Ãdem-biisã zu-loees na n saa ka la bilfu!

“SÃ N ka a yaa bũmb sẽn naag segls toɛy-toɛy fãa b sẽn maan sẽn na yɩl n welg yɛl nins sẽn wat ne mo-yõsã tɩ nanambsã teend-a fãa, sõngrã b sẽn kõt n yolsd nebã ka tõe n tall yõod wʋsg ye. Naoor wʋsgo b yãame tɩ sõngrã a yen-yen bal ka tõe n welg zu-loees naam yɛl sẽn wa ne ye.”—Les Réfugiés dans le monde 2000.

Baa ne sõng-kãsemsã b sẽn kõtã, ãdem-biisã zu-loees tara paasg bal tɩ sẽn maand kaẽ ye. Nanambsã na n wa tõog n yãa yellã tɩɩm zãng-zãng bɩ? Togs sɩda, yaa toogo. La yɛ la d tõe n le bao sõngre? Lɛtrã a Poll sẽn gʋls Efɛɛz kiris-nebã sɩngrẽ, a wilga Wẽnnaam sẽn na n yiis ãdem-biisã fãa zu-loees to-to. A tol n wilga Wẽnnaam sẽn na n tũnug ne bũmb ning n maan dẽ. Bõn-kãng na n yiisa yɛl nins sẽn wat ne zu-loeesã tɩ namsd tõnd rũndã-rũndã wã. Bõe yĩng tɩ y ka na n ges a Poll sẽn yet bũmb ningã? A goamã bee Efɛɛz rãmba 1:3-10 pʋgẽ.

“Tigim bũmb fãa yɛs Kirist pʋgẽ”

Tʋm-tʋmdã a Poll yeelame tɩ Wẽnnaam raab yaa maan “yɛl-gesgo, wakatã b sẽn yãkã saabẽ.” Woto rat n yeelame tɩ bõe? Rat n yeelame tɩ Wẽnnaam yãka wakat n na n “tigim bũmb fãa yɛs Kirist pʋgẽ, bũmb nins sẽn be saasẽ wã la bũmb nins sẽn be tẽng zugã.” (Efɛɛz rãmba 1:10, NW ) N-ye, Wẽnnaam sɩngame n maand segls sẽn na yɩl n kɩt tɩ bũmb fãa sẽn be saasẽ la tẽng zug zĩnd zems-n-taar pʋgẽ yẽ sor-wilgr pʋgẽ. Gomd ning b sẽn lebg tɩ ‘tigim yɛsã’ wɛɛngẽ, Biibl mit a Joseph Henry Thayer yeelame: “Lebs n tigim yɛs a meng yĩnga. . . . bũmb fãa la bõn-vɩɩlɩ fãa (yel-wẽnd sẽn da welg hal tɩ ta wakat kãnga) tɩ b zĩnd lagem-n-taar pʋgẽ ne Kirist.”

Woto wilgdame tɩ Wẽnnaam segd n maana woto, welgrã sẽn sɩng to-to wã yĩnga. Ninsaal belmã sɩngr sẽnẽ, tõnd roagdb a Ãdem ne a Hawa, tũu a Sʋɩtãan Munaafɩɩk n kɩɩs Wẽnnaam. B ra rat n sooga b mens n yãk bãmb mens sẽn tagsd tɩ yaa sõma la  wẽnga. (Sɩngre 3:1-5) Wa sẽn zems ne a tɩrlmã, Wẽnnaam rig-b lame n yiis a zakã pʋgẽ, tɩ b ka le tar lagem-n-taar ne-a ye. B kẽesa ãdem-biisã pa-zems-zãngã ne a yel-beed nins tõnd sẽn vɩ rũndã-rũndã wã pʋgẽ.—Rom dãmba 5:12.

Wẽnnaam basame tɩ wẽng zĩnd wakat bilf yĩnga

Tõe tɩ kẽer sʋk woto: ‘Bõe yĩng tɩ Wẽnnaam bas-b tɩ b maan woto. Bõe yĩng t’a ka tũnug ne a pãng sẽn yɩɩd fãa wã n modg t’a raabã pidsi, tɩ ne woto bɩ a gɩdg tood la namsg nins tõnd sẽn tar rũndã-rũndã wã?’ Tagsg a woto tõe n waa d yamẽ nana-nana bala. La Wẽnnaam sã n da tũnugẽ ne a pãng sẽn yɩɩd fãa wã woto, bõe la rẽ ra na n wilgẽ? Ned sẽn na n beẽ tɩ b sẽn kɩɩs-a bilf bal bɩ a yik n menems kɩɩsdbã a sẽn tar pãng yĩnga, rẽ yĩnga y na n nonga ned a woto buud sɩda? Yaa vẽeneg tɩ ayo.

Sɩd-sɩda kɩɩsdb kãensã pa kɩɩs Wẽnnaam pãngã sẽn ka to wã bal ye. Sẽn yɩɩd fãa, b sẽn kɩɩsã yaa tɩ Wẽnnaam ka tar sor n na n dɩ naamã wa a sẽn dɩt-a to-to wã, la t’a ka rɩt-a wa sẽn segdã ye. Sẽn na yɩl n welg yel-kãensã sẽn pukã wakat fãa yĩnga, wakat bilf pʋgẽ a Zeova basa a bõn-naandsã tɩ b rɩ naam b mens zut n pa kẽes a toog ye. (Koɛɛg Soaba 3:1; Luk 21:24) La wakat kãng sã n wa sa, a mengã na n leb n kẽesa a toog n deeg naamã zãng n dɩ tẽngã zugu. Wakat kãnga yɩta vẽeneg fasɩ tɩ yaa yẽ sẽn dɩt naamã to-to wã n tõe tɩ laafɩ, sũ-noogo, la bark sẽn kaoosd wakat fãa zĩnd tẽngã neb fãa nafa yĩnga. Yaa rẽ poor la b na n sãam neb nins sẽn weoogd b taabã dũniyã pʋgẽ wã wakat fãa yĩnga.—Yɩɩl Sõamyã 72:12-14; Daniɛll 2:44.

“Tɩ dũniyã nan ka naan ye”

A Zeova ra yãka yam n na n pids bõn-kãensã fãa hal daar zãra. A Poll yeelame tɩ yaa hal ‘tɩ dũniyã nan ka naan ye.’ (Efɛɛz rãmba 1:4) Ka sẽn deng tɩ b naan tẽngã bɩ a Ãdem la a Hawa ye. Dũni kãng ra yaa “sõama wʋsgo,” sẽn paase kɩɩsgã ra nan ka yik ye. (Sɩngre 1:31) Rẽ, tʋm-tʋmd a Poll ra gomda ‘dũni’ bʋg yelle? A ra gomda a Ãdem ne a Hawa kambã dũni yelle, sẽn yaa dũni sẽn tar yel-wẽn la sẽn pa zems zãng n saagd n na n paam fãagrã. Nanand t’a Ãdem ne a Hawa rog kambã, a Zeova ra zoe n mii a sẽn na n maan to-to n welg yellã n kõ a Ãdem kambã b sẽn tõe n fãagã yolsgo.—Rom dãmba 8:20.

Yaa vẽeneg tɩ woto ka rat n yeel tɩ yaa tɩlae tɩ ãndũni Naab sẽn-ka-to wã welg yɛlã wa ninsaalbã sẽn welgd-b to-to wã ye. Ninsaalbã sẽn mi tɩ yel-be-lingdem tõe n wa pukame wã, b maanda segls toɛy-toɛy sẽn na yɩl n wa tõog n welg yellã. La Wẽnnaam sẽn-tõeyã-fãa wã yãkda a sẽn dat n maaneg bal la a pids-a. La a Poll baas n wilga a Zeova sẽn yãk yam n na n welg yɛlã to-to sẽn na yɩl n wa ne yolsg wakat fãa yĩng n kõ ãdem-biisã. Segl-kãens a sẽn maanã la bʋse?

Ãnda n na n wa ne yolsgo?

A Poll wilgame tɩ Kirist karen-biis sẽn zae ne vʋʋsem sõngã tara tʋʋmd sẽn ka wõnd a taab ning sẽn yaa yiis wẽng ning a Ãdem yel-wẽndã sẽn wa ne wã. A Poll yeelame t’a Zeova ‘yãka bãmb Kirist maasem yĩng’ tɩ b rɩ naam ne a Zezi a saasẽ Rĩungã pʋgẽ. A Poll leb n wilgame n paas t’a Zeova ‘pĩnd n yãka [‘pʋlma’, NW ] bãmb tɩ b lebg yẽ kamb a Zezi Kirist maasem yĩnga.’ (Efɛɛz rãmba 1:4, 5) Yaa vẽeneg tɩ ka bãmb ned kam fãa yembr-yembr la a Zeova yãk bɩ a pʋlem ye. La a reng n pʋlma wẽn-sakdb sull sẽn da na n wa naag Kiristã n yiis wẽng ning a Sʋɩtãan Munaafɩɩk la a Ãdem ne a Hawa sẽn wa ne ãdem-biisã fãa zutã.—Luk 12:32; Hebre dãmba 2:14-18.

Ad wã yaa bõn-kãsenga! A Sʋɩtãan sẽn da kɩɩs Wẽnnaam naam sẽn-ka-to wã sɩngrẽ wã, a ra yetame tɩ Wẽnnaam naana ninsaalbã ne zamse, tɩ b sã n paam namsg la kʋɩɩb-kãsenga b na n kɩɩsa Wẽnnaam  naamã. (Zoob 1:7-12; 2:2-5) Wẽnnaam a Zeova wilga “a sõmblem d sẽn ka segd ne wã sẽn tar ziirã” (NW ) ne manesem sẽn be rasãnde, n wa wilg t’a tara bas-yard ne a bõn-naandsã sẽn be tẽng zugã n sak tɩ ãdem-biis sẽn yaa yel-wẽn-maandb kẽer lebg a tẽeb komdibli. Sul-bi-kãngã neb na n tɩ vɩɩmda saasẽ. Bõe yĩnga?—Efɛɛz rãmba 1:3-6; Zã 14:2, 3; 1 Tesalonik rãmba 4:15-17; 1 Pɩɛɛr 1:3, 4.

Tʋm-tʋmd a Poll yeelame tɩ Wẽnnaam komdibl kãensã lebga “pʋɩt-n-taas ne Kirist” a saasẽ Rĩungã pʋgẽ. (Rom dãmba 8:14-17) B sẽn yaa rĩm dãmb la maan-kʋʋdbã, b na n sõngame n yols ninsaalbã ne tood la namsg ning sẽn tar-b rũndã-rũndã wã. (Wilgri 5:10) Sɩda, “bõn-naandsa wẽeda siri n namsd wa pag sẽn dat n dog tɩ ta masã.” La ka la bilfu komdibli kãensã Wẽnnaam sẽn yãkã na n naaga a Zezi Kirist n tʋme, tɩ ninsaalb nins sẽn yaa sakdbã fãa “paam yolsg ne faoolem yembdo n paam pʋɩɩr ne Wẽnnaam kamba b lohorma ne b ziira pʋgẽ.”—Rom dãmba 8:18-22.

‘Fãagr ne bãmb zɩɩm’

Yaa ne a Zezi Kirist maoongã sẽn yaa rondã maasem la bõn-kãensã fãa na n tõog n maane. Maoon-kãng yaa Wẽnnaam sõmblem d sẽn ka segd ne wã pukr ning sẽn yaa kãseng n yɩɩd ãdem-biis nins b sẽn tõe n fãagã yĩnga. A Poll gʋlsame: ‘Yaa [a Zezi Kirist] maasem yĩng la tõnd paamd fãagre ne bãmb zɩɩm, fãagre sẽn yaa yel-wẽna sugri sẽn zems bãmb bark kãsengã.’—Efɛɛz rãmba 1:7.

Wẽnnaam raabã pidsg pʋgẽ, a Zezi Kirist la nin-kãseng ning sẽn yɩɩdã. (Hebre dãmba 2:10) Maoongã a sẽn kõ wã yaa bũmb a Zeova sẽn tõe n tik n sak a Ãdem yagens kẽer a saasẽ zakã neb sʋka, la a yols ninsaalbã ne a Ãdem yel-wẽndã biisi, n ka boog bas-yard ning b sẽn segd n tall ne a noyã ye. (Matɩe 20:28; 1 Tɩmote 2:6) A Zeova maana yɛlã ne manesem sẽn teend a tɩrlmã la sẽn pids yɛl nins a bʋ-kaoor noyã sẽn baood tɩ pidsã.—Rom dãmba 3:22-26.

Wẽnnaam “yel-solgdg sõngã”

Wẽnnaam maana yʋʋm n ka wilg a sẽn na n pids a raabã tẽngã wɛɛngẽ wã to-to takɩ ye. Pipi yʋʋm kob-gĩndẽ wã, a kɩtame “tɩ [kiris-neba] bãng a raabã yel-solgdg sõngã.” (Efɛɛz rãmba 1:9, NW ) A Poll ne a kiris-nin-taas sẽn zae ne vʋʋsem sõngã bãnga tʋʋm kãseng ning b sẽn kõ a Zezi Kirist Wẽnnaam raabã pidsg pʋgẽ wã. B ra leb n sɩng n bãngdame tɩ b yaa pʋɩt-n-taas ne Kirist saasẽ Rĩungã pʋgẽ. (Efɛɛz rãmba 3:5, 6, 8-11) N-ye, yaa Rĩungã sẽn yaa goosneema sẽn be a Zezi Kirist la a naam dɩt-n-taasã nugẽ wã la Wẽnnaam na n tũnug ne n wa ne laafɩ wakat fãa yĩng saasẽ la tẽng zugu. (Matɩe 6:9, 10) Yaa ne rẽ maasem la a Zeova na n lebs n maneg tẽngã t’a yɩ wa a sẽn da rat t’a yɩ to-to sɩngrẽ wã.—Ezai 45:18; 65:21-23; Tʋʋma 3:21.

Wakat ning a sẽn yãk n na n yiis namsg la yel-kɛg buud fãa tẽngã zugã ta n saame. La sɩd-sɩdã a Zeova sɩnga lebs-n-manegã yʋʋmd 33 Pãntekotã tɛka. Wãn-wãn to? Ra ya a sẽn da sɩng n tigimd “bũmb nins sẽn be saasẽ wã”, sẽn yaa neb nins sẽn na n dɩ naam ne Kirist saasẽ wã. Efɛɛz kiris-nebã ra bee nin-kãens sʋka. (Efɛɛz rãmba 2:4-7) Sẽn pa kaoos pʋgẽ, tõnd wakatã a Zeova sɩngame n tigimd  “bũmb nins sẽn be tẽng zugã.” (Efɛɛz rãmba 1:10, Kãab-paalgã Koe-noogo) A tũnugda ne moonegã tʋʋmd sẽn maand zĩig fãa wã n wilgd tẽn-tẽnsã fãa koe-noogã sẽn tɩ loe ne a goosneemã sẽn yaa Rĩungã sẽn be a Zezi Kirist nugẽ wã. Masã mengã, b tigimda neb nins sẽn sakdã zĩig ning b sẽn na n paam koglg la sãoogr tẽebã wɛɛngẽ. (Zã 10:16) Ka la bilfu, tẽng sẽn yaa arzãn sẽn yɩlg zugu, b na n paama b mens zãng fasɩ ne yel-kɛgã la namsgã fãa.—2 Pɩɛɛr 3:13; Wilgri 11:18.

Sebr a yembr (La situation des enfants dans le monde 2000) yeelame tɩ sigls nins sẽn sõngd ãdem-biis nins sẽn be namsg pʋgẽ tʋʋmd “kẽnga taoor wʋsg ne manesem sẽn lingda.” La taoor kẽngr ne manesem sẽn lingd n yɩɩdã ya a soab ning Kirist Zezi ne a naam dɩt-n-taasã sẽn be saasẽ goosneem Rĩungã pʋgẽ sẽn na n maan ka la bilfã. B na n welga yɛl nins fãa sẽn wat ne mo-yõsã la yel-wẽns a taabã sẽn namsd tõndã. B na n kɩtame tɩ ãdem-biisã zu-loees fãa sa ka la bilfu.—Wilgri 21:1-4.

[Foto rãmba, seb-neng a 4]

Sõngrã b sẽn kõt sẽn namsd-bã ka tõog n welg ãdem-biisã zu-loees ye

[Foto, seb-neng a 6]

Kirist maoongã sẽn yaa rondã yolsa ãdem-biisã ne a Ãdem yel-wẽndã

[Foto, seb-neng a 7]

D tõe n paama koglg la sãoogr tẽebã wɛɛngẽ rũndã-rũndã

[Foto, seb-neng a 7]

Ka la bilfu, ne Mesi Rĩungã maasem, neba na n paama b mens zãng-zãng ne zu-loeesã