Zãmsg sẽn tar yõod zĩig fãa la yell buud fãa pʋgẽ

“Yãmb sẽn dat tɩ neba maan yãmb bũmb ningã, bɩ yãmb me maan bãmb boto.”—Matɩe 7:12.

A ZEZI KIRIST n togs gom-kãensã sẽn pẽneg yʋʋm tus a yiib sẽn looge, a Tãng zug Zãmsg yʋʋr sẽn yi wã pʋgẽ. Rẽ tɛka, yɛl wʋsg la b togs la b gʋls gom-kãngã zugu. Wala makre, b wilgame tɩ yaa “Gʋlsg Sõamyã võor meng-meng la woto,” “kiris-ned sẽn segd n maan a to bũmb ningã kʋmsgo,” la “yel-manesem no-kãsenga.” Woto yĩnga, b mii no-kãngã sõma wʋsg hali tɩ kɩt tɩ b n nong n boond-a tɩ noor sẽn tar yõod wʋsgo.

Pa neb nins sẽn yet tɩ b yaa kiris-nebã bal n sakd vɩɩm manesem no-kãngã a Zezi sẽn togsã ye. Zidaisma, Budisma la Gerɛk filozofi wã fãa togsa no-kãseng kãngã ne manesem toɛy-toɛya. A Kõnfisius b sẽn waoogd wʋsg Yaang zãmaana neb sʋk wa yam soab la karen-saam kãseng sẽn yɩɩdã goma goam neb wʋsg sẽn mi, sẽn yɩɩd fãa Yaang nebã. A Kõnfisius sebr a yembrẽ (The Analects) sẽn ya a Sɛb a Naasã tãab-n-soabã pʋgẽ, d yãta tags-kãngã b sẽn togs naoor a tãabo. Naoor a yiibu, a Kõnfisius leoka karen-biis sʋgsg n yeele: “Yãmb sẽn pa rat tɩ b maan-y bũmb ningã, bɩ y ra maan neb a taabã ye.” Sasa a to, a karen-biig a Zigong sẽn wa n yeel ne tɩtaam tɩ: “Mam sẽn pa rat tɩ neb a taabã maan maam bũmb ningã, mam me pa rat n maan bãmb ye” wã, karen-saambã leoka woto: “Yaa sɩda, la fo nan pa tõe n maan woto ye.”

Ned sã n karemd gom-kãensã, a tõe n yãame t’a Kõnfisius togsgã pa tusd ned t’a maan tʋʋm neer wa a Zezi sẽn togs kaoosg poorã ye. A Zezi sẽn kõ no-sõng ningã ra tusda ned t’a maan neb a taabã yel-sõmde. Wala nebã sã n maan tɩ zems ne a Zezi togsgã sẽn tusd nebã tɩ b maan neerã, n gesd neb a taabã yell la b baood n sõngd-bã, la b sakd no-kãngã daar fãa, y pa tagsd tɩ woto ra na n kɩtame tɩ dũniyã zug vɩɩm maneg n paas sɩda? Yaa woto tɩ sãmbg ka be ye.

B sã n togsa gom-kãngã t’a tusd ned t’a maan tʋʋm neere tɩ pa woto me, bɩ b sẽn togs-a to-to ning fãa, bũmb ning sẽn tar yõod yaa tɩ neb sẽn vɩɩmd zãmaan toɛy-toɛy la zĩis toɛy-toɛy la sẽn yit buud toɛy-toɛy pʋsẽ talla bas-yard ne vɩɩm manesem no-sõngã a Zezi sẽn togsã. Woto wilgdame bal t’a Zezi sẽn togs bũmb ning Tãng zug Zãmsgẽ wã yaa zãmsg sẽn tar yõod zĩig fãa la yell buud fãa pʋgẽ, sẽn pak zĩig fãa la zãmaan fãa neba.

 Bɩ y sʋk y menga: ‘Mam datame tɩ b waoog maam, tɩ b ra bak-m n base, tɩ b tall pʋ-peelem ne-m bɩ? Mam dat n vɩɩmda dũni sẽn pa tar bu-sãbsgo, bi-beer la zabr pʋgẽ bɩ? M nongẽ lame n zĩnd zak pʋgẽ nebã fãa sẽn tar waoogr ne b taabã tagsg la b rat b neer bɩ?’ Sɩda, ãnd soab n na n zãgs woto? Sẽn be yaa tɩ neb nins sẽn paamd woto masã wã pa waoog ye. Ne neb wʋsg sõor sẽn yɩɩde, saag n paam bõn-kãensã yaa bũmb b sẽn pa tẽed la bala.

B pa tũud vɩɩm manesem no-sõngã ye

Ãdem-biisã vɩɩm pʋgẽ, wakat fãa neb la b nams la b kʋ, n pa tall waoogr baa bilf ne b dʋrwa rãmbã ye. Afirik nebã b sẽn yõg n maan yembsã, Nazi rãmbã nin-kʋʋr zagse, modg kambã tɩ b tʋma, la buud neb kʋʋb zĩis wʋsgã bee yel-kãens sʋka. B tõe n sõdga yel-kãensã sẽn yaa wẽns wʋsgã tɩ yɩɩg woto.

Rũndã-rũndã, dũni ning pʋgẽ tõnd sẽn vɩ sẽn tar bãngr te-bɛd wʋsgã yaa rat-m-yembr dũniyã. Yɛlã sã n wɩng-ba, bɩ b sã n ka waoogd dʋrwa rãmb nins b sẽn tagsd tɩ b tarame wã, neb wʋsg pa ye tagsd b taaba yell ye. (2 Tɩmote 3:1-5) Bõe yĩng tɩ neb wʋsg woto lebg rat-m-yembr dãmba, nin-toose, neb sẽn pa tar nimbãan-zoeer la sẽn baood bãmb meng nafr bala? Baa ne b sẽn mi vɩɩm manesem no-sõngã zĩig fãa wã, rẽ yĩnga pa b sẽn pa tũud-a wã, n get-a wa noor sẽn le pa zems ne masã yɛlã, n get-b wa no-kʋd sɩda? Zu-bʋko, yaa woto, baa neb wʋsg nins sẽn yet tɩ b tẽeda Wẽnnaamã sʋka. La d sã n ges yɛlã sẽn kẽngd neng ningã, nebã na n lebga rat-m-yembr dãmb n paase.

Woto yĩnga, sʋgs-kãsems nins d sẽn segd n bao n leokã yaa: Tũ no-sõngã d vɩɩmã pʋgẽ baoodame tɩ d maan bõe? Neb n be n ket n tũud-a bɩ? La wakat na n waame tɩ ãdem-biisã fãa na n tũ vɩɩm manesem no-sõngã bɩ? Sẽn na yɩl n paam sʋgs-kãensã leokr sẽn sɩd zemse, d bõos tɩ y karem sõsg ning sẽn pʋgdã.

[Foto, seb-neng a 3]

A Kõnfisius la neb a taab zãmsa no-sõngã nens toɛy-toɛya