Tẽeb ziri wã soo yãmb vɩɩmã bɩ?

TẼEB ziri wã bee dũniyã zĩig fãa. Wakat ninga b get-b-la wala rog-n-mik bũmbu. Bɩ b tõe n ges-b-la wa bũmb sẽn ka yõod wʋsgo, la sẽn paasd vɩɩmã noom bala. Nasaar tẽnsẽ wã b pa get tẽeb ziri wã wa bũmb sẽn tar yõod woto ye. Zĩis a taab wala Afiriki, tẽeb ziri wã tara pãng wʋsg nebã vɩɩm pʋgẽ.

Afirik rog-n-mikã yɛl wʋsg tika tẽeb ziri wã zugu. Sĩnima wã, radio wã n paas sɛb nins b sẽn yiisd Afirikã gomda tẽeb ziri wã la yel-soalem a taab wala tɩɩma yɛla, yaab rãmbã baleng la tɩɩm buud fãa sẽn na yɩl n kogl f meng yelle. Bõe yĩng tɩ tẽeb ziri wã tar pãng wʋsg woto nebã zutu, la yaa yɛ la tẽeb ziri wã yita?

Yaa bõe n wa ne tẽeb ziri wã?

Yaa nebã sẽn zoet kɩɩmsã la zĩn dãmb buud fãa wã yĩng la sẽn kɩt tɩ tẽeb ziri wʋsg beẽ wã. Yɛl sã n maane, nebã tagsdame tɩ yaa bãmb n wat sẽn vɩ-bã nengẽ n dat n wa ne yelle, keoogr bɩ keoore.

Tẽeb ziri wã tara loees wʋsg me ne tɩbsgã la tɩp-tɩɩmã. Ne neb wʋsg sẽn be tẽns nins sẽn nan yidgdã pʋsẽ, nasaar tɩpgã ligd yaa toog wʋsgo, la naoor wʋsgo, b pʋd n pa tõe n paam tɩbs-kãng buudã ye. Woto kɩtame tɩ neb wʋsg baood b bãasã tɩɩm bɩ b makd n na n beool bãasã n kẽed rog-n-mikã yel-maandɩ, tɩɩm dɩɩb la tẽeb ziri wã yɛl pʋsẽ. B leb n nonga tɩɩm dãmbã sẽn mi b rog-n-mikã la b gomd bãmb buud goamã n yɩɩd nasaara yir logtorã. Rẽ n so tɩ tẽeb ziri wã ket n tar pãng wʋsgo.

Rog-n-mik sẽn yaa tẽeb ziri wã tagsdame tɩ bãasã la sãmpoagã pa wat yaar woto, la tɩ yaa zĩn dãmbã bɩ kɩɩmsã n wat ne-ba. Tɩɩm dãmbã tõe n yeelame tɩ ned yaab sẽn ki sũur n pa noom ne bũmbu. Pa rẽ bɩ kinkir bag yeel tɩ ned n tũnug ne tɩɩm soab a to n kãab kãab-beed sẽn be-a toog pʋgẽ wã zugu, la tɩ yaa rẽ yĩng la sẽn kɩt tɩ bãagã bɩ sãmpogrã wa wã.

Dũniyã gill zugu, tẽeb ziri pa yembr baa bilf zĩig ne a to fãa ye. Sẽn paase, tẽeb ziri wã yelgr bee ne zĩig fãa rog-n-miki, a soalmã la yɛl a taaba. La b fãa yel-yɛngã yaa b sẽn tẽed tɩ ned bɩ bũmb sẽn yit kɩɩmsẽ wã wall zĩn dãmbã dũni pʋgẽ n baood tɩ b sigs a sũurã.

Tẽeb ziri wã yaa yell bɩ a pa yelle?

Ne zags wʋsgo, kinkirs rogem yaa bũmb sẽn yaa toor zall la sẽn kõt sũ-noogo. Baasgo, sã n yaa ne tẽeb ziri wã rãmba, b tõe n ges-a-la wala bãnde. Afirik nen-taoor zĩis kẽere, neb wʋsg geta kinkirs rogem wala wẽnnaam dãmb dogem, tɩ rẽ kɩt tɩ b balemd kinkirsã. Kinkirg a yembr bɩ a yiibã fãa sã n  ki, b maanda bõn-naands kɩds sẽn yaa b wẽnego, tɩ zakã neb segd n kõ bõn-naands kãens rɩɩbo. Zĩis a taaba, nebã geta kinkirs rogem wala kãab wẽnga, hal tɩ kɩt tɩ roagdb kẽer yãkd biig a ye n kʋ wall b yiibã fãa. Bõe yĩnga? Yaa b sẽn tẽed tɩ b yiibã fãa sã n ket n vɩya, daar n be tɩ b na n kʋ b roagdbã.

Makr a woto wilgdame tɩ baa ne tẽeb ziri kẽer sẽn wõnd b yaa bõn-sãams n ka yellã, a taab tõe n yɩɩ yelle, n wa ne yõor yãkr menga. Bũmb sẽn pa yell sã n maane, tɩ b bilg a võorã kɛgre, a tõe n lebga yell masã.

Sɩd-sɩda, tẽeb ziri wã yaa tũudum buudu. D sã n ges tẽeb ziri wã sẽn tar yɛl a woto wã, zemsame tɩ d sʋk woto: Yaa ãnd la tẽeb ziri wã la tʋʋm nins sẽn naag-a wã nafda?

Tẽeb ziri wã yẽgre

Baa ne yɛlã sẽn kõt kaset t’a Sʋɩtãan ne zĩn dãmb sẽn yaa wẽns beeme wã, rũndã-rũndã neb wʋsg pa rat n sak n deeg b belmã ye. Baasg zãnga, zabr wakate, f sã n pa sak n deeg tɩ bɛ sẽn yaa wẽng n be, tõe n waa ne yel-beed bala. Tõe n yɩɩ woto me ne zabr ning d sẽn maand ne zĩn dãmbã pãng sẽn yɩɩd ninsaalbã pʋgẽ, bala tʋm-tʋmd a Poll gʋlsa woto: ‘Tõnd zabr . . . yaa ne sɩɩs wẽns buud fãa.’—Efɛɛz rãmba 6:12.

Baa ne tõnd sẽn pa tõe n yã zĩn dãmbã sẽn yaa wẽnsã, b sɩd beeme. Biiblã wilgdame tɩ malɛk n tũnug ne waaf n gom ne pipi pag a Hawa, tɩ rẽ kɩt tɩ pagã kɩɩs Wẽnnaam noore. (Sɩngre 3:1-5) Biiblã wilgdame tɩ malɛg-kãng yaa “wag-kʋdre sẽn boond tɩ diable la Sʋɩtãana sẽn belgd dũniyã fãa wã.” (Wilgri 12:9) Yẽ soabã sẽn ya a Sʋɩtãanã tõogame n belg malɛgs a taab tɩ b kɩɩs Wẽnnaam. (Ziid 6) Malɛg-wẽns kãens lebga zĩn dãmba, Wẽnnaam bɛɛba.

A Zezi riga zĩn dãmb n yiis ninsaalb pʋsẽ. A karen-biisã me maana woto. (Mark 1:34; Tʋʋma 16:18) Malɛg-kãens pa yaab rãmbã sẽn ki wã ye, bala kũum “ka mi bũmb ye.” (Koɛɛg Soaba 9:5) Sẽn yaa lebende, yaa bãmb la malɛg-tõts nins a Sʋɩtãan sẽn da belgã. Bao  n gom ne-ba, bɩ sak b pãn-tusdgã pa bũmb d sẽn segd n ges wa yel-bil ye, bala wala b taoor soab a Sʋɩtãan Munaafɩɩka, b rat n sãama tõndo. (1 Pɩɛɛr 5:8) B bõn-datlã yaa b kɩt tɩ tõnd bas saag-yɛng ning bal ãdem-biisã sẽn tare, sẽn yaa Wẽnnaam Rĩungã.

Biiblã pukda manesem a yembr a Sʋɩtãan la a zĩn dãmbã sẽn tũnugd ne, n yetẽ: “Sʋɩtãana toeemda a meng n lebgd vẽenem malɛɛka.” (2 Korẽnt dãmba 11:14) A Sʋɩtãan dat n belga tõnd tɩ d tẽ tɩ yẽ tõe n kõo tõnd vɩɩm sẽn yaa sõma n yɩɩda. Woto yĩnga, wakat bilf pʋgẽ, tõe n wõnda zĩn dãmbã sẽn yaa wẽnsã sõngr bee nafre. La b pa tõe n wa ne tɩɩm sẽn na n yiis y yɛlã wakat fãa yĩng ye. (2 Pɩɛɛr 2:4) B pa tõe n kõ ned ba a ye vɩɩm sẽn pa sate, la ka la bilfu b na n sãamame. (Rom dãmba 16:20) Yaa tõnd Naandã bal n kõt vɩɩm sẽn pa satã la sũ-noog sɩd-sɩdã. Leb n yaa yẽ bal n kõt koglg sẽn yaa sõma n yɩɩd fãa zĩn-wẽnsã taoore.—Zak 4:7.

Wẽnnaam gɩdgame tɩ d ra tũnug ne tɩɩm la bagr n bao sõngr ye. (Tõodo 18:10-12; 2 Rĩm dãmba 21:6) Rẽ yaa lageng ne bɛ wã, kaool maaneg ne sẽn bas-b Wẽnnaamã! Bagr bʋgb ne b sẽn boond tɩ horoskopã tũnugri, tɩɩm soab nengẽ kẽngre, bɩ kẽes-m-meng baa yaa bilf tẽeb ziri buud fãa pʋgẽ, wilgdame tɩ f sakdame tɩ zĩn dãmbã wilg-f sor sard nins f sẽn dɩkd f vɩɩmã pʋgẽ wã. Rẽ ne y sẽn lagem-b n kɩɩsd Wẽnnaam yaa yembre.

Y tõe n paama koglg ne wẽngã bɩ?

Nizɛɛr rao yʋʋr sẽn boond t’a Ade * ra zãmsda Biiblã ne a Zeova Kaset soab a yembr sẽn moond koe-noogã wakat fãa. A Ade wilga bũmb ning sẽn kɩt t’a ra tar tɩ-yodr a butikẽ wã: “Bɛɛbã yaa wʋsgo.” A Ade sẽn zãms Biiblã sõng-a lame t’a bãng tɩ ya a Zeova bal n tõe n sɩd kogl neda. Kaset soabã karma Yɩɩl Sõamyã 34:7, t’a Ade kelge: “[A Zeova, NW ] malɛk rãmb gũbgda neb nins sẽn zoet bãmbã n fãagd bãmba.” Rẽ poore a Ade yeela woto: “A Zeova sã n sɩd tõe n kogl maam, rẽnd m na n basa tɩ-yodrã.” Masã, yʋʋm wʋsg poore, a lebga tiging kãsem soaba, la  wakat fãa so-pakda. A bɛ ba a ye pa tõog n maan-a wẽng ye.

Biiblã wilgdame tɩ yel-lingdem paamda tõnd fãa, d yaa tẽeb ziri soab tɩ d pa woto me. (Koɛɛg Soaba 9:11) La a Zeova pa makd tõnd ne bõn-wẽns abada. (Zak 1:13) Yaa yel-wẽnd ning a Ãdem sẽn bẽeg tõndã n wa ne kũumã la pa-zems-zãngã. (Rom dãmba 5:12) Yaa rẽ n kɩt tɩ ned fãa lʋɩt bãag wakat-wakatã, la d maand tudgr sẽn tõe n wa ne yel-beedã. Woto yĩnga, na n yɩɩ tudgr tɩ d yeel tɩ bãasã fãa bɩ d zu-loeesã fãa yita zĩn dãmbã nengẽ. Tẽeb kãngã na n tusa tõnd bal tɩ d bao n sigs zĩn dãmbã sũy ne manesem buudu. * Tõnd sã n pa keemẽ, d segdame n bao tɩbsg sẽn zemse, la d ra bao saglg “ziri ba” a Sʋɩtãan Munaafɩɩkã nengẽ ye. (Zã 8:44) B geelame n mik tɩ neb nins sẽn vɩ tẽns nins pʋsẽ tẽeb ziri sẽn tɩ loe ne yaab rãmbã sẽn be wʋsgã pa vɩ n kaoosd n yɩɩd bɩ n tar vɩɩm sẽn yaa sõma n yɩɩd tẽns a taabã neb ye. Rẽnd vẽenega, tẽeb ziri wã pa kõt yĩns laafɩ ye.

Wẽnnaam pãng yɩɩda zĩn dãmba fãa, la a rata tõnd neere. “Zusoaba geta nin-tɩrse, la b wʋmda bãmb pʋʋsgo.” (1 Pɩɛɛr 3:12) Pʋʋs-y n kos-a t’a koglg-y la a kõ-y yam. (Yelbũna 15:29; 18:10) Maan-y modgr n wʋm a Gomdã sẽn yaa Biiblã võore. Biiblã bãngr takɩ n yaa koglg ning sẽn yaa sõma n yɩɩdã, bala rẽ na n sõnga tõnd tɩ d bãng bũmb ning sẽn kɩt tɩ bõn-wẽnsã watẽ wã, la d sẽn tõe n paam Wẽnnaam sẽn tõeyã fãa wã lohorem to-to.

Wẽnnaam bãngr nafa

A Zeova la a raabã rũndã la beoog daar yĩngã bãngr takɩ yaa bũmb sẽn yaa lebend ne zɩɩlmã la tẽeb ziri wã. Bãng-kãng bal n sɩd tõe n kogl tõndo. Rao a ye sẽn yit Benẽ yʋʋr sẽn boond t’a Zã makr wilgda rẽnda. Tẽeb ziri wã ra tara pãng wʋsg a Zã zakã neb zutu. Sã n yaa ne buudã rog-n-mik tẽeb ziri wã, pag sẽn dog biribl paalem segd n paa sug-roog sẽn yaa toor zall pʋgẽ dasem a wɛ. La sã n yaa bipugl la a rog-yã, a na n paa sug-roogẽ n maan dasem a yopoe.

Yʋʋmd 1975 wã, a Zã pagã roga biribl-neere, tɩ b pʋd a yʋʋr t’a Mark. A Zã ne a pagã tika b Biibl bãngrã zugu, n da pa rat n maan baa fʋɩ sẽn tɩ loe ne zĩn dãmbã ye. La b na n zoee rabeem n tũ tẽeb ziri wã n kɩt tɩ biigã ma zĩnd sug-roogẽ wã bɩ? Ayo, b zãgsa buudã tẽeb ziri.—Rom dãmba 6:16; 2 Korẽnt dãmba 6:14, 15.

Rẽ yĩnga yel-beed paama a Zã zaka rãmb bɩ? Yʋʋm wʋsg loogr poore a Mark lebga kãsemb sõngd a Zeova Kaset rãmbã tiging pʋgẽ. A Zã zakã neb fãa tara sũ-noogo b sẽn pa bas tɩ tẽeb ziri wã tall pãn-tusdg b vɩɩma zug n sãam b tẽebã yĩnga.—1 Korẽnt dãmba 10:21, 22.

Kiris-neb hakɩkã segd n zãaga b mens ne tẽeb ziri wã yɛl sẽn yaa wẽnsã b vɩɩmã pʋgẽ, la b sak tẽebã vẽenem Naand a Zeova la a Biribl a Zezi Kirist sẽn kõtã. Yaa woto la b tõe n paam sũur pʋgẽ bãane, b sẽn mi tɩ b maanda sẽn yaa tɩrg Wẽnnaam nifẽ wã yĩnga.—Zã 8:32.

[Tẽngr not rãmbã]

[Zĩ-gũbri/Foto, seb-neng a 5]

Tẽeb ziri sẽn wɛ dũniyã gill zugã

• Mood a yiib sẽn sel mui laagẽ yaa kũum bãnde.

• Vĩuug yãab wĩntoog yaa zu-beedo.

• Buzi bugum sã n ki neb sẽn tigim n tũud rog-n-mik yel-maandɩ wakate, rat n yeelame tɩ zĩn dãmb n be yambẽ.

• F sã n bas tɩ maasem tɩɩg lʋɩ tẽnga, rat n yeelame tɩ ned la b na n kʋ zakã pʋgẽ.

• Rɩk pugl n dogl gadg zug wata ne zu-beedo.

• Lombr dãamd rigda zĩn dãmba.

• Buzi rãmbã fãa kiisg vugr rogem tẽegr kibs gato zug kɩtdame t’a soabã sẽn dat paam pidsgu.

• Rɩk saag n dell gadg kõta zĩn dãmbã sẽn be saagẽ wã sor tɩ b wa ne kãab wẽng gadgã zugu.

• F sã n kẽnd tɩ yũ-sablg pɩʋʋg f taoore, wata ne zu-beedo.

• F fursɛt sã n fãag n lʋɩ rat n yeelame tɩ rao n na n wa ges-fo.

• Wobd fot sã n tees roog noore, wata ne zu-noogo.

• Wed-moaag na-bend bãens sã n yag rig-noor zugu, wata ne zu-noogo.

• Yũnunyũug sã n yit roog zugu, yaa koglg ne wẽnga.

• Radg tẽngr kẽnd yaa zu-beedo.

• Nin-gɛtg wãab wata ne yʋʋm a yopoe zu-beedo.

• F sã n sãeeg zũmbri (poivre), rat n yeelame tɩ no-koeemd n na n yik foo ne f zo-nongr sʋka.

• F sã n sãeeg yamsem, wata ne zu-beedo, sã n pa f yãk-a-la zerɩ n zʋʋg f goabg bãokã n fãeege.

• F sã n yik zoambdg sẽn lengd zug n bas t’a ket n lengd vɩʋʋgo, boonda zĩn dãmb tɩ b wa zĩnd be.

• F sã n fõgen naooda, wata ne zu-beedo.

• Ned sã n ki, b segd n paka fẽneta wã n bas sɩɩgã t’a yi.

[Zĩ-gũbri, seb-neng a 4]

B paama b mens ne tẽeb ziri wã

A Zeova Kaset rãmbã ra moonda Afirikdisiid babg a ye pʋgẽ. B sẽn wa n wẽ sallem tɩ b pak roog a yembre, Kaset rãmbã sega pag sẽn da yeelg Sangoma (bag-bʋgd) fu-neeba. B ra rat n lebg n loogame, la pagã pẽdg-b lame tɩ b taas b koɛɛgã. Kaset soab a ye n karem Tõodo 18:10-12 sẽn na yɩl n wilg Wẽnnaam tagsg bag-bʋgendã yɛl wɛɛngẽ. Bagã reega koɛɛgã n sak Biibl zãmsgo. A yeelame tɩ Biiblã zãmsg sã n tõog n wilg yẽ tɩ Sangoma wã bɩ bag-bʋgendã sɩd kɩɩsda a Zeova raabã, a na n basa tʋʋm-kãngã.

A sẽn wa n zãms sebr ning sẽn yaa Y Tõe n Vɩɩmda Wakat Sẽn-kõn-sa Tẽng zug Arzãnẽ wã sak 10 ne Biiblã poore, a yõoga a bagrã teed fãa n sɩng n wat tigissẽ wã Rĩungã Roogẽ. Sẽn paase, a tɩ gʋlsa a kãadmã kãdengẽ tɩ zems ne laloa wã, baa ne a sẽn da welg ne a sɩdã yʋʋm 17 pʋgẽ wã. Masã, pʋg-kãngã ne a sɩda fãa ya a Zeova Kaset rãmb sẽn dɩk b mens n kõ-a.

[Foto, seb-neng a 4]

“Sangoma” sẽn bʋgd bagr ne kõab n dat n bãng bũmb ning sẽn wa ne nedã zu-loeese

[Foto rãmba, seb-neng a 6]

Wẽnnaam bãngr hakɩka kõta koglg la sũ-noogo