Kiris-neb hakɩkã ket n kẽnda sɩdã pʋgẽ
Kiris-neb hakɩkã ket n kẽnda sɩdã pʋgẽ
“Bũmb ninga sẽn kõt maam sũ-noog n yɩɩda, yaa tɩ bãng tɩ mam kamba kẽnda sɩd pʋgẽ.”—3 ZÃ 4.
1. Sɩd ning sẽn tɩ loe ne “Koe-noogã” tika bõe zugu?
YAA neb nins sẽn balemd a Zeova “[b yamẽ, Sebr Sõngo] la ne sɩda” bal n tat a yam. (Zã 4:24) B tũuda sɩdã la kiris-neb zãmsgã fãa sẽn tik Wẽnnaam Gomdã zugã. “Koe-noogã” sɩd tika a Zezi Kirist la a Zeova naam sẽn-ka-to wã zemsg wilgr ne a Rĩungã maasmã zugu. (Galat dãmba 2:14) Wẽnnaam basdame tɩ neb nins sẽn nong ziri wã paam “belgr kãseng[a],” la neb nins sẽn dat fãagrã segd n tẽe koe-noogã la b kẽn sɩdã pʋgẽ.—2 Tesalonik rãmba 2:9-12; Efɛɛz rãmba 1:13, 14.
2. Sẽn yɩɩd fãa, bõe yĩng tɩ tʋm-tʋmd a Zã ra tar sũ-noogo, la loees bʋg buud n da be yẽ ne a Gaiyus sʋka?
2 Rĩungã koe-moondb yaa “tʋmd-n-taas sɩda pʋgẽ.” B gãda sɩdã kãn-kãe n kẽnd a pʋgẽ wa tʋm-tʋmd a Zã ne a zoa a Gaiyus. A Zã ra tagsda a Gaiyus yell a sẽn da gʋlsd woto wã: “Bũmb ninga sẽn kõt maam sũ-noog n yɩɩda, yaa tɩ bãng tɩ mam kamba kẽnda sɩd pʋgẽ.” (3 Zã 3-8) Baa sã n da ka a Zã n zãms a Gaiyus sɩdã me, tʋm-tʋmdã sẽn kʋʋlã sẽn bɩ tẽebã wɛɛngẽ la sẽn wilgd ba nonglmã yĩng kɩtame tɩ zems t’a ges a Gaiyus sẽn da wõnd a yʋʋm ka ta-a wã wala a biig tẽebã pʋgẽ.
Sɩdã la kiris-neb balengã
3. Pipi kiris-nebã sẽn da tigimd taabã bõn-datl la a yõod yaa bʋgo?
3 Pipi kiris-nebã ra tigimda taab n zãmsd sɩdã, la naoor wʋsgo ra yaa neb zagsẽ. (Rom dãmba 16:3-5) Rẽ kɩtame tɩ b ra kengd taab pels la b yikd taab ratem nonglem la tʋʋm sõma yĩnga. (Hebre dãmba 10:24, 25) A Tɛrtiliẽ (yʋʋmd 155 sẽnẽ–220 poore) gʋlsa woto, neb sẽn da yet tɩ b yaa kiris-neb kaoosg zugẽ wɛɛngẽ: “D tigimda taab n karemd Wẽnnaam sɛbã . . . Ne gom-sõms kãense, d rɩlgda d tẽebã, n paasd d saagrã la d bas-yardã pãnga.”—Apologétique, sak 39.
4. Yɩɩlã yõod kiris-neb tigissẽ wã ra yaa bõe?
4 Pipi kiris-nebã tigiss wakat me b ra yɩɩndame. (Efɛɛz rãmba 5:19; Kolos rãmba 3:16) Porfesɛɛr a Henry Chadwick gʋlsame n wilg tɩ yʋʋm kob-gĩnd a yiib soab seb-gʋlsd a Celsus ra yãame tɩ sẽn yet-b tɩ b yaa kiris-nebã sẽn da yɩɩnd yɩɩl ninsã “ra yaa nood wʋsg hal tɩ ra kãbd-a sũuri.” A Chadwick paasa woto: “A Kelma sẽn yit Alɛgsãndri wã n yɩ pipi kiris-ned n gʋls n wilg reem buud ning sẽn zems ne kiris-neda. A wilgame tɩ ka segd n yɩ reem ne saoog sẽn nekd pag ne rao lageng tʋlsem ye.” (The Early Church, seb-neng 274-5) Wõnda pipi kiris-nebã sã n da tigim taaba b ra yɩɩndame. Woto me, a Zeova Kaset rãmbã nong n yɩɩnda yɩɩl sẽn tik Biiblã zug n pẽgd Wẽnnaam la a Rĩungã.
5. a) Wãn-wãn la pipi kiris-neb tigimsã ra paamd sor-wilgri? b) Wãn-wãn la kiris-neb hakɩkã tũ a Zezi goam nins sẽn be Matɩe 23:8 9 pʋgẽ wã?
5 Pipi kiris-neb tigimsẽ wã, kãsem dãmbã n da zãmsd nebã sɩdã, tɩ kãsemb sõngdbã ra sõngd b tẽed-n-taasã ne manesem toɛy-toɛya. (Filip rãmba 1:1) Taoor lʋɩtb sull sẽn da teeg Wẽnnaam Gomdã la vʋʋsem sõngã n da kõt sor-wilgr tẽebã wɛɛngẽ. (Tʋʋma 15:6, 23-31) B ra ka tũnugd ne waoogr yʋy me ye, bala a Zezi ra kõo karen-biisã noor tɩ: “Bɩ yãmb da bao tɩ neb bool yãmb tɩ Karensaamb ye, tɩ bõe, yãmb karen-saamb ya a ye bala, la yãmb fãa yaa ba-biisi. Bɩ y ra bool ned dũniyã zug tɩ yãmb ba ye, tɩ bõe, yãmb Ba ya a ye bala n be arzãna.” (Matɩe 23:8, 9) Zĩ-kãensã la zĩis a taab wɛɛngẽ, yɛl n be tɩ pipi kiris-nebã ra maandẽ tɩ wõnd wa a Zeova Kaset rãmbã sẽn maandã.
B paama namsg b sẽn moon sɩdã yĩnga
6, 7. Baa kiris-neb hakɩkã sẽn da moond laafɩ koɛɛgã, manesem bʋg la nebã tall ne-ba?
6 Baa pipi kiris-nebã sẽn da moond Rĩungã laafɩ koɛɛgã, b nams-b-la wa b sẽn da nams a Zezi wã. (Zã 15:20; 17:14) Pĩnd yɛl mit a John von Mosheim yeelame tɩ yʋʋm kob-yendẽ kiris-nebã ra yaa “neb sẽn ka maand ned wẽnga, sẽn zɩ n tall tags-wẽng b yamẽ ne tẽngã neer ye.” Doktɛɛr a Mosheim yeelame tɩ bũmb ning “sẽn da kãbd Rom dãmbã sũy tɩ b ra zabd ne kiris-nebã yaa b tũudmã yel-maandɩ sẽn yaa nana, tɩ yaa toor fasɩ ne neb a taabã tũudum yɛlã.” A paasame: “B ra pa kʋʋd maoongo, b ra ka tar wẽn-doto, bõn-naandse, kinkir bagba, bɩ maan-kʋʋdb ye. La woto ra seka a na kɩt tɩ nebã wʋsgã sẽn ka mi wã ning-b taale, b sẽn tags tɩ tũudum ba a ye ra ka tõe n ka tũnug ne tũudum bõn-maandɩ kãensa wã. Rẽ kɩtame tɩ b ra get kiris-nebã wala wẽnd-kae rãmba. La Rom dãmbã laloa wilgdame tɩ neb nins b sẽn ning taal tɩ b yaa wẽnd-kae rãmbã yaa zamaanã neb nins sẽn ya-b wẽns n yɩɩdã.”
7 Maan-kʋʋdba, te-naandba, la neb a taab sẽn tũnugd ne bõn-naandsã pʋʋsg n paamd b noor dɩɩbã tusa nin-buiidã tɩ b zab ne kiris-nebã, b sẽn da ka kẽed bõn-naands pʋʋsg yɛl pʋsẽ wã yĩnga. (Tʋʋma 19:23-40; 1 Korẽnt dãmba 10:14) A Tɛrtiliẽ gʋlsame: “B ra tẽedame tɩ kiris-nebã n yaa sabab ne yel-beed buud fãa sẽn paamd tẽngã, bɩ sẽn wat nin-buiidã zutu. Yaa saag n ni tɩ koom lim tẽngã n ta lalse, tɩ yaa koom n ka pid Nill Kʋɩlgã n puug tɩ koom sek pʋtã me, yaa saag n pa ni tɩ yaa tẽngã n digimd me, yaa kom n wa tẽngã tɩ yaa yel-beed n maan me, neba fãa tarame bal “tɩ b lob kiris-nebã gɩgmã tɩ b wãb-ba!’ ” Kiris-neb hakɩkã ‘gũusa b mens n ka pʋʋs bõn-naands ye,’ n ka bʋ yell ning fãa sẽn da tõe paam-b rẽ yĩng ye.—1 Zã 5:21.
Sɩdã la tũudmã kibs rãmba
8. Bõe yĩng tɩ neb nins sẽn kẽnd sɩdã pʋgẽ wã ka maand Nowɛlle?
8 Neb nins sẽn kẽnd sɩdã pʋgẽ wã gũusdame n ka maand kibs rãmb sẽn ka tik Biiblã zug ye, bala ‘lageng ka be vẽenem ne lik sʋk’ ye. (2 Korẽnt dãmba 6:14-18) Wala makre, b ka maand Nowɛllã nebã sẽn maand yʋʋm-sar kiuug rasem 25 wã ye. Sebr a yembr (The World Book Encyclopedia) sak n deegame tɩ “ned ba a ye ka mi Kiristã rogem daar takɩ ye.” Tɩ sebr a to (Encyclopedia Americana, yʋʋmd 1956 rẽndã) yeel woto: “Yaa Rom kibs ning b sẽn boond tɩ Saturnalia wã b sẽn da maand yʋʋm-sar kiuugã pʋɩ-sʋk sasa wã, n kõ makr ne Nowɛllã sũ-noog yel-maandɩ wʋsgo.” Sebr a to (a M’Clintock ne a Strong Cyclopædia) leb n wilgame tɩ: “Nowɛllã ka Wẽnnaam n kõ noor tɩ b maan ye, a leb n ka yit Kãab Paalgã pʋgẽ me ye.” Sebr ning gom-zug sẽn yaa La vie quotidienne en Palestine au temps de Jésus wã yeela woto: “Rũmsã . . . ra paga rot pʋsẽ waooda wakate. Woto bal seka a na kɩt tɩ b bãng tɩ b sẽn minim n maand Nowɛllã wakat ningã, sẽn yaa waoodã sasa wã ka sɩd ye, bala evãnzill dãmbã wilgame tɩ pe-kɩɩmbã ra bee pʋtẽ.”—Luk 2:8-11.
9. Bõe yĩng t’a Zeova pĩnd la masã sõgen dãmb ka maand kiris-neb Paka?
9 Nebã tagsdame tɩ kiris-neb Pakã yaa kibs sẽn tẽegd Kiristã vʋʋgre, la sɛb d sẽn tõe n tall bas-yard ne wilgdame t’a tɩ loee ne ziri tũudmã. Gom-biis võor sebr a yembr (The Westminster Dictionary of the Bible) yeelame tɩ “sɩngrẽ wã [kiris-neb Pakã] ra yaa kibs b sẽn maand pẽrẽntã wã sasa n waoogd zɛrmanik vẽenem la pẽrẽntã wẽnnaam dãmbã, tɩ ãnglo sagsõ rãmbã ra boonda tɩ Eastre,” bɩ Eostre. Sẽn ya a soab fãa sebr a ye (Encyclopædia Britannica 11 soabã) yeela woto: “Bũmb ka be Kãab Paalgã pʋgẽ sẽn wilgd tɩ b maana kiris-neb Pak ye.” Pipi kiris-nebã ra ka maand kiris-neb Pak ye, dẽ tõnd wakatã me a Zeova nin-buiidã ka maand Pak ye.
10. Bõe la a Zezi lugl tɩ b maandẽ, la ãnda n maan dẽ wa sẽn segda?
10 A Zezi pa kõ a karen-biisã noor tɩ b maan kibs n tẽeg a rogem bɩ a vʋʋgr ye, la a lugla a kũuma sẽn yɩ maoongã Tẽegre. (Rom dãmba 5:8) Sɩda, yaa rẽ bal la a Zezi kõ a karen-biisã noor tɩ b tẽege. (Luk 22:19, 20) A Zeova Kaset rãmbã ket n maanda bõn-kãngã b sẽn boond me tɩ Soaalã zaabr dɩɩbã yʋʋmd fãa.—1 Korẽnt dãmba 11:20-26.
B moona sɩdã tẽngã gill zugu
11, 12. Wakat fãa, wãn-wãn la b rãmb nins sẽn kẽnd sɩdã pʋgẽ wã teel koe-moonegã tʋʋmde?
11 Neb nins sẽn bãng sɩdã getame tɩ yaa zu-noog n kõ-b tɩ b rɩk b sẽkã, b pãngã, la bũmb a taab b sẽn tar n kẽes koe-noogã mooneg tʋʋmd pʋgẽ. (Mark 13:10) Ra yaa kũunã b sẽn kõt ne yamleoogã n sõngd pipi kiris-nebã tɩ b moon koe-noogã. (2 Korẽnt dãmba 8:12; 9:7) A Tɛrtiliẽ gʋlsa woto: “Baa ligd ningr zĩig sã n da beẽ me, ligd ning sẽn be a pʋgẽ wã ka ligd neb sẽn yao n na n kẽ tũudmã pʋgẽ, tɩ yaa wala tũudmã lebga leebg yell ye. Ned fãa ra wata ne ligd bilf vugr kiuug fãa, bɩ a sẽn tʋll wakat ninga, sã n mikame t’a sɩd tʋllame la a tõeyã, tɩ bala b ka modgd ned ba a ye. Kũuna yaa ne yamleoog la b maanda.”—Apologétique sak 39.
12 Yaa yamleoog kũuna me n sõngd a Zeova Kaset rãmba tɩ b maand Rĩungã mooneg tʋʋmd dũniyã gill zugu. A Zeova Kaset rãmbã sẽn yãk b toogo, sɩdã ratb nins sẽn tar mi-beoogã getame tɩ yaa zu-noog ne-b tɩ b teel tʋʋm-kãngã ne ligdi. Ka me, d le neeme t’a Zeova Kaset rãmbã sẽn maandã wõnda pipi kiris-nebã sẽn da maandã.
Sɩdã, la meng yel-manesmã
13. B yel-manesmã pʋgẽ, a Pɩɛɛr sagl-bʋg la a Zeova Kaset rãmbã sakda?
13 Pipi kiris-nebã sẽn da yaa neb sẽn kẽnd sɩdã pʋgẽ wã, b tũu tʋm-tʋmd a Pɩɛɛr sagl-kãngã: “Bɩ y kɩt tɩ yãmb yel-manesem yɩ sõama neb nins sẽn ka pʋʋsd Wẽnnaama sʋka, tɩ baa bãmb sẽn kãnegd yãmb wa nin-wẽnsã, bãmb na waoog Wẽnnaam b waoonga daare bãmb sẽn na n yã yãmb tʋʋm sõama wã yĩnga.” (1 Pɩɛɛr 2:12) A Zeova Kaset rãmbã sakda gom-kãensã ne b sũy fãa.
14. Kiris-nebã tagsg yaa wãn-wãn ne reem nins sẽn wilgd yoobã yɛlã?
14 Baa sɩdã kɩɩsg sẽn da wa n piuugã poore, neb nins sẽn da yet tɩ b yaa kiris-nebã ra lakda b mens ne yoobo. A William Dool Killen sẽn yaa tũudum pĩnd yɛl porfesɛɛr gʋlsa woto: “Yʋʋm kob-gĩn a yiib la a tãab soabã wakate, galʋ-tẽn-kãseng fãa pʋgẽ, reemã roogẽ n da yaa zĩig ning nebã sẽn da nong n debdẽ wã. Baa naoor wʋsgo reem-dɛɛmdbã sẽn da yaa neb vɩɩm manesem sẽn yaa yook wʋsgã, wakat fãa b reema ra pidsda wakat kãng nebã tʋls-wẽnse. . . . Kiris-neb hakɩkã fãa ra kisa reema zĩisi. . . . B ra zãagda b mens ne a yoobã yɛlã. Sẽn paase, b sẽn da tũnugd ne wẽn-zɩtbã tũudum wẽn-pogs la a wẽn-dapã wakat fãa wã kɩɩsda b tẽebã.” (The Ancient Church, seb-neng 318-19) Rũndã-rũndã me, a Zezi karen-biis hakɩkã lakda b mens ne reem nins sẽn yaa wẽnse, la sẽn wilgd yoobã yɛlã.—Efɛɛz rãmba 5:3-5.
Sɩdã, la ‘nanambsã’
15, 16. Ãnda la ‘nanambsã,’ la neb nins sẽn kẽnd sɩdã pʋgẽ wã tagsg ra yaa wãn-wãn ne-ba?
15 Baa ne pipi kiris-nebã yel-manesem sẽn da yaa sõma wã, Rom rĩm dãmbã wʋsg sẽn yɩɩd ka tall tagsg sẽn zems b zut ye. Pĩnd yɛl mit a Ernest Georges Hardy yeelame tɩ rĩm dãmbã ra get-b-la wala “nin-yẽesens sẽn zems ne kisgri.” Lɛta Bitini guvɛrneer a Plin le Zen ne Rĩm a Trazã sẽn gʋls taab wilgdame tɩ nanambsã ra ka mi kiris-nedemdã halhaal meng sẽn ya a soab ye. Kiris-nebã tagsg yaa wãn-wãn ne tẽngã pãn-soaadba?
16 Wala a Zezi dẽenem karen-biisã, a Zeova Kaset rãmbã sakda “nanambsa noyã.” (Rom dãmba 13:1-7) Ninsaalbã sã n baood tɩ kiris-nebã maan bũmb sẽn kɩɩsd Wẽnnaam daabã, b tagsg yaa woto: “A zemsame tɩ tõnd sak Wẽnnaam n yɩɩd nebã.” (Tʋʋma 5:29) Sebr a yembr (After Jesus—The Triumph of Christianity) yeela woto: “Yaa sɩd tɩ kiris-nebã ra ka balemd rĩma ye, la b yaool n da ka tẽn-dãmbdb me ye. Sẽn paase, baa ne wẽn-zɩtbã sẽn da get tɩ b tũudmã yaa toor t’a manesmã zabd-b wakat ningã, a ra ka yell n kõ soolmã neb ye.”
17. a) Pipi kiris-nebã ra teenda goosneem bʋgo? b) Wãn to la Kiristã karen-biisã tũ goam nins sẽn be Ezai 2:4 pʋgẽ b vɩɩmã pʋgẽ?
17 Pipi kiris-nebã ra teenda Wẽnnaam Rĩungã wa a Abrahaam, a Izaak, ne a Zakoob sẽn tall tẽeb ne kãabg ning sẽn tɩ loe ne ‘tẽng Wẽnnaam sẽn naanã.’ (Hebre dãmba 11:8-10) Wa b Zusoabã, a Zezi karen-biisã “ka dũniyã rẽnd” ye. (Zã 17:14-16) Sẽn paase, b baoo laafɩ ‘n dɩk b sʋʋs n kʋd wãgse,’ n ka naag ninsaalbã zabẽ ye. (Ezai 2:4) A Geoffrey Nuttall sẽn yaa egiliizã pĩnd yɛl karen-saambã yãa yɛl sẽn wõnd taab zĩ-kãng wɛɛngẽ n yeele: “Pipi kiris-nebã sẽn da tagsd to-to zabrã wɛɛngẽ wã wõnda wa b rãmb nins sẽn boond b mens t’a Zeova Kaset rãmbã tagsg wʋsgo, tɩ yel-kãngã sakr yaa toog ne-do.”
18. Bõe yĩng tɩ goosneem ba a yembr ka tar bʋʋm n na n zoe a Zeova Kaset rãmbã?
18 Pipi kiris-nebã sẽn da yaa pa-kẽesd-m-toog rãmb n sakd ‘nanambsã’ yĩngã b ra ka yell n kõ pãn-soaadbã ye. Yaa woto me ne a Zeova Kaset rãmbã. Amerik rɩtgã zʋrnall gʋlsd a yembr gʋlsa woto: “Sã n ka a soabã yaa nin-sãbs la bas-yard kaalem soab tɩ loog fãa, ned ka be sẽn na n tẽ t’a Zeova Kaset rãmbã yaa yell n kõ pãn-soaad ba a yembr ye. B yaa tũudum neb sull sẽn ka sãamdba la sẽn nong laafɩ, wa sẽn segd n yɩ to-to ne tũudum.” Pãn-soaadb sẽn mi yɛlã sõma miimi tɩ bũmb ba a ye ka be sẽn segd n yɛɛs-b a Zeova Kaset rãmbã wɛɛngẽ ye.
19. Lampo rãmbã wɛɛngẽ, bõe la b tõe n yeel pipi kiris-nebã la a Zeova Kaset rãmbã wɛɛngẽ?
19 Bũmb a yembr pipi kiris-nebã sẽn maan n waoog ‘nanambsã’ yaa b sẽn da yaood b lampo rãmbã. A Zistẽ Martiir gʋlsa Rom naab a Antonin le Pieux (yʋʋmd 138-161) n yeel tɩ kiris-nebã ra yaooda b lampo rãmbã “ne yamleoog n yɩɩd neba fãa.” (Première apologie, sak 17) Sẽn paase, a Tɛrtiliẽ togsa Rom nanambsã tɩ b lampo rɛɛsdbã segd n “talla mi-beoog ne kiris-nebã” b sẽn ka reemd ne lampo rãmbã yaoobã yĩnga. (Apologétique, sak 42) Pax Romana bɩ Rom bãana nafa kiris-nebã, ne a sẽn da kɩt tɩ zems-n-taar be nebã sʋkã, tɩ so-sõma beẽ wã, la tɩ so-togr ko-kãsemsã zut be bãanã. Kiris-nebã ra sak n deegame tɩ bãmb me segd n maana bũmb n kõ zãmaanã neba, n dol b sẽn da paamdã, n tũ a Zezi sagl-kãngã: “Bɩ y kõ Sezaar bũmb nins sẽn yaa Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.” (Mark 12:17) Rũndã-rũndã me a Zeova Kaset rãmbã tũuda sagl-kãngã, tɩ nebã pẽgd-b b pʋ-peelmã yĩnga, wala makre lampo rãmbã yaoob wɛɛngẽ.—Hebre dãmba 13:18.
Sɩdã yaa bũmb sẽn lagemd neb ne taaba
20, 21. Sẽn tɩ loe ne laafɩ wã sẽn be saam-biisã sʋkã wɛɛngẽ, yel-bʋg n yaa sɩda pipi kiris-nebã la a Zeova masã sõgen dãmbã wɛɛngẽ?
20 Pipi kiris-nebã sẽn da kẽnd sɩdã pʋgẽ wã yĩng kɩtame tɩ b ra yaa saam-biis sẽn lagem taab laafɩ pʋgẽ, wa sẽn yaa to-to ne a Zeova Kaset rãmbã rũndã-rũndã wã. (Tʋʋma 10:34, 35) Lɛtr la b yiis The Moscow Times zʋrnallã pʋgẽ tɩ yet woto: “B mii a Zeova Kaset rãmbã sõma wa neb sẽn be yamleoogo, n yaa nin-sõamyã, la sẽn tar sik-m-mengã tɩ f moor tõe n yɩ noog ne-b nana-nana. B leb n ka namsd neb a taabã ye, sẽn paase, b baooda laafɩ ne neb a taabã . . . Bãmb sʋkã, ned ka be n deegd zãmb kũuni, n yaa rã-tɩgd bɩ dorg yamb ye, la ka toog tɩ d bãng bũmb ning sẽn kɩt tɩ yaa woto wã ye. B modgdame n na n bas tɩ b tẽebã sẽn tik Biiblã zugã wilg-b sor bũmb ning fãa b sẽn yet la b maandẽ wã pʋgẽ. Dũniyã neb fãa sã n da makdẽ n na n tũ Biiblã wa a Zeova Kaset rãmbã sẽn maand to-to wã, tõnd dũniyã sẽn yaa nen-kɛglem dũniyã na n toeema zãng fasɩ.”
21 Sebr a yembr (Encyclopedia of Early Christianity) yeelame: “Pipi egiliizã neb ra geta b mens wa ninsaalb zamaan paalga, t’a pʋgẽ bɩ ninsaalb moor sẽn da ka noom ne taab pĩnda, wala Zʋɩf rãmb la bu-zẽms neba, ra tõe n vɩɩmd ne taab laafɩ pʋgẽ.” A Zeova Kaset rãmbã me yaa dũni gill saam-biis sẽn nong laafɩ, n sɩd yaa zamaan paalga. (Efɛɛz rãmba 2:11-18; 1 Pɩɛɛr 5:9; 2 Pɩɛɛr 3:13) Pretoria sẽn be Afirikdisiidã reem zĩigẽ zĩ-gũudb taoor soabã sẽn yã Kaset rãmb sẽn yit buud toɛy-toɛy sẽn tigim taab tigis-kãsengẽ ne laafɩ wã, a yeelame: “Neba fãa tara waoogr manesem, b ra gomda ne taab ne yamleoogo, manesem ning b sẽn tall rasem a wãna pʋgẽ wã wilgdame tɩ yãmb sorã neb vɩɩm manesem yaa sõma, la tɩ yãmb vɩɩ ne taab wa zak a ye neb sẽn tar sũ-noogo.”
B paama bark b sẽn zãmsd nebã sɩdã yĩnga
22. Kiris-nebã sẽn sɩng n wilgd sɩdã vẽenegã tɛka, bõe n maanda?
22 A Poll ne kiris-neb a taabã ‘wilga sɩda vẽeneg’ ne b manesmã la ne b moonegã. (2 Korẽnt dãmba 4:2) Rẽ yĩnga yãmb ka sak t’a Zeova Kaset rãmbã maanda woto me, la b zãmsd tẽn-tẽnsã fãa sɩdã sɩda? Tẽngã fãa gill zugu, neba sakda baleng hakɩkã ne sũ-noog n kaoogd n debd ‘Zusoaba roog tãngẽ,’ tɩ b sõorã tar paasg n debd bala. (Ezai 2:2, 3) Yʋʋmd fãa, neb tusa n deegd lisg n wilgd tɩ b rɩka b mens n kõ Wẽnnaam, tɩ kɩtdẽ tɩ b tõe n maan tigims paals wʋsgo.
23. Yãmb tagsg yaa wãn-wãn ne b rãmb nins sẽn zãmsd tẽn-tẽnsã fãa neb sɩdã?
23 Ba a Zeova Kaset rãmbã sẽn yit zĩis toɛy-toɛyã, b tara lagem-n-taar sɩd balengã pʋgẽ. Nonglem ning b sẽn wilgdã kɩtdame tɩ nebã bãng tɩ bãmb la a Zezi karen-biisi. (Zã 13:35) Rẽ yĩnga yãmb tõe n yãame tɩ ‘Wẽnnaam sɩd bee bãmb sʋk’ bɩ? (1 Korẽnt dãmba 14:25) Rẽ yĩnga yãmb teenda b rãmb nins sẽn zãmsd tẽn-tẽnsã fãa neb sɩdã bɩ? Sã n yaa woto, bɩ y wilg wakat fãa tɩ y tara mi-beoog sɩdã yĩnga, n paam zu-noog n kell n kẽn a pʋgẽ wakat fãa yĩnga.
Tẽegre
Wãn to la y na n leokẽ?
• Balengã wɛɛngẽ, wõneg bʋg n be pipi kiris-nebã sẽn da maand to-to wã ne a Zeova Kaset rãmbã sẽn maandã?
• Tũudum yel-tẽegdem bʋg bal la neb nins sẽn kẽnd sɩdã pʋgẽ wã maanda?
• Ãnda rãmb la ‘nanambsã,’ la kiris-nebã tagsg yaa wãn-wãn ne-ba?
• Wãn to la sɩdã lagemd neb ne taaba?
[Zãmsgã sogsgã]
[Foto rãmba, seb-neng 19]
A Zezi kõo a karen-biisã noor tɩ b maan a kũuma sẽn yɩ maoongã