A Abrahaam yaa mak-sõng tẽeba wɛɛngẽ
A Abrahaam yaa mak-sõng tẽeba wɛɛngẽ
‘A Abrahaam yaa moos nins fãa sẽn tẽeda ba.’—ROM DÃMBA 4:11.
1, 2. a) Wãn to la kiris-neb hakɩkã tẽr a Abrahaam yell rũndã-rũndã? b) Bõe yĩng tɩ b boond a Abrahaam tɩ ‘moos nins fãa sẽn tẽedã ba’?
A YƖƖ buud sẽn tar pãng yaaba, no-rɛɛsa, lɛɛbd la taoor lʋɩta. La rũndã-rũndã kiris-nebã tẽra a yell wa tẽeb sẽn pa vigsd soaba. Yaa tẽeb kãng n kɩt tɩ Wẽnnaam a Zeova ges-a wa a zoa. (Ezai 41:8; Zak 2:23) A yʋʋrã la a Abrahaam, la Biiblã boond-a lame tɩ “moos nins fãa sẽn tẽeda ba.”—Rom dãmba 4:11.
2 La neb sẽn deng a Abrahaam wa a Abɛll, a Enok la a Nowe pa wilg tẽeb sɩda? N-ye, la yaa ne a Abrahaam la b maan kaool n na n ning tẽngã buud fãa barka. (Sɩngre 22:18) Woto, makr wɛɛngẽ, a lebga neb nins fãa sẽn da na n tall tẽeb ne Yagengã ba. (Galat dãmba 3:8, 9) Woto, rẽnd d tõe n gesa a Abrahaam wa tõnd ba, bala a tẽebã yɩɩ mak-sõng d sẽn segd n dɩk togs-n-taar ne. B tõe n gesa a vɩɩmã fãa wa tẽeb pukri, bala a tẽebã sega makr wʋsgo. Sɩda, a Abrahaam sẽn da nan pa seg a tẽebã makr ning sẽn yɩ toaag n yɩɩgã, sẽn dat n yeel tɩ Wẽnnaam sẽn da nan pa kõ-a noor t’a rɩk a biribl a Izaak n maan maoongã, a Abrahaam da zoe n wilga a tẽeb makr wʋsg toom sẽn pa ta woto pʋsẽ. (Sɩngre 22:1, 2) Masã, bɩ d vaees mak-kãensã sẽn deng n wa a tẽebã zugã n ges zãmsg ning rẽ sẽn tõe n kõ tõnd rũndã-rũndã.
B kõ-a-la noor t’a yi Ur tẽngã
3. Bõe la Biiblã yet a Abram zakã neb vɩɩm wɛɛngẽ?
3 Biiblã goma a Abram (b sẽn wa n boond kaoosg zugẽ t’a Abrahaama) yell Sɩngre 11:26 pʋgẽ. B yeela be woto: “A Teera sẽn ta yʋʋm pis-yopoe, yẽ yaool n doga a Abram ne a Nahoor la a Harã.” A Abram da yaa wẽn-zoɛt a Sɛm yagenga. (Sɩngre 11:10-24) Sã n yaa ne Sɩngre 11:31, a Abram vɩɩmda ne a zakã rãmb “Ur sẽn be Kalde soolma.” Yɩɩ galʋ-tẽng sẽn da tar arzɛka, sẽn da be Efrat kʋɩlgã yaanga. * Woto, a ra pa bɩ fu-rotẽ, n toeemd zĩig wakat fãa ye, la a ra yaa ned sẽn be zĩ-yende, galʋ-tẽng pʋgẽ tɩ vɩɩmã ra yaa naar wʋsg vɩɩm. Teed n da yit zĩis a taab n wat Ur daasẽ wã tɩ b tõe n da-ba. Galʋ-tẽngã ra pida ne ro-bɛd sẽn maneg sõma n yaa neeba.
4. a) Bõe yĩng tɩ ra pa nana ne sɩd Wẽnnaamã balemdb tɩ b vɩɩmd Ur tẽngã pʋgẽ? b) Wãn to la a Abram wa n tẽ a Zeova?
4 Ur arzɛkã sẽn yãk a toogo, ra pa nana ne ned ning fãa sẽn da rat n tũ sɩd Wẽnnaamã beenẽ ye. Ra yaa galʋ-tẽng sẽn fõr n kẽ wẽn-naands pʋʋsg la tẽeb ziri pʋgẽ. Sɩda, galʋ-tẽngã ro-zãnts sẽn yɩɩdã ra yaa pʋʋsg rot b sẽn da balemdẽ a Naana sẽn makd kiuugã. Sãmbg sẽn ka be, b ra pẽdgda a Abram t’a maan baleng sẽn yaa rẽgd a woto, tõe t’a roagdb kẽer da pẽdgd-a lame t’a maan woto. Sã n yaa ne Zʋɩf rãmbã sẽn nong n yetẽ, a Abram ba a Teera mengã ra yaa bõn-naands maanda. (Zozue 24:2, 14, 15) Sẽn yaa to-to fãa, a Abram da pa maand baleng sẽn yaa rẽgd ye. A yaab a Sɛm sẽn da kʋʋlã ra ket n vɩɩme. Rẽnd sãmbg sẽn ka be, a zãms-a-la yɛl nins a sẽn da mi sɩd Wẽnnaamã wɛɛngẽ wã. Rẽ kɩtame t’a Abram tall tẽeb ne a Zeova, la pa wẽnd a Naana ye!—Galat dãmba 3:6.
Tẽeb makre
5. A Abram sẽn da wa n ket Ur tẽngã, Wẽnnaam kõ-a-la no-bʋgo, la a kãab-a-la bõe?
5 B ra segd n maka a Abram tẽebã. Wẽnnaam vẽnega a meng ne-a n kõ-a noor woto: “Yik n bas f tẽnga ne f buudã la f yirã n kẽng tẽng ninga mam sẽn na n wilg fooma. Mam na n kɩtame tɩ f lebg buud sẽn yaa kãseng ba; la mam na n ninga f zug barka n kɩt tɩ f yʋʋr yɩ kãsenga, la fo na n waa ne barka. Neb nins sẽn ningd fo zug barkã, mam na n ninga bãmb dãmb zut barka, la neb nins sẽn kãabd foom wẽngã, mam na n kãaba bãmb dãmb wẽnga. La dũniyã buud fãa na n paama bark fo yĩnga.”—Sɩngre 12:1-3; Tʋʋma 7:2, 3.
6. Bõe yĩng t’a Abram da segd n paam tẽeb meng-meng n tõog n yi Ur?
6 A Abram da kʋʋlame n ket n pa tar biig ye. Wãn to la b ra na n kɩt t’a lebg “buud sẽn yaa kãseng[a]”? La pʋd n da yaa tẽn-bʋg meng pʋgẽ la b sẽn da yeel-a t’a kẽngã? Wẽnnaam pa togs-a rẽ wẽnd ye. Woto yĩnga, a Abram da segd n talla tẽeb hakɩk n tõog n yi n bas Ur la naar vɩɩm ning fãa sẽn da be be wã. Sebr a yembr (La Famille, l’amour et la Bible, ãngil.) yeta woto tẽn-kʋdem wẽndẽ wã wɛɛngẽ: “Sɩbgr sẽn yaa kãseng n yɩɩd sẽn tõe n wa zak ned zug yaa b sẽn na n dig-a n zãag ne a zaka neba. . . . Sãmbg sẽn ka be, a Abrahaam sẽn sak Wẽnnaam noorã n yi n bas a tẽngã la a buudã wilga sakr la bas-yard kãseng ne Wẽnnaam.”
7. Wãn to la kiris-nebã tõe n seg makr wa a Abram sẽn seg-b rãmbã buudu?
7 Rũndã-rũndã, tõeeme tɩ kiris-neb seg makr woto. Wala a Abram, b tõe n tusda tõnd tɩ d rat n dɩk laogã baoob n lʋɩɩs Wẽnnaamã tʋʋm taoore. (1 Zã 2:16) Tõnd zak neb sẽn pa tẽedb wa tõnd tõe n kɩɩsda tõndo. Tõe n yɩɩ tõnd roagdb b sẽn yiis tigingã pʋgẽ me. B tõe n dat n tudga tõnd tɩ d tall tũud-n-taar sẽn pa sõma. (Matɩe 10:34-36; 1 Korẽnt dãmba 5:11-13; 15:33) Woto, a Abram kõo tõnd mak-sõngo. A rɩka zood ne a Zeova wã n lʋɩɩs bũmb fãa taoore, baa rogmã. A ra pa mi wãn to la wakat ning takɩ Wẽnnaam kãabsã sẽn da na n pidsã ye. Baasg zãnga, a ra ratame n dɩk a vɩɩmã fãa n dell kãab-kãensã. Ad sɩd yaa bũmb sẽn sɩd kengd raood sõma tɩ d ning Rĩungã pipi zĩigẽ tõnd vɩɩmã pʋgẽ rũndã-rũndã.—Matɩe 6:33.
8. Wãn to la a Abram tẽebã tall pãng a zakã neb meng-menga zutu, la bõe la rẽ tõe n zãms kiris-nebã?
8 Yɩɩ wãn to ne a Abram zakã neb meng-menga? Yaa vẽeneg t’a Abram tẽebã la a kɩs-sɩd sẽn pa vigsdã talla pãng a zaka rãmb zut wʋsgo, bala a pag a Sarai ne a ba-biig biig a Lot saka Wẽnnaam noorã n yi Ur. Kaoosg poore, a Abram ba-biig a Nahor la a kamb kẽer yii Ur n tɩ zĩnd Harã, n balem a Zeova be. (Sɩngre 24:1-4, 10, 31; 27:43; 29:4, 5) Bãng-y t’a Teera sakame n na n yi ne a biig a Abram! Woto, Biiblã yetame tɩ ya a Teera la zakã soaba, sẽn yikd ne nebã n kẽngd Kana tẽngã. (Sɩngre 11:31) Tõnd sã n kõ d zakã neb kasetã ne yam, tõe tɩ b wa sak n tẽ.
9. Segl-bʋs la a Abram da segd n maan a so-toakã yĩnga, la bõe yĩng tɩ rẽ ra baood mong-m-meng yam wʋsgo?
9 Nand t’a Abram sɩng a so-toakã, a ra tara tʋʋm wʋsg n na n maane. A ra segd n koosa teed wʋsg n da fu-roto, yʋgma, rɩɩb la teed a taab sẽn yaa tɩlae. Tõe t’a Abram paama bõne, seglsã sẽn yɩ ne yãgbã yĩnga, la a sũur da noomame t’a sak a Zeova. Ra segd n yɩɩ ra-kãseng menga, seglsã sẽn wa n sa t’a Abram nebã yit Ur tẽngã ne a zãma wã n na n sɩng so-toakã! Yẽ ne a nebã ra yɛga Efrat kʋɩlgã, n yit rɩtg babgã n debd nen-taoor babgã. B so-toakã rɩka semen dãmba, b maana sẽn ta kɩlometr 1000, n yaool n ta Mezopotami galʋ-tẽng sẽn be rɩtg babg b sẽn boond tɩ Harã, sẽn yaa so-toagdb sik zĩigã.
10, 11. a) Bõe yĩng t’a Abram pa Harã n kaoose? b) Raood kengr bʋg la b tõe n kõ kiris-neb nins sẽn get roagdb sẽn kʋʋl yellã?
10 A Abram zĩnda Harã. Tõe t’a maana woto a ba a Teera sẽn kʋʋlã yĩnga. (Maankʋʋre 19:32) Woto me, rũndã-rũndã, kiris-neb wʋsg segdame n ges b roagdb sẽn kʋʋl bɩ sẽn bẽed yelle. Yɩɩ tɩlae ne kẽer tɩ b maan remsg b vɩɩmã pʋgẽ sẽn na yɩl n maan woto. Rẽ sã n wa yaa tɩlae, b tõe n kõo nin-kãensã bas-m-yam tɩ mong-m-meng nins b sẽn maand ne nonglmã “tata Wẽnnaam yam.”—1 Tɩmote 5:4.
11 Kaoosg pʋgẽ ‘a Teera yõor tɛk yɩɩ yʋʋm kobs-yi la a nu, la a Teera kii Harã tẽnga pʋgẽ.’ Sɩd-sɩda, a Abram maana sũ-sãang a ba wã kũum yĩnga, la sũ-sãangã wakat sẽn loogã, a bee loogr zug bala. “A Abram sẽn wa n yi Harã wã t’a tara yʋʋm pis-yopoe la a nu. A Abram talla yẽ pag a Sarai ne yẽ [ba-biig biig, NW ] a Lot la paoong nins fãa yẽ sẽn paama ne neb nins fãa yẽ sẽn paam Harã tẽngã. La bãmb dɩka sor n kẽng Kana. La bãmb tõogame n ta Kana soolem.”—Sɩngre 11:32; 12:4, 5.
12. Bõe la a Abram maan a sẽn da wa n be Harã wã?
12 D bãng t’a Abram sẽn da wa n be Harã wã, a ‘paama arzɛk wʋsgo.’ Baa ne a Abram sẽn bas laog sẽn na yɩl n yi Urã, a yii Harã ne arzɛka. Vẽenega, Wẽnnaam ning-a-la barka. (Koɛɛg Soaba 5:18) Baa Wẽnnaam sẽn pa kãabd t’a na n kõo a nin-buiidã fãa arzɛkã, a yaa kɩs-sɩd soab ne a sẽn kãab n yeel t’a na n gesa neb nins sẽn ‘basd b yiri, walla b ba-bi-rap walla b ba-bi-pogs’ Rĩungã yĩngã yellã. (Mark 10:29, 30) A Abram leb n ‘paama neba,’ sẽn dat n yeel tɩ sõgen dãmba. Sebr a yembr yetame t’a Abram da ‘tuubda neba.’ (Sɩngre 18:19) Yãmb tẽebã tusd-y lame tɩ y gom ne y yagsã, y tʋmd-n-taasã bɩ y karen-bi-taasã bɩ? A Abram da pa vigl Harã n yĩm Wẽnnaam noorã ye. A rɩka a sẽkã n tʋm ne yam Harã. La masã a beenẽ zĩndgã wakat sẽn sa, a “Abram kẽnga wa Zusoaba sẽn da yeel yẽ wã.”—Sɩngre 12:4.
A pasga Efrat kʋɩlgã
13. Wakat bʋg la a Abram pasg Efrat Kʋɩlgã, la rẽ võor yaa bõe?
13 A Abram da segd n le toga sore. A loog n basa Harã tɩ yẽ ne a zãma wã kẽng nen-taoore, n zãag ne kɩlometr 90. Tõe t’a Abram yalsa Efrat kʋɩlga noore, tɩ Karkemis tolengã zĩigẽ be kʋɩlgã rʋʋnde. Yaa zĩ-kãng la so-toagdbã rengd n pasge. * Yaa wakat bʋg la a Abrahaam zãma wã pasg kʋlgã rʋʋnde? Biiblã wilgdame tɩ maana yʋʋm 430 tɩ Zʋɩf rãmbã na n yaool n yi Ezipt yʋʋmd 1513 S.D.T.W., Nizã rasem 14. Yikri 12:41 yetame: “La yʋʋm kobs-naas la pis-tã wã daar sẽn ta, Zusoaba zãma wã yiimi n bas Ezipt.” Rẽnd Wẽnnaam sẽn maan kaoolã ne a Abrahaamã yɩɩ yʋʋmd 1943 S.D.T.W., Nizã rasem 14, a Abram sẽn da wa n sak n pasg Efrat kʋɩlgã.
14. a) Bõe la a Abram da tõe n yã ne a tẽebã nini? b) Rũndã-rũndã, wãn to la Wẽnnaam nin-buiidã paamd bark n yɩɩd a Abram?
14 A Abram basa galʋ-tẽng sẽn tar arzɛk a poorẽ. La masã a ra tõe n gẽega “tẽng sẽn tar yẽbgr sõama,” goosneema tɩrg sẽn da na n dɩ naam ãdem-biisã zutu. (Hebre dãmba 11:10) N-ye, ne b sẽn da pa togs a Abram yɛlã fãa wã, a ra sɩngame n ne Wẽnnaam daabã sẽn yaa fãag ãdem-biisã sẽn kiidã. Rũndã-rũndã, d tara bark d sẽn wʋmd a Zeova raabã võor wʋsg n yɩɩd a Abramã. (Yelbũna 4:18) ‘Galʋ-tẽngã,’ bɩ goosneema sẽn yaa Rĩungã a Abram sẽn da gũudã yaa yel-sɩd masã. B lugl-a-la saasẽ yʋʋmd 1914 tɛkã. Woto yĩnga, d pa segd n tall tẽeb la bas-yard ne a Zeova sɩda?
A Kãabg tẽngẽ wã zĩndgã sɩngame
15, 16. a) Bõe yĩng t’a Abram da segd n paam daood n tõog n me tẽn-kugr a Zeova yĩnga? b) Rũndã-rũndã, wãn to la kiris-nebã tõe n tall raood wa a Abram?
15 Sɩngre 12:5, 6 yeta tõndo: “La bãmb dɩka sor n kẽng Kana. La bãmb tõogame n ta Kana soolem. A Abram pɩʋʋgame n ta zĩig sẽn boond tɩ Sikɛm, zĩig ninga More Sɛn tɩɩg sẽn be wã.” Sikɛm da bee kɩlometr 50 ne Zerizalɛm rɩtg babgã, la a bee long sẽn sakd kood zĩigẽ, b sẽn bilg wala “zĩ-sõngã arzãna.” Baasg zãnga, “wakat kãng tɩ Kana nebã ra bee tẽngã pʋgẽ.” Sẽn mik tɩ Kana nebã ra yaa raglem dãmbã, a Abram da segd n gũusame n kogl a zakã neb tɩ b manesmã ra mad-b ye.—Yikri 34:11-16.
16 Naoor a yiib-n-soaba, “Zusoaba puka b meng ne a Abram n yeel yaa: ‘Mam na n kõo fo yagensa tẽng kãngã.’ ” Ad sɩd yɩ sũ-noogo! A Abram da segd n talla tẽebo, n tõog n maan sũ-noog ne bũmb a beoog daar yagens bal sẽn da na n dɩ a nafre. Baasg zãnga, a Abram “mee tẽn-kugr be Zusoab ninga sẽn da puk b meng ne yẽ wã yĩnga.” (Sɩngre 12:7) Biiblã mit a yembr wilgda woto: “Tẽn-kugr meeb zĩigẽ da yaa bũmb sẽn wilgd vẽeneg tɩ f soog-a lame la tɩ f tara sor n na n vɩɩmd f tẽebã.” Tẽn-kugr a woto meeb me ra yaa raood tʋʋmde. Sãmbg sẽn ka be, tẽn-kug-kãng ra wõnda b sẽn bilg a soab ning kaoosg zugẽ Tõogã kaool pʋgẽ wã, sẽn yaa kug b sẽn nog woto bala (n pa peesã). (Yikri 20:24, 25) A ra segd n yɩɩ toor wʋsg ne Kana nebã tẽn-kuga. Woto, ne raoodo, a Abram yãka nebã fãa taoor n na n yɩ sɩd Wẽnnaam a Zeova balemda, hali tɩ rẽ ra tõe n wa ne toog la yell n kõ-a. Yaa wãn to ne tõnd rũndã-rũndã? Tõnd neb kẽere, sẽn yɩɩd fãa kom-bɩɩsã, zoetame n pa wilgd d yagsã bɩ d karen-bi-taasã tɩ d balemda a Zeova bɩ? Bɩ a Abram makrã tus tõnd fãa tɩ d zẽk d zutu, d sẽn ya a Zeova sõgen dãmbã yĩnga!
17. Wãn to la a Abram wilg t’a yaa Wẽnnaam yʋʋrã moonda, la bõe la rẽ tẽegd kiris-nebã rũndã-rũndã?
17 A Abram sẽn kẽngẽ fãa, a lʋɩɩsda a Zeova balengã taoore. “La yẽ yii be n loog n ta tãng ninga sẽn be Betɛll yaanga sɛɛga. La yẽ tilga a fu-rooga Betɛll ne Ai sʋka tɩ Betɛll be taoore tɩ Ai be a yaanga. La yẽ mee tẽn-kugr beenẽ Zusoaba yĩnga n pʋʋs ne Zusoaba [“a Zeova,” NW ] yʋʋre.” (Sɩngre 12:8) Hebre gomd ning b sẽn lebg tɩ ‘pʋʋs ne . . . yʋʋrã’ rat n yeelame me tɩ “togse (moon) yʋʋrã.” Sãmbg sẽn ka be, a Abram moona a Zeova yʋʋrã ne raood Kana a yagsã sʋka. (Sɩngre 14:22-24) Rẽ tẽegda tõnd tɩ d segd n ‘kɩsa kaset ne d noor goama bãmb yʋʋra yĩng’ wa d sẽn tõe tɛk rũndã-rũndã.—Hebre dãmba 13:15; Rom dãmba 10:10.
18. A Abram manesem ne Kana tẽngã neb ra yaa wãn to?
18 A Abram pa kaoos zĩ-kãensã ba a ye pʋsẽ ye. “La a Abram yikame n kẽn n tɩ ta zĩig sẽn boond tɩ Negɛb.” Zĩ-kãng ra yaa war bilf sẽn be Zida tãensã goabg babgo. (Sɩngre 12:9) A sẽn da ket n kẽnd la a wilgd t’a ya a Zeova balemd zĩ-paalg fãa pʋgẽ wã yĩnga, a Abram ne a zakã rãmb “ra togsda zãma sʋk tɩ b ra yaa sãamb la so-toagdb tẽngã pʋgẽ.” (Hebre dãmba 11:13, NW ) Wakat fãa, b ra gũusdame n da yõg zood wʋsg ne b yagsã sẽn yaa kɩfen dãmbã ye. Woto me, rũndã-rũndã, kiris-nebã ket n welgame n “ka dũniyã rẽnd” ye. (Zã 17:16) Baa ne d sẽn yaa nin-sõms ne d yagsã la d tʋmd-n-taasã, d gũusdame n da tall manesem sẽn pukd dũni sẽn zãr ne Wẽnnaamã rẽnd ye.—Efɛɛz rãmba 2:2, 3.
19. a) Bõe yĩng tɩ zĩig toeeng wakat fãa wã yɩ toog ne a Abram la a Sarai? b) Makr a taab bʋs n da gũud a Abram?
19 D ra yĩm tɩ pa yɩ nana ne a Abram bɩ a Sarai tɩ b yikd n toeemd zĩig wakat fãa ye. Ra yaa b rũm-bãgã la b ra teeg n vɩ, la ra pa rɩɩb b sẽn da Ur daasẽ wã sẽn da tar teed wʋsgã ye. B ra vɩɩ fu-rot pʋsẽ, la pa rot sẽn me sõma pʋsẽ ye. (Hebre dãmba 11:9) A Abram da tara tʋʋm wʋsgo. A ra tara yɛl wʋsg n na n maan n ges a rũm-bãgã la a sõgen dãmbã yelle. Sãmbg sẽn ka be, a Sarai tʋma tʋʋm nins pag sẽn da minim n maand rẽ wẽndã: zom nagbo, bur wẽebo, lamd wĩibu, fut wʋgbo. (Sɩngre 18:6, 7; 2 Rĩm dãmba 23:7; Yelbũna 31:19; Ezekɩɛll 13:18) La makr a taab n da wate. Ra pa na n kaoos la a Abram ne a zakã rãmb seg yell sẽn da na n ning b vɩɩmã yell pʋgẽ ye! A Abram tẽebã tara pãng n sek a na yals kãn-kãe makrã taoor bɩ?
[Tẽngr not rãmbã]
^ sull 3 Baa ne masã Efrat kʋɩlgã sẽn zãr ne pĩnd Ur yaangã ne kɩlometr piig la a yoobe, kaset n be n wilgdẽ tɩ tẽn-kʋdem wẽndẽ wã, kʋɩlgã ra bee galʋ-tẽngã nen-taoore. Woto, kaoosg poore, b ra tõe n yeelame t’a Abram da yita Efrat “kʋɩlga rʋʋnde.”—Zozue 24:3.
^ sull 13 Yʋʋm kobs loogr poore, Asiri Rĩm a Asurnasirpall a 2 soab tũnuga ne bõn-yood sẽn dugd koom zug n pasg Efrate, Karkemis noorẽ wã. A Abram me maana woto bɩ, bɩ yẽ ne a nebã faoa koomã n pasge, d pa mi ye, Biiblã pa yet baa fʋɩ a zug ye.
Y bãngame bɩ?
• Bõe yĩng tɩ b bool a Abram tɩ “moos nins fãa sẽn tẽeda ba”?
• Bõe yĩng t’a Abram da segd n paam tẽeb n sak n yi Ur sẽn be Kalde wã?
• Wãn to la a Abram wilg t’a ra lʋɩɩsda a Zeova balengã taoore?
[Zãmsgã sogsgã]
[Kart, seb-neng a 8]
(Sebrã meng pʋgẽ la y tõe n yã fãa)
A ABRAM SO-TOAKÃ
Ur
Harã
Karkemis
KANA
Mog-Kãsengã
[Kartã sẽn yitẽ]
D’après une carte au copyright de Pictorial Archive (Near Eastern History) Est. and Survey of Israel
[Foto, seb-neng a 7]
A Abram da segd n talla tẽeb n sak n bas Ur vɩ-noogã
[Foto, seb-neng 10]
A sẽn da vɩ fu-rotẽ wã, a Abram ne a zakã rãmb “ra togsda zãma sʋk tɩ b ra yaa sãamb la so-toagdba”