Ket-y n maand a Zeova raabã ne sũ-keelem
Ket-y n maand a Zeova raabã ne sũ-keelem
“Mam Wẽnnaam, mam sũur kɛɛma, mam sũur kɛɛma.”—YƖƖL SÕAMYÃ 57:8.
1. Bõe yĩng tɩ d tõe n tall bas-m-yam wa a Davɩɩd?
A ZEOVA tõe n kɩtame tɩ tõnd sẽn ya a sõgen dãmb sẽn dɩk d mens n kõ-a wã tall su-keelem kiris-neb tẽebã pʋgẽ sẽn na yɩl tɩ d tõog n kell n gãd kiris-neb tũudum hakɩkã sõma. (Rom dãmba 14:4) Woto yĩnga, d tõe n talla bas-m-yam sẽn tar pãng wa yɩɩl gʋlsd a Davɩɩd sẽn yɩɩl woto wã: “Wẽnnaam, mam sũur kɛɛma.” (Yɩɩl Sõamyã 108:1) Tõnd sã n tar sũ-keelem, d na n datame n maan tɩ zems ne d sẽn dɩk d meng n kõ Wẽnnaamã. Sẽn paase, d sã n bao a sor-wilgr la a pãngã, d sẽn yaa burkĩn nebã, d na n tõogame n yals kãn-kãe, n maan yãkr n da vigsi la d tall tẽeb sẽn tar pãnga, ‘tɩ wakat fãa bɩ d maand Zusoaba tʋʋmd wʋsgo.’—1 Korẽnt dãmba 15:58.
2, 3. A Poll goam nins sẽn be 1 Korẽnt dãmba 16:13 (NW ) pʋgẽ wã võor yaa bõe?
2 Tʋm-tʋmd a Poll taasa a Zezi karen-biis nins sẽn da be pĩnd wẽndẽ Korẽntẽ wã saglse, tɩ sagl-kãens sɩd pak rũndã-rũndã kiris-nebã. A yeela woto: “Bɩ y gũus y mense n yals kãn-kãe tẽeb pʋgẽ, bɩ y maan wa sẽn zems neb sẽn bɩ, la bɩ y keng y mense [“yɩ-y rapa,” NW ].” (1 Korẽnt dãmba 16:13) Ne Gerɛk goama, b sẽn togs no-kãensã to-to wã wilgdame tɩ yaa bũmb sẽn segd n ket n maand wakat fãa. Sagl-kãngã võor yaa bõe?
3 D tõe n ‘gũusa’ tẽebã wɛɛngẽ, d sã n kɩɩs a Sʋɩtãan Munaafɩɩk la d kell n pẽneg Wẽnnaam. (Zak 4:7, 8) A Zeova teegr kɩtdame tɩ d kell n tall d zems-n-taarã la d ‘yals kãn-kãe kiris-neb tẽebã pʋgẽ.’ Tõnd ne pagb wʋsg sẽn be tõnd sʋkã ‘maanda wa rapa,’ d sẽn maand Wẽnnaam raabã ne raood n yaa Rĩungã moondbã yĩnga. (Yɩɩl Sõamyã 68:11, NW ) D ‘paamda pãnga,’ (NW ) d sã n ket n baood pãng d saasẽ Ba wã nengẽ sẽn na yɩl n maan a raabã.—Filip rãmba 4:13, Sebr Sõngo.
4. Bõe la tõnd maan n wa reeg lisg n lebg kiris-neba?
4 Tõnd wilgame tɩ d saka sɩdã, d sẽn wa n dɩk d mengã n kõ a Zeova zãnga, la d wilg rẽ n deeg koom lisgã. La yaa bõe la tõnd maan n wa reeg lisgu? Pipi, d paama Wẽnnaam Gomdã bãngr hakɩka. (Zã 17:3) Rẽ kɩtame tɩ d tall tẽebo, tɩ tus-d tɩ d tek yam n kos sugri, tɩ d wilg sũ-sãoong sɩd-sɩd ne d pĩnd tʋʋm wẽnsã. (Tʋʋma 3:19; Hebre dãmba 11:6) Rẽ poore tõnd tuubame, bala d basa tʋʋm wẽnsã sẽn na yɩl n tall vɩɩm sẽn zems ne Wẽnnaam daabã. (Rom dãmba 12:2; Efɛɛz rãmba 4:23, 24) Rẽ poore, d rɩka d meng n kõ a Zeova pʋʋsg pʋgẽ ne d sũur fãa. (Matɩe 16:24; 1 Pɩɛɛr 2:21) D pʋʋsa Wẽnnaam t’a kõ-d sũur kaset sẽn yaa sõma, la d reeg lisg n wilg tɩ d rɩka d meng n kõ-a. (1 Pɩɛɛr 3:21) D sã n ning yel-kãensã d yamẽ, na n sõng-d lame tɩ d ket n ne vẽeneg tɩ d segd n ket n maanda modgr sẽn na yɩl n vɩɩmd tɩ zems ne d sẽn dɩk d meng n kõ wã, la d ket n maand a Zeova raabã ne sũ-keelem.
Ket-y n baood bãngr hakɩkã
5. Bõe yĩng tɩ d segd n ket n deegd Gʋlsg Sõamyã bãngre?
5 Sẽn na yɩl tɩ d vɩɩmd tɩ zems ne d sẽn dɩk d meng n kõ Wẽnnaamã, rẽnda d ket n deegd Gʋlsg Sõamyã bãngr sẽn kengd tẽebo. Ad sɩd yɩɩ ne yamleoog wʋsg la d rɩ tẽebã rɩɩbo, d sẽn wa n bãng sɩd ning sẽn yit Wẽnnaam nengẽ wã pipi wã! (Matɩe 24:45-47) ‘Rɩ-kãens’ ra nooma wʋsgo, b sɩd rɩlga tõnd sõma tẽebã wɛɛngẽ. Masã, d sẽn ya a Zeova sõgen dãmb sẽn dɩk d mens n kõ-a wã, yaa tɩlae tɩ d ket n dɩt tẽebã rɩɩb sẽn dɩlgd sõma wã, sẽn na yɩl n ket n tar sũ-keelem.
6. Tõe tɩ yaa wãn to la b sõng yãmb tɩ y tall naneb wʋsg ne sɩd ning sẽn yit Biiblã pʋgẽ wã?
6 Modgr yaa tɩlae sẽn na yɩl n bãng Gʋlsg Sõamyã n paase. A wõnda laog sẽn solg baoobo, tɩ baood modgr wʋsgo. La d sã n wa yã ‘Zusoaba bãngre,’ ad sɩd yaa keoor sẽn tar barka! (Yelbũna 2:1-6) Rĩungã koe-moond sẽn zãms Biiblã ne yãmb pipi wã, tõe t’a tũnuga ne Bãngr Sẽn Tar n Debd Vɩɩm Sẽn-Kõn-Saẽ Wã sebre. Tõe tɩ y rɩka sẽk wʋsg n zãms sak fãa n sa, tõe tɩ y sõsa sag-kãng zug ne taab sẽn yɩɩd vugri. A sẽn karem verse rãmbã n wilg-b võorã nafa yãmba. Bũmb võor wʋmb sã n da yaa toogo, a ra wilgda a võore. Ned ning sẽn da zãmsd yãmb Biiblã segla a meng sõma, n pʋʋs n kos Wẽnnaam vʋʋsem sõngã, la a sõng yãmb tɩ y tall mi-beoog wʋsg ne sɩdã.
7. Bõe n kɩtd tɩ ned paamd tõog sẽn na yɩl n zãms neb a taabã sɩd ning sẽn yit Wẽnnaam nengẽ wã?
7 Modg-kãng zemsame, bala a Poll gʋlsame: “Ned sã n paamd zãmsgo, bɩ a yãk bũmb ninga a sẽn tarã n kõ ned ninga sẽn zãmsda yẽ wã.” (Galat dãmba 6:6) Ka wã, Gerɛk goamã wilgdame tɩ Wẽnnaam Gomdã zãmsg ra kẽeda ned ning b sẽn ‘zãmsdã’ yam la a sũur sõma. Y sã n paamd zãmsg woto, kɩtdame tɩ y tõog n yɩ neb a taabã karen-saamb menga. (Tʋʋma 18:25) Y sã n dat n yɩ kɩs-sɩd soab ne y sẽn dɩk y meng n kõ wã, y segd n kell n talla y tẽebã laafɩ la y keelem n ket n zãmsd Wẽnnaam Gomdã.—1 Tɩmote 4:13; Tɩt 1:13; 2:2.
Tẽeg-y y sẽn tek yam n kos sugr la y tuubã
8. Wãn to la d tõe n kell n tall manesem sẽn tat Wẽnnaam yam?
8 Yãmb tẽra yolsg ning y sẽn paame, y sẽn wa n zãms sɩdã, n tek yam n kos sugrã, tɩ rẽ poor tɩ y yã tɩ Wẽnnaam kõ-y-la sugri, tẽeb ning y sẽn tar ne a Zezi maoongã sẽn yaa rondã maasem yĩng bɩ? (Yɩɩl Sõamyã 32:1-5; Rom dãmba 5:8; 1 Pɩɛɛr 3:18) Sɩd-sɩda, y pa rat n leb yel-wẽna pʋgẽ ye. (2 Pɩɛɛr 2:20-22) Sẽn paase, a Zeova pʋʋsg wakat fãa na n sõnga yãmb tɩ y tall manesem sẽn tat Wẽnnaam yam, tɩ y vɩɩmd tɩ zems ne y sẽn dɩk y meng n kõ-a wã, la y ket n maand a Zeova raabã ne kɩs-sɩda.—2 Pɩɛɛr 3:11, 12.
9. D sẽn bas yel-wẽnã maanegã, yaa manesem bʋg masã la d segd n talle?
9 Y sẽn tuub n bas yel-wẽnã, bɩ y ket n baood Wẽnnaam sõngr n kell n tall sũ-keelem. Y sɩd ra tudga sore, la y sẽn sʋk tɩ b wilg-y sorã, y sɩnga so-toakã so-sõngã zugu. Bɩ y modg masã n da bʋdg n bas sorã ye. Ket-y n teegd Wẽnnaam sor-wilgrã, la y rɩk sard ne y meng n pa vɩɩmã sor zugu.—Ezai 30:20, 21; Matɩe 7:13, 14.
Ra tol-y n yĩm tɩ y rɩka y meng n kõ n deeg lisg ye
10. Yel-bʋs la d segd n ning d yamẽ d sẽn dɩk d meng n kõ Wẽnnaamã wɛɛngẽ?
10 Ning-y y yamẽ tɩ pʋʋsg pʋgẽ, y rɩka y meng n kõ a Zeova, sẽn na yɩl n maan a raabã ne kɩs-sɩd wakat sẽn pa sat yĩnga. (Ziid 20, 21) Rɩk f meng n kõ rat n yeelame tɩ welg toor baleng yĩnga. (Maankʋʋre 15:31; 22:2) Y sẽn dɩk y meng n kõ wã ra pa wakat bilf bũmb ye, y leb n pa rɩk y mengã n kõ ninsaalb ye. Y ra rɩka y meng n kõ Ãndũniyã Naab sẽn ka to wã wakat fãa yĩnga, la y sã n dat n vɩɩmd tɩ zems ne rẽ, rɩlla y tall kɩs-sɩd ne Wẽnnaam y vɩɩmã tõre. N-ye, “tõnd sã n vɩ, walla tõnd sã n ki, tõnd yaa Zusoaba rẽnda.” (Rom dãmba 14:7, 8) Tõnd sũ-noogã bee ne tõnd sẽn na n sak a Zeova raabã la d ket n maand a raabã ne sũ-keelem.
11. Bõe yĩng tɩ y segd n tẽeg y lisgã la a võorã yelle?
11 Wakat fãa bɩ y tẽeg y lisgã sẽn wilgd tɩ y rɩka y meng n kõ Wẽnnaam ne y sũur fãa wã. Lisgã ra pa yɩ ne modgr ye, bala y yãka y toorẽ yam n maan woto. Masã, y rɩka sard sẽn pa vigsd ne y meng tɩ y yam yãkrã na n zemsa ne Wẽnnaam daabã y vɩɩmã sẽn ketã pʋgẽ bɩ? Yãmb kosa Wẽnnaam sũur-kaset sẽn yaa sõma n deeg lisg n wilg tɩ y rɩka y meng n kõ-a. Kogl-y sũur-kaset sõng kãngã n vɩɩmd tɩ zems ne y sẽn dɩk y meng n kõ wã, tɩ y na n paama a Zeova barkã sẽn yaa wʋsgã.—Yelbũna 10:22.
Yãmb yam yãkrã me tara yõodo
12, 13. Wãn to la tõnd mengã yam yãkr tɩ loe ne rɩk m meng n kõ la lisgã?
12 Rɩk m meng n kõ la lisgã sɩd waa ne bark n kõ neb milyõ rãmb dũniyã gill zugu. Tõnd sã n wa wilg tɩ d rɩka d meng n kõ Wẽnnaam n deeg koom lisgu, d kiida sã n yaa ne tõnd pĩnd vɩɩmã wɛɛngẽ, la pa rat n yeel tɩ d ye pa tar yam yãkr ye. Tõnd sẽn yaa tẽedb sẽn paam zãmsg sõma wã, sɩd tũu ne tõnd meng yam yãkre, d sẽn wa n dɩk d meng n kõ Wẽnnaam pʋʋsg pʋgẽ n deeg lisgã. Rɩk d meng n kõ Wẽnnaam n deeg lisg baoodame tɩ d bãng Wẽnnaam daabã sẽn ya a soab la d yãk ne yamleoog n maan-a. (Efɛɛz rãmba 5:17) Yaa woto la d rɩkd togs-n-taar ne a Zezi sẽn yãk a toorẽ yam n bas a raadã wãab tʋʋmd n deeg lisgu, n kẽes a meng zãng a saasẽ Ba wã raab maaneg pʋgẽ wã.—Yɩɩl Sõamyã 40:8, 9; Zã 6:38-40.
13 Wẽnnaam a Zeova ra ratame t’a Biriblã ‘zems zãng a namsga yĩnga.’ Woto yĩnga a Zezi ra segdame n yãk a toorẽ yam, n deeg namsg kãens ne kɩs-sɩda. Sẽn na yɩl n tõog n maan woto, a ‘kelem n pʋʋsa ne kosg la nintãm tɩ Wẽnnaam leok a pʋʋsgo, a sakra yĩnga.’ (Hebre dãmba 2:10, 18; 5:7, 8) Tõnd sã n tall Wẽnnaam zoees sẽn naag ne waoogr woto, tõnd me tõe n kɩsa sɩd tɩ ‘Wẽnnaam na n leoka’ tõndo, la d tõe n kɩsa sɩd t’a Zeova na n kɩtame tɩ d sẽn ya a Kaset rãmb sẽn dɩk b mens n kõ-a wã yals kãn-kãe.—Ezai 43:10.
Y tõe n kell n talla sũ-keelem
14. Bõe yĩng tɩ d segd n karem Biiblã daar fãa?
14 Yaa bõe n tõe n sõng yãmb tɩ y kell n tall sũ-keelem n vɩɩmd tɩ zems ne y sẽn dɩk y meng n kõ Wẽnnaamã? Yãk-y bõn-datl sẽn yaa paam Wẽnnaam Gomdã bãngr sẽn tar paasgo, n karem Biiblã daar fãa. Woto yaa bũmb ‘tʋm-tʋmd sẽn tũud sɩd la sẽn tar yamã’ sẽn sagend tõnd wakat fãa tɩ d maane. B kõta sagl-kãngã, bala vɩɩmd tɩ zems ne d sẽn dɩk d meng n kõ wã baoodame tɩ d ket n kẽnd sɩd ning sẽn yit Wẽnnaam nengẽ wã pʋgẽ. A Zeova siglgã sã n da yãkẽ yam n na n tũ zãmsg sẽn yaa ziri, b ra pa na n tol n sagl a Zeova Kaset rãmbã la neb nins b sẽn moondã tɩ b karem Biiblã ye.
15. a) Yaa bõe la d segd n gese, d sã n wa yãkd n na n maan bũmbu? b) Bõe yĩng tɩ b tõe n yeel tɩ bao n kõ noorã yaa bũmb sẽn wat yiib-n-soab zĩigẽ ne kiris-neda?
15 Y sã n wa yãkd n na n maan bũmbu, wakat fãa, bɩ y ges yãk-kãng sẽn tõe n mad yãmb sẽn dɩk y meng n kõ a Zeova wã pidsgu. Rẽ tõe n tɩ loee ne yãmb nug tʋʋmdã. Yãmb modgdame t’a sõng-y tɩ y maan tɩ sɩd balengã kẽng taoor bɩ? Baa ne tʋʋmd taoor-dãmbã sẽn nong n get kiris-neb nins sẽn dɩk b mens n kõ Wẽnnaamã wa neb b sẽn tõe n tall bas-yard ne la wa neb sẽn tʋmd sõma wã, b leb n neeme t’a Zeova Kaset rãmbã pa neb sẽn maood wʋsg n na n lʋɩ taoor dũniyã pʋgẽ, la tɩ b pa maand wags-n-taar n dat zĩis sẽn yaood sõma n yɩɩd ye. Sẽn yaa woto wã, yaa Kaset rãmbã sẽn pa baood n na n paam arzɛgse, yʋʋr bɩ naamã yĩnga. Ne neb nins sẽn vɩ tɩ zems ne b sẽn dɩk b mens n kõ Wẽnnaamã, sẽn tar yõod n yɩɩdã yaa Wẽnnaam daabã maanego. Nug-tʋʋmd sẽn sõngd-b tɩ b paam b noor dɩɩbã wata yiib-n-soab zĩigẽ. Wala tʋm-tʋmd a Polle, tʋʋmd ning sẽn tar yood n yɩɩd ne bãmb yaa kiris-neb koe-moonegã tʋʋmde. (Tʋʋma 18:3, 4; 2 Tesalonik rãmba 3:7, 8; 1 Tɩmote 5:8) Yãmb ningda Rĩungã yɛl pipi zĩigẽ y vɩɩmã pʋgẽ bɩ?—Matɩe 6:25-33.
16. Bõe la d tõe n maane, yɩɩr sẽn loog noor sã n maandẽ tɩ yaa toog ne tõnd tɩ d vɩɩmd tɩ zems ne d sẽn dɩk d meng n kõ Wẽnnaamã?
16 Tõe tɩ neb kẽer sẽn da wa n nan pa bãng sɩdã, yɩɩr buud toor-toor n da rat n lim-ba. La ad b sɩd talla sũ-noogo, mi-beoog la nonglem ne Wẽnnaam, b sẽn wa n tẽ Rĩungã saagrã! B sã n tags bark nins b sẽn paam dẽ tɛkã yelle, tõe n sõng-b lame tɩ b vɩɩmd tɩ zems ne b sẽn dɩk b mens n kõ a Zeova wã. La yaa wãn to, yɩɩr sẽn loog nug vɩɩmã zu-loees yĩng zãmaan kãngã pʋgẽ sã n dat n gɩdg “Wẽnnaam goama,” wa gõos sẽn dɩt bõn-bul tɩ b pa tõog n bɩ wã? (Luk 8:7, 11, 14; Matɩe 13:22; Mark 4:18, 19) Yãmb sã n neẽ tɩ yel-kãngã sɩnga yãmb ne y zakã rãmb paoongo, bɩ y bas y yɩɩrã ne a Zeova n pʋʋs-a t’a sõng-y tɩ y bɩ nonglem la mi-beoog pʋgẽ. Yãmb sã n dɩk y yellã n bas ne a Zeova, a na n teel-y lame la a kõ-y pãng tɩ y ket n maand a raabã ne sũ-noog la sũ-keelem.—Yɩɩl Sõamyã 55:23; Filip rãmba 4:6, 7; Wilgri 2:4.
17. Wãn to la d tõe n mao ne mak-toose?
17 Ket-y n pʋʋsd Wẽnnaam a Zeova n pa vaandẽ ye, wa y sẽn da pʋʋs to-to y sẽn wa n dɩk y mengã n kõ-a wã. (Yɩɩl Sõamyã 65:3) Y sã n wa rat n maan wẽnga, bɩ y sã n wa be mak-toaag pʋgẽ, bɩ y bao Wẽnnaam sor-wilgr la a sõngr sẽn na yɩl n tũ sor-wilgr kãngã. Ning-y y yamẽ tɩ tẽeb yaa tɩlae, bala karen-biig a Zak gʋlsa woto: “Ned sã n be yãmb sʋk t’a yam paoodẽ, bɩ a kos Wẽnnaam sẽn kõt neba fãa ne yamleoog n ka lengdẽ wã, la a na paam. La bɩ a kos ne tẽebo la a ra sãmb ye, tɩ bõe, ned ninga sẽn sãmbda, a wẽnda ko-pɛma sobg sẽn pengda t’a lengdẽ. Bɩ ada soaba ra tags t’a na n deega bũmb Zusoaba nengẽ ye. Yẽ yaa yam a yiib soaba sẽn yuusd ne a yɛla fãa.” (Zak 1:5-8) Makr sã n wõnd a yɩɩda tõnd pãnga, d tõe n kɩsa sɩd ne woto: “Yãmb nan ka paam makr ba a yembr sẽn nan ka mak ninsaal ye. La Wẽnnaam sẽn yaa sɩd soabã, bãmb ka na n sak tɩ yãmb paam makr sẽn yɩɩd yãmb pãng ye. La ne makre bãmb na n maana sore tɩ yãmb tõe n yi, la tɩ yãmb tõe n paam pãng makra pʋgẽ n da lʋɩ ye.”—1 Korẽnt dãmba 10:13.
18. Bõe la d tõe n maane, yel-wẽn-kãseng sẽn solg sã n maagd raab ning d sẽn tar n na n vɩɩmd tɩ zems ne d sẽn dɩk d meng n kõ a Zeova wã?
18 Yaa wãn to masã, yel-wẽn-kãseng sẽn solg sã n tiisd yãmb sũur kasetã n maagd raab ning y sẽn tar n dat n vɩɩmd tɩ zems ne y sẽn dɩk y meng n kõ Wẽnnaamã? Yãmb sã n teka yam n kos sugri, y tõe n paama belsgo, y sẽn mi t’a Zeova ‘ka paoogd sik-m-meng yam ne sũ-sãoongã.’ (Yɩɩl Sõamyã 51:19) Bao-y kiris-neb kãsem dãmbã sẽn tar nonglmã sõngre, n miẽ tɩ b sẽn dɩkd a Zeova togs-n-taarã b na n talla naneb ne y sẽn tʋll n lebs n paam zems-n-taar ne y yĩngr Ba wã. (Yɩɩl Sõamyã 103:10-14; Zak 5:13-15) Rẽ, ne tẽeb pãn-paalg la sũ-keelem, y na n tõog n tũu so-tɩrse, n yã tɩ y tõe n vɩɩmdame tɩ zems ne y sẽn dɩk y meng n kõ Wẽnnaamã.—Hebre dãmba 12:12, 13.
Ket-y n maand a raabã ne sũ-keelem
19, 20. Bõe yĩng tɩ tar yõod hal wʋsg tɩ d vɩ wakat fãa tɩ zems ne d sẽn dɩk d mens n kõ wã?
19 Wakat tood kãensã, d segd n modga wʋsg n vɩɩmd tɩ zems ne d sẽn dɩk d meng n kõ wã la d ket n maand Wẽnnaam daabã ne sũ-keelem. A Zezi yeelame tɩ: “Ned ninga sẽn na n tall a tẽeb hal tɩ wakat ta, a na n paama fãagre.” (Matɩe 24:13) Tõnd sẽn vɩ ‘yaoolem wakatã’ yĩnga, saabã tõe n waa wakat buud fãa. (2 Tɩmote 3:1) Sẽn paase, tõnd ned ba a yembr pa tõe n kɩs sɩd t’a na n taa beoog ye. (Zak 4:13, 14) Woto yĩnga, tara yõod wʋsg tɩ d ket n vɩ tɩ zems ne d sẽn dɩk d mens n kõ wã rũndã!
20 Tʋm-tʋmd a Pɩɛɛr goma rẽ yell wʋsg a lɛtr a yiib-n-soabã pʋgẽ. A wilgame tɩ wa wẽn-kɩɩsdbã sẽn paam sãang sa-kãsengã pʋgẽ wã, tẽngã sẽn makd zãmaan wẽngã na n paama sãang “a Zeova daarã” (NW ). Woto yĩnga, a Pɩɛɛr yeela woto: “Yãmb ka rat n yɩ neba b yel-manesem sẽn yaa sõama la sẽn sakd Wẽnnaam . . . bɩ?” A leb n sagl-b-la woto: “Dẽ yĩnga, mam zo-nongdse, yãmb sẽn deng n bãng bõn-kãensã, bɩ y gũus neere tɩ [ziri karen-saam dãmbã la wẽn-kɩɩsdba] tʋʋm wẽnsa ra vigs yãmb ye.” (2 Pɩɛɛr 3:5-17) Ad sɩd ra na n yɩɩ kaeto, ned sẽn deeg lisg sã n pa yals kãn-kãe n wa lak n bas sɩdã n maan yõor kɩɩsg kãng pʋgẽ!
21, 22. Wãn to la Yɩɩl Sõamyã 57:8 goamã paam pidsg a Davɩɩd la kiris-neb hakɩkã vɩɩm pʋgẽ?
21 Yãmb sẽn dat ne y sũurã fãa n vɩɩmd tɩ zems ne y sẽn dɩk y meng n kõ Wẽnnaamã pãng tõe n paasame, y sã n ning y lisgã daar sẽn yɩ sũ-noog daarã y yamẽ, la y bao Wẽnnaam sõngr sẽn na yɩl tɩ y goamã la y tʋʋmã noog a sũuri. (Yelbũna 27:11) A Zeova zɩ n bas a nin-buiidã ye, tɩ tõnd me segd n sɩd sak-a wakat fãa. (Yɩɩl Sõamyã 94:14) A talla nimbãan-zoeer ne a Davɩɩde, n kɩt t’a bɛɛbã bẽds yɩ zaalem la a fãag-a. A Davɩɩd talla mi-beoog ne rẽ n wilg tɩ nonglem a sẽn tall ne a Fãagdã yaa kãn-kãe n pa vigsdẽ ye. A yɩɩla woto ne a sũur fãa: “Mam Wẽnnaam, mam sũur kɛɛma, mam sũur kɛɛma. Mam na n yɩɩla ne yʋʋm teed yãmb yĩnga.”—Yɩɩl Sõamyã 57:8.
22 Wa a Davɩɩde, kiris-neb hakɩkã pa reemd ne b sẽn dɩk b meng n kõ Wẽnnaamã ye. Ne sũ-keelem, b getame tɩ b fãagrã la b koglgã yita a Zeova nengẽ, a soab ning b sẽn yɩɩnd n pẽgd ne sũ-noogã. Yãmb sã n tar sũ-keelem, y na n teega Wẽnnaam, la ne a sõngre y na n tõog n vɩɩmdame tɩ zems ne y sẽn dɩk y meng n kõ-a wã. N-ye, y tõe n yɩɩ wa “nin-tɩrg” ning yɩɩl-gʋlsdã sẽn yɩɩl woto a wɛɛngẽ wã: “Dabeem ka tar-a koe-beed yĩng ye, a sũur kɛɛma, a dellda Zusoabã.” (Yɩɩl Sõamyã 112:6, 7) Y sã n tar tẽeb la bas-yard zãng-zãng ne Wẽnnaam, y tõe n vɩɩmdame tɩ zems ne y sẽn dɩk y meng n kõ-a wã, la y ket n maand a Zeova raabã ne sũ-keelem.
Y tẽrame bɩ?
• Bõe yĩng tɩ d segd n ket n paamd Biiblã bãngr hakɩka?
• Bõe yĩng tɩ d segd n ning d yamẽ tɩ d kosa sugr la d tuubi?
• Wãn to la tõnd sẽn dɩk d meng n kõ wã la d lisgã tẽegr nafd tõndo?
• Bõe n na n sõng tõnd tɩ d ket n maand a Zeova raabã ne sũ-keelem?
[Zãmsgã sogsgã]
[Foto rãmba, seb-neng 28]
D sã n dɩk koe-nooga mooneg n lʋɩɩs taoore, sõngda tõnd tɩ d ket n maand a Zeova raaba ne sũ-keelem
[Foto, seb-neng 28]
Yãmb karemda Wẽnnaam Gomdã daar fãa tɩ kɩt tɩ y tar laafɩ tẽebã wɛɛngẽ bɩ?