Koe-noogã barka
Koe-noogã barka
“A Zeova yãka maam n tʋm maam tɩ m tɩ togs sik-m-mens rãmba koe-noogo. A tʋma maam tɩ m tɩ tɩbs sũ-sãoong rãmba sũyã, . . . tɩ m bels sẽn yãbd-bã.”—EZAI 61:1, 2, NW.
1, 2. a) A Zezi wilgame t’a yaa ãnd soaba, la wãn to? b) Bark bʋs la koe-noogã a Zezi sẽn moona wa ne?
VƲƲSG daar a yembr yibeoogo, a Zezi koe-moonega wa n kẽes-a-la karen-doogẽ Nazarɛte. B gʋlsa rẽ wɛɛngẽ tɩ: “B kõ[o] bãmb Wẽnnaam no-rɛɛs a Ezai sebre. La bãmb sẽn lak sebrã, b yãa zĩig ning sẽn gʋlse: ‘Zusoaba Sɩɩg bee mam zugu. Tɩ bõe, bãmb kõo maam pãng tɩ m moon Koe-noog[o].’ ” A Zezi kẽnga taoor ne bãngr-gomdã karengo. Rẽ poore, a zĩndame n yeele: “Gʋlsg sõng kãngã yãmb sẽn wʋm masã wã pidsa rũnda.”—Luk 4:16-21.
2 Woto, a Zezi wilgame tɩ yaa yẽ la koe-moond ning waoong b sẽn pĩnd n togsã, sẽn yaa koe-noog togsd la belsg kõtã. (Matɩe 4:23) Ad a Zezi sẽn da tar n na n togsã sɩd ra yaa koe-noog tɛkẽ! A togsa a kɛlgdbã tɩ: “Mam yaa dũniyã vẽenem. Ned ninga sẽn tũud maam, a kõn kẽn lik pʋgẽ ye, la a na paam vɩɩm vẽenem.” (Zã 8:12) A leb n yeelame: “Yãmb sã n tall mam goama, yãmb yaa mam karen-biis hakɩɩka. Yãmb na bãng sɩda, la sɩda na kõ yãmb lohorem [paam-m-menga, NW ].” (Zã 8:31, 32) N-ye, a Zezi ra tara “vɩɩm sẽn-ka-sɛt goama.” (Zã 6:68, 69) Vẽenem, vɩɩm, la paam-m-meng sɩd yaa bark d sẽn segd n ges tɩ tara yõod wʋsgo!
3. Koe-noog bʋg la a Zezi karen-biisã moon-yã?
3 Yʋʋmd 33 T.W. Pãntekotã poore, a Zezi karen-biisã kẽnga taoor ne a tʋʋmdã sẽn yaa koe-noogã moonegã. B moona “Wẽnnaam soolem koe-noog” Israɛll nebã la bu-zẽmsã neba. (Matɩe 24:14; Tʋʋma 15:7; Rom dãmba 1:16) Neb nins sẽn sakã wa n bãnga Wẽnnaam a Zeova. B paama fãagr ne tũudmã wɛɛngẽ yembdo, n lebg tẽeb bu-paalg sẽn yaa “Israɛll sẽn yaa Wẽnnaam dẽnda” neba. Bãmb rãmba la sẽn tar saagr n na n dɩ naam wakat sẽn pa sat saasẽ ne b Soaal a Zezi Kirista. (Galat dãmba 5:1; 6:16; Efɛɛz rãmba 3:5-7; Kolos rãmba 1:4, 5; Wilgri 22:5) Ad woto sɩd yɩɩ bark meng-menga!
Koe-noogã mooneg rũndã-rũndã
4. Wãn to la koe-noogã mooneg tʋʋmd pidsd rũndã-rũndã?
4 Rũndã-rũndã, kiris-neb nins sẽn zae ne vʋʋsem sõngã paama “piis a taab[ã]” ‘kʋʋn-kãseng’ sõor sẽn tar fɩɩgrã teelgo. Rẽ kɩtame tɩ b ket n pidsd tʋʋmd ning sẽn yaa bãngr-gomd b sẽn sɩng n bobl a Zezi wã. (Wilgri 7:9; Zã 10:16) Rẽ kɩtame tɩ koe-noogã moon wʋsg n yɩɩd pĩndã. Tẽns 235 pʋsẽ, a Zeova Kaset rãmbã kẽngame n ‘tɩ togs naong rãmba koe-noogo, la b bels sũ-sãoong rãmba. La b togs yembs lohorem koɛɛga. La b wilg bi-bees fãagr koɛɛga; la b moon Zusoaba bark koɛɛga, la b togs tõnd Wẽnnaam sũ-dokr daar koɛɛga, la b bels sũ-sãoong rãmba fãa.’ (Ezai 61:1, 2) Woto yĩnga, kiris-nebã koe-noog mooneg tʋʋmd ket n wata ne bark n kõt neb wʋsgo, la a belsd “toog sẽn tar b rãmba” ne belsg sɩd-sɩda.—2 Korẽnt dãmba 1:3, 4.
5. Koe-noogã mooneg wɛɛngẽ, wãn to la a Zeova Kaset rãmbã yaa toor ne dũni kiris-nedemdã egiliiz rãmba?
5 Yaa sɩd tɩ dũni kiris-nedemdã egiliiz rãmb tũnuga ne manesem buud toor-toor n moon evãnzillã. Wʋsg tʋma misioneer dãmb tɩ b tɩ tuub neb tẽns a taabẽ. Wala makre, tũudum sebr a yembr (The Orthodox Christian Mission Center Magazine) wilgda Egiliizã misioneer dãmb tʋʋmd sẽn yɩ to-to Madagaskaare, Afirikdisiidi, Tãnzani la Zĩmbabwe. Baasg zãnga, Ortodogs Egiliizã pʋgẽ, n paas dũni kiris-nedemdã egiliiz rãmb a taabẽ, b tũudmã neb wʋsg sẽn yɩɩd fãa pa kẽesd b mens tʋʋm kãngã pʋgẽ ye. Sẽn yaa lebend ne rẽ, a Zeova Kaset rãmb nins fãa sẽn dɩk b mens n kõ a Zeova wã modgdame n na n kẽes b mens koe-noogã mooneg pʋgẽ. B miimi tɩ koe-noogã mooneg yaa kaset sẽn wilgd tɩ b tara tẽeb hakɩka. A Poll yeelame: “Yaa ne sũur la ned tẽeda n paamd tɩrlem, la a yaa ne noor la a kɩt kaseto n paamd fãagre.” Tẽeb sẽn pa tusd ned t’a maan bũmb sɩd yaa tẽeb sẽn ki.—Rom dãmba 10:10; Zak 2:17.
Koe-noog sẽn wat ne bark sẽn kõn sa
6. Koe-noog bʋg la b moond rũndã-rũndã?
6 A Zeova Kaset rãmbã moonda koɛɛg ning sẽn yaa koe-noog n yɩɩdã. B lakda b Biibl dãmbã n wilgd sẽn dat-b n kelgã t’a Zezi maana a vɩɩmã maoong n pak sor n kõ ãdem-biisã tɩ b tõe n pẽneg Wẽnnaam, n paam b yel-wẽna sugri, la b paam vɩɩm sẽn pa sat saagre. (Zã 3:16; 2 Korẽnt dãmba 5:18, 19) B moondame tɩ Wẽnnaam Rĩungã lugla saasẽ, t’a Zezi Kirist sẽn paam vʋʋsem sõng zaeebã yaa Rĩmã. B leb n moondame tɩ ka la bilfu Rĩungã na n yiisa wẽngã sẽn be tẽng zugã la a ges Arzãnã luglg yelle. (Wilgri 11:15; 21:3, 4) B pidsda a Ezai bãngr-gomdã n togsd b taabã tɩ yaa masã la a “Zeova maan-neerã yʋʋmde,” (NW ) sasa ning ãdem-biisã sẽn tõe n ket n sak koe-noogã. B leb n keoogda nebã tɩ b bãng tɩ ka la bilfu, “Wẽnnaam sũ-dokr daar[ã]” na n waame, sasa ning a Zeova sẽn na n wa sãam wẽng maandb nins sẽn pa tekd yam n kos sugrã.—Yɩɩl Sõamyã 37:9-11.
7. Yel-bʋg b sẽn vɩɩmd n wilgd t’a Zeova Kaset rãmbã tara zems-n-taare, la bõe yĩng tɩ b tar zems-n-taar woto?
7 Dũni kãngã sẽn pid ne yel-beed la sabaab rãmbã pʋgẽ, koe-noog a to ye ka be n tar nafa sẽn kõn sa woto ye. Neb nins sẽn sakd-a wã kẽeda dũni gill kiris-neb saam-biis sẽn tar zems-n-taar sʋka. Kiris-nin-kãens pa basd tɩ b tẽnsã, b buudã la b tarma sẽn yaa toɛy-toɛya welg-b ye. B ‘maanda nonglem, bala a yaa bũmb fãa loɛtg sɩd-sɩda.’ (Kolos rãmba 3:14; Zã 15:12) D yãa rẽ rɩẽ Afirik tẽng a yembrẽ. Bug-raad tãoog n nek na-tẽngã neb ne yibeoogo. B rãmbã ra makdame n na n deeg naama. La zabrã sẽn wa n lebg buud zabrã, zak a yembr neb sẽn ya a Zeova Kaset rãmb la b sãbg-yã, b sẽn solg b Kaset taag sẽn yaa buud a to wã nedã yĩnga. Zakã neb leokame: “Ya a Zeova Kaset rãmb bal n be tõnd roogẽ wã.” Sã n yaa ne bãmba, buudã sẽn yaa toor-toorã pa tar yõod ye. Sẽn tar yõod n yɩɩdã yaa kiris-ned nonglmã, b sẽn na n kõ neb nins sẽn be belsg raab pʋgẽ wã belsgã. Pag a yembr sẽn da kĩ ne zag-kãng yeelame: “Tũudum a taabã neb fãa zãmba b tũudmã neba. Ya a Zeova Kaset rãmbã bal n pa maan woto.” Yɛl wʋsg sẽn wõnd woto la b togs tɩ yit tẽns nins sẽn gudg ne tẽng-n-biis ne taab zabã, tɩ wilgdẽ t’a Zeova Kaset rãmbã sɩd “nonga ba-biisã.”—1 Pɩɛɛr 2:17.
Koe-noogã toeemda neba
8, 9. a) Toeen-bʋs la neb nins sẽn sakd koe-noogã maanda? b) Yel-bʋs b sẽn vɩɩmd n wilgd koe-noogã pãnga?
8 Koe-noogã tɩ loee ne a Poll sẽn bool tɩ “vɩɩm ninga sẽn be masã wã, la vɩɩm ninga sẽn watã.” (1 Tɩmote 4:8) Woto pa kõt saagr sẽn be rasãnd wʋsgo, la sẽn be bas-m-yam beoog-daar yĩng bal ye, la a leb n manegda “vɩɩm ninga sẽn be masã wã.” Yaa Wẽnnaam Gomdã, sẽn yaa Biiblã n wilgd a Zeova Kaset rãmbã yembr-yembr sore, sẽn na yɩl tɩ b vɩɩmã zems ne Wẽnnaam daabã. (Yɩɩl Sõamyã 119:101) B lebgda nin-paalse, b sẽn bɩɩsd tɩrlem la kɩs-sɩdã.—Efɛɛz rãmba 4:24.
9 Ges-y a Franco makrã. A ra yaa sũ-yikr soaba. Yɛlã sã n da pa lebd be fãa, a sũurã ra yikda wʋsg t’a pãbd teedã n wãada. A pagã zãmsa Biiblã ne a Zeova Kaset rãmbã, la Kaset rãmbã sẽn kõ mak-sõng kiris-nedemdã pʋgẽ wã sõnga a Franco bilf-bilf t’a bãng t’a ra segd n toeemame. A zãmsa Biiblã ne-b n baas n tõog n puk vʋʋsem sõngã biis nins sẽn yaa laafɩ la yõk-m-mengã. (Galat dãmba 5:22, 23) A ra bee neb 492 sẽn deeg lisg Bɛlzik yʋʋmd 2001 wã sʋka. Ges-y a Alejandro makrã me. A yaa bi-bɩɩg sẽn da rɩkd dorgã wʋsgo, hali tɩ kɩt t’a ra vɩ sagdã lobr zĩigẽ n fuiid be n baood bũmb nins a sẽn tõe n tɩ koose, n paam n da dorgã. A sẽn da wa n tar yʋʋm 22, a Zeova Kaset rãmbã boola a Alejandro t’a wa tɩ b zãms Biiblã ne-a, t’a sake. A ra karemda Biiblã daar fãa la a wat kiris-neb tigissã. A yɩlga a vɩɩmã tao-tao hali n kɩt tɩ pa yã n ta kiis a yoobe, la a tõog n kẽes a meng koe-noogã mooneg pʋgẽ, n lebg Panama rɩẽ koe-moondb 10 115 wã ned a yembr ye.
Koe-noogã yaa bark n kõ sik-m-mens rãmbã
10. Ãnd dãmb n sakd koe-noogã, la wãn to la b toeemd b tagsgo?
10 A Ezai togsa bãngr-gomd n wilg tɩ b ra na n moona sik-m-mens rãmbã koe-noogã. Sik-m-mens rãmb kãens yaa ãnd dãmba? B wilga Tʋʋma sebr pʋgẽ tɩ yaa b rãmb nins sẽn “tar yam-sõng vɩɩm sẽn kõn sa wã yĩngã.” (Tʋʋma 13:48, NW ) B yaa sik-m-mens rãmb sẽn yit tals la arzɛk rãmb sʋka, sẽn sak sɩdã koɛɛga. Nin-kãensã bãngame tɩ Wẽnnaam daabã maaneg na n waa ne bark sẽn yaa kãsems n yɩɩd dũni kãngã sẽn tõe n kõ wã fãa. (1 Zã 2:15-17) La wãn to la a Zeova Kaset rãmbã moond koe-noogã tɩ kẽed nebã sũyã?
11. Sã n yaa ne a Polle, yaa wãn to la b segd n moon koe-noogã?
11 Be neere, ges-y tʋm-tʋmd a Poll makrã. A gʋlsa Korẽnt dãmbã woto: “M ba-biisi, mam sẽn wa yãmb nengẽ wã, mam ka wa ne goama walla yam sẽn yɩɩd neb a taab rẽnda n wa togs yãmb Wẽnnaam kaseta ye. Tɩ bõe, mam yãka yam tɩ mam kõn bãng bũmb ba a yembre yãmb sʋk ye, sã n ka a Zezi Kirist la b sẽn ka bãmb kũum dapɩka zuga bala.” (1 Korẽnt dãmba 2:1, 2) A Poll pa bao n tũnug ne a bãngrã n dɩ yʋʋr a kɛlgdbã taoor ye. A pa zãms-b bũmb a to n zʋʋg yɛl nins sẽn sɩd yaa sɩd sẽn yit Wẽnnaam nengẽ wã ye. Yaa yel-kãens la b sẽn gʋls tɩ be Biiblã pʋgẽ rũndã wã. Ges-y a Poll sẽn yeel a Tɩmote me sẽn yaa koe-noogã moond wa yẽ wã bũmb ninga: “Bɩ f moon Wẽnnaam koɛɛgã, la f nang pãng wakat fãa, nana wala toog pʋgẽ.” (2 Tɩmote 4:2) A Tɩmote ra segd n moona “koɛɛgã,” Wẽnnaam koɛɛgã. A Poll gʋlsa a Tɩmote woto me: “Nang pãng n ta Wẽnnaam yam n yɩ tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.”—2 Tɩmote 2:15.
12. Yaa wãn to la a Zeova Kaset rãmbã tũud a Poll saglsã la a makrã rũndã-rũndã?
12 A Zeova Kaset rãmbã tũuda a Poll makrã, n paas sagls nins a sẽn kõ a Tɩmote wã. B sak n deegame tɩ Wẽnnaam Gomdã tara pãnga, n dɩkd-a n tʋmd sõma, b sẽn baood n na n wilg b yagsã saagr la belsg goam sẽn zemsã sasa. (Yɩɩl Sõamyã 119:52; 2 Tɩmote 3:16, 17; Hebre dãmba 4:12) Yaa sɩda, b tʋmda sõma ne sɛb nins sẽn tik Biiblã zugã, sẽn na yɩl tɩ sẽn nong-b sɩdã paam Biiblã bãngre, b vʋʋsg wakate. La wakat fãa b baoodame n na n wilg nebã Gʋlsg sõamyã goama. B miimi tɩ Wẽnnaam Gomdã vʋʋsem sõng sẽn vẽneg tɩ b gʋlsã na n tusa sik-m-mens rãmbã tɩ b toeeme. La b sã n tũnug ne woto, kengda bãmb mensã tẽeb me.
‘Sẽn yãbdbã fãa belsgo’
13. Yʋʋmd 2001 wã, yel-bʋs n kɩt tɩ nebã yãbd n dat belsgo?
13 Yʋʋmd 2001 wã talla sabaab rãmb wʋsgo. La rẽ kɩtame tɩ neb wʋsg ra rat belsgo. Wala makre, bõn-bɩʋʋng kiuugã, sabaab kãseng n zĩnd Etazĩni. Yɩɩ teerorist rãmbã sẽn wẽ zĩig ning b sẽn boond tɩ Wɛrld Tereed Sẽntɛɛr sẽn be Niu Yorkã, la Pẽntagon sẽn pẽ Wasĩnton, D.C. wã. Ad wẽ-kãngã sɩd waa ne sũ-sãang tɛkẽ n kõ Etazĩni tẽngã tõre! Yel-kãensã taoore, a Zeova Kaset rãmbã maoodame n na n pids b tʋʋmdã n kõ ‘sẽn yãbdbã belsgo.’ Yɛl a wãn neb sẽn vɩɩmd n na n wilg b sẽn maand rẽ to-to.
14, 15. Wãn to la Kaset rãmb tõog n tũnug ne Gʋlsg Sõamyã sõma n bels sẽn yãbdbã zĩis toɛ-toɛ a yiib pʋsẽ?
14 Saam-bi-poak sẽn yaa wakat fãa koe-noogã moond pẽnega pag sor zug n sʋk-a a sẽn tagsd to-to ne teerorist rãmbã bi-be-tʋʋm sẽn maan sẽn pa kaoosã. Tɩ pagã sɩng yãbre, n yeel t’a sũurã sãamame, la a rat n bãnga a sẽn na n kõ a sõngr to-to. Kaset soabã yeela pagã tɩ Wẽnnaam geta tõnd fãa yell wʋsgo, la a karem Ezai 61:1, 2. Gom-kãensã vʋʋsem sõng sẽn vẽneg tɩ b gʋlsã talla võor ne pagã, t’a yeel tɩ nebã fãa ra maanda sũ-sãang nebã sẽn ki wã yĩngã. A saka seb-vãoog n kos Kaset soabã t’a wa ges-a a yiri.
15 Kaset rãmb a yiib sẽn da moond koe-noogã mika rao sẽn tʋmd a garaas pʋgẽ, n yeel-a tɩ b rat n taas-a-la belsg goam sẽn yit Gʋlsg Sõamyã pʋgẽ, yel-beed ning sẽn maan sẽn pa kaoos Wɛrld Tereed Sẽntɛɛr zĩigẽ wã yĩnga. A sakame, tɩ b karem 2 Korẽnt dãmba 1:3-7, sẽn tar gom-kãensã wã: “Tõnd paamda belsg wʋsg Kirist maasem yĩng[a].” Rao wã talla mi-beoogo, a yagsã sẽn ya a Zeova Kaset rãmbã sẽn da taasd belsg koɛɛg neb a taabã yĩnga, n yeele: “Wẽnd na ning tʋʋm-sõng ning y sẽn maandã barka.”
16, 17. Yel-bʋs a yiib b sẽn vɩɩmd n wilgd tɩ Biiblã tara pãng n tõe n sõng neb nins sũy sẽn sãam wʋsg yel-beedã yĩnga?
16 A Zeova Kaset soab a yembr sẽn da lebg n na n tɩ ges neb nins sẽn nong sɩdã sega pag a yembr sẽn da wilg a ratem ne koɛɛgã biribla. Kaset soaba wilgame tɩ yagsã sẽn da maand bũmb ning yel-beedã sẽn maan sẽn pa kaoos pʋgẽ wã poorã paka yẽ me. Linga rao wã wʋsgo, Kaset soabã sẽn dɩk a sẽk n get nebã n na n bãng nebã keelma. T’a yeel t’a sẽn da tʋmdẽ wã kɛga Wɛrld Tereed Sẽntɛɛre, la tɩ sabaabã fãa yɩɩ a nifẽ. A sẽn wa n sʋk tɩ bõe yĩng la Wẽnnaam bas tɩ namsgã beẽ, Kaset soabã karma Biiblã verse rãmba, wala makre Yɩɩl Sõamyã 37:39 sẽn yet tɩ: “Nin-tɩrs fãagr yita Zusoaba nengẽ. Bãmb yaa bãmb pãng zĩig toog wakate.” Ne sõmblem, rao wã sʋka Kaset soabã yẽ ne a zakã neb sẽn da rɩkd yellã to-to, la a yeel-a t’a lebg n wa, la a wilg a mi-beoog ne b sẽn kaag-a wã.
17 Neb tusa wã a Zeova Kaset rãmbã sẽn bels terorist rãmbã bi-be-tʋʋmã poorã sʋkã, pag a yembr n zĩndi. Yaa Kaset rãmbã sẽn da wa n get b yagsã la b seg-a. A sũurã ra sãama wʋsg ne yɛl nins sẽn da maana, t’a kelg Yɩɩl Sõamyã 72:12-14 karengã: “Yẽ na n fãaga nimbãan ned sẽn kelemda la naong soab sẽn ka tar sõangda. Far soaba ne nimbãan ned nimbãaneg tara yẽnda, la yẽ na n fãaga nimbãan dãmba vɩɩm. Yẽ na n fãaga bãmb ne toolem la pãnga, la bãmb zɩɩm daagr na n yɩɩ bõn-kãseng yẽ nifẽ.” Ad gom-kãensã sɩd ra zemsa kɛpɩ! Pagã kosa Kaset rãmbã tɩ b karem verse kãensã yɛsa, la a yeel-b tɩ b wa kẽ zakẽ tɩ b kẽng taoor ne sõsgã. Sõsgã saabẽ, Biibl zãmsg n sɩnge.
18. Wãn to la Kaset soab sõng a yagse, b sẽn wa n kos-a t’a pʋʋs b yĩngã?
18 Kaset soab a yembr n tʋmd rɛstorã pʋgẽ sẽn be arzɛk rãmb sakẽ. Pĩndã nebã ra pa wilgd ratem ne Rĩungã koe-noog beenẽ ye. Teerorist rãmbã bi-be-tʋʋm poore, wõnda nin-kãens sũyã sãama wʋsgo. Bi-beesã wẽeb poore, arzũmã zaabre, rɛstorã wã yel-gɛt sẽn yaa pagã boola neba fãa tɩ b yi yɩng n zã buzi rãmba, tɩ b tags wakat a wãn bal n tẽeg neb nins sẽn ki wã yelle. Kaset soabã talla waoogr ne b yĩn-sidsã n yi yɩng n yals sorã zug sɩɩ. Yel-gɛtã bãngame t’a ra ya a Zeova Kaset soaba. Rẽ, b sẽn tags bilf poore, pagã kos-a lame t’a pʋʋs nebã fãa yĩnga, tɩ Kaset soabã sake. A pʋʋsgã pʋgẽ, a goma yãbrã sẽn be wʋsgã yelle, la a yeel tɩ saagr n be. A goma wakat ning bõn-wẽns kãensã sẽn pa na n leb n zĩndã yelle, la a yeel tɩ nebã fãa ra tõe n pẽnega belsg Wẽnnaamã n paase, b sã n paam Biiblã bãngr hakɩka. B sẽn wa n yeel tɩ “ãmiina” poore, yel-gɛtã ne neb sẽn yɩɩd 60 sẽn da be yɩng be wã kolga Kaset soabã n pʋʋs-a barka, n mobg-a, n togs tɩ b zɩ n wʋm pʋʋsg sẽn yaa sõma woto ye.
B yaa bark n kõ b yagsã
19. Yel-bʋg n wilgd tɩ kẽer sakd n deegame t’a Zeova Kaset rãmbã tũuda noy sẽn yaa sõma wʋsgo?
19 Sẽn yɩɩd fãa masã wakatã, neb nins sʋk a Zeova Kaset rãmbã sẽn beẽ n moond koe-noogã, yaa nafr n kõ nin-kãense, wala neb wʋsg sẽn yeelã. Yɩta wãn tɩ neb sẽn dat n sõng tɩ laafɩ, pʋ-peelem la vɩɩm manesem sẽn yaa sõma zĩndi, pa yɩ pãng sẽn be nafre? Azi Tẽn-sʋk tẽng a yembrẽ, Kaset rãmbã yãa polɩɩs naab sẽn be retrɛte. A yeelame tɩ b ra yeela yẽ t’a vaees tũudum toɛy-toɛyã. A sẽn wa a Zeova Kaset rãmbã nengẽ n na n gesã, a sũur yɩɩ noog ne b pʋ-peelmã la b manesem sõngã. A sũur yɩɩ noog ne b tẽebã sẽn pa vigsdã, la b sẽn tikd b zãmsgã Gʋlsg Sõamyã zutã yĩnga. Rao-kãngã saka Biibl zãmsgo.
20. a) Bõe la tʋʋmd ning a Zeova Kaset rãmbã sẽn tʋm rɩẽ wã wilgda? b) Bõe n wilgd tɩ tʋʋm wʋsg n ket maanego, la wãn to la d get zu-noog ning d sẽn tar n yaa koe-noogã moondbã?
20 D sã n ges yɛl a wãn b sẽn vɩɩmdã b sẽn togs sõs-kãngã pʋgẽ wã, baa d sẽn tõe n togs bãmb tusa wã, yaa vẽeneg t’a Zeova Kaset rãmbã moona koɛɛgã wʋsg yʋʋmd 2001 tʋʋmd yʋʋmdã sasa. * B goma ne neb milyõ rãmba, b belsa neb wʋsg sẽn da yãbde, la b moonegã tʋʋmd talla barka. Yɩɩ neb 263 431 n wilg tɩ b rɩka b mens n kõ Wẽnnaam, n deeg lisgu. Dũniyã gill zugu, koe-noogã moondb sõor fɩɩgrã yɩɩ 1,7 koabg zugu. La neb 15 374 986 sẽn wa a Zezi kũumã yʋʋmd-yʋʋmd tẽegrẽ wã wilgdame tɩ tʋʋm wʋsg n ket maanego. (1 Korẽnt dãmba 11:23-26) Bɩ d ket n baood sik-m-mens rãmb nins sẽn sakd koe-noogã. La a Zeova maan-neerã yʋʋmd sã n ket n kẽngd taoor fãa, bɩ d ket n belsd “sũ-sãang rãmba.” Ad sɩd yaa zu-noog tɛkẽ la d sẽn tarã! Sɩd-sɩda, tõnd fãa moonda a Ezai gom-kãensã: “Mam na n maana sũ-noog ne Zusoabã. Mam na n kɩdma m Wẽnnaama yĩnga.” (Ezai 61:10) Bɩ Wẽnnaam ket n tũnugd ne tõnd n tʋmdẽ, a sẽn pidsd bãngr-gom-kãngã wã sasa: “Zusoab a Wẽnnaam na n kɩtame tɩ tɩrlem ne pẽgr bul n yi buuda fãa taoore.”—Ezai 61:11.
[Tẽngr note]
^ sull 20 Seb-neng 29 n tɩ ta 32 wilgda a Zeova Kaset rãmbã tʋʋmdã, yʋʋmd 2001 tʋʋmdã sasa.
Yãmb tẽrame bɩ?
• Wãn to la koe-noog ning a Zezi sẽn moona ning sik-m-mens rãmbã barka?
• Bark bʋg la neb nins sẽn sak koe-noogã a Zezi pipi karen-biisã sẽn moona paam-yã?
• Rũndã-rũndã, wãn to la koe-noogã ning sẽn kelgdbã barka?
• Wãn to la d get zu-noog ning d sẽn tar n yaa koe-noogã moondbã?
[Zãmsgã sogsgã]
[Taablo, seb-neng 29-32]
A ZEOVA KASET RÃMBÃ TƲƲMD RAPOOR DŨNIYÃ GILL ZUGU, YƲƲMD 2001
(Ges-y volim relie wã pʋgẽ)
[Foto rãmba, seb-neng 25]
Wakat fãa, a Zeova Kaset rãmbã tẽegdame tɩ b tara zɩɩb sẽn yaa koe-noogã moonego
[Foto rãmba, seb-neng 27]
Neb nins sẽn sakd koe-noogã lebgda dũni gill saam-biis sẽn tar zems-n-taare