Zãmsg sẽn zemse

Neb wʋsg sẽn yɩɩd geta No-sõngã wa zãmsg a Zezi sẽn kõ vɩɩm manesmã zugu, la yẽ menga yeela woto: “Mam karenga ka mam dẽnd ye, yaa sẽn tʋma maama rẽnda.”—Zã 7:16.

N-YE, a Zezi sẽn zãms bũmb ningã, n paas b sẽn wa n boondẽ tɩ no-sõngã, yita a Soab ning sẽn tʋm a Zezi wã, sẽn dat n yeel tɩ Wẽnnaam a Zeova sẽn yaa Naandã nengẽ.

Sɩngrẽ wã, Wẽnnaam da ratame tɩ ãdem-biisã maan b taabã wa bãmb mens sẽn dat tɩ b maan-b to-to wã. A kõo makr ning sẽn yaa sõma n yɩɩdã n wilg t’a rata neb a taabã neere, d sã n ges a sẽn naan ninsaalbã to-to wã: “Wẽnnaam naana ninsaal wa b meng wẽnego, Wẽnnaam naana yẽ wa bãmb wẽnego. Bãmb naana bãmb dao wa la paga.” (Sɩngre 1:27) Woto rat n yeelame tɩ Wẽnnaam kõo ãdem-biisã a mengã zʋg-kãsems ne nonglem, sẽn na yɩl tɩ b tõog  n vɩɩmd ne laafɩ, ne sũ-noog la zems-n-taare, tɩ ra tõe n kell n yɩ woto wakat fãa yĩnga. Sũur kaset ning Wẽnnaam sẽn kõ-bã sã n paam zãmsg sẽn zemse, a ra kɩtdame tɩ b maan b taabã wa bãmb mensã sẽn dat tɩ b maan bãmb bũmb ningã.

Rat-m-yembrã n lʋɩ taoore

Sẽn mik tɩ ãdem-biisã sɩnga neer woto wã, bõe n maan masã tɩ yaa woto? D sã n na n togs nana-nana bala, neba sɩngame n talld zʋg-wẽns wala rat-m-yembrã. Wa b sẽn wilg Sɩngr sak a 3 pʋgẽ wã, neb wʋsg sẽn yɩɩd mii Biiblã kɩbar ning sẽn wilg pipi rao wã ne a pagã sẽn maan bũmb ningã. A Sʋɩtãan sẽn yaa Wẽn-kɩɩs kãsengã tusa a Ãdem ne a Hawa tɩ b zãgs Wẽnnaam naamã ne rat-m-yembre, n bao n na n soog b mense. B manesmã sẽn pukd rat-m-yembr la tõdgrã kɩtame tɩ b paam bõn wʋsg yembo, la a leb n wa ne biis sẽn yaa wẽns wʋsg b kamb nins b sẽn da na n dogã zutu. Woto wilgda vẽeneg tɩ f sã n zãgs zãmsg ning b sẽn wa n boondẽ tɩ manesem no-sõngã a wata ne yel-beedo. Woto yĩnga, “rao a yembr n wa ne yel-wẽna dũniyã tɩ kũum wa yel-wẽna yĩnga. Rẽ n kɩt tɩ kũum yõkd neba fãa, fãa sẽn maand yel-wẽna yĩnga.”—Rom dãmba 5:12.

Baa ne ãdem-biisã wʋsg sẽn zãgs Wẽnnaam a Zeova soayã sẽn pukd nonglmã, a pa bas-b ye. Wala makre, a Zeova kõo Israɛll buudã a Tõogã sẽn na yɩl n wilg-b sore. A zãms-b lame tɩ b maan neb a taabã wa b sẽn dat tɩ b maan bãmbã. Tõogã wilga b sẽn segd n tall manesem ning ne yembsã, kɩɩbsã la pʋg-kõapã. A ra wilgda b sẽn da segd n welg yɛl sẽn tɩ loe ne ned pigbu, ned zukri, la wagdem. Tõodã yĩnsã laafɩ wã wɛɛngẽ ra wilgdame tɩ b ra maanda yɩɩr ne neb a taabã yĩns-laafɩ. Tõod n da be pag ne rao lagengã wɛɛngẽ menga. A Zeova kʋmsa a Tõogã n yeel a nin-buiidã tɩ: “Bɩ f nong f yak wa f menga,” t’a Zezi lebs n dɩk togs-kãngã kaoosg poore. (Maankʋʋre  19:18; Matɩe 22:39, 40) Tõogã ra leb n gomda manesem ning b sẽn segd n tall ne sãambã sẽn wa n fãoog Israɛll nebã yelle. Tõogã kõo noor woto: “Da nams sãan ye; tɩ bõe, yãmb mii sãamb yelle yãmb sẽn da yaa sãamb Ezipt tẽngã.” Woto rat n yeelame tɩ Israɛll nebã ra segd n talla nimbãan-zoeer sẽn naag ne sõmblem manesem ne nimbãan dãmbã.—Yikri 23:9; Maankʋʋre 19:34; Tõodo 10:19.

Israɛll sã n da tũud Tõogã ne kɩs-sɩd fãa, a Zeova ra ningda buudã barka. A Davɩɩd ne a Salomo naamã wakate, buudã paama bark tɩ nin-buiidã ra tar sũ-noogo. Pĩnd wẽndẽ kɩbar yeta tõnd woto: “Zida ne Israɛll neba yaa wʋsg wa bĩisr sẽn be ko-kãsenga noore. La bãmb rɩtame la b yũuda tɩ b sũy noomẽ. Laafɩ zĩnda Zida ne Israɛll tẽnsa pʋsẽ sẽn sɩng ne Dan hal tɩ ta Bɛɛr-Seba, tɩ ned kam fãa so a viyn tɩɩg ne a kankanga n zĩ a tẽngre.”—1 Rĩm dãmba 4:20; 5:5.

Zu-bʋko, buudã laafɩ wã la a bãanã pa kaoos ye. Baa ne b sẽn kõ Israɛll nebã Wẽnnaam Tõogã, b pa tũ-a ye. B basame tɩ rat-m-yembrã kɩt tɩ b pa ges b taabã yell ye. Rẽ sẽn paas ne sɩdã kɩɩsgã kɩtame tɩ tood wa nebã yembr-yembr zut la buudã gill zugu. Sẽn na n baase, yʋʋmd 607 S.D.T.W., a Zeova basame tɩ Babilon nebã tɩ sãam Zida rĩungã, Zerizalɛm galʋ-tẽngã la wẽn-do-neerã sẽn da be beenẽ wã menga. Bõe yĩnga? “Yãmb ka sak m goama ye. Woto yĩnga, mam na n boola buud nins sẽn be rɩtga ne Babilon naab a Nebukadnezaar sẽn yaa m tʋm-tʋmda tɩ b wa zab ne tẽng kãnga nebã la ne buud nins sẽn gũbg-a wã. Mam na n menesa bãmb n kɩt tɩ tẽnga sãam tɩ wakat fãa bɩ neb yã n gir b zut n yɛɛse.” (Zeremi 25:8, 9) B sẽn bas a Zeova baleng yɩlemdã yaood la woto!

Mak-sõng d sẽn segd n dɩk togs-n-taar ne

La sã n yaa ne a Zezi Kiristi, a zãmsa nebã no-sõngã, la a leb n kõ mak-sõng sẽn yaa kãseng n yɩɩdã me, no-kãng tũubã pʋgẽ. A sɩd gesa neb a taabã yell neere. (Matɩe 9:36; 14:14; Luk 5:12, 13) Vugri, Nayin galʋ-tẽngã noore, a Zezi yãa pʋg-kõor sũur sẽn sãam wʋsgo, a biribl kũum yĩnga, tɩ neb wʋsg yãagd kũumã n na n tɩ mum-a. Biiblã yetame: “La Zusoaba sẽn yã-a, b zoea a nimbãanega.” (Luk 7:11-15) Gomd ning sẽn yaa “zoe a nimbãanega,” sã n yaa ne bãngr sebr a yembre (Vine’s Expository Dictionary of Old and New Testament Words), a rat n yeelame tɩ “kʋm ned f sũur pʋgẽ.” A Zezi yãame tɩ pagã sũur sãamame, tɩ rẽ tus-a t’a yiis a toogã. Ad sɩd yɩɩ sũ-no-kãseng meng n kõ pʋg-kõ-kãngã, a Zezi sẽn vʋʋg biriblã n ‘lebs yẽnda a ma’ wã!

Sẽn na n baase, wa sẽn zems ne Wẽnnaam daabã, a Zezi saka ne yamleoog n nams la a kõ a vɩɩmã tɩ yɩ rondo, sẽn na yɩl tɩ ãdem-biisã paam b mens n yi yel-wẽnã la kũumã yembdẽ. Woto yaa mak-sõng sẽn yɩ kãseng n yɩɩdã, sã n yaa ne no-sõngã tũubu.—Matɩe 20:28; Zã 15:13; Hebre dãmba 4:15.

Neb sẽn tũud vɩɩm manesem no-sõngã

Neb n be tõnd wakatã n sɩd tũud no-sõngã bɩ? N-ye, la pa sẽn wat n yaa nana ne-b bal ye. Wala makre, Dũni gill Zabr a yiib-n-soabã wakate, Alemayn tẽngã Nazi rãmbã sẽn da so wã pʋgẽ, a Zeova Kaset rãmbã talla b tẽebã ne Wẽnnaam la b nonglmã ne b taabã, n zãgs tɩ b kõn kɩɩs vɩɩm manesem no-sõngã ye. Wakat ning Tẽngã pãn-soaadb sẽn da baood tɩ nebã bak Zʋɩf rãmbã n kisgã, Kaset rãmbã kell n tũu no-sõngã. Baa nams-bɛɛgã zagsẽ, b kell n gesa neb a taabã yelle, n pʋɩ b rɩɩbo, baa ne rɩɩbã sẽn da pa wʋsgã, ne Zʋɩf rãmb a taab la neb sẽn pa Zʋɩf rãmb kom sẽn da rat n kʋ. Sẽn paase, Tẽngã soaadb sẽn kõ-b noor tɩ b rɩk bug-raad n kʋ neb a taabã, b zãgsa rẽ maanego, wala b sẽn pa rat me tɩ neb a taabã kʋ-bã. B ra na n yɩɩ wãn n kʋ neb nins b sẽn da tog n nong wa b mensã? B sẽn tõdgã yĩnga, b talla bãmb wʋsg n kẽng nams-bɛɛgã zagsẽ, la b kʋ wʋsg menga.—Matɩe 5:43-48.

 Y sẽn karemd sõs-kãngã wã sasa, no-sõngã tũub yõod a to la y paamda. A Zeova Kaset rãmbã mikame tɩ rũndã-rũndã, neb wʋsg namsdame n pa tar saagr la sõngr ye. Rẽ yĩnga, Kaset rãmbã maanda tʋʋmd sẽn yaa sõma n sõngd b taabã tɩ b paam saagr la sor-wilgr sẽn zems ning sẽn be Biiblã pʋgẽ wã. Yaa zãmsg tʋʋmd sẽn maand dũniyã gill zug masã n yɩɩd wakat a taabã fãa. A biisã yaa bõe? Wa b sẽn deng n togs bãngr-gomd pʋgẽ Ezai 2:2-4 pʋgẽ wã, “buud wʋsg” sẽn yɩɩd neb milyõ a yoob dũniyã gill zugu, n paam ‘zãmsg a Zeova soɛyã pʋsẽ n tũud a so-bugsã.’ Ne makr wɛɛngẽ, b zãmsa ‘rɩk b sʋʋsã n kud wãgse, la b rɩk b kãna n kud goeto.’ B paama laafɩ la bãan wakat kãngã sẽn gudgã pʋgẽ.

Yaa wãn to ne yãmba?

Tags-y n ges tood la namsg nins sẽn paam ãdem-biisã, nebã sẽn pa tũ no-sõngã sẽn tar yõod wʋsgã, Edɛn zẽeda pʋgẽ tõdgrã a Sʋɩtãan Munaafɩɩk sẽn wa ne wã tɛkã yĩngã. A Zeova yãka raab n na n toeem yɛlã ka la bilfu. Wãn to? “Wẽnnaam Biiga waame n na n sãam Sʋɩtãana tʋʋma.” (1 Zã 3:8) Rẽ na n zĩnda Wẽnnaam Rĩungã sẽn be a Zezi Kirist sẽn tar yam la sẽn tar tõogã nugẽ wã naam sasa. Yẽ n yaa ned ning sẽn zãms nebã no-sõngã la a meng tũ-a wã.—Yɩɩl Sõamyã 37:9-11; Daniɛll 2:44.

Rĩm a Davɩɩd sẽn vɩɩmd pĩnd Israɛllẽ wã togsa woto: “Mam dag n yaa bi-bɩɩga, la masã mam kʋʋlame, la mam nan ka yã tɩ b bas nin-tɩrg ye, la mam nan ka yã t’a yagens bõosd rɩɩb me ye. Yẽ yaa nimbãan-zoɛt daar fãa n pengdẽ, la yẽ yagens paamda barka.” (Yɩɩl Sõamyã 37:25, 26) Yãmb pa ne tɩ neb wʋsg sẽn yɩɩd rũndã-rũndã reegda neb a taab nusẽ, n fãada, lakae b pa ‘maand nimbãaneg n pengdẽ’ sɩda? Vẽenega, vɩɩm manesem no-sõngã tũub tõe n waa ne laafɩ la bãan hakɩka, bala a kɩtdame tɩ ned paam bark masã la beoog-daar Wẽnnaam Rĩungã naam wakate. Wẽnnaam Rĩungã na n yiisa rat-m-yembr la wẽng buud fãa tẽngã zugu, n ledg zãmaan kãngã naamã sẽn sãama ne zãmaan paalg Wẽnnaam sẽn na n wa ne. Rẽ, nebã fãa na n tũu vɩɩm manesem no-sõngã.—Yɩɩl Sõamyã 29:11; 2 Pɩɛɛr 3:13.

[Foto rãmba, seb-neng a 4, 5]

A Zezi pa zãms nebã no-sõngã bal ye, a leb n kõo mak-sõng wʋsg n tũ-a

[Foto rãmba, seb-neng a 7]

No-sõngã tũub tõe n waa ne laafɩ la bãane