Karemdbã sʋgsgo

Kiris-ned tõe n kõo mumb sõasg ned sẽn kʋ a meng yĩng bɩ?

Yaa kiris-ned fãa n segd n yãk a sã n tõe n kõo ned sẽn wõnd a kʋʋ a meng kũum sõasga, t’a sũur-kaset ka ning a taal Wẽnd taoore. A sã n na n wa rɩk a sardã a segd n tagsa sʋgs-kãensã zutu: Bõe la a Zeova tagsd meng-kʋʋbã zugu? Rẽ yĩnga nedã sɩd kʋʋ a meng ne yamleoog bɩ? Yaa zu-lɛbg bɩ sũ-sãang buud n kɩt t’a kʋ a meng bɩ? Ned sã n kʋ a menga, tẽngã neb geta rẽ wãn-wãna?

D sẽn yaa kiris-nebã ya a Zeova sẽn tagsd to-to meng-kʋʋbã zug n pak tõndo. Ninsaal vɩɩmã tara yõod wʋsg a Zeova nifẽ. (Sɩngre 9:5; Yɩɩl Sõamyã 36:10) Ned sã n kʋ a meng ne yamleoogo yaa wa a sẽn kʋ a to, la rẽ yaa wẽng Wẽnnaam nifẽ. (Yikri 20:13; 1 Zã 3:15) La woto kɩtdame tɩ b ka tõe n kõ mumb sõasg ned ning sẽn kʋ a mengã yĩng bɩ?

D rɩk makr ne Israɛll Rĩm a Saull kũumã. A sẽn mik t’a ra ka na n tõog n põs zabr ning a sẽn da zabd a tɛkem-tɛkem ne Filistẽ rãmbã pʋgẽ wã, “a Saull rɩka a sʋʋgã n kõs a menga,” sẽn na yɩl tɩ bɛɛbã ra wa yaal-a ye. Filistẽ rãmbã sẽn yã a kũumã, b rɩk-a lame n tɩ ka Bet-san galʋ-tẽngã lalg zugu. Zabɛs-Galaad dãmbã sẽn bãng Filistẽ rãmbã sẽn maan bũmb ningã b wa n yiisa kũuma n tɩ yõoge. Rẽ poore b wʋka kõabã n tɩ mumi. B tol n loee noor rasem a yopoe, wa sẽn zems ne Israɛll nebã rog-m-miki. (1 Sãmwɛll 31:4, 8-13; Sɩngre 50:10) A Davɩɩd sẽn ya a Zeova sẽn zae a soabã sẽn wʋm Zabɛs-Galaad nebã sẽn maan bũmb ningã, a yeelame: “Bɩ Zusoab ning yãmb barka y sẽn maan y Zusoab a Saull neer n mum-ba yĩnga. La masã, bɩ Zusoaba zoe yãmb nimbãanega n maan yãmb neere.” (2 Sãmwɛll 2:5, 6) Biiblã ka wilg tɩ b ninga Zabɛs-Galaad nebã taal b sẽn maan bõn-kãensã a Saull mumbã yĩngã ye. Mak-y bũmb nins sẽn maan a Saull wɛɛngẽ wã ne b rãmb nins b sẽn zãgs tɩ b kõn mumi, b tʋʋm wẽnsã yĩngã. (Zeremi 25:32, 33) Kiris-ned sẽn yaa saam-biig tõe n tagsa kɩba-kãngã sẽn tɩ loe ne a Saullã zug n bãng a sã n na n sakame n kõ mumb sõasg ned sẽn kʋ a meng yĩng bɩ a ka na n kõ.

Kiris-nedã tõeeme n dat n tags mumbã sõasg bõn-datl zugu. Sẽn yaa lebend ne neb nins sẽn tẽed tɩ sɩɩg pa kiidã, a Zeova Kaset rãmbã ka maand mumb yɛl sẽn na yɩl n wilg tɩ kiidã looga dũni a to pʋgẽ ye. Ayo, mumbã sõasg sẽn kõtã ka sẽn na yɩl tɩ naf kiidã ye, la yaa sẽn na yɩl n bels kiidã neba, la b kõ neb nins sẽn wa wã kaset n wilg sẽn ki-bã halhaal sẽn ya a soaba. (Koɛɛg Soaba 9:5, 10; 2 Korẽnt dãmba 1:3-5) Bũmb a to sẽn tar yõod wʋsg sẽn kɩtd tɩ b kõt mumb sõasgã yaa sẽn na yɩl n sõng kɛlgdbã tɩ b tags ninsaal vɩɩmã sẽn yaa koɛɛgã zugu. (Koɛɛg Soaba 7:2) Rẽ yĩngã b sã n kõ mumb sõasg ned ning sẽn kʋ a mengã yĩnga, bõn-datɩ kãensã na n paama pidsg bɩ?

Yaa sɩd tɩ neb kẽer tõe n tagsdame t’a soabã yãka a meng yõor ne yamleoogo, n mi vẽeneg t’a sẽn maan woto wã a beega a Zeova. La rẽ yĩnga b tõe n paama kaset sẽn sɩd wilgd tɩ tagsg a woto yaa sɩd bɩ? Tõe n yaa ned sẽn yik n kʋ a meng zĩig pʋgẽ bal n ka yaas n tags bɩ? Neb kẽer makame n na n kʋ b mense, n wa toeem yam n base. Ned ka tõe n tek yam n kos sugr bũmb a sẽn maan yĩng a kũum poor ye.

B mikame tɩ neb wʋsg kʋʋ b mens zu-lɛbg bɩ sũ-sãang buud yĩnga, tɩ rẽ me yaa bõn-kãseng a to d sẽn segd n ning d yamẽ. B tõe n sɩd yeelame  tɩ nin-kãensã yaa neb sẽn kʋ b mense, tɩ ka yɩ ne yamleoog ye. B maana gɛɛl n yã tɩ neb nins sẽn kʋ b mensã 90 koabg zug yaa zu-lɛbga, sũ-sãang buudu, bɩ dorg buud sẽn kẽes-b yembd pʋgẽ yĩnga. Rẽ yĩnga a Zeova na n kõo neb a woto sẽn tar zu-lɛbg buud a woto sugri, b sẽn kʋ b mensã yĩng bɩ? D ka tõe n bãng kiidã sã n maana yel-wẽnd a Zeova sẽn ka tõe n kõ sugr ye. Kiris-ned tõe n gesa a soabã vɩɩm la a laafɩ sẽn da yɩ to-to, a sã n wa tagsd n dat n bãng a sã n na n kõo mumb sõasg ned sẽn kʋ a meng yĩng bɩ a ka na n kõ.

Bũmb a to me la b segd n gese: Wãn-wãn la tẽngã neb tagsd ned sẽn kʋ a meng wɛɛngẽ, la nin-kãng mengã kũum zugu? Sẽn yɩɩd fãa yel-kãngã segd n paka kãsem dãmba, bala b ka rat t’a Zeova Kaset rãmbã tiging yʋʋr wa sãam ye. Kãsem dãmbã tõe n tika tẽngã neb sẽn tagsd to-to ned sẽn kʋ a meng wɛɛngẽ zugu, sẽn yɩɩd fãa neba tagsg nin-kãng kũumã zugu, n ka kõ mumb sõasg zãma taoor bɩ Rĩungã Roogẽ ye.

Baasg zãnga, b sã n kos kiris-ned sẽn yaa saam-biig t’a kõ mumb sõasgã, a tõe n tagsame tɩ yẽ mengã na n yãka yam n kõ-a, tɩ ka yɩ tigingã yʋʋr yĩng ye. A sã n yãk yam n na n maan dẽ, bɩ a gũus neer n da wa gom goam sẽn wilgd vẽeneg t’a soabã tõe n vʋʋgame ye. A soabã na vʋʋg t’a kõn vʋʋgã bee ne a Zeova, la ned ka tõe n bãng n yeel kiidã sã n na n vʋʋgame bɩ a ka na n vʋʋg ye. Saam-biigã na n gom n tadga Biiblã sẽn yet bũmb ning kũumã wɛɛngẽ zugu, la a bels kiidã neba.