D sẽn na n mao ne “yĩng gõaag” to-to
D sẽn na n mao ne “yĩng gõaag” to-to
“Mam barka [f sẽn pa segd ne wã, NW ] sekda foom.”—2 KORẼNT DÃMBA 12:9.
1, 2. a) Bõe yĩng tɩ pa segd n ling-du, makrã la zu-loeesã sẽn paamd tõndã yĩnga? b) Bõe yĩng tɩ d tõe n tall bas-yard baa d sã n wa be makr pʋgẽ?
“NEB nins fãa sẽn dat n tũ Kirist Zezi ne pʋ-peelma na n paama namsgo.” (2 Tɩmote 3:12) Bõe yĩng tɩ yaa woto? Ya a Sʋɩtãan sẽn yet tɩ ninsaal balemda Wẽnnaam a sẽn dat bũmb yĩng balã, t’a maand a sẽn tõe fãa n na n wilg tɩ sɩd yaa woto wã yĩnga. Vugri, a Zezi keooga tʋm-tʋmdbã sẽn da yaa kɩs-sɩd dãmbã woto: “Sʋɩtãana kosame n dat n paam yãmb n yelg wa ki.” (Luk 22:31) A Zezi ra mii sõma tɩ Wẽnnaam basame t’a Sʋɩtãan makd tõnd ne zu-loees sẽn wat ne namsg wʋsgo. Yaa sɩda, woto pa rat n yeel tɩ zu-loɛɛg fãa sẽn paamd tõnd yita a Sʋɩtãan bɩ a zĩn dãmbã nengẽ vẽeneg ye. (Koɛɛg Soaba 9:11) La a Sʋɩtãan tũnugda ne bũmb nins fãa a sẽn tarã sẽn na yɩl n sãam tõnd burkĩndã Wẽnnaam taoore.
2 Biiblã yeta tõnd tɩ makr nins sẽn wat tõnd zutã pa segd n ling-d ye. Makr ning fãa sẽn wa tõnd zug pa bõn-sãang ye. (1 Pɩɛɛr 4:12) Sɩda, “[tõnd] ba-biisa sẽn be dũniyã pʋgẽ wã tara namsg wa yãmb sẽn tarã.” (1 Pɩɛɛr 5:9) Rũndã-rũndã, a Sʋɩtãan makda Wẽnnaam sõgen fãa ne yɛl wʋsgo. A Sʋɩtãan Munaafɩɩk sũur noomame, a sã n neẽ tɩ tõnd namsd ne zu-loees wʋsg sẽn wat ne sũ-sãams ka tɛka. Sẽn na yɩl n maan woto, a tũnugda ne a zãmaan kãngã yɛlã sẽn na yɩl n paas bɩ n keng ‘tõnd yĩng gõaag’ buud fãa wã toom. (2 Korẽnt dãmba 12:7) Baasg zãnga, d pa segd n bas t’a Sʋɩtãan sãam d burkĩndã Wẽnnaam taoor ye. Wa a Zeova sẽn na n ‘maan sor’ tɩ tõnd tõog n tall sũ-mar makrã pʋgẽ wã, yaa woto me la a na n maane, tõnd sã n wa be zu-loees sẽn wõnd gõos tõnd yĩngã pʋgẽ.—1 Korẽnt dãmba 10:13.
D sẽn na n mao ne gõaag to-to
3. A Zeova leoka a Poll tɩ bõe, a sẽn kos-a t’a yiis gõaagã a yĩngẽ wã?
3 Tʋm-tʋmd a Poll kosa Wẽnnaam t’a yãk gõaagã a yĩngẽ wã. A leokame tɩ: “Mam kosa Zusoaba naoor a tãab tɩ b kɩt tɩ bõn-kãng loog n bas maam.” A Zeova leoka a Poll tɩ bõe, baa ne a sẽn kos woto ne a sũur fãa wã? “Mam barka sekda foom; tɩ bõe, yaa pãng komsem pʋgẽ la ned bãngd mam pãnga.” (2 Korẽnt dãmba 12:8, 9) Bɩ d vaees leok-kãngã n ges wãn to la a tõe n sõng tõnd tɩ d mao ne zu-loees sẽn wõnd gõose, tɩ namsd tõndo.
4. Wãn to la a Poll rɩ a Zeova barkã a sẽn pa segd ne wã nafa?
4 Ges-y tɩ Wẽnnaam yeela a Poll t’a tall mi-beoog ne bark a sẽn pa segd ne wã a sẽn da zoe n paam Kirist maasem yĩngã. Sɩda, a Poll paama bark kãsems ne manesem toɛy-toɛy wʋsgo. Ne nonglem a Zeova kõ-a-la zu-noog t’a lebg a Zezi karen-biiga, baa ne a Poll sẽn kɩɩs a Zezi karen-biisã tɩ loog noorã. (Tʋʋma 7:58; 8:3; 9:1-4) Rẽ poore, ne sõmblem, a Zeova kõo a Poll tʋʋm la zu-nood wʋsg a sõgenegã pʋgẽ sẽn kõ-a sũ-no-kãsenga. Rẽ tara zãmsg sẽn yaa vẽeneg n kõ tõndo. Baa d sã n wa be toog sẽn yaa kãseng pʋgẽ, d ket n tara bark wʋsgo, tɩ d segd n tall mi-beoog rẽ yĩnga. D makrã pa segd n tol n kɩt tɩ d yĩm sõmblem wʋsg ning a Zeova sẽn tall ne-dã ye.—Yɩɩl Sõamyã 31:20.
5, 6. a) Wãn to la a Zeova zãms a Poll t’a bãng tɩ yaa ‘pãn-komsem pʋgẽ la ned bãngd’ Wẽnnaam pãngã? b) Wãn to la a Poll makrã wilg t’a Sʋɩtãan yaa ziri yagda?
5 A Zeova barkã d sẽn pa segd ne wã seka tõnd bũmb a to pʋgẽ. Wẽnnaam pãngã yaa wʋsgo, hal tɩ yɩɩd sẽn na sõng tõnd d makrã pʋgẽ. (Efɛɛz rãmba 3:20) A Zeova zãmsa a Poll tɩ yaa ‘pãn-komsem pʋgẽ la ned bãngd yẽ pãngã.’ Wãn to? Ne nonglem, a kõo a Poll pãng tɩ seke, sẽn na yɩl t’a tõog n mao ne a makrã. A Poll me sẽn maan sũ-mar toogã pʋgẽ la a sẽn tall bas-yard zãng ne a Zeova wã wilga nebã fãa Wẽnnaam pãngã sẽn tar tõog ninga, a Poll sẽn yaa ninsaal sẽn ka pãng la sẽn yaa yel-wẽn maandã vɩɩm pʋgẽ. Ges-y rẽ sẽn maan a Sʋɩtãan bũmb ningã. A sẽn yeel tɩ ninsaalbã na n balma Wẽnnaam, vɩɩmã sã n yaa noog n pa tar zu-loees balã, a Poll sẽn tall burkĩndã yɩɩ wa pɛk la b waag tẽn-kãn-ned kãngã!
6 A Poll ra bee ne a Sʋɩtãan n zabd ne Wẽnnaam. A ra yaa ned sẽn da namsd kiris-nebã ne wuk-m-menga, n da yaa Fariziẽ sẽn da tar yẽesem. Sãmbg sẽn ka be, a ra tara naar a vɩɩmã pʋgẽ, a sẽn da rog zak ning pʋgẽ t’a nebã nus ra zãadã yĩnga. A Poll ra balemda a Zeova la Kirist masã, n yaa “tʋm-tʋmdba yao-zʋʋga.” (1 Korẽnt dãmba 15:9) Woto wã a ra sakda pipi kiris-nebã taoor lʋɩtb sull zu-sobendã ne sik-m-menga. Sẽn paase, a ra maanda sũ-mar toogã pʋgẽ ne kɩs-sɩda, baa ne a sẽn tar yĩng gõaagã. Vɩɩmã zu-loees sẽn pa kɩt t’a Poll yẽesmã boogã pa yɩ a Sʋɩtãan noog baa bilf ye. A Poll zɩ n yĩm tɩ sẽn pak-a n yɩɩd da yaa saagr ning a sẽn tar n na n dɩ naam Kirist saasẽ Rĩungã pʋgẽ wã ye. (2 Tɩmote 2:12; 4:18) Baasg zãnga zu-loɛɛg sẽn wõnd gõaag sẽn namsd wʋsg pa zĩnd sẽn tõog n boog a yẽesmã ye. Bɩ tõnd me yẽesmã kell n paam pãng woto! A Zeova sẽn sõngd tõnd d makrã pʋgẽ wã, a waoogda tõnd n kõt-d zu-noog tɩ d sõng n wilg t’a Sʋɩtãan yaa ziri yagda.—Yelbũna 27:11.
A Zeova seglsã yaa tɩlae ne tõndo
7, 8. a) A Zeova tũnugda ne bõe n kõt a sõgen dãmbã pãng rũndã-rũndã? b) Bõe yĩng tɩ Biiblã kareng daar fãa la a zãmsg tar yõod kẽeng sẽn na yɩl n tõog n mao ne d yĩng gõaagã?
7 Rũndã-rũndã, a Zeova kõta kiris-neb nins sẽn tũud sɩdã pãnga, n tũnugd ne a vʋʋsem sõngã, a Gomdã la kiris-nedemdã pʋgẽ saam-biisã. Wala tʋm-tʋmd a Polle, d tõe n dɩka d zɩɩbã n dogl a Zeova zug pʋʋsg pʋgẽ. (Yɩɩl Sõamyã 55:23) Wẽnnaam sã n pa yiis tõnd makrã me a tõe n kõ-d-la yam tɩ d mao ne-ba, baa yaa ne makr nins sẽn yaa kãsems n yɩɩdã. A Zeova leb n tõe n kenga tõnd raoodo, n kõ-d “pãng ning sẽn yɩɩd ninsaal dẽndã,” sẽn na yɩl n sõng-d tɩ d tall sũ-mar toogã pʋgẽ.—2 Korẽnt dãmba 4:7, NW.
8 Wãn to la d paamd sõng-kãngã? D segd n zãmsa Wẽnnaam Gomdã neere, bala yaa be la d yãt belsg sɩd-sɩda. (Yɩɩl Sõamyã 94:19) Biiblã pʋgẽ, d karemda goam Wẽnnaam sõgen dãmb sẽn togs tɩ kẽed sũuri, b sẽn da wa n bõosd Wẽnd sõngrã sasa. Wẽnnaam sẽn leok-ba, tɩ nong n yaa ne belsg goamã kɩtdame tɩ d tagse. A Gomdã zãmsg na n kõo tõnd pãnga, sẽn na yɩl tɩ “pãng ning sẽn yɩɩd ninsaal dẽndã yɩ Wẽnnaam dẽnda la ka sẽn yit-a tõnd mensẽ wã ye.” Wala tõnd sẽn segd n dɩ rɩɩb daar fãa n paam pãngã, woto me, d segd n dɩlga d mens ne Wẽnnaam goama n da vaal ye. Tõnd maanda woto bɩ? D sã n maand woto, d na n yãame tɩ d sẽn paam “pãng ning sẽn yɩɩd ninsaal dẽndã” sõngda tõnd tɩ d maan sũ-mar toogã pʋgẽ, zu-loeesã b sẽn tõe n dɩk n mak ne gõosã sã n wa namsd tõndo.
9. Wãn to la kãsem dãmbã tõe n sõng neb nins sẽn maood ne zu-loeesã?
9 Kiris-neb kãsem dãmbã sẽn yaa wẽn-zoɛtbã tõe n yɩɩ wa ‘zĩ-lilldg sebg wakate,’ la “zĩ-soalgdg sa-kẽeng wakate,” sẽn dat n yeel tɩ b kogenda tõndo, yɩɩrã la zu-loeesã taoore. Kãsem dãmb nins sẽn dat n zems ne bilgr kãngã vʋʋsem sõngã sẽn vẽneg tɩ b gʋlsã segd n kosa a Zeova ne sik-m-meng la ne pʋ-peelem, t’a kõ-b “gom-minim zɩlemde,” sẽn na yɩl tɩ b bãng b sẽn na n leok sẽn namsdbã to-to ne goam sẽn zemse. Kãsem dãmbã goam tõe n kõo tõnd belsgo, d sã n wa be toog pʋgẽ wa saag sẽn maagd zĩig to-to wã. Kãsem dãmbã sã n “bels sũ-sãoong rãmbã” ne b goamã, b sɩd teenda b tẽebã pʋgẽ saam-biis sẽn yɛ bɩ sẽn koms raood yĩng gõaag yĩngã.—Ezai 32:2; 50:4; 1 Tesalonik rãmba 5:14.
10, 11. Wãn to la Wẽnnaam sõgen dãmbã tõe n keng neb a taabã sẽn be mak-toos pʋsẽ wã raoodo?
10 A Zeova sõgen dãmbã fãa bee dũni gill kiris-nebã zak sẽn tar zems-n-taar pʋgẽ. N-ye, tõnd yaa “wil ne taab yĩng a yembr pʋgẽ,” la “zemsame tɩ tõnd me nong taaba.” (Rom dãmba 12:5; 1 Zã 4:11) Wãn to la d wilgd nonglem kãng sẽn yaa tɩlaeyã? Sã n yaa ne 1 Pɩɛɛr 3:8, (Sebr Sõngo) d maanda woto “ne taab kʋmbo, ne taab nonglem, ne taab nimbãan-zoeere” ne neb nins fãa sẽn kĩ ne tõnd tẽebã pʋgẽ wã. Sã n yaa ne neb nins sẽn maood ne yĩng gõaag tɩ pa nana wã, b yaa kom-bɩɩs tɩ b kʋʋlame me, tõnd fãa segd n talla sõmblem wʋsg ne-ba. Wãn-to?
11 D segd n modgame n zoe b nimbãanega, b sẽn namsdã yĩnga. Tõnd sã n pa tar nimbãan-zoeere, n pa tar nonglem bɩ d toog sã n kae ne-ba, d tõe n paasa b namsgã n pa bãng ye. Tõnd sã n miẽ tɩ b bee tood pʋsẽ, segd n tusa tõnd tɩ d gũus ne d goama, la d sẽn tar manesem ning ne-bã. D sã n tar manesem sẽn yaa sõma la sẽn kengd b raoodo, baa b toogã sẽn wõnd gõaagã sẽn namsd-bã sẽn yaa to-to, tõe n boog-a lame. Yaa woto la d tõe n sõng n keng b raoodo.—Kolos rãmba 4:11.
Kẽer sẽn mao ne b zu-loeesã n tõog to-to
12-14. a) Bõe la kiris-ned a yembr maan sẽn na yɩl n mao ne kãnsɛɛre? b) Wãn to la saam-bi-poak kãngã tẽebã pʋgẽ saam-biis teel-a la b keng a raoodo?
12 D sẽn kolgd yaoolem day kãensã saabã yĩnga, ‘toodã’ tara paasg bala. (Matɩe 24:8) Woto, tẽng zug ka, makr tõe n waa ned fãa zugu, sẽn yɩɩd fãa a Zeova sõgen dãmb nins sẽn yaa kɩs-sɩd dãmba, sẽn baood n na n maan a raabã. D rɩk makr ne kiris-ned sẽn da yaa wakat fãa so-pakda. Logtoɛɛmbã yãame tɩ bãag b sẽn boond tɩ kãnsɛɛr n tar-a, t’a kɩt tɩ b maan-a wopeer a kokoyẽ wã. Yẽ ne a sɩdã sẽn wa n bãng tɩ bã-kãngã n tar-a wã, b yɩɩ tao-tao n pʋʋs a Zeova n kaoos n bõos a sõngre. Rẽ poore, saam-bi-poakã yeelame tɩ bãan sẽn pa tõe n bãng n bilg n wa b zutu. Baasg zãnga, wakat ninga yaa noogo, wakat ninga yaa toogo, sẽn yɩɩd fãa, a sẽn wa n maood ne tɩbsgã sẽn wa ne zu-loees nins n paasã sasa.
13 Sẽn na yɩl n mao ne a bãagã, saam-bi-poakã modgame n bao n bãng kãnsɛɛr sẽn ya a soab wa a sẽn da tõe tɛka. A tɩ yãa a logtoɛɛmbã. Gũusg Gasgã la Réveillez-vous ! wã pʋgẽ, la a Zeova Kaset rãmba sɛb a taab pʋgẽ, a yãa neb vɩɩm kɩbay sẽn wilgd neb sẽn mao ne bã-kãngã b sũyã pʋsẽ. A leb n karma Biiblã verse rãmb sẽn yaa sõma sẽn wilgd t’a Zeova tara tõog n na n teel a nin-buiidã zu-loees wakate, la a leb n paam kɩbay a taab sẽn sõng-a.
14 Sõsg a yembr sẽn gomd d sẽn na n mao to-to ne saagr kaalem tara gom-kãensã sẽn kõt yamã: “Sẽn ka rat n naaga neb baooda sẽn noom a menga.” (Yelbũna 18:1) Woto yĩngã, sõsgã kõo sagl-kãngã: “Mao-y n da bao n bak n yɩ y yembr ye.” * Saam-bi-poakã yeta woto: “Neb wʋsg yeelame tɩ b ra pʋʋsda mam yĩnga, a taab telefona maam. Kãsem dãmb a yiib n da boond maam telefonẽ wakat fãa sẽn na yɩl n bãng m keelem. Mam paama flɛɛr dãmb la kart postall dãmb wʋsg sẽn toond pʋʋsem. Kẽer segla rɩɩb meng n wa. Sẽn paase, neb wʋsg kõo b mens ne yamleoog n na n dɩk maam n kẽng tɩbsgã zĩisẽ.”
15-17. a) Wãn to la kiris-ned mao ne zu-loees aksɩdã rãmb sẽn wa ne? b) Teelg bʋg la tigingã neb kõ-yã?
15 Niu Megsiko sẽn be Etazĩni wã, pag sẽn ya a Zeova Kaset soab hal sẽn kaoos n da maan aksɩdã rãmb a yiib mobill pʋgẽ. A yublã la a bãgdã poglame, tɩ yãng kõb-sugdsã bãag sẽn da namsd-a sẽn yɩɩd yʋʋm 25 sẽn loogã. Ad a sẽn yete: “Yɩl n zẽk m zugã, la m dɩk bũmb zɩslem sẽn pa yɩɩd kɩlo a yiib ra yaa tʋʋmd meng-menga. La m sẽn pʋʋs a Zeova ne m sũur fãa wã, sõng-m-la wʋsgo. Yɩɩ woto me ne Gũusg Gasgã sõss nins d sẽn zãmsã. Sõs-kãensã a yembr n wɛgs Miise 6:8, n wilg tɩ kẽn ne Wẽnnaam sik-m-meng pʋgẽ rat n yeelame tɩ f miime tɩ yɛl n be tɩ f pa tõe n maan ye. Rẽ sõnga maam tɩ m bãng tɩ baa ne m sẽn be zu-loɛɛg ning pʋgẽ wã, m pa segd n koms raoodo, baa lɛɛr dãmb nins m sẽn dɩkd n kẽesd koe-moonegã pʋgẽ wã sã n pa ta mam sẽn datã ye. Sẽn be yõod n yɩɩdã yaa m sẽn balemd-a ne yam-sõngã.”
16 Saam-bi-poakã leb n yeelame: “Kãsem dãmbã pẽga maam wakat fãa, modgr nins m sẽn maand n na n wa tigissã la m moon koe-noogã yĩnga. Kom-bɩɩsã ra pʋʋsda maam ne mobgre. So-pakdbã maaga b mens wʋsg ne maam, la naoor wʋsgo, b ra toeemda b moonegã sasa la a zĩis tɩ zems ne maam, m bãagã sã n wa wɩnge. Sã n da yaa saag n niid bɩ waood bɩ bũmb sẽn wõnd woto, b ra tallda maam ne nonglem n kẽng b lebg-n-tɩ-ges rãmbẽ wã, bɩ b Biibl zãms rãmbẽ wã. La m sẽn da pa tõe n bob korg ne sɛbã yĩnga, koe-moondb a taabã ra ningda mam sɛbã b kordẽ wã, m sã n wa yi koe-moonegẽ wã.”
17 Ges-y tigingã kãsem dãmbã la tẽedb a taabã sẽn sõng saam-bi-pogs a yiib kãensã tɩ b mao ne b komslmã sẽn wõnd gõaagã to-to. B kõo sõngr sẽn yaa vẽeneg ne nonglem, sẽn na yɩl n sõng-b zĩis sẽn yaa takɩ, tẽebã, yĩngã, la yĩn-sidsã wɛɛngẽ. Woto pa tusd yãmb tɩ y sõng saam-biis a taabã sẽn tar zu-loeesã sɩda? Kom-bɩɩse, yãmb me tõe n yɩɩ sõngr n kõ neb nins sẽn be yãmb tigingã pʋgẽ n maood ne yĩng gõaagã.—Yelbũna 20:29.
18. Raood kengr bʋg la d tõe n paam ne neb vɩɩm kɩbayã sẽn be Gũusg Gasgã la Réveillez-vous ! wã zʋrno rãmb pʋsẽ?
18 Gũusg Gasgã la Réveillez-vous ! wã yaa zʋrno rãmb sẽn tar kɩbay sẽn wilgd a Zeova Kaset rãmb wʋsg sẽn mao ne zu-loeese, n ket n maood ne-b b vɩɩmã pʋgẽ. Y sẽn karemd sõs-kãensã wakat fãa wã, y na n yãame tɩ y tẽebã pʋgẽ saam-biis sẽn be dũniyã gill zugã maana sũ-mar naongã zu-loeesã pʋsẽ, b nin-nongr kũum sabaab pʋgẽ sasa, n paas zabr sasa. A taab vɩɩ ne bãas sẽn koms-ba. Wʋsg pa tõe n maan bõn-yood nins neb nins sẽn tar laafɩ wã sẽn maand nana-nana wã ye. B bãasã yaa makr meng-menga, la sẽn tɩ yɩɩda, b sã n pa tõe n kẽes b meng kiris-neb tʋʋmã pʋgẽ wa b sẽn datã. Ad b sɩd tar mi-beoog wʋsg ne sõngr la teelg ning b saam-biis sẽn yaa kom-bɩɩs la sẽn kʋʋl-bã sẽn kõt-bã!
Sũ-mar tallg toog pʋgẽ kõta sũ-noogo
19. Bõe yĩng t’a Poll da tõe n kɩdem, baa ne a makrã sẽn wõnd gõosã la a pãn-komslmã fãa?
19 A Poll kɩdmame, a sẽn yã Wẽnnaam sẽn kõ-a pãngã. A yeelame: “Mam na n maana sũ-noog n yɩɩd m pãng-komsma pʋgẽ tɩ Kirist pãng pid maam. Yaa woto yĩnga mam maanda sũ-noog pãng-komsem pʋgẽ la paoogr pʋgẽ la yel-pakr pʋgẽ la namsg pʋgẽ la tood pʋsẽ Kirist yĩnga; tɩ bõe, mam sẽn ka be pãng wakate, yaa wakat kãng la mam paamd pãnga.” (2 Korẽnt dãmba 12:9, 10) A Poll sẽn vɩɩmd n yã yɛl ninsã yĩnga, a ra tõe n gʋlsa woto ne bas-m-yam: “Mam ka yet woto bũmb sẽn paoog maam yĩng ye; tɩ bõe, mam sũur yaa noog ne mam sẽn yaa bũmb ningã. Mam minima naongo, la mam minima arzɛk me. Ne bũmb fãa la zĩiga fãa mam minimame tɩ rɩ n tɩge, la mam minima kom me; mam minimame tɩ paam wʋsgo, la mam minimame tɩ kong me. Mam tõe n maana bũmb fãa ne Kirist pãnga bãmb sẽn kõt maama.”—Filip rãmba 4:11-13.
20, 21. a) Bõe yĩng tɩ d tõe n paam sũ-noogo, d sã n bʋgs “bũmb nins nin sẽn ka ne wã” zutu? b) “Bũmb nins nin sẽn ka ne wã” kẽer y sẽn saagd n na n yã tẽng zug Arzãnã pʋgẽ yaa bʋse?
20 Rẽnd d sã n maan sũ-mar ne toog buud fãa b sẽn tõe n mak ne yĩng gõaaga, d tõe n paama sũ-no-kãsenga, d sẽn tõog n wilg neba fãa t’a Zeova pãngã yaa vẽeneg tõnd pãn-komslmã pʋgẽ wã yĩnga. A Poll gʋlsame: “[D raooda ka boogd ye,” Sebr Sõngo] . . . Tõnd sɩɩga tara manegr daar fãa. Tɩ bõe, tõnd namsg sẽn yaa bilfu la sẽn ka kaoosda tʋmda tõnd pʋse tɩ kõ tõnd naam sẽn yaa kãseng n yɩɩda la sẽn ka sɛt ye. Tõnd . . . geta bũmb nins nin sẽn ka ne wã. Tɩ bõe, . . . bũmb nins nin sẽn ka ne wã paada wakat sẽn ka sɛta.”—2 Korẽnt dãmba 4:16-18.
21 Rũndã-rũndã, a Zeova nin-buiidã fãa la bal tara saagr n na n vɩɩmd tẽng zug Arzãnẽ n paam bark nins a sẽn kãabã. Rũndã-rũndã, b tõe n gesa bark kãensã wa bũmb “nin sẽn ka ne.” Baasg zãnga, ka la bilf bala, d na n yãa bark kãens ne d nini, n-ye, la d rɩ bark kãens nafa wakat sẽn pa sate. Bark a woto na n yɩɩ yolsgo, d sẽn pa na n leb n vɩɩmd zu-loees sẽn wõnd gõosã pʋgẽ abada wã yĩnga! Wẽnnaam Biriblã na n “sãam[a] Sʋɩtãana tʋʋma,” la a “sãam Sʋɩtãana sẽn so kũuma pãnga.”—1 Zã 3:8; Hebre dãmba 2:14.
22. Bas-yard la yam yãkr sẽn tar pãng bʋg la d segd n talle?
22 Rẽnd gõaag ning fãa sẽn be tõnd yĩngẽ wã n namsd tõnd rũndã-rũndã sẽn ya a soab fãa, bɩ d ket n maood ne-a. Wala a Polle, d na n paama pãng n maan woto a Zeova sẽn kõt tõnd pãng wʋsgã maasem yĩnga. D sã n wa paam n vɩ tẽng zug Arzãnẽ wã, d na n pʋʋsa a Zeova sẽn yaa tõnd Wẽnnaamã bark daar fãa, a tʋʋm-kãsemsã fãa a sẽn maan n sõng tõndã yĩnga.—Yɩɩl Sõamyã 103:2.
[Tẽngr note]
^ sull 14 Ges-y sõsg ning gom-zug sẽn yaa: “Biiblã tagsgo: D sẽn na n mao to-to ne saagr kaalem,” yʋʋmd 2000, sig-noy kiuug rasem a 8, Réveillez-vous ! wã pʋgẽ.
Wãn to la y na n leoke?
• Bõe yĩnga, la wãn to la Munaafɩɩkã makd n na n sãam kiris-neb hakɩkã burkĩndi?
• Wãn to la a Zeova pãngã ‘yaa vẽeneg ned pãn-komsem pʋgẽ’?
• Wãn to la kãsem dãmbã la neb a taabã tõe n keng neb nins zu-loeesã sẽn namsdã raoodo?
[Zãmsgã sogsgã]
[Foto, seb-neng 13]
A Poll pʋʋsa naoor a tãab n kos Wẽnnaam t’a yiis a yĩng gõaagã