Vɩɩm manesem noy nins yãmb sẽn yãkdã

YÃMB yaa ned sẽn tũud noy bɩ? Bɩ yãmb getame tɩ no-tɩrsã tũub ye pa tar yõod wʋsgo? Sẽn yaa to-to fãa, ned fãa tara a noy a sẽn tũud n tẽed tɩ yaa sõma. Sã n yaa ne gom-biis võor sebr a yembre, noy-tikr yaa “f meng noy sẽn tɩ loe ne manesem sõma.” Noyã tara pãng yɛl nins tõnd sẽn yãkd n na n maana zutu, la a wilgd tõnd sor vɩɩmã pʋgẽ. Noyã yaa wa busolle.

Wala makre, a Zezi sagla a karen-biisã tɩ b tũ vɩɩm manesem noor ning sẽn be Matɩe 7:12 pʋgẽ wã: “Yãmb sẽn dat tɩ neba maan yãmb bũmb ningã, bɩ yãmb me maan bãmb boto.” A Confucius karen-biisã tũu neer maaneg noy sẽn gomd sõmblem, sik-m-menga, waoogre, la kɩs-sɩda yelle. Baa neb sẽn pa wẽn-tũudb tara bũmb sẽn tar yõod n yɩɩd ne-ba, bɩ sor-wilgr b sẽn tũud b vɩɩmã pʋgẽ.

No-bʋs buud la d segd n yãke?

La d segd n ninga d yamẽ tɩ noyã tõe n yɩɩ sõma wall wẽnse. Wala makre, neb sõor sẽn tar paasg n basd tɩ manesem b sẽn boond masã tɩ maam-nandã tusd-b b manesmã pʋgẽ. Baa neb wʋsg sẽn tõe n pa mi gom-kãngã wã, bɩ sẽn tõe n tagsdẽ t’a pa pak-bã, b sã n basd manesem no-sõmsã yaa maam-nandã manesem la b tara. Yaa woto la yãmb boond manesem kãngã tɩ pa woto me, maam-nandã pukda rat-m-yembre, tɩ naoor wʋsg bɩ a naag ne laog nonglem sẽn loog noore. Sin televiziõ taoor soab a yembr yeelame: “Tõnd tara noy a yiibu. A yembrã yaa raadensã ratem pidsgu, t’a to wã yaa ligd baoobo.”

B tõe n dɩka maam-nandã manesem n mak ne ema (aimant). Wãn to la ema tar pãn-tusdg busoll sẽn yaa rɩtg babg wilgdã zugu? A yiibã sã n kɛg taaba, busollã fũ-peem pa leb n teesd rɩtg babgã ye. Woto me, maam-nandã manesem tõe n kẽesa ned weoog vɩɩm manesmã wɛɛngẽ, n kɩt tɩ bũmbã fãa a soabã sẽn maandã tik a tʋlsmã zugu.

Yaa bũmb sẽn lingd yãmba, tɩ y bãng tɩ maam-nandã manesem pa sɩng masã bɩ? A sɩnga Edɛn zẽedẽ wã, tõnd pipi roagdbã sẽn da wa n bas noy nins tõnd Naandã sẽn luglã. Woto sãama b sũur-kasetã sẽn yaa wa sor-wilgdã. B sẽn ya a Ãdem ne a Hawa yagensã, manesem kãngã b sẽn boond masã tɩ “maam-nandã” waa ne yɩɩr n kõ ãdem-biisã.—Sɩngre 3:6-8, 12.

Sẽn yɩɩd fãa, d nee manesem kãngã sasa ning Biiblã sẽn boond tɩ ‘yaoolem wakatã,’ sẽn yaa “tood” sasa wã. Neb wʋsg yaa “beed dãmba.” Rẽnd pa lingri, b sẽn tusd tõnd tɩ d tall maam-nand manesmã ye.—2 Tɩmote 3:1-5.

 Tõe tɩ yãmb na n saka bi-bɩɩg yʋʋr sẽn boond t’a Olaf sẽn gʋls a Zeova Kaset rãmbã tʋʋmd-will a yembr sẽn be Eropã gom-kãensã: “Yaa toog tɩ f kell n pa yɩlemd vɩɩm manesmã la yoobã yɛl wɛɛngẽ, sẽn yɩɩd fãa sã n yaa ne tõnd kom-bɩɩsã. D bõosdame tɩ y ket n tẽegd-d tɩ yaa tɩlae tɩ d gãd Biiblã noy sõma-sõma.”

A Olaf sẽn yeelã yaa sɩda. Wẽnnaam noyã tõe n sõnga tõndo, kom-bɩɩs la sẽn kʋʋl-ba, tɩ d ket n tũud manesem noy sẽn yaa sõma wʋsgo. B leb n tõe n sõnga tõnd tɩ d lak d mens ne maan-nandã manesem. Y sã n dat n zãms n paas Biiblã noy sẽn tõe n sɩd sõng-y to-to wã zugu, bɩ y modg n karem sõsg ning sẽn pʋgdã.

[Foto, rãmba, seb-neng a 4]

Rũndã-rũndã, neb wʋsg toor kae ne neb a taabã yɛl ye