Rɩk-y a Zeova togs-n-taar y kambã wubr pʋgẽ

“Biribl bʋg la a ba ka remsda?”—HEBRE DÃMBA 12:7, Kãab-paalgã Koe-noogo.

1, 2. Bõe yĩng tɩ yaa toog ne roagdbã tɩ b wub b kambã rũndã-rũndã?

VAEES-N-GƐSG b sẽn maan Zapõ yʋʋm a wãn sẽn loog wilgame tɩ kãsemb nins b sẽn sʋkã, sẽn zems pʋɩ-sʋk ra tagsdame tɩ roagdbã ra pa yẽsd wʋsg ne b kambã, la tɩ roagdbã põnegda b kambã tɩ looge. Vaees-n-gɛsg a to la b maan tẽn-kãng pʋgẽ, n mik tɩ sẽn zems ned a yembr a naas zug sẽn leokã sak n deegame tɩ b pa mi b sẽn na n tall manesem ning ne b kambã ye. Pa yaang tẽnsẽ wã bal la yaa woto ye. “Kanada, roagdb wʋsg sak n deegame tɩ b pa mi b sẽn na n maan to-to n yɩ roagdb sẽn wubd b kamb sõma ye,” woto la The Toronto Star wilg-yã. Zĩig fãa, roagdbã neeme tɩ yaa toog tɩ b wub b kambã.

² Bõe yĩng tɩ yaa toog ne roagdbã tɩ b wub b kambã? Bʋʋm kãseng a yembr yaa tõnd sẽn be “yaoolem wakate,” la ‘tood sasa’ wã yĩnga. (2 Tɩmote 3:1) Sẽn paase, wala Biiblã sẽn yetã, “ninsaalba sũya tagsg yaa wẽnse hal b yãadem wakate.” (Sɩngre 8:21) La sẽn yɩɩd fãa yaa kom-bɩɩsã la a Sʋɩtãan tõe n paam nana-nana. A yaa wa “gɩgemd sẽn kelemda” n baood sẽn pa tar-b minimã n na n yõke. (1 Pɩɛɛr 5:8) Yaa sɩd tɩ zu-loeesã yaa wʋsg ne roagdb nins sẽn yaa kiris-nebã, sẽn dat n wub b kambã ‘ne Zusoaba saglgo la a zãmsgã.’ (Efɛɛz rãmba 6:4) Wãn to la roagdbã tõe n sõng b kambã tɩ b wa lebg a Zeova balemdb sẽn bɩ tẽebã wɛɛngẽ, sẽn tõe n bãng ‘sõama ne wẽng n bake’?—Hebre dãmba 5:14.

3. Bõe yĩng tɩ roagdbã zãmsg la b sor-wilgr yaa tɩlae sẽn na yɩl n tõog n wub kambã?

³ “Biig bul n yaa yalma,” woto la Rĩm a Salomo sẽn yaa yam soabã togs-yã. (Yelbũna 13:1; 22:15) Sẽn na yɩl n yiis yalemd kãngã b sũyẽ wã, kambã ratame tɩ b roagdba rems-b ne nonglem. La pa wakat fãa la kom-bɩɩsã sakd rems-kãngã ne sũ-noog ye. Sɩda, naoor wʋsgo, b pa nong saglg lɛ-lɛ, baa sẽn yaa ned ning n kõ-a ye. Woto n kɩt tɩ roagdbã segd n bao n “zãms biig a manesem sẽn tog n yɩ to-to.” (Yelbũna 22:6) Kambã sã n sak kiblg a woto, tõe n fãaga b yõorã. (Yelbũna 4:13) Ad sɩd tara yõod wʋsg tɩ roagdbã bãng b kambã zãmsg sẽn dat n yɛɛlga!

Kiblg sẽn dat n yɛɛlga

4. Gom-biig ning sẽn yaa ‘kiblgã’ b sẽn tũnug ne Biiblã pʋgẽ wã pipi võor yaa bõe?

⁴ Roagdb kẽer yɛɛsda b na n wa yeel tɩ b namsda b kambã, yĩngã wɛɛngẽ, ne no-goam bɩ yĩn-sidg poglgo, tɩ kɩt tɩ b pa remsd b kambã ye. Yɛɛs-kãngã buud pa segd n zĩnd d nengẽ ye. Gom-biig ning sẽn yaa “kiblg” b sẽn tũnug ne Biiblã pʋgẽ wã pa tɩ loe ne pãng maaneg bɩ toom buud fãa ye. Gerɛk gom-biig ning b sẽn lebg tɩ yaa “kiblgã” reng n tɩ loee ne zãmsgo, remsgo, la wakat ningã yaa sɩbgr kãn-kãe b sẽn kõt ne nonglem.

5. Bõe yĩng t’a Zeova yel-manesmã ne a nin-buiidã vaeesg be nafre?

⁵ A Zeova kõta makr sẽn zems zãnga, a sã n wa kõt kiblg kãng buudu. Tʋm-tʋmd a Poll rɩka a Zeova n mak ne ba sẽn yaa ninsaal n gʋlse: “La biribl bʋg la a ba ka [remsda, Kãab-paalgã Koe-noogo]? . . . Tõnd ba rãmba rag n sɩbga tõnd wakat bilf pʋgẽ wa b sẽn data, la Wẽnnaam sɩbgda tõnd d manegr yĩnga, tɩ d lebg pʋ-peelem dãmb wa bãmba.” (Hebre dãmba 12:7-10) N-ye, a Zeova  kibenda a nin-buiidã n dat tɩ b yɩ sõms bɩ yɩlma. Sɩd-sɩda, d tõe n zãmsa yɛl wʋsg kambã kiblg wɛɛngẽ, d sã n ges a Zeova sẽn zãms a nin-buiidã to-to wã.—Tõodo 32:4; Matɩe 7:11; Efɛɛz rãmba 5:1.

Nonglmã tara pãnga

6. Bõe yĩng tɩ tõe n yɩ toog ne roagdbã tɩ b rɩk a Zeova nonglmã togs-n-taare?

⁶ “Wẽnnaam yaa nonglem,” woto la tʋm-tʋmd a Zã togs-yã. Woto yĩnga, wakat fãa, yaa ne nonglem la a Zeova kõt zãmsgo. (1 Zã 4:8; Yelbũna 3:11, 12) Woto rat n yeelame tɩ roagdb nins sẽn tar nonglem ne b kambã tagsdame tɩ yaa nana tɩ b rɩk togs-n-taar ne a Zeova zĩ-kãng wɛɛngẽ bɩ? Ayo. Wẽnnaam nonglmã tika noy zutu. La Gerɛk mit a yembr wilgame tɩ nonglem kãng “pa naag wakat fãa ne tõnd sẽn nong bũmb ningã ye.” Wẽnnaam pa basd t’a nonglmã kɩt t’a põneg a nin-buiidã ye. Wakat fãa a geta sẽn yaa sõma n yɩɩd ne a nin-buiidã.—Ezai 30:20; 48:17.

7, 8. a) Nonglem mak-bʋg sẽn tik noy zut la a Zeova kõ a yel-manesmã ne a nin-buiidã pʋgẽ? b) Wãn to la roagdbã tõe n dɩk a Zeova togs-n-taar n sõng b kambã tɩ b tõog n tũ Biiblã noyã?

⁷ Ges-y nonglem ning a Zeova sẽn tall ne Israɛll nebã. A Moiiz tũnuga ne makr sẽn be rasãnd n bilg a Zeova nonglmã ne Israɛll buudã sẽn da yaa bu-paalgã. D karemda woto: “Zusoaba maana bãmb wa sɩl-kẽeng sẽn nekd a kamb a tʋkẽ n zãmsd bãmb yɩgbo n yaool n tẽeg a pɩgs n kokd bãmb tɩ b zao a pɩgsa zutu. Yaa Zusoaba bal n tall bãmba, Wẽnnaam a to ka zĩnd ne [a Zakoob] ye.” (Tõodo 32:9, 11, 12) Sẽn na yɩl n zãms a kambã yɩgbo, sɩl-kẽeng ‘nekda a kamb a tʋkẽ,’ n fibd a pɩgsã sẽn na yɩl t’a kambã yɩge. Liuun-bil sã n wa baas n yi tʋka pʋgẽ, sẽn nong n be pĩig sẽn zãnt zugã, a ma wã ‘tẽegda a pɩgsã’ n kok a biigã. Sã n wẽnd a biigã na n wẽe tẽnga, a ma wã ‘kokd-a-la a pɩgsa zutu.’ A Zeova gesa Israɛll sẽn yaa bu-paalgã yell woto ne nonglem. A kõo a nin-buiidã a Moiiz Tõogã. (Yɩɩl Sõamyã 78:5-7) Rẽ, Wẽnnaam gesa buudã yell neere, n sak n fãag-ba, b sã n da be zu-loees pʋgẽ.

⁸ Wãn to la roagdb nins sẽn yaa kiris-nebã rɩkd togs-n-taar ne a Zeova nonglmã? Pipi, b segd n zãmsa b kambã noy nins sẽn be Wẽnnaam Gomdã pʋgẽ wã. (Tõodo 6:4-9) B sẽn datã yaa b sõng kom-bɩɩsã tɩ b zãms n dɩk sard tɩ zems ne Biiblã noyã. B sã n wa maand woto, roagdb sẽn tar nonglem geta b kambã yell wa sɩlg sẽn kokd a kamba, n get b sẽn tũud noy nins b sẽn zãmsã to-to. Kambã yʋʋm sẽn paasd tɩ b kõt-b paam-m-meng n paasd bilf-bilfã, roagdb sẽn get b kamb yell seglame n na n ‘kok’ la b ‘rɩk b kambã b pɩgsã zutu,’ b sã n wa be yell pʋgẽ. Yaa wa yel-bʋg buudu?

9. Sẽn yɩɩd fãa, roagdb sẽn tar nonglem segd n bãnga yel-bʋg sẽn tõe n wa tiiri? Rɩk-y makre.

⁹ Wẽnnaam a Zeova keooga Israɛll nebã tɩ b gũus tɩ tũud-n-ta-wẽnsã wata ne yelle. (Sõdbo 25:1-18; Ɛsdras 10:10-14) Tall tũud-n-ta-wẽns me yaa yell sẽn wɛ rũndã-rũndã. (1 Korẽnt dãmba 15:33) Roagdb nins sẽn yaa kiris-nebã segd n dɩka a Zeova togs-n-taar zĩ-kãngã wɛɛngẽ. Yʋʋm 15 bipugl yʋʋr sẽn boond t’a Lisa ra nonga biribla, la biriblã ra pa tar bipuglã zak rãmb vɩɩm manesem la b tẽeb ye. A Lisa togsa woto: “Mam roagdbã yɩɩ tao-tao n yã tɩ toeeng n be mam tagsgã pʋgẽ tɩ b na n bao a tɩɩm. Wakat ninga b remsda maam, la wakat a taaba, b kengda mam pɛlg ne sũ-bʋgsem.” B zĩnda ne a Lisa n maag b yĩng n kelg-a. Woto sõng-a lame t’a mao ne yellã yẽgre: a Lisa ra ratame t’a reem-n-taasã sak-a. *

Ket-y n sõsd sõma ne-ba

10. Wãn to la a Zeova kõ mak-sõngo, sã n yaa ne sõs ne Israɛll nebã wɛɛngẽ?

¹⁰ Sẽn na yɩl n tõog kambã zãmsg pʋgẽ,  roagdbã segd n modga sõma n ket n sõsd sõma ne b kambã. Baa ne a Zeova sẽn mi bũmb ning sẽn be tõnd sũurẽ wã zãngã, a yeta tõnd tɩ d gom ne-a. (1 Kɩbaya 28:9) A Zeova sẽn kõ Israɛll nebã Tõogã poore, a yãka Levi nebã tɩ b kõ-b zãmsgo, la a kõo no-rɛɛsdb tɩ b tɩ sõng-b tɩ b tags n dems b mense. A leb n wilgame t’a tʋllame n kelg b pʋʋsgã.—2 Kɩbaya 17:7-9; Yɩɩl Sõamyã 65:3; Ezai 1:1-3, 18-20; Zeremi 25:4; Galat dãmba 3:22-24.

11. a) Wãn to la roagdbã tõe n gom sõma n paas ne b kambã? b) Bõe yĩng tɩ tar yõod ne roagdbã tɩ b yɩ neb sẽn kelgd sõma, b sã n wa sõsd ne b kambã?

¹¹ Wãn to la roagdbã rɩkd a Zeova togs-n-taare, b sã n wa sõsd ne b kambã? Pipi, la sẽn yɩɩd fãa, b segd n baoa sẽk n zĩnd ne-ba. Roagdbã me segdame n da gom yaar tɩ wa yɩ paoogr ne kambã ye. Wala makre, “Yaa woto bal bɩ? M da tagsdame tɩ ra yaa bũmb sẽn sek togsga,” “Loog ka ne f yalemdã,” “Fo tẽeda wãn bala? Fo nan yaa yãaga.” (Yelbũna 12:18) Sẽn na yɩl n tus kambã tɩ b togs sẽn be b sũyã pʋsẽ, roagdb sẽn tar yam modgdame n na n yɩ neb sẽn mi kelgre. Roagdb nins toor sẽn kae ne b kambã, b sã n yaa kɩdsã, kambã me sã n wa bɩ b toor pa na n zĩnd ne-b ye. Wakat fãa, a Zeova tʋlgame n kelg a nin-buiidã. A ket n kelgda neb nins sẽn sikd b mens n kedgd n teesd yẽ pʋʋsg pʋgẽ wã.—Yɩɩl Sõamyã 91:15; Zeremi 29:12; Luk 11:9-13.

12. Roagdbã sẽn na n pukd zʋgd bʋs n na n kɩt tɩ yɩ nana n yɩɩd ne b kambã tɩ b pẽneg-ba?

¹² Ges-y wãn to me la Wẽnnaam zʋg-sõma wã nens kẽer kɩt tɩ yɩ nana ne a nin-buiidã tɩ b pẽneg-a. Wala makre, pĩnd wẽndẽ Israɛll rĩm a Davɩɩd maana yel-wẽn-kãsenga, a sẽn maan yoob ne a Batseba wã. A Davɩɩd sẽn yɩ ninsaal sẽn pa zems zãngã yĩnga, a maana yel-wẽn-kãsems a taab a vɩɩmã pʋgẽ. La a yaool n zɩ n bas n pa pẽneg a Zeova la a bao sugr ne keoogr a nengẽ ye. Sãmbg sẽn ka be, Wẽnnaam nonglmã la a nimbãan-zoeerã kɩtame tɩ yɩ nana n yɩɩd ne a Davɩɩd t’a tek yam n sak a Zeova yɛsa. (Yɩɩl Sõamyã 103:8) B sã n pukd Wẽnnaam zʋgd wala nimbãan-zoeerã, roagdbã tõe n sõngame n kɩt tɩ sõsg sõma zĩndi, baa b kambã sã n tudgi.—Yɩɩl Sõamyã 103:13; Malaki 3:17.

Yɩ-y maan tɩ zems rãmba

13. Yɩ maan tɩ zems soab rat n yeelame tɩ bõe?

¹³ Roagdbã sã n wa kelgd b kambã, b segd n yɩɩ maan tɩ zems rãmba, la b puk “yam ninga sẽn yit yĩngra.” (Zak 3:17) “Bɩ nebã fãa bãng yãmb maan-tɩ-zemsã,” woto la tʋm-tʋmd a Poll gʋls-yã. (Filip rãmba 4:5, NW ) Yɩ maan tɩ zems soab rat n yeelame tɩ bõe? Gerɛk gom-biig ning b sẽn lebg tɩ “maan tɩ zemsã” võor a yembr yaa “f sẽn na n pa baoodẽ tɩ b tũ tõogã wa sẽn gʋlsã ne pa-vigsdi.” Roagdbã sã n wa teend vɩɩmã manesem la tẽebã noyã, wãn to la b tõe n yɩ maan tɩ zems rãmba?

14. Wãn to la a Zeova tall maan-tɩ-zems ne a Lote?

¹⁴ A Zeova kõta mak-kãseng ne yɩ maan tɩ  zems soabã wɛɛngẽ. (Yɩɩl Sõamyã 10:17) A sẽn wa n sagl a Lot ne a zakã rãmb tɩ b yi Sodom galʋ-tẽngã sẽn paam taal n gũud sãoongã, a Lot ra ‘kaoosdame.’ Rẽ poore, a Zeova malɛkã sẽn wa n yeel-a t’a zoe n kẽng tãngã zug babgẽ wã n põsã, a Lot yeelame: “Mam ka tõe n zoe n ta tãnga . . . ye. Ges-y-yã, tẽng kãngã [Zoaar] pẽeme, la mam tõe n zoe n taa be. A yaa bilfu. Bɩ y bas tɩ m ta be n põse. A ka tẽn-bil sɩda?” A Zeova manesem yɩɩ wãn to? A yeelame: “Be neere, mam sakame, m ka na n sãam tẽng ninga fo sẽn gomd a yella ye. Nang pãng n zoe n kẽ be!” (Sɩngre 19:16-21, 30) A Zeova ra sakame n maan wa a Lot sẽn kosã. N-ye, roagdbã segdame n gãd noy nins Wẽnnaam a Zeova sẽn yãk a Gomdã sẽn yaa Biiblã pʋgẽ wã. Baasg zãnga, b segdame n tõog n zems b mens ne b biigã tʋlsem, rẽ sã n pa kɩɩsd Biiblã noyã.

15, 16. Zãms-bʋg la roagdbã tõe n paam ne bilgr ning sẽn be Ezai 28:24, 25 pʋgẽ wã?

¹⁵ Yɩ maan tɩ zems soab me baoodame tɩ d segl kambã sũy tɩ b tõog n sak saglse. A Ezai rɩka bilgr n mak a Zeova ne koaad n yeele: “Rɩ yĩnga koaad kãasda a pʋʋg wakat fãa n ward-a la a kood-a n ka basdẽ sɩda? Yẽ sã n maneg a zĩigã, a na n fẽrga siili la a fẽrg kiu la a bʋd ki ne kamaan b zĩisẽ la a toog bɩt b kɩremsã.”—Ezai 28:24, 25.

¹⁶ A Zeova “koodame sẽn na yɩl n bʋd bõn-buudu,” la a “manegdame la a ward a zĩigã” (NW ). Yaa woto la a segend a nin-buiidã sũy n yaool n kibl-ba.. Roagdbã sã n wa remsd b kambã, wãn to la b tõe n ‘ko’ b kambã sũyã? Ba a yembr n dɩk a Zeova togs-n-taare, a sẽn wa n demsd a yʋʋm a naas biriblã. A biriblã pãba yak biribla, t’a bool-a n maag a yĩng n kelg bũmb ning sẽn kɩt t’a maan woto wã. Rẽ poore, sẽn na yɩl n ‘ko’ a a biriblã sũuri, ba wã togs-a-la kɩbar a yembr sẽn wilgd biig sẽn tar pãng n yɩɩd a taab n nong n maand-b pãng sẽn pãb biribl kɩdga hal tɩ zab-a wʋsgo. A biriblã sẽn wʋm kɩbarã, a yeelame tɩ b segd n sɩbga biig ning pãng sẽn yɩɩd a taabã n pãb biig a to wã. ‘Koob’ a woto segla biigã sũur n kɩt tɩ yɩ nana ne-a n yɩɩd t’a bãng t’a sẽn pãb yakã biriblã ra yaa maan f to pãnga, la tɩ ra yaa wẽnga.—2 Sãmwɛll 12:1-14.

17. Zãms-bʋg sẽn tɩ loe ne roagdbã remsg la b kõ Ezai 28:26-29?

¹⁷ Rẽ poore, a Ezai maka a Zeova remsgã ne ka-koaad tʋʋmd a to: ki bɩ bɛng pãbre. Koaad tũnugda ne teed buud toor-toor wa sẽn zems ne fɩɩbã keelem sẽn yaa to-to wã. Ra-bãand la b tũnugd ne n pãbd zẽ-biis sẽn tar yũ-noog n yaa sablgã sẽn pa kɛgma, la ra yaa ra-bedr la b ra tũnugd ne n pĩngd zẽ-biis sẽn tar yũ-noog n pa sablgã, la ra yaa ne bilim-bilim la b tũnugd n pãbd bõn-bɛɛl fɩɩb sẽn kɛgma.  Baasg zãnga, a pa na n pãb bõn-bɛɛl kɛgemsã hali n beds-b ye. Woto me, a Zeova sã n dat n yiis bũmb sẽn pa sõma a nin-buiidã nengẽ, a toeemda a manesmã tɩ zems ne ratmã la yɛlã sẽn yaa to-to wã. A zɩ n tʋm ne a pãngã tɩ looge, bɩ n wilg toom tɩ loog noor ye. (Ezai 28:26-29, Sebr Sõngo) Kamb kẽer yɩta tao-tao n sak b roagdbã, tɩ ye pa tɩlae tɩ b paas bũmb ye. La a taab ratame tɩ b tẽeg-b n yɩlem wʋsgo, t’a taab rat tɩ b gom tɩ b sak ne manesem sẽn tar pãng n yɩɩda. Roagdb sẽn yaa maan tɩ zems rãmb na n demsa biig fãa tɩ zems ne-a.

Maan-y tɩ zakã pʋgẽ sõss tall yamleoogo

18. Wãn to la roagdbã tõe n bao sẽk n maan zak pʋgẽ Biibl zãmsg wakat fãa?

¹⁸ Zak pʋgẽ Biibl zãmsgã maaneg wakat fãa la daar verse wã zug sõsg daar fãa bee manesem nins sẽn yaa sõma n yɩɩd yãmb sẽn tõe n tũnug ne n zãms y kambã sʋka. Zak pʋgẽ zãmsg tara pãng n yɩɩda, b sã n maand-a wakat fãa. B sã n pa yãk zãmsgã wakat n wa tiig zĩig pʋgẽ n dat n maan-a, yaa toog tɩ b tõog n maan-a wakat fãa. Rẽnd roagdbã segd n ‘baoa sẽk’ zãmsgã yĩnga. (Efɛɛz rãmba 5:15-17) Tõog n yãk wakat takɩ sẽn zems ne nebã fãa tõe n yaa toogo. Zak soab a ye sẽn yã t’a kambã yʋʋm sẽn vẽsgdã b sẽkã lebga toor-toore, tɩ ra kɩt tɩ yaa toog n yɩɩd tɩ b tigim zakã neb fãa. La, zakã neb fãa ra bee ne taab tigingã tigiss yʋndo. Woto kɩtame tɩ zakã soab segl tɩ b maan zakã pʋgẽ zãmsgã yʋʋn-kãensã a yembr sasa. Segl-kãng zemsame. Kamb a tãabã fãa ya a Zeova sõgen dãmb sẽn deeg lisg masã.

19. Wãn to la roagdbã tõe n dɩk a Zeova togs-n-taare, b sã n wa maand zak pʋgẽ zãmsgo?

¹⁹ Baasg zãnga, karem tagsa wʋsg bal sẽn yit Gʋlsg Sõamyã pʋgẽ zãmsgã wakat pa sek ye. A Zeova tũnuga ne maan-kʋʋdbã n zãms Israɛll buudã a sẽn lebs n luglã, b sẽn ‘karem tõoda neba fãa taoor n bilg-a tɩ b bãng a võorã.’ (Nehemi 8:8) Ba a yembr sẽn tõog n sõng a kamb a yopoe fãa tɩ b nong a Zeova ra nong n kẽe a ro-gãagẽ wã wakat fãa sẽn na yɩl n deng n segl zak pʋgẽ zãmsgã, n zemsd zãmsgã tagsa ne biig fãa ratem.  A ra maandame tɩ zãmsgã be yamleoog ne a kambã. A biribl a yembr sẽn bɩ yeela woto: “Zãmsgã ra bee yamleoog wakat fãa. Tõnd sã n da tãood ball zaka pʋgẽ, zãmsga wakat sã n ta d basda ballã tãoog tao-tao n zoe n kẽnge. Semenã pʋgẽ, yaa zaaba nins sẽn be yamleoog n yɩɩdã a yembre.”

20. Yel-bʋg sẽn tõe n wa kambã wubr pʋgẽ la d na n leb n gese?

²⁰ Yɩɩl-gʋlsdã togsa woto: “Gese, komdibli yaa pʋɩɩr Zusoaba sẽn kõta. Ned biig a sẽn dog yaa yaoodo.” (Yɩɩl Sõamyã 127:3) Kambã wubr baooda sẽk la modgre, la d sã n maan woto tɩ zemse, tõe n wa kõo d kambã vɩɩm sẽn pa sate. Ad woto sɩd yaa keoor sẽn be rasãnd wʋsgo! Rẽ, bɩ d rɩk a Zeova togs-n-taar ne yẽesem, d sã n wa wubd d kambã. Baasg zãnga, roagdbã sẽn tar zɩɩb n na n ‘wub [kambã] ne Zusoaba saglgo la zãmsgã’ pa rat n yeel tɩ b na n tõoga b tʋʋmdã tɩ sik ka be ye. (Efɛɛz rãmba 6:4) Baa biig sã n paam zãab sõma wʋsgo, a tõe n lebga tõat n bas a Zeova balengo. Sã n yaa woto, d na n maana wãna? Yaa rẽ yell la d na n gom sõsg ning sẽn pʋgdã pʋgẽ.

[Tẽngr note]

Bõe la y leokda?

• Wãn to la roagdbã tõe n dɩk togs-n-taar ne a Zeova nonglmã b sẽn bilg Tõodo 32:11, 12 pʋgẽ wã?

• Bõe la y zãms-yã, sã n yaa ne a Zeova sẽn gom ne Israɛll nebã to-to wã wɛɛngẽ?

• Bõe la a Zeova sẽn kelg a Lot kosgã zãmsd tõndo?

• Kambã remsg pʋgẽ, zãms-bʋg la Ezai 28:24-29 kõt tõndo?

[Zãmsgã sogsgã]

[Foto, seb-neng 21]

A Moiiz rɩka a Zeova sẽn zãmsd a nin-buiidã n mak ne sɩl-kẽeng sẽn maand to-to ne a kambã

[Foto rãmba, seb-neng 22]

Roagdbã segd n baoa sẽk b kambã yĩnga

[Foto, seb-neng 23]

“Semenã pʋgẽ, yaa zaaba nins sẽn be yamleoog n yɩɩdã a yembre”