Karemdbã sʋgsgo

“Vʋʋsg” ning yell b sẽn gom Hebre dãmba 4:9-11 pʋgẽ wã yaa bõe, la wãn to la ned ‘kẽed vʋʋsg kãnga’ pʋgẽ?

Tʋm-tʋmd a Poll gʋlsa yʋʋm pipi kob-gĩndẽ Hebre kiris-nebã woto: “Vʋʋsg raar keta Wẽnnaam neba yĩnga. Tɩ bõe, ned ninga sẽn kẽed Wẽnnaam vʋʋsgã, a basda a tʋʋma wa Wẽnnaam me sẽn da bas b tʋʋmã. Dẽ yĩnga, bɩ tõnd nang pãng n kẽ vʋʋsg kãnga.”—Hebre dãmba 4:9-11.

A Poll sẽn yeel tɩ Wẽnnaam vʋʋsa ne A tʋʋmdã, yaa wa a ra gomda b sẽn togs bũmb ning Sɩngre 2:2 pʋgẽ wã yelle. B yeta be woto: “Sẽn wa n na n ta rasem a yopoe wã tɩ Wẽnnaam tʋma b tʋʋma fãa n sɛ n bas n vʋʋs baraare.” Bõe yĩng t’a Zeova sɩng ‘vʋʋsg rasem a yopoe wã’? Sɩd-sɩda, a ra pa rat n vʋʋs yaams yĩng ne ‘a tʋʋma fãa’ ye. Verse ning sẽn pʋgdã sõngdame tɩ d wʋm gomdã võore: “Wẽnnaam ninga rasem a yopoe wã raar barka n welg-a ne dasem a taabã. Tɩ bõe, baraare, Wẽnnaam vʋʋsame n bas b tʋʋma fãa b sẽn da maand naaneg wakatã.”—Sɩngre 2:3; Ezai 40:26, 28.

“Rasem a yopoe wã” ra yaa toor ne rasem a yoob nins fãa sẽn da loog-bã, bala a ra yaa daar Wẽnnaam sẽn ning bark n sõmse, sẽn dat n yeel t’a welg-a-la toore, n yãk-a raab sẽn yaa toor zall yĩnga. Raab kãng ra yaa bõe? Wẽnnaam da pĩnd n wilga a raab ãdem-biisã la tẽngã wɛɛngẽ. Wẽnnaam yeela pipi rao wã ne a pagã “tɩ b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” (Sɩngre 1:28) Baa Wẽnnaam sẽn kõ ãdem-biisã la tẽngã sɩngr sẽn zems zãngã, ra na n kaoosame tɩ b wa tõog tẽngã gill la b toeem-a t’a lebg arzãn sẽn pid ne neb sẽn zems zãng wa Wẽnnaam sẽn da ratã. Woto yĩnga, “rasem a yopoe wã,” Wẽnnaam vʋʋsame, bɩ a basa tʋmbo, sã n yaa ne tẽng zug bõn-yooda naanegã wɛɛngẽ, sẽn na yɩl n bas t’a sẽn da zoe n naana yidg n tɩ zems ne a raabã. ‘Ra-kãng’ saabẽ wã, bũmb ning fãa Wẽnnaam sẽn yãk yam n na n maana na n pidsame. Vʋʋsg kãng na n kaoosa wakat a wãna?

D sã n leb Hebre dãmbã pʋgẽ, d yãtame t’a Poll wilgame tɩ “vʋʋsg raar keta Wẽnnaam neba yĩnga,” la a sagla a kiris-nin-taasã tɩ b maan b sẽn tõe n “kẽ vʋʋsg kãnga” pʋgẽ. Woto wilgdame t’a Poll sẽn da wa n gʋls gom-kãensã wã, Wẽnnaam “rasem a yopoe” soaba vʋʋsgã sẽn sɩng yʋʋm 4 000 sẽn dengã ra ket n kẽngda taoore. A pa na n baas tɩ sã n pa Wẽnnaam daabã sẽn tɩ loe ne ãdem-biisã la tẽngã n pids zãnga, a Zezi Kirist sẽn yaa “vʋʋsg raar Zusoaba” Yʋʋm Tusr Naama rɩɩb saabẽ ye.—Matɩe 12:8; Wilgri 20:1-6; 21:1-4.

A Poll da tara saagr kãseng kãnga a yamẽ, a sẽn da wa n wilgd f sẽn tõe n kẽ Wẽnnaam vʋʋsgã pʋgẽ to-to wã. A gʋlsame: “Ned ninga sẽn kẽed Wẽnnaam vʋʋsgã, a basda a tʋʋma.” Woto wilgda tõnd tɩ baa ne ãdem-biisã sẽn paam sɩngr sẽn zems zãngã b pa kẽ Wẽnnaam vʋʋsgã pʋgẽ ye. Sẽn yɩ woto wã ya a Ãdem ne a Hawa sẽn yɩ tao-tao n kɩɩs Wẽnnaam “rasem a yopoe wã” daar vʋʋsg b sẽn da segl bãmb yĩngã yĩnga. Sẽn yaa lebende, b tõdgame n da rat n soog b mens Wẽnnaam taoore. Sɩda, b saka a Sʋɩtãan belgrã n bas Wẽnnaam sor-wilgr sẽn tar nonglmã. (Sɩngre 2:15-17) Rẽ kɩtame tɩ b kong vɩɩm sẽn pa sat tẽng zug arzãnã pʋgẽ wã. Rẽ tɛka, ãdem-biisã fãa kẽe yel-wẽnã la kũumã yembd pʋgẽ.—Rom dãmba 5:12, 14.

Ãdem-biisã tõdgr pa gɩdg Wẽnnaam daabã ye. A vʋʋsgã ket n kẽngda taoore. Baasg zãnga, a Zeova maana seglg ne nonglem, n kõ a Biribl a Zezi Kirist tɩ yɩ rondo, sẽn na yɩl tɩ neb nins fãa sẽn sakd-a n tar tẽebã tõog n gẽeg yolsg la vʋʋsg ne yel-wẽnã la kũumã zɩɩbo. (Rom dãmba 6:23) Yaa rẽ yĩng la a Poll sẽn sagl a kiris-nin-taasã tɩ b ‘vʋʋs ne b tʋʋmã.’ B ra segd n saka Wẽnnaam seglsã n paam fãagre, la b ra bao n tʋm b mens beoog-daar fãagr yĩnga, n maan b sẽn dat wa Ãdem ne a Hawa ye. B ra segdame me n gũus n da tʋm tʋʋm n bao n kõ b mens bʋʋm ye.

 D sã n bas tõnd meng raab maanego, bɩ dũniyã yɛl baoob sẽn na yɩl n maan Wẽnnaam daabã, sɩd yaa bũmb sẽn kõt yolsg la vʋʋsgo. A Zezi maana bool-kãngã: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo. Tɩ bõe, mam yɛla yaa naana, la mam zɩɩb yaa faasga.”—Matɩe 11:28–30.

A Poll sẽn gom Wẽnnaam vʋʋsgã yell la a sẽn wilg ned sẽn tõe n kẽ a pʋgẽ to-to wã sɩd kenga Hebre kiris-nebã pels Zerizalɛm, bala b tẽebã yĩnga, b ra maanda sũ-mar namsg wʋsg la yaalg taoore. (Tʋʋma 8:1; 12:1-5) Woto me, a Poll goamã tõe n kenga kiris-nebã pels rũndã-rũndã. Tõnd me sẽn ne tɩ Wẽnnaam sẽn kãab t’a na n waa ne tẽng zug arzãn a Rĩungã sẽn yaa tɩrgã naam sasa pidsg kolgame wã yĩnga, d segd n vʋʋsa ne d mensã tʋʋma, la d maan d sẽn tõe fãa sẽn na yɩl n kẽ vʋʋsg kãng pʋgẽ.—Matɩe 6:10, 33; 2 Pɩɛɛr 3:13.

[Foto rãmba, seb-neng 31]

Wẽnnaam sẽn kãab tẽng zug arzãnã na n paama pidsg a vʋʋsg daarã saabẽ