“Ned nan ka gom wa ra-kãngã abada”
“Ned nan ka gom wa ra-kãngã abada”
‘La neba fãa kɩsa bãmb kaseto. La bark [gom-nood, NW ] nins sẽn yit yẽ noorẽ wã yɛɛsa nebã.’—LUK 4:22.
1, 2. a) Bõe yĩng tɩ gard dãmb nins b sẽn tʋm tɩ b tɩ yõk a Zezi wã lebg n wa nus-vɩɩdo? b) Bõe n wilgd tɩ ra pa gard dãmbã bal la a Zezi zãmsgã ra kẽ-yã?
GARD dãmbã pa tõog n maan tʋʋmd ning b sẽn tʋm-b tɩ b tɩ maana ye. B tʋm-b lame tɩ b tɩ yõk a Zezi Kirist, la b lebg n waa nus-vɩɩdo. Maan-kʋʋdbã kãsem ne Fariziẽ rãmbã yeelame tɩ b togs a võore: “Yaa bõe tɩ yãmb ka tall bãmb n wa?” Sɩda, bõe yĩng tɩ gard dãmbã pa yõk rao sẽn da pa na n sak n zab ne-ba? Gard dãmbã yeelame: “Ned nan ka gom wa ra-kãngã abada.” A Zezi zãmsgã kẽ-b-la wʋsg hali n kɩt tɩ b pa sak n na n yõk ned sẽn yaa laafɩ soab woto n loog ne ye.—Zã 7:32, 45, 46.
2 Pa gard kãens bal la a Zezi zãmsgã kẽ wʋsg ye. Biiblã yeta tõnd tɩ neb kʋʋng n wa n na n kelg-a. A ba-yira neb yɛɛsa b sẽn wʋm ‘bark gom-nood nins sẽn yit bãmb [a Zezi] noorẽ wã.’ (Luk 4:22) Naoor yaka, a zĩnda koom koglg pʋgẽ n gom ne kʋʋngã sẽn tigim Galile Mogrã noorã. (Mark 3:9; 4:1; Luk 5:1-3) Vugri, “neb kʋʋng” n zĩnd ne-a n maan dasma, hali n pa rɩ meng ye.—Mark 8:1, 2.
3. Sẽn yɩɩd fãa, yaa bõe yĩng la a Zezi sẽn da yaa karen-saam kãseng sẽn ka to wã?
3 Bõe n kɩt t’a Zezi ra yaa karen-saamb sẽn ka mak-n-taaga? Sẽn yɩɩd fãa, yaa nonglmã yĩnga. * A Zezi ra nonga sɩd nins a sẽn da taasd nebã, la a ra nong neb nins a sẽn da zãmsdã. La a Zezi ra mii zãmsgã manesem wʋsgo. Zãmsg sõss nins sẽn be seb-kãngã pʋgẽ wã pʋsẽ, d na n yãa manesem kẽer sẽn tar pãng a sẽn tũnug ne la d ges d sẽn tõe n dɩk a togs-n-taar to-to.
Zãmsg võor wʋmb sẽn yaa nana la vẽenega
4, 5. a) Bõe yĩng t’a Zezi tũnug ne goam võor wʋmb sẽn yaa nana a zãmsgã pʋgẽ, la bõe yĩng t’a sẽn maan woto wã yaa bõn-kãsenga? b) Wãn to la Tãng zug Zãmsgã yaa makr sẽn wilgd t’a Zezi zãmsa nebã ne goam võor wʋmb sẽn yaa nana?
4 Sẽn karem-b n zãag zĩigã nong n tũnugda ne gom-zɩsd tɩ b kɛlgdbã pa wʋmd b võor baa bilf ye. La tõnd sã n pa gomd tɩ neb a taabã wʋm d sẽn yetã võore, b na n yɩɩ wãn n dɩ tõnd bãngrã nafre? A Zezi sẽn da zãmsd nebã, a zɩ n gom tɩ nebã pa wʋm a sẽn yetã võor ye. Tags-y n ges gom-biis sõor ka tɛk nins a sẽn da mi wã. Baasg zãnga, baa ne a bãngrã sẽn yaa wʋsgã, a tagsa a kɛlgdbã yelle, pa yẽ mengã yell ye. A ra miime tɩ bãmb wʋsg ra ‘yaa nin-tals sẽn ka paam zãmsgo.’ (Tʋʋma 4:13) Sẽn na yɩl n tõog n zãms nebã, a tũnuga ne goam nin-kãens sẽn da tõe n wʋm b võore. Tõe tɩ gom-biis nins a sẽn tũnug ne wã võor wʋmb ra yaa nana, la bãngr nins gom-bi-kãens sẽn da taasdã ra tagma wʋsgo.
5 D dɩk makr ne a Zezi Tãng zug Zãmsgã sẽn be Matɩe 5:3–7:27 pʋgẽ wã. Tõe t’a Zezi rɩka sẽn zems minit 20 bal n kõ zãms-kãngã. La zãms-kãng ra tara pãng wʋsgo, n kõ noy yẽg sẽn tɩ loe ne yɛl wala yoobo, kãadem kaoob la laog nonglmã. (Matɩe 5:27-32; 6:19-34) Baasg zãnga, tagsa võor wʋmb sẽn yaa toog bɩ b sẽn togs ne gom-tagd ka be ye. Baa biig meng ra tõe n wʋma a gom-bil fãa võore. Rẽnd pa lingri la a sẽn wa n gom n sa tɩ kʋʋngã sẽn da yaa koaadba, rũm kɩɩmb la zĩm-yõgdb wʋsg ‘yɛɛs yẽ karengã yĩnga’ ye!—Matɩe 7:28.
6. Kõ-y makr sẽn wilgd a Zezi sẽn togs goam sẽn yaa nana tɩ b võorã yaool n tagme.
6 A Zezi ra nong n tũnugda ne goam sẽn yaa vẽenes la koeese, n togsd yɛl võor wʋmb sẽn yaa nana la sẽn tar võor wʋsgo. A Zezi kɩtame t’a zãmsgã kẽ a kɛlgdbã yamẽ la b sũyẽ hal tɩ b pa tõe n yĩm ye. Ges-y makr a wãna: “Ned ka be sẽn tõe n sak zu-soben dãmb a yiib ye. . . . Yãmb ka tõe n sak Wẽnnaam la arzɛgs yiib fãa ye.” “Da bʋ-y ned bʋʋd ye, tɩ Wẽnnaam da wa bʋ yãmb bʋʋd ye.” “Yaa ne bãmb biisã la yãmb na n bãng bãmba.” “Neb sẽn tar laafɩ ka baood tɩp ye, yaa bãad dãmba n baood tɩpa.” “Neb nins fãa sẽn zãad sʋʋsã, yaa sʋʋg n na n kʋ-ba.” “Bɩ y kõ Sezaar bũmb nins sẽn yaa Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.” “Sẽn kõt-a sũ-noog yɩɩda sẽn deegd-a.” * (Matɩe 6:24; 7:1, 20; 9:12; 26:52; Mark 12:17; Tʋʋma 20:35, Sebr Sõngo) Baa ne a Zezi sẽn togs gom-kãensã sẽn kolg yʋʋm 2000 loogr poorã, gom-kãensã sẽn tar pãngã tẽegr yaa nana rũndã-rũndã.
Sʋgsgã tũnugri
7. Bõe yĩng t’a Zezi maan sʋgsgo?
7 A Zezi tũnuga ne sʋgsgã sõma wʋsgo. A ra nong n maanda woto, baa ne a sẽn da tõe n togs a kɛlgdbã leokrã vẽeneg bal tɩ pa rɩk sẽkã. La bõe yĩng t’a maan sʋgsgo? Wakat-wakate, a tũnuga ne sʋgsg sẽn kẽed sũuri, sẽn na yɩl n puk a kɩɩsdbã yam-wẽnse, n kɩt tɩ b yɩ sɩɩ. (Matɩe 12:24-30; 21:23-27; 22:41-46) La naoor wʋsgo, a Zezi rɩka sẽk n maan sʋgsg sẽn na yɩl n taas sɩdã, sẽn na yɩl t’a kɛlgdbã gom n wilg sẽn be b sũyẽ, la sẽn na yɩl n kɩt t’a karen-biisã tagse. Bɩ d vaees makr a yiib sẽn tɩ loe ne tʋm-tʋmd a Pɩɛɛre.
8, 9. Wãn to la a Zezi tũnug ne sʋgsg n sõng a Pɩɛɛr t’a wa bãng sʋkr ning sẽn tɩ loe ne wẽn-doogã yaoodã leokr a toore?
8 Pipi, tẽeg-y yõor yaood dɛɛgdbã sẽn da wa n sʋk a Pɩɛɛr n gese a Zezi sã n da yaooda wẽn-doogã yaoodã. * A Pɩɛɛr sẽn mi n yaa yãg-yãg soabã leokame t’a “yaoodame sẽ.” Baasg zãnga, bilf poore, a Zezi kɩtame t’a Pɩɛɛr tagse, a sẽn yeel-a tɩ: “ ‘Sɩmo, fo tagsg yaa bõe? Dũniyã rĩm dãmba reegda yaood ãnda rãmb nengẽ? Bãmb meng kamba nengẽ bɩ, bɩ yaa sãamba nengẽ?’ Yẽ yeela bãmb yaa: ‘Yaa sãamba nengẽ.’ La a Zezi leoka yẽnda: [‘Dɩlla zaka kamb ka yaood ye,’ Sebr Sõngo].’ ” (Matɩe 17:24-27) A Zezi sʋgsgã võor da segd n yɩɩ vẽeneg ne a Pɩɛɛre. Bõe yĩnga?
9 A Zezi wakatã, ra pa tɩlae ne nanambsã zags neb tɩ b yao lampo ye. A Zezi yaool n da yaa saasẽ Rĩm a Zeova b sẽn da balemd wẽn-doogẽ wã Biribl yende. Rẽ kɩtame tɩ ra pa tɩlae t’a yao lampo wã ye. Ges-y t’a Zezi pa yeel a Pɩɛɛr leokrã vẽeneg woto ye. Ne bʋgsem, a tũnuga ne sʋgsg sõma n sõng a Pɩɛɛr t’a wa baas n bãng leokrã a toore, la tõe tɩ rẽ sõng-a lame t’a bãng t’a segd n tagsa neer n yaool n gome.
10, 11. A Zezi manesem yɩɩ wãn to, a Pɩɛɛr sẽn wa n fiuug rao tʋbr yʋʋmd 33 Pakã yʋngã, la wãn to la rẽ wilgd t’a Zezi ra mii sʋgsgã yõodo?
10 Makr a yiib-n-soabã tɩ loee ne bũmb sẽn maan yʋʋmd 33 Pakã yʋngo, kʋʋngã sẽn da wa n na n yõk a Zezi wã. Karen-biisã sʋka a Zezi n gese b sã n segd n zab n sõng-a lame. (Luk 22:49) A Pɩɛɛr pa yaas n gũ leokrã ye. A tol n fiuuga rao tʋbr ne sʋʋga (tõe meng t’a Pɩɛɛr da rat n maan-a-la wẽng sẽn yɩɩd woto). A Pɩɛɛr sẽn maana kɩɩsda a zu-soabã raabo, bala a Zezi ra segla a meng n na n bas tɩ b yõk-a. A Zezi manesem yɩɩ wãn to ne rẽ? Wa a sẽn nong n maagd a meng wakat fãa wã, a maana a Pɩɛɛr sʋgsg a tãabo: “Bõe n maan tɩ m na n bas bõn-yũudl ninga m Ba sẽn kõ maama n ka yũ?” “Fo ka mi tɩ mam tõe n pʋʋsa m Ba tɩ b kõ maam malɛk rãmb tus pis-yopoe la a yiib la? La a sã n yɩ woto Gʋlsg Sõamyã nins sẽn wilg tɩ yaa tɩlae tɩ yɩ woto wã na n yɩɩ wãn n paam pidsgu?”—Zã 18:11; Matɩe 26:52-54.
11 Tags-y kɩba-kãngã zug bilf n gese. Neb kʋʋng sũy sẽn yiki, n gũbg a Zezi, t’a ra miẽ t’a kũumã ra kolga wʋsgo, la t’a Ba wã yʋʋr pekr la ãdem-biisã fãagr da bee yẽ nugẽ. Ne rẽ fãa, a rɩka sẽk sasa kãng meng n zãms a Pɩɛɛr sɩd sẽn tar yõod wʋsgo, n tũnug ne sʋgsg hal tɩ sɩd kẽ a yamã sõma. Pa vẽeneg t’a Zezi ra mii sʋgsgã yõod sɩda?
Bilgr sẽn tar pãng wʋsgo
12, 13. a) Bilgr sẽn tar pãng yaa bõe? b) Wãn to la a Zezi tũnug ne bilgr sẽn tar pãng n na n wilg tɩ yaa yalemd tɩ d sãbg d saam-biisã, kongr sẽn pa zem fʋɩ yĩnga?
12 A Zezi koe-moonegẽ wã, a ra nong n tũnugda ne zãmsg manesem a to. Yaa bilgr sẽn tar pãng wʋsgã. Woto yaa f sẽn na n tũnug ne makr sẽn bilgd bũmb nebã sẽn mi tɩ pa tõe n yɩ, sẽn na yɩl tɩ tagsg yɩ vẽenega. Ne bilgr sẽn tar pãngã, a Zezi kɩtame tɩ nebã mams yɛlã tɩ yɩ vẽeneg b yamẽ wã, tɩ b ra pa tõe n yĩm-b nana-nana ye. Bɩ d ges makr a wãna.
13 A Zezi Tãng zug Zãmsgẽ wã, a sẽn da wa n wilgd vẽeneg tɩ d bas neb a taabã ‘bʋʋd kaoobã,’ a Zezi yeelame: “Yaa bõe tɩ fo get moog sẽn be fo ba-biigã nifẽ wã n ka get daooga sẽn be fo mengã nifẽ wã?” (Matɩe 7:1-3) Y tõe n mamsa yel-kãngã n ges bɩ? Ned sẽn nong neb a taab sãbgr yetame tɩ b bas t’a yãk moogã sẽn be a saam-biigã “nifẽ wã.” Nin-sãbs yetame t’a saam-biigã pa ne yɛlã vẽeneg tɩ sek a na tags tɩrg ye. La nin-sãbsã sẽn nong n kaood bʋʋdã meng nifr pʋgẽ ‘zeng-raoog’ n be be, n kɩt t’a pa ne sõma ye. Ad woto sɩd yaa manesem b sẽn pa tõe n yĩm sẽn na yɩl n wilg vẽeneg tɩ yaa yalemd tɩ d sãbg d saam-biisã, kongr sẽn pa zem fʋɩ yĩnga, tɩ tõnd mengã yaool n tar kongr sẽn yaa kãsemse!
14. Bõe yĩng t’a Zezi sẽn gom yaag rũmpigl n yaool n vol yʋgemdã yaa bilgr sẽn tar pãng wʋsgo?
14 Wakat a to, a Zezi puka Fariziẽ dãmbã bãong n yeel tɩ b yaa “sor-wilgdb sẽn yaa zoense sẽn yaagd rũmpigli n yaool n vend yʋgma!” (Matɩe 23:24) Sɩda, woto ra yaa bilgr sẽn tar pãng wʋsgo. Bõe yĩnga? A Zezi kɛlgdbã ra miime tɩ yʋgemd bedrem yɩɩda rũmpigl zĩig sẽn zãre. B magame n ges tɩ yaa rũmpigli milyõ 70 n tat yʋgemd zɩslem. Sẽn paase, a Zezi ra miime tɩ Fariziẽ rãmbã ra yoogda divẽ wã ne peen-goaadga. Nin-kãensã sẽn nong noy tũub tɩ zems kɛpɩ wã ra pa rat n wa vol rũmpigl n wa lebg rẽgd tũudmã yel-maandɩ wɛɛngẽ ye. La sã n yaa ne makr wɛɛngẽ b yaool n vonda yʋgemd me sẽn yaa rẽgdã. (Maankʋʋre 11:4, 21-24) A Zezi sẽn da rat tɩ b wʋm bũmb ningã võor da yaa vẽenega. Fariziẽ rãmbã ra tũuda Tõogã bũmb ning sẽn yaa kɩdg n yɩɩdã neere, la b ra pa gũusd n tũud yɛl nins sẽn tar-b yõod n yɩɩdã sẽn yaa “tɩrlem la nimbãan-zoeere la sɩda” ye. (Matɩe 23:23) Ad a Zezi sɩd puk b sẽn sɩd yaa b rãmbã vẽenega!
15. Zãmsg kẽer bʋs la a Zezi taas n tũnug ne bilgr sẽn tar pãng wʋsgo?
15 A Zezi koe-moonegã fãa pʋgẽ, a ra nong n tũnuga ne bilgr sẽn tar pãng wʋsgo. Ges-y makr a wãna. “Tẽeb wa siil bila” sẽn da tõe n serg tãnga. Makr ning a Zezi sẽn tũnug ne ka wã yaa sõma wʋsg sẽn na yɩl n wilg tɩ baa yaa tẽeb bilf la f tara, a tõe n pidsa yɛl wʋsgo. (Matɩe 17:20) Yʋgemd sẽn yaa bedrã sẽn na n modg n kẽ fũ-pĩim võorẽ. Ad woto sɩd yaa bilgr sẽn wilgd sõma tɩ yaa toog ne arzɛk soab sẽn dat n balem Wẽnnaam, n yaool n nong laog la arzɛgse! (Matɩe 19:24) A Zezi makr goamã sẽn be rasãndã, la a sẽn tõe n gom tɩ sɩd kẽ nebã sũy sõma-sõma ne goam bilfã pa bõn-kãseng yãmb nifẽ sɩda?
A tũnuga ne tags-tɩrs b sẽn da pa tõe n kɩɩse
16. Wakat fãa, a Zezi tũnuga ne a bãngrã sẽn yaa wʋsgã wãn to?
16 A Zezi sẽn da tar yam sẽn zems zãngã ra tara minim wʋsg n na n kɩt tɩ nebã tags tɩrga. La a zɩ n tũnug ne manesem kãngã tɩ pa zems ye. A zãmsgã pʋgẽ, wakat fãa, a tũnuga ne a bãngrã n kɩt tɩ sɩdã kẽng taoore. Wakat kẽere, a tũnuga ne tags-tɩrg sẽn tar pãng wʋsg n kɩɩs kɩɩsg goam sẽn pa sɩdã tũudum bɛɛb sẽn wat ne wã. Naoor wʋsgo, a tũnuga ne tagsg sẽn yaa tɩrg n kõo a karen-biisã zãmsg sẽn tar yõodo. Bɩ d ges tõog kãseng ning a Zezi sẽn tare, sã n yaa ne tags-tɩrs tũnugrã.
17, 18. Tags-tɩrg bʋg sẽn tar pãng wʋsg la a Zezi tũnug ne n kɩɩs taal ning Fariziẽ rãmbã sẽn ning-a zaalem yĩngã?
17 Ges-y sasa ning a Zezi sẽn da wa n sãoog rao a yembr zĩn sẽn tar la sẽn da yaa zoang n pa tõe n goma. Fariziẽ rãmbã sẽn wʋm kɩbarã b yeelame: “Dao kãng ka rigd zĩn-dãmba a sã n ka ne Bɛlzebul [a Sʋɩtãana] pãnga sẽn yaa zĩn-dãmba naab ye.” Bãng-y tɩ ka wã Fariziẽ rãmbã sak n deegame tɩ pãng sẽn yɩɩd ninsaal pãng ra yaa tɩlae sẽn na yɩl n dig a Sʋɩtãan zĩn dãmbã. Baasg zãnga, sẽn na yɩl tɩ nebã ra tẽ a Zezi, b yeelame t’a Zezi pãngã ra yita a Sʋɩtãan nengẽ. A Zezi wilgame tɩ b pa tags tɩ bɩ la b yaool n gom woto, n leok-ba: “Welgr sẽn be soolem ninga fãa na sãam, la welgr sẽn kẽed tẽng ninga bɩ yir ninga fãa kõn yals ye. Sʋɩtãana sã n digd Sʋɩtãana a welga ne a menga. Dẽ, a soolem na yɩɩ wãn n yalse?” (Matɩe 12:22-26) Sɩda, a Zezi ra yeta woto: ‘Mam sã n da ya a Sʋɩtãan tʋm-tʋmd wa yãmb sẽn yetã, n sãamd a Sʋɩtãan sẽn maana, rẽnd a Sʋɩtãan tʋmd n kɩɩsda a meng bõn-datɩ n segd n lʋɩ ka la bilfu.’ Woto pa tags-tɩrg sẽn tar pãng wʋsg sɩda?
18 Rẽ poore, a Zezi kɩtame tɩ nebã tags yel-kãngã zugu. A ra miime tɩ Fariziẽ rãmbã sʋk menga, neb kẽer da rigda zĩn dãmba. Rẽ n so t’a maan-b sʋkr sẽn yaa nana la sẽn wilgd tɩ b ka bʋʋm ye: “La mam sã n digd zĩn-dãmba ne a Bɛlzebul pãnga, yãmb kamba [bɩ y karen-biisã] rigda bãmb ne ãnda pãnga?” (Matɩe 12:27) A Zezi tagsgã ra yaa woto: ‘Sɩda, mam sã n digd zĩn dãmbã ne a Sʋɩtãan pãnga, rẽnd yãmb mensã karen-biis tʋmda ne pãn-kãnga.’ Bõe la Fariziẽ rãmbã tõe n yeel masã? B kõn tol n sak n deeg tɩ b karen-biisã tʋma ne a Sʋɩtãan pãng ye. A Zezi tũnuga ne tags-tɩrg n kɩt tɩ b bãng tɩ b sẽn ning-a taalã ra yaa yalemdo.
19, 20. a) Wãn to la a Zezi tũnug ne tags-tɩrg sõma? b) Wãn to la a Zezi tũnug ne makr sẽn wat n baas ne ‘sẽn yɩɩda’ n kɩt tɩ nebã tagse, a sẽn da wa n leokd a karen-biisã sẽn kos-a t’a zãms-b pʋʋsgã?
19 A Zezi sẽn tũnug ne tags-tɩrg n kɩt t’a bɛɛbã yɩ sɩɩ wã toor sẽn ka be, a tũnuga ne tags-tɩrs nebã sẽn sak n deege, n zãms-b sɩd sẽn kengd raood la sẽn be yamleoog a Zeova wɛɛngẽ. Naoor wʋsgo, a tũnuga ne makr a sẽn wat n baas n yeel tɩ ‘sẽn yɩɩda,’ n sõng a kɛlgdbã tɩ b ra tek sɩd ning b sẽn zoe n miẽ wã bala, la b paam tẽeb n paas me. D ges makr a yiib bala.
20 A sẽn da wa n leokd a karen-biisã sẽn kos-a t’a zãms-b pʋʋsgã, a Zezi rɩka makr ne rao ‘pẽdgr’ sẽn wa n baas n kɩt t’a zoa wã sẽn da pa rat n sõng-a wã sak a kosgã. A Zezi leb n wilgame tɩ roagdbã tʋllame n ‘kõ b kambã kũun sẽn yaa sõma.’ Rẽ poore, a baasa woto: ‘A sã n yaa woto tɩ yãmb a nin-wẽnsa bãng tɩ kõ yãmb kamba kũun sẽn yaa sõama; dẽ, sẽn yɩɩda yãmb arzãn Ba kõn kõ neb nins sẽn kot bãmba Sɩɩg Sõng bɩ?’ (Luk 11:1-13) A Zezi sẽn da rat n wilg ka wã pa manesem sẽn wõnd taab ye, la yaa manesem sẽn yaa lebend ne taaba. Zoa sẽn pa rat n kõ sõngr tõe n wa baasame n sak a to wã kosgo, la roagdbã ne b sẽn yaa ninsaalb sẽn pa zems zãngã sã n get b kambã ratem yelle, rẽnd sẽn yɩɩd fãa tõnd saasẽ Ba wã kõta a vʋʋsem sõngã a sõgen dãmb sẽn tũud-a ne sɩda, la sẽn pʋʋsd-a ne sik-m-mengã!
21, 22. a) Tags-bʋg la a Zezi tũnug ne, a sẽn da wa n kõt saglg sẽn wilgd nebã sẽn na n maan to-to n mao ne yɩɩrã laogã yɛl wɛɛngẽ wã? b) D sẽn lebg n tẽeg a Zezi zãmsgã manesem kẽerã, d tagsg yaa bõe masã?
21 A Zezi tũnuga ne tagsg sẽn wõnd woto, a sẽn wa n kõt saglg sẽn wilgd nebã sẽn na n mao ne yɩɩrã laogã yɛl wɛɛngẽ wã. A yeelame: ‘Bɩ y ges gãabdo. Bãmb ka bʋta, la b ka tigsd ye, la bãmb ka tar bũmb bĩngr zĩiga wala baoor ye. La Wẽnnaam dɩlgda bãmba. Yãmb ka be yõod n yɩɩd bõn-yɩgdɩ wã sɩda? Bɩ y ges ruluglɛlma sẽn yɩ wãn n bɩtẽ. A ka tʋmda, la a ka wĩid lamd me ye . . . Wẽnnaam sã n maneg moog tɩ yɩ neer woto, sẽn be weoogẽ dũnda tɩ b na n yõog bugum beoogo, bãmb kõn ges yãmb yell hal wʋsgo n yɩɩd bɩ?’ (Luk 12:24, 27, 28) N-ye, a Zeova sã n get liuuli la tɩ-puud yelle, a sẽn na n ges a sõgen dãmbã yell sõma n yɩɩda! A Zezi sẽn gom ne bʋgsem n wilg tags-tɩrg sẽn tar pãng wʋsg woto wã kẽe a kɛlgdbã sũy sõma tɩ sãmbg ka be ye.
22 D sẽn lebg n tẽeg a Zezi zãmsgã manesem kẽerã, d tõe n tagsa masã tɩ gard dãmb nins sẽn pa yõk-a wã sẽn wa n yeel tɩ “ned nan ka gom wa ra-kãngã abada” wã, b ra pa yagd ziri ye. La tõe tɩ b sẽn mi a Zezi ne zãmsg manesem ning n tɩ yɩɩdã yaa makrã bɩ kɩbayã tũnugri. Bõe yĩng t’a tũnug ne manesem kãngã? La yaa bõe n kɩt t’a makrã ra tar pãng woto? Sʋgs-kãensã na n paama leokr sõsg ning sẽn pʋgdã pʋgẽ.
[Tẽngr not rãmbã]
^ sull 3 Ges-y sõss nins sẽn yaa “Mam kõo yãmb mamsgo,” la ‘Tũ-y maam wakat fãa,’ sẽn be yʋʋmd 2002, bõn-bɩʋʋng kiuug pipi raar Gũusg Gasgã pʋgẽ wã.
^ sull 6 Yaoolem gom-kãngã sẽn be Tʋʋma 20:35 (Sebr Sõngo) pʋgẽ wã, yaa tʋm-tʋmd a Poll bal n lebs n dɩk-a, baa ne a võorã sẽn be Evãnzill dãmbẽ wã. Tõe t’a Poll wʋm-a-la ned noorẽ (sã n pa karen-biig sẽn wʋm a Zezi noorẽ n dɩk n togs-a, ya a Zezi meng vʋʋgra poor la a togs-a) bɩ yaa ne Wẽnnaam vẽnegr la a wʋm-a.—Tʋʋma 22:6-15; 1 Korẽnt dãmba 15:6, 8.
^ sull 8 Zʋɩf rãmbã ra segd n yaoa wẽn-dooga lampo yʋʋmd fãa ne drakem a yiibu (sẽn zems rasem a yiib tʋʋmd yaoodo). B ra rɩkda ligd kãng n get wẽn-doogã zãab yelle, tʋʋmd ning sẽn maand be wã, la daar fãa maandã b sẽn kõt buudã yĩngã yelle.
Y tẽrame bɩ?
• Mak-bʋs n wilgd t’a Zezi sẽn da zãmsd nebã to-to wã ra yaa nana-nana la vẽenega ?
• Bõe yĩng t’a Zezi tũnug ne sʋgsg a zãmsgã pʋgẽ?
• Bilgr sẽn tar pãng yaa bõe, la wãn to la a Zezi tũnug ne rẽ?
• Wãn to la a Zezi tũnug ne tags-tɩrg n zãms a karen-biisã sɩd sẽn be yamleoog a Zeova wɛɛngẽ?
[Zãmsgã sogsgã]
[Foto, seb-neng 18]
Fariziẽ dãmbã ra ‘yaagda rũmpigli la b ra vond yʋgma’