Kirist taoor-sobendã yaa vẽeneg ne yãmb bɩ?
Kirist taoor-sobendã yaa vẽeneg ne yãmb bɩ?
“Da kɩt-y tɩ nebã bool yãmb tɩ taoor dãmb ye, bala, ned a yen tãa n yaa taoor soaba, yaa Kirist.”—MATƖE 23:10, Kãab-paalgã Koe-noogo.
1. Ãnd bal n yaa kiris-neb hakɩkã Taoor-soaba?
RA YAA talaato, Nizã rasem 11. Yaa rasem a tãab poor la b ra na n kʋ a Zezi Kirist. Yɩɩ a yaoolem kẽngr wẽn-doogẽ wã. Baraare, a Zezi taasa kʋʋngã sẽn tigim be wã ne a karen-biisã zãmsg sẽn tar yõod wʋsgo. A yeelame: “Ra kɩt-y tɩ nebã boond yãmb tɩ karen-saamb ye. Bala, yãmb karen-saamb yaa a yen tãa, la yãmb fãa yaa ba-biisi. Da bool-y ned baa a yen tãa dũni ka tɩ ba ye. Bala, ned a yen tãa n yaa yãmb ba, a soab ning sẽn be-a saasẽ wã. Da kɩt-y tɩ nebã bool yãmb tɩ taoor dãmb ye, bala, ned a yen tãa n yaa taoor soaba, yaa Kirist.” (Matɩe 23:8-10, Kãab-paalgã Koe-noogo) Vẽenega, ya a Zezi Kirist la kiris-neb hakɩkã Taoor-soaba.
2, 3. D sã n kelgd a Zeova la d sakd Taoor-soab ning a sẽn yãkã, a wata ne bõe tõnd vɩɩmã pʋgẽ?
2 D sã n sak a Zezi taoor-sobendã, a sɩd wata ne nafa wʋsg tõnd vɩɩmã pʋgẽ! Wẽnnaam a Zeova pĩnd n togsa Taoor-soab kãng waoongo. A tũnuga ne no-rɛɛs a Ezai n yeel tɩ: “Yãmb fãa ko-yũud sẽn tarã, bɩ y wa koom zĩigẽ. Baa yãmb sã n ka tar ligdi, bɩ y wa reeg n dɩ. Bɩ y wa reeg rãam ne bĩisem zaalem. . . . Kelg-y maam neere, tɩ y na n dɩɩ rɩ-noodo. La rɩ-nood na n nooga yãmb sũyã. . . . Gese, mam kõo yẽ t’a yɩ kaset soaba la buuda fãa naaba la b soaala.”—Ezai 55:1-4.
3 A Ezai rɩka makr ne bõn-yũudi nebã sẽn mi, wala koom, bĩisim la rãam, sẽn na yɩl n wilg ned vɩɩm sẽn manegd to-to, a sã n kelg a Zeova la a tũ Naab la Soaal ning a sẽn kõ tõndã. Rẽ kõta yolsgo. A yaa wala ko-maasg yũub tʋʋlg daare. Woto me, sɩdã la tɩrlmã ko-yũud sẽn tar tõndã paamda tɩgsgo. Wa bĩisim sẽn kõt kom-peels pãng la a sõngd-b tɩ b bɩ wã, ‘koɛɛga sẽn wẽnd wa bĩismã’ kõta tõnd pãng la a paasd d tẽebã bɩʋʋngo, tɩ d zems-n-taarã ne Wẽnnaamã paasdẽ. (1 Pɩɛɛr 2:1-3) Wa rãam sẽn paasd sũ-noog kibs wakatã, woto me, d sã n balem sɩd Wẽnnaam la d tũ Taoor-soab ning a sẽn yãk n kõ-dã makre, kɩtdame tɩ d vɩɩmã tall “sũ-noog wʋsgo.” (Tõodo 16:15) Rẽnd tara yõod wʋsg tɩ tõnd fãa, kom-bɩɩs la nin-kẽemba, pagb la rapa, wilg tɩ Kirist taoor-sobendã sɩd tara yõod wʋsg ne-do. La yaa wãn to la d tõe n wilg d vɩɩmã pʋgẽ daar fãa tɩ Mesɩ wã yaa tõnd Taoor-soaba?
Kom-bɩɩse, bɩ y ‘ket n paasd y yam’
4. a) Bõe n maane, a Zezi sẽn da tar yʋʋm 12 n kẽng Zerizalɛm Pakã wakatã? b) A Zezi sẽn da wa n tar yʋʋm 12 bala, a ra paama zãmsg sõma sẽn ta hal zĩ-bʋgo?
4 Ges-y makr ning tõnd Taoor-soabã sẽn kõ kom-bɩɩsã. Baa ne d sẽn pa mi yɛl wʋsg a Zezi yãadmã wɛɛngẽ wã, bũmb a ye n maan tɩ vẽnegd tõnd wʋsg rẽ zugu. A Zezi sẽn da wa n tar yʋʋm 12, a roagdbã peeg-a lame tɩ b maan yʋʋmd-yʋʋmd so-toakã n kẽng Zerizalɛm Pakã yĩnga. Sasa kãngã, a kẽesa a meng sõsg sẽn tik Gʋlsg Sõamyã zut pʋgẽ, t’a zakã rãmb pa bãng n loog n bas-a. Rasem a tãab poore, a roagdbã, a Zozɛf la a Maari sẽn da maand yɩɩrã lebg n wa yã-a-la wẽn-doogẽ wã “t’a zĩ karen-saam dãmba sʋka n kelgd bãmba, la a sokd bãmb bũmb wʋsgo.” Sẽn paase, “a Zezi bãngra ne a leokra yɛɛsa neb nins fãa sẽn wʋma.” A Zezi sẽn da wa n tar yʋʋm 12 bala, a ra tõe n maana sʋgs tẽebã yɛl zut sẽn kɩtd tɩ nebã tagse, la a ra tõe n kõo leoor sẽn wilgd t’a tara yam ne bãngr wʋsg me. Sãmbg sẽn ka be, a roagdbã zãmsg ra sõng-a lame.—Luk 2:41-50.
5. Wãn to la kom-bɩɩsã tõe n bãng b manesmã sã n yaa sõma ne Biibl zãmsg b sẽn maand zakã neb fãa yĩngã?
5 Tõe tɩ yãmb yaa bi-bɩɩga. Yãmb roagdbã sã n yaa Wẽnnaam sõgen dãmb sẽn tar kɩs-sɩda, sãmbg ka be tɩ b maanda Biibl zãmsg ne y zakã rãmb wakat fãa ye. Yãmb manesem yaa wãn to ne Biibl zãmsg b sẽn maand ne y zakã neb fãa wã? Bõe yĩng tɩ y pa na n tags sʋgs-kãensã zutu: ‘Mam teenda seglg ning b sẽn maan mam zakã neb fãa Biibl zãmsgã yĩng bɩ? Mam kẽesda m toog a pʋgẽ, n maand m sẽn tõe fãa n na n wa wakat ning b sẽn yãk zãmsgã yĩngã bɩ?’ (Filip rãmba 3:16) ‘Mam kõta leokr sõma zãmsgã wakat bɩ? Sã n zemsame, mam maanda sʋkr zãmsgã wɛɛngẽ, la m wilgd b sẽn tõe n tũ zãms-kãng to-to bɩ? Mam sẽn bɩt tẽebã wɛɛngẽ wã, mam bɩɩsda ratem ne “rɩɩb sẽn yaa taok [sẽn] yaa neb nins sẽn bɩ” wã yĩngã bɩ?’—Hebre dãmba 5:13, 14.
6, 7. Biiblã kareng daar fãa tõe n talla yõod bʋg ne kom-bɩɩsã?
6 Biiblã kareng daar fãa wã me tara yõodo. Yɩɩl gʋlsdã yɩɩla woto: “Bark bee ned ninga zugu sẽn ka reegd nin-wẽns saglg ye, . . . yẽ nonga Zusoaba tõogo n tagsd a yell [“n karemd-a,” NW ] wĩntoog ne yʋngo.” (Yɩɩl Sõamyã 1:1, 2) A Moiiz lɛdgd a Zozue ‘karma tõogã wĩntoog ne yʋngo.’ Rẽ kɩtame t’a tõog n tʋm ne yam la a tõog n pids tʋʋmd ning Wẽnnaam sẽn bobl-a wã. (Zozue 1:8) Tõnd Taoor-soab a Zezi Kirist yeelame: “A gʋlsame: Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Matɩe 4:4) Sã n yaa tɩlae tɩ d rɩ rɩɩb daar fãa, d sẽn dat tẽebã rɩɩb wakat fãa n yɩɩde!
7 Yʋʋm 13 bipugl a Nicole yãame tɩ tẽeb kom n tar-a, t’a sɩng Biiblã kareng daar fãa. * Masã a tara yʋʋm 16, la a karma Biiblã zãng a pipi soaba, la a karm-a-la sẽn kolg pʋɩ-sʋk yɛsa. A sẽn maand to-to wã pa toog ye. “M modgdame n karem baa yaa sak a yembr daar fãa.” Woto la a yeel-yã. Wãn to la a daar fãa Biibl karengã sõng-a? Ad a sẽn leoke: “Rũndã-rũndã pãn-tusd-wẽnsã yaa wʋsgo. Daar fãa, m segda yɛl lekollẽ wã la zĩis a taab sẽn zabd ne m tẽebã. Biiblã kareng daar fãa sõngd-m lame tɩ m tẽeg Biiblã noy tao-tao, tɩ rẽ sõngd-m tɩ m yalsd kãn-kãe pãn-tusd-kãens taoore. Rẽ kɩtame tɩ m neẽ tɩ m pẽnega a Zeova ne a Zezi n paase.”
8. A Zezi ra minim n maanda bõe Zʋɩf rãmbã karen-doogẽ, la wãn to la kom-bɩɩsã tõe n dɩk a togs-n-taare?
8 A Zezi ra minim n kelgdame la a kẽesd a toog Gʋlsg Sõamyã kareng pʋgẽ Zʋɩf rãmbã karen-doogẽ. (Luk 4:16; Tʋʋma 15:21) Ad woto sɩd bee nafr wʋsg ne kom-bɩɩsã, b sã n tũ mak-kãnga n kẽngd kiris-neb tigissẽ wã b sẽn karemdẽ la b zãmsd Biiblã, n pa vaandẽ ye. A Richard sẽn tar yʋʋm 14 wilga a mi-beoog ne tigis-kãens n yeele: “Tigissã tara yõod ne maam. Wakat fãa, m paamda tẽegr be sẽn yaa sõma la wẽnga wɛɛngẽ, sẽn zems la sẽn pa zems vɩɩm manesmã wɛɛngẽ, sẽn zems ne Kirist manesem la sẽn pa zems ne a manesmã wɛɛngẽ. Pa tɩlae ne-m tɩ m paam toog n yaool n bãng yam ye.” N-ye, “Zusoaba kaset yaa sɩda n ka viigdẽ ye. A kõta zɩɩlem soab yam.” (Yɩɩl Sõamyã 19:8) Semen fãa, a Nicole me modgdame n na n kẽes a meng tigingã tigiss a nu wã fãa. A leb n dɩkda lɛɛr a yiib bɩ a tãab n segend tigissã.—Efɛɛz rãmba 5:15, 16, Kãab-paalgã Koe-noogo.
9. Wãn to la kom-bɩɩsã ‘yam tõe n paase’?
9 Bi-bɩɩlem yaa wakat sẽn zems sẽn na yɩl n bao n ‘bãng sɩd Wẽnnaam sẽn ka to la a Zezi Kirist yẽ sẽn tʋm a soaba.’ (Zã 17:3) Tõe tɩ y mii kom-bɩɩs sẽn dɩkd sẽk wʋsg n karemd bãnd desine rãmba, n get televiziõ, n deemd video reem, bɩ n vaeesd yɛl ka tɛk ẽntɛrnetã pʋgẽ. Y pa segd n dɩk bãmb togs-n-taar ye, y tara y Taoor-soabã mak-sõng sẽn zems zãng n na n tũ. A Zezi sẽn da yaa bi-bɩɩga, a ra nong n zãmsda a Zeova wɛɛngẽ. La rẽ waa ne bõe? A sẽn da nong tẽebã yɛlã yĩnga, “a Zezi [ra] bɩtame, t’a yam paasdẽ.” (Luk 2:52) Yãmb me tõe n maana woto.
“Bɩ y sak taaba”
10. Bõe n na n sõng tɩ zak pʋgẽ vɩɩmã tall laafɩ la sũ-noogo?
10 Yirã tõe n yɩɩ laafɩ la sũ-noog zĩiga, bɩ zabr la no-koɛɛm zĩiga. (Yelbũna 21:19, NW; 26:21) Tõnd sẽn sakd Kirist taoor-sobendã paasda laafɩ wã la sũ-noogã zakã pʋgẽ. Sɩda, a Zezi makrã yaa mak-sõng n kõ zagsã neba, b manesmã ne taabã pʋgẽ. Gʋlsg Sõamyã yetame tɩ: “Bɩ y sak taaba yãmb sẽn zoet Kirista yĩnga. Pagba, bɩ y sak y sɩdba wa yãmb sẽn sakd Zusoabã. Tɩ bõe, sɩd yaa pag zu-soab wa Kirist sẽn yaa bãmb neba zu-soabã, bãmb neba sẽn yaa bãmb yĩnga, la bãmb yaa fãagda. . . . Raopa, bɩ y nong y pagba wa Kirist sẽn nong bãmb tẽedbã n kõ bãmb meng bãmb yĩngã.” (Efɛɛz rãmba 5:21-25) Tʋm-tʋmd a Poll gʋlsa Kolos tigingã woto: “Kamba, bɩ y sak y ba rãmba ne y ma rãmba ne bũmb fãa; tɩ bõe, bõn-kãng tata Zusoaba yam.”—Kolos rãmba 3:18-20.
11. Wãn to la sɩd tõe n wilg tɩ Kirist taoor-sobendã tara yõod wʋsg ne-a?
11 Sagl-kãngã tũub baoodame tɩ sɩdã lʋɩ taoor zakã pʋgẽ, t’a pagã teel-a wakat fãa, tɩ kambã sak b roagdbã. La yaa rao wã sẽn na n tʋmd a zu-sobendã tʋʋmd tɩ zems la a zu-sobendã wat ne sũ-noogo. Sɩd sẽn tar yam segdame n bãng a sẽn na n tʋm a zu-sobendã tʋʋmd to-to, n dɩk togs-n-taar ne yẽ mengã Zusoab la a Taoor-soaba, sẽn yaa Kirist Zezi wã. (1 Korẽnt dãmba 11:3) Baa ne a Zezi sẽn lebg “bãmb neba zug ne bũmb fãa wã,” a pa wa tẽng zug “tɩ neb sõng bãmb ye, b waame n na n sõng nebã.” (Efɛɛz rãmba 1:22; Matɩe 20:28) Woto me, sɩd sẽn yaa kiris-ned tʋmda a zu-sobendã tʋʋmde, pa yẽ mengã nafr yĩng bal ye, la yaa sẽn na yɩl n ges a pagã ne a kambã yelle, n-ye, zakã gill ratem yelle. (1 Korẽnt dãmba 13:4, 5) A baoodame n na n dɩk togs-n-taar ne Wẽnnaam la a zu-soab a Zezi Kirist zʋg-sõma wã. A segd n yɩɩ sũ-bʋgsem soab la sik-m-meng soab wala a Zezi. (Matɩe 11:28-30) A sã n ka bʋʋm, pa toog ne-a t’a yeel tɩ “gaafare,” bɩ “f bee bʋʋm” ye. A mak-sõngã kɩtdame tɩ yaa nana ne a pagã t’a yɩ ‘sõangda,’ “loakda,” (NW ) la ‘kẽed-n-taaga,’ n zãmsd yɛl a sɩdã nengẽ la a naagd-a n tʋmdẽ.—Sɩngre 2:20; Malaki 2:14.
12. Bõe n na n sõng pag t’a sak zu-sobendã noor sõma?
12 Sã n yaa ne pagã, a segd n saka a sɩdã. La dũniyã tagsg sã n tar pãng a zugu, tõe n kɩtame t’a tagsgã golem zu-sobendã noor wɛɛngẽ, tɩ kɩt t’a pa rat n sak rao zu-sobend ye. Gʋlsg Sõamyã pa wilgd tɩ rao wã segd n sooga a pagã ne pãng ye, la a kõta noor tɩ pagbã segd n saka b sɩdbã. (Efɛɛz rãmba 5:24) Biiblã leb n wilgdame tɩ zakã taoor sobend zɩɩb zaoa sɩdã bɩ ba wã zugu, la b sã n tũ Biiblã saglse, sõngd n waa ne laafɩ la zems-taab zakã pʋgẽ.—Filip rãmba 2:5.
13. Mak-sõng bʋg la a Zezi kõ kambã sakra wɛɛngẽ?
13 Kambã segd n saka b roagdbã. Rẽ wɛɛngẽ, a Zezi kõo makr sẽn yaa sõma wʋsgo. A Zezi sẽn da wa n tar yʋʋm 12 n kẽ wẽn-doogẽ wã tɩ b bas-a n loog tɩ maan rasem a tãabã poore, “a Zezi tũu [a roagdbã] n kuil Nazarɛt, la a saka bãmb noore.” (Luk 2:51) Kambã sã n sakd b roagdbã, sõngd n paasda laafɩ la zems-n-taar zakã pʋgẽ. Zakã ned fãa sã n sak Kirist taoor-sobendã, kɩtdame tɩ zakã paam sũ-noogo.
14, 15. Bõe n na n sõng tõnd tɩ d tõoge, d sã n wa segd zu-loees d zakã pʋgẽ? Kõ-y makre.
14 Baa zu-loees sã n wa zakã pʋgẽ, bũmb ning sẽn na n kɩt tɩ b tõog n welg-bã yaa b sẽn na n dɩk a Zezi togs-n-taar la b sak a sor-wilgrã. Wala makre, a Jerry sẽn tar yʋʋm 35 sẽn kẽ kãadem ne a Lana, sẽn da zoe n tar bipuglã, yell n wa tɩ bãmb ned ba a yembr pa reng n tags a zug ye. A Jerry wilgdame: “M da miime tɩ sẽn na yɩl n yɩ zak soab sẽn tʋmd a tʋʋmd neere, m da segd n tũu Biiblã noy nins sẽn kõt zags a taab me sũ-noogã. La pa kaoos la m wa bãng tɩ m da segd n tũ-b-la ne yam la gũusg wʋsg n paas ye.” A pagã bipugl ges-a-la wa ned sẽn zãagd-a ne a ma wã, tɩ bipuglã sũur da pa noom ne-a lae-lae ye. A Jerry talla yam-vẽenem n bãng tɩ tags-kãng talla pãn-tusdg wʋsg bipuglã goam la a tʋʋm manesem zutu. Wãn to la a maan yellã taoore? A Jerry leokame: “A Lana ne maam sakame tɩ nananda, yaa yẽ n da na n ges a bipuglã wubr yelle, tɩ mam bao n paam zems-n-taar ne bipuglã. Sẽn wa n beẽ-beẽ, manesem kãngã woma bi-sõama.”
15 D sã n wa segd zu-loees yiri, d segd n talla yam-vẽenem n bãng bũmb ning sẽn kɩt tɩ zakã nebã gomd woto la b maand woto wã võore. D segdame me n paam yam sẽn na yɩl n tũ Wẽnnaam noyã tɩ zemse. Wala makre, a Zezi bãnga bũmb ning sẽn kɩt tɩ pag a yembr zɩɩm sẽn da yitã sɩɩs-a wã võore, t’a tall manesem sẽn zems la nimbãan-zoeer ne pagã. (Maankʋʋre 15:25-27; Mark 5:30-34) Tõnd Taoor-soabã tara yam la a wʋmd yɛlã võore. (Yelbũna 8:12) D sã n maan wa yẽ, d na n paama sũ-noogo.
‘Bɩ y ket n baood Rĩungã nanda’
16. Bõe n segd n yɩ pipi tõnd vɩɩmã pʋgẽ, la wãn to la a Zezi kõ tõnd mak-sõng rẽ wɛɛngẽ?
16 A Zezi wilga vẽenega, bũmb ning sẽn segd n yɩ pipi neb nins sẽn sak a taoor-sobendã vɩɩm pʋgẽ. A yeelame: “Bɩ y reng n bao Wẽnnaam soolem ne bãmb tɩrlem.” (Matɩe 6:33) La ne a mak-sõngã, a wilga tõnd d sẽn na n maan dẽ to-to. Rasem 40 no-loeerã la bʋgsgã ne pʋʋsgã a sẽn maan a lisgã poorã saabẽ, a Zezi paama makre. A Sʋɩtãan Munaafɩɩk kãab-a-la “dũniyã soolem fãa” naam. Ges-y vɩɩm ning a Zezi sẽn da tõe n paame, a sã n da sakẽ a Sʋɩtãan kũunã! La sẽn da pak Kirist n yɩɩd ya a Ba wã raab maanego. A leb n yãame t’a Sʋɩtãan dũniyã pʋgẽ vɩɩm da na n yɩɩ vɩ-koɛɛga. Tao-tao bala a zãgsa bũmb ning a Sʋɩtãan sẽn kãab-a wã n yeele: “A gʋlsame: Waoog Zusoaba fo Wẽnnaam, la f sak bãmb bala.” Rẽ poor bilfu, a Zezi “sɩngame n moon Koe-noogo n yeele: ‘Bɩ yãmb tek yam n kos sugri, tɩ arzãn soolem kolgame.’ ” (Matɩe 4:2, 8-10, 17) Kirist rɩka a tẽng zug vɩɩmã sẽn kellã fãa n kẽes a meng zãng Wẽnnaam Rĩungã mooneg pʋgẽ.
17. Wãn to la d tõe n wilg tɩ Rĩungã yɛl n be pipi zĩigẽ tõnd vɩɩmã pʋgẽ?
17 D segd n dɩka d Taoor-soabã togs-n-taare, n da bas t’a Sʋɩtãan dũniyã belg-d n kɩt tɩ tõnd bõn-datl kãseng vɩɩmã pʋgẽ yɩ tʋʋm sẽn yaood wʋsg la nug-tʋʋmd ye. (Mark 1:17-21) Ad na n yɩẽ-la yalemd wʋsg menga, d sã n fõr n kẽ dũniyã yɛl baoob pʋgẽ tɩ lebg bẽdg ne-do, hal tɩ Rĩungã yɛl leb poorẽ! A Zezi bobla tõnd Rĩungã moonego, la karen-biisã maaneg tʋʋmde. (Matɩe 24:14; 28:19, 20) Yaa sɩda, tõe tɩ d tara zak n segd n ges a yelle, bɩ zɩɩb a taab sẽn zao d zugu, la d sũur yaa noogo, d sẽn dɩkd d zaaba wã la d wɩkɛn dãmbã n tʋmd kiris-neb tʋʋmdã sẽn yaa moon nebã la zãms-bã. La ad sɩd kengda raoodo, neb 780 000 sẽn tõog n yɩ wakat fãa koe-moondb bɩ so-pakdb yʋʋmd 2001 wã!
18. Bõe n sõngd tõnd tɩ d paam sũ-noog koe-moonegã pʋgẽ?
18 Evãnzill dãmbã wilgdame t’a Zezi yaa ned sẽn tʋmd wʋsgo, la sẽn yaa nimbãan-zoɛta. A sẽn yã tɩ tẽeb kom n da tar neb nins sẽn da be be wã, b nimbãaneg yõk-a lame t’a yɩ tao-tao n sõng-ba. (Mark 6:31-34) Tõnd koe-moonegã kõta sũ-noogo, sã n yaa d sẽn nong neb a taabã yĩng n kɩt tɩ d sɩd tʋll ne d sũur fãa n sõng-ba. La wãn to la d tõe n paam tʋlsem kãngã buudu? Bi-bɩɩg yʋʋr sẽn boond t’a Jayson yeelame: “Mam sẽn wa n tar yʋʋm piig la zaka, m da pa nong koe-noogã mooneg wʋsg ye.” Yaa bõe n sõng-a t’a bɩɩs nonglem ne tʋʋm kãngã? Ad yẽ meng sẽn leokde: “Tõnd zakẽ wã, sibr yibeoog fãa d ra moonda koe-noogã. Woto ra yaa sõma ne maam, bala m sã n da moond koe-noogã n paasdẽ, m da nee bõn-sõma nins a sẽn pidsdã n paasdẽ, tɩ woto kɩt tɩ m da nong-a n paasdẽ.” Tõnd me segd n kẽesa d mens koe-moonegã pʋgẽ sõma wakat fãa.
19. Sard sẽn pa vigsd bʋg la d segd n dɩk ne d meng Kirist taoor-sobendã wɛɛngẽ?
19 Sɩd yaa yolsg la bũmb sẽn kõt nafr tɩ d sak Kirist taoor-sobendã. D sã n maan woto, d na n tõogame n bɩɩs d bãngrã la d yamã d bi-bɩɩlmã wakate. Zakã lebgda laafɩ la sũ-noog zĩiga, tɩ koe-moonegã lebg tʋʋmd sẽn kõt sũ-noogo. Bɩ d sɩd rɩk sard sẽn pa vigsd ne d meng n wilg d vɩɩmã fãa pʋgẽ la yãkr nins d sẽn maandã pʋsẽ, tɩ d geta Kirist taoor-sobendã wa bũmb sẽn tar yõod wʋsg ne-do. (Kolos rãmba 3:23, 24) La a Zezi Kirist yɩɩ tõnd Taoor-soab ne bũmb a to tũnugri: yaa kiris-neb tigingã. Sõsg ning sẽn pʋgdã na n wilga d sẽn tõe n dɩ segl-kãngã nafr to-to.
[Tẽngr note]
^ sull 7 B toeema yʋy kẽere.
Y tẽrame bɩ?
• Wãn to la tõnd Taoor-soab Wẽnnaam sẽn yãkã tũub nafd tõndo?
• Wãn to la kom-bɩɩsã tõe n wilg tɩ b rat n tũu a Zezi taoor-sobendã?
• Pãn-tusdg bʋg la Kirist taoor-sobendã tar neb nins sẽn sakd-a wã zak pʋgẽ vɩɩm zugu?
• Wãn to la tõnd koe-moonegã wilgd tɩ Kirist taoor-sobendã tara yõod wʋsg ne-do?
[Zãmsgã sogsgã]
[Foto rãmba, seb-neng 10]
Bi-bɩɩlmã yaa wakat sẽn zems sẽn na yɩl n bao n bãng Wẽnnaam la tõnd Taoor-soab ning a sẽn yãkã
[Foto, seb-neng 11]
Kirist taoor-sobendã sakr paasda zak pʋgẽ sũ-noogã
[Foto rãmba, seb-neng 13]
A Zezi baoa Rĩungã pipi. La yãmba?