Maan-y sũ-noog a Zeova tɩrlmã yĩnga

“Ned sã n baood tɩrlem ne sõmblem, a paamda vɩɩm ne tɩrlem la waoogre.”—YELBŨNA 21:21.

1. Nebã manesem bʋs n wa ne yel-beedo?

“SOR n be tɩ neb get-a wa so-tɩrga, la a yaool n dabda kũum zĩigẽ.” (Yelbũna 16:25) Ad Biiblã yel-bũn-kãngã sɩd bilgda neb wʋsg manesem sẽn yaa to-to rũndã-rũndã hal tɩ zems kɛpɩ! Naoor wʋsgo, nebã nong n maanda sẽn yaa tɩrg b mens ninẽ bala, tɩ b toor kae ne neb a taabã bõn-datem kãsems ye. (Yelbũna 21:2) B yetame tɩ b tũuda tẽngã laloa la a noyã, la b sã n paam sor fãa la b sẽn baood n na n gil-ba. Rẽ wat n baasa ne zãmaan neb sẽn be welgr la yam-yuusg pʋgẽ.—2 Tɩmote 3:1-5.

2. Bõe la d rat ne yãgbo, ãdem-biisã neer yĩnga?

² Tõnd meng neer yĩng la ãdem-biisã laafɩ la b bãan yĩnga, ne yãgbo d rata noy sẽn zems la sẽn yaa tɩrse, nebã fãa sẽn na n sak la b tũ. Vẽenega, noor ka be ninsaal sẽn na n yiisi, ba a soabã yam la a pʋ-peelem sẽn sõs n yaa to-to, sẽn tõe n pids raab kãngã ye. (Zeremi 10:23; Rom dãmba 3:10, 23) Noor a woto sã n beẽ, yɛ la b tõe n yã-a, la bõe la a segd n wõnege? Tõe tɩ sʋkr ning sẽn tar-a yõod n yɩɩdã yaa: Noor a woto sã n beẽ, yãmb na n maana sũ-noog ne-a la y sak n tũ-a tɩ goam kaẽ bɩ?

D sẽn tõe n yã no-tɩrsã to-to

3. Ãnd soab n tar tõog n yɩɩd n tõe n kõ noy sẽn sakd reegr la sẽn nafd nebã fãa, la bõe yĩnga?

³ Sẽn na yɩl n yã noy sẽn sakd reegr la sẽn be nafr ne nebã fãa, rẽnda d bao ned sẽn pa basd tɩ nebã yĩng kõbgo, buud bɩ politikã yɩ gɩdgr ne-a sõngre, la tɩ ninsaal yam sẽn pa ne yɩɩgã la a pãn-komslmã pa yɩ gɩdgr ne-a me ye. Sãmbg sẽn ka be, a soab ning bal sẽn tar tõog kãng yaa Naand sẽn-tõeyã-fãa soabã, sẽn yaa Wẽnnaam a Zeova wã, sẽn yet woto wã:  “Wa yĩngr zãntlem sẽn yɩɩda dũniyã, woto me, mam soɛya yɩɩda yãmb soɛyã la mam tagsa yɩɩda yãmb tagsã.” (Ezai 55:9) Sẽn paase, Biiblã bilgda a Zeova wa “Wẽnnaam sẽn maand sɩda n ka maand wẽng ye. Bãmb yaa sõngo la tɩrga.” (Tõodo 32:4) Biiblã fãa pʋgẽ, d yãta gomd ning sẽn yaa “Zusoaba yaa tɩrga.” (Yikri 9:27; 2 Kɩbaya 12:6; Yɩɩl Sõamyã 11:7; 129:4; Wiisgu 1:18) N-ye, d tõe n paama noy nins sẽn yaa sõma n yɩɩdã a Zeova nengẽ, a sẽn yaa kɩs-sɩd soab la tɩrgã yĩnga.

4. Gom-biig ning sẽn yaa tɩrlem soab võor yaa bõe?

⁴ Neb wʋsg ka nong neb nins sẽn tagsd tɩ b yaa tɩrs bɩ sõms n yɩɩd b taabã, bɩ b paoogd nin-kãens menga. Baasg zãnga, sã n yaa ne Biiblã tɩrlem soab yaa ned sẽn yaa tɩrga, burkĩna, zʋg-sõng soaba, sẽn ka tar taale, sẽn ka maand yel-wẽnde, sẽn tũud Wẽnnaam noyã bɩ vɩɩm manesem noy sẽn segde, n maand sẽn yaa tɩrga. Rẽ yĩnga yãmb kõn maan sũ-noog ne tõog bɩ noor võor sẽn tagem woto sɩda?

5. Wilg-y b sẽn bilg tɩrlmã võor to-to Biiblã pʋgẽ.

⁵ Sebr a yembr (Encyclopaedia Judaica) yeela woto tɩrlmã wɛɛngẽ: “Tɩrlmã ka bũmb sẽn be ned yamẽ bal ye, la yaa maan sẽn yaa tɩrg la sẽn zems f manesmã ne neb a taabã fãa pʋgẽ.” Wala makre, Wẽnnaam tɩrlmã ka zʋg a sẽn tar bala, wa a sẽn yaa sõng la a yaa yɩlemdã ye. Sẽn yaa lebend ne rẽ, ya a mengã halhaal pukr manesem tɩrs pʋsẽ. B tõe n yeelame t’a Zeova sẽn yaa sõng la a yaa yɩlemdã yĩngã, bũmb ning fãa a sẽn maand la bũmb ning fãa sẽn yit a nengẽ yaa tɩrga. Wa Biiblã sẽn yeelã, “[A Zeova, NW ] manesem fãa yaa tɩrga la bãmb tʋʋma fãa bee nonglem.”—Yɩɩl Sõamyã 145:17.

6. Bõe la a Poll yeel yẽ wakatẽ Zʋɩf rãmb kẽer sẽn ka tẽed wɛɛngẽ, la bõe yĩng t’a yeel woto?

⁶ A Poll lɛtr ning a sẽn tool Rom kiris-nebã pʋgẽ, a gom n tadga yel-kãngã zugu. A gʋlsa Zʋɩf rãmb kẽer sẽn ka tẽed wɛɛngẽ woto: “Bãmb ka mi Wẽnnaam tɩrlem ye. Bãmb baoodame n dat n wilg bãmb mens tɩrlem, la bãmb ka sakd Wẽnnaam tɩrlem ye.” (Rom dãmba 10:3) Bõe yĩng t’a Poll gom nin-kãensã yell n yeel tɩ b “ka mi Wẽnnaam tɩrlem”? Rẽ yĩnga b ra ka neb sẽn zãms Tõogã sẽn yaa Wẽnnaam no-tɩrsã la? Yaa sɩd tɩ b ra zãmsame. La bãmb wʋsg ra geta tɩrlmã wala zʋg-sõngo, b sẽn tõe n paam tũudum noy tũub ne modgr wʋsg pʋgẽ, lakae pa noy sẽn wilgd-b sor b manesmã ne b taabã pʋgẽ ye. Wala a Zezi wakatẽ tũudum taoor dãmbã, b ka wʋm tɩrlmã võor baa bilfu.—Matɩe 23:23-28.

7. Wãn to la a Zeova tɩrlmã pukda?

⁷ Sẽn yaa lebend fas ne bãmba, a Zeova tɩrlmã pukda vẽeneg a tʋʋma fãa pʋsẽ. Baa ne a tɩrlmã sẽn baood t’a ra mum a nin yel-wẽn neb sẽn maand ne yamleoogã taoorã, tɩrlmã ka leb n kɩtd me tɩ Wẽnnaam yaa toog kae soaba, n modgd tɩ b tũ a noyã, n baoodẽ tɩ b zoe-a la b zãag ne-a ye. Sẽn yaa lebend ne rẽ, a tɩrlem tʋʋma kõo tikr tɩ ãdem-biisã tõe n kolg-a n paam tɩ b fãag-b ne yel-wẽndã bi-wẽnse. Dẽnd sɩd zemsame t’a Zeova bilg a meng wa ‘Wẽnnaam sẽn yaa tɩrga, la fãagda.’—Ezai 45:21.

Loees nins sẽn be tɩrlmã la fãagrã sʋka

8, 9. Wãn-wãn to la Wẽnnaam tɩrlmã puk Tõogã pʋgẽ?

⁸ Sẽn na yɩl n bãng loees ning sẽn be Wẽnnaam tɩrlmã la a fãagrã sẽn yaa nonglem tʋʋmdã sʋka, bɩ d ges Tõogã a sẽn tũnug ne a Moiiz n kõ Israɛll buudã sẽn yet bũmb ninga. Yaa vẽeneg tɩ Tõogã ra yaa tɩrga. A Moiiz yaoolem goamã pʋgẽ, a tẽega Israɛll nebã woto: “Buud ka be n tar tõod ne minund sẽn yaa tɩrs wa mam sẽn kõ yãmb dũnda wã ye.” (Tõodo 4:8) Yʋʋm kobs loogr poore, Israɛll Rĩm a Davɩɩd yeelame: “[A Zeova, NW ] bʋʋd kaoob yaa sɩda la tɩrg bala.”—Yɩɩl Sõamyã 19:10 .

 ⁹ A Zeova tũnuga ne Tõogã n wilg a noyã sẽn zems zãngã, sẽn wilgd sẽn yaa sõma la sẽn yaa wẽngã. Tõogã togsa yɛl wʋsg sẽn wilgd Israɛll nebã sẽn da segd n zã b mens to-to tũudmã yɛl wɛɛngẽ. La ka tek rẽ bal ye, a ra leb n wilga b sẽn segd n zã b mens to-to tolengã, kãadmã, rɩɩbã, laafɩ wã, la bʋ-kaoorã yɛl wɛɛngẽ me. Tõogã ra tara sɩbgr sẽn ka vigsd kɩɩsdbã yĩnga, tɩ wakat kẽer mengã sɩbg-kãngã yaa kũum. * La rẽ yĩnga Wẽnnaam no-tɩrsã sẽn pukd Tõogã pʋgẽ wã ra yaa toog wʋsg tɩ looge, sẽn yaa zɩɩb sẽn zɩs n kõ nin-buiidã, hal tɩ rẽ yiisd b sũ-noogã la kɩt tɩ b ka tõe n yãk yam n maan b sẽn data, wa neb kẽer sẽn yet rũndã-rũndã wã bɩ?

10. Neb nins sẽn nong a Zeova wã tagsg yaa wãn-wãn ne a tõogã?

¹⁰ Neb nins sẽn nong a Zeova wã maana sũ-noog kãseng ne a no-tɩrsã. Wala makre, a Davɩɩd ka sak t’a Zeova bʋ-kaoorã yaa sɩd la tɩrs bal ye, wa d sẽn yã wã, a ra leb n talla nonglem wʋsg ne-ba, la a tall mi-beoog no-kãens yĩnga. A gʋlsa woto a Zeova tõodã la a bʋ-kaoorã wɛɛngẽ: “Bãmb zemsa baoob n yɩɩd sãnem, a yɩɩd sãnem halaale. Bãmb yaa nood n yɩɩd sɩɩdo, b yɩɩda sɩɩd sẽn yit sɩ-vak n tosdẽ. N-ye, yãmb tõoda sagenda y tʋm-tʋmdã. Bãmb sakr tara yõod wʋsgo.”—Yɩɩl Sõamyã 19:8, 11, 12.

11. Wãn to la Tõogã yɩ wa ‘karen-saamba sẽn tall [neba] n wa Kirist nengẽ’?

¹¹ Yʋʋm kobs loogr poore, tʋm-tʋmd a Poll wilga Tõogã yõod ning sẽn yaa kãseng n yɩɩdã menga. A gʋlsa a lɛtr ning a sẽn tool Galat dãmbã pʋgẽ woto: “Tõog yaa wa karen-saamba n na n tall tõnd n wa Kirist nengẽ tɩ tõnd tõe n zems tẽeb yĩnga.” (Galat dãmba 3:24) A Poll wakatẽ wã, b sẽn da boond tɩ karen-saamba ra yaa zag-kãseng sõgen bɩ yamba. Ra yaa yẽ n segd n kogl kambã la a yãag-b karengã zĩigẽ. Woto me, Tõogã ra kogenda Israɛll nebã ne tẽn-yagsã vɩɩm manesem la b tũudum tʋʋm yoodã. (Tõodo 18:9-13; Galat dãmba 3:23) Sẽn paase, Tõogã ra kɩtame tɩ Israɛll nebã bãng tɩ b yaa yel-wẽn-maandb sẽn baood sugr la fãagre. (Galat dãmba 3:19, Kãab-paalgã Koe-noogo) Maoong toɛy-toɛyã b sẽn da maandã wilgdame tɩ maoong sẽn na n wa yɩ rond yaa tɩlae, la leb n deng n wilgd yɛl sẽn na n wa sõng-b tɩ b bãng Mesi hakɩkã n bake. (Hebre dãmba 10:1, 11, 12) Dẽ, ba a Zeova sẽn tũnug ne Tõogã n wilg a tɩrlmã, a maana rẽ neba neere, la b fãagr wakat sẽn-kõn-sa yĩnga.

Neb nins Wẽnnaam sẽn get tɩ b yaa tɩrsã

12. Israɛll nebã sã n da tũ Tõogã bõe la b ra tõe n paamẽ?

¹² Tõogã a Zeova sẽn kõ wã sẽn da yaa tɩrgã yĩngã, Israɛll neba sã n da sak-a b ra tõe n yɩɩ tɩrs Wẽnnaam nifẽ. Israɛll neba sẽn da segend n na n kẽ Kãabg Tẽngẽ wã, a Moiiz  tẽeg-b-la woto: “Tõnd sã n gũus d mens n sak tõod kãensa fãa wa bãmb sẽn yeel tõndã, bãmb na n gesa tõnd wa nin-tɩrse.” (Tõodo 6:25) Sẽn paase, a Zeova ra kãaba woto: “Bɩ y sak mam tõoda ne m noorã. Ned sã n sak bãmba, a na n vɩɩmda ne bãmba. Mam ya [a Zeova, NW ].”—Maankʋʋre 18:5; Rom dãmba 10:5.

13. A Zeova sẽn da baood t’a nin-buiidã tũ a Tõogã sẽn yaa tɩrgã, a maana sẽn ka zems bɩ? Wilg-y y leokrã võore.

¹³ Zu-bʋko, Israɛll buudã ka “sak tõod kãensa fãa” a Zeova taoor ye, tɩ woto kɩt tɩ b kong bark nins b sẽn da kãabã. B ka tõog n tũ Wẽnnaam noyã fãa ye, bala Wẽnnaam Tõogã zemsa zãng tɩ bãmb yaool n da pa zems zãng ye. Woto rat n yeelame tɩ Wẽnnaam pa tɩrga, bɩ t’a maanda yɛla kɛgr bɩ? Yaa vẽeneg tɩ ka woto ye. A Poll gʋlsame: “Dẽ, tõnd na n yeelame tɩ bõe? Wẽnnaam maanda sẽn ka neer bɩ? Ayo, ka woto ye.” (Rom dãmba 9:14) D sẽn mi yaa tɩ sẽn deng Tõoga kũun la a poore, neb la Wẽnnaam ges wa nin-tɩrse, baa b sẽn da pa zems zãng n yaa yel-wẽn maandbã. A Nowe, a Abrahaam, a Zoob, a Rahaab, ne a Daniɛll zĩnda wẽn-zoɛtb a woto sʋka. (Sɩngre 7:1; 15:6; Zoob 1:1; Ezekɩɛll 14:14; Zak 2:25) Dẽ masã sʋkrã la woto: Wẽnnaam tika bõe zug n ges nin-kãensã wa nin-tɩrse?

14. Biiblã sã n yeel tɩ ninsaal yaa “tɩrga,” rat n yeelame tɩ bõe?

¹⁴ Biiblã sã n yeel tɩ ninsaal yaa “tɩrga,” ka rat n yeel t’a pa tar yel-wẽnd bɩ t’a zemsa zãng ye. Ayo, rat n yeelame t’a maana bũmb nins a sẽn segd n maan Wẽnnaam la ninsaalbã taoorã. Wala makre, b boola a Nowe tɩ “nin-tɩrga,” la ned “sẽn ka tar yell a zamaan neba sʋk[a],” bala “bũmb nins fãa Wẽnnaam sẽn yeel yẽ t’a maana, yẽ maaname.” (Sɩngre 6:9, 22; Malaki 3:18) Lisd a Zã roagdb a Zakari ne a Elizabɛt ra “yaa nin-tɩrs Wẽnnaam taoore, bãmb saka Zusoaba noora ne b tõoga fãa tɩ ned ka tõe n dõd-b ye.” (Luk 1:6) Sẽn paase, b bilga Itali sodaas naab yʋʋr sẽn boond t’a Korney, sẽn ka Israɛll neda, n yeel t’a “yaa nin-tɩrga la a zoet Wẽnnaam”—Tʋʋma 10:22.

15. Tɩrlmã tɩ loee wʋsg ne bõe?

¹⁵ Sẽn paase, b sã n yet tɩ ninsaal tara tɩrlem, tɩ loee wʋsg ne bũmb ning sẽn be a sũurẽ wã, sẽn yaa tẽebo, mi-beoog la nonglem ning a sẽn tar ne a Zeova la ne a kãabsã, la ka a sẽn maand Wẽnnaam sẽn baood t’a maanã bal ye. Gʋlsg Sõamyã yeelame t’a Abrahaam “tẽe Zusoabã, la bãmb geelga yõ wã wa tɩrlem yẽ yĩnga.” (Sɩngre  15:6) A Abrahaam ra ka tẽed tɩ Wẽnnaam beeme bal ye, a ra leb n tẽeda Wẽnnaam sẽn kãab tɩ ‘yageng’ n na n wa wã. (Sɩngre 3:15; 12:2; 15:5; 22:18) A Zeova tika tẽeb la tʋʋm sẽn zems ne tẽeb a woto zutu, n tõog n tall zems-n-taar ne a Abrahaam la ne kɩs-sɩd dãmb a taab la a bark-ba, baa b sẽn da yaa neb sẽn ka zems zãngã.—Yɩɩl Sõamyã 36:11; Rom dãmba 4:20-22.

16. Tẽeb tallg ne rondã waa ne bõe?

¹⁶ Sẽn na n baase, ninsaal yɩl n yɩ tɩrgã bee ne a sã n tẽeda a Zezi maoongã sẽn yɩ rondã. A Poll gʋlsa pipi kiris-nebã wɛɛngẽ woto: “B sã n le paam [tɩ Wẽnnaam yeel tɩ b yaa tɩrse, NW ] tũu ne Wẽnd yamleoog la Kirista maoonga yõodo.” (Rom dãmba 3:24, Sebr Sõngo) A Poll ra gomda neb nins b sẽn yãk tɩ b na n tɩ naag Kiristã n dɩ naam saasẽ Rĩungã pʋgẽ wã yelle. La a Zezi maoongã leb n paka sor tɩ neb a taab sõor sẽn ta milyõ rãmb tõe n paam n yɩ tɩrs Wẽnnaam nifẽ. Yãab pʋgẽ, tʋm-tʋmd a Zã yãame tɩ “kʋʋng [kãseng, NW ] n be be tɩ ned ka tõe n sõd n sɛ ye, . . . Bãmb yalsa geera ne Pebila taoore, la bãmb yera fu-peelse.” Fu-peelsã makda b sẽn yaa yɩlem la tɩrs Wẽnnaam taoorã, bala “bãmb peka b fut tɩ lebg peelse ne Pebila zɩɩm.”—Wilgri 7:9, 14.

Maan-y sũ-noog a Zeova tɩrlmã yĩnga

17. Tɩrlmã baoob pʋgẽ, bõe ne bõe la d tog n maane?

¹⁷ Ba a Zeova sẽn kõ a Biribl a Zezi Kirist ne nonglem, tɩ ninsaalbã tõe n tũnug ne yẽ n paam n yɩ tɩrs Wẽnnaam taoorã, b ka lebgd tɩrs woto bal ye. Nedã tog n talla tẽeb ne a Zezi maoongã, n maneg a vɩɩmã t’a zems ne Wẽnnaam daabã, n dɩk a meng n kõ a Zeova, la a wilg rẽ ne koom lisg reegre. Rẽ poore, nedã tog n ket n baooda tɩrlem, ne tẽeb zʋg-sõma a taab tallgo. A Poll sagla a Tɩmote, sẽn da yaa kiris-ned sẽn deeg lisg n paam saasẽ boollã woto: “Bao tɩrlem ne Wẽnnaam sakre la tẽeb ne nonglem la sũ-mar ne sũ-bʋgsem.” (1 Tɩmote 6:11; 2 Tɩmote 2:22) A Zezi me leb n wilga vẽeneg tɩ d segd n ket n maanda modgre, a sẽn yeel tɩ: “Bɩ y reng n [ket n baood, NW ] Wẽnnaam soolem ne bãmb tɩrlem.” Tõeeme tɩ d tʋmda wʋsg n baood Wẽnnaam Rĩungã barka, la rẽ yĩnga d leb n modgda wʋsg n tũud a Zeova so-tɩrsã bɩ?—Matɩe 6:33.

18. a) Bõe yĩng tɩ tɩrlmã baoob ka nana? b) Bõe la a Lot makrã zãmsd tõndo?

¹⁸ Yaa vẽeneg tɩ tɩrlem baoob ka nana ye. Rẽ yaa tõnd fãa sẽn pa zems zãng n tar tʋʋm-kɛg maaneg tʋlsmã yĩnga. (Ezai 64:5) Sẽn paase, tõnd vɩɩ neb toog sẽn kae ne a Zeova so-tɩrsã sʋka. Tõnd yɛlã sẽn yaa to-to wã yaa wala a Lot rẽndã. Yẽ ra vɩɩ Sodom, sẽn da yaa galʋ-tẽng t’a neba yaa wẽns wʋsgã pʋgẽ. Tʋm-tʋmd a Pɩɛɛr wilga bũmb ning sẽn kɩt t’a Zeova ra ges tɩ zemsame t’a fãag a Lot ne galʋ-tẽngã sãoongã sẽn da kolgdã. A Pɩɛɛr yeelame: “Nin-tɩrg kãnga sẽn da be bãmb sʋka n yãtẽ la a wʋmd bãmb tʋʋm wẽnsã, yẽ sũur da sãamda daar fãa.” (2 Pɩɛɛr 2:7, 8) Dẽ, tõnd ned kam fãa segd n sʋka a meng woto: ‘Mam sakda yoobã yɛl mam sẽn ne tɩ nebã maandẽ wã m sũurẽ bɩ? Mam geta nen-kɛglem reemã bɩ ɛspoorã neb wʋsg sẽn nongã wa bõn-yood sẽn ka tar yamleoog bal bɩ? Bɩ wala a Lote, tʋʋm-kãensã sẽn ka tɩrsã sãamda m sũuri?’

19. D sã n maand sũ-noog Wẽnnaam tɩrlmã yĩnga, bark bʋs la d tõe n paame?

¹⁹ Tõnd wakatã sẽn yaa wẽng wakat tɩ  d ka mi yɛlã sẽn na n yɩ to-to wã, sũ-noog maaneg a Zeova tɩrlmã yĩng wata ne bãan la koglgo. Sʋkr ning sẽn yaa: ‘[Zeova], ãnda n na n sig yãmb zãndẽ? Ãnda n na n pa yãmb tãn-sõnga zugã?’ Rĩm a Davɩɩd leokame tɩ: “Yaa ned ninga sẽn kẽnd ne pʋ-peelem la a maand tɩrga.” (Yɩɩl Sõamyã 15:1, 2) D sã n baood Wẽnnaam tɩrlmã la d maand sũ-noog a yĩnga, d tõe n kell n talla zems-n-taar ne-a la d ket n paamd a lohorem la a barka. Dẽ, d vɩɩmã na n yɩɩ sũ-noog la meng waoogr vɩɩm, tɩ d yama gãe bãane. Wẽnnaam Gomdã yeelame: “Ned sã n baood tɩrlem ne sõmblem, a paamda vɩɩm ne tɩrlem la waoogre.” (Yelbũna 21:21) Sẽn paase, d sã n maan d sẽn tõe fãa n maand sẽn yaa tɩrg d tʋʋma fãa pʋsẽ, d paamda zems-n-taar sẽn be sũ-noog ne neb a taabã, la vɩɩm sẽn yaa sõma n yɩɩd vɩɩm manesmã la tẽebã wɛɛngẽ. Yɩɩl gʋlsdã yeelame: “Bark bee neb nins sẽn sakd tõogã la sẽn maand tɩrg wakat fãa wã zutu.”—Yɩɩl Sõamyã 106:3.

[Tẽngr note]

Y tõe n wilga a võor bɩ?

• Tɩrlem yaa bõe?

• Wãn-wãn la fãagrã tɩ loe ne Wẽnnaam tɩrlmã?

• Wẽnnaam tika bõe zug n get ninsaalbã wa nin-tɩrse?

• Wãn to la d tõe n maan sũ-noog a Zeova tɩrlmã yĩnga?

[Zãmsgã sogsgã]

[Foto rãmba, seb-neng 23]

Rĩm a Davɩɩd wilgame t’a nonga Wẽnnaam noyã ne a sũur fãa

[Foto rãmba, seb-neng 24]

Wẽnnaam gesa a Nowe, a Abrahaam, a Zakari ne a Elizabɛt, la a Korney wa nin-tɩrse. Yãmb mii sẽn yaa bũmb ning yĩng bɩ?