Bɩ Tõnd da yɛ ne tʋʋm sõma maaneg ye
Bɩ Tõnd da yɛ ne tʋʋm sõma maaneg ye
“Bɩ tõnd da yɛ ne tʋʋm sõama maaneg ye, tɩ bõe, wakat sã n ta tõnd na wʋk yaoodo tõnd sã n ka yɛ ye.”—GALAT DÃMBA 6:9.
1, 2. a) Bõe yĩng tɩ sũ-mar tallg toog pʋgẽ yaa tɩlae sẽn na yɩl n sõgen Wẽnnaam? b) Wãn to la a Abrahaam tall sũ-mar makr pʋgẽ, la yaa bõe n sõng-a t’a maan woto?
TÕND sẽn ya a Zeova Kaset rãmbã, d sũur nooma ne Wẽnnaam daabã maanego. D leb n paamda tẽeb kengre, d sẽn tʋkd karen-biilmã “zɩɩbã” yĩnga. (Matɩe 11:29, Sebr Sõngo) Baasg zãnga, pa nana wakat fãa tɩ d naag Kirist n sõgen a Zeova ye. Tʋm-tʋmd a Poll wilga woto vẽenega, a sẽn wa n sagl a kiris-nin-taasã woto wã: “Yãmb tog n paama sũ-mare tɩ yãmb sẽn sak Wẽnnaam daabã n sɛ, yãmb na n paama bũmb ninga b sẽn kãab yãmbã.” (Hebre dãmba 10:36) Wẽnnaam sõgenegã sẽn tõe n yɩ toogã yĩnga, sũ-mar yaa tɩlae.
2 Sɩd-sɩda, a Abrahaam vɩɩmã yaa kaset ne rẽ. Naoor wʋsgo, a sega zu-loees la sũ-sãamse. B sẽn kõ-a noor t’a yi Ur tẽngã, vɩɩmã sẽn da yaa naar vɩɩmã ra yaa zu-loeesã sɩngr bala. Pa kaoos la kom wa ye: beem ne yagsã, b sẽn da wa n dat n deeg a pagã, a buudã neb kẽer kisgri, la zabrã sabaab rãmba. La mak-kãsems sẽn yɩɩd woto n da wate. La a Abrahaam da zɩ n yɛ ne tʋʋm sõma maaneg ye. Rẽ sɩd yaa bõn-kãsenga, y sã n tags t’a ra pa tar Wẽnnaam Gomdã zãng wa tõnd sẽn tar rũndã-rũndã wã. Baasg zãnga, a ra mii pipi bãngr-gomdã tɩ sãmbg ka be ye. Be Wẽnnaam yeela woto: “Mam na n ninga beem foo ne paga sʋka, la fo yagenga ne yẽ yageng sʋka.” (Sɩngre 3:15) Ra yaa ne a Abrahaam maasem la yagengã ra na n tũ n wa, rẽ n so tɩ Sʋɩtãanã tug beem ne-a wã n yɩɩd fãa. Sãmbg sẽn ka be, a Abrahaam sẽn bãng rẽ wã sõng-a lame t’a maan sũ-mar makrã pʋgẽ ne sũ-noogo.
3. a) Rũndã-rũndã, bõe yĩng t’a Zeova nin-buiidã segd n gũ tɩ toog wa? b) Raood kengr bʋg la Galat dãmba 6:9 kõt tõndo?
3 Rũndã-rũndã, a Zeova nin-buiidã me segd n gẽega toodo. (1 Pɩɛɛr 1:6, 7) Sẽn yɩɩd fãa, Wilgri 12:17 yeta tõnd tɩ d gũus t’a Sʋɩtãan ‘maanda zabr’ ne kellã sẽn zaeyã. ‘Piis a taabã’ sẽn tʋmd wʋsg ne sẽn zae-bã yĩnga, bãmb me pa põsd a Sʋɩtãan sũ-yikrã ye. (Zã 10:16) Kɩɩsg ning kiris-nebã sẽn tõe n sege, b sẽn moond koɛɛgã zãma wã yĩngã toor sẽn ka be, b leb n tõeeme n seg mak-toos b mensã vɩɩm pʋgẽ. A Poll sagenda tõnd woto: “Bɩ tõnd da yɛ ne tʋʋm sõama maaneg ye, tɩ bõe, wakat sã n ta tõnd na wʋk yaoodo tõnd sã n ka yɛ ye.” (Galat dãmba 6:9) N-ye, baa ne a Sʋɩtãan sẽn dat n sãam tõnd tẽebã, d segd n kɩɩs-a lame, n yals kãn-kãe tẽebã pʋgẽ. (1 Pɩɛɛr 5:8, 9) Tõnd sẽn tar kɩs-sɩdã tõe n waa ne bõe? Zak 1:2, 3 wilgdame: “M ba-biisi, makr toɛ-toɛ sã n paam yãmba, bɩ y geelg bãmb wa sũ-noog bala, tɩ yãmb miimi tɩ yãmb tẽeb makr wata ne sũ-mare.”
Zabr vẽenega
4. Wãn to la a Sʋɩtãan maan zabr vẽeneg n mak n na n sãam Wẽnnaam nin-buiidã burkĩndi?
4 Sɩd-sɩda, a Abrahaam vɩɩmã makda “makr toɛ-toɛ” nins kiris-ned sẽn segd rũndã-rũndã wã. Wala makre, a ra segd n tɩ zaba ne pigdbã sẽn yi Sineaarã. (Sɩngre 14:11-16) Rẽnd pa lingri, a Sʋɩtãan sẽn ket n zabd ne tõnd vẽeneg n tũnugd ne bɛɛbã n namsd tõnd d tẽebã yĩngã ye. Dũni gill zabr a yiib-n-soabã saab tɛka, tẽns wʋsg nanambs gɩdga a Zeova Kaset rãmbã koe-moonego. Annuaire des Témoins de Jéhovah 2001 gomda bɛɛbã sẽn nams a Zeova Kaset rãmba Ãngola tɩ b maan sũ-mar nams-kãng pʋgẽ wã yelle. Tõnd saam-biisã sẽn be tẽn-kãens pʋsẽ wã teega a Zeova n yals kãn-kãe n pa leb poorẽ ye! Yel-kãensã pʋsẽ b pa tall nen-kɛglem bɩ tõdgr manesem ye, la b kẽnga taoor ne koɛɛgã mooneg ne yam.—Matɩe 24:14.
5. Wãn to la bɛɛbã tõe n nams kom-bɩɩs nins sẽn yaa kiris-nebã lekollẽ wã?
5 La pa wakat fãa la nams f tẽeb yĩng tɩ loe ne nen-kɛglem ye. Sẽn wa n beẽ-beẽ, Wẽnnaam barka a Abrahaam ne kamb a yiibu. Ya a Ismaɛll la a Izaak. Sɩngre 21:8-12 yeta tõnd tɩ vugri, a Ismaɛll da “laada” a Izaak. A lɛtr ning a sẽn taas Galat dãmbã pʋgẽ, a Poll wilgame tɩ pa kamb sẽn wʋsd ne taab bal ye, bala a yetame t’a Ismaɛll da namsda a Izaak. (Galat dãmba 4:29) Woto, zemsame tɩ b yeel tɩ karen-bi-taasã yaalg la bɛɛbã sãbgr yaa namsgo. Kiris-ned sẽn yaa bi-bɩɩg yʋʋr sẽn boond t’a Ryan tẽra namsg ning a karen-bi-taasã sẽn nams-a wã woto: “Minit 15 d sẽn be biisã pʋgẽ n digd lekollẽ wã ra yaa wa lɛɛr dãmb ne maam, bala b ra tʋʋda maam. B rɩkda brike rãmb n wɩngd kut n yõod maam.” Yaa bõe yĩng la b sẽn nams-a woto wã? “Mam sẽn paam zãmsg ning Wẽnnaam siglgẽ wã kɩtame tɩ m yɩ toor ne kom-bɩɩs a taabã sẽn be lekollẽ wã.” Baasg zãnga, ne a roagdbã sõngre, a Ryan tõog n talla sũ-mar toogã pʋgẽ ne kɩs-sɩda. Kom-bɩɩse, yãmb reem-n-taasã yaalg kɩtdame tɩ y koms raood bɩ? Be neere, ra koms-y raood n bas ye! Y sã n maan sũ-mar toog pʋgẽ ne kɩs-sɩda, a Zezi gom-kãensã na n pidsa y zutu: “Bark bee yãmb zutu neb sẽn na n gom yãmb wẽnga, la nams yãmba, la sãbs yãmb mam yĩnga.”—Matɩe 5:11.
Daar fãa yɩɩrã
6. Yel-bʋs n tõe n wa ne mo-gãs kiris-nebã sʋk rũndã-rũndã?
6 Makr nins tõnd sẽn segd rũndã-rũndã wã wʋsg sẽn yɩɩd tɩ loee ne daar fãa yɩɩrã. A Abrahaam mengã ra segd n welga zu-loees sẽn puk yẽ rũm-kɩɩmbã ne a ba-biig biig a Lot rũm-kɩɩmbã sʋka. (Sɩngre 13:5-7) Woto me rũndã-rũndã, nebã zʋg sẽn yaa toɛ-toɛyã la sũ-ki-bõoneg tõe n waa ne mo-gãs tɩ wa rat meng n sãam tigingã laafɩ. “Sũ-kiiri ne no-koɛɛma sẽn be zĩig ninga, zũnglg ne tʋʋm wẽns buud fãa bee beenẽ.” (Zak 3:16) Ad sɩd tara yõod wʋsg ne tõnd tɩ d ra bas tɩ wuk-m-mengã sãam laafɩ wã ye. D maan wa a Abrahaam sẽn bao neb a taabã neerã!—1 Korẽnt dãmba 13:5; Zak 3:17.
7. a) Bõe la ned segd n maane, a kiris-nin-taag sã n beeg-a tɩ sãam a sũuri? b) Wãn to la a Abrahaam kõ mak-sõng n tall zems-n-taar ne neb a taabã?
7 Tall laafɩ tõe n yɩɩ toogo, d sã n tagsdẽ tɩ tẽed-n-taag talla manesem sẽn yaa kɛgr ne-do. Yelbũna 12:18 yetame: “Ned sẽn ka gũusd goam zabda wa sʋʋg sẽn wãag neda.” Baa f sã n pa rat n maan wẽnga, f sã n gom n pa tagse, a tõe n sãama ned sũur wʋsgo. Sũ-sãangã tõe n yɩɩ wʋsg n yɩɩg menga, d sã n neẽ tɩ b kãneg-d lame, bɩ b wɩd-d-la ne wẽnem. (Yɩɩl Sõamyã 6:7, 8) La kiris-ned pa segd n bas tɩ sũ-sãang kɩt t’a bas sẽn yaa sõma maaneg ye. Yãmb sã n be yell a woto pʋgẽ, bɩ y tɩ yã bɛɛgdã n gom ne-a ne nonglem n dems yɛlã. (Matɩe 5:23, 24; Efɛɛz rãmba 4:26) Bɩ y tʋlg n kõ a soaba sugri. (Kolos rãmba 3:13) D sã n bas tɩ sũ-kẽkã sa, d sigsda d mengã sũuri, la d leb n paam zems-n-taar ne d saam-biigã. A Abrahaam pa tall sũ-kẽk baa bilf ne a Lot ye. A yɩɩ tao-tao n tɩ zab n sõng a Lot ne a zakã rãmba!—Sɩngre 14:12-16.
Makr tõnd mens sẽn baoode
8. a) Wãn to la kiris-nebã tõe n ‘kẽes b mens tood wʋsg pʋsẽ’? b) Bõe yĩng t’a Abrahaam da tõe n tall tagsg sẽn zems laogã wɛɛngẽ?
8 D sak n deeg tɩ makr kẽer yaa tõnd mens n baood-ba. Wala makre, a Zezi kõo a karen-biisã noor woto: “Bɩ y ra bĩng-y paoong dũniyã ka, zĩig ninga mogdo la tẽng-n-piisim sẽn sãamda, la wagda sẽn kẽed n wʋkdẽ wã ye.” (Matɩe 6:19) La, saam-biis kẽer ‘kẽesa b mens to-kãseng pʋgẽ,’ b sẽn dɩk laogã baoob n lʋɩɩs Rĩungã yɛl taoorã yĩnga. (1 Tɩmote 6:9, 10) A Abrahaam da sakame n na n bas laogã sẽn kõt naar ningã sẽn na yɩl n ta Wẽnnaam yam. “Ne tẽebo, yẽ siga tẽng ninga Wẽnnaam sẽn kãab yẽ wã wa tẽn-sãanga n zĩnd fu-rot pʋsẽ. La a Izaak ne a Zakoob me sẽn tar pʋɩɩr ne kãabg a yembrã, bãmb me maana woto. Tɩ bõe, yẽ rag n gũuda [galʋ-]tẽng sẽn tar yẽbgr sõama, a tãn-meta ne a naanda sẽn yaa Wẽnnaam.” (Hebre dãmba 11:9, 10) A Abrahaam sẽn da maand tẽeb ne ‘galʋ-tẽng’ bɩ Wẽnnaam goosneemã sẽn da wat beoog-daarã sõng-a lame t’a ra teeg arzɛkã ye. Pa yam bũmb ne tõnd me tɩ d maan woto sɩda?
9, 10. a) Wãn to la neb sẽn baood n lʋɩ taoor tõe n wa ne makre? b) Rũndã-rũndã, wãn to la saam-biig tõe n maan a meng ‘bilfu’?
9 Ges-y bũmb a to. Biiblã kõta sor-wilgr kãngã sẽn tar pãngã: “Ned sã n tẽed t’a yaa bũmbu n yaool n yaa zaalem bala, a belgda a menga.” (Galat dãmba 6:3) Sẽn paase, b sagenda tõnd tɩ d ra maan “bũmb baa fɩ ne geesem-geesem wall ne wuk-m-meng ye, la . . . [ne] sik-m-meng yam.” (Filip rãmba 2:3, Kãab-Paalgã Koe-noogo) Kẽer wata ne makr b mens zut b sẽn pa tũud sagl-kãngã wã yĩnga. B sẽn dat n lʋɩ taoor la pa ‘tʋʋmd sẽn yaa neerã’ yĩnga, b komsda raood n yẽgemdẽ, b sã n pa paam zu-nood tigingã pʋgẽ.—1 Tɩmote 3:1.
10 A Abrahaam kõo mak-sõng n pa “tags tɩ yẽ yaa sõama n yɩɩd sẽn zems ye.” (Rom dãmba 12:3) A sẽn seg a Melkisedɛkã, a Abrahaam pa maan wa a sẽn tar Wẽnnaam lohorem sõma wã kɩtame t’a yɩɩd-a ye. Sẽn yaa lebende, a sak n deegame t’a Melkisedɛk sẽn yaa maan-kʋʋdã yɩɩda yẽ, n kõ-a teedã yembr piig zugu. (Hebre dãmba 7:4-7) Woto me, rũndã-rũndã, kiris-nebã segdame n sak n maan b mens ‘bilf’ n da bao n dɩ yʋʋr ye. (Luk 9:48) Sã n wõnd sẽn be-b taoorã pa rat n kõ-y zu-nood kẽere, bɩ y vaees y meng ne pʋ-peelem n gese, zĩis pa be yãmb zʋgdã bɩ y manesmã pʋgẽ y sẽn segd n maneg n paase? Ra sãam-y y sũy ne zu-nood nins y sẽn pa paama ye, bao-y n dɩ zu-noog ning y sẽn zoe n tarẽ wã nafa tɩ pidi. Zu-no-kãng yaa y sẽn na n sõng neb a taabã tɩ b bãng a Zeova wã. N-ye, “bɩ y sik yãmb mens Wẽnnaam sẽn yaa pãng soaba taoore, tɩ wakat sã n ta bãmb na zẽk yãmba.”—1 Pɩɛɛr 5:6.
D tall tẽeb ne bũmb nins d sẽn pa ne wã
11, 12. a) Bõe yĩng tɩ neb kẽer sẽn be tigingã pʋgẽ tõe n wa tẽed tɩ saabã pa kolg wʋsgo? b) Wãn to la a Abrahaam kõ mak-sõng n tik a vɩɩmã Wẽnnaam kãabsã zutu?
11 Makr a to tõe n tɩ loee ne zãmaan-wẽngã saab sẽn wõnd a kaoosdame wã. Sã n yaa ne 2 Pɩɛɛr 3:12, kiris-nebã segdame ‘n gũud Zusoaba daar ne datem kãsenga.’ Baasg zãnga, neb wʋsg n gũ ‘ra-kãngã’ sẽn na maan yʋʋma, kẽer yaa yʋʋm pi-gĩna. Rẽ tõe n kɩtame tɩ kẽer wa koms raood n wa tagsdẽ t’a Zeova daarã pa kolg wʋsg ye.
12 Bɩ d ye ges a Abrahaam makrã. A vɩɩmã fãa ra tika Wẽnnaam kãabsã zut n yɩɩda, baa ne kãab-kãens fãa sẽn da pa na n pids tɩ yẽ ket n vɩyã. Yaa sɩd t’a vɩɩmd n kaoosa sẽn sek a na yã a biribl a Izaak sẽn bɩ. La ra yaa yʋʋm kob-gĩn poor la a Abrahaam yagensã ra na n yɩ wala “ãds sẽn be saasẽ,” bɩ “bĩisr sẽn be ko-kãsenga noore.” (Sɩngre 22:17) La a Abrahaam pa sãam a sũur bɩ n koms raood ye. Ad tʋm-tʋmd a Poll sẽn yeel a Abrahaam la zak soben dãmb a taab wɛɛngẽ: “Neb kãens fãa kii ne tẽebo n ka paam bũmb nins Wẽnnaam sẽn kãab bãmba ye, la bãmb yãa bõn-kãens n beel bãmb yɩɩga. La bãmb miimi tɩ bãmb yaa sãamba la pa-wet dũniyã zugu.”—Hebre dãmba 11:13.
13. a) Rũndã-rũndã, wãn to la kiris-nebã yaa wa “sãamba”? b) Bõe yĩng t’a Zeova na n sãam zãmaan kãngã?
13 A Abrahaam sã n da tõe n tik a vɩɩmã kãabs pidsg sẽn da be “yɩɩga” zutu, tõnd segd n tõog n maana woto ne bõn-kãensã pidsg sẽn kolg wʋsgã n yɩɩda! Wala a Abrahaam, d segd n gesa d mens wa “sãamba,” a Sʋɩtãan dũniyã pʋgẽ, n pa rat n vigl wʋsg n pids d sẽn data fãa ye. Wa sẽn zemse, d sẽn nong n yɩɩd pa ‘bũmb fãa sɛɛba’ sẽn na n kolg bal ye, la ya a sẽn na n ta. (1 Pɩɛɛr 4:7) Tõe tɩ bã-kɛgeng n namsd tõndo. Bɩ tõe tɩ yaa laogã kaalem n namsd tõnd wʋsgo. La yaa d tẽeg t’a Zeova pa wat ne saabã n na n fãag tõnd ne yɛl nins sẽn wat ne sũ-sãamsã bal ye, la yaa sẽn na yɩl n pek a mengã yʋʋre. (Ezekɩɛll 36:23; Matɩe 6:9, 10) Saabã na n waame, tõe tɩ pa wakat ning sẽn zems ne tõndã ye, la yaa wakat ning sẽn yaa sõma n yɩɩd ne a Zeova raabã pidsgã.
14. Wãn to la Wẽnnaam sũ-marã nafd kiris-nebã rũndã-rũndã?
14 Tẽeg-y me tɩ “Zusoaba ka kaoosda tɩ pids bãmb kãabg wa neb kẽer sẽn tagsda ye. La bãmb sẽn ka rat tɩ ned ba a ye sãama yĩnga, bãmb maanda sũ-mar ne yãmba n dat tɩ yãmb fãa yam tek tɩ y kos sugri.” (2 Pɩɛɛr 3:9) Bãng-y tɩ b sẽn yet tɩ Wẽnnaam “maanda sũ-mar ne yãmba,” yaa kiris-neb tigingã neba. Yaa vẽeneg tɩ tõnd kẽer data sẽk n paas n toeem la b rems b mense, tɩ b wa ‘mik tɩ d bee laafɩ pʋgẽ, tɩ dẽgd tosbo ne dõdb kaẽ ye.’ (2 Pɩɛɛr 3:14) Rẽ yĩnga tõnd pa segd n tall mi-beoogo, Wẽnnaam sẽn tall sũ-mar woto ne-dã yĩng sɩda?
D tall sũ-noog baa ne zu-loeesã
15. Wãn to la a Zezi tõog n tall a sũ-noogã makrã taoore, la wãn to la nafd kiris-nebã rũndã-rũndã, b sã n dɩk a togs-n-taare?
15 A Abrahaam vɩɩmã zãmsda kiris-nebã yɛl wʋsg rũndã-rũndã. A pa wilg tẽeb bal ye, a wilgame t’a tara sũ-mare, yam, raood la nonglem sɩd-sɩd ne a taaba. A wilgame t’a Zeova balengã n wat pipi a vɩɩmã pʋgẽ. La yaa d tẽeg tɩ ya a Zezi Kirist n kõ mak-sõng sẽn tɩ yɩɩd fãa tõnd sẽn segd n dɩk togs-n-taar ne wã. Yẽ me sega tood la makr wʋsgo, la bãmb fãa pʋgẽ a zɩ n menems a sũ-noogã ye. Bõe yĩnga? Bala a ra kell n tagsda saagr ning sẽn da watã yelle. (Hebre dãmba 12:2, 3) Woto yĩnga, a Poll pʋʋsa woto: “Bɩ Wẽnnaam sẽn yaa sũ-mare la belsg soaba sõng yãmba tɩ y sak taab ne yam sõama wa sẽn zems Kirist Zezi mamsgo.” (Rom dãmba 15:5) D sã n tar tagsg ning sẽn zemsã d tõe n paama sũ-noogo, baa ne gɩdgr nins a Sʋɩtãan sẽn ningd tõnd taoorã.
16. Bõe la d tõe n maane, sã n wõnd zu-loeesã lim-d lame?
16 Sã n wõnd zu-loeesã rat n lim-y lame, bɩ y tẽeg tɩ wa a Zeova sẽn da nong a Abrahaam to-to wã, yaa woto la a nong yãmb me. A ratame tɩ y tõoge. (Filip rãmba 1:6) Teeg-y a Zeova zãng-zãnga, n kɩs sɩd t’a “ka na n sak tɩ yãmb paam makr sẽn yɩɩd yãmb pãng ye. La ne makre bãmb na n maana sore tɩ yãmb tõe n yi, la tɩ yãmb tõe n paam pãng makra pʋgẽ n da lʋɩ ye.” (1 Korẽnt dãmba 10:13) Minim-y n karemd Wẽnnaam Gomdã daar fãa. (Yɩɩl Sõamyã 1:2) Nang-y pãng ne pʋʋsgã, n kos a Zeova t’a sõng-y tɩ y tall sũ-mar toog pʋgẽ. (Filip rãmba 4:6) A na n ‘kõo neb nins sẽn kot bãmba Sɩɩg Sõngo.’ (Luk 11:13) Rɩ-y segls nins a Zeova sẽn maan sẽn na yɩl n dɩlg yãmb tẽebã wɛɛngẽ wã nafa, wala tõnd sɛb nins sẽn tik Biiblã zugã. Sẽn paase, bao-y saam-biisã teelgo. (1 Pɩɛɛr 2:17) Kẽng-y kiris-neb tigissẽ wã n da vaal ye, bala yaa be la y na n paam daood kengr ning y sẽn dat sẽn na yɩl n maan sũ-mar toog pʋgẽ wã. (Hebre dãmba 10:24, 25) Kɩdm-y-yã, y sẽn sɩd mi tɩ y sẽn maand sũ-mar toog pʋgẽ wã na n wa kɩtame tɩ y ta Wẽnnaam yam, la tɩ yãmb kɩs-sɩdã noog a sũurã!—Yelbũna 27:11; Rom dãmba 5:3-5.
17. Bõe yĩng tɩ kiris-nebã pa komsd raoodo?
17 Wẽnnaam da nonga a Abrahaam n get-a wa a “zoa.” (Zak 2:23) Baa ne rẽ, a Abrahaam vɩɩmã ra yaa zu-loees sẽn wat ne sũ-sãams la toodo. Woto yĩnga, kiris-nebã pa segd n tẽ tɩ b na n põsa rẽ ‘yaoolem wakat’ kãensã sẽn yaa wẽnsã ye. Sɩda, Biiblã yeta tõnd tɩ d bãng tɩ “nin-wẽnsa ne zãmb dãmb na n maana wẽng n paase.” (2 Tɩmote 3:1, 13) Ra koms-y raood ye. Bãng-y tɩ yɛlã sẽn wɩngd woto ne-dã yaa kaset t’a Sʋɩtãan zãmaan-wẽngã saab kolgame. La a Zezi tẽegda tõnd tɩ “ned ninga sẽn na n tall a tẽeb hal tɩ wakat ta, a na n paama fãagre.” (Matɩe 24:13) Woto, bɩ y ‘ra bas tʋʋm sõma maaneg ye!’ Rɩk-y a Abrahaam togs-n-taare, la y zĩnd neb nins sẽn “paam kãabgo tẽeb ne sũ-mar yĩnga” sʋka.—Hebre dãmba 6:12.
Y tẽrame bɩ?
• Bõe yĩng t’a Zeova nin-buiidã segd n gũ tɩ makr la toog paam-b rũndã-rũndã?
• Wãn to la a Sʋɩtãan tõe n maan zabr vẽeneg ne-do?
• Wãn to la b tõe n welg mo-yõs nins sẽn be kiris-nebã ne taab sʋkã?
• Wãn to la wuk-m-mengã la rat-m-yembrã wat ne makre?
• Wãn to la a Abrahaam kõ mak-sõngo, a sẽn da wa n gũud Wẽnnaam kãabsã pidsg sasa wã?
[Zãmsgã sogsgã]
[Foto, seb-neng 18]
Kiris-neb wʋsg sẽn yaa kom-bɩɩs namsda b tẽebã yĩnga, b reem-n-taasã sẽn yaand-bã
[Foto, seb-neng 21]
A Abrahaam wẽndẽ wã, Wẽnnaam kãabsã pidsg ra bee “yɩɩga,” la ne rẽ fãa, a vɩɩmã ra tika rẽ zugu