Karemdbã sʋgsgo

Yaa sõma ne kiris-ned hakɩk t’a kẽng egiliizẽ kũum mees bɩ kãadem yĩng bɩ?

Tõnd sã n kẽes d toog ziri tũudmã yɛlẽ baa bilfu, yaa bũmb sẽn pa tat a Zeova yam, tɩ d segd n lak d mens ne rẽ. (2 Korẽnt dãmba 6:14-17; Wilgri 18:4) Kũum mees b sẽn maand egiliizẽ yaa tũudum yɛl maaneg sẽn tik tagsa sẽn kɩɩsd Gʋlsg Sõamyã wala sɩɩg pa kiidã la tɩ b na n dola nin-sõma wã fãa n kẽng ne-b saasẽ. Pik makrã, la naag n maan pʋʋsg ne prɛtr bɩ pastɛɛr bee manesem kãensã buudã sʋka. Pʋʋsg la tũudum yɛl a taab sẽn yaa lebend ne Biiblã goamã tõeeme me n zĩnd kãadem kõom b sẽn maand egiliizẽ bɩ zĩig a to. Kiris-ned sã n be neb sull sẽn kẽesd b mens ziri tũudmã manesem pʋgẽ, tõe n yɩɩ toog ne-a t’a yals kãn-kãe n da naag a meng b yel-maandɩ wã pʋgẽ ye. Ad sɩd pa yam tʋʋmd ne-d tɩ d ning d meng yell a woto buud pʋgẽ ye!

Yaa wãn to, kiris-ned sã n tagsdẽ tɩ yaa tɩlae ne-a t’a kẽng kũum mees bɩ kãadem egiliizẽ? Wala makre, sɩd sẽn pa a Zeova Kaset soab tõe n yeela a pagã sẽn yaa kiris-nedã t’a wa yãag-a beenẽ. Rẽ yĩnga, a pagã tõe n yãag-a lame n kẽng be n pa naag b yɛlã maaneg pʋgẽ bɩ? Pagã tõeeme n pa rat n kɩɩs a sɩdã raabo, n yãk yam t’a na n kẽnga be ne-a, n ning a yamẽ wã t’a pa na n naag n maan tũudmã yɛl ba a yembr ye. A leb n tõeeme me n yãk yam n pa kẽnge, n tags tɩ yɛla sẽn yaa to-to wã na n talla pãng a zug tɩ looge, n wa kɩt t’a kɩɩs Wẽnnaam noyã. Yaa pagã n na n yãk a sẽn na n maaneg yel-kãngã pʋgẽ. A segdame n bãng a sẽn sɩd rat bũmb ning a sũurã pʋgẽ, n tall sũur kaset sẽn yaa yɩlemde.—1 Tɩmote 1:19.

Sẽn ya a soab fãa, na n yɩɩ sõma t’a wilg a sɩdã t’a sũur-kasetã pa kõt-a sor t’a kẽes a meng tũudmã yɛl baa bilf pʋgẽ, n naag n yɩɩle, bɩ a sulg a zug pʋʋsgã wakat ye. A pagã sã n wilg woto, tõeeme t’a sɩdã wa tags t’a pagã sã n yãag-a tõe n waa ne yãnd buud n kõ-a. A tõeeme n yãk yam n kẽng a yembre, a sẽn nong a pagã yĩnga, a sẽn tar waoogr ne a pagã tẽebã yĩnga, bɩ a sẽn pa rat yãndã yĩnga. La a sɩdã sã n pẽdgdẽ t’a yãag-a, tõeeme t’a pagã yãag-a n pa kẽes a meng tũudmã yɛlẽ ye.

Bũmb d sẽn pa segd n yĩm yaa tõnd kẽngrã egiliizã tũudum yel-maandɩ pʋgẽ sẽn tõe n tall pãn-tusdg ning tẽed-n-taas a taab zutã. Rẽ tõe n namsa neb kẽer sũur-kaset bɩ? Rẽ na n kɩtame tɩ b ye paam pãng n lak b mens ne bõn-naands pʋʋsg bɩ? Tʋm-tʋmd a Poll kõo sagl-kãngã: “Tɩ yãmb bãng bũmb nins sẽn yaa sõama n yɩɩda, la tɩ Kirist daare yãmb na zĩnd pʋ-peelem n yɩ neb sẽn ka tar yell [“la y ra kɩt tɩ neb a taab lʋɩ,” NW ] ye.”—Filip rãmba 1:10.

Rog-pẽts sã n be be, b tõe n talla pãng f zug n paase. Sẽn yaa to-to fãa, kiris-ned segd n gũusame n ges yɛl nins fãa sẽn tɩ loe ne manesem kãngã wã. Yɛl kẽer pʋsẽ, sɩdã bɩ pagã tõe n wa tagsame t’a sã n kẽng egiliizẽ kũum mees bɩ kãadem yĩng n pa naag tũudmã yɛlẽ, yell pa na n zĩnd ye. Baasg zãnga, yɛlã tõe n kɩtame t’a sã n kẽnge, wẽng ning a sẽn na n maan a mengã sũur kasetã bɩ neb a taabã sũur kasetã yɩɩg a be kẽngrã nafa. Sẽn yaa to-to fãa, kiris-ned segdame n sɩd bãng t’a sẽn yãk n na n maan bũmb ningã pa na n gɩdg-a t’a pa tall sũur kaset sẽn yaa yɩlemd Wẽnnaam la nebã taoor ye.