Karemdbã sʋgsgo

Hal sẽn ta zĩ-bʋg la a Moiiz Tõogã sẽn gɩdg tɩ neb sẽn kĩ ne taab ra kẽ kãadem ne taabã pak kiris-nebã rũndã-rũndã?

Tõog ning a Zeova sẽn kõ Israɛll buudã pa togsd yɛl wʋsg kãadem yel-maandɩ wɛɛngẽ ye. Baasg zãnga, a tara gɩdgr kẽer kãadmã kõom wɛɛngẽ. Wala makre, Maankʋʋre 18:6-20 pʋgẽ, d yãta b sẽn gɩdg tɩ ned ra gãand “a roagd” bɩ [“a rog-pẽt ye,” NW ]. Verse kãens wilgda rogem loets buud nins sẽn gɩdgd kẽ ne taabã. Yaa sɩd tɩ kiris-nebã pa tũud a Moiiz Tõogã ye. (Efɛɛz rãmba 2:15; Kolos rãmba 2:14) Baa ne rẽ, woto pa rat n yeel tɩ kiris-nebã tõe n maana b toog kae bala, b sã n wa yãkd ned ning b sẽn na n kẽ kãadem ne wã ye. Rẽ yaa bʋʋm toɛy-toɛy yĩnga.

Pipi, dũniyã rãmb tara b noy sẽn tɩ loe ne kãadem rog-pẽts ne taab sʋka, tɩ kiris-nebã segd n sak tẽng ning pʋgẽ b sẽn vɩyã noyã. (Matɩe 22:21; Rom dãmba 13:1) Yaa sɩd tɩ tẽng ne a to fãa, noyã pa yembr zĩ-kãens wɛɛngẽ ye. Rũndã-rũndã noy wʋsg sẽn tɩ loe ne yel-kãngã reng n tika kẽ kãadem ne rog-pẽt sẽn wat ne zu-loees nins rogmã wɛɛngẽ wã zugu. D miime tɩ neb sẽn yaa rog-pẽts sã n kẽ kãadem ne taaba tõe n kɩtame tɩ b rog kamb sẽn tar zams la bãase. Yaa rẽ yĩnga, n paas b sẽn ‘sakd nanamsa noyã’ yĩng n kɩt tɩ kiris-neb sẽn dat n kẽ kãadmã sakd tẽng ning b sẽn beẽ wã noy sẽn tɩ loe ne kãadem kõomã.

Masã yell sẽn be yaa d bãng sẽn sakd la sẽn pa sakd zĩig ning tõnd sẽn vɩyã. Buud fãa la bal tara noy la rog-n-mik sẽn gɩdg kãadem neb sẽn yaa rog-pẽts ne taab sʋka, n get rẽ wa kisgu. Kãadem gɩdgr a woto tõe n toeema hal wʋsg buud toɛy-toɛy pʋsẽ, la “naoor wʋsgo, neb a yiibã sã n pẽ taab rogma wɛɛngẽ n yɩɩda, kɩtdame tɩ kẽ ne taabã yaa bũmb sẽn kis n yɩɩd bãmb b yiibã sʋka,” woto la sebr a yembr (The Encyclopædia Britannica) yeta. Baa tɩ sã n pa kãadem sẽn tɩ loe ne rog-pẽtse, kiris-nebã pa na n maan b toog kae zãng ne rog-n-mikã b sẽn luglã, bɩ buudã tagsg sẽn tar tikr sõma wã ye. Rẽ yaa sẽn na yɩl tɩ b ra wa sãbg kiris-neb tigingã bɩ Wẽnnaam yʋʋrã ye.—2 Korẽnt dãmba 6:3.

Bũmb a yembr d sẽn pa segd n yĩm yaa sũur-kasetã Wẽnnaam sẽn kõ tõndã. Nebã fãa rogame n mi sẽn zems la sẽn pa zemse, sõma la wẽnga. (Rom dãmba 2:15) B sũur kasetã yet-b-la sẽn zems la sẽn pa zemse, bũmb ning sẽn pa segd la sẽn yaa beegre, sã n pa mikame t’a soabã sũur kaset golmame bɩ riglmame, a sẽn minim wẽng maanegã yĩnga. A Zeova goma rẽ yell a sẽn da wa n kõ Israɛll nebã a tõogã n gɩdg tɩ b ra kẽ kãadem ne rog-pẽtã. D karemda woto: “Bɩ y ra maan wa Ezipt rãmba sẽn maanda zĩig ninga yãmb sẽn da be wã ye. Bɩ y ra maan wa neb nins sẽn be Kana soolma sẽn maanda zĩig ninga mam sẽn na n zĩndg yãmba ye. La bɩ y ra sak bãmb minunda me ye.” (Maankʋʋre 18:3) Kiris-nebã nanda b sũur kasetã sẽn paam Biiblã zãmsgã wʋsgo, la b pa basd tɩ tẽn-tẽnsã tagsg sẽn golem sẽn tɩ loe ne sõma la wẽngã sãam-a ye.—Efɛɛz rãmba 4:17-19.

Rẽnd d tõe n baasame n yeel tɩ bõe? Baa ne kiris-nebã sẽn pa tũud a Moiiz Tõogã rũndã-rũndã wã, b sũur kasetã yet-b-la vẽeneg tɩ kãadem kõom ne rog-pẽts wala ba ne a bipugla, ma ne a biribla, biribl ne bipugl sẽn yaa ma a yen bɩ ba a yen, yaa bũmb b sẽn pa tõe n sak abada kiris-nebã sʋka. * Rogmã will sã n tar yalgre, kiris-nebã miime tɩ noy n lugl kãadmã wɛɛngẽ tɩ zems ne laloa wã, la tɩ no-kãens sakda reegre, sã n yaa ne minungã la nebã nif gesgo. D segdame n tags b zut neere, d sã n wa sakd Gʋlsg Sõamyã sagl-kãngã: “Bɩ kãadem zĩnd waoogre ne neba fãa.”—Hebre dãmba 13:4.

[Tẽngr note]