D sã n maand a Zeova sẽn baood tɩ d maana, waoogd-a lame
D sã n maand a Zeova sẽn baood tɩ d maana, waoogd-a lame
‘Mam na n waooga bãmb ne bark pʋʋsgo.’—YƖƖL SÕAMYÃ 69:31.
1. a) Bõe yĩng t’a Zeova segd ne waoogre? b) Wãn to la d waoogd-a ne bark pʋʋsgo?
A ZEOVA yaa Wẽnnaam sẽn tõeyã fãa, ãndũniyã Naab sẽn ka to, la Naandã. Rẽ yĩnga, a yʋʋrã la a raabã rũndã la beoog yĩngã kɩtame t’a zems ne waoogre. Waoog a Zeova rat n yeelame tɩ d tall naneb sẽn ka to ne-a, tɩ d pẽg-a la d kils-a ne d goam la d manesem. Sẽn na yɩl n maan woto ne “bark pʋʋsgo,” rɩlla d tall mi-beoog wakat fãa ne bũmb nins a sẽn maand tõnd yĩng masã wã, la bũmb ning a sẽn na n maan n kõ-d beoog-daarã yĩnga. B wilga manesem ning d sẽn segd n tallã Wilgri 4:11 pʋgẽ. Beenẽ malɛk rãmbã sẽn be saasẽ n tar kɩs-sɩdã yetame: “Tõnd Zusoaba la tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.” Wãn to la tõnd waoogd a Zeova? Yaa d sẽn zãmsd n bãngd-a la d maand bũmb nins a sẽn baood tɩ d maana. D segd n tagsa wa yɩɩl-gʋlsdã sẽn yeel tɩ: “Bɩ y zãms maam tɩ m maan sẽn tat yãmb yam; tɩ bõe, yãmb yaa mam Wẽnnaam.”—Yɩɩl Sõamyã 143:10.
2. A Zeova manesem ne neb nins sẽn waoogd-a wã, la ne neb nins sẽn pa waoogd-a wã yaa wãn to?
2 A Zeova nanda neb nins sẽn waoogd-a wã. Yaa rẽ yĩng la a sẽn yaa ‘neb nins sẽn baood bãmba roandã.’ (Hebre dãmba 11:6) Keoorã yaa bõe? A Zezi yeela pʋʋsg a sẽn taas a saasẽ Ba wã pʋgẽ tɩ: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.” (Zã 17:3) N-ye, neb nins sẽn ‘waoogd [a Zeova] ne bark pʋʋsgã’ na n “sooga dũniyã la bãmb na n zĩnda a zug wakat sẽn-ka-sɛta.” (Yɩɩl Sõamyã 37:29) La sã n yaa ne nin-wẽnsã yẽ, b “ka tar beoog yell saagr ye.” (Yelbũna 24:20, Sebr Sõngo) Yaoolem day kãensã, yaa yãgb bũmb tɩ d pẽg a Zeova, bala ka la bilfu, a na n sãama nin-wẽnsã la a kogl nin-tɩrsã. “Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.”—1 Zã 2:17; Yelbũna 2:21, 22.
3. Bõe yĩng tɩ d segd n bao n bãng a Malaki sebrã neere?
3 A Zeova raabã bee Biiblã pʋgẽ, bala “Gʋlsg Sõamyã zãnga yaa Wẽnnaam n kõ tõndo.” (2 Tɩmote 3:16) Wẽnnaam Gomdã tara kɩbay wʋsg sẽn wilgd a Zeova sẽn ning neb nins sẽn waoogd-a wã bark to-to, la bũmb ning sẽn paam neb nins sẽn pa maand woto wã. Kɩba-kãensã a yembr tɩ loee ne bũmb nins sẽn maan Israɛll no-rɛɛs a Malaki wakatã. Yaa yʋʋmd 443 sẽn deng Kirist zãmaanã wakat sẽnẽ, a Nehemi sẽn da wa n yaa taoor lʋɩt Zida wã sasa, la a Malaki gʋls sebr ning sẽn tar a yʋʋrã. Seb-kãngã sẽn tar pãng la a be yamleoogã tara zãmsg la bãngr-goam b sẽn ‘gʋls tõnd saglg yĩnga, tõnd sẽn be dũniyã sɛɛb wakata yĩnga.’ (1 Korẽnt dãmba 10:11) D sã n bao n bãng a Malaki bãngr goamã võor n paase na n sõng-d lame tɩ d segl d mens a Zeova “daar ning sẽn sek rabeema” yĩnga, Wẽnnaam sẽn na n wa sãam zãmaan wẽng kãngã wã.—Malaki 4:5.
4. B takda tõnd yamã n sikd yɛl a yoob bʋs zut Malaki sak a 1 wã pʋgẽ?
4 Wãn to la a Malaki sebrã b sẽn gʋls sẽn yɩɩd yʋʋm 2 400 sẽn loogã sõngd tõnd yʋʋm kob-gĩnd 21 soab kãngã pʋgẽ tɩ d segl d mens a Zeova ra-kãsengã sẽn be rabeemã yĩngã? Pipi sakã takda tõnd yamã n sikd yel-kãsems a yoob zutu, sẽn na n sõng-d tɩ d waoog a Zeova ne bark pʋʋsg n paam a lohorem la vɩɩm sẽn pa satã: 1) A Zeova nonga a nin-buiidã. 2) D segd n talla naneb ne tẽebã yɛla. 3) A Zeova ratame tɩ d rɩk d sẽn tar tɩ yaa sõma n yɩɩdã n kõ-a. 4) Yaa nonglem sẽn pa baood f meng nafr n tusd Wẽnd balemdb hakɩkã, la pa laog nonglem yĩng ye. 5) Sõgeneg sẽn sakd Wẽnnaam deegr pa rok-m-zugẽ yɛl maaneg f sẽn get tɩ yaa zɩɩb ye. 6) Tõnd ned kam fãa segd n kolg n togsa Wẽnnaam taoore. Sõss a tãabã sẽn pʋgdã na n tika a Malaki sebrã zugu, la pipi sõsgã na n tika sak a 1 wã zug n vaees yel-kãensã fãa neere.
A Zeova nonga a nin-buiidã
5, 6. a) Bõe yĩng t’a Zeova ra nong a Zakoobe? b) D sã n dɩk togs-n-taar ne a Zakoob n tall a tẽebã buudu, bõe la d tõe n gẽege?
5 A Zeova nonglmã yaa vẽeneg a Malaki bãngr-gomdã pipi verse rãmb pʋsẽ. A sebrã sɩngda ne gom-kãensã: “Ad bãngr-goam Zusoaba sẽn kõ a Malaki t’a togs Israɛll nebã.” Sẽn paase, Wẽnnaam yeelame: “Mam nonga yãmba.” A Zeova rɩka makr verse kãng pʋgẽ n yeele: “Mam nonga a Zakoob.” A Zakoob yɩɩ rao sẽn tall tẽeb ne a Zeova. A Zeova wa n toeema a Zakoob yʋʋrã tɩ lebg Israɛlle, t’a lebg Israɛll buudã yaaba. Ya a Zakoob sẽn da tar tẽebã yĩng la a Zeova sẽn da nong-a wã. Israɛll neb nins sẽn tall tẽeb ne a Zeova wa a Zakoobã kɩtame t’a nong bãmb me.—Malaki 1:1, 2.
6 Tõnd sã n nong a Zeova la d lagemd ne a nin-buiidã ne kɩs-sɩda, d tõe n paama belsg ne goam nins sẽn be 1 Sãmwɛll 12:22 pʋgẽ wã: ‘Bãmb yʋ-kãsenga yĩnga Zusoaba [a Zeova] ka na n bas bãmb neba ye.’ A Zeova nonga a nin-buiidã, la a na n wa keoo-b lame n kõ-b vɩɩm sẽn pa satã. Rẽ n so tɩ b yeele: “Dell Zusoaba n maan neere. Zĩnd tẽng[ã] pʋgẽ n vɩɩnd ne laafɩ. Maan sũ-noog Zusoaba yĩnga, la bãmb na kõ foom f sẽn kot bũmb ninsã.” (Yɩɩl Sõamyã 37:3, 4) Tõnd sẽn nong a Zeova wã tɩ loee ne bũmb a yiib-n-soab b sẽn wilg tõnd Malaki sak a 1 wã pʋgẽ.
Tall-y naneb ne tẽebã yɛla
7. Bõe yĩng t’a Zeova kisg a Ezayu?
7 Wa d sẽn karemd Malaki 1:2, 3 pʋgẽ wã, a Zeova sẽn yeel tɩ “mam nonga a Zakoob[ã]” poore, a paasame tɩ: “la m kisg a Ezayu.” Bõe yĩng tɩ ra yaa woto? A Zakoob waooga a Zeova, la a kinkir-taag a Ezayu pa maan woto ye. B ra boonda a Ezayu t’a Edom me. Malaki 1:4 pʋgẽ, Edom tẽngã yʋʋr boondame tɩ wẽnem tẽngã, sẽn paase, b puka tẽngã neb bãongo. B pʋda a Ezayu yʋʋr tɩ Edom, (sẽn dat n yeel tɩ “Miuugu”), a sẽn koos a rogem pʋɩɩr sẽn tar yõodã ne a Zakoob n tek ne beng-miuugã poore. “Yaa woto t’a Ezayu geelg a rogem pʋɩɩra wa zaalem.” Woto la Sɩngre 25:34 yeta. Tʋm-tʋmd a Poll sagla a tẽed-n-taasã tɩ b gũus neere, “tɩ nin-yoodre walla ned sẽn ka sõama ra zĩnd yãmb sʋk [n pa tar naneb ne tẽebã yɛl, NW ] wa a Ezayu sẽn koos a rogem pʋɩɩr n paam dɩɩb vugr bala ye.”—Hebre dãmba 12:14-16.
8. Yaa bõe n tus a Poll t’a rɩk a Ezayu n mak ne yoaada?
8 Bõe yĩng t’a Poll rɩk a Ezayu tʋʋmã n tɩ loe ne yoobo? Bala f sã n tar a Ezayu yam-tagsgã buudu, tõe n kɩtame tɩ f pa tall naneb ne tẽebã yɛl ye. Rẽ tõe n kɩtame tɩ f maan yel-wẽn-kãsems wala yoobo. Woto yĩnga, tõnd ned kam fãa tõe n sʋka a menga: ‘Wakat ninga m dat n teka m kiris-ned rogem-pʋɩɩrã sẽn yaa vɩɩm sẽn pa satã ne wakat bilf bũmb wala beng-miuugã a Ezayu sẽn sakã bɩ? Tõe tɩ m paoogda tẽebã yɛl n pa miẽ bɩ?’ A Ezayu ra yãgdame n na n pids yĩngã ratem. A yeela a Zakoob woto: “M kota foom tɩ f n yãk bɛng miida n kõ-m [tao-tao, NW ] tɩ m wãbe.” (Sɩngre 25:30) Zu-bʋko, Wẽnnaam sõgen dãmb kẽer sɩd yeelame: “Tao-tao! Bõe yĩng tɩ m na n gũ kãadem sẽn be waoogre?” Pag ne rao lagengã ratem pidsg baa sẽn na n yɩ to-to wã n yɩ bãmb beng-miuugã.
9. Wãn to la d tõe n kell n tall a Zeova zoees sẽn naag ne waoogre?
9 Bɩ d ra tol n paoog tẽebã yɛl n pa tall naneb ne yɩ yɩlemd pag ne rao lagengã wɛɛngẽ, burkĩndlem tallg la d tẽebã rogem-pʋɩɩr ye. D ra yɩ wa a Ezayu ye, la d yɩ wa a Zakoob n kell n tall zoees sẽn naag ne waoogr ne Wẽnnaam, n tall naneb sẽn yaa kãseng ne tẽebã yɛla. Wãn to la d tõe n maan dẽ? Yaa d sẽn na n modg n tũ bũmb nins a Zeova sẽn baood tɩ d maana. Wa sẽn zemse, masã d na n goma yel-kãseng a tãab n soabã sẽn be Malaki sak a yembr pʋgẽ wã yelle. Yaa bõe?
D kõ a Zeova d sẽn tar tɩ yaa sõma n yɩɩdã
10. Wãn to la maan-kʋʋdbã ra paoogd a Zeova taablã?
10 Zida maan-kʋʋdbã sẽn da maand b tʋʋmdã Zerizalɛm a Malaki wakatã ra pa kõt a Zeova maand nins sẽn yaa sõma n yɩɩdã ye. Malaki 1:6-8 yetame: “Biig waoogda a ba, la yamb waoogda a zu-soaba. Mam sã n yaa y ba, m waoogra bee yɛ? La m sã n yaa y soaala, m zoeesa bee yɛ? Yãmb paooga maam. . . . Yaa Zusoabã [a Zeova] n yeele.” “Tõnd maana bõe n paoog yãmba?” woto la maan-kʋʋdbã sʋk-yã. “Yãmb zãa rɩ-rẽgd n kolg m tẽn-kugrã,” woto la a Zeova leok-yã. Tɩ maan-kʋʋdbã sʋk tɩ: “Tõnd maana bõe n paoog-yã?” T’a Zeova yeel-b yaa: “Yãmb gesa m taabla wa bõn-zaalga la y paoog maam.” Maan-kʋʋdb kãensã talla paoogr ne a Zeova taablã wakat buud fãa b sẽn wa ne rũng sẽn tar zang maoongã yĩng n yetẽ: “Pa wẽng ye.”—NW.
11. a) Bõe la a Zeova yeel maand nins sẽn pa sakd reegrã wɛɛngẽ? b) Bõe yĩng tɩ nin-buiidã me ra tar taale?
11 Dẽ, sẽn na yɩl n kɩt tɩ b tags tɩrga, a Zeova yeel-b lame tɩ: “Rɩk-y bũmb a woto n kõ y naab n gese, a sũur na yɩ noog ne-yã? A na sak n deeg yãmb sɩda?” Ayo, b naabã sũur pa na n yɩ noog ne kũun a woto ye, tɩ pa sʋkd Ãndũniyã Naab sẽn-ka-to wã ye. A kõn deeg kũun sẽn pa sõma ye. La ra pa maan-kʋʋdbã bal n da zems ne taalã ye. Sɩd me, b ra paoogda a Zeova yʋʋrã ne b sẽn da kõt maand kãensã buudã. La rat n yeelame tɩ nin-buiidã ra ka taal bɩ? Ayo! Ra yaa bãmb n da tũusd rũms sẽn yaa zoense, wobs la bãad dãmb n wat n kõt maan-kʋʋdbã tɩ b maan maandã. Ad sɩd yaa beegr menga!
12. Wãn to la b sõngd tõnd tɩ d rɩk d sẽn tar tɩ yaa sõma n yɩɩdã n kõ a Zeova?
12 Yaa d sẽn na n dɩk d sẽn tar tɩ yaa sõma n yɩɩdã n kõ a Zeova la d wilgd tɩ d sɩd nong-a lame. (Matɩe 22:37, 38) Sẽn yaa lebend ne a Malaki wẽndẽ maan-kʋʋdbã sẽn yaa kɩɩsdbã, rũndã-rũndã, a Zeova siglgã kõta Gʋlsg Sõamyã zãmsg sẽn sõngd tõnd tɩ d pẽg a Zeova ne bark pʋʋsgo, ne d sẽn tũud bũmb nins Wẽnnaam sẽn baood tɩ d maana. Bũmb a naas-n-soab sẽn tar yõod sẽn tɩ loe ne rẽ la d tõe n yã Malaki sak a yembrã pʋgẽ.
Nonglem sẽn pa baood a meng nafr n tusd Wẽnd balemdb hakɩkã
13. Bõe la maan-kʋʋdbã ra maand tɩ wilgdẽ tɩ yaa laog nonglem n da tusd-ba?
13 A Malaki wẽndẽ maan-kʋʋdbã ra yaa rat-m-yembr dãmba, neb sẽn ka nonglem la sẽn nong ligdi. Wãn to la d mi rẽ? Malaki 1:10 (NW ) yetame: “‘Ãnd n be yãmb sʋkã n na n pag kʋɩlensã? La yãmb kõn sak n widg m tẽn-kugrã bugum n pa reeg bũmb ye. Mam sũur pa noom ne yãmb ye,’ tãb-biis soab a Zeova n yeel woto, ‘la kũun ning sẽn yit y nugẽ wã pa be yamleoog ne-m ye.’” Bãng-y tɩ maan-kʋʋdb kãensã sẽn da nong laogã ra kota ligd baa yaa tʋʋm-kɩdg la b maan wẽn-doogẽ wã, wala rotã noy pagb la bugmã widgr tẽn-kugrã zugu! Ad pa lingr la kũun nins sẽn yit b nusẽ wã sẽn pa tall yamleoog ne a Zeova wã ye!
14. Bõe yĩng tɩ d tõe n yeel tɩ yaa nonglem n tusd a Zeova Kaset rãmbã?
14 Pĩnd wẽndẽ Israɛllã maan-kʋʋdb sẽn yaa yel-wẽn-maandbã sẽn da nong laogã la b rat-m-yembrã segd n kɩtame tɩ tõnd bãng vẽeneg tɩ sã n yaa ne Wẽnnaam Gomdã, sẽn nong-b laogã pa na n paam Wẽnnaam Rĩungã ye. (1 Korẽnt dãmba 6:9, 10, NW ) D sã n tags maan-kʋʋdb kãensã rat-m-yembr manesmã zugu, leb n kɩtdame tɩ d tall naneb n paas ne moonegã tʋʋmd a Zeova Kaset rãmbã sẽn maandã. Tõnd moonda koe-noogã ne yamleoog n pa kot ligd abada. ‘Tõnd pa rɩkd Wẽnnaam koɛɛgã n leebd n baood yõod ye,’ ayo. (2 Korẽnt dãmba 2:17, Kãab-paalgã Koe-noogo ) Wala a Polle, tõnd ned kam fãa sɩd tõe n yeela woto: “Mam moona yãmb Wẽnnaam koe-noogã ne sũ-noog n pa bao yõod ye.” (2 Korẽnt dãmba 11:7, NW ) Bãng-y t’a Poll “moona . . . koe-noogã ne sũ-noog[o].” Rẽ kɩtdame tɩ d na n gom bũmb a nu soab sẽn be Malaki sak a 1 wã pʋgẽ wã yelle.
Wẽnd baleng pa zɩɩb sẽn yaa rok-m-zugẽ bũmb ye
15, 16. a) Manesem bʋg la maan-kʋʋdbã ra tar ne maandã kũuni? b) Wãn to la a Zeova Kaset rãmbã kõt b maandã?
15 Maan-kʋʋdb nins sẽn zĩnd Zerizalɛm pĩnd wẽndẽ wã n da pa tar kɩs-sɩdã ra geta maandã kũun wa tʋʋmd sẽn yaad b sẽn maand ne rok-m-zugẽ. Ra yaa zɩɩb ne-ba. Wa b sẽn togs Malaki 1:13 pʋgẽ wã, Wẽnnaam yeel-b lame: “Yãmb yeelame: Tõnd yɛɛ ne yõ wã fãa. La yãmb pursame.” Maan-kʋʋdb kãensã pursame, sẽn dat n yeel tɩ b talla pa-nandem ne Wẽnnaam balengã yɛla. Bɩ tõnd mengã pʋʋs n da wa tol n yɩ wa bãmb ye. Sẽn yaa lebend ne bãmb bɩ d tall tagsg ning sẽn be 1 Zã 5:3 pʋgẽ wã wakat fãa: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.”
16 Bɩ d kõ Wẽnnaam tẽeb maand ne sũ-noogo, n da tol n ges rẽ wa zɩɩb sẽn yaad tõnd ye. Bɩ d tũ bãngr-gom-kãngã: “Kẽng-y [a Zeova] nengẽ n tɩ bõos sugri n yeel yaa: Yiis-y tõnd yel-wẽna, la y reeg d pʋʋsgã tɩ d na n pẽga yãmba [kõo d no-bɩmsã lol-poala, NW ].” (Oze 14:3) “D no-bɩmsã lol-poala” yaa gomd sẽn dat n yeel tɩ tẽeb maando, tõnd sẽn gomd n pẽgd a Zeova la d togsd a raabã. Hebre dãmba 13:15 yetame: “[A Zezi Kirist] maasem yĩnga, bɩ tõnd kõ Wẽnnaam maand daar fãa sẽn yaa pẽgre, sẽn dat n togse tɩ d kɩs kaset ne noor goama bãmb yʋʋra yĩnga.” Ad d sɩd tar sũ-noogo, d tẽebã maand sẽn pa rok-m-zugẽ bũmbu, la yaa tõnd nonglmã ne Wẽnnaam d sẽn wilgd ne d sũy fãa wã yĩnga! Masã, bɩ d gom bũmb a yoob-n-soab sẽn be Malaki sak a 1 pʋgẽ wã yelle.
Ned kam fãa segd n kolg n togsa Wẽnnaam
17, 18. a) Bõe yĩng t’a Zeova kãab “zãmb” soabã wẽnga? b) Bõe yell la neb nins sẽn tall zãmbã pa tagse?
17 Ned ning fãa sẽn da vɩ a Malaki wẽndẽ wã ra tara kolg-n-togs ne a tʋʋma, la yaa woto ne tõnd me. (Rom dãmba 14:12; Galat dãmba 6:5) Wa sẽn zems ne rẽ, Malaki 1:14 yetame: “Zãmb dãmb nins sẽn mi n dɩk pe-raoog [sẽn pa tar zang] n pʋlem maam n yaool n dɩk rũng a to sẽn tar zang n dondẽ wã na n paama toogo.” Ned ning fãa sẽn da tar rũm-bãgr pa tõe n yeel tɩ yaa rũm-yɛnga, wala makre pe-yɛng la a tara, t’a pa tar a sẽn na n yãk a soab ye. Rẽnd a sã n wa yãkd rũng n na n maan maoongo, pa tɩlae ne-a t’a yãk rũng sẽn yaa zoanga, woabga, bɩ bãad ye. A sã n da yãk rũng sẽn pa sõma woto, rẽ ra wilgdame t’a paooga maoongã a Zeova sẽn yeel tɩ b maana, bala ned sẽn da tar bãgr sɩd ra pa kongd rũms sẽn ka zang a rũmsã sʋk ye!
18 Rẽnd a Zeova bee bʋʋm la a sẽn kãab ‘zãmb soab’ wẽngã, a sẽn bas a rũm-sõmsã yãkr n yãk rũng sẽn yaa zoanga, woabg bɩ bãadã.Tõe t’a tɛ-a-la ne pãng n tɩ kõ maan-kʋʋdã t’a maan maoongã. La b pa wilg zĩig ba a yembr meng tɩ maan-kʋʋdbã tika Tõogã n wilg tɩ rũms sẽn tar zams woto ra pa bũmb sẽn sakd ye. (Maankʋʋre 22:17-20.) Neb nins sẽn da tagsd tɩrgã fãa ra segd n bãngame tɩ yaa wẽng wʋsgo, b sã n da makẽ n tall kũun a woto n tɩ kõ b naabã. La sɩd-sɩda, b sẽn da be a Soab ning taoorã ra yaa Ãndũniyã Naab sẽn-ka-to soab a Zeova, sẽn yaa kãseng n yɩɩd naab buud fãa zĩig sẽn zãrã. Malaki 1:14 togsa rẽ woto: “‘Mam yaa rĩm-kãsenga tɩ buud a taab zoet mam yʋʋre.’ Yaa Saasẽ-pãng-soabã n yeele.”
19. Bõe la d gũud ne yãgbo, la bõe la d segd n maandẽ?
19 D sẽn yaa Wẽnnaam sõgen dãmb sẽn tar kɩs-sɩdã, d gũuda daar ning ãdem-biisã fãa sẽn na n pẽg Rĩm Kãseng a Zeova ne waoogr kãsenga. Rẽ wẽnde, “dũniyã na n pida ne Zusoaba [a Zeova] bãngr wa koom sẽn pid mogre.” (Ezai 11:9) La nananda bɩ d modg n maand bũmb nins Wẽnnaam sẽn baood tɩ d maana, n dɩk yɩɩl gʋlsdã togs-n-taar n yeel woto: ‘Mam na n waooga bãmb ne bark pʋʋsgo.’ (Yɩɩl Sõamyã 69:31) Sẽn na yɩl n tõog n maan woto, a Malaki bãngr-gomdã tara sagls a taab sẽn tõe n naf-d wʋsgo. Sõss a yiibã sẽn pʋgdã pʋsẽ, bɩ d vaees a Malaki sebrã babs a taabã neere.
Yãmb tẽrame bɩ?
• Bõe yĩng tɩ d segd n waoog a Zeova?
• Bõe yĩng t’a Malaki wakatẽ maan-kʋʋdbã maand ra pa sakd a Zeova reegre?
• Wãn to la d kõt a Zeova pẽgr maando?
• Bõe n da segd n tus Wẽnd balemdb hakɩkã?
[Zãmsgã sogsgã]
[Foto, seb-neng 18]
A Malaki bãngr-gomdã goma tõnd wakatã yelle
[Foto, seb-neng 19]
A Ezayu pa tall naneb ne tẽebã yɛl ye
[Foto, seb-neng 20]
Maan-kʋʋdbã la nin-buiidã kõo maand sẽn pa sakd reegre
[Foto, seb-neng 21]
Dũniyã gill zugu, a Zeova Kaset rãmbã kõta pẽgr maand n pa kot ligd ye