Kʋʋlem pa gɩdg zãmsg ye

A KSENIYA roga yʋʋmd 1897. A ra tara kompugli a 3, biribl a yembre, yagens 15, la yagen-tʋbrakẽes 25. A vɩɩmã fãa tõre, a maana bũmb ning a roagdbã sẽn zãms-a t’a maana. Baa ne a sẽn da zoe zabr ning sẽn da maand Abkhaz Repibilikã sẽn be Mog-sablgã la Kokaaz sʋkã n wa soond Mosku wã, a sũurã ra nooma ne a vɩɩmã, sẽn yɩɩd fãa, ne bũmb ning a sẽn bool tɩ tẽeb a sẽn paam a yaab rãmba nengẽ wã.

Yʋʋmd 1993, a Kseniya bipugl a Meri lebga a Zeova Kaset soaba. A Meri sɩngame n gomd ne a Kseniya Wẽnnaam a Zeova la Biiblã yelle, la a ra pa rat n kelg ye. A Kseniya ra tara a bipuglã togsg woto: “M kʋʋla wʋsg n le pa tõe n zãms n bãng bũmb ye.”

Baasg zãnga, a bipugl a Meri, a yagengã pag a Londa, la a yagen-tʋbrakẽes a Nana la a Zaza fãa sẽn lebg a Zeova Kaset rãmbã kell n goma ne-a Biiblã yelle. Yʋʋmd 1999 wã t’a Kseniya ra tara yʋʋm 102. Zaabr a yembre, b karma verse t’a Kseniya kelg tɩ kẽe a sũurã. Ra ya a Zezi goam nins sẽn nekd ratem a sẽn togs a tʋm-tʋmdb nins sẽn tall kɩs-sɩda, a sẽn da wa n lugend Soaalã Zaabr Dɩɩbã. (Luk 22:19, 20) Zaab-kãngã, a yʋʋm 102 wã zugu, a Kseniya yãka yam n na n zãms Biiblã.

A Kseniya yeela woto: “M sẽn vɩɩmd yʋʋm 102 poore, m baas n bãnga vɩɩmã võore. Masã m neeme tɩ bũmb ka be n yɩɩd m maan Wẽnnaam kãseng a Zeova sẽn tar nonglmã raab ye. M ket n tõe n tagsa sõma la m tar yĩns laafɩ. M tõe n karmame tɩ pa tũ ne nin-gets ye, la m naagda m zakã neb n tʋmdẽ.”

Yʋʋmd 2000, sɩpaolg kiuug rasem a 5, a Kseniya reega lisgu. Ad a sẽn yete: “Masã, mam dɩkda m vɩɩmã n kõt a Zeova n na n maan a raabã ne nonglem. Mam zĩi biisã yalsg zĩig sẽn pẽ m zakã n basd zʋrno rãmb la seb-vãad ne nebã. Naoor wʋsgo m nebã wat n get-m lame, la m togsd-b-la sɩdã a Zeova wɛɛngẽ ne sũ-noogo.”

A Kseniya gẽegda daar ning ‘a yĩnga sẽn na n le yɩ sõama n yɩɩd a yãadem wakate, a sẽn na n le lebg wa a sẽn da yaa bũmb ninga a bi-bɩɩlem wakatã.’ (Zoob 33:25) Ned sẽn wẽ yʋʋm koabg sã n pa tagsdẽ t’a kʋʋla wʋsg ne a na tõog n zãms n bãng vɩɩmã võor Biiblã pʋgẽ, bõe la d na n yeel ne yãmb masã?