Wakat ning d sẽn tog n vẽneg yell n togsã

D sã n solg yɛl kẽer n ka togse, tõe n kɩtame tɩ bãan zĩndi. La wakat ninga b segd n vẽnega yel-soalgdg n togs bɩ? Ges-y no-rɛɛs a Amos sẽn yeel bũmb ning Wẽnnaam wɛɛngẽ: “Zusoaba ka maand bũmb n ka wilg b no-rɛɛsdba sẽn yaa b tʋm-tʋmdba ye.” (Amos 3:7) Gom-kãensã zãmsda tõnd bũmb yel-solgdsã wɛɛngẽ. A Zeova tõeeme n solg yɛl kẽer n maan wakat a wãn n ka togs ye, n wa baas n vẽneg-a n togs neb kẽere. Wãn-wãn la d tõe n dɩk togs-n-taar ne a Zeova zĩ-kãngã wɛɛngẽ?

Wakat ninga, kãsem dãmbã b sẽn yãk kiris-neb tigingã pʋgẽ wã tõe n yãame tɩ tara yõod tɩ b solg yɛl kẽer n ka togs ye. (Tʋʋma 20:28) Wala makre, tigingã nafr yĩnga b tõeeme n dɩk sard n solg segls kẽer b sẽn maane, bɩ toeeng tigingã taoor sobend wɛɛngẽ n ka togs hal tɩ wakat ning takɩ ta.

La sã n yaa woto, b segdame n togs neb nins yellã sẽn pakã b sã n na n vẽnega yellã n togse, wakat ning b sẽn na n maan dẽ wã, la b sẽn na n maan dẽ to-to. Neb nins yellã sẽn pakã sã n mi wakat ning b sẽn na n vẽneg yellã n togsã, tõe n sõng-b lame tɩ b tõog b noore.—Yelbũna 25:9, Sebr Sõngo.