Wãn to la y tõe n sõng ‘bi-menemdga’?
Wãn to la y tõe n sõng ‘bi-menemdga’?
“Maan[-y] sũ-noog n deem . . . a ra menemame, la mam le yã-a lame.”—LUK 15:32.
1, 2. a) Kom-bɩɩs kẽer manesem yɩɩ wãn to ne kiris-neb sɩdã? b) Wãn to la roagdb la kamb nins sẽn be yel-kãngã pʋgẽ wã tõe n tagse?
“M NA N basa sɩdã!” Ad sɩd yaa sũ-sãoong tɛkẽ n kõ roagdb sẽn yaa wẽn-zoɛtba, sẽn modg wʋsg n wub b kamb kiris-neb sorã pʋgẽ, n wa wʋm gom-kãensã b biig noorẽ! Kom-bɩɩs a taab ‘zãaga ne’ sɩdã n pa tol n yeel b sẽn tagsd ye. (Hebre dãmba 2:1) Bãmb wʋsg wõnda a Zezi yel-bũndã bi-menemdgã, sẽn bas a ba wã zak n tɩ sãam a rogem-pʋɩɩrã tẽn-zãrgẽ wã.—Luk 15:11-16.
2 Baa ne a Zeova Kaset rãmb wʋsg sẽn pa tar zu-loe-kãngã wã, ne neb nins zu-loe-kãngã sẽn tarã, belsg goam kae sẽn tõe n yiis b toogã zãng fasɩ ye. La bũmb a yembr d sẽn pa segd n yĩm yaa sũ-sãams nins sẽn tõe n wa paam bi-kɩɩsdã. Tõe t’a sũur kasetã namsd-a lame. A Zezi yel-bũndã pʋgẽ, biribl menemdgã wa baasame n “bao yam n kõ a menga,” n lebg n wa tɩ kõ a ba wã sũ-noogo. Wãn to la roagdbã la neb a taabã sẽn be tigingã pʋgẽ wã tõe n sõng kom-menemdsã tɩ b ‘bao yam n kõ b mense’?—Luk 15:17, Sebr Sõngo.
Bũmb ning sẽn kɩt tɩ kẽer basd sɩdã
3. Bʋʋm kẽer bʋs n tõe n kɩt tɩ kom-bɩɩsã bas kiris-neb tigingã?
3 Kom-bɩɩs tus kobs n balemd a Zeova ne sũ-noog kiris-neb tigingã pʋgẽ. La bõe yĩng masã tɩ kom-bɩɩs a taabã basd sɩdã? B tõe n tagsdame tɩ bũmb la b kongd tɩ dũniyã tõe n kõ-ba. (2 Tɩmote 4:10) Bɩ b tõe n geta a Zeova bãgrã sẽn kõt koglgã wa bũmb sẽn boogd b soog-m-mengã wʋsgo. Sũur kaset sẽn tar taale, raab sẽn yaa kãseng ne pag bɩ ne raoa, bɩ f sẽn na n tʋll tɩ f reem-n-taasã sak-f me tõe n kɩtame tɩ bi-bɩɩg bas a Zeova bãgrã. Bi-bɩɩg tõe n basa Wẽnnaam sõgenego, a sẽn tagsd t’a roagdbã bɩ kiris-ned a to maanda wa b tũuda sɩdã n yaool n pa tũud-a wã yĩnga.
4. Yaa bʋʋm kãseng bʋg n nong n kɩt tɩ kom-bɩɩsã bas sɩdã?
4 Biig tõdgr manesem nong n yaa bãn sẽn wilgd t’a ka pãng tẽebã wɛɛngẽ ye, rẽ nong n wilgda sẽn be a sũurã pʋgẽ wã. (Yelbũna 15:13; Matɩe 12:34) Baa bʋʋm ning sẽn kɩt tɩ bi-bɩɩg zãag ne sɩdã, yellã yẽgr nong n tɩ loee ne a sẽn pa paam “sɩdã bãngr hakɩk[ã].” (2 Tɩmote 3:7, NW ) Kom-bɩɩsã pa segd n balem a Zeova ne rok-m-zugẽ bal ye. Tara yõod wʋsg tɩ bãmb mensã tall zood sẽn tar pãng ne a Zeova. Bõe n na n sõng-b tɩ b maan woto?
Kolg-y Wẽnnaam
5. Bõe n yaa tɩlae sẽn na yɩl tɩ bi-bɩɩg tall zood ne Wẽnnaam?
5 Karen-biig a Zak gʋlsame: “Bɩ y kolg Wẽnnaam, la bãmb na kolg yãmba.” (Zak 4:8) Sẽn na yɩl n maan woto, bi-bɩɩg segdame n paam sõngre, sẽn na yɩl n tall nonglem ne Wẽnnaam Gomdã. (Yɩɩl Sõamyã 34:9) Sɩngrẽ wã, a na n data ‘bĩisim,’ sẽn yaa Biiblã zãms-yẽgã. La Wẽnnaam Gomdã sã n wa kõt-a sũ-noog t’a nong “rɩɩb sẽn yaa taok” sẽn yaa tẽeb zãmsg sẽn tar pãngã, pa na n kaoos la a bɩ tẽebã wɛɛngẽ ye. (Hebre dãmba 5:11-14; Yɩɩl Sõamyã 1:2) Bi-bɩɩg sẽn sak n deeg t’a fõr n kẽe dũniyã vɩɩm manesem pʋgẽ sɩngame n nand tẽebã yɛla. Yaa bõe n sõng-a t’a lebg n wa? A saka saglg ning b sẽn kõ-a t’a karem Biiblã tõre, n kell n tũ Biiblã kareng na-kẽndre. N-ye, Wẽnnaam Gomdã kareng wakat fãa tara yõod wʋsg sẽn na yɩl n tall zood sẽn tar pãng ne a Zeova.
6, 7. Wãn to la roagdbã tõe n sõng b kambã tɩ b tall nonglem ne Wẽnnaam Gomdã?
6 Ad sɩd tara yõod wʋsg tɩ roagdbã sõng b kambã tɩ b tall nonglem ne Wẽnnaam Gomdã! Baa ne b sẽn tar zak pʋgẽ Biibl zãmsg sẽn maand n pa vaandẽ wã, bipugl n maan tũud-n-taar ne bi-beese. A tẽra woto a zak pʋgẽ Biibl zãmsgã wɛɛngẽ: “M baaba sã n da maand sʋgsgã, m da leokda sẽn gʋlsã bal n pa tol n zẽk m nengã n ges-a meng ye.” Zãmsgã gill saab zak pʋgẽ zãmsgã sasa pa sek ye, roagdb nins sẽn tar yamã segd n tũnuga ne zãmsg minim. (2 Tɩmote 4:2) Sẽn na yɩl tɩ bi-bɩɩg nong zãmsgã, a segd n gesame tɩ zãmsgã pak-a lame. Bõe yĩng tɩ y pa na n maan sʋgsg sẽn kɩtd tɩ biigã togs a sẽn tagsde? Sagl-y bi-bɩɩgã t’a tũ sagls nins sẽn be zãmsgã pʋgẽ wã. *
7 Sẽn paase, maan-y tɩ sõsgã sẽn tik Gʋlsg Sõamyã zugã tall yamleoogo. Sã n zemsame, bɩ y kɩt tɩ kambã reem yɛl Biiblã sẽn gom b yelle. Kɩt-y tɩ b yã tẽng ning yɛlã sẽn zĩndẽ wã zĩig b yamẽ wã. Y sã n tũnug ne kart dãmb la taablo rãmba, tõe n sõng-y-la ne rẽ maanego. N-ye, b sã n zĩnd n tags rẽ zug bilfu, zãmsgã zakã pʋgẽ tõe n talla pãng la a tik yɛl toor-toor zutu. Roagdbã me segdame n ges bãmb mengã zems-n-taar ne a Zeova wã sẽn yaa to-to. Bãmb mensã sã n kolgd a Zeova, b tõe n sõnga b kambã tɩ b maan woto.—Tõodo 6:5-7.
8. Wãn to la pʋʋsg sõngd ned t’a kolg Wẽnnaam?
8 Pʋʋsgã sõngda ned me t’a kolg Wẽnnaam. Bipugl yʋʋm sẽn zems piig la a wãn maana yɩɩre, a sẽn pa mi a sã n na n tũu kiris-neba vɩɩm manesem bɩ a sã n na n talla tũud-n-taar ne zo-rãmb sẽn da pa tar a tẽebã. (Zak 4:4) Bõe la a maan dẽ wɛɛngẽ? Ad a sẽn sak n yeele: “Pipi wã, m pʋʋsa a Zeova m sẽn da tagsd to-to wã wɛɛngẽ.” A goamã baasgẽ a yeelame t’a pʋʋsgã paama reegre, a sẽn wa n baas n paam zoa kiris-neb tigingã pʋgẽ, n tõe n togs-a a sũurẽ yɛlã. A ra tagsdame t’a Zeova ra wilgd-a-la sore, n sɩng n tar zood ne Wẽnnaam. Roagdbã tõe n sõnga b kambã tɩ b pʋʋsgã yɩ sõma n paase. Roagdbã sã n wa pʋʋsd ne b zakã rãmba, b tõe n sɩd pʋʋsdame tɩ yit b sũurẽ wã, sẽn na yɩl tɩ b kambã bãng tɩ b roagdbã tara zems-n-taar ne a Zeova.
Tall-y sũ-mare, la y ra vigs noyã zut ye
9, 10. Mak-sõng bʋg la a Zeova kõ-yã, sã n yaa ne tall sũ-mar ne Israɛll nebã sẽn yɩ kɩɩsdbã wɛɛngẽ?
9 Bi-bɩɩg sã n wa sɩng sɩdã basgo, a tõe n baoodame n na n yɩ a yembre, la a pa rat n sak t’a roagdbã gom ne-a tẽebã yɛl yell ye. Bõe la roagdbã tõe n maan yel-toog kãngã buud taoore? Ges-y a Zeova sẽn maan to-to ne tẽn-kʋdem wẽndẽ Israɛllã. A maana sũ-mar ne Israɛll nebã ‘sũyã sẽn da yaa kɛgemsã,’ sẽn yɩɩd yʋʋm 900, t’a yaool n bas-b b kɩɩsgã pʋgẽ. (Yikri 34:9; 2 Kɩbaya 36:17-21; Rom dãmba 10:21) Baa ne b sẽn ‘mak-a’ naoor wʋsgã, a Zeova ra yaa ‘ninbãan-zoɛt’ ne-ba. “Naoor wʋsgo bãmb sigsa b sũuri n ka sak n maan wa b sũura sẽn da yik to-to wã ye.” (Yɩɩl Sõamyã 78:38-42) Wẽnnaam da pa tar taal a manesmã ne-bã pʋgẽ ye. Roagdb sẽn tar nonglem rɩkda togs-n-taar ne a Zeova, la b tar maag-m-menga, b sã n modgd n sõngd biigã t’a pa sakd tao-tao ye.
10 Tall sũ-mar bɩ maag-m-meng rat n yeelame me tɩ f zãgs tɩ f kõn bas saagr tallg tɩ zems-n-taarã na n leb n waame ye. A Zeova kõo mak-sõng n wilg d sẽn na n tall sũ-mar to-to. A yãka yam n tʋm koe-taasdb Israɛll nebã nengẽ “n ka bas ye.” A Zeova “da zoeta b neba . . . nimbãanega,” baa ne b sẽn ‘yaal Wẽnnaam tʋm-tʋmdba [“koe-taasdba,” NW ] n ka nand Wẽnnaam goama.’ (2 Kɩbaya 36:15, 16) A kosa Israɛll nebã tɩ “ned kam fãa bas a manesem wẽnga.” (Zeremi 25:4, 5) La a Zeova pa kɩɩs a no-tɩrsã ye. B ra yeela Israɛll nebã tɩ b tek yam n sak Wẽnnaam ne a noyã yɛsa.
11. Wãn to la roagdbã tõe n yɩ sũ-mar dãmb la b ra vigs noyã zutu, b manesmã ne biig sẽn bʋdg pʋgẽ?
11 Roagdbã tõe n dɩka a Zeova togs-n-taar n yɩ sũ-mar dãmba, la b ra yɩ tao-tao n koms raood n bas biig sẽn bʋdg ye. B pa na n bas saagr maaneg ye, la b na n yãka yam n ket n maandẽ tɩ sõsg sõma-sõma tõog n zĩndi, bɩ n ye zĩndi. Roagdbã na n gãda no-tɩrsã, la b tõog n ‘da bas’ biigã boolg t’a lebg n wa sɩdã pʋgẽ ye.
B sã n wa yiis biig sẽn vɩ ne a roagdba
12. Zɩɩb bʋg la roagdbã tar ne biig sẽn vɩ ne-ba, tɩ b yaool n yiis-a tigingã pʋgẽ?
12 Yaa wãn to masã, biig sẽn vɩ ne a roagdb sã n kẽ yel-wẽn-kãseng pʋgẽ, t’a sẽn pa tek yam n kos sugrã kɩt tɩ b yiis-a tigingã pʋgẽ? Biigã sẽn vɩ ne a roagdbã yĩnga, ket n yaa bãmb n segd n zãms-a la b kibl-a tɩ zems ne Wẽnnaam Gomdã. Wãn to la b tõe n maan dẽ?—Yelbũna 6:20-22; 29:17.
13. Wãn to la roagdbã tõe n modg n zãms b biigã sẽn bʋdgã tɩ zãmsgã kẽ a sũuri, b sã n wa zãmsd Biiblã bãmb ne yẽ bal sasa?
13 Roagdbã tõeeme n kõ zãmsg la kibl-kãngã Biibl zãmsg bãmb sẽn maand ne biigã bal sasa, la woto meng n são. Roagdbã getame tɩ zʋʋg biigã tõdgr manesem n bao n ges sẽn be a sũurẽ wã. A tẽebã bãag halhaal fãa yaa wãn to? (Yelbũna 20:5) B tõe n zãmsa biigã tɩ kẽ a sũurã sõma bɩ? Verse bʋs la b tõe n tũnug ne tɩ wom biis sõma? Tʋm-tʋmd a Poll kõta tõnd bas-m-yam woto: “Wẽnnaam goama vɩɩme la a tara pãnga, la a rɩtame n yɩɩd sʋʋg sẽn tar noy a yiibu, la a kẽeda hali n welgd vɩɩm ne sɩɩga la kõb-sugds ne [b] sɩɩlem, la a yaa sũur tagsgo la ratem bʋ-kaooda.” (Hebre dãmba 4:12) N-ye, roagdbã tõe n maaname tɩ yɩɩg b yeel b biigã bal t’a ra ye maan wẽng ye. B tõe n modgame n sɩng n bao yellã tɩɩm la b tʋm dẽ yĩnga.
14. Bõe la bi-kɩɩsd segd n maan pipi sẽn na yɩl n lebs n paam zems-n-taar ne a Zeova, la wãn to la roagdbã tõe n sõng biig t’a maan woto?
14 Segdame tɩ biig sẽn bʋdg lebs n paam zems-n-taar ne a Zeova. A sẽn segd n maan bũmb ning pipi, ya a “tek yam n kos sugri.” (Tʋʋma 3:19; Ezai 55:6, 7) Roagdbã sã n sõngd biigã b yirã t’a tek yam n kos sugri, b segd n ‘maana sũ-mare, n zãmsd biigã sẽn yaa kɩɩsdã ne sũ-bʋgsem.’ (2 Tɩmote 2:24-26) B segd n ‘leng-a’ lame tɩ zems ne Biiblã sẽn yetã. Gerɛk gom-biig ning b sẽn lebg tɩ yaa “lengã” tõeeme me n lebg tɩ “kõ kaset sẽn yaa vẽenega.” (Wilgri 3:19; Zã 16:8, NW ) Woto yĩnga, lengr tɩ loee ne f sẽn na n kõ kaset tɩ sek tɩ biigã sak n deeg t’a maana yel-wẽnde. Yaa sɩd tɩ rẽ maaneg pa nana ye. La sã n tõeyã, roagdbã tõeeme n gom tɩ kẽ a sũurã, n tũnug ne bũmb nins fãa sẽn zems ne Gʋlsg Sõamyã n kɩt t’a sake. B segd n modg n sõng-a lame t’a bãng t’a segdame n ‘kisg wẽnga, la a nong neere.’ (Amos 5:15, Sebr Sõngo) Tõe t’a ‘yamã vẽnege, t’a tõog n fãag a meng ne Sʋɩtãana kũusri.’
15. Pʋʋsgã yõod yaa bõe, sẽn na yɩl tɩ bi-kɩɩsd lebs n paam zems-n-taar ne a Zeova?
15 Lebs n paam zems-n-taar ne a Zeova tũuda ne pʋʋsg tɩlae. Yaa sɩda, ned ba a ye pa segd n “pʋʋs Wẽnnaam” yel-wẽnd ned sẽn da lagem ne kiris-neb tigingã sẽn maand ne pʋtoog n pa tekd yam n kos sugr yĩng ye. (1 Zã 5:16, 17; Zeremi 7:16-20; Hebre dãmba 10:26, 27) La, roagdbã tõe n kosa a Zeova t’a kõ-b yam tɩ b bao yellã tɩɩm. (Zak 1:5) Bi-bɩɩg b sẽn yiis sã n kõ kaset t’a teka yam n kos sugri, n yaool n pa tõe n “[gom ne, NW ] raood Wẽnnaam taoore,” roagdbã tõe n pʋʋsame tɩ Wẽnnaam sã n yã bũmb a sẽn tõe n tik n kõ biigã beegr sugri, bɩ A raab maane. (1 Zã 3:21) Pʋʋs-kãensã kelgr segd n sõnga biigã t’a ges a Zeova wa Wẽnnaam sẽn tar nimbãan-zoeere. *—Yikri 34:6, 7; Zak 5:16.
16. Wãn to la d tõe n sõng biig b sẽn yiis zak neba?
16 B sã n yiis bi-bɩɩg sẽn deeg lisgu, tigingã neb segdame n “ra maan tũud-n-taar ne” yẽ ye. (1 Korẽnt dãmba 5:11; 2 Zã 10, 11) Rẽ tõe n wa baas n sõng-a lame t’a ‘bao yam n kõ a menga,’ n lebg n wa Wẽnnaam bãgrã sẽn yaa koglg zĩigã pʋgẽ. (Luk 15:17, Sebr Sõngo) La a wa t’a pa wa me, tigingã neb tõe n kenga biigã b sẽn yiisã zak neb raoodo. Tõnd fãa tõe n yãa soay n ‘kʋm-ba,’ la d tall ‘nimbãan-zoeer’ ne-ba.—1 Pɩɛɛr 3:8, 9, Sebr Sõngo.
Neb a taabã sẽn tõe n sõng to-to
17. Bõe la tigingã neb segd n ning b yamẽ, b sã n wa makd n na n sõng biig tẽeb sẽn maage?
17 Yaa wãn to ne bi-bɩɩg b sẽn pa yiis kiris-neb tigingã pʋgẽ, la sẽn maag tẽebã pʋgẽ? Tʋm-tʋmd a Poll gʋlsame: “Will a yembr sã n namsdẽ, wila fãa namsda ne yẽnda.” (1 Korẽnt dãmba 12:26) Neb a taabã tõe n wilga ne b tʋʋm tɩ b geta bi-bɩ-kãng yelle. La yaa d gũusi, tɩ biig tẽeb sẽn yaa kom-kom tõe n bẽega kom-bɩɩs a taabã. (Galat dãmba 5:7-9) Tiging a yembr pʋgẽ, kãsemb sẽn da tar yam-sõng n da rat n sõng kom-bɩɩs tẽeb sẽn da maage, tɩ b bool-b tɩ b wa reemẽ tɩ b maan mizik neba sẽn nong n kelgdẽ. Baa ne kom-bɩɩsã sẽn sak hal tɩ sɩd yɩ-b noogã, b sẽn tall pãn-tusdg ning bãmb ne taab zutã kɩtame tɩ b wa lak n bas tigingã. (1 Korẽnt dãmba 15:33; Ziid 22, 23) Bũmb ning sẽn tõe n sõng n sãoog biig tẽeb sẽn yaa kom-komã pa lagem taab n deem tɩ tẽeb sor-wilgr kaẽ ye, la yaa lagem-n-taar sẽn na n sõng-a t’a nong tẽebã yɛla. *
18. Wãn to la d tõe n dɩk togs-n-taar ne a Zezi yel-bũndã pʋgẽ bi-menemdgã ba?
18 Bi-bɩɩg sẽn bas tigingã sã n lebg n wa Rĩungã Roogẽ bɩ a kẽng tigis-kãsengẽ, bɩ y tags n ges a yĩn-sidgã sẽn tõe n yɩ a soaba. D pa segd n pʋʋs-a ne y waoong wa a Zezi yel-bũndã pʋgẽ bi-menemdg ba wã sɩda? (Luk 15:18-20, 25-32) Bi-bɩɩg sẽn bas kiris-neb tigingã n yaool n wa tigims gĩnd sull tigis-kãsengẽ yeela woto: “M da tẽedame tɩ nebã fãa ra na n lak n bas-m lame, la saam-biisã la saam-bi-pogsã pẽnega maam n pʋʋs-m ne m waoongo. M sũur sɩd ra yaa noog wʋsgo.” A sɩnga Biiblã zãmsg yɛsa, n wa reeg lisg rẽ poore.
Ra koms-y raood n bas ye
19, 20. Bõe yĩng tɩ d segd n tall manesem sẽn yaa sõma ne bi-menemdga?
19 Sõng ‘bi-menemdg’ t’a ‘bao yam n kõ a meng’ baooda sũ-mare, la a tõe n yɩɩ toog ne roagdbã la neb a taabã. La ra koms-y raood n bas ye. “Zusoaba ka kaoosda tɩ pids bãmb kãabg wa neb kẽer sẽn tagsda ye. La bãmb sẽn ka rat tɩ ned ba a ye sãama yĩnga, bãmb maanda sũ-mar ne yãmba n dat tɩ yãmb fãa yam tek tɩ y kos sugri.” (2 Pɩɛɛr 3:9) Tõnd tara bas-m-yam sẽn yit Gʋlsg Sõamyã pʋgẽ sẽn wilgd t’a Zeova ratame t’a nin-buiidã tek yam n kos sugr n vɩɩmde. Sɩda, a yãka yam n maan segls sẽn na yɩl tɩ ninsaalbã lebs n paam zems-n-taar ne-a. (2 Korẽnt dãmba 5:18, 19) A sũ-marã kɩtame tɩ neb milyõ rãmb tek yam n lebg n wa.—Ezai 2:2, 3.
20 Rẽ, roagdbã pa segd n tũnug ne manesem buud fãa sẽn zems ne Gʋlsg Sõamyã n sõng b bi-menemdgã t’a yam wa sɩda? Rɩk-y a Zeova togs-n-taar n tall sũ-mare, y sã n wa modgd sõma n na n sõng y biigã t’a lebg n wa a Zeova nengẽ. Gãd-y Biiblã noy kãn-kãe, la y modg n dɩk a Zeova togs-n-taare, n tall nonglem, tɩrlem la yam, y sã n wa pʋʋsd-a n kot a sõngre. Wala neb nins sẽn da yaa tõtb piig la a yiib wʋsg sẽn sak a Zeova nonglem boollã n lebg n wa a nengẽ wã, yãmb biribl bɩ y bipugl-menemdgã tõe n lebg n waa Wẽnnaam bãgrã sẽn yaa koglg zĩigã pʋgẽ.—Luk 15:6, 7.
[Tẽngr not rãmbã]
^ sull 6 Sẽn na yɩl n paam sagls n paas ne y sẽn tõe n zãms kambã tɩ yɩ sõma to-to, bɩ y ges yʋʋmd 1999 Gũusg Gasgã, sẽoog kiuug pipi daare, seb-neng 19-23.
^ sull 15 B pa segd n maan pʋʋs-kãens zãma sʋk biigã b sẽn yiisã yĩng tigingã tigissẽ ye, bala neb a taabã pa mi b sẽn yiis a soabã sũur halhaal ye.—Yʋʋmd 1980, yʋʋm-vẽkr kiuug rasem 15 Gũusg Gasgã, seb-neng 31.
^ sull 17 Sẽn na yɩl n paam sagls sẽn yaa takɩ, bɩ y ges yʋʋmd 1972, zĩ-likr kiuug rasem 22, seb-neng 13-16; yʋʋmd 1996, bõn-bɩʋʋng kiuug rasem 22, seb-neng 21-23 Réveillez-vous ! rãmbã.
Yãmb tẽrame bɩ?
• Kom-bɩɩs sã n basd tigingã, yellã yẽgr meng tõe n yaa bõe?
• Wãn to la b tõe n sõng kom-bɩɩsã tɩ b tall zems-n-taar ne a Zeova?
• Bõe yĩng tɩ roagdbã segd n tall sũ-mare, la b ra vigs noyã zutu me, b sã n wa sõngd bi-menemdga?
• Wãn to la tigingã neb tõe n sõng bi-menemdg t’a lebg n wa?
[Zãmsgã sogsgã]
[Foto, seb-neng 25]
Roagdbã sã n maan pʋʋsg sẽn yit b sũyẽ, tõe n sõnga b kambã tɩ b yã tɩ zood n be b roagdbã ne a Zeova sʋka
[Foto, seb-neng 25]
Wẽnnaam Gomdã kareng yaa tɩlae sẽn na yɩl n tall zood sẽn tar pãng ne a Zeova
[Foto, seb-neng 27]
Bi-menemdg sã n wa ‘bao yam n kõ a meng’ n lebg n wa bɩ y reeg-a sõma
[Foto, seb-neng 28]
Modg-y sõma n sõng y biigã t’a lebg n wa a Zeova nengẽ