Bõe yĩng tɩ d segd n deeg lisgu?

“Bɩ y kẽng n maan neba buud fãa tɩ b yɩ mam karen-biisi n lis bãmb[a].”—MATƖE 28:19.

1, 2. a) Wãn to la kẽer wa n deeg b lisgu? b) Sʋgs-bʋs la b maand lisgã wɛɛngẽ?

RĨM a Sarlemayn sẽn yaa Frã wã modga Saksõ rãmbã b sẽn tõogã tɩ b reeg lisg yʋʋmd 775-77. “A modg-b lame tɩ b maan tuubg ne yʋʋr kiris-nedemdã pʋgẽ.” Woto la pĩnd yel-mit a John Lord gʋls-yã. Woto me, Risi naab a Vladimir pipi soab sẽn kẽ kãadem ne na-poak sẽn be Gerɛk Ortodogs tũudmã pʋgẽ yʋʋmd 987 T.W. poore, a yikame n dat t’a soolmã neb yɩ “kiris-neba.” A yiisa noor n yeel tɩ b kõo a nin-buiidã lisgu, la a yeel tɩ sẽn pa sak-ba b na n kʋ-b lame!

² Lis-kãens zemsame bɩ? B tara võor sɩd-sɩd bɩ? Yaa ned fãa bal la b tõe n lis bɩ?

Lisgã: Wãn to la b maand-a?

3, 4. Bõe yĩng tɩ koom mesb bɩ koom kɩrgr zugẽ wã pa zems ne kiris-neb lisgã?

³ A Sarlemayn la a Vladimir sẽn modg nebã tɩ b reeg lisgã, b sẽn maana pa zems ne Wẽnnaam Gomdã ye. Sɩda, b sã n yet tɩ b kõo ned lisgu, b sẽn mes-a koom, n kɩrg koom a zugẽ, bɩ n lis-a komẽ t’a yaoog n pa paam Gʋlsg Sõamyã sɩd zãmsgo, pa tar yõod ye.

⁴ Ges-y bũmb ning sẽn maane, Nazarɛt Zezi wã sẽn wa n kẽng Lisd a Zã nengẽ yʋʋmd 29 T.W. wã. A Zã ra lisda nebã Zʋrdẽ Kʋɩlgẽ wã. B yãka b toorẽ yam n wa a nengẽ n na n deeg lisgu. A kɩtame bal tɩ b yals Zʋrdẽ kʋɩlgã pʋgẽ t’a yãk kʋɩlgã koom bilf n kɩrg b zutã bɩ n mes-b ne koomã bɩ? Yaa bõe n maane, a Zã sẽn kõ a Zezi lisgã? A Matɩe wilgame t’a Zezi sẽn deeg lisgã poore, a “yii koomẽ wã.” (Matɩe 3:16) A ra kẽe koomẽ wã, tɩ b lis-a Zʋrdẽ kʋɩlgẽ wã. Woto me, Etiopi balem naabã sẽn yaa wẽn-tũudã reega lisg ‘koom sẽn beẽ.’ Zĩ-kãens sẽn tar koomã ra yaa tɩlae, bala a Zezi ne a karen-biisã lisg yɩɩ koom pʋgẽ lisg zãnga.—Tʋʋma 8:36.

5. Wãn to la pipi kiris-nebã ra lisd nebã?

⁵ Gerɛk gom-biis nins b sẽn lebg tɩ “lisã,” “lisgã” la sẽn paasã tɩ loee ne lisg koom pʋgẽ. Gom-biis võor sebr a yembr (Smith’s Bible Dictionary) yeta woto: “Lisg meng-mengã rat n yeela sɩd-sɩd tɩ kẽ koomẽ zãnga.” Woto, Biibl lebgr kẽer yetame tɩ “Lisd a Zã.” (Matɩe 3:1, Rotherham, Diaglott, interlinear) A Augustus Neander sebr (History of the Christian Religion and Church, During the Three First Centuries) yeta woto: “Sɩngrẽ wã lisgã ra maanda ne koomẽ bõrb zãnga.” Fãrens sebr yʋʋr sẽn yi (Larousse du XX^e Siècle, Paari, yʋʋmd 1928) yeta woto: “Pipi kiris-nebã lisg ra yaa koom pʋgẽ lisg zãnga, zĩig ning fãa b sẽn yã koom.” Sẽn paase, bãngr-sebr a to (New Catholic Encyclopedia 1967 Volume 2, seb-neng 56.) yetame: “Yaa vẽeneg tɩ Lisgã pipi Egiliizã pʋgẽ ra maanda ne koom pʋgẽ kõom zãnga.” Woto yĩnga rũndã-rũndã, ned sã n dat n deeg lisg n yɩ a Zeova Kaset soaba, b bõrda a soabã koom pʋgẽ zãng fasɩ.

Bʋʋm a to sẽn kɩt tɩ d segd n deeg lisgu

6, 7. a) Yaa bõn-datl bʋg yĩng la a Zã lis nebã? b) Yaa bõe n da yaa paalg a Zezi karen-biisã lisg pʋgẽ?

⁶ Lisg ning a Zã sẽn da kõtã bõn-datl yaa toor ne lisg ning a Zezi karen-biisã sẽn da kõtã. (Zã 4:1, 2) A Zã lisa nebã tɩ yɩ bãnd sẽn wilgd zãma wã taoor tɩ b teka yam n kos sugri, b sẽn maan yel-wẽn nins n beeg Tõogã yĩngã. * (Luk 3:3) La bõn-paalg n be a Zezi karen-biisã lisg pʋgẽ. Yʋʋmd 33 T.W. Pãntekotã, tʋm-tʋmd a Pɩɛɛr sagla a kɛlgdbã woto: “Bɩ y tek yam n kos sugri tɩ y ned kam fãa sak koom lisgu ne a Zezi Kirist yʋʋre y yel-wẽna sugr yĩnga.” (Tʋʋma 2:37-41) Baa ne a sẽn da gomd ne Zʋɩf rãmbã la bu-zẽms neb nins sẽn tuub n sak Zʋɩf rãmbã tũudmã, a Pɩɛɛr da pa gomd lisg sẽn wilgd tɩ b teka yam n kos sugr b sẽn maan yel-wẽn nins n beeg Tõogã yĩng yell ye. A ra leb n pa rat n yeel tɩ lisgã a Zezi yʋʋr yĩngã makda yel-wẽnã yẽesg ye.—Tʋʋma 2:10.

⁷ Pãntekotã raar n kãnga, a Pɩɛɛr tũnuga ne ‘soolmã pipi kʋɩlen-biiga.’ Bõn-datl bʋg yĩnga? Yaa sẽn na yɩl n wilg a kɛlgdbã tɩ b bãng tɩ b tara sor n na n kẽ saasẽ Rĩungã pʋgẽ. (Matɩe 16:19) Zʋɩf rãmbã sẽn zãgs t’a Zezi pa Mesi wã yĩng kɩtame masã tɩ tek yam n kos sugr la tẽeb tallg ne-a ra yaa bũmb sẽn lebg tɩlae, b sã n dat n paam tɩ Wẽnnaam kõ-b sugri. B ra tõe n wilga zãma wã taoor tɩ b tara tẽeb kãnga, n deeg koom lisg a Zezi Kirist yʋʋr yĩnga. Rẽ wã wɛɛngẽ, b ra wilgdame tɩ b rɩka b mens n kõ Wẽnnaam ne a Zezi Kirist maasem. Neb nins fãa sẽn dat Wẽnnaam lohormã rũndã-rũndã wã segd n talla tẽeb kãng buudu, n dɩk b mens n kõ Wẽnnaam a Zeova, la b reeg kiris-neb lisgã tɩ yɩ bãnd sẽn wilgd tɩ b rɩka b mens zãng-zãng n kõ Wẽnnaam sẽn yaa Zãntlem sẽn ka to Soabã.

Bãngr hakɩkã yaa tɩlae

8. Bõe yĩng tɩ pa nebã fãa n tõe n paam kiris-neb lisgã?

⁸ Pa nebã fãa n tõe n paam kiris-neb lisgã ye. A Zezi kõo a karen-biisã noor woto: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre. La zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Nand tɩ b reeg lisgu, nebã segd n paama ‘zãmsg sẽn na yɩl n sak bũmb nins fãa a Zezi sẽn da togs a karen-biisã.’ Woto yĩnga, lisg ning b sẽn modg neb n kõ, tɩ b pa tar tẽeb sẽn tik Wẽnnaam Gomdã bãngr hakɩk zugã pa tar yõodo, a leb n yaa lebend ne tʋʋmd ning a Zezi sẽn kõ a karen-biis hakɩkã.—Hebre dãmba 11:6.

9. Reeg lisg ‘Ba wã yʋʋr yĩng’ rat n yeelame tɩ bõe?

⁹ Reeg lisg ‘Ba wã yʋʋr yĩng’ rat n yeelame tɩ bõe? Rat n yeelame tɩ ned ning sẽn dat n deeg lisgã sak n deega tõnd saasẽ Ba wã naam la a zu-sobendo. Woto, b sakd n deegame tɩ Wẽnnaam a Zeova la tõnd Naanda, “Sẽn ka to  dũniyã tɛk fãa,” la Ãndũniyã Naab sẽn ka to.—Yɩɩl Sõamyã 83:19; Ezai 40:28; Tʋʋma 4:24.

10. Reeg lisg ‘Biriblã yʋʋr yĩng’ rat n yeelame tɩ bõe?

¹⁰ Reeg lisg ‘Biriblã yʋʋr yĩng’ rat n yeelame tɩ d sak n deeg tõog la zu-sobend ning a Zezi sẽn tare, a sẽn yaa Wẽnnaam Biribl yend a sẽn naana yĩnga. (1 Zã 4:9) Neb nins sẽn tar zʋgd nins sẽn zems ne lisg reegrã sakdame tɩ ya a Zezi la Wẽnnaam tʋm t’a wa kõ ‘a vɩɩmã tɩ yao neb wʋsg yĩngã.’ (Matɩe 20:28; 1 Tɩmote 2:5, 6) Sẽn dat-b n deeg lisgã segdame me n sak n deeg tɩ Wẽnnaam ‘waooga a Biriblã ne waoogr sẽn yaa kãsenga.’—Filip rãmba 2:8-11; Wilgri 19:16.

11. Reeg lisg ‘vʋʋsem sõngã yʋʋr yĩng’ võor yaa bõe?

¹¹ Reeg lisg ‘vʋʋsem sõngã yʋʋr yĩng’ võor yaa bõe? Woto wilgdame tɩ sẽn dat-b n deeg lisgã sak n deegame tɩ vʋʋsem sõngã ya a Zeova pãng sẽn tʋmde, a sẽn tũnugd ne manesem toɛy-toɛy tɩ zems ne a raabã. (Sɩngre 1:2; 2 Sãmwɛll 23:1, 2; 2 Pɩɛɛr 1:21) Neb nins sẽn pidsd yɛl nins b sẽn baood sẽn na yɩl n deeg lisgã sakd n deegame tɩ vʋʋsem sõngã sõngd-b lame tɩ b wʋm “Wẽnnaam yel-zulumsã” võore, tɩ b moon Rĩungã, la b wilg tɩ b tara vʋʋsem sõngã biis sẽn yaa “nonglem la sũ-noogo la laafɩ la sũ-mare la maan neere la sũ-maasem la tẽebo la sũ-bʋgsem la yõk-m-menga.”—1 Korẽnt dãmba 2:10, NW; Galat dãmba 5:22, 23; Zoɛll 2:28, 29.

Tek yam n kos sugrã la tuubgã yõodo

12. Wãn to la kiris-neb lisgã tɩ loe ne tek yam n kos sugri?

¹² A Zezi sẽn da yaa ninsaal sẽn zems zãngã sẽn deeg lisg ningã sẽn yãk a toogo, lisg yaa bãnd sẽn tat Wẽnnaam yam sẽn wilgd tɩ ned teka yam n kos sugri. D sã n tek yam n kos sugri, yaa d sũur sẽn sãam wʋsg ne bũmb d sẽn maane, bɩ d sẽn da segd n maan n pa maane. Pipi yʋʋm kob-gĩndẽ Zʋɩf rãmbã sẽn da rat n ta Wẽnnaam yama ra segd n teka yam n kos sugri, yel-wẽn nins b sẽn maan n beeg Kiristã yĩngã. (Tʋʋma 3:11-19) Tẽedb kẽer sẽn yaa bu-zẽms neb teka yam n kos sugri, yoobo, bõn-naands pʋʋsgo, zuub la yel-wẽn-kãsems a taab b sẽn maan yĩnga. B sẽn tek yam n kos sugrã yĩnga, b paama “pekre” a Zezi zɩɩmã pʋgẽ. B “welgame tɩ yɩ sõama,” bɩ b welg-b-la toor Wẽnnaam tʋʋmdã yĩnga. Sẽn paase, b “lebga tɩrs” Kirist yʋʋr yĩnga, la ne Wẽnnaam vʋʋsmã pãnga. (1 Korẽnt dãmba 6:9-11) Yaa tɩlae tɩ d tek yam n kos sugr sẽn na yɩl n paam sũur kaset sẽn yaa sõma, la yolsg ning Wẽnnaam sẽn kõte, tɩ d tɩlg ne yel-wẽna taalã.—1 Pɩɛɛr 3:21.

13. Tuubgã yõod yaa bõe lisgã wɛɛngẽ?

¹³ D segd n tuubame n yaool n deeg lisg n lebg a Zeova Kaset rãmba. Tuubgã yaa bũmb ned sẽn yãkd a toorẽ yam n maan ne a sũur fãa t’a na n tũu Kirist Zezi. Neb a woto basda b pĩnd tʋʋm wẽnsã n yãk yam ne pa vigsd n na n maan sẽn yaa tɩrg Wẽnnaam nifẽ. Gʋlsg Sõamyã pʋgẽ, Hebre la Gerɛk gom-biis nins sẽn gomd tuubgã yellã võor yaa lebge, toeeme. A rat n yeelame tɩ f bas manesem wẽnga, n lebg n tũ Wẽnnaam. (1 Rĩm dãmba 8:33, 34) Tuubg baoodame tɩ d “maan sẽn zems yam tekr tʋʋma.” (Tʋʋma 26:20) A baoodame tɩ d bas ziri tũudmã, tɩ d vɩɩmd tɩ zems ne Wẽnnaam noyã, la d sak a Zeova zãng-zãnga. (Tõodo 30:2, 8-10; 1 Sãmwɛll 7:3) Tõnd sã n tuubi, d tagsgã, d bõn-datɩ wã la d zʋgã toeemdame. (Ezekɩɛll 18:31) D ‘basda d pĩnd tʋʋma,’ nin-paalgã sã n wa ledg wẽn-kɩɩsgã manesem.—Tʋʋma 3:19; Efɛɛz rãmba 4:20-24; Kolos rãmba 3:5-14.

Rɩk d meng n kõ ne d sũur fãa wã tara yõod hal wʋsgo

14. A Zezi karen-biisã rɩk b meng n kõ wã võor yaa bõe?

¹⁴ A Zezi karen-biisã segd n dɩka b mens n kõ Wẽnnaam ne b sũy fãa me n yaool n deeg lisgu. Tũudmã wɛɛngẽ, rɩk n kõ rat n yeelame tɩ welg toor baleng yĩnga. Rẽ maaneg tara yõod wʋsgo, hal tɩ kɩt tɩ d segd n togs a Zeova pʋʋsg pʋgẽ tɩ d yãka yam n na n sak-a zãng-zãng wakat sẽn pa sat yĩnga. (Tõodo 5:9, NW )  Yaa sɩda, tõnd pa rɩk d meng n kõ tʋʋmd bɩ ninsaal ye, la yaa Wẽnnaam mengã.

15. Bõe yĩng tɩ sẽn dat-b n deeg lisgã reegd koom lisgu?

¹⁵ Tõnd sã n wa rɩk d mens n kõ Wẽnnaam Kirist maasem yĩnga, d wilgdame tɩ d rata ne d sũur fãa n dɩk d vɩɩmã n maan Wẽnnaam daabã b sẽn wilg Gʋlsg Sõamyã pʋgẽ wã. Sẽn na yɩl n wilg tɩ b rɩka b mens n kõ, sẽn dat-b n deeg lisgã reegda koom lisgu, wa a Zezi mengã sẽn da reeg lisg Zʋrdẽ Kʋɩlgẽ wã, tɩ yɩ bãnd t’a wilgda a meng Wẽnnaam n na n maan a raabã. (Matɩe 3:13) D bãng t’a Zezi ra pʋʋsda sasa kãng sẽn tar yõod wʋsgã wakate.—Luk 3:21, 22.

16. Wa sẽn zemse, wãn to la d tõe n wilg d sũ-noogo, neb sã n deegd lisgu?

¹⁶ A Zezi lisgã ra pa reem yell ye, la a yaool n da yaa sũ-noog bũmbu. Yaa woto me ne kiris-nebã lisg rũndã-rũndã. Neb sã n wa wilgd tɩ b rɩka b mens n kõ Wẽnnaam, d tõe n wilgame tɩ d sũur noomame n wẽ nug-poak ne waoogre la d pẽg-b ne nonglem. La d pa segd n kilsd-b bɩ n fɩɩndẽ, bala woto pa waoogr ne lisgã ye. Lisgã pa reem yell ye, yaa tẽeb wilgr bũmbu. D segd n wilga d sũ-noogã ne burkĩndi.

17, 18. Bõe n kɩtd tɩ b bãnge, neb sã n tũuda bũmb nins b sẽn baood lisg yĩngã bɩ b pa tũudi?

¹⁷ Sẽn yaa lebend ne neb nins sẽn mesd kom-peelsã koom bɩ sẽn modgd neb wʋsg sẽn pa paam Gʋlsg Sõamyã bãngr n kõ lisgã, a Zeova Kaset rãmbã zɩ n modg ned t’a reeg lisg ye. Sɩda, b pa lisd neb nins sẽn pa tar tẽebã zʋgd nins b sẽn baoodã ye. Nand tɩ ned wa tõog n lebg koe-noogã moond sẽn pa deeg lisgu, kiris-neb kãsem dãmbã baoodame n bãng a soabã sã n sɩd mii Biiblã zãms-kãsemse, a sã n tũuda zãms-kãens a vɩɩmã pʋgẽ, la a sã n leokda sʋkr wala kada soabã tɩ n-ye: “Fo sɩd ratame n lebg a Zeova Kaset soab bɩ?”

¹⁸ Naoor wʋsgo, neb sã n moond Rĩungã koɛɛg sõma n wilg tɩ b rat n deega lisgu, kiris-neb kãsem dãmbã sõsda ne-ba, sẽn na yɩl n bãng nin-kãens sã n sɩd yaa tẽedb sẽn dɩk b mens n kõ a Zeova la sẽn tũud yɛl nins b sẽn baood lisg reegr yĩngã. (Tʋʋma 4:4; 18:8) Sʋgsg sẽn yɩɩd bãmb 100 la ned kam fãa na n leoke, tɩ rẽ sõngd kãsem dãmbã tɩ b bãnge, nin-kãensã sã n tũuda Gʋlsg Sõamyã sẽn baood tɩ b maan bũmb nins sẽn na yɩl n deeg lisgã bɩ b sã n pa tũudi. Kẽer pa tũud bũmb nins b sẽn baood tɩ b maana ye, tɩ woto yĩng bɩ b pa sakd tɩ b reeg lisg n yɩ kiris-neb ye.

Yaa bõe n gɩdgd yãmba?

19. Sã n yaa ne Zã 6:44, ãnd dãmb n na n yɩ a Zezi pʋɩt-n-taasã?

¹⁹ Tõe tɩ b yeela neb wʋsg b sẽn modg tɩ b reeg lisg tɩ b na n kẽnga saasẽ b kũumã poore. La a Zezi goma a karen-biis nins sẽn tũud a makrã yell n yeel woto: “Ned ka tõe n wa mam nengẽ tɩ ka m Ba sẽn tʋma maama n bool-a ye.” (Zã 6:44) A Zeova taka neb 144 000 n kẽng Kirist nengẽ, sẽn na yɩl tɩ b yɩ a Zezi pʋɩt-n-taas saasẽ Rĩungã pʋgẽ. Lisg b sẽn modg n kõ zɩ n kɩt tɩ ned yɩ yɩlemd zems ne zĩ-kãngã sẽn tar ziir Wẽnnaam seglsã pʋsẽ wã ye.—Rom dãmba 8:14-17; 2 Tesalonik rãmba 2:13; Wilgri 14:1.

20. Bõe n tõe n sõng neb kẽer sẽn nan pa reeg lisgu?

²⁰ Sẽn tɩ yɩɩd fãa, yʋʋmd 1935 wã tɛka, neb kʋʋng wʋsg sẽn saagd n na n põs “to-kãsenga” n vɩɩmd tẽng zug wakat sẽn pa satã tɩ naaga a Zezi ‘piis a taabã.’ (Wilgri 7:9, 14; Zã 10:16) B tara zʋgd nins sẽn zems lisgã reegr yĩngã, bala b tũuda Wẽnnaam Gomdã b vɩɩmã pʋgẽ, la b nong Wẽnnaam ‘ne b sũur fãa, ne b sɩɩg fãa, ne b pãnga fãa, la ne b yam fãa.’ (Luk 10:25-28) Baa neb kẽer sẽn yã t’a Zeova Kaset rãmbã ‘waoogda Wẽnnaam b yamẽ ne pʋ-peelmã,’ b  nan pa tũ a Zezi makr n kõ kaset zãma sʋk tɩ b sɩd nonga a Zeova la b sakd-a-la zãng-zãnga, n deeg lisg ye. (Zã 4:23, 24, Sebr Sõngo; Tõodo 4:24; Mark 1:9-11) Nin-kãensa sã n wʋm pʋʋsg sẽn sɩd yit sũur pʋgẽ la sẽn yaa takɩ lisgã sẽn tar yõod wʋsgã wɛɛngẽ, tõe n tus-b lame la kõ-b raood tɩ b tũ Wẽnnaam Gomdã zãnga, tɩ b rɩk b mens n kõ Wẽnnaam a Zeova zãnga, n deeg lisgu.

21, 22. Yaa bõe yĩng la neb kẽer sẽn pa rɩkd b mens n kõ Wẽnnaam la b pa reegd lisgã?

²¹ Kẽer sẽn pa rat n dɩk b mens n kõ la b reeg lisgã yaa b sẽn fõr n kẽ dũniyã yɛl pʋsẽ wʋsgã yĩnga, bɩ b baooda arzɛgsã wʋsg hal n pa leb n tar sẽk tẽebã yɛl yĩng ye. (Matɩe 13:22; 1 Zã 2:15-17) Ad b sɩd ra na n paama sũ-noog wʋsgo, b sã n da toeem b tagsa wã la b bõn-datɩ wã! A Zeova pẽnegr da na n kõ-b-la tẽeb arzɛgse, n boog b yɩɩrã, la a kõ-b bãan la sũ-noogo, b sẽn mi tɩ b maanda Wẽnnaam daabã yĩnga.—Yɩɩl Sõamyã 16:11; 40:9; Yelbũna 10:22; Filip rãmba 4:6, 7.

²² Neb kẽer yetame tɩ b nonga a Zeova la b pa rɩkd b mens n kõ-a n deeg lisg ye, bala b tagsdame tɩ woto b pa tar kolg n togs Wẽnnaam taoor ye. La tõnd ned kam fãa na n kolg n togsa Wẽnnaam taoore. Tõnd sẽn wa n wʋm a Zeova gomdã, kolg n togs n zao d zugu. (Ezekɩɛll 33:7-9; Rom dãmba 14:12) Pĩnd Israɛllã neb sẽn da yaa ‘buud b sẽn yãkã’ ra roga buud sẽn dɩk a meng n kõ a Zeova pʋgẽ, tɩ woto kɩt masã tɩ b ra segd n balem-a wakat fãa tɩ zems ne a noyã. (Tõodo 7:6, 11) Rũndã-rũndã, ned ba a yembr pa rogd n zoe n yaa Wẽnnaam sõgen sẽn dɩk a meng n kõ-a ye, la d sã n paama Gʋlsg Sõamyã zãmsg hakɩka, d segd n tũ-a-la ne tẽebo.

23, 24. Yɛɛsg bʋs n pa segd n kɩt tɩ nebã pa reeg lisgu?

²³ Kẽer tõe n yɛɛsdame tɩ b pa tar bãngr sẽn seke, tɩ rẽ kɩt tɩ b pa rat n deeg lisg ye. La yɛl wʋsg n be tõnd fãa sẽn segd n zãms n bãnge, bala ‘ninsaalbã ka tõe n tags n bãng tʋʋmd ninga Wẽnnaam sẽn maan hal sɩngre tɩ ta sɛɛbã ye.’ (Koɛɛg Soaba 3:11) Ges-y Etiopi balem naabã makre. A ra yaa bu-zẽng ned sẽn tuub n sak Zʋɩf rãmbã tũudum, n da tar Gʋlsg Sõamyã bãngre, la a ra pa tõe n leok sʋgsgã fãa sẽn tɩ loe ne Wẽnnaam daabã ye. La a sẽn wa n  bãng segls nins a Zeova sẽn maan fãagrã yĩng ne a Zezi maoongã sẽn yaa rondã maasmã, balem naabã yɩɩ tao-tao n deeg koom lisgu.—Tʋʋma 8:26-38.

²⁴ Kẽer maanda sãmb-sãmb ne b rɩk b mens n kõ Wẽnnaam, b sẽn yɛɛsd b na n wa pa tõog n maan tɩ zems ne b sẽn dɩk b meng n kõ wã yĩnga. Yʋʋm 17 bipugl a Monique yeta woto: “Mam da pa rat n deeg lisg ye, bala m da yɛɛsdame m na n wa pa tõog n maan tɩ zems ne m sẽn dɩk m meng n kõ wã.” Baasg zãnga, tõnd sã n teeg a Zeova ne d sũurã fãa, ‘a na n demsa tõnd sorã.’ A na n sõnga tõnd tɩ d sẽn ya a sõgen dãmb sẽn dɩk b mens n kõ wã ‘ket n kẽnd sɩda pʋgẽ.’—Yelbũna 3:5, 6; 3 Zã 4.

25. Sʋk-bʋg leokr la d segd n bao n bãnge?

²⁵ Yʋʋmd fãa, bas-yard zãng-zãng neb tusa sẽn tar ne a Zeova, la nonglem ning b sẽn tar ne-a ne b sũy fãa wã tusd-b lame tɩ b rɩk b mens n kõ-a n deeg lisgu. Rẽnd sɩd-sɩda, Wẽnnaam sõgen dãmb nins fãa sẽn dɩk b mens n kõ-a wã rat n yɩɩ kɩs-sɩd dãmb ne-a wakat fãa. Baasg zãnga, tõnd vɩɩ wakat toodo, tɩ d tẽebã paamd makr buud toor-toore. (2 Tɩmote 3:1-5) Bõe la d tõe n maan tɩ d vɩɩmã zems ne d sẽn dɩk d mens n kõ a Zeova wã? Yaa rẽ la d sẽn na n bao n bãng sõsg ning sẽn pʋgdã pʋgẽ wã.

[Tẽngr note]

Y tẽrame bɩ?

• Wãn to la kiris-ned lisgã maanda?

• Bãng-bʋg la ned segd n paam n yaool n deeg lisgu?

• Bõe ne bõe la d segd n maan n paam kiris-neb hakɩkã lisgã?

• Bõe yĩng tɩ neb kẽer pa reegd lisgu, la wãn to la b tõe n sõng-ba?

[Zãmsgã sogsgã]

[Foto rãmba, seb-neng 24]

Yãmb mii lisg reegr ‘ne Ba wã, Biriblã la vʋʋsem sõngã yʋʋr yĩng’ sẽn dat n yɛɛlg bɩ?