“Wẽnnaam tʋʋm-kãsemsa” tusda tõnd tɩ d maan a raabã

“Tõnd . . . wʋmd[a] bãmb sẽn gomd Wẽnnaam tʋʋm-kãsemsa ne tõnd mens goama.”—TƲƲMA 2:11.

1, 2. Yel-lingdem bʋg n zĩnd Zerizalɛm yʋʋmd 33 Pãntekotã sasa?

YƲƲMD 33, sig-noy wẽnd yibeoog a yembre, yel-lingdem wʋsg n paam rap la pagb sẽn da tigim taaba. Nin-kãens ra ya a Zezi Kirist karen-biis sẽn da tigim roog pʋgẽ Zerizalɛm. “La vugr bala bʋrg sẽn wẽnd sob-kãseng yii arzãna n wa n pid roog ninga bãmb sẽn be wã. La bãmb yãa zɛlma sẽn wẽnd bug-witim sẽn welg taab n zĩnd ned kam fãa zugu. Bãmb fãa pida ne Sɩɩg Sõngo. La b sɩngame n gom gom-zẽna.”—Tʋʋma 2:2-4, 15.

² Kʋʋng kãseng n tigim roogã noore. Zʋɩf rãmb sẽn dog tẽn-zẽmsẽ n da be bãmb sʋkã. Ra yaa neb ‘sẽn sakd tẽeba sõma’ sẽn da wa Zerizalɛm n na n maan Pãntekot kibsã. Ra ling-b-la wʋsgo, bala b ned kam fãa wʋma karen-biisã sẽn da “gomd Wẽnnaam tʋʋm kãsemsa” yell ne bãmb buudã goamã. Sẽn mik tɩ sẽn da gomd-bã fãa ra yaa Galile nebã, b yɩɩ wãn n tõog n maan dẽ?—Tʋʋma 2:5-8, 11.

3. Yaa koe-bʋg la tʋm-tʋmd a Pɩɛɛr taas kʋʋngã Pãntekotã sasa?

³ Tʋm-tʋmd a Pɩɛɛr da yaa Galile nin-kãensã a yembre. A wilgame tɩ semen a wãn  sẽn da reng rẽ, rap sẽn da pa nin-tɩrs n da kʋ a Zezi Kirist. Baasg zãnga, Wẽnnaam vʋʋga a Biriblã. Rẽ poore, a Zezi puka a karen-biisã nifẽ naoor wʋsgo. A Pɩɛɛr ne neb a taab me maana kaset ne rẽ. Rasem piig rẽ loogr poore, a Zezi ra rʋʋ saasẽ. Yaa yẽ n pʋdg vʋʋsem sõngã a karen-biisã zutu. Rẽ talla võor ne neb nins sẽn da maand-b Pãntekotã bɩ? N-ye. A Zezi kũumã paka sor n kõ-b tɩ b tõe n paam b yel-wẽnã sugr la b reeg “Wẽnnaam kũuna sẽn yaa Sɩɩg sõngã,” b sã n da tall tẽeb ne-a. (Tʋʋma 2:22-24, 32, 33, 38) Bõe la neb nins sẽn da be be n kelgdẽ wã maan-yã, b sẽn wʋm “Wẽnnaam tʋʋm kãsemsa”? La wãn to la kɩba-kãngã tõe n sõng tõnd tɩ d mag tõnd mengã tʋʋmd a Zeova yĩngã sẽn ta zĩig ninga?

Tus-b lame tɩ b tʋme!

4. A Zoɛll bãngr-gom-bʋg n pids yʋʋmd 33 Pãntekotã daare?

⁴ Karen-biisã sẽn be Zerizalɛmã sẽn paam vʋʋsem sõngã, b pa yaas n gũ la b sɩng n moond fãagr koe-noogã neb a taabã ye. B sɩnga ne kʋʋngã sẽn da tigim Pãntekotã raar yibeoogã. B moonegã pidsa bãngr-gom-kãsenga, a Petuɛll biig a Zoɛll sẽn gʋls yʋʋm kobs-nii sẽn da reng rẽ wã. A Zoɛll gʋlsame tɩ: “Mam na n pʋdga m sɩɩga neba buud fãa zutu. Yãmb komdibli ne y kompugli na n togsa bãngr goama. Yãmb nin-kẽemba na n zãmsa zãmsdo, la y rasãmba na n yãa bõn-makre. Baraare, mam na n pʋdga m sɩɩga yem-daad ne yem-pogs zutu . . . tɩ Zusoaba ra-kãsenga sẽn tar dabeema yaool n ta.”—Zoɛll 1:1; 3:1, 2, 4; Tʋʋma 2:17, 18, 20.

5. Wãn to la pipi yʋʋm kob-gĩndẽ kiris-nebã togs bãngr-goamã? (Ges-y tẽngr notã.)

⁵ Woto ra rat n yeelame tɩ Wẽnnaam da na n yãka rap la pagb tɩ b fãa yɩ no-rɛɛsdb n deng n togs beoog daar yɛl wala a Davɩɩd, a Zoɛll la a Debora bɩ? Ayo. ‘Komdibli la kompugli, yemb-raad la b yemb-pogsã’ yaa kiris-neba. B sẽn na n togs bãngr-goamã rat n yeelame tɩ b na n basame t’a Zeova vʋʋsem sõngã tus-b tɩ b togs ‘tʋʋm kãsems’ nins a sẽn da maan la a sẽn na n ket n maandẽ wã. Woto b na n yɩɩ Zãntlem sẽn yɩɩd fãa Soabã koe-taasdba. * La kʋʋngã manesem yɩɩ wãn to rẽ taoore?—Hebre dãmba 1:1, 2.

6. Kʋʋngã sẽn wʋm a Pɩɛɛr sõsgã, tusa neb wʋsg tɩ b maan bõe?

⁶ Kʋʋngã sẽn wʋm a Pɩɛɛr sẽn wilg yɛlã võorã poore, rẽ tusa bãmb wʋsg tɩ b maan bũmbu. B ‘deega a Pɩɛɛr goama,’ la b “paama koom lisgu. La baraare karen-biisa paasa sẽn kolg tus a tãabo.” (Tʋʋma 2:41) B sẽn da yaa Zʋɩf rãmb halaal la tẽn-zẽms neb sẽn tuub n sak Zʋɩf rãmbã tũudmã, b ra zoe n paama Gʋlsg Sõamyã zãms-kãsemse. Bãngr a woto sẽn naag ne a Pɩɛɛr zãmsgã b sẽn tẽ wã kɩtame tɩ b ra tõe n lis-b ne “Ba la Biiga la Vʋʋsem sõng yʋʋr yĩnga.” (Matɩe 28:19, Sebr Sõngo) B lisgã poore, “bãmb saka tʋm-tʋmdba sẽn zãms[ã].” Sasa kãng pʋgẽ me, b sɩngame n togsd neb a taabã b tẽeb paalgã. Sɩda, “daar fãa bãmb bee ne taab Wẽnnaam dooga pʋgẽ, . . . Bãmb pẽga Wẽnnaam la b paama bark neba fãa nifẽ.” B sẽn kõ kasetã woto wã yĩnga, “Zusoaba fãagda neb n paasdẽ.” (Tʋʋma 2:42, 46, 47) Pa yã n kaoos la b maan kiris-neb tigims paals tẽns wʋsg pʋsẽ tẽedb paals kãensã sẽn da vɩẽ n wã ye. Sãmbg sẽn ka be, yaa b sẽn modg wʋsg n moon “koe-nooga,” b sẽn wa n leb b yiyã yĩng me n sõng n wa ne fɩɩgr kãngã.—Kolos rãmba 1:23.

Wẽnnaam Gomdã tara pãnga

7. a) Yaa bõe n takd tẽn-tẽns fãa neb tɩ b wat a Zeova siglgẽ wã rũndã-rũndã? b) Bõe la y ne dũniyã gill zugu, la yãmb sẽn beẽ wã, sẽn wilgd tɩ fɩɩgr tõe n zĩndame? (Ges-y tẽngr notã)

⁷ Yaa wãn to ne neb nins sẽn tʋll n lebg  Wẽnnaam sõgen dãmb rũndã-rũndã wã? Bãmb me segd n zãmsa Wẽnnaam Gomdã neere. B sã n maan woto, b wat n bãngame t’a Zeova yaa Wẽnnaam sẽn ‘yaa nimbãan-zoeta la bark kõata, t’a sũur ka yikd tao-tao, la t’a nonglem yaa wʋsgo.’ (Yikri 34:6; Tʋʋma 13:48) B zãmsd n bãnga rondã sẽn yaa segl-sõng ning a Zeova sẽn maan n tũnug ne a Zezi Kirist, a soab ning zɩɩm sẽn tõe n yɩlg-b ne yel-wẽnã fãa wã. (1 Zã 1:7) B wat n talla mi-beoog me, b sẽn bãng tɩ Wẽnnaam raabã yaa tɩ ‘nin-tɩrs la sẽn pa-b nin-tɩrs me na n vʋʋgame’ wã. (Tʋʋma 24:15, NW ) Nonglem ning b sẽn tar ne a Soab ning sẽn maan ‘bõn-kãsems’ kãensã wã pita b sũyã, tɩ rẽ tus-b tɩ b rat n moon sɩd kãensã sẽn tar yõod wʋsgã. Woto, b rɩkda b mens n kõ, n deeg lisg n lebg Wẽnnaam sõgen dãmb la b ket n ‘bɩt Wẽnnaam bãngr pʋgẽ.’ *—Kolos rãmba 1:10b; 2 Korẽnt dãmba 5:14.

8-10. a) Wãn to la yell a yembr kiris-nin-poak sẽn vɩɩmd wilgd tɩ Wẽnnaam Gomdã “tara pãnga”? b) Bõe la yel-kãngã zãmsd yãmb a Zeova wɛɛngẽ, la a manesmã ne a sõgen dãmbã wɛɛngẽ? (Yikri 4:12)

⁸ Bãngr ning Wẽnnaam sõgen dãmbã sẽn zãmsd Biiblã n paamdẽ wã pa zugẽ-zugẽ bãngr ye. Bãngr a woto nekda b yĩn-sidsã, n toeemd b tagsgã, la a kẽed b sũyã. (Hebre dãmba 4:12) Wala makre, pag yʋʋr sẽn boond t’a Kamiy la b ra rɩk tʋʋm t’a get sẽn kʋʋl-bã yelle. A sẽn da get neb nins yellã a yembr yʋʋr la a Marte, sẽn ya a Zeova Kaset soaba. La a Mart zu-lɛbgã ra tara pãng wʋsgo, tɩ ra yaa tɩlae tɩ b ges a yell wakat fãa. B ra segd n tẽeg-a lame t’a rɩ, t’a vol a rɩɩbã menga. La ne rẽ fãa bũmb n da pa a Mart yamẽ wã a sẽn da pa tõe n yĩmi, wa d sẽn na n yã wã.

⁹ Daar a yembre, a Mart yãa a Kamiy sẽn yãbda, zu-loeesã a sẽn da tar tɩ sãam a sũurã yĩnga. T’a Mart mobg a Kamiy n yeel-a t’a wa t’a zãms-a Biiblã. La ned sẽn tar zu-lɛbg wa a Mart ra tõe n maana Biibl zãmsg ne ned sɩda? N-ye, a ra tõeeme! Baa ne a Mart pʋ-tẽerã sẽn da menem la balã, a ra pa tõe n yĩm a Wẽnnaam kãsengã yell ye. A ra leb n pa yĩm sɩdã sẽn tar yõod wʋsgã a sẽn da zãms Biiblã pʋgẽ wã ye. Zãmsgã wakate, a Mart zãmsa a Kamiy t’a karem sull fãa, t’a bao Gʋlsg Sõamyã verse rãmb b sẽn sõdgã, la a karem sʋkrã sẽn be seb-nengã tẽngrã, la a leok sʋkrã rẽ poore. Kell n yɩɩ woto, la baa ne a Mart pãn-komsmã, a Kamiy bɩɩ Biiblã bãngr pʋgẽ. A Mart gesame t’a Kamiy ra segd n naaga neb a taab sẽn nong Wẽnnaam daabã maanego, t’a kõ a Kamiy fuug la naooda, sẽn na yɩl t’a paam teed sẽn zems n ningi, a sã n kẽng a pipi tigisgẽ Rĩungã Roogẽ.

¹⁰ A Mart sẽn ges a Kamiy yell ne nonglmã, a mak-sõngã ne a tẽebã sẽn pa vigsdã kenga a Kamiy pɛlga. Rẽ kɩtame t’a tags t’a Mart sẽn da modgd n zãmsd yẽ bũmb ning ne Biiblã yaa bũmb sẽn tar yõod wʋsgo, tɩ bõe, a Mart ra yĩma bũmba fãa la bala, sã n dok bũmb nins a sẽn zãms Gʋlsg Sõamyã pʋgẽ wã. Rẽ poore, b sẽn wa n toeem a Kamiy tʋʋm zĩigã, a gesame t’a ra segd n maan bũmb masã.  Pipi sor a sẽn paam bala, a ninga fut la naooda nins a Mart sẽn da kõ-a wã n kẽng Rĩung Roogẽ. La a sẽn wa n ta be, a kosa Biibl zãmsgo. A Kamiy bɩɩ tẽebã wɛɛngẽ sõma n deeg lisgu.

Tusd-b lame tɩ b sakd a Zeova noyã

11. Yẽesmã tallg moonegã pʋgẽ wã toor sẽn ka be, wãn to la d tõe n wilg tɩ Rĩungã Koɛɛg tusda tõnd tɩ d sake?

¹¹ Rũndã-rũndã, a Zeova Kaset rãmbã yɩɩda bãmb milyõ a yoobe. Wala a Mart la a Kamiy masã, b moonda “Wẽnnaam soolem koe-noog kãngã” dũniyã gill zugu. (Matɩe 24:14; 28:19, 20) Wala pipi kiris nebã, “Wẽnnaam tʋʋm kãsemsa” tusd-b-la sõma tɩ b sakdẽ. B tara mi-beoogo, b sẽn tar zu-noog n zãad a Zeova yʋʋrã, la a sẽn pʋdg a vʋʋsem sõngã bãmb zutã yĩnga. Woto yĩnga, b modgda bũmb fãa pʋgẽ n na n kɩt tɩ b “kẽnda zems Zusoaba waoogre la [b] ta bãmb yam ne bũmb fãa,” n tũud a noyã b vɩɩmã nens fãa pʋsẽ. Wẽnnaam noyã sẽn tɩ loe ne fut ningr la meng manegrã bee bõn-kãens sʋka.—Kolos rãmba 1:10a; Tɩt 2:10.

12. Sagl-bʋg sẽn yaa takɩ fu-yerdɩ wã la meng manegrã wɛɛngẽ la d yãt 1 Tɩmote 2:9, 10 pʋgẽ?

¹² N-ye, a Zeova kõo noy sẽn tɩ loe ne tõnd mengã yalẽ. Tʋm-tʋmd a Poll wilga Wẽnnaam noy kẽer dẽ wɛɛngẽ. “Mam datame me tɩ pagba maneg b mens n [ning] futu sẽn zems ne yõk-m-menga la gũus-m-menga, ka tɩ wẽ pʋg-sadre ne zut pãnongo ne sãnem la kĩndi ne nagem fut ye. La bɩ b maneg b mens ne tʋʋm-sõama wa pagb sẽn sakd Wẽnnaam.” * Bõe la gom-kãensã zãmsd tõndo?—1 Tɩmote 2:9, 10.

13. a) ‘Maneg f meng ne fut sẽn zemsã’ rat n yeelame tɩ bõe? b) Bõe yĩng tɩ d tõe n yeel t’a Zeova noyã tũub pa toog wʋsgo?

¹³ A Poll goamã wilgdame tɩ kiris-nebã segd n ‘manega b mens ne fut sẽn zemse.’ B pa segd n bas b mensã n yaa yɛɛ bɩ zũiiy ye. Nebã fãa, baa sẽn yaa b naong rãmbã tõe n tũu no-kãensã sẽn zemsã, b sã n ges tɩ b fu-yerdɩ wã zemse, n yaa yɩlem la sakd gesgo. Wala makre, yʋʋmd fãa, sẽn na yɩl n kẽng b tigims gĩn sull tigis-kãsengẽ wã, Kaset rãmb sẽn be Amerikdisiid tẽng a yembrẽ kẽnda nao kɩlometr dãmb wʋsg n pasg kãgrã. Rẽ poore, b kẽeda koom kogend n maan lɛɛr dãmb wʋsg n yaool n ta tigis-kãsengã zĩigẽ. Saam-biig mii n tõe n lʋɩ koomẽ wã bɩ a maan tɩ tɩɩg yer a futã so-toakã sasa. Rẽ kɩtame tɩ tigis-kãsengã rebdb sã n wa ta tigis-kãsengã zĩigẽ, b yalẽ wã pa sakd gesg ye. Woto yĩnga, b rɩkda sẽk n ningd b butõ rãmbã, n manegd b sɛn dãmbã, n pɛgsdẽ la b repaasd fut nins b sẽn na n ning n kẽng tigis-kãsengẽ wã. B sẽn bool-b tɩ b wa rɩ a Zeova taablẽ wã yaa bũmb sẽn tar yõod wʋsgo b nifẽ, tɩ b rat n ning fut sẽn zemse.

14. a) Ning fut tɩ “zems ne yõk-m-menga la gũus-m-menga” rat n yeelame tɩ bõe? b) Ning fut wa ‘neb sẽn sakd Wẽnnaam’ baoodame tɩ tõnd maan bõe?

¹⁴ Rẽ poore, a Poll wilgame tɩ d segd n ninga fut sẽn “zems ne yõk-m-menga la gũus-m-menga.” Woto wilgdame tɩ tõnd yalẽ wã pa segd n puk wilg-m-menga, n yɩ sãang wʋsgo, n nek pag ne rao lageng tʋlsem, n pukd yĩngã babs nins sẽn da segd n solgã, bɩ n puk nagem modɛll paals tɩ loog noor ye. Sẽn paase, d segd n ninga futã tɩ zems ne neb ‘sẽn sakd Wẽnnaam.’ Rẽ pa kɩtd tɩ d tags neer yellã zug sɩda? B sẽn baoodã pa f ning fut sẽn zemse, f sã n kẽngd tigingã tigissẽ, tɩ rẽ poor tɩ f maan f toog kae wakat a taabã ye. Wakat fãa, tõnd mengã yalẽ segd n puka tõnd waoogr manesmã, d sẽn yaa kiris-neb la d yaa Wẽnnaam tʋm-tʋmdb wĩndg la yʋngã. Yaa vẽeneg tɩ tõnd tʋʋmã fut la d lekollã fut na n zemsa ne tʋʋm buud nins d sẽn na n maana. Baasg zãnga, d segd n ninga fut ne sik-m-meng la burkĩndi. Tõnd fu-yerdɩ wã sã n wilgd wakat fãa tɩ tõnd tẽeda Wẽnnaam, d pa  na n tol n bas n pa kõ kasetã wakat sẽn pa yãk sasa, d sẽn zoet yãnd d yalẽ wã yĩng ye.—1 Pɩɛɛr 3:15.

‘Bɩ y ra nong dũniyã ye’

15, 16. a) Bõe yĩng tɩ tar yõod tɩ d ra rɩk togs-n-taar ne dũniyã fu–yerdɩ la b maneg-m-mengã? (1 Zã 5:19) b) Yel-bʋs sẽn zems yĩng la d segd n lak d mens ne fu-yerdɩ la maneg-m-meng modɛll paalsã?

¹⁵ Saglg ning sẽn be 1 Zã 2:15, 16 pʋgẽ wã me kõta sor-wilgri, d sã n wa rat n yãk fu-yerdɩ bɩ n maneg d mensã. D karemda woto: “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye. Tɩ bõe, bũmb nins fãa sẽn be dũniyã n yaa yĩng ratem wẽnga la nin datem wẽnga ne tɩtaama ka yit tõnd Ba nengẽ ye. Bãmb yaa dũniyã rẽnda.”

¹⁶ Ad sagl-kãngã sɩd zemsame! Neb a taabã pãn-tusdg tara pãng wʋsg tõnd wakatã. Rẽ kɩtame tɩ d pa segd n bas tɩ dũniyã wilg tõnd d sẽn na n ning d futã to-to ye. Futã ningr la maneg m mengã modɛll dãmb ye pa sõma yaoolem yʋʋm kãensã ye. Baa sẽn maand-b afɛɛr dãmbã ne tʋm-tʋmdbã fu-yerdɩ manesem ye pa mak-sõng wakat fãa ne kiris-ned ye. Rẽ yaa bũmb a to sẽn kɩt tɩ d segd wakat fãa n bãng tɩ d pa segd n bas d mens n “yɩ wa dũniyã rãmb ye,” d sã n dat n vɩɩmd tɩ zems ne Wẽnnaam noyã, tɩ ne woto bɩ “tõnd Fãagda kareng paam waoogr ne bũmb fãa.”—Rom dãmba 12:2; Tɩt 2:10.

17. a) Sʋgs-bʋs la d tõe n sʋk d menga, d sã n wa rat n da fuug bɩ n yãk modɛlle? b) Bõe yĩng tɩ zak soben dãmbã segd n ges b zakã neb yembr-yembr yalẽ?

¹⁷ Nand tɩ y ra fuugu, yaa yam tʋʋmd tɩ y sʋk y meng woto: ‘Bõe yĩng tɩ modɛll kãngã noom maam? B rɩka modɛll kãngã n tɩ loe ne reem dɛɛmd yʋʋr sẽn yi mam sẽn nong wʋsg bɩ? Bi-bees sull bɩ neb sull sẽn sagend nebã tɩ b soog b mense, la b tall tõdgr yam n  tũud modɛll kãngã bɩ?’ D segdame me n maag d yĩng n ges fuugã. Sã n yaa zipu, a woglmã yaa wãn to? B wãag-a-la wãn to? Fuugã zemsame, n tar burkĩnd bɩ, bɩ a sẽbda mupp, n nekd pag ne rao lageng tʋlsem, bɩ n yaa zũii bɩ? Sʋk-y y meng woto: ‘Mam sã n ning fu-kãngã, a na n yɩɩ sabab tɩ neb lak n lʋɩ tẽebã wɛɛngẽ bɩ?’ (2 Korẽnt dãmba 6:3, 4) Bõe yĩng tɩ yel-kãngã segd n pak tõndo? Yaa Biiblã sẽn yet woto wã yĩnga: “Kirist ka maan sẽn noom bãmb meng ye.” (Rom dãmba 15:3) Kiris-neb zak soben dãmbã segd n gũusame n ges tɩ b zakã neb yalẽ zemse. Zak soben dãmbã segd n talla waoogr ne Wẽnnaam sẽn tar ziirã b sẽn balemdã, n da maan yam yoog la b kõ b zaka rãmb sagls sẽn yaa vẽenes ne nonglem, rẽ sã n yaa tɩlae ye.—Zak 3:13.

18. Bõe n tusd yãmb tɩ y maand gũusg ne y fu-yerdɩ wã la y mengã manegre?

¹⁸ Koɛɛg ning tõnd sẽn tarã yita a Zeova sẽn yaa burkĩnd la sõmblem sẽn yɩɩd fãa soabã nengẽ. (Ezai 6:3) Biiblã sagenda tõnd tɩ “wa kom-nongdse,” bɩ d rɩk a togs-n-taare. (Efɛɛz rãmba 5:1) Tõnd fu-yerdɩ wã la d mengã manegr tõe n kɩtame tɩ b waoog tõnd saasẽ Ba wã wall b paoog-a. Sɩd-sɩda, d ratame t’a sũur yɩ noogo!—Yelbũna 27:11.

19. Bõe nafa la d paamda, d sẽn kɩtd tɩ neb a taabã bãngd “Wẽnnaam tʋʋm kãsemsa”?

¹⁹ Yãmb tagsg yaa bõe ne “Wẽnnaam tʋʋm-kãsemsa” y sẽn zãms n bãngã? Sɩd-sɩda, ad d paama bark menga, d sẽn bãng sɩdã! D sẽn wilgd tɩ d tara tẽeb ne a Zezi Kirist zɩɩmã sẽn daagã yĩnga, d paama d yel-wẽnã sugri. (Tʋʋma 2:38) Rẽ kɩtame tɩ d tõe n gom ne raood Wẽnnaam taoore. D pa zoet kũum wa neb nins sẽn pa tar saagrã ye. Wall tɩ yɩ woto, a Zezi kõo tõnd bas-m-yam tɩ daar n wat tɩ “fãa sẽn be [tẽegr] yaad pʋsẽ na n wʋm bãmb koɛɛg n yi.” (Zã 5:28, 29) A Zeova maana neer a sẽn wilg tõnd bõn-kãensã fãa wã. Sẽn paase, a pʋdga a vʋʋsem sõngã tõnd zutu. Woto yĩnga, d sẽn tar mi-beoog kũun sõma kãensã fãa wã yĩngã segd n tusa tõnd tɩ d sak a noyã sẽn yaa sõma wʋsgã, la d pẽg-a ne yẽesem, n moond d taabã ‘bõn-kãsems’ kãensã fãa.

[Tẽngr not rãmbã]

Wãn to la y na n leokẽ?

• ‘Bõn-kãsems’ bʋs la nebã wʋm yʋʋmd 33 Pãntekotã, la b manesem yɩɩ wãn to?

• Wãn to la ned wat n lebg a Zezi Kirist karen-biiga, la yɩ karen-biig baoodame tɩ f maan bõe me?

• Bõe yĩng tɩ tar yõod wʋsg tɩ d ges d fu-yerdɩ wã la d mengã manegr yelle?

• Yel-bʋs la d segd n gese, d sã n wa rat n bãng fuug bɩ modɛll sã n zemsame?

[Zãmsgã sogsgã]

[Foto, seb-neng 29]

A Pɩɛɛr mooname tɩ b vʋʋga a Zezi

[Foto rãmba, seb-neng 31]

Yãmb mengã yalẽ waoogda Wẽnnaam ning y sẽn balemdã bɩ?

[Foto rãmba, seb-neng 32]

Kiris-nebã segd n gesame tɩ b zakã neb maneg b mens sõma