Bao-y Wẽnnaam ne y sũurã la ne y yamã

Kiris-nedemd hakɩkã sagenda tõnd tɩ d rɩk d sũurã la d yamã n tʋm n paam tẽeb sẽn tat Wẽnnaam yam.

SƖDA, a Zezi Kirist sẽn yaa kiris-nedemdã lugendã zãmsa tõnd tɩ d nong Wẽnnaam ne d “sũur fãa” la ne d “sɩɩga fãa.” Zãms-kãng toor sẽn ka be, d segd n nonga Wẽnnaam ne d “yam fãa.” (Matɩe 22:37) N-ye, tõnd tagsgã segd n sõnga tõnd wʋsg d balengã pʋgẽ.

A Zezi sã n da rat t’a kɛlgdbã tags a zãmsgã zugu, a ra nong n yeta woto: “Yãmb tagsda bõe?” (Matɩe 17:25; 18:12; 21:28; 22:42) Tʋm-tʋmd a Pɩɛɛr me gʋlsa a tẽed-n-taasã sẽn na yɩl n ‘nek b yam sõma.’ (2 Pɩɛɛr 3:1) Tʋm-tʋmd a Poll sẽn yɩ pipi misioneer ning sẽn toga sor n yɩɩdã sagla kiris-nebã tɩ b rɩk b “yam” n tʋme, la b “bãng Wẽnnaam daab sẽn yaa sõama, la sẽn tat bãmb yam la sẽn zems zãnga.” (Rom dãmba 12:1, 2) Yaa b sẽn na n bao n wʋm bũmb ning b sẽn tẽedã võor neer bal la kiris-nebã tõe n paam tẽeb sẽn tat Wẽnnaam yam, la sẽn tõe n yals kãn-kãe makr fãa taoore.—Hebre dãmba 11:1, 6.

Sẽn na yɩl n sõng neb a taabã tɩ b tall tẽeb kãngã buudu, pipi koe-moondb nins sẽn yaa kiris-nebã “tika Gʋlsg Sõamyã zug n kɩt tɩ nebã tagse, n wilgdẽ la b kõt kaset ne Gʋlsgã goam a taab” tɩ yɛl nins b sẽn zãmsdã yaa sɩda. (Tʋʋma 17:1-3, NW ) Manesem a woto sẽn zems ne tagsg sẽn yaa tɩrgã kɩtdame tɩ pʋ-peelem dãmbã sak koɛɛgã. Wala makre, neb wʋsg sẽn da be Masedoan galʋ-tẽng ning b sẽn boond tɩ Beere wã pʋgẽ “deega Wẽnnaam koɛɛga ne b sũyã fãa. La bãmb baoo Gʋlsg Sõamyã pʋgẽ daar fãa tɩ bãng bũmb nins [a Poll ne a tũud-n-taasã] sẽn yet bãmba sã n yaa tɩrga.” (Tʋʋma 17:11) Yɛl a yiib la d segd n  bãng ka. Pipi, Beere nebã ra rata ne b sũyã fãa n kelg Wẽnnaam Gomdã. Yiib-n-soaba, b pa reng n tẽ ne zond yaar tɩ b sẽn wʋma da yaa tɩrg ye, la b baoa Gʋlsg Sõamyã pʋgẽ n bãng b sẽn wʋma sã n yaa sɩda. A Luk sẽn da yaa misioneerã pẽga Beere nebã rẽ yĩnga, n yeel tɩ b “ra tara yam-sõng[o].” (Kãab-paalgã Koe-noogo). Yãmb tara yam-sõng woto buudu, y sã n wa tagsd tẽebã yɛl zut bɩ?

Yamã ne sũurã tʋmda ne taaba

Wa d sẽn togs tɩ loogã, yam la sũur tara tʋʋmd balengã pʋgẽ. (Mark 12:30) Tags-y makr ning b sẽn dɩk sõsg ning sẽn loogã pʋgẽ sẽn wilgd pẽntrã b sẽn yao, sẽn pa tũnug ne pẽntiir ning b sẽn datã yelle. A sã n da kelgẽ-la ned ning sẽn bobl yẽ tʋʋmdã neere, a ra na n tʋmẽ-la tʋʋmdã ne a sũur fãa n mi vẽeneg tɩ tʋʋmdã taa roogã soab yam. Yaa woto me ne tõnd balengã.

A Zezi yeelame tɩ ‘Wẽnnaam waoogdb sɩd-sɩda na n waoog Ba a Wẽnnaam ne b sɩɩse la ne sɩda.’ (Zã 4:23) Rẽ n kɩt tɩ tʋm-tʋmd a Poll gʋls woto: ‘Yaa woto n kɩt tɩ . . . tõnd pʋʋsd Wẽnnaam yãmb yĩnga n ka basdẽ ye, la tõnd kotame tɩ yãmb sũyã pid ne bãmb daaba bãngre [hakɩkã, NW ] la yam fãa ne vẽnegr ninga Sɩɩg Sõng sẽn kõtã, tɩ yãmb kẽnda zems Zusoaba waoogre la a ta bãmb yam ne bũmb fãa.’ (Kolos rãmba 1:9, 10) ‘Bãngr hakɩk’ a woto tusda pʋ-peelem dãmbã tɩ b tʋm ne b sũy fãa la ne b sɩɩs fãa b balengã pʋgẽ, n tar kɩs-sɩd zãnga, bala b “waoogda [b] sẽn mi.”—Zã 4:22.

Bʋʋm kãens yĩnga, a Zeova Kaset rãmbã pa kõt kamb bɩ neb sẽn nong sɩdã paalem lisgu, b sẽn pa paam n zãms Gʋlsg Sõamyã neerã yĩngã. A Zezi kõo a karen-biisã tʋʋm-kãngã: “Bɩ y kẽng n maan neba buud fãa tɩ b yɩ mam karen-biisi . . . La zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Yaa Biiblã zãmsdb sẽn tar pʋ-peelma sẽn na n paam Wẽnnaam daabã bãngr hakɩk poor bal la b tõe n maan yãkr sẽn zems balengã wɛɛngẽ. Yãmb maoodame n na n paam bãngr hakɩk woto bɩ?

Wʋm-y Soaalã pʋʋsg võore

Sẽn na yɩl n wilg tɩ paam Biiblã bãngr hakɩk la bãng a sẽn yetã zugẽ-zugẽ pa yembre, bɩ d ges b sẽn nong n boondẽ tɩ Tõnd Ba sẽn be arzãna, bɩ Soaalã pʋʋsg sẽn be Matɩe 6:9-13 pʋgẽ wã.

Neb milyõ rãmb lebgd n togsda a Zezi makr pʋʋsgã wakat fãa egiliizẽ wã. La bãmb b wãn n paam tɩ b wilg-b a võorã, sẽn yɩɩd fãa pʋʋsgã pipi babg ning sẽn gomd Wẽnnaam yʋʋrã la a Rĩungã yellã? Yel-kãensã tara yõod wʋsg hali n kɩt t’a Zezi ning-b pipi a pʋʋsgã pʋgẽ.

Pʋʋsgã sɩngda woto: “Tõnd Ba sẽn be arzãnẽ, tɩ yãmb yʋʋr yɩ ne waoogre,” sẽn dat n yeel tɩ paam pẽgre, bɩ yɩ sõngo. Ges-y t’a Zezi yeelame tɩ d pʋʋs tɩ Wẽnnaam yʋʋrã yɩ ne waoogre. Ne neb wʋsgo, rẽ wata ne sʋgsg sẽn ta a yiibu: Pipi, Wẽnnaam yʋʋrã yaa bõe? Yiib-n-soaba, bõe yĩng tɩ b segd n kɩt t’a yɩ sõngo?

D tõe n yãa pipi sʋkrã leokr zĩis 7 000 Biiblã pʋgẽ, buud goam nins pʋsẽ b sẽn gʋls Biiblã sɩngrẽ wã. A yembr bee Yɩɩl Sõamyã 83:18 (NW ) pʋgẽ: “Tɩ nebã tõog n bãng tɩ fo yʋʋr sẽn yaa Zeova wã, foo f yembr bal n yaa Zãntlem Sẽn-ka-to soab dũniyã tɛk fãa.” Wẽnnaam yʋʋrã sẽn yaa Zeova wã wɛɛngẽ Yikri 3:15 (Sebr Sõngo) yetame: “Yaa yʋ-kãnga n na n yɩ m yʋʋre zamaan sẽn wate, yaa yʋ-kãnga la y na n ning y pʋ-tẽerẽ, zamaan woo zamaana.” * La bõe yĩng tɩ b segd n kɩt tɩ Wẽnnaam yʋʋrã sẽn yaa yɩlemdã la sõngã meng-mengã yɩ ne waoogre? Yaa b sẽn paoog a yʋʋrã la b sãam-a ãdem-biisã sɩngrẽ wã yĩnga.

 Edɛnẽ, Wẽnnaam yeela a Ãdem ne a Hawa tɩ b sã n dɩ tɩɩg ning biis yẽ sẽn gɩdg tɩ b ra rɩ wã, b na n kiime. (Sɩngre 2:17) A Sʋɩtãan kɩɩsa Wẽnnaam ne tɩtaam n yeel a Hawa: “Yãmb ka na n ki ye.” Woto wã, a Sʋɩtãan yeelame tɩ Wẽnnaam yaga ziri. La a pa tek woto ye. A tʋʋsa Wẽnnaam yʋʋrã wʋsg n paase, a sẽn yeel a Hawa tɩ Wẽnnaam da solgd-a-la bãngr sẽn tar yõod wʋsg ne-a wã yĩnga. A yeelame: “Tɩ bõe, Wẽnnaam miimi tɩ daar ninga yãmb sẽn na n yãk a [sõma ne wẽng bãngr tɩɩgã] biisã n dɩ, yãmb nina na n pukame tɩ yãmb lebg wa Wẽnnaam n mi sõama ne wẽng n bake.” Ad sɩd yaa tẽn-kãn-ned menga!—Sɩngre 3:4, 5.

B sẽn dɩ tɩɩg biig ning b sẽn gɩdg rɩɩbã, a Ãdem ne a Hawa yãkame n na n zĩnd a Sʋɩtãan poorẽ. Rẽ tɛkã, ãdem-biis wʋsg mi tɩ b pa mi me, b paooga Wẽnnaam yʋʋrã n paase, b sẽn zãgs a no-tɩrsã yĩnga. (1 Zã 5:19) Nebã ket n tʋʋsda Wẽnnaam, b sẽn ningd-a taal b namsgã yĩngã, baa sẽn yaa bãmb mens tʋʋm wẽnsã n wat ne rẽ wã. “Ned yalemd n sãamd a yell t’a sũur yaool n sãamd ne Zusoabã.” (Yelbũna 19:3) Masã, y pa ne bũmb ning sẽn kɩt t’a Zezi sẽn sɩd ra nong a Ba wã pʋʋs t’A yʋʋrã yɩ ne waoogrã sɩda?

“Tɩ yãmb soolem wa”

A sẽn pʋʋs tɩ Wẽnnaam yʋʋrã yɩ ne waoogr poore, a Zezi yeelame: “Tɩ yãmb soolem wa, tɩ yãmb daab maan dũniyã zug wa sẽn maand arzãna.” (Matɩe 6:10) D tõe n sʋka woto verse kãngã wɛɛngẽ: ‘Wẽnnaam soolmã yaa bõe? Bõe la a waoongã tɩ loe ne Wẽnnaam daabã maaneg tẽng zugu?’

Biiblã pʋgẽ, gom-biig ning sẽn yaa ‘soolmã rat n yeelame tɩ “Rĩungu,” bɩ “rĩm naam.” Rẽnd sã n yaa ne sẽn segde, Wẽnnaam Soolmã tɩ loee ne Wẽnnaam naam, bɩ a goosneema, ne rĩm a sẽn yãke. Rĩm kãng pa ned a to n zʋʋg a Zezi Kirist sẽn vʋʋgã, sẽn yaa “Rĩm dãmb Dĩma la zu-soben dãmb Zusoaba” ye. (Wilgri 19:16; Daniɛll 7:13, 14) Sã n yaa ne Wẽnnaam Rĩungã sẽn be a Zezi Kirist sẽn yaa Mesi wã nugẽ wã wɛɛngẽ, no-rɛɛs a Daniɛll gʋlsa woto: “La rĩm dãmb kãens sẽn dɩt naam wakate [ãdem-biisã goosneema rãmb sẽn dɩt naam masã wã], Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.”—Daniɛll 2:44.

N-ye, Wẽnnaam Rĩungã na n sooga tẽngã zãnga, n yiis nin-wẽnsã fãa a zugu, la a rɩ naam “wakat fãa.” Rẽ wɛɛngẽ wã, Wẽnnaam Rĩungã yaa bõn-tũnugdg ning sẽn na n yɩ sabab t’a Zeova yʋʋrã yɩ ne waoogre, n pek-a n yiis taal ning fãa a Sʋɩtãan la nin-wẽnsã sẽn wa ne a zugã.—Ezekɩɛll 36:23.

Wẽnnaam Rĩungã tara nin-buiid wala goosneema rãmbã fãa. B yaa ãnd dãmba? Biiblã leokdame: “Sũ-maasem dãmba na n sooga dũniyã n maan sũ-noog laafɩ wʋsg yĩnga.” (Yɩɩl Sõamyã 37:11) Woto me, a Zezi yeelame: “Bark bee sũ-maasem dãmbã zutu, tɩ bõe, bãmb na soog dũniyã.” Sɩda, nin-kãensã tara Wẽnnaam daabã bãngr sẽn yaa sɩda, sẽn yaa tɩlae sẽn na yɩl n paam vɩɩmã.—Matɩe 5:5; Zã 17:3.

Mams-y n ges tẽngã tõr sẽn na n pid ne sũ-maasem dãmba, sũ-bʋgsem dãmb sẽn sɩd nong Wẽnnaam la b nong b taaba! (1 Zã 4:7, 8) Yaa woto la a Zezi pʋʋs n kose, a sẽn wa n yeel tɩ: “Tɩ yãmb soolem wa, tɩ yãmb daab maan dũniyã zug wa sẽn maand arzãna.” Yãmb wʋmda bũmb ning sẽn kɩt t’a Zezi zãms a karen-biisã tɩ b pʋʋs woto wã võor bɩ? La sẽn yɩɩda, yãmb nee pʋʋsg kãnga pidsg sẽn tõe n tall pãng ning yãmb mengã zug bɩ?

Rũndã-rũndã, neb milyõ rãmb tikda b zãmsgã Gʋlsg Sõamyã zug n kɩtdẽ tɩ nebã tagsdẽ

A Zezi reng n togsame tɩ b ra na n tũnuga ne tẽeb zãmsg b sẽn kõt neb dũniyã gill zugu, n moon Wẽnnaam Rĩungã sẽn watã. A yeelame: “Wẽnnaam soolem koe-noog kãngã na n  moona dũniyã tɛk fãa tɩ yɩ kaset buud fãa yĩnga. Dẽ, dũniyã [bɩ masã zãmaana] sɛɛb na yaool n ta.”—Matɩe 24:14.

Dũniyã gill zugu, a Zeova Kaset rãmb milyõ a yoob n moond koe-noog kãngã b taabã. B ratame tɩ y zãms n bãng n paas Wẽnnaam la a Rĩungã wɛɛngẽ, n ‘maag y yĩns n bao n bãng Gʋlsg Sõamyã,’ n tũnug ne y tagsgã tõogã. Y sã n maan woto, na n paasa y tẽebã pãngã, la kõ-y sũ-noogo, saagr ning y sẽn tar n na n paam vɩɩmã tẽng zug arzãnã pʋgẽ wã, sẽn na n ‘pid ne a Zeova bãngr wa koom sẽn pid mogrã’ yĩnga.—Ezai 11:6-9.

[Tẽngr note]

 [Foto/Zĩ-gũbri, seb-​neng a 8]

RƖK-Y KAREN-SAAM KÃSENGÃ TOGS-N-TAARE

Naoor wʋsgo, a Zezi tika Biiblã gom-zut sẽn yaa takɩ zut n kõ zãmsgo. Wala makre, a vʋʋgrã poore, a wilga a tʋʋmdã Wẽnnaam daabã pʋgẽ a karen-biis a yiib sẽn da maand yɩɩr a kũumã wɛɛngẽ. Luk 24:27 yetame t’a “sɩnga ne a Moiiz la Wẽnnaam no-rɛɛsdba fãa n bilg Gʋlsg Sõamyã fãa võyã sẽn wilgd bãmb yelle.”

Ges-y t’a Zezi yãka gom-zug takɩ sẽn yaa: ‘Yẽ mengã’ sẽn yaa Mesi wã, la a tika “Gʋlsg Sõamyã fãa” zug n wɛgs gom-zu-kãngã. Sɩd me, a Zezi tõgna verse rãmb taab sõma tɩ sõng a karen-biisã tɩ b bãng tẽebã sɩd vẽenega. (2 Tɩmote 1:13) Rẽ kɩtame tɩ b paam vẽnegre, la kɩt me tɩ goamã kẽ b sũyã wʋsgo. Biiblã yetame: “La bãmb yeela taab yaa: ‘Tõnd ka paam sũ-noog kãsenga bãmb sẽn gom ne tõnd sora zugu, la bãmb sẽn bilg tõnd Gʋlsg Sõamyã sɩda?’ ”—Luk 24:32.

A Zeova Kaset rãmbã maoodame n na n dɩk a Zezi togs-n-taar b koe-moonegã pʋgẽ. B sẽn dɩkd sɛb ning pipi n zãmsd ne nebã yaa Bõe la Wẽnnaam baood tɩ tõnd maane? la Bãngr Sẽn Tar n Debd Vɩɩm Sẽn-Kõn-Saẽ Wã. Seb-kãensã wɛgsda Biiblã gom-zut wʋsgo. Wala makre, “Ãnda la Wẽnnaam?,” “Bõe yĩng tɩ Wẽnnaam bas namsgã tɩ beẽ?,” “Wãn-wãn la y tõe n yã tũudum hakɩkã?,” “Yaa yaoolem dayã la woto!,” la “D me zak sẽn waoogd Wẽnnaam.” Zãmsg fãa tara verse rãmb wʋsgo.

Y tõe n yãa a Zeova Kaset rãmbã sẽn be yãmb sakẽ wã wall y gʋls n tũnug ne adɛrs ning sẽn be seb-kãngã pʋgẽ seb-neng a 2, sẽn na yɩl n paam Biibl zãmsg y yir zaalem, zãmsg sẽn tik gom-zu-kãensã bɩ a taab zutu.

[Zĩ-gũbrã foto]

Gom-y tɩ kẽ karen-biigã sũuri, n tũnug ne gom-zut takɩ sẽn tik Biiblã zugu

[Foto rãmba, seb-​neng a 7]

Yãmb wʋmda a Zezi makr pʋʋsgã võor bɩ?

“Tõnd Ba sẽn be arzãna, tɩ yãmb yʋʋr yɩ ne waoogre . . . ”

“Tɩ yãmb [Mesi wã] soolem wa . . . ”

“Tɩ yãmb daab maan dũniyã zug wa sẽn maand arzãna”