Kirist wilgda a tigingã sore

“La gese, mam bee ne yãmb wakat fãa hal tɩ ta wakat sɛɛbo.”—MATƖE 28:20.

1, 2. a) A Zezi vʋʋgrã poor a sẽn wa n kõt a karen-biisã noor tɩ b tɩ maan karen-biisã, bõe me la a kãab-ba? b) Wãn to la a Zezi wilg pipi kiris-neb tigingã sore?

A VƲƲGRÃ poore, nand t’a rʋ saasẽ, a Zezi Kirist sẽn yaa tõnd Taoor soabã puka a karen-biisã taoor n yeele: “B kõo maam pãng fãa sẽn be arzãna la sẽn be dũniyã. Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre. La zãms bãmb tɩ b sak bũmb nins fãa mam sẽn da togs yãmbã. La gese, mam bee ne yãmb wakat fãa hal tɩ ta wakat sɛɛbo.”—Matɩe 23:10, Kãab-paalgã Koe-noogo; 28:18-20.

² A Zezi kõo a karen-biisã yõe fãagr tʋʋmd sẽn yaa maan karen-biisi, la a leb n kãab me t’a na n zĩnda ne-ba. Pipi kiris-nebã yɛl sẽn gʋls Biiblã pʋgẽ tɩ be Tʋʋma sebrẽ wã wilgda vẽeneg tɩ Kirist tũnuga ne tõog ning Wẽnnaam sẽn kõ-a wã n wilg tigingã b sẽn lugl paalma sore. A tʋma “Sõangd” ning a sẽn yeel t’a na n tʋmame tɩ wa wã sẽn yaa vʋʋsem sõngã, sẽn na yɩl n keng a karen-biisã la a wilg-b sor b modgrã pʋgẽ. (Zã 16:7; Tʋʋma 2:4, 33; 13:2-4; 16:6-10) A Zezi sẽn vʋʋgã, a tũnuga ne malɛk rãmb tɩ b sõng a karen-biisã. (Tʋʋma 5:19; 8:26; 10:3-8, 22; 12:7-11; 27:23, 24; 1 Pɩɛɛr 3:22) Sẽn paase, tõnd Taoor-soabã wilga tigingã sore, n maan segls tɩ rap sẽn tar tõog yɩ siglgã taoor lʋɩtb sulli.—Tʋʋma 1:20, 24-26; 6:1-6; 8:5, 14-17.

3. Sʋgs-bʋs la d na n leok sõs-kãngã pʋgẽ?

³ Yaa wãn to yẽ ne tõnd wakatã sẽn yaa ‘zãmaanã yɛl baasgã’? Wãn to la a Zezi Kirist wilgd kiris-neb tigingã sor rũndã-rũndã? La wãn to la d tõe n wilg tɩ d sakda a taoor-sobendã?

Zusoabã tara tʋm-tʋmd sẽn tũud sɩda

4. a) Ãnd soab n yaa ‘tʋm-tʋmd sẽn tũud sɩd la sẽn tar yamã’? b) Yaa bõe la Zusoabã rɩk n bobl tʋm-tʋmdã?

⁴ A Zezi sẽn da wa n kõt bãngr-gomd ning sẽn tɩ loe ne a belmã bãndã, a yeela woto: “Dẽ,  ãnda n yaa tʋm-tʋmda sẽn tũud sɩda la sẽn tar yam, t’a Zusoaba kõ-a noor t’a ges a zak yelle n moeneg a zaka wa sẽn zemse? Bark bee tʋm-tʋm kãng zugu a Zusoaba sẽn na n wa mik t’a maanda woto. Mam yeta yãmb sɩda tɩ yẽ na kõ-a noor t’a yɩ a zaka fãa yel-geta.” (Matɩe 24:45-47) “Zusoaba” yaa tõnd Taoor-soab a Zezi Kirist, la a yãka ‘tʋm-tʋmd sẽn tũud sɩd la sẽn tar yamã,’ sẽn yaa kiris-neb nins sẽn zae ne vʋʋsem sõngã sẽn be tẽng zugã, tɩ b ges a tẽng zug yɛla fãa yelle.

5, 6. a) Tʋm-tʋmd a Zã yãabã a sẽn paama pʋgẽ, yaa bõe la “fɩtl dogends a yopoe wã” la “ãds a yopoe wã” makda? b) “Ãds a yopoe wã” sẽn be a Zezi nug rɩtgẽ wã wilgda bõe?

⁵ Wilgr sebrã wilgdame tɩ ya a Zezi Kirist meng n wilgd tʋm-tʋmd sẽn tũud sɩd la sẽn tar yamã sore. Yãab sẽn tɩ loe ne ‘Zusoaba raar’ pʋgẽ, tʋm-tʋmd a Zã yeelame tɩ “mam yãa fɩtl dogends a yopoe. La fɩtl dogends a yopoe wã sʋka, mam yãa a yembr sẽn wẽnd Ninsaal Biiga,” sẽn ‘zãad ãds a yopoe ne a rɩtgo.’ A Zezi wilga a Zã yãabã võor n yeel woto: “Sã n ya ãds a yopoe wã fo sẽn yãe m dɩtg nugẽ, ne sãnem fitls a yopoe wã, ad-b võore: ãds a yopoe wã yaa m Tiginga sẽn sẽeg tẽns a yopoe wã Malɛgse, la sãnem fitls a yopoe wã makda Tiginga tẽns a yopoe wã.”—Wilgri 1:1, 10-20, Sebr Sõngo.

⁶ “Fɩtl dogends a yopoe wã” makda kiris-neb tigims hakɩkã fãa sẽn be ‘Zusoabã daar’ sẽn sɩng yʋʋmd 1914. La “ãds a yopoe wã” makda bõe? Pipi, b ra makda yel-gɛtb nins fãa sẽn da paam vʋʋsem sõng pʋgẽ dogem la a zaeebã, sẽn get pipi yʋʋm kob-gĩndẽ tigimsã yellã. * Yel-gɛtbã ra bee a Zezi nug-rɩtgo, sẽn dat n yeel t’a ra wilgd-b-la sore. N-ye, Kirist Zezi wilga tʋm-tʋmdã sẽn yaa neb sullã sore. Baasg zãnga, masã, yel-gɛtb nins sẽn zae ne vʋʋsem sõngã sõor yaa bilfu. Wãn to la Kirist taoor-sobendã tat a Zeova Kaset rãmbã tigims sõor sẽn yɩɩd 93 000 dũniyã gill zugu?

7. a) Wãn to la a Zezi tũnugd ne Siglgã taoor lʋɩtb sull n wilgd tigimsã sor dũniyã gill zugu? b) Bõe yĩng tɩ b tõe n yeel tɩ yaa vʋʋsem sõngã n yãkd kiris-neb nins sẽn yaa yel-gɛtbã?

⁷ Wala yʋʋm pipi kob-gĩndẽ wã, rũndã-rũndã, yaa rap sul bil sẽn tar zʋgd sẽn zemsã b sẽn yãk yel-gɛtb sẽn zae ne vʋʋsem sõngã sʋk n yaa Siglgã taoor lʋɩtb sulli, sẽn gomd tʋm-tʋmd sẽn tũud sɩd la sẽn tar yamã yʋʋr yĩngã. Tõnd Taoor-soabã tũnugda ne Siglgã taoor lʋɩtb sull n yãkd rap nins sẽn tar zʋgd sẽn zemsã, b paama vʋʋsem sõngã zaeeb tɩ b pa paam me, tɩ b yɩ kãsem dãmb tigimsã pʋsẽ. Rẽ wɛɛngẽ, vʋʋsem sõngã a Zeova sẽn kõ a Zezi sor t’a tũnug ne wã tʋʋmd yaa kãsenga. (Tʋʋma 2:32, 33) Pipi, yel-gɛtb kãensã segd n pidsa yɛl nins b sẽn baood tɩ be Wẽnnaam Gomdã vʋʋsem sõng sẽn vẽneg tɩ b gʋlsã pʋgẽ. (1 Tɩmote 3:1-7; Tɩt 1:5-9; 2 Pɩɛɛr 1:20, 21) Tũuda ne pʋʋsg la vʋʋsem sõngã sor-wilgri, tɩ b wilg tɩ neb zemsa ne yãkre, leb n yaa woto me yãkrã meng sasa. Sẽn paase, neb  nins b sẽn yãkã wilgda vẽeneg tɩ b womda vʋʋsem sõngã biisi. (Galat dãmba 5:22, 23) Rẽnd a Poll saglgã paka kãsem dãmbã fãa, b paama vʋʋsem sõngã zaeeb tɩ b pa paam me: “Gũus-y y mensã la bãgrã neb fãa, vʋʋsem sõngã sẽn yãk yãmb b sʋk tɩ y yɩ yel-gɛtbã.” (Tʋʋma 20:28, NW ) Ra-kãensã b sẽn yãkã paamda Siglgã taoor lʋɩtb sull sor-wilgri, la b kɩɩmd tigingã ne yamleoogo. Woto kɩtame masã tɩ Kirist be ne tõndo, la a wilgd tigingã sore.

8. Wãn to la Kirist tũnugd ne malɛk rãmbã n wilgd a karen-biisã sore?

⁸ A Zezi tũnugda ne malɛk rãmb meng-meng me n wilgd a karen-biisã sor rũndã-rũndã. Sã n yaa ne ki wã la nadensã yel-bũndi, tigisgã ra na n yɩɩ ‘zãmaanã yɛl baasg’ (NW ) sasa. Ãnd dãmb la Zusoabã ra na n tũnug ne tigisgã pʋgẽ? Kirist yeela woto: “Tigisdba yaa malɛk rãmba.” La a paase: “Ninsaal Biiga na n tʋma bãmb malɛk rãmba, la b na n wʋka bõn-lakdsa ne neb nins sẽn maand wẽnga fãa n yiis bãmb Wẽnnaam soolem pʋgẽ.” (Matɩe 13:37-41) Sẽn paase, wala malɛk sẽn wilg a Filip sor sẽn na yɩl t’a yã Etiopi balem naabã, woto kaset sẽn yaa vẽeneg bee rũndã-rũndã sẽn wilgd tɩ Kirist tũnugda ne a malɛk rãmbã n wilgd kiris-neb hakɩkã tʋʋmd sore, tɩ b yãt pʋ-peelem dãmbã.—Tʋʋma 8:26, 27; Wilgri 14:6.

9. a) Kirist tũnugda ne bõe n wilgd kiris-neb tigingã sor rũndã-rũndã? b) Yel-bʋg la d segd n gese, d sã n dat n dɩ Kirist taoor-sobendã nafa?

⁹ Ad d sɩd tara bas-m-yam, d sẽn mi t’a Zezi Kirist tũnugda ne Siglgã taoor lʋɩtb sulli, vʋʋsem sõngã la malɛk rãmbã n kõt a karen-biisã sor-wilgr rũndã-rũndã wã. Ba a Zeova balemdb kẽer sã n bak wakat bilf pʋgẽ n zãr ne Siglgã taoor lʋɩtb sull namsg b tẽebã yĩng bɩ bũmb a to yĩnga, Kirist na n ket n kõta sor-wilgr n tũnug ne vʋʋsem sõngã la malɛk  rãmbã teelgo. Baasg zãnga, yaa tõnd sẽn na n sak a zu-sobendã bal la nafd tõndo. Wãn to la d tõe n wilg tɩ d sakda Kirist taoor-sobendã?

‘Sak-y taoor-dãmba la y reeg bãmb goama’

10. Wãn to la d tõe n wilg naneb ne tigingã pʋgẽ kãsem dãmbã?

¹⁰ Tõnd Taoor-soabã kõo tigimsã “neb kũuni.” “Bãmb kõo kẽer tɩ yɩ tʋm-tʋmdba, la kẽer bãmb no-rɛɛsdba, la kẽer koe-moondba, la kẽer pe-kɩɩmba, la kẽer karen-saam dãmba.” (Efɛɛz rãmba 4:8, 11, 12) Tõnd sẽn tagsd to-to b zut la d tar manesem ning ne-bã wilgda vẽenega, tõnd sã n sakda Kirist taoor-sobendã bɩ d pa sakde. Yaa bũmb sẽn zems tɩ d ‘yɩ neb sẽn mi beoog’ ne rap sẽn tar zʋgd sẽn zems tẽebã wɛɛngẽ Kirist sẽn kõ wã. (Kolos rãmba 3:15) Leb n zemsame tɩ tõnd waoog-ba. Tʋm-tʋmd a Poll gʋlsame tɩ: “Zemsame tɩ kãsem dãmba sẽn tʋmd bãmb tʋʋmd neera paam waoogr naoor a yiib n yɩɩd neb a taabã.” (1 Tɩmote 5:17) Wãn to la d tõe n wilg d mi-beoog la d naneb ne kãsem dãmbã bɩ yel-gɛtbã sẽn be tigingã pʋgẽ wã? A Poll leokdame: “Bɩ y sak yãmb taoor dãmba la y reeg bãmb goama.” (Hebre dãmba 13:17) N-ye, d segd n sak-b lame la d reeg b goamã.

11. Bõe yĩng tɩ d sã n tall waoogr ne kãsem dãmbã, yaa bũmb sẽn wilgd tɩ d vɩɩme tɩ zems ne d lisgã?

¹¹ Tõnd Taoor-soabã zemsa zãnga, la rap nins a sẽn kõ tõndã pa zems zãng ye. Rẽ kɩtame tɩ b tõe n tudg wakat ninga. Baasg zãnga, tara yõod wʋsg tɩ d ket n sakd segls nins Kirist sẽn maana wakat fãa. Sɩda, vɩɩmd tɩ zems ne tõnd sẽn dɩk d meng n kõ Wẽnnaam n deeg lisgã rat n yeelame tɩ d sak n deeg tɩ zu-sobend sẽn tũ ne vʋʋsem sõng yãkrã tigingã pʋgẽ wã zemsame, la d sakd zu-sobend kãngã ne yamleoogo. Tõnd lisgã ‘vʋʋsem sõng yʋʋr yĩngã’ yaa togsg d sẽn maand zãma wã taoor sẽn wilgd tɩ d mii vʋʋsem sõngã la d sak n deega tʋʋmd ning a sẽn tar a Zeova raabã pʋgẽ wã. (Matɩe 28:19, NW ) Lisg a woto rat n yeelame tɩ d lagemd n tʋmda ne vʋʋsem sõngã la d pa maand bũmb ba a yembr sẽn gɩdgd a tʋʋmdã Kirist karen-biisã sʋkã ye. Sẽn mik tɩ vʋʋsem sõngã tara tʋʋmd sẽn yaa kãseng sẽn na yɩl n wilg tɩ kãsem dãmb zemsa ne yãkre, la b yãkrã pʋgẽ wã yĩnga, d sɩd tõe n yɩɩ kɩs-sɩd dãmb ne d lisgã, d sã n pa lagemd n tʋmd ne kãsem dãmbã tigingã pʋgẽ sɩda?

12. Mak-bʋs sẽn tɩ loe ne zu-sobendã paoogr la a Ziid wilgda, la bõe la b zãmsd tõndo?

¹² Gʋlsg Sõamyã tara makr wʋsg sẽn zãmsd tõnd sakr yõodo. Karen-biig a Ziid goma neb nins sẽn sãbg rap nins b sẽn yãk tigingã pʋgẽ wã yelle, n kõ makr a tãab sẽn yaa keoogr n yeele: “Bãmb na n paama toogo; tɩ bõe, bãmb tũu a Kayẽ sore, la bãmb tũu a Balaam kongra yaood yĩng ne b sũur fãa, la bãmb sãama a Koore kɩɩsga pʋgẽ.” (Ziid 11) A Kayẽ zãgsame n pa tũ saglg ning a Zeova sẽn kõ ne nonglmã, n yãk n tall kisgr sẽn baas ne nin-kʋʋre. (Sɩngre 4:4-8) Baa ne Wẽnnaam sẽn keoog a Balaam n yɩlma, a makame n na n kãab Wẽnnaam nin-buiidã wẽng ligd yĩnga. (Sõdbo 22:5-28, 32-34; Tõodo 23:6) A Koore ra pa be poorẽ Wẽnnaam nin-buiidã sʋk ye, la rẽ ra pa sek-a ye. A tusa nebã tɩ b kɩɩs Wẽnnaam sõgen a Moiizi, sẽn da yaa sik-m-meng soab n yɩɩd neba fãa tẽng zugã. (Sõdbo 12:3; 16:1-3, 32, 33) Yel-beed n wa a Kayẽ, a Balaam la a Koore zutu. Mak-kãensã sɩd zãmsda tõnd vẽeneg tɩ d segd n kelga neb nins sẽn tar taoor-sobend t’a Zeova tũnugd ne-bã, la d tall waoogr ne-ba!

13. Bark bʋs la no-rɛɛs a Ezai reng n togs neb nins sẽn sakd kãsem dãmbã yĩngã?

¹³ Ãnd n be n pa rat n dɩ zu-sobend ning d Taoor-soabã sẽn lugl kiris-neb tigingã pʋgẽ wã nafa? No-rɛɛs a Ezai reng n togsa taoor-sobend kãng barkã n yeel tɩ: “Dẽ, dĩma na n dɩɩ naam ne tɩrlem, la kom-bɛɛmba na n sooga soolma ne zemsgo. Bãmb ned kam fãa na n yɩɩ wa zĩ-lilldga sobg wakate la a wa zĩ-soalgdg sa-kẽeng wakate. Bãmb na n yɩɩ wa kʋɩls tẽn-koɛɛng pʋgẽ, la a wa kug-kãseng maasem tẽng  sẽn ka pãng pʋgẽ.” (Ezai 32:1, 2) Kãsem soab fãa ra segd n yɩɩ wa koglg la fãagr ‘zĩiga.’ Baa zu-sobendã sakr sã n yaa toog ne-do, bɩ d modg ne d sũur fãa n sak zu-sobend ning Wẽnnaam sẽn lugl tigingã pʋgẽ wã.

Kãsem dãmbã sẽn sakd Kirist taoor-sobendã to-to

14, 15. Wãn to la neb nins sẽn lʋɩt taoor tigingã pʋgẽ wã wilgd tɩ b sakda Kirist taoor-sobendã?

¹⁴ Kiris-ned fãa segd n tũu Kirist taoor-sobendã, sẽn yɩɩd fãa kãsem dãmbã. Yel-gɛtbã bɩ kãsem dãmbã tara zu-sobend tigingã pʋgẽ. La b pa baood n na n ‘soog b tẽed-n-taasã tẽeb’ n bao n soog b vɩɩmã ye. (2 Korẽnt dãmba 1:24, NW ) Kãsem dãmba tũuda a Zezi gom-kãensã: “Yãmb mi tɩ soolem toɛy-toɛya nanams maanda bãmb pãnga, la tɩ nin-kãsems soo bãmba. A kõn yɩ woto yãmb sʋk ye.” (Matɩe 20:25-27) Kãsem dãmbã sã n wa tʋmd b taoor-sobendã tʋʋmde, b modgda ne pʋ-peelem n na n sõng neb a taabã.

¹⁵ B sagenda kiris-nebã woto: “Bɩ y tẽeg yãmb taoor dãmba . . . yelle. La bɩ y tags bãmb baoosg sẽn yɩ bũmb ninga, la maan togs-n-taar ne bãmb tẽebo.” (Hebre dãmba 13:7) B pa yet tɩ y maan woto tɩ kãsem dãmbã yaa taoor-dãmb ye. A Zezi yeelame: “Ned a yen tãa n yaa taoor-soaba, yaa Kirist.” (Matɩe 23:10, Kãab-paalgã Koe-noogo) Yaa kãsem dãmbã tẽeb togs-n-taar la d segd n dɩke, bala bãmb rɩkda tõnd Taoor-soab sɩd-sɩd sẽn yaa Kiristã togs-n-taare. (1 Korẽnt dãmba 11:1) Ges-y manesem kẽer pʋsẽ kãsem dãmbã sẽn maood n na n wõneg Kirist b manesmã ne b taabã pʋgẽ.

16. Baa ne a sẽn da tar zu-sobend ningã, manesem bʋg la a Zezi tall ne a karen-biisã?

¹⁶ Baa ne a Zezi sẽn da yɩɩd ninsaalb a taabã bũmb fãa wɛɛngẽ la a ra tar zu-sobend sẽn ka to sẽn yit a Ba wã nengẽ wã, a ra tara sik-m-menga, a manesmã ne a karen-biisã pʋgẽ. A zɩ n lim a kɛlgdbã ne bãng-bɛd wilgr ye. A Zezi talla nimbãan-zoeer ne a karen-biisã, n pa yĩm tɩ b sẽn yaa ninsaalbã, b tara ratem kẽere. (Matɩe 15:32; 26:40, 41; Mark 6:31) A zɩ n kos a karen-biisã tɩ b maan b sẽn pa tõe ye, la a zɩ n zɩlg-b bũmb b sẽn pa tõe n tʋk ye. (Zã 16:12) A Zezi ra yaa “sũ-mar soaba la . . . nin-nana.” Rẽnd pa lingr la neb wʋsg sẽn paam yolsg a nengẽ wã ye.—Matɩe 11:28-30.

17. Wãn to la kãsem dãmbã segd n wilg tɩ b tara Kirist sik-m-mengã buud b manesmã ne neb a taabã tigingã pʋgẽ?

¹⁷ Kirist sẽn yaa Taoor-soaba sã n talla sik-m-mengã, sẽn yɩɩd fãa neb nins sẽn lʋɩt taoor tigingã pʋgẽ wã segd n maana woto n yɩɩda! Sɩda, b gũusdame n pa na n tʋm tɩ loog noor ne zu-sobend ning b sẽn bobl-bã ye. Sẽn paase, b pa na n “wa ne goama walla yam sẽn yɩɩd neb a taab rẽnda,” n bao yʋʋr neb a taabã taoor ye. (1 Korẽnt dãmba 2:1, 2) Sẽn yaa lebende, b modgdame n na n togs sɩd ning sẽn yit Gʋlsg Sõamyã pʋgẽ wã t’a yɩ nana, la b togs-a ne pʋ-peelem. Sẽn paase, kãsem dãmbã modgdame n na n yɩ maan tɩ zems rãmba, sã n yaa ne yɛl nins b sẽn gũud tɩ b taabã maana wɛɛngẽ, la b modgd n na n ges b ratmã yelle. (Filip rãmba 4:5) B sẽn mi tɩ ned fãa tara a kogsã yĩnga, b tara nonglem n pa yĩmd rẽ yell b manesmã ne b saam-biisã pʋgẽ ye. (1 Pɩɛɛr 4:8) Kãsem dãmb nins sẽn tar sik-m-meng la sũ-bʋgsmã sɩd pa kõt yolsg sɩda? Sɩd yaa woto.

18. A Zezi sẽn tall manesem ning ne kambã zãmsda kãsem dãmbã bõe?

¹⁸ Ra pa toog tɩ f pẽneg a Zezi n sõs ne-a ye, baa f ra yaa kɩdga. Ges-y a Zezi sẽn leok  bũmb ninga, a karen-biisã sẽn leng nebã n yeel-b tɩ b ra ‘wa ne kambã.’ A Zezi yeela woto: “Bas-y kom-bõonega tɩ b wa mam nengẽ n da gɩdg bãmb ye.” Rẽ, “bãmb talla bãmb b nugẽ n tik bãmb ne b nusi n ning b zut barka.” (Mark 10:13-16) A Zezi ra tara nonglem la a ra yaa nin-sõngo, tɩ neb a taabã ra nong a zĩigẽ. Nebã ra pa zoet a Zezi ye. Baa kambã ra nonga a zĩigẽ. Kãsem dãmbã me yaa neb b sẽn tõe n pẽneg n sõs ne nana-nana, la b sẽn tar nonglem la sõmblmã yĩnga, neb a taabã, baa kamb nonga b zĩigẽ.

19. Paam ‘Kirist tagsg’ baooda bõe maanego, la bõe modgr la rẽ baooda?

¹⁹ Kãsem dãmbã sẽn tõe n dɩk Kirist Zezi togs-n-taar tɩ ta zĩig ningã bee ne b sẽn mi-a tɩ ta zĩig ningã. “Ãnda n bãng Zusoaba [a Zeova, NW ] tagsgo n na n zãms bãmba?” Woto la a Poll sʋk-yã, la a paas tɩ: “La tõnd tara Kirist tagsgo.” (1 Korẽnt dãmba 2:16) Paam Kirist tagsg rat n yeelame tɩ d bãng a sẽn tagsd to-to la a zʋg-sõma wã fãa. Dẽ, d tõogd n bãnga a Zezi sẽn da na n maan to-to yell takɩ taoore. Tags-y n ges y sẽn da na n tõog n bãng tõnd Taoor-soabã sõma! N-ye, woto baoodame tɩ d bãng Evãnzill dãmbã sõma la d pidsd d yamã ne a Zezi vɩɩmã bãngr la a mak-sõngã wakat fãa. Kãsem dãmbã sã n modg wʋsg n tũ Kirist taoor-sobendã woto, neb nins sẽn be tigingã pʋgẽ wã na n datame n dɩk togs-n-taar ne b tẽebã n paase. La kãsem dãmbã sũy noomame, b sã n ne neb a taab sẽn tũud Taoor-soabã makr ne sũ-noogo.

Ket-y n kẽngd taoor ne Kirist taoor-sobendã sakre

20, 21. D sẽn gũud dũni paalgã b sẽn kãabã, tõnd sard dɩkr kãe-kãe segd n yɩɩ bõe?

²⁰ Kirist taoor-sobendã sakr ne tõnd fãa yaa bũmb sẽn yaa tɩlae. Tõnd sẽn pẽnegd zãmaan kãngã saabã, tõnd sẽn be zĩig ningã yaa wa Israɛll nebã sẽn da be Moaab rasempʋɩɩgẽ wã yʋʋmd 1473 S.D.T.W. B ra bee Kãabg Tẽngã noore, tɩ Wẽnnaam tũnug ne no-rɛɛs a Moiiz n yeel woto: “Yaa foom [a Zozue] n na n tall nin-kãensã n kẽ tẽng ninga Zusoab a Wẽnnaam sẽn da wẽen ne b yaab rãmbã n yeel tɩ b na n kõo bãmbã.” (Tõodo 31:7, 8) Ra ya a Zozue la taoor-soab ning Wẽnnaam sẽn yãkã. Israɛll nebã sã n da rat n kẽ Kãabg Tẽngẽ wã, b ra segd n saka a Zozue taoor-sobendã.

²¹ Biiblã yeta tõndo: “Ned a yen tãa n yaa yãmb taoor soaba, Kirist.” Yaa Kirist bal n na n tall tõnd n kẽes dũni paalgã b sẽn kãabe, tɩ tɩrlem na n zĩnd a pʋgẽ wã pʋgẽ. (2 Pɩɛɛr 3:13) Woto yĩnga, bɩ d rɩk sard kãn-kãe n sak a taoor-sobendã d vɩɩmã nens fãa pʋsẽ.

[Tẽngr note]

kãn-kãe segd n yɩɩ bõe?

• Wãn to la Kirist wilg pipi tigingã sore?

• Wãn to la Kirist wilgd a tigingã sor rũndã-rũndã?

• Bõe yĩng tɩ d segd n sak neb nins sẽn lʋɩt taoor tigingã pʋgẽ wã?

• Wãn to la kãsem dãmbã tõe n wilg tɩ Kirist yaa b Taoor-soaba?

[Zãmsgã sogsgã]

[Foto, seb-neng 15]

Kirist wilgda a tigingã sore, la a zãad yel-gɛtbã a nug rɩtgẽ

[Foto rãmba, seb-neng 16]

“Bɩ y sak yãmb taoor dãmba la y reeg bãmb goama”

[Foto, seb-neng 19]

A Zezi ra tara nonglem, a pẽnegr me yaa nana. Kiris-neb kãsem dãmbã modgdame n na n yɩ wa yẽ