Ziri tags-kʋd kũumã wɛɛngẽ vaeesg neere

WAKAT buud fãa, kũum sẽn tõe n wa wã kõo ninsaal yɩɩr la rabeem. Sẽn yɩɩd fãa, tũudmã ziri zãmsg toɛy-toɛyã, rog-n-migsã la ned kam fãa sẽn tẽedã, wã fãa sẽn kalem taabã wa n paasa kũumã rabeem sẽn tar nebã wʋsgo. Kũumã rabeem sẽn tar nebã sẽn wat ne yell ningã, ya a sẽn kɩtd tɩ nebã pa tõe n maan sũ-noog ne vɩɩmã, la a sẽn boogd kɩs-sɩd ning b sẽn tar tɩ vɩɩmã tara bõn-datlã.

Tũudum kãsemsã tara taal n yɩɩda, b sẽn zãmsd nebã tags-kʋd wʋsg sẽn yaa ziri kũumã wɛɛngẽ wã yĩnga. D sã n vaees bãmb b wãn tɩ zems ne sɩd ning sẽn be Biiblã pʋgẽ wã, bɩ y ges yãmb sã n tõe n paama vẽnegr n paase, ne yãmb meng sẽn tagsd to-to kũumã wɛɛngẽ wã.

Pipi ziri tags-kʋdre: Kũum yaa vɩɩmã saab sẽn zemse.

“Kũum . . . yaa bũmb d sẽn pa tõe n gil d vɩɩmã pʋgẽ,” woto la sebr a yembr (Death—The Final Stage of Growth) yeta. Goam a woto wilgdame tɩ nebã tẽedame tɩ kũum yaa bũmb sẽn zemse, tɩ yaa bõn-vɩɩg fãa saab la woto bala. La tags-kãngã kɩtame tɩ neb wʋsg lebg kɩɩsdb la noy zãgsdba.

La vɩɩmã sẽn sat ne kũumã sɩd yaa bũmb sẽn zems bɩ? Pa mitbã fãa n tagsd woto ye. Wala makre, a Calvin Harley sẽn yaa bõn-vɩɩlɩ yel-mitã sẽn baood n na n bãng ninsaalbã kʋʋlem võorã yeelame t’a pa tẽed tɩ “b naana [ninsaalbã] tɩ b wa ki ye.” Logtor a William Clark yeelame: “Kũum pa tar loees tɩlae ne vɩɩm sẽn ya a soaba ye.” Sẽn paase, a Seymour Benzer sẽn tʋmd bãngr zãmsg zĩigẽ wã (California Institute of Technology) yeelame tɩ “b tõe n bilga kʋʋlmã sõma n paase, pa wala bũmb sẽn na n ta a wakat n wa ye, la yaa wala yell d sẽn tõe n toeeme.”

Bãngdbã sã n zãmsd n bãngd b sẽn naan ninsaalbã to-to wã, lingd-b-la wʋsgo. B neeme tɩ laog la tõod nins b sẽn kõ tõndã yɩɩda tõnd sẽn dat yʋʋm 70 n digd 80 vɩɩm yĩngã zĩig sẽn zãre. Wala makre, bãngdbã yãame tɩ ninsaal kalkõtã tara pʋ-tẽer sẽn yaa kãseng wʋsgo. Kẽer tagsdame tɩ ned vɩɩm pʋgẽ, ya a kalkõtã pãn-tõog babg fĩ-fĩi bal la a tʋmd ne. Zemsame tɩ d sʋke, ‘Bõe yĩng tɩ d tar kalkõt ne tõog sẽn yaa kãseng woto, tɩ tõnd yaool n tũnugd ne a babg fĩ-fĩi bal d vɩɩmã pʋgẽ?’

Yãmb sã n leb n gese, y neeme tɩ ned sã n wa ki ninsaalbã sũy pa noom ye. Ne neb ka tɛka, b paga, b sɩda, bɩ b biig kũum tõe n yɩɩ sũ-sãang sẽn yaa kãseng b sẽn pa tõe yĩm b vɩɩmã tõre. Naoor wʋsgo, sũ-sãang kãseng yõkda nebã hal tɩ kaoose, b nin-nongr kũum poore. Baa neb nins sẽn yet tɩ kũumã yaa bũmb sẽn zems ne ninsaalbã getame tɩ yaa toog tɩ b sak tɩ bãmb mengã kũum na n yɩɩ bũmbã fãa saabo. Zʋrnall a yembr (British Medical Journal) wilgame tɩ “mitba nong n tagsdame tɩ ned fãa rat n ket n vɩɩme bala.”

 Ninsaal manesem sẽn nong n yaa to-to kũum taoorã, a sẽn tar tõog kãseng n na n tẽeg yɛl la a zãmsã, la a sẽn tar vɩɩm sẽn pa sat tʋlsem sẽn tar pãng wʋsgã, pa vẽeneg tɩ b naan-a lame t’a vɩɩmd wakat fãa yĩng sɩda? Sɩda, Wẽnnaam pa naan ninsaalbã tɩ b wa baas ne kũum ye, la yaa ne vɩɩm sẽn pa sat saagre. Ges-y Wẽnnaam sẽn ning pipi ninsaalbã taoore, b beoog-daarã wɛɛngẽ: “La Wẽnnaam ninga bãmb zut barka n yeel b tɩ b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” (Sɩngre 1:28) Ad sɩd yaa beoog-daar sẽn be rasãnd la sẽn kaoosde!

Ziri tags-kʋdr a 2 soaba: Yaa Wẽnnaam n boond nebã a nengẽ.

Kamb a tãab ma sẽn da tar yʋʋm 27 sẽn da kiid n basd-b yeela katolik masɛɛr a ye woto: “Ra wa yeel-m tɩ yaa Wẽnnaam daab mam wɛɛngẽ la woto ye. . . . M pa nong baa-baa tɩ ned a to yeel maam woto ye.” Yaool n yaa woto la tũudum wʋsg zãmsd nebã kũumã wɛɛngẽ: b zãmsda nebã tɩ Wẽnnaam n boond nebã a nengẽ la b sẽn kiidã.

Naandã sɩd yaa toaag woto hal n wa sek a na kʋ tõnd tɩ nimbãan-zoeer kaẽ, n miẽ tɩ woto sãamda tõnd sũur wʋsg bɩ? Sã n yaa ne Wẽnnaam ning yell Biiblã sẽn gomdã yaa ayo. Sã n yaa ne 1 Zã 4:8, “Wẽnnaam yaa nonglem.” Bãng-y tɩ Biiblã pa yet tɩ Wẽnnaam tara nonglem bɩ tɩ Wẽnnaam nonga neb ye, la a yetame tɩ Wẽnnaam yaa nonglem. Wẽnnaam nonglmã tara pãnga, n yaa nonglem halaal sẽn zems zãng sõma fasɩ hali n kɩt tɩ nonglem kãng kẽ a nedemdã la a tʋʋma fãa pʋsẽ, tɩ kɩt tɩ b tõe n yeel wa sẽn zems tɩ Wẽnnaam yaa nonglem. A pa Wẽnnaam sẽn kʋʋd neba, sẽn na yɩl n bool-b a nengẽ ye.

Ziri tũudmã basa neb wʋsg sãmb-sãmb pʋgẽ sã n yaa ne sẽn ki-bã sẽn be zĩig ninga, la b halhaalã wɛɛngẽ. Saasã, bugum yirã, pirgatoaarã, lẽmbã, zĩ-kãensã la zĩis a taabã b get-b-la wala zĩis b sẽn pa tõe n wʋm b võore, la wala zĩis sẽn kõt rabeem wʋsg menga. Sã n yaa ne Biiblã yẽ, a yeta tõnd tɩ sẽn ki-bã pa mi baa fʋɩ ye. B sẽn be zĩig ningã wõnda gõeem. (Koɛɛg Soaba 9:5, 10; Zã 11:11-14) Woto yĩnga, d pa segd n maan yɩɩr ne bũmb ning sẽn maand tõnd kũum poorã, wala d sẽn pa na n maan yɩɩr ne ned sẽn gõe sõma wã ye. A Zezi goma wakat sẽn wat tɩ “fãa sẽn be [tẽegr, NW ] yaad pʋsẽ na n wʋm bãmb koɛɛg n yi,” n paam vɩ-paalg tẽng zug arzãnã pʋgẽ.—Zã 5:28, 29; Luk 23:43.

Ziri tags-kʋdr a 3 soaba: Wẽnnaam n dɩkd kom-kɩdsã sẽn na yɩl tɩ b lebg malɛgse.

A Elizabɛt Kübler-Ross sẽn vaees neb sẽn da bẽed b yõor bãagã, goma tagsg tũudma neb sẽn nong n tarẽ yelle. A bilga yell sẽn sɩd zĩndi, n yeel tɩ “bipugl kɩdg yao yʋʋr sẽn yaa Johnny sẽn wa n maan kaalem, pa yɩ yam bũmb tɩ b yeela tɩ yaa Wẽnnaam sẽn nong komdibli kɩdsã wʋsgã yĩng n kɩt t’a rɩk a Johnny saasẽ wã ye.” Gom-kãensã buud pa kɩtd tɩ b tags sõma Wẽnnaam zug ye, a leb n pa wilgd a nedemdã la a manesmã sẽn ya a soab ye. A Dr. Kübler-Ross kẽnga taoor woto: “Bipugl kɩd-kãngã wa n bɩ n lebga paga, t’a sũ-yikrã ne Wẽnnaam ket n pa sa ye. Rẽ kɩtame tɩ yʋʋm pis-tã poore, yẽ meng biribl a yembr sẽn wa n ki, yam ka m meng sẽn yaa kãseng n yõk-a.”

Bõe yĩng tɩ Wẽnnaam na n deeg biig sẽn na yɩl n kɩt t’a lebg malɛk a to wala Wẽnnaam sã n da rata biigã n yɩɩd biiga roagdbã? Sã n da yaa sɩd tɩ Wẽnnaam dɩkda kambã, rẽ ra pa na n wilgẽ t’a yaa Naand sẽn ka nonglem la sẽn yaa rat-m-yembr soab sɩda? Sẽn yaa lebend ne tagsg a woto, Biiblã yetame: “Nonglem yita Wẽnnaam nengẽ.” (1 Zã 4:7) Rẽ yĩnga, ninsaalb sẽn tũud vɩɩm manesem noy sã n getẽ  tɩ yaa bũmb sẽn pa zems tɩ b yãk ned yõore, nonglem Wẽnnaam na sak n maan bõn-kãng sɩda?

La bõe yĩng masã tɩ kamb kiidẽ? Biiblã leokr a yembr rẽ wɛɛngẽ bee Koɛɛg Soaba 9:11 pʋgẽ: “Zu-beed n be bãmb fãa yĩnga.” La Yɩɩl Sõamyã 51:7 yetame tɩ tõnd fãa pa zems zãnga, tɩ d yaa yel-wẽn-maandb hal b sẽn dɩk tõnd pʋgã wakate, la tɩ ninsaalbã fãa baasg masã wakatã yaa kũum yɛl toɛy-toɛy sẽn tõe n yɩ sabab tɩ wa yĩnga. Wakat ninga, kũumã wẽedame tɩ d nan pa rog menga, tɩ wa ne rog-kɩɩnga. Zĩis a taaba, kambã kiida sabaab rãmb bɩ sãmpogr yĩnga. Yel-kãensã fãa pa Wẽnnaam n maand ye.

Ziri tags-kʋdr a 4 soaba: B namsda neb kẽer b kũum poore.

Tũudum wʋsg zãmsda nebã tɩ nin-wẽnsã na n kẽnga bugum yir n nams be wakat sẽn pa sate. Rẽ yĩnga, zãms-kãngã yaa tɩrga, la a zemsa ne Gʋlsg Sõamyã bɩ? Ninsaal vɩɩmã kaoosg zemsa yʋʋm 70 bɩ 80. Baa ned sã n tar taal a sẽn maan wẽng sẽn loog noor yĩng a vɩɩmã tõre, rẽ yĩnga, b sã n nams-a wakat sẽn pa sate, yaa sɩbgr sẽn zems bɩ? Ayo. Ra na n yɩɩ bũmb sẽn pa zems baa bilfu, tɩ b nams ned wakat sẽn pa sate, yel-wẽn a sẽn maan wakat bilf pʋgẽ yĩnga.

Yaa Wẽnnaam bal n tõe n wilg bũmb ning sẽn maand nebã kũum poore, la a sɩd wilga rẽ tɩ b gʋls a Gomdã sẽn yaa Biiblã pʋgẽ. Ad Biiblã sẽn yete: “[Rũng] kiida wa [ninsaala]. Bãmb b yiiba fãa yõe vʋʋsem yaa bũmb a yembre . . . Bãmb fãa rabda zĩ-yende. Fãa maana ne tẽng tom, la fãa leb n lebgda tẽng tom.” (Koɛɛg Soaba 3:19, 20) Ka, b pa gomd bugum yir yell ye. Ninsaalbã sã n ki b lebda tomẽ n ye pa beẽ ye.

Sẽn na yɩl n paam namsgo, rẽndame tɩ ned ket n mi bũmbu. Sẽn ki-bã ket n mii bũmb bɩ? Biiblã ye kõta leokr zĩ-kãngã wɛɛngẽ woto: “Bala, nin-vɩɩs miime tɩ b na n kiime. La kũum ka mi bũmb ye, la bãmb ka le paamd tʋʋmd yaood ye.” (Koɛɛg Soaba 9:5) Sẽn ki-bã sẽn ‘ka mi bũmbã’ yĩnga, b pa tõe n nams zĩig ba a yembr ye.

Ziri tags-kʋdr a 5 soaba: Kũum yaa tõnd vɩɩmã saab wakat fãa yĩnga.

D sã n ki n sa, d ye pa be ye, la rẽ pa rat n yeel tɩlae tɩ yaa tõnd vɩɩm saagrã saab fãa la woto ye. A Zoob sẽn yɩ kɩs-sɩd soabã ra miime t’a sã n wa ki, a ra na n kẽnga yaoogẽ, bɩ Seool pʋgẽ. La  kelg-y a sẽn pʋʋs Wẽnnaam to-to ningã: “Mam datame tɩ y solg maam kɩɩm-kulg [Seool, NW ] pʋgẽ hal tɩ y sũura sigi. La y yãk wakat n kõ maam t’a sã n wa ta bɩ y tẽeg m yelle. Ned sã n ki, a tõe n le vʋʋgame bɩ? . . . La yãmb sã n bool maam, mam na n sakame.”—Zoob 14:13-15.

A Zoob ra tagsdame t’a sã n da tall a kɩs-sɩdã ne Wẽnnaam n tõk a kũum, a ra na n tẽega a yell n wa vʋʋg-a. Ra yaa Wẽnnaam sõgen dãmbã fãa tagsg la woto tẽn-kʋdem wẽndẽ wã. A Zezi mengã sɩd wilgame tɩ saag-kãng yaa sɩda, n wilg tɩ Wẽnnaam na n tũnuga ne yẽ n vʋʋg sẽn ki-bã. Kirist mengã goam kõta tõnd bas-m-yam kãngã: “Wakat watame tɩ fãa sẽn be [tẽegr, NW ] yaad pʋsẽ na n wʋm [a Zezi] koɛɛg n yi. Neb nins sẽn da maan neera na n vʋʋg n paama vɩɩm, la neb nins sẽn da maan wẽnga na n vʋʋg n paama bʋʋdo.”—Zã 5:28, 29.

Ka la bilfu, Wẽnnaam na n yiisa wẽngã fãa la a lugl dũni paalga, saasẽ rĩungã naam dɩɩb pʋgẽ. (Yɩɩl Sõamyã 37:10, 11; Daniɛll 2:44; Wilgri 16:14, 16) A baasgã na n yɩɩ arzãn dũniyã gill zugu, sẽn tar neb sẽn maand Wẽnnaam daabo. Biiblã pʋgẽ d karemda woto: “Mam wʋma koe-kãseng sẽn yi geerẽ wã n yeele: ‘Gese, Wẽnnaam yir bee neba sʋka. La bãmb na n zĩnda ne bãmba, la bãmb na n yɩɩ bãmb neba, la bãmb menga na n paa ne bãmba. Bãmb na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.’”—Wilgri 21:3, 4.

D kõn leb n zoe kũum dabeem ye

Vʋʋgrã saagr bãngre, n paas bãngr ning d sẽn tar ne a Soab ning sẽn yɩ sabab tɩ d tar saag-kãngã wã tõe n belsa tõndo. A Zezi kãaba woto: “Yãmb na bãng sɩda, la sɩda na kõ yãmb lohorem.” (Zã 8:32) Rabeem ning d sẽn tar ne kũumã yiisg bee rẽ sʋka. Ya a Zeova bal n ya a soab ning sẽn sɩd tõe n yiis kʋʋlmã la kũumã la a kõ tõnd vɩɩm sẽn pa satã. Yãmb tõe n teẽ Wẽnnaam kãabsã bɩ? N-ye, y segd n tẽeme, bala Wẽnnaam Gomdã sẽn yetã paamda pidsg wakat fãa. (Ezai 55:11) Zãms-y n paas Wẽnnaam daabã ãdem-biisã wɛɛngẽ. A Zeova Kaset rãmbã na n sõng-y-la ne sũ-noogo.

[Goam sẽn tar pãngã, seb-neng a 6]

Kũumã rabeem sã n tar neda, kɩtdame t’a sũur pa tõe n yɩ noog ne a vɩɩmã ye

[Taablo, seb-neng a 7]

ZIRI TAGS-KƲD SẼN WƐ KŨUMÃ WƐƐNGẼ BÕE LA GƲLSG SÕAMYÃ YETA?

● Kũum yaa vɩɩmã saab sẽn zemse Sɩng. 1:28; 2:17; Rom 5:12

● Yaa Wẽnnaam n boond nebã a nengẽ Zoob 34:15; Yɩɩl 37:11, 29; 115:16

● Wẽnnaam n dɩkd kom-kɩdsã sẽn na yɩl Yɩɩl 51:7; 104:1, 4;

tɩ b lebg malɛgse Hebre 1:7, 14

● B namsda neb kẽer b kũum poore Yɩɩl 146:4; Koɛ. 9:5, 10; Rom dãmba 6:23

● Kũumã yaa tõnd vɩɩmã saab Zoob 14:14, 15;

wakat fãa yĩnga Zã 3:16; 17:3; Tʋʋ. 24:15

[Foto, seb-neng a 8]

D sẽn mi kũum sẽn ya a soabã yiisda tõnd rabeemã

[Seb-neng a 5 fotã soaadbã]

Barrators—Giampolo/The Doré Illustrations For Dante’s Divine Comedy/Dover Publications Inc.