Dũni noog sẽn tõe n paam to-to

“YƖƖ Nazarɛt ned a Zezi n yɩ nin-yɛng ning sẽn tara pãng n yɩɩd ãdem-biisã zãmaan fãa pʋgẽ, la pa yʋʋm tus a yiibã sẽn loogã pʋgẽ bal ye.” Woto la zʋrnall Time yeel-yã. A Zezi sẽn da wa n be tẽngã zugã, pʋ-peelem dãmb tusa sak n deegame t’a yaa kãseng yembo, la b leb n sak n deegame t’a geta neb a taabã yell sõma. Woto yĩnga, pa lingr la b sẽn da rat n maan-a rĩma ye. (Zã 6:10, 14, 15) La a Zezi pa sak n kẽes a meng na-baoor yɛlẽ ye.

A ZEZI manesmã tika yɛl a tãab zutu: pipi yaa a Ba wã tagsg ne ninsaal yam-yãkrã, tɩ ninsaal naama be sʋkã. Yiib-n-soaba, a Zezi ra miimi tɩ malɛg-wẽns sẽn tar pãng n tʋmd n dat n sãam modgr nins ninsaalbã sẽn maand n dat n dɩ naam sõma wã, la sẽn na n paas tãabo, a ra miime tɩ Wẽnnaam ratame n lugl yĩngr goosneema tɩ rɩ naam dũniyã gill zugu. D sã n wa vaeesd yel-kãensã b tãabã sõma, d na n yãa bũmb ning sẽn kɩt tɩ ãdem-biisã sẽn modg n na n maneg dũniyã t’a yɩ sõma n yɩɩdã pa tõogã. D na n leb n yãa d sẽn tõe to-to n tõoge.

Ninsaalbã tõe n dɩɩ naam b taab zut tɩ yɩ sõma bɩ?

Wẽnnaam sẽn naan ninsaalbã, a kõ-b-la zu-sobend rũmsã zutu. (Sɩngre 1:26) La ãdem-biisã ra segd n saka Wẽnnaam naam sẽn ka to wã. Pipi rao wã ne a pagã ra segdame n sɩd wilg b sakr ne Wẽnnaam n da rɩ tɩɩg ning biig ye, sẽn yaa “sõama ne wẽng bãngr tɩɩga.” (Sɩngre 2:17) Zu-bʋko, a Ãdem ne a Hawa tʋmame tɩ nar ne b yam-yãkrã, n kɩɩs Wẽnnaam. B sẽn dɩ tɩɩg ning biig b sẽn gɩdg rɩɩbã ra pa wagdem bal ye, ra yaa Wẽnnaam naam sẽn ka to wã tõdgre. Seb-neng tẽngr not sẽn tɩ loe ne Sɩngre 2:17 Nouvelle Bible de Jérusalem pʋgẽ yetame t’a Ãdem ne a Hawa baoo “soog-m-meng sõma ne wẽng yãkrã wɛɛngẽ, tɩ rẽ wilgdẽ tɩ ninsaal pa reeg tɩ b naan-a lame ye . . . Pipi yel-wẽndã ra yaa Wẽnnaam naam sẽn ka to wã zãgsgo.”

No-koeem kãsems la rẽ wa ne, tɩ Wẽnnaam bas t’a Ãdem ne a Hawa la b kambã yãk b sẽn na n zã b vɩɩmã to-to, la b lugla b mens noy sẽn tɩ loe ne sõma la wẽngã yãkr wɛɛngẽ. (Yɩɩl Sõamyã 147:19, 20; Rom dãmba 2:14) Yaa woto la ninsaal sɩng n maand a yam yãkre. La woma bi-sõma bɩ? D sẽn yã yɛlã sẽn yɩ to-to yʋʋm tusa sẽn loogã, d tõe n yeelame tɩ ayo! Koɛɛg Soaba 8:9 (NW ) yetame: “Ninsaal . . . dɩ[ɩ] naam ninsaal zug a wẽng yĩngã.” Ninsaalb sẽn dɩ naam b taab zut tɩ yɩ kaeto woto wã sɩd wilgdame tɩ Zeremi 10:23 togsda sɩda: “Zusoaba, mam miime tɩ ninsaal  ka tar noor ne a vɩɩm sẽn na n yɩ bũmb ninga ye. Ninsaal ka so a meng vɩɩm yell ye.” Ãdem-biisã sẽn maan tɩ loog pĩndã wilgdame tɩ b pa tõe n dɩ naam tɩ yɩ sõma tɩ b Naandã pa kẽes a toog ye.

A Zezi ra saka woto zãng fasɩ. A ra kisa soog-m-meng ne Wẽnnaam. “Mam ka maand bũmb ne m meng pãng ye,” woto la a yeel-yã. “Mam sẽn maand bũmb ninsa tata [Wẽnnaam] yam daar fãa.” (Zã 4:34; 8:28, 29) Woto yĩnga, a Zezi sẽn pa paam sor Wẽnnaam nengẽ n na n deeg ninsaalbã naama, a pʋd n pa tags naam-kãng sakr meng ye. La woto ra pa rat n yeel t’a pa rat n sõng ninsaalb a taabã ye. Sẽn yaa lebende, a maana a sẽn tõe fãa sẽn na yɩl n sõng nebã tɩ b paam sũ-no-kãseng rẽ wẽnde, la beoog-daare. A tol n kõ a vɩɩmã ãdem-biisã yĩnga. (Matɩe 5:3-11; 7:24-27; Zã 3:16) La a Zezi ra miimi tɩ “bũmb fãa tara a wakate,” la tɩ yaa woto me ne wakat ning Wẽnnaam sẽn yãk n na n wilg a naam sẽn ka to wã ãdem-biisã zutã. (Koɛɛg Soaba 3:1; Matɩe 24:14, 21, 22, 36-39) La tẽeg-y tɩ Edɛn zẽedẽ wã, tõnd pipi roagdbã saka malɛg-wẽngã sẽn tũnug ne waaf n goma raabo. Rẽ kɩtdame tɩ d gom bũmb a yiib-n-soabã sẽn kɩt t’a Zezi pa kẽes a meng dũniyã naam yɛlẽ wã yelle.

Dũniyã naab ning neba sẽn pa mi wã

Biiblã yeta tõnd t’a Sʋɩtãan kãaba a Zezi “dũniyã soolem fãa ne b naam,” a Zezi sã n da sak n wõgemd n balm-a vugr bala. (Matɩe 4:8-10) A kãaba a Zezi dũniyã naam, la yaa sẽn zems ne yẽ a Sʋɩtãan magbo. A Zezi pa bas tɩ mak-kãngã tõog-a ye. La sɩd ra yaa makr bɩ? A Sʋɩtãan sɩd ra tõeeme n kõ bõn-kãseng a woto bɩ? N-ye, bala a Zezi mengã boola a Sʋɩtãan tɩ “dũniyã naaba,” tɩ tʋm-tʋmd a Poll yeel t’a yaa “dũni kãnga wẽnnaam.”—Zã 14:30; 2 Korẽnt dãmba 4:4; Efɛɛz rãmba 6:12.

Yaa sɩd t’a Zezi ra miimi t’a Sʋɩtãan toor da kae ne ãdem-biisã neer ye. A yeelame t’a Sʋɩtãan yaa “nin-kʋʋda,” la t’a yaa “ziri yagda, la ziri ba.” (Zã 8:44) Vẽenega, dũni sẽn ‘be’ malɛg-wẽng a woto “nugẽ” sɩd pa tõe n tol n paam sũ-noog ye. (1 Zã 5:19) La a Sʋɩtãan pa na n tall zu-sobend kãngã wakat fãa ye. A Zezi sẽn yaa malɛk sẽn tar pãng masã wã na n yiisa a Sʋɩtãan la a pãn-tusdgã zãnga.—Hebre dãmba 2:14; Wilgri 20:1-3.

A Sʋɩtãan mengã miimi t’a naamã dũniyã  zugã wakat lebgda koɛɛga. Woto yĩnga, a maanda a sẽn tõe fãa n na n kʋɩɩb ãdem-biis sẽn pa rat n toeema, wala a sẽn maan sẽn deng a Nowe wakatẽ Sa-kãsengã sasa wã. (Sɩngre 6:1-5; Ziid 6) Wilgri 12:12 yetame: “Toog bee ne neb nins sẽn be dũniyã zugu la ko-kãsenga pʋgẽ wã. Tɩ bõe, Sʋɩtãana sigame n wa yãmb nengẽ, la a sũ-puugra yaa kãsenga a sẽn bãng t’a wakat yaa bilfa yĩnga.” Biiblã bãngr-goam la dũniyã yɛl wilgdame tɩ tõnd vɩɩ ‘wakat bilfa’ baasg sasa. (2 Tɩmote 3:1-5) Yolsg kolgame masã.

Goosneema sẽn na n wa ne sũ-noogo

Bũmb a tãab-n-soab sẽn kɩt t’a Zezi pa kẽ na-baoorã yɛlẽ wã ya a sẽn da mi tɩ beoog-daare, Wẽnnaam da na n lugla saasẽ goosneema t’a rɩ naam tẽngã zugã. Biiblã boonda goosneema kãng tɩ Wẽnnaam Rĩungu, la ra yaa rẽ la a Zezi zãmsgã gom-zu-kãsenga. (Luk 4:43; Wilgri 11:15) A Zezi zãmsa a karen-biisã tɩ b pʋʋs tɩ Rĩung kãng wa, bala yaa naam kãng bal n na n kɩt tɩ ‘Wẽnnaam daab maan dũniyã zug wa a sẽn maand saasẽ wã.’ (Matɩe 6:9, 10) Tõe tɩ y sʋk woto: ‘Rĩung kãng sã n na n dɩɩ naam dũniyã gill zugu, bõe n na n paam ninsaalbã goosneema rãmba?’

Leokrã bee Daniɛll 2:44 pʋgẽ: ‘Rĩm dãmb kãens sẽn dɩt naam [rũndã zamaanã saab] wakate, Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa [sẽn yaa ninsaalb rẽndã] tɩ b menem n bas-a t’a yaas wakat fãa.’ Bõe yĩng tɩ Wẽnnaam Rĩungã na n “sãam” tẽng zug naama? Bala bãmb ket n kɩɩsda Wẽnnaam ne soog-m-meng yam ning a Sʋɩtãan sẽn wa ne Edɛn zẽedẽ wã. Neb a woto wãada ãdem-biisã yembo, la sẽn paase neb nins sẽn tar yam-kãngã wã lebgda Naandã bɛɛba. (Yɩɩl Sõamyã 2:6-12; Wilgri 16:14, 16) Woto yĩnga, d segd n sʋka d menga: ‘Tõnd bee Wẽnnaam naama poorẽ bɩ, bɩ d kɩɩsd-a lame?’

Ãnd soab naam la y na n yãke?

Sẽn na yɩl n sõng nebã tɩ b maan yãkr sẽn tik bãngr hakɩk zug naamã wɛɛngẽ, a Zezi tʋma a karen-biisã tɩ b tɩ moon “soolem koe-noog kãngã . . . dũniyã tɛk fãa tɩ yɩ kaset buud fãa yĩnga,” tɩ zãmaan kãngã saab yaool n ta. (Matɩe 24:14) Rũndã-rũndã, ãnd dãmb la b mi tɩ b yaa neb sẽn moond Wẽnnaam Rĩungã? Ya a Zeova Kaset rãmbã. Sɩda, hal sẽn kaoose, zʋrnall kãngã poor tara gom-kãensã: “Moonda a Zeova Rĩungã.” Rũndã-rũndã, Kaset rãmb milyõ a yoob sẽn be sẽn yɩɩd tẽns 230 pʋsẽ sõngda nebã tɩ b paamd bãngr hakɩk Rĩung kãng wɛɛngẽ. *

Rĩungã zẽemb na n paama barka

Wakat fãa, a Zezi maana yɛlã wa Wẽnnaam sẽn datã. Woto, a pa yãk ne soog-m-meng n bao n na n teel yẽ zãmaana, bɩ n kɩt t’a maneg n paas ne ninsaalbã naam tũnugr ye. A tʋma wʋsg n kɩt tɩ Wẽnnaam Rĩungã,  sẽn yaa dũniyã zu-loees tɩɩm balã yɛl kẽng taoore. A sẽn tall kɩs-sɩdã yĩnga, b kõ-a-la naam sẽn tar ziir saasẽ, t’a yɩ Rĩung kãng mengã Rĩma. Ad sɩd yaa keoor kãseng la a paam-yã, a sẽn sak Wẽnnaamã yĩnga!—Daniɛll 7:13, 14.

Neb milyõ rãmb sẽn dɩkd a Zezi togs-n-taar n ningd Wẽnnaam Rĩungã pipi zĩigẽ, la b sakd Wẽnnaam daabã me na n paama kũun kãsenga: yaa b sẽn na n paam zu-noog n yɩ Wẽnnaam Rĩungã tẽng zug zẽembã. (Matɩe 6:33) Rĩung kãng naama rɩɩb sẽn na n yɩ ne nonglmã sasa, b na n kɩtame tɩ b yɩ ninsaalb sẽn zems zãnga, sẽn tar vɩɩm sẽn pa sat saagre. (Wilgri 21:3, 4) Dẽenem Zã 2:17 yetame: “Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.” B sã n wa sãama a Sʋɩtãan ne a poorẽ dãmbã, n toeem tẽngã gill t’a lebg arzãn tɩ bu-welsgo, zãmb leebgã, la ziri tũudmã ye kaẽ, ad sɩd na n yɩɩ sũ-noog meng tɩ d pa tẽng zug ka wakat sẽn pa sate!—Yɩɩl Sõamyã 37:29; 72:16.

N-ye, yaa Wẽnnaam Rĩungã bal n sɩd tõe n kõ dũniyã sũ-noogo, la koɛɛg ning sẽn moond rẽ wã, sɩd zemsame tɩ b boola tɩ koe-noogo. Yãmb sã n nan pa maan woto, nindaar t’a Zeova Kaset soab sã n wa yãmb yiri, bõe yĩng tɩ y pa na n kelg koe-noog kãngã b sẽn taasd yãmbã?

[Tẽngr note]

[Foto seb-neng a 4]

Pĩnd yɛlã kõta kaset tɩ ninsaalbã pa tõe n dɩ naam sõma tɩ Wẽnd pa kẽes a toog ye

[Foto, seb-neng a 4]

A Sʋɩtãan sẽn dɩt naam masã “dũniyã” zugã yĩnga, a ra tõe n kãaba a Zezi “dũniyã soolem fãa”

[Foto rãmba, seb-neng a 6]

A Zezi zãmsa nebã tɩ Wẽnnaam Rĩungã naam wakate, dũniyã na n yɩɩ zĩ-neer wʋsgo