Sor ning y sẽn tar n na n tẽ y sẽn datã

Sãmbg sẽn ka be, y nonga y sẽn tar sor ning n tõe n tẽ bũmb ning fãa y sẽn datã. Yaa woto me ne nebã fãa la bala. Tẽngã neb milyaar a yoobã sẽn tũnugd ne so-kãng b sẽn tarã waa ne tẽeb buud toor-toor sẽn pa tõe n bãng n bilgi. Wala bõn-yoodã kõbgo, b wõnegã, b halhaalã, b noomã, b yũugã, la bʋrg ning d sẽn wʋmd ãndũniyã pʋgẽ wã sẽn yaa toor-toorã, tẽeb toor-toor nong n nekda nebã ratem n paasdẽ, la a paasd b sũ-noogã. Yel-kãens sẽn yaa toɛy-toɛyã sɩd tõe n kɩtame tɩ vɩɩmã tall yamleoogo.—Yɩɩl Sõamyã 104:24.

LA YAA d gũusi. Tẽeb kẽer pa toor bal ye, b yaa yell me. Wala makre, yʋʋm kob-gĩnd 20 soabã sɩngrẽ, neb kẽer wa n tẽedame tɩ Zʋɩf rãmbã la Frãmasõ rãmbã ra geendame n na n “lub kiris-nedemdã n soog dũniyã.” Bũmb a ye sẽn kɩt tɩ b tẽed woto yaa seb-vãoog (Protocols of the Learned Elders of Zion) goam sẽn dat tɩ b kisg Zʋɩf rãmbã. Seb-vã-kãng ra yetame tɩ b ra geendame me n na n paas lampo rãmbã tɩ looge, n paas zab-teedã yiisgu, la tɩ b ratame n maan sosiete sẽn na n soog fãa tɩ ‘Buzẽmsã arzɛk sa zĩig pʋgẽ.’ B ra tagsdame me tɩ yaa sẽn na yɩl n toeem karengã tɩ ‘Buzẽmsã neb lebg wa we-rũms sẽn pa tagsde,’ la b maan tẽr dãmb sẽn be tẽngã tẽngr meng n tõgen na-tẽnsã ne taab tɩ Zʋɩf rãmbã kãsem dãmb ‘tõog bɛ buud fãa n menems-a.’

Yaa vẽeneg tɩ woto ra yaa zɩlem-beedo, sẽn da rat tɩ nebã kisg Zʋɩf rãmbã wʋsgo. A Mark Jones sẽn tʋmd British Museum yeta woto: ‘Seb-vã-kãngã sẽn tusd nebã tɩ b kisg Zʋɩf rãmbã yelga Risi.’ Yaa be la b ning-a zʋrnall pʋgẽ pipi yʋʋmd 1903. B ning-a-la Lõndr zʋrnall sẽn boond tɩ The Times pʋgẽ yʋʋmd 1920, sig-noy kiuug rasem a 8. Sẽn yɩɩd yʋʋm-yɛng poore, The Times wilgame tɩ seb-vãoogã sẽn da togsã yaa ziri. La rẽ t’a ra zoe n maana yelle. A Jones yeelame tɩ ‘Yaa toog tɩ b yiis zɩlem-beed a woto buudu.’ Nebã sã n sak-a n sa, zɩlem-beedã wata ne tẽeb sẽn pa sɩd lɛ-lɛ, zẽnem, la tẽeb sẽn yaa yelle, naoor wʋsgo a biisã yaa wẽns wʋsgo, wala yʋʋm kob-gĩnd 20 soabã yɛl sẽn wilgã.—Yelbũna 6:16-19.

D mak d sẽn tẽedã ne sɩdã n gese

D tõe n wa tẽeda sẽn pa sɩd tɩ pa tũ ne d raab ye. Wakat ninga, yaa yɛlã võor la d wʋmd kɛgr bala. Neb wʋsg yõe n yɩ koeese, b sẽn maan bũmb n da tẽed tɩ yaa tɩrgã. Sẽn paase, d nong n tẽeda bũmbu, d sẽn dat n tẽ-a wã yĩng bala. Porfesɛɛr a yembr yeelame tɩ baa bãngdb bɛdã “nonga b mensã tagsg tɩ loog naoor  wʋsgo.” B sẽn tẽed bũmb ninsã luta b yamã tɩ b ye pa tagsd tɩrg ye. Woto yĩnga, b tõe n dɩka b vɩɩmã tõr n bao n na n wilg zaalem tɩ tẽeb sẽn yaa kɛgr yaa sɩda.—Zeremi 17:9.

Yɩɩ woto ne tũudmã tẽebo. Rẽ wɛɛngẽ wã, tẽeb sẽn kɩɩsd taabã tara pãnga. (1 Tɩmote 4:1; 2 Tɩmote 4:3, 4) Ned tõe n tara tẽeb wʋsg ne Wẽnnaam. Tɩ ned a to yeel tɩ nin-kãng “tẽeda bũmb sẽn ka võor” bala. Tɩ nina yetẽ bal tɩ f tara sɩɩg sẽn pa kiid sẽn vɩ f kũum poore. Tɩ ned a to tẽed tɩ f sã n ki, f ye pa be ye, saa zãng fasɩ. Vẽenega, tẽeb sẽn kɩɩsd taab woto fãa pa tõe n yɩ sɩd ye. Rẽ yĩnga, pa yam bũmb tɩ y sɩd bao n bãng vẽeneg tɩ y sẽn tẽed bũmb ningã sɩd yaa sɩda, la tɩ pa yãmb sẽn dat n tẽ-a wã yĩng bala? (Yelbũna 1:5) Wãn to la y tõe n maan woto? Sõsg ning sẽn pʋgdã na n vaeesa rẽ.

[Foto, seb-neng a 3]

Sõsg sẽn yi yʋʋmd 1921 wã sẽn wilgd “Protocols of the Learned Elders of Zion”