“Fo yaa pʋg-sõngo”

Yaa Moaab pʋg-bɩɩg a yembr la b pẽg woto. Ra yaa pʋg-kõor yʋʋr sẽn boond t’a Rut, n yaa Israɛll poak a Naomi bi-paga. A Rut zĩnda Israɛll sẽn na maan yʋʋm 3 000 sẽn looge. Bʋ-kaoodbã sẽn wa n dɩt naamã sasa, a paama yʋ-noogo. (Rut 3:11) Yẽ maana wãn n wa paam yʋ-noog woto? La makr ning a sẽn basã tõe n nafa ãnda?

A Rut pa yɩ pag sẽn ‘maand kʋɩɩng ye.’ A ra yaa pʋg-tʋmdg hal sõma. A sẽn wa n yiisd ki pʋʋgẽ, yẽ sẽn tʋmd sõma to-to wã kɩtame tɩ b pẽg-a. Baa b sã n da rat n kõ yẽ tʋʋm nana, yẽ ra modgdame n maan-a sõma tɩ yɩɩg b sẽn da rata menga. Ad a Rut sɩd ra zemsa pʋg-sõng ninga sẽn yẽesa ne tʋʋma, la sẽn zems ne pẽgr Biiblã sẽn gomd a soab yellã.—Yelbũna 31:10-31; Rut 2:7, 15-17.

Ya a Rut tẽeb zʋg-sõmã wã, sẽn yaa sik-m-mengã, mong-m-mengã n ye paas kɩs-sɩd nonglmã n kɩt t’a ra paamd zu-zẽkr zãma sʋkã. Yẽ basa a roagdbã ne a ba-yirã n tũ a Naomi, n da pa tẽed koglg ning yi-kãadem sẽn wat ne wã paoong ye. Wakat kãngã a Rut ra yeelame t’a tʋll n balma a Zeova sẽn ya a Naomi Wẽnnaamã. Gʋlsg Sõamyã wilga a Rut yõodã sẽn da zem to-to n yetẽ t’a “yaa sõma ne [a Naomi] n yɩɩd komdibli a yopoe.”—Rut 1:16, 17; 2:11, 12; 4:15.

Ba a zãmaanã neb sẽn da pẽgd a Rut yel-somdã wʋsgã, a yõodã sẽn tɩ yɩɩd ya a Zeova meng sẽn tall naneb ne a zʋg-sõma wã n keo-a n kõ-a zu-noog t’a paam n yɩ a Zezi Kirist yaab-poakã. (Matɩe 1:5; 1 Pɩɛɛr 3:4) Mak-sõng ning a Rut sẽn kõ wã pa kiris-nin-pogsã yĩng bal ye, a yaa sõmã ne ned ning fãa sẽn yet t’a balemda a Zeova.