‘Mam kõo yãmb mamsg tɩ y tũ’
‘Mam kõo yãmb mamsg tɩ y tũ’
“Yãmb da tog n yɩɩ karen-saam dãmb hal daar zãra.”—HEBRE DÃMBA 5:12.
1. Bõe yĩng tɩ goam nins sẽn be Hebre dãmba 5:12 pʋgẽ wã tõe n kɩt tɩ kiris-ned tags tɩ pak-a lame?
YÃMB sẽn karem verse yẽgrã vʋʋsem sõng sẽn vẽneg tɩ b gʋlsã, y pa ne tɩ pak-y lame sɩda? Sã n yaa woto, y pa y yembr ye. D sẽn yaa Kirist karen-biisã, d miime tɩ d segd n yɩɩ karen-saam dãmba. (Matɩe 28:19, 20) D miime tɩ wakat ning pʋgẽ d sẽn vɩyã yĩng kɩtame tɩ d segd n yɩ tao-tao n zãms nebã sõma wa d sẽn tõe tɛka. La d miime tɩ tõnd zãmsgã yaa yõor yell n kõ neb nins d sẽn zãmsdã! (1 Tɩmote 4:16) Rẽnd wa sẽn zemse, d tõe n sʋka d menga: ‘Mam yaa karen-saamb wa sẽn segdã bɩ? Wãn to la m tõe n tʋm m karen-saamdã tʋʋmd sõma n paase?’
2, 3. a) Wãn to la karen-saamb a yembr wilg karen-saamd sẽn yaa sõma tikri? b) Mak-sõng bʋg la a Zezi kõ karen-saamdã wɛɛngẽ?
2 Yel-kãensã sẽn pak tõndã pa segd n sãam d sũur ye. D sã n ges d zãmsgã wa bũmb sẽn tũud ne manesem sẽn yaa toor zall wʋsgo, d tõe n wa tagsame tɩ d pa tõe n paas d zãmsgã sõmblem ye. La karen-saamd sẽn yaa sõma pa tũud ne zãmsg na-kẽndr bal ye, la a tũuda ne bũmb yõod sẽn yɩɩd woto zĩig sẽn zãra. Kelg-y karen-saamb a ye sẽn tar minim sẽn yeel bũmb ning rẽ wɛɛngẽ sebr a ye pʋgẽ to-to: “Karen-saamd sẽn yaa sõma pa tik manesem takɩ zugu, bɩ na-kẽndr sẽn yaa toor zall zug ye. . . . Karen-saamd reng n baoodame tɩ f tall nonglem.” Yaa sɩd t’a ra gomda dũniyã pʋgẽ karen-saamd yelle. La baasgo, a sẽn togsã tõe n paka tõnd sẽn yaa kiris-neb sẽn karemd neb a taabã n yɩɩd menga. Wãn to?
3 Sẽn kõ-a tõnd mak sõng karen-saamdã wɛɛngẽ wã pa ned a to n zʋʋg a Zezi Kirist ye. A yeela a karen-biisã: ‘Mam kõo yãmb mamsgo.’ (Zã 13:15) A ra gomda mamsg ning a sẽn kõ tõnd sik-m-mengã tallg wɛɛngẽ wã yelle. La a Zezi sẽn zãms nebã Wẽnnaam Rĩungã koe-noogã sẽn yaa tʋʋm kãseng ning a sẽn pids tẽng zugã bee mamsg ning a sẽn bas tõnd yĩngã sʋka. (Luk 4:43) Woto yĩnga, yãmb sã n da na n bilgẽ-la a Zezi tʋʋmdã ne gom-bi-yɛnga, y ra na n yãka gom-biig ning sẽn yaa “nonglma.” Bɩ bõe? (Kolos rãmba 1:15; 1 Zã 4:8) A Zezi nonglmã ne a saasẽ Ba a Zeova wã ra yɩɩda bũmb fãa. (Zã 14:31) La a Zezi sẽn da yaa karen-saambã, a talla nonglem ne manesem a yiib me n paase. A ra nonga sɩd nins a sẽn zãms nebã, la a ra nonga nebã a sẽn da zãmsdã. Bɩ d ges mak-sõng kãngã nens a yiibã neere.
A nonga Wẽnnaam sɩdã hal sẽn kaoose
4. Wãn to la a Zezi wa n tall nonglem ne a Zeova zãmsgã?
4 Karen-saamb tagsg ne a sẽn zãmsd bũmb ningã mata a zãmsga sõmblem wʋsgo. Karen-saamba sã n tall yam-kaalgo, na n pukame tɩ karen-biisã me tall yam-kaalg ne a zãmsgã. A Zezi pa tall yam-kaalg baa bilf ne sɩd nins sẽn tar yõod a sẽn zãms nebã a Zeova la a Rĩungã wɛɛngẽ wã ye. Nonglem ning a Zezi sẽn da tar ne zãms-kãnga wã ra yaa wʋsgo. A wa n paama nonglem kãngã, a sẽn wa n zãmsd n bãngdẽ wã sasa. Hal sẽn kaoos wʋsgo, nand t’a yɩ ninsaala, Wẽnnaam Biribl a Zezi ra nonga zãmsg wʋsgo. Ezai 50:4, 5 tara gom-kãensã sẽn zemsã: “Zusoab a Wẽnnaam kõo maam gom-minim zelemde tɩ m tõe n bãng goam nins mam sẽn tog n leok ned ninga pãng sẽn sɛ wã. Yibeoog fãa, bãmb yokda mam tʋbre tɩ m kelg wa karen-biiga. Zusoab a Wẽnnaam yoka mam tʋbre, la mam ka tõdg ye. Mam ka leb poorẽ ye.”
5, 6. a) Yel-bʋg n maan a Zezi a lisgẽ wã vẽenega, la rẽ tẽeg-a-la bõe? b) Welg-bʋg la d ne a Zezi la a Sʋɩtãan sʋka, sã n yaa ne Wẽnnaam Gomdã rɩk-n-tʋm wɛɛngẽ?
5 A sẽn da wa n yaa ninsaal n be tẽng zug n bɩtẽ wã, a Zezi kell n talla nonglem ne yam ning sẽn yit Wẽnnaam nengẽ wã. (Luk 2:52) Rẽ, a lisgã sasa, yel-sãang n maane. “Yĩngr pakame,” woto la Luk 3:21 yeta. Vẽenega, rẽ masã a Zezi ra tõe n tẽega a vɩɩmã sẽn da ya a soab sẽn deng t’a yɩ ninsaalã. Rẽ poore, a loee noor dasem 40 weoogã pʋgẽ. A Zezi sã n da tagsd zãmsg nins a sẽn paam a Zeova nengẽ saasẽ wã zugu, ra kõt-a-la sũ-noog wʋsgo. La pa kaoos la a nonglmã ne Wẽnnaam sɩdã paam makr ye.
6 Yaams la kom sẽn wa n tar a Zezi, a Sʋɩtãan baoome n na n mak-a. Ad sɩd yaa welg-kãseng meng n be Wẽnnaam komdibli a yiib kãensã sʋka! B yiibã fãa togsa goam sẽn yit Hebre Gʋlsg Sõamyã pʋgẽ, la pa ne yam yɛng baa bilf ye. A Sʋɩtãan golma Wẽnnaam Gomdã, n tũnug ne-a ne paoogr manesem sẽn na yɩl n pids a meng raabo. Sɩda, tõt kãngã kisa Wẽnnaam sɩdã bala. A Zezi yẽ togsa goam sẽn yit Gʋlsg Sõamyã pʋgẽ ne nonglem sẽn yaa vẽenega, n tũnug ne Wẽnnaam Gomdã tɩ zems neer a leokr fãa pʋgẽ. A Zezi ra bee hal sẽn kaoos wʋsg tɩ b yaool n wa gʋls gom-kãensã vʋʋsem sõngã vẽnegr pʋgẽ. Ne rẽ fãa, a talla waoogr wʋsg ne gom-kãense. Sɩd kãens sẽn da tar yõod wʋsgã ra yita a saasẽ Ba wã nengẽ! A yeela a Sʋɩtãan tɩ gom-kãensã sẽn yit a Zeova nengẽ wã ra tara yõod n yɩɩd rɩɩbo. (Matɩe 4:1-11) N-ye, a Zezi ra nonga sɩd nins fãa a Zeova sẽn da zãms-a wã. La wãn to la a wilg nonglem kãng a karen-saamdã pʋgẽ?
A ra nonga sɩd nins a sẽn zãms nebã
7. Bõe yĩng t’a Zezi pa zãms nebã a meng tagsa?
7 Nonglem ning a Zezi sẽn da tar ne sɩd nins a sẽn zãms nebã ra yaa vẽeneg wakat fãa. A ra tõẽ-la nana-nana n zãms nebã a meng tagsa. A ra tara bãngr la yam wʋsgo. (Kolos rãmba 2:3) Baasg zãnga, a tẽega a kɛlgdbã n yɩlem naoor wʋsg tɩ bũmb nins fãa yẽ sẽn zãmsd nebã ra pa yit yẽ meng nengẽ ye, la ra ya a saasẽ Ba wã nengẽ. (Zã 7:16; 8:28; 12:49; 14:10) A ra nonga Wẽnnaam sɩdã wʋsg ne a na ledg-a ne a meng tagsgo.
8. A koe-noogã mooneg sɩngrẽ, yaa wãn to la a Zezi kõ mak-sõng Wẽnnaam Gomdã zug tikr wɛɛngẽ?
8 A Zezi sẽn wa n sɩng a koe-moonegã zãma sʋkã, a yɩɩ tao-tao n kõ mak-sõngo. Ges-y a sẽn maan to-to n togs Wẽnnaam nin-buiidã pipi t’a ra yaa Mesi ning b sẽn kãabã. A waa kʋʋngã taoor bal n moon tɩ yẽ mengã yaa Kiristã, tɩ rẽ poor bɩ a maan yel-solem bɛd n na n wilg rẽ bɩ? Ayo. A kẽnga karen-doogẽ, zĩig ning Wẽnnaam nin-buiidã sẽn nong n karemd Gʋlsg Sõamyã. Beenẽ a zẽka a koɛɛg n karem Ezai 61:1, 2 bãngr-gomdã, la a wilg tɩ sɩd kãensã sẽn yaa bãngr-goamã pidsa yẽ zugu. (Luk 4:16-22) Yel-soalmã wʋsgã a sẽn maana sõngame n wilg t’a Zeova ra bee ne-a. Baa ne rẽ fãa, wakat fãa a tika Wẽnnaam Gomdã zug n zãms nebã.
9. A manesmã ne Fariziẽ rãmbã pʋgẽ, wãn to la a Zezi wilg t’a nonga Wẽnnaam Gomdã wakat fãa?
9 Tũudmã bɛɛb sã n da kɩɩsd a Zezi, a ra pa baood n na n wilg t’a yam yɩɩd-b lame ye, baa ne a sẽn da tõe nana-nana n gom n lub-b kɩɩs taab a woto pʋgẽ wã. Wall t’a maan woto, a ra basdame tɩ Wẽnnaam Gomdã wilg-b tɩ b ka bʋʋm ye. Wala makre, tẽeg-y wakat ning Fariziẽ rãmbã sẽn da wa n yeel t’a Zezi karen-biisã kɩɩsa Vʋʋsg daarã, b sẽn da wa n pasgd pʋʋgã n yãk ka-zut a wãn n tẽgd n wõbdẽ wã yelle. A Zezi leokame: “Yãmb nan ka karem a Davɩɩd sẽn maan bũmb ninga kom sẽn tar bãmb ne neb nins sẽn be ne bãmba la?” (Matɩe 12:1-5) Sɩda, tõe tɩ Fariziẽ kãensã sẽn da yaa tɩrs b mens nifẽ wã karma kɩbar ning vʋʋsem sõng sẽn vẽneg tɩ b gʋls tɩ be 1 Sãmwɛll 21:1-6 pʋgẽ wã. Sã n yaa woto, b pa bãng zãms kãseng ning sẽn be be wã yõod ye. La a Zezi maana sẽn yɩɩd a karem kɩbarã. A tagsa kɩbarã zug n sak a zãmsgã ne a sũur fãa. A talla nonglem ne no-kãsems nins a Zeova sẽn tũnug ne verse kãensã n taasã. Rẽ n so t’a tũnug ne kɩba-kãnga, n paas makr a yembr sẽn yit a Moiiz Tõogã pʋgẽ, n wilg Tõogã sẽn pukd yam sẽn zemsã. Woto me, a Zezi sẽn tall nonglem wakat fãa ne Wẽnnaam Gomdã tus-a lame t’a kɩɩs modgr nins tũudmã taoor dãmb sẽn maan sẽn na yɩl n golm-a b mens nafr yĩngã, bɩ n lud-a ne ninsaalbã rog-n-migs sẽn gĩt nebã.
10. Wãn to la a Zezi pids bãngr-goamã sẽn tɩ loe ne a zãmsgã sõmblem?
10 Nonglem ning a Zezi sẽn da tar ne sɩd ning a sẽn da zãmsd nebã kɩtame t’a pa zãms-a ne rok-m-zugẽ abada, tɩ kõt yam-yiisg ye. Bãngr-goam nins vʋʋsem sõng sẽn vẽneg tɩ b gʋlsã wilgdame tɩ Mesi wã ‘noor na n goma gom-noodo,’ n tũnug ne “goam sẽn be yamleoogo.” (Yɩɩl Sõamyã 45:3, Sebr Sõngo; Sɩngre 49:21, NW ) A Zezi pidsa bãngr-gom-kãensã n kɩt t’a koɛɛgã tall yamleoog la a tall pãnga, n tũnug ne ‘gom-noodo,’ a sẽn da wa n zãmsd sɩdã a sẽn da nong wʋsgã. (Luk 4:22) Sãmbg sẽn ka be, a sẽn da kõt zãmsgã ne yamleoogã ra pukda a nen-wamdã zugu. Ad a kelgr sɩd ra segd n bee yamleoogo, la ad sɩd yaa mak-sõng n kõ tõnd tɩ d na n tũ, d sã n wa gomd ne neb a taabã d sẽn zãms bũmb ningã wɛɛngẽ!
11. Bõe yĩng t’a Zezi sẽn da tar tõod karen-saamdã wɛɛngẽ wã pa kɩt t’a lebg wuk-m-meng soaba?
11 A Zezi sẽn da wʋmd Wẽnnaam sɩdã võor wʋsgã la a ra togsd gom-noodã kɩtame t’a lebg wuk-m-meng soab bɩ? Nong n yaa woto ne ninsaalbã. La tẽeg-y t’a Zezi ra tara yam sẽn pukd wẽn-zoeere. Yam a woto pa kõt-f sor tɩ f zẽk f meng ye, bala “sik-m-mens rãmba tara yam.” (Yelbũna 11:2) Bũmb a to n kɩt t’a Zezi pa tall wuk-m-meng bɩ zẽk-m-meng ye.
A Zezi ra nonga neb nins a sẽn da zãmsdã
12. Wãn to la a Zezi wilg t’a ra pa rat t’a karen-biisã zoe-a?
12 Nonglem kãseng ning a Zezi sẽn tall ne nebã puka a zãmsgã pʋgẽ wakat fãa. A zãmsgã zɩ n kẽes nebã rabeem wa ninsaalb nins sẽn yaa wuk-m-mens rãmbã sẽn maandã ye. (Koɛɛg Soaba 8:9) A Pɩɛɛr sẽn maan kaset ne a Zezi yel-solemd a yembre, ling-a-la hal wʋsgo, t’a wõgemd a Zezi taoore. La a Zezi ra pa rat t’a karen-biisã zoe-a ye. A yeela ne sõmblem tɩ: “Da zoe rabeem ye,” n yaool n gom ne a Pɩɛɛr karen-biisã maanegã tʋʋmd sẽn be yamleoogã, a Pɩɛɛr meng sẽn da na n kẽes a meng a pʋgẽ wã yelle. (Luk 5:8-10) A Zezi ra ratame t’a karen-biisã nonglem ne sɩdã Wẽnnaam wɛɛngẽ wã tus-b tɩ b sake, la a ra pa rat tɩ b zoe rabeem ne yẽ sẽn yaa b karen-saambã ye.
13, 14. Wãn to la a Zezi zoe nebã nimbãanega?
13 Nonglem ning a Zezi sẽn tall ne neb nins a sẽn zãmsã ra yaa vẽeneg me ne nimbãan-zoeerã a sẽn tall ne-bã. “La a Zezi sẽn yã kʋʋngã, b nimbãanega yõka bãmba, tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.” (Matɩe 9:36) B sẽn da be toog ning pʋgẽ wã kɩtame t’a zoe b nimbãanega, n dat n sõng-ba.
14 Ges-y a Zezi sẽn zoe ned nimbãaneg wakat a to. Pag zɩɩm n da yiti, t’a pẽneg a Zezi kʋʋngã sʋk n sɩɩs a fuugã zerdo, t’a bãagã sãooge. A Zezi yãame tɩ pãng n yi a nengẽ, la a pa yã ned ning sẽn da paam sãoogrã ye. A baoome n na n bãng sẽn ya a soaba. Bõe yĩnga? Pa sẽn na yɩl n sãbg pagã, a sẽn kɩɩs Tõogã bɩ gʋlsdbã la Farizɩẽ dãmbã noy n da yɛɛsd dẽ yĩngã ye. Wall tɩ yɩ woto, a yeela pagã tɩ: “M biiga, fo tẽeba fãag-f lame. Kẽng ne laafɩ, f bãaga sẽn da yaand fooma na n kell n sãooga zãnga.” (Mark 5:25-34, Sebr Sõngo) Ges-y gom-bi-kãensã sẽn pukd nimbãaneg ningã. A pa yeel bal tɩ “paam maagr” ye. A yeelame: “Kẽng ne laafɩ, f bãaga sẽn da yaand fooma na n kell n sãooga zãnga.” Kaanẽ wã a Mark tũnugda ne gom-biig võor sɩd-sɩdã sẽn dat n yeel tɩ “sẽn pãbde,” sẽn yaa pãbr buud b sẽn tũnugd ne n namsd ned tɩ loog noorã. Woto, a Zezi sak n deegame tɩ pagã bãag ra nams-a lame, tõe tɩ ra yaa yĩng la sũur pʋgẽ toogo. A zoee pagã nimbãanega.
15, 16. Yel-bʋs sẽn zĩnd a Zezi koe-moonegã sasa n wilgd t’a ra baood n na n yãa nebã zʋg-sõma?
15 A Zezi leb n wilgame t’a nonga nebã, a sẽn da get b zʋg-sõma wã yĩnga. Ges-y bũmb ning sẽn maane, a sẽn wa n seg a Natanayɛll sẽn wa n lebg a tʋm-tʋmd kaoosg poorã. “A Zezi sẽn yã a Natanayɛll sẽn wat bãmb nengẽ, bãmb goma yẽ yell n yeele: ‘Ad Israɛll ned sẽn ka tar zãmbo.’ ” A Zezi tõog n gesa a Natanayɛll sũurã n bãng a sẽn sɩd ya a soaba. Yaa sɩda, a Natanayɛll da zãr ne a zems zãnga. A ra tara pãn-komslem wa tõnd fãa. Sɩda, a sẽn wa n wʋm tɩ b gomd a Zezi yellã, a pʋd n goma gom-kãs n yeele: “Bõn-sõng tõe n yii Nazarɛt wɛ?” (Zã 1:45-51) Baasg zãnga, yɛl nins fãa b sẽn da tõe n togs a Natanayɛll wɛɛngẽ wã sʋka, a Zezi yãka bũmb sẽn yaa sõma, a pʋ-peelmã, n na n gom dẽ zugu.
16 Woto me, soda-naaba, tõe tɩ yaa Buzẽng ned sẽn yit Rom, sẽn pẽneg a Zezi n kos-a t’a sãoog a yambã sẽn da pa keemã, a Zezi ra miime tɩ sodaagã ra tara pãn-komslem. Rẽ wẽndẽ soda-naab ra pa tõe n pa tʋm nen-keglem la zɩɩm daagr tʋʋm wʋsgo, la a kẽes a meng ziri tũudum yɛl pʋgẽ ye. Ne rẽ fãa, a Zezi sẽn da ne n yɩɩd yaa bũmb ning sẽn yaa sõma rao wã nẽngẽ wã, a tẽeb sẽn yaa kãseng wʋsgã. (Matɩe 8:5-13) Kaoosg poore, a Zezi sẽn da wa n gom ne tʋʋm-wẽns maand b sẽn da ka namsg ra-luk zug n kɛgl yẽ wã, a pa zab rao wã a sẽn da tʋm bi-be-tʋʋmã yĩng ye, la a kenga a raood n kõ-a saagr beoog-daar yĩnga. (Luk 23:43, NW ) A Zezi ra miime t’a sã n sãbg neb a taabã, na n komsa b raood bala. Sãmbg sẽn ka be, a sẽn modg n na n yã neb a taabã zʋg-sõma wã tusa neb wʋsg tɩ b maan modgr wa b sẽn tõe tɛk n paas menga.
A ra tʋll n sõnga nebã
17, 18. A sẽn sak n wa tẽng zugã, wãn to la a Zezi wilg t’a tʋll n sõnga neb a taabã?
17 Kaset a to sẽn tar pãng sẽn wilgd t’a Zezi nongã neb nins a sẽn da zãmsdã ra ya a sẽn da tʋll n sõng-bã. Sẽn deng t’a yɩ ninsaalã sasa, Wẽnnaam Birilbã talla nonglem wakat fãa ne ãdem-biisã. (Yelbũna 8:30, 31) A sẽn ya a Zeova “Gomda” bɩ a koe-taasdã, a sõnga ãdem-biisã naoor wʋsg ne yamleoogo. (Zã 1:1) Baasg zãnga, sẽn na yɩl n zãms ãdem-biisã vẽeneg me n paase, a sakame n “lebg wa yamba n dɩk yĩng wa ninsaala,” n bas a naamã zĩig sẽn be saasẽ wã n wa tẽng zugu. (Filip rãmba 2:7; 2 Korẽnt dãmba 8:9) A Zezi sẽn da wa n be tẽng zugu, a ra pa gũud tɩ nebã sõng-a ye. Wall tɩ yɩ woto, a yeelame: “Yaa woto yĩng la Ninsaal Biiga wayã. Bãmb ka wa tɩ neb sõng bãmb ye, b waame n na n sõng nebã, la kõ b vɩɩm tɩ yao neb wʋsg yĩnga.” (Matɩe 20:28) A Zezi pidsa gom-kãensã zãng fasɩ.
18 A Zezi sika a meng n pids neb nins a sẽn zãmsã raabo, n modg wʋsg b yĩng ne yẽesem. A saaga Kãabg Tẽngã ne nao n maan kɩlometr dãmb kobs n moon wʋsgo, n mao n na n zãms neb wʋsg wa a sẽn tõe tɛka. Sẽn yaa lebend ne Fariziẽ rãmbã la gʋlsdbã, a kell n yɩɩ sik-m-meng soab la ned pẽnegr sẽn yaa nana. Neb buud fãa, nanambse, sodaase, tõog mitba, pagba, kamba, naong rãmba, bãad dãmba, la neb b sẽn bak n bas menga, pẽneg-a-la nana-nana tɩ rabeem kaẽ ye. Baa ne a Zezi sẽn da zems zãngã, a ra yaa ninsaala, tɩ yaams la kom da yõkd-a. La ba a sẽn da wa n ya n dat n vʋʋse, bɩ n da baood zĩig sẽn pa tarẽ bʋrg n na n pʋʋse, a lʋɩɩsa neb a taabã raab taoore.—Mark 1:35-39.
19. Wãn to la a Zezi kõ mak-sõng sã n yaa ne tall sik-m-menga, sũ-mar la sõmblem ne a karen-biisã wɛɛngẽ?
19 A Zezi ra leb n dat n sõnga a meng karen-biisã woto me. A zãms-b-la ne sõmblem la sũ-mare. B sã n da pa wʋmd zãms-kãsems kẽer võor tao-tao, a ra pa basd b zãmsgo, n yik a sũur bɩ n ning-b taal ye. A ra ket n baooda a sẽn na maaneg n kɩt tɩ b tõog n wʋm zãmsgã võore. Wala makre, yãmb wee n tags n ges a karen-biisã sẽn da wẽed no-keemd naoor wʋsg n dat n bãng ned ning sẽn da yaa kãseng n yɩɩd bãmb sʋkã. Naoor ka tɛka, hal tɩ wa tõk yʋng ning sẽn deng a kũuma, a Zezi yãa sor n zãms-b tɩ b tall sik-m-meng ne taaba. Sik-m-mengã la yɛl a taabã fãa wɛɛngẽ, a Zezi ra tõe n yeela woto wa sẽn zemse: “Mam kõo yãmb mamsg[o].”—Zã 13:5-15; Matɩe 20:25; Mark 9:34-37.
20. Karen-saamd manesem bʋs n kɩt t’a Zezi ra yaa toor ne Fariziẽ dãmbã, la bõe yĩng tɩ manesem kãng tar pãnga?
20 Bãng-y t’a Zezi pa togs a karen-biisã mak-sõngã sẽn da ya a soab bal ye. A ‘kõo bãmb mamsgo.’ A zãms-b-la ne a mak-sõngã. A pa gom n paoog-ba, wala a sã n da getame t’a yaa kãseng wʋsg ne a na maan yɛl nins a sẽn yet-b tɩ b maana ye. Yaa woto la Fariziẽ rãmbã ra maanda. A Zezi yeelame tɩ: “Bãmb yetame la b ka maand ye.” (Matɩe 23:3) Ne sik-m-menga, a Zezi wilga a karen-biisã a zãmsgã sẽn sɩd yaa bũmb ninga, n tũ la a sak zãms-kãngã a vɩɩmã pʋgẽ. Woto, a sẽn sagl a karen-biisã tɩ b ra gĩd b vɩɩmã ne laog nonglmã, pa yɩ toog ne-b tɩ b wʋm a võor ye. B ra nee vẽeneg t’a Zezi gom-kãensã yaa sɩda: “Waas tara bogdo, la liuuli tara tʋgdo, la Ninsaal Biiga ka tar zĩig n na n gãneg b zug ye.” (Matɩe 8:20) A Zezi sõnga a karen-biisã n kõ-b mak-sõng ne sik-m-menga.
21. Bõe la d na n yã sõsg ning sẽn pʋgda wã pʋgẽ?
21 Vẽenega, a Zezi sɩd yɩɩ zãmaan fãa karen-saam kãseng tẽng zug ka! A nonglmã ne bũmb ning a sẽn zãmsã la ne nebã a sẽn zãmsã ra yaa vẽeneg ne pʋ-peelem dãmbã fãa sẽn yã-a la b kelg-a wã. Rẽ yaa vẽeneg ne tõnd me rũndã-rũndã sẽn zãmsd mak-sõng ning a sẽn kõ wã. La wãn to la d tõe n tũ Kirist makrã sẽn zems zãngã? Sõsg ning sẽn pʋgdã na n leoka sʋk-kãngã.
Y ra na n leokẽ-la wãn to?
• Karen-saamd sẽn yaa sõma tika bõe zugu, la ãnd n kõ mak-sõng rẽ wɛɛngẽ?
• Wãn to la a Zezi wilg t’a tara nonglem ne sɩd nins a sẽn zãms nebã?
• Wãn to la a Zezi wilg t’a tara nonglem ne neb nins a sẽn da zãmsdã?
• Mak-bʋs n wilgd t’a Zezi ra tʋll n sõnga neb nins a sẽn da zãmsdã ne sik-m-menga?
[Zãmsgã sogsgã]
[Foto, seb-neng a 8]
Wãn to la a Zezi wilg t’a ra nonga no-kãsems nins sẽn be Wẽnnaam Gomdã pʋgẽ wã?