Nang-y pãng tigisgã pʋgẽ!
Nang-y pãng tigisgã pʋgẽ!
“Neb nins sẽn bʋt ne nintãma na n tigsa ne sũ-noog yɩɩla.”—YƖƖL SÕAMYÃ 126:5.
1. Bõe yĩng tɩ d segd n “kos tigisga soaba tɩ b tʋm tigisdba tɩ b kẽng bãmb tigisgã” rũndã-rũndã?
A ZEZI KIRIST sẽn gilg naoor a tãab-n-soab n moon Galile wã poore, a togsa a karen-biisã woto: “Tigisg yaa wʋsgo la tigisdba yaa bilfu.” (Matɩe 9:37) Zide me ra yaa woto. (Luk 10:2) Sẽn mik tɩ ra yaa woto sẽn pẽneg yʋʋm 2 000 sẽn loogã, yaa wãn to yẽ rũndã-rũndã? Be neere, rɩẽ koe-moonegã sasa, sẽn yɩɩd a Zeova Kaset rãmb 6 000 000 n nang pãng tẽebã tigisg pʋgẽ dũniyã neb 6 000 000 000 sʋka, tɩ nin-bãmb wʋsg ‘sũyã sãam wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.’ Woto yĩnga, a Zezi sẽn sagl tɩ b “kos tigisga soaba tɩ b tʋm tigisdba tɩ b kẽng bãmb tigisgã” tara yõod rũndã wa a sẽn da tar yõod yʋʋm kob-gĩnã sẽn loogã sasa.—Matɩe 9:36, 38.
2. Bõe yĩng tɩ dũniyã nebã gomd tõnd yellẽ?
2 Wẽnnaam a Zeova sẽn yaa tigisgã Zusoabã reega pʋʋsgã sẽn kot tɩ b tʋm tʋm-tʋmdb n paasã. La ad sɩd yaa sũ-noog meng tɩ d naag n tʋm tigisgã tʋʋmd Wẽnnaam sẽn wilgd sorã! Baa tõnd sõorã sẽn paoode, b sã n mak-d ne tẽnsã neb sõore, dũniyã neb nee tõnd sẽn kẽesd d meng ne yẽesem n moond Rĩungã la d maand karen-biisã. Tẽns wʋsg pʋsẽ, kɩba-kɩtbã gomda tõnd yelle. Televiziõ pʋgẽ b sã n wẽ sallem, filmã pʋgẽ nebã tõeeme n yeel tɩ ya a Zeova Kaset rãmbã n wa. N-ye, tõnd sẽn yaa kiris-nebã, b mii tõnd tẽeb tigisgã tʋʋmd yʋʋm kob-gĩnd 21 soabã pʋgẽ sõma.
3. a) Wãn to la d mi tɩ pipi yʋʋm kob-gĩndẽ wã nebã ra nee b sẽn moond Rĩungã? b) Bõe yĩng tɩ d tõe n yeel tɩ malɛgsã sõngda tõnd d koe-moonegã pʋgẽ?
3 Pipi yʋʋm kob-gĩndẽ wã dũniyã neb ra nee b sẽn moond Rĩungã, hal tɩ b nams koe-noogã moondba. Rẽ n kɩt tɩ tʋm-tʋmd a Poll gʋls woto: “Ne mam tagsgo, a wẽnda wa Wẽnnaam kɩtame tɩ tõnd sẽn yaa tʋm-tʋmdba lebg yaoolem dãmb neba sʋka, la tõnd yaa neb nins b sẽn kao b bʋʋdo tɩ b zems kũum; tɩ bõe, tõnd [tʋm-tʋmdbã] yaa bõn-gets ne dũniyã la ne malɛk rãmba la ne ninsaalba me.” (1 Korẽnt dãmba 4:9) Woto me, tõnd sẽn yaa Rĩungã koe-moondbã, d sã n nang pãng baa ne b sẽn namsd tõnd d tẽebã yĩngã, kɩtdame tɩ dũniyã neb neẽ, la rẽ yaa bũmb sẽn pak malɛgsã. Wilgri 14:6 yetame: “Mam [tʋm-tʋmd a Zã] yãa malɛk a to sẽn yɩgd n pɩʋʋgd arzãna, la a tara Koenoog sẽn ka sɛta n na n moon neb nins sẽn be dũniyã soolem fãa la buud fãa la goam toɛ-toɛya fãa la neba fãa.” N-ye, malɛgsã sõngda tõnd d koe-moonegã pʋgẽ, sẽn dat n yeel tɩ d tigisgã pʋgẽ!—Hebre dãmba 1:13, 14.
‘B kis-d lame’
4, 5. a) Keoog bʋg la a Zezi kõ a karen-biisã? b) Bõe yĩng tɩ b ‘kis’ Wẽnnaam rũndã-rũndã sõgen dãmbã?
4 A Zezi sẽn wa n tʋm a tʋm-tʋmdbã tɩ b tɩ maan tigisgã, b saka a noorã n ‘paam yam wa wiisi, n yɩ sõama wa wala.’ A Zezi paasame: “Gũus-y yãmb mens ne nebã, tɩ bõe, bãmb na n talla yãmb n kẽng bʋʋd zĩisi, la b na n pãba yãmb ne kal-waas b karen-dotẽ. B na n talla yãmb n kẽng guverneer dãmb ne rĩm dãmb taoore mam yĩnga, tɩ yɩ kaseto bãmb ne neb sẽn ka pʋʋsd Wẽnnaama yĩnga. . . . Neba fãa na n kisga yãmb mam yʋʋrã yĩnga, la ned ninga sẽn na n tall a tẽeb makr pʋgẽ hal tɩ wakat ta, a na paam fãagre.”—Matɩe 10:16-22.
5 B ‘kisa’ tõnd rũndã-rũndã, ‘dũniyã fãa sẽn be wẽng soab’ a Sʋɩtãan Munaafɩɩk sẽn yaa Wẽnnaam la a nin-buiidã bɛ kãseng nugẽ wã yĩnga. (1 Zã 5:19) Tõnd bɛɛbã nee bark ning tõnd sẽn tar tẽebã wɛɛngẽ wã, la b pa rat n sak n deeg tɩ rẽ yita a Zeova nengẽ ye. Kɩɩsdbã nee tõnd sũ-noogã, tõnd nen-wamã sẽn pukd sũ-noogo, d sã n wa tʋmd tigisgã tʋʋmdã. Tõnd zems-n-taarã sɩd yɛɛsd-b lame! Sɩda, tõe tɩ b sakd n deega woto tɩ pa tũ ne b yam, b sã n wa tog sor tẽn-zẽng n tɩ mik t’a Zeova Kaset rãmbã tʋmda tʋʋmd ning bãmb sẽn yã b ba-yirã. Sɩda, tõnd miimi tɩ wakat sẽn zems sasa, a Zeova sẽn yaa tõnd tɛɛnd la d zems-n-taarã yẽgrã na n kɩtame t’a bɛɛbã meng bãng-a.—Ezekɩɛll 38:10-12, 23.
6. Bas-m-yam bʋg la d tara, d sẽn kẽesd d meng tigisgã pʋgẽ wã, la rẽ wata ne sʋk-bʋgo?
6 Tigisgã Zusoab kõo a Biribl a Zezi Kirist “pãng fãa sẽn be arzãna la sẽn be dũniyã.” (Matɩe 28:18) Woto, a Zeova yãka a Zezi t’a ges tigisgã yelle, la a tũnugda ne malɛgsã la ‘tʋm-tʋmd sẽn tũud sɩd la sẽn tar yamã’ sẽn paam vʋʋsem sõng zaeeb sẽn be tẽng zug ka wã. (Matɩe 24:45-47; Wilgri 14:6, 7) La wãn to la d tõe n mao ne bɛɛbã kɩɩsg n yaool n ket n tar d sũ-noogã, n nangd pãng tigisgã pʋgẽ?
7. Yam bʋg la d segd n modg n talle, b sã n wa kɩɩsd tõnd bɩ b namsd tõndo?
7 B sã n wa kɩɩsd tõnd bɩ n namsd tõnd vẽeneg d tẽebã yĩnga, bɩ d bao Wẽnnaam sõngre, sẽn na yɩl n kell n tall tagsg ning a Poll sẽn tallã. A gʋlsame: “B sẽn gomd tõnd wẽngã, tõnd ningda barka; tõnd sẽn paamd namsgã, tõnd sakdame; b sẽn kãnegd tõndã, tõnd sagenda ne belsg goama.” (1 Korẽnt dãmba 4:12, 13) D sã n tar yam kãng la d moond koɛɛgã zãma sʋk ne gũusgu, wakat ninga a tõe n toeema tõnd bɛɛbã manesem.
8. Bas-m-yam bʋg la a Zezi goam nins sẽn be Matɩe 10:28 pʋgẽ wã kõt yãmba?
8 Baa b sã n yet tɩ b na n kʋʋ tõndo, rẽ meng pa boogd tõnd yẽesmã tigisgã tʋʋmd pʋgẽ ye. D moonda Rĩungã koɛɛg zĩig fãa wa d sẽn tõe tɛk n pa zoet rabeem ye. Sẽn paase, a Zezi gom-kãensã kõta tõnd bas-m-yam sẽn kengd raoodo: “Bɩ y ra zoe neb nins sẽn kʋʋd yĩngã, la b ka tõe n kʋ sɩɩga ye. Sẽn yɩɩda bɩ y zoe sẽn tõe n sãama sɩɩga ne yĩng a yiib fãa bug-tẽngã.” (Matɩe 10:28) Tõnd miimi tɩ d saasẽ Ba wã yaa vɩɩm Kõta. A keooda neb nins sẽn tar burkĩndlem ne-a, la b nangd pãng tigisgã pʋgẽ ne kɩs-sɩdã.
Koɛɛg sẽn fãagd yõyã
9. Manesem bʋg la kẽer tall ne a Ezekɩɛll goamã, la wãn to la bũmb sẽn wõnd woto maand rũndã-rũndã?
9 No-rɛɛs a Ezekɩɛll sẽn moon a Zeova koeesã ne raood n taas-b ‘nin-tõtsã buud’ sẽn yaa Israɛll rĩmd piigã la Zida wã, neb kẽer la a koɛɛgã yɩ noogo. (Ezekɩɛll 2:3) A Zeova yeelame: “Ne bãmba, fo yaa wa ned sẽn tar koko noog n yɩɩnd n wẽed konde.” (Ezekɩɛll 33:32) Baa ne b sẽn da nong a Ezekɩɛll goamã, b pa tũ-b ye. Yaa wãn to yẽ rũndã-rũndã? Kellã sẽn zaeyã la b tũud-n-taasã sã n moond a Zeova koeesã ne raoodo, kẽer nong n kelgda bark nins Rĩungã sẽn na n wa ne wã, la b pa sakd n lebg karen-biis n naag tigisgã pʋgẽ ye.
10, 11. Yʋʋm kob-gĩnd 20 soabã pipi babgẽ, yaa bõe la b maan n moon koɛɛg sẽn fãagd yõyã, la a biisã yɩɩ bõe?
10 Sẽn yaa lebende, wʋsg saka tigisgã tʋʋmd boolle, n naag n moon Wẽnnaam koeesã. Kiris-neb tigis-kãsems sẽn pʋg taab sẽn sɩng yʋʋmd 1922 n tɩ ta yʋʋmd 1928 wã sasa, wala makre bʋ-kaoor koees la b moon a Sʋɩtãan dũniyã zãmaan wẽng zug vẽenega. Radio rot n moon bãong pukr kãens b sẽn togs tigis-kãsems kãens sasa wã. Rẽ poore, Wẽnnaam nin-buiidã pʋɩɩ sɛb tus-kẽema sẽn gomd rẽ yelle.
11 Yʋʋmd 1940 sẽn wa n kolgdẽ, b kõo kasetã ne manesem a to. Yaa sũ taab n kẽn n kõ kasetã soayã zutã. Pipi wã a Zeova nin-buiidã ra gʋlsda zãma sõssã gom-zut b sẽn na n wɛgsã n ning seb-bɛd zut n tabl b mensã, taoor la poor tɩ nebã tõe n karem. Kaoosg poore, b tũnuga ne manesem kãng n taas koees wala “Tũudmã yaa bẽdg la zãmb-n-dɩ,” la “Sõgen-y Wẽnnaam la Kirist sẽn yaa Rĩmã.” Kaset rãmbã sẽn da wa sũ taab n kẽnd soayã zutã, so-loaadbã gesa wʋsgo. ‘Rẽ kɩtame tɩ b bãng a Zeova Kaset rãmbã sõma, tɩ rẽ kõ-b raood n paase,’ woto la saam-biig sẽn da lagemd wakat fãa n maand tʋʋm-kãngã soayã zut Lõndr sẽn be Ãngeletɛɛrã yeel-yã.
12. Wẽnnaam bʋ-kaoorã koees toor sẽn ka be, bõe la d wilg wʋsg d koe-moonegã pʋgẽ, la masã ãnd dãmb n lagemd n moond koe-noogã?
12 D sẽn moond Wẽnnaam bʋ-kaoorã koeesã sasa, tõnd me ratame tɩ b bãng bark nins Rĩungã sẽn na n wa ne wã. Tõnd sẽn kõt kasetã ne raood dũniyã gill neb taoorã sõngda tõnd tɩ d bao neb nins sẽn zemsã. (Matɩe 10:11) Sẽn zae-bã sull yaoolem dãmbã wʋsg sẽn yɩɩd saka tigisgã booll yʋʋmd 1920 n digd yʋʋmd 1940 sʋk sasa. La tigis-kãsengẽ b sẽn maan yʋʋmd 1935, kɩba-kãseng sẽn tɩ loe ne beoog-daar sẽn be bark n kõ ‘piis a taabã’ ‘kʋʋng kãseng’ tẽng zug arzãnã pʋgẽ n zĩndi. (Wilgri 7:9; Zã 10:16) B tũu Wẽnnaam bʋ-kaoorã koees n tall zems-n-taar ne sẽn zae-bã n moond koe-noogã sẽn fãagd yõyã.
13, 14. a) Bels-bʋg la Yɩɩl Sõamyã 126:5, 6 tõe n kõ tõndo? b) Tõnd sã n ket n bʋtẽ la d zagsd koom, na n wa baasa ne bõe?
13 Goam nins sẽn be Yɩɩl Sõamyã 126:5, 6 pʋgẽ wã kõta Wẽnnaam tigisdbã belsg kãsengã, sẽn yɩɩd fãa neb nins sẽn namsd b tẽebã yĩngã. Be b yetame: “Neb nins sẽn bʋt ne nintãma na n tigsa ne sũ-noog yɩɩla. Ned ninga sẽn zãad bʋd-gẽbga n yit n kẽnd ne yãbrã, a na n leb n waa ne sũ-noog yɩɩla n tʋk a ka-kila.” Yɩɩl gʋlsdã sẽn gom bʋdb la kẽebg yellã wilgdame t’a Zeova gesa kellã sẽn yi pĩnd Babilonã yembdã n wa wã yelle, la a ning-b barka. B sũy yɩɩ noog wʋsg b sẽn yiis-b yembdẽ wã, la tõe tɩ b yãba b sẽn da wa n bʋt tẽng sẽn kʋɩ zug b sẽn da pa ko b yʋʋm 70 yembdã sasa. Baasg zãnga, neb nins sẽn nang pãng ne bʋdbã rɩɩ b tʋʋm-toogã yõod la b paam sũ-noog a pʋgẽ.
14 D tõe n daaga nintãm, d sã n wa be makr pʋgẽ, bɩ tõnd bɩ d tẽed-n-taas sã n namsd a bʋʋm zugu. (1 Pɩɛɛr 3:14) Tõnd tigisgã pʋgẽ, sɩngrã tõe n yɩɩ toogo, bala d modga koe-moonegã pʋgẽ n yaool n pa tar bũmb sẽn wilgd tɩ woma biis ye. La d sã n ket n bʋtẽ la d zagsd koom, Wẽnnaam na n kɩtame tɩ bɩ, naoor wʋsgo a na n maana woto tɩ zʋʋg tõnd sẽn gẽegdã. (1 Korẽnt dãmba 3:6) Makr ne rẽ yaa Biibl dãmbã la sɛb nins sẽn tik Biiblã zug tõnd sẽn pʋtã sẽn womd biis ninsã.
15. Rɩk-y makr sẽn wilgd tɩ kiris-neb sɛbã tara yõod tigisgã pʋgẽ.
15 D rɩk rao sẽn boond t’a Jim makrã. A ma wã sẽn wa n ki wã, a teedã sʋka a yãa sebr ning gom-zug sẽn yaa La vie : comment est-elle apparue ? Évolution on création ? * A karma sebrã ne yamleoogo. Kaset soab n sõs ne-a sor zugu, t’a Jim sak t’a lebg n wa ges-a, la rẽ wa n baasa ne Biibl zãmsgo. A Jim bɩɩ tao-tao tẽebã wɛɛngẽ, n dɩk a meng n kõ a Zeova n deeg lisgu. A togsa a zakã neb a taab bũmb ning a sẽn zãmsã. Rẽ kɩtame t’a ba-biig ne a ba-bi-poak lebg a Zeova Kaset rãmba. Rẽ poore, a Jim paama zu-noog n tɩ tʋm Lõndr Betɛllẽ wã wa yamleoog tʋm-tʋmda.
B namsd-b lame tɩ b yaoog n tar sũ-noogo
16. a) Bõe yĩng tɩ tigisgã wom bi-sõma? b) A Zezi yeelame tɩ d bãng tiir tɩ nebã manesem na n yɩɩ wãn to koe-noogã taoore, la yaa ne yam bʋg la tõnd gomd ne nebã?
16 Bõe yĩng tɩ tigisgã wom bi-sõma woto? Bala kiris-neb nins sẽn zaeyã ne b tũud-n-taasã tũu a Zezi no-kãensã: “Bũmb ninga mam sẽn togs yãmb likẽ, bɩ y togs vẽenemẽ, la bũmb ninga sẽn walem yãmb tʋbẽ, bɩ y moon dot zutu.” (Matɩe 10:27) La yaa d bãng tɩ toog tõe n wa waame, bala a Zezi keooga woto: “Neb kẽer na n kɩtame tɩ b kʋ b ba-biisi, la ba rãmb na n maana b kamb woto, la kamb me na n kɩɩsa b ba rãmb ne b ma rãmb n kɩt tɩ b kʋ-ba.” A Zezi paasa woto: “Bɩ y ra tags tɩ mam waame tɩ laafɩ zĩnd ye, mam waame tɩ sʋʋg zĩndi.” (Matɩe 10:21, 34) A Zezi ra pa tʋll n welg zagsã ye. La wakat ninga yaa rẽ la koe-noogã maan-yã. Yaa woto me ne Wẽnnaam sõgen dãmbã rũndã-rũndã. Tõnd sã n tʋgd n sõsd ne zagsã nebã, d pa tʋll n welg-b ye. Tõnd ratame tɩ zakã ned fãa sak koe-noogã. Yaa rẽ n kɩt tɩ tõnd gomd ne zakã neb fãa ne sõmblem la ne zoodo, sẽn kɩtd tɩ tõnd koɛɛgã be yamleoog ne “neb nins fãa sẽn [dat] n paam vɩɩm sẽn ka sɛta.”—Tʋʋma 13:48.
17. Wãn to la neb nins sẽn teend Wẽnnaam naam sẽn-ka-to wã welg toore, la makr ne rẽ yaa bʋgo?
17 Rĩungã koɛɛg welga neb nins sẽn teend Wẽnnaam naam sẽn-ka-to wã toore. Wala makre, ges-y tõnd koe-moond-taas sẽn wilg tɩ b yaa toore, b sẽn ‘kõ Sezaar bũmb nins sẽn yaa Sezaar dẽnda, la b kõ Wẽnnaam bũmb nins sẽn yaa Wẽnnaam dẽndã’ Nasional Sosialismã zãmaanẽ Alemayn tẽngã. (Luk 20:25) Sẽn yaa lebend ne tũudmã nanambs la kiris-neb ne yʋʋrã sẽn be dũni kiris-nedemdã egiliiz rãmbã pʋsẽ wã, a Zeova sõgen dãmbã yalsa kãn-kãe, n zãgs Biiblã noy kɩɩsgo. (Ezai 2:4; Matɩe 4:10; Zã 17:16) Porfesɛɛr a Christine King yeela woto a sebrã (L’État nazi et les nouvelles religions, ãngil.) pʋgẽ: “Yaa Kaset rãmbã bal la [Nazi rãmbã] goosneema wã pa tõoge, bala baa ne b sẽn kʋ neb tusa wã, tʋʋmdã kẽnga taoore, t’a Zeova Kaset rãmbã siglg ra ket n kẽngd taoor yʋʋmd 1945, sig-noy kiuugã, tɩ Nasional Sosialismã yaool n da ka be ye.”
18. Yam bʋg la a Zeova nin-buiidã tar baa ne b sẽn namsd-b b tẽebã yĩngã?
18 A Zeova nin-buiidã sẽn tall manesem ning b bɛɛbã namsg taoorã sɩd yaa kãsenga. Baa ne tẽn-soaadbã sẽn tõe n yã tɩ tõnd tara tẽeb kãsengã, lingd-b lame, b sẽn ne tɩ tõnd pa tar tags-wẽns la sũ-dokr yamã. Wala makre, Kaset rãmb nins sẽn põs kũum Nazi rãmbã nugẽ wã nong n wilgda b sũ-noog b sã n tẽeg yɛl nins b sẽn vɩɩmdã. B miimi t’a Zeova kõ-b-la “pãng ning sẽn yɩɩd pãn-zaalgã.” (2 Korẽnt dãmba 4:7, NW ) Sẽn zae-bã sẽn be tõnd sʋkã tara kɩs-sɩd tɩ ‘bãmb yʋya gʋlsa arzãna.’ (Luk 10:20) B tõog-toogã wata ne saagr sẽn pa sãamd sũur ye. Tigisdb nins sẽn tar kɩs-sɩd sẽn saagd n na n vɩɩmd tẽng zugã me kɩsa sɩd woto.—Rom dãmba 5:4, 5.
Nang-y pãng tigisgã pʋgẽ
19. Manesem bʋs sẽn wom biis la kiris-nebã tũnug ne n moon koe-noogã?
19 D gũ n ges a Zeova sẽn na n bas tɩ tõnd tʋm tẽeba tigisg tʋʋmd tɩ ta wakat ningã. La nananda, yaa d ning d yamẽ tɩ tigisdbã tara manesem takɩ b sẽn tũnugd n maand b tʋʋmdã. Woto me, d tõe n kɩsa sɩd tɩ d sã n tũnug ne manesem nins sẽn yɩ sõma wã, d moonegã na n woma biisi. A Poll yeela a kiris-nin-taasã: “Dẽ yĩnga, mam kota yãmba tɩ y yɩ mam togs-n-taase.” (1 Korẽnt dãmba 4:16) A Poll sẽn da wa n seg Efɛɛz kãsem dãmbã Mile wã, a tẽeg-b lame t’a ra zãms-b-la “neba sʋka la rot pʋsẽ.” (Tʋʋma 20:20, 21) A Tɩmote sẽn maan tũud-n-taar ne a Poll sẽn yaa tʋm-tʋmdã bãnga a sẽn da zãmsd nebã to-to. Yaa woto yĩng la a sẽn da tõe n wilg Korẽnt dãmbã. (1 Korẽnt dãmba 4:17) Wẽnnaam ninga a Poll moonegã manesem barka. Woto me, a na n ninga tõnd nang pãngã koe-moonegã pʋgẽ wã barka, zãma sʋk la zak-zakã, d lebg n tɩ ges rãmbã, d Biibl zãms rãmbã la d sẽn debd zĩig ning fãa d sẽn tõe n yã nebã.—Tʋʋma 17:17.
20. Wãn to la a Zezi wilg tɩ tẽeb tigisg wʋsg n da wate, la wãn to la sɩd yɩ woto yʋʋm sẽn pa kaoosã pʋgẽ?
20 A sẽn moon Samari poak sẽn pẽ Sisaar yʋʋmd 30 T.W., a Zezi goma tẽeb tigisg yelle. A yeela a karen-biisã: “Bɩ y zẽk y nens n gese pʋtã, tɩ bõe, bãmb pelgame n ta tigsg masã. Ned ninga sẽn tigsda, a paamda yaoodo n wʋkd biis n bĩngd vɩɩm sẽn ka sɛta yĩnga, tɩ sẽn bʋta wã ne sẽn tigisda wã fãa na n lagem n paama sũ-noogo.” (Zã 4:34-36) Tõe t’a Zezi ra zoe n yãa a sõsgã biis ne Samari poakã, bala neb wʋsg n da talld tẽeb ne-a pagã kaset yĩnga. (Zã 4:39) Yʋʋm sẽn pa kaoosã pʋgẽ, tẽns toɛy-toɛy n yãk gɩdgr nins b sẽn da gɩdg a Zeova Kaset rãmbã, bɩ n sak n kõ-b-la sor tɩ zems ne laloa wã, tɩ woto pak sor tɩ b tʋm tigisgã tʋʋmd zĩ-zẽmse. Rẽ kɩtame tɩ tẽeb tigisg sẽn yaa kãseng maand n kẽngd taoore. Sɩda, dũniyã gill zugu, bark wʋsg la d paamda, d sẽn ket n kẽngd taoor tẽebã tigisg pʋgẽ wã.
21. Bõe yĩng tɩ d segd n nang pãng tigisgã pʋgẽ ne sũ-noogo?
21 Kood sã n bɩ n dat tigisgu, tigisdbã pa segd n bas tɩ kaoos la b maan tigisgã ye, b segd maana tao-tao. Rũndã-rũndã, d segd n tʋma wʋsg ne yãgbo, bala d vɩɩ “sɛɛba wakate.” (Daniɛll 12:4) N-ye, d segda zu-loeese, la a Zeova balemdb wʋsg la b tigisd n yɩɩd pĩndã. Woto yĩnga masã yaa sũ-noog wakate. (Ezai 9:2) Woto, d sẽn yaa tʋm-tʋmdb sẽn tar sũ-noogã, bɩ d nang pãng tigisgã tʋʋmdẽ!
[Tẽngr note]
^ sull 15 Ya a Zeova Kaset rãmbã n maan seb-kãngã la b pʋɩ-ya.
Wãn to la y na n leokẽ?
• Wãn to la tigisgã Zusoab reeg kosg ning b sẽn maan tɩ b wa ne tigisdb n paasã?
• Baa ne b sẽn ‘kis’ tõndã, yam bʋg la d ket n tarẽ?
• Bõe yĩng tɩ d tar sũ-noogo, baa b sã n namsd tõndo?
• Bõe yĩng tɩ d segd n nang pãng tigisgã pʋgẽ ne yãgbo?
[Zãmsgã sogsgã]
[Foto, seb-neng 15]
Neb wʋsg yãa Kaset rãmbã sẽn sũ taab n kẽn soayã zut n moon koe-noogã
[Foto, seb-neng 15]
Tõnd bʋtame la d zagsd koom, la yaa Wẽnnaam n kɩtd tɩ bɩtẽ
[Foto rãmba, seb-neng 16, 17]
Malɛgsã sõngda neb nins sẽn kẽ tẽebã tigisg pʋgẽ wã