Rɩk-y Karen-saam kãsengã togs-n-taare
Rɩk-y Karen-saam kãsengã togs-n-taare
“Bɩ y kẽng n maan nebã . . . tɩ b yɩ mam karen-biisi . . . La zãms bãmb tɩ b sak bũmb nins fãa mam sẽn da togs yãmbã.”—MATƖE 28:19, 20.
1, 2. a) Wãn to la d tõe n yeel tɩ tõnd fãa yaa karen-saam dãmba? b) Sã n yaa zãmsgã wɛɛngẽ, zɩɩb bʋg sẽn pa wõnd a taab la kiris-neb hakɩkã tara?
YÃMB yaa karen-saamb bɩ? D tõe n yeelame tɩ n-ye. Wakat buud fãa yãmb sẽn wilgd so-toagd sẽn menem sore, y sẽn wilgd y tʋmd-n-taag a sẽn na n maan tʋʋmd to-to, bɩ n wilg biig a sẽn na n wid a naooda to-to, y kõta zãmsgo. Neb a taabã sõngr ne manesem kãensã kõta sũ-noogo, pa sɩda?
2 Sã n yaa ne neb a taabã zãmsg wɛɛngẽ, kiris-neb hakɩkã tara zɩɩb sẽn pa wõnd a taaba. B bobla tõnd tʋʋmd sẽn yaa ‘maan neba tɩ b yɩ karen-biisi, n zãms-ba.’ (Matɩe 28:19, 20) Tigingã pʋgẽ me, d tara soay n na n kõ zãmsgo. Rap sẽn tar tõog la b yãk tɩ b yɩ ‘pe-kɩɩmb la karen-saam dãmba,’ sẽn na yɩl n keng tigingã tẽebo. (Efɛɛz rãmba 4:11-13) B kiris-neb tʋʋmã b sẽn maand daar fãa wã pʋgẽ, pagb nins sẽn bɩ wã segd n ‘zãmsa sẽn yaa sõama’ pʋg-bɩɩsã. (Tɩt 2:3-5) B sagenda tõnd fãa tɩ d keng d tẽed-n-taasã pelse, la d tõe n tũu sagl-kãngã n tũnug ne Biiblã n keng neb a taabã tẽebo. (1 Tesalonik rãmba 5:11) Ad sɩd yaa zu-noog la d tara, d sẽn yaa Wẽnnaam Gomdã karen-saam dãmba, la d sẽn tõe n taas neb a taabã tẽebã arzɛgs sẽn tõe n yɩ nafr sẽn kaoosdã yĩnga!
3. Wãn to la d tõe n paas d karen-saamdã sõmblem?
3 La wãn to la d tõe n maneg d karen-saamdã t’a yɩ sõma n paase? Sẽn tɩ yɩɩd fãa, yaa d sẽn na n dɩk Karen-saam Kãseng a Zezi togs-n-taare. La neb kẽer tõe n yeelame tɩ: ‘La m yɩta wãn n tõog n dɩk a Zezi togs-n-taare? Yẽ ra zemsa zãng wɛ.’ Yaa sɩd tɩ d pa tõe n yɩ karen-saam dãmb sẽn zems zãng ye. La baa tõnd tõog zĩ-kãng wɛɛngẽ wã sẽn zem to-to fãa, d tõe n maana d pãng sẽn tõe tɛk n dɩk a Zezi sẽn zãms nebã to-to wã togs-n-taare. Bɩ d ges d sẽn tõe n maan to-to n dɩk a zãmsgã manesem togs-n-taare: A sẽn kõt zãmsg võor wʋmb sẽn yaa nana-nana wã, a sẽn tũnugd ne sʋgsgã sõma wã, a sẽn kɩtd tɩ nebã tags tɩrgã, la a sẽn dɩkd makr sẽn zemsã.
D kõ zãmsg võor wʋmb sẽn yaa nana
4, 5. a) Bõe yĩng tɩ sɩd ning sẽn be Biiblã pʋgẽ wã võor wʋmb yaa nana wʋsgo? b) Sẽn na yɩl n kõ zãmsg võor wʋmb sẽn yaa nana, bõe yĩng tɩ tar yõod tɩ d gũus ne gom-biis nins d sẽn tũnugd ne wã?
4 Wẽnnaam Gomdã sɩd kãsemsã võor wʋmb pa toog ye. A Zezi yeela woto pʋʋsg pʋgẽ: “M Ba . . . , mam pẽgda yãmba, yãmb sẽn solg bõn-kãens ne yẽesem dãmba la ne yam dãmba, n yaool n vẽneg kom-bõoneg ne bõn-kãensa yĩnga.” (Matɩe 11:25) A Zeova vẽnega a raabã n wilg neb nins sẽn yaa pʋ-peelem la sik-m-mens rãmba. (1 Korẽnt dãmba 1:26-28) Dẽnd sɩd ning sẽn be Biiblã pʋgẽ wã võor wʋmb yaa nana.
5 Yãmb sã n maand Biibl zãmsg ne neda, bɩ y sã n lebg n tɩ ges neb sẽn dat n bãng sɩdã, wãn to la y tõe n kõ zãmsg võor wʋmb sẽn yaa nana. Be neere, yaa bõe la d zãms d Karen-saam Kãsengã nengẽ? Sẽn na yɩl t’a kɛlgdbã wʋsg sẽn da yaa “nin-tals sẽn ka paam zãmsgã” wʋm a zãmsgã võore, a Zezi tũnuga ne goam sẽn yaa vẽenes tɩ b ra tõe n wʋm a võore. (Tʋʋma 4:13) Sẽn na yɩl n kõ zãmsg võor wʋmb sẽn yaa nana, pipi bũmb d sẽn segd n maan yaa d tũus d gom-biisã sõma. Pa tɩlae tɩ d tũnug ne gom-zɩsd bɩ goam võor wʋmb sẽn yaa toog sẽn na yɩl tɩ neb a taabã sak n deeg sɩd ning sẽn be Wẽnnaam Gomdẽ wã ye. ‘Goam a woto sẽn yɩɩd neb a taaba rẽnd’ tõe n yɛɛsa neba, sẽn yɩɩd fãa sẽn pa karem-b n zãag bɩ sẽn pa tar-b bãngr wʋsgã. (1 Korẽnt dãmba 2:1, 2) A Zezi makrã wilgdame tɩ gom-biis võor wʋmb sẽn yaa nana b sẽn yãk ne gũusg neer tõe n taasa sɩdã t’a tall pãng wʋsg n yɩɩda.
6. Wãn to la d tõe n da lim karen-biig ne zãmsg wʋsg sẽn loog noore?
6 Sẽn na yɩl n kõ zãmsg võor wʋmb sẽn yaa nana, d segdame me n gũus n da lim d karen-biigã ne zãmsg wʋsg tɩ loog ye. A Zezi ra miime tɩ yɛl n da be t’a karen-biisã pa tõe n wʋm b võor nand ye. (Zã 16:12) Tõnd me pa segd n yĩm tɩ yaa woto ne Biiblã zãmsdb ye. Wala makre, d sã n maand Biibl zãmsg ne ned Bãngr Sẽn Tar n Debd Vɩɩm Sẽn-Kõn-Saẽ Wã, pa tɩlae tɩ d wilg bũmb fãa võor ye. * Leb n pa tɩlae me tɩ d bao n na n zãms yɛl wʋsg var-vare, wala yɛl wʋsg zãmsg n tar yõod n yɩɩd ye. Wall tɩ yɩ woto, yaa yam tʋʋmd tɩ d ges karen-biigã ratem la a pãn-tõogã n yaool n yãk zãmsgã tʋʋlem sẽn na n yɩ to-to. Tõnd daabã yaa d sõng-a t’a lebg Kirist karen-biig la a Zeova balemda. Tõnd segd n dɩka sẽk ning fãa sẽn yaa tɩlaeyã sẽn na yɩl n sõng zãmsdã sẽn nong sɩdã t’a wʋm a sẽn zãmsd bũmb ningã võor vẽenega. Woto, sɩdã tõe n kẽe a sũurã n tus-a t’a sak Wẽnnaam.—Rom dãmba 12:2.
7. Sagl-bʋs n tõe n sõng tõnd tɩ d kõ zãmsg võor wʋmb sẽn yaa nana, d sã n kõt sõss tigingã pʋgẽ?
7 D sã n wa kõt sõss tigingẽ wã, sẽn yɩɩd fãa nin-paals sã n be kɛlgdbã sʋka, wãn to la d tõe n gom ‘goam võor nebã sẽn wʋmd’ nana-nana? (1 Korẽnt dãmba 14:9) Ges-y sagls a tãab sẽn tõe n yɩ sõngre. Pipi, wilg-y gom-sãamsã fãa y sẽn na n tũnug ne wã võore. Tõnd sẽn wʋm Wẽnnaam Gomdã võorã kɩtame tɩ tõnd wʋmd goam kẽer võor neb wʋsg sẽn pa mi ye. D sã n tũnugd ne goam wala “tʋm-tʋmd sẽn tũud sɩd la sẽn tar yam,” “piis a taab” la “Babilon kãsenga,” d segd n wilga b võorã ne gom-koees sẽn kɩtd tɩ b võorã yaa vẽenega. Yiib-n-soaba, lak-y y meng ne goam wʋsgo. Goam wʋsgo, la goam b sẽn togs ne bãng-bɛdã rãmb gom-biis tõe n kɩtame tɩ kɛlgdbã yam yi ne sõsgã. D sã n dat tɩ d goama yɩ vẽenese, rẽndame tɩ d bas gom-biis la goam nins sẽn pa tɩlaeyã. Tãab-n-soaba, ra bao-y n wɛgs tagsa wʋsg ye. Tõe tɩ d maana vaeesg n yã kɩbay wʋsg sẽn be yamleoogo. La sẽn são yaa d sẽn na n kʋms kɩbayã tɩ b lebg tags-yẽg a wãna, n tũnug ne tagsa nins bal sẽn wilgd vẽeneg tɩ tags-yẽg kãens yaa sɩdã, tɩ woto bɩ d tõog n wɛgs-b wakat ning b sẽn kõ wã pʋgẽ.
Sʋgsg sẽn tar pãng tũnugri
8, 9. Wãn to la d tõe n yãk sʋkr sẽn zems ne kɛlgdã ratem? Kõ-y makre.
8 Tẽeg-y t’a Zezi ra mii sʋgsg tũnugr sõma-sõma sẽn na yɩl n kɩt t’a karen-biisã wilg sẽn da be b yamẽ wã la sẽn na yɩl n tus-b tɩ b tags sõmã. A Zezi maana sʋgsg ne bʋgsem n gom tɩ kẽ b sũyã sõma. (Matɩe 16:13, 15; Zã 11:26) Wala a Zezi, wãn to la d tõe n tũnug ne sʋgsg sẽn tar pãnga?
9 D sã n wa moond zak-zaka, d tõe n tũnuga ne sʋgsg n nek nebã ratem, tɩ rẽ pak sor tɩ d gom Wẽnnaam Rĩungã yelle. Wãn to la d tõe n yãk sʋkr sẽn zems ne kɛlgdã ratem? Yɩ-y ned sẽn get ne gũusgu. Y sã n wa kolgd zaka, bɩ y ges teed nins sẽn be zaka yɩngã. Reem teed n be zakã pʋgẽ, tɩ wilgdẽ tɩ zakã tara kamb bɩ? Sã n yaa woto, d tõe n sʋkame: ‘Yãmb zoe n sʋka y meng n ges dũniyã sẽn na n yɩ to-to, yãmb kambã sã n wa bɩ?’ (Yɩɩl Sõamyã 37:10, 11) Kʋɩlensã tara sogds wʋsgo, bɩ bũmb sẽn peebd n gɩdgd wagda bɩ? Sã n yaa woto d tõe n sʋkame: ‘Yãmb tagsdame tɩ wakat n na n wa zĩnd tɩ nebã na n paam bãan b yiy la soayã zut bɩ?’ (Miise 4:3, 4) Bũmb n be n wilgdẽ tɩ koams n be zakã pʋgẽ bɩ? Rẽ, y tõe n sʋkame: ‘Wakat n na n wa zĩnd tɩ nebã fãa na n paam yĩns laafɩ bɩ?’ (Ezai 33:24) D tõe n yãa sagls wʋsg D Sẽn Na n Sɩng la D Ket n Kẽngd Taoor ne Biibl Sõss To-to wã sebr pʋgẽ. *
10. Wãn to la d tõe n tũnug ne sʋgsg n ‘toog’ Biibl karen-biigã tagsa la a yĩn-sidsã, la bõe la d segd n ning d yamẽ?
10 Wãn to la d tõe n tũnug ne sʋgsgã sõma, d sã n wa zãmsd ned Biiblã? D pa tõe n karem sẽn be nebã sũyẽ wa a Zezi ye. Baasg zãnga, d sã n maan sʋgsg ne gũusg la yam, tõe n sõng-d lame tɩ d ‘toog’ Biibl zãmsdã tagsa la a yĩn-sidsã. (Yelbũna 20:5) D rɩk makr ne d sẽn na n zãmsd Bãngr sebrã sak ning sẽn yet tɩ: “Bũmb ning sẽn kɩt tɩ wẽn-zoeer vɩɩm kõt sũ-noogã.” A gomda Wẽnnaam sẽn tagsd to-to ne pʋ-likã, yoob la yɛl a taab yelle. Biibl karen-biigã tõe n leoka sʋgsg nins sẽn gʋlsã tɩ zems kɛpɩ, la rẽ yĩnga a sak n deega a sẽn zãmsdã bɩ? D tõe n sʋkame: ‘Sã n yaa ne yãmba, a Zeova sẽn tagsd to-to yɛl a woto zutã wõnda bũmb sẽn zems bɩ?’ ‘Wãn to la y tõe n tũ Biiblã no-kãensã y vɩɩmã pʋgẽ?’ La tẽeg-y tɩ y segd n talla waoogr ne Biibl karen-biigã. D pa rat n maan sʋgsg sẽn ningd-a yãnd ye.—Yelbũna 12:18.
11. Wãn to la zãma sõsdbã tõe n tũnug ne sʋgsg sẽn tar pãnga?
11 Zãma sõsdbã me tõe n tũnuga ne sʋgsg sẽn tar pãnga. Sõsg pʋgẽ sʋgsgo, sẽn yaa sʋgsg d sẽn pa gũud tɩ d kɛlgdbã zẽk b koɛɛg n leokã tõe n sõnga kɛlgdbã tɩ b bʋgs b yamẽ la b tags tɩrga. Wakat-wakate, a Zezi tũnuga ne sʋgs-kãensã buudu. (Matɩe 11:7-9) Sẽn paase, sɩngr-goama poore, sõsd tõe n tũnuga ne sʋgsg n wilg tags-kãsems nins a sẽn na n wɛgsã. A tõe n yeelame: “Tõnd rũndã sõsgã pʋgẽ, d na n yãa sʋgsg nins sẽn pʋgdã leoore . . . ” Rẽ poore, baasg goamẽ wã, a tõe n tũnuga ne sʋgs-kãens n lebg n tẽeg tags-kãsemsã.
12. Kõ-y makr n wilg kiris-neb kãsem dãmbã sẽn tõe n tũnug ne sʋgsg to-to n sõng tẽed-n-taag t’a paam belsg sẽn yit Wẽnnaam Gomdã pʋgẽ?
12 B pe-kɩʋʋng tʋʋmdã pʋgẽ, kiris-neb kãsem dãmbã tõe n tũnuga ne sʋgsg n sõng “sũ-sãoong rãmbã” tɩ b paam belsg sẽn yit a Zeova Gomdã pʋgẽ. (1 Tesalonik rãmba 5:14) Wala makre, sẽn na yɩl n sõng ned sẽn be sũ-sãoong pʋgẽ, kãsem soab tõe n taka a yamã n sik Yɩɩl Sõamyã 34:19 zugu. Be yetame: “Zusoaba pẽnegda neb nins sũy sẽn sãamã, la bãmb fãagda sũ-pa-noom dãmbã.” Sẽn na yɩl n kɩs sɩd tɩ ned ning sẽn koms raoodã nee gom-kãensã sẽn pak yẽ mengã to-to, kãsem soabã tõe n sʋkame: ‘A Zeova pẽe ãnda? Wakat-wakate, fo ‘sũur sãamdame’ bɩ? A Zeova sã n pẽe nin-kãensã wala Biiblã sẽn yetã, woto pa rat n yeel t’a pẽe foo sɩda?’ Pɛlg kengr woto tõe n kenga ned sũur sẽn sãam raoodo.—Ezai 57:15.
D tũnug ne tags-tɩrga
13, 14. a) Wãn to la d tõe n kɩt tɩ ned tags tɩrga, a sã n yetẽ t’a pa tõe n tẽ Wẽnnaam a nif sẽn pa ne? b) Bõe yĩng tɩ d pa segd n tẽ tɩ yaa nebã fãa n na n sake?
13 Tõnd koe-moonegã pʋgẽ, d rat n gomame tɩ kẽ nebã sũy n tũnug ne tags-tɩrs sẽn yaa sõma la sẽn kɩtd tɩ b sak n deege. (Tʋʋma 19:8; 28:23, 24) Woto rat n yeelame tɩ d segd n tũnuga ne tags-gĩtim võor wʋmb sẽn yaa toogo, sẽn na yɩl n kɩt tɩ neb a taabã sak n deeg sɩd ning sẽn be Wẽnnaam Gomdẽ wã bɩ? Abada. Pa tɩlae tɩ tagsg sẽn yaa tɩrg võor wʋmb yɩ toog ye. Tagsa sẽn yaa tɩrs b sẽn wilg tɩ b võorã wʋmb yaa nana nong n tara pãng n yɩɩda. D ges makr a yembre.
14 D na n leoka wãn to, ned sã n yeel t’a pa tõe n tẽ Wẽnnaam a sẽn pa tõe n yã ne a nifu? D tõe n kɩtame t’a tags la a sak n deeg tɩ teoog fãa tara maanda. D sã n ne tʋʋmde, d sakd n deegame tɩ ned n tʋme. D tõe n yeelame: ‘Yãmb sã n be weoogẽ n wa yã ro-neer tɩ rɩɩb be be, y na n sak n deega vẽeneg tɩ ned n me roogã la a ning rɩɩbã be. Woto me, d sẽn ne tɩ bũmbã fãa maana ne raab dũniyã zug la d ne rɩɩbã sẽn yaa wʋsg tẽngã zugã, pa bũmb sẽn zems tɩ d sak n deeg tɩ Nina n naan woto sɩda?’ Biiblã wilgda yel-kãng vẽeneg woto: “Roog fãa yaa ned n me, la yaa Wẽnnaam n me bũmb fãa.” (Hebre dãmba 3:4) Baasg zãnga, baa tõnd tagsgã sẽn yaa tɩrg to-to fãa, pa nebã fãa n na n sak n deeg ye. Biiblã tẽegda tõnd tɩ yaa neb nins bal sẽn ‘tar yam sõngã’ n na n lebg tẽedba.—Tʋʋma 13:48, NW; 2 Tesalonik rãmba 3:2.
15. Tags-tɩrg bʋg buud la d tõe n tũnug ne n wilg a Zeova zʋg-sõma wã la a manesmã, la makr a yiib bʋs n wilgd d sẽn tõe n tũnug ne tagsg sẽn yaa tɩrg to-to?
15 Tõnd zãmsgã pʋgẽ, yaa koe-moonegã pʋgẽ tɩ yaa tigingã pʋgẽ me, d tõe n tũnuga ne tags-tɩrg n kɩt tɩ nebã bãng a Zeova zʋg-sõma wã la a manesmã. Sẽn yɩɩd fãa, wakat-wakate, a Zezi tũnuga ne tagsg buud sẽn baasd ne ‘sẽn yɩɩda’ sõma. (Luk 11:13; 12:24) Tags-tɩrg kãngã buudã sẽn tik manesem sẽn yaa lɛbl ne taab zuta yĩngã, a tõe n talla pãng wʋsg kɛlgdbã zugu. Sẽn na yɩl n wilg tɩ bugum yirã zãmsg pa tar võore, d tõe n yeelame: ‘Ba sẽn tar nonglem pa na n sɩbg a biig n dɩk biigã nus n ning bugmẽ ye. Sẽn yɩɩd fãa, tõnd saasẽ Ba wã sẽn tar nonglmã, sẽn zɩ n tags bugum yirã maaneg yellã meng kõn sak n maan woto ye!’ (Zeremi 7:31) Sẽn na yɩl n zãms nebã t’a Zeova geta a sõgen dãmbã yembr-yembr yelle, d tõe n yeelame: ‘A Zeova sã n mi ãds milyaar dãmbã fãa a yembr yʋʋre, sẽn yɩɩd fãa, a kõn ges ninsaalbã a sẽn nong a sẽn da ne a Biriblã zɩɩm sẽn tar yõod wʋsgã sɩda?’ Tags-tɩrg sẽn tar pãng a woto tõe n sõnga tõnd tɩ d gom tɩ kẽ neb a taabã sũy sõma.
Makr sẽn zemse
16. Bõe yĩng tɩ makr rɩkr tar yõod zãmsg pʋgẽ?
16 Makr sẽn tar pãng yaa wa noosd sẽn kɩtd tɩ tõnd zãmsgã tall yamleoog n paas ne neb a taabã. Bõe yĩng tɩ makr dɩkr tar yõod zãmsg pʋgẽ? Karen-saamb a yembr wilga woto: “Tags woto bal n pa tũnug ne makrã bee yɛl nins sẽn yaa toog n yɩɩd ne ninsaalbã sʋka.” Makrã kɩtdame tɩ d mamsd yɛl sẽn tar pãng d yamẽ wã tɩ yaa vẽenega, tɩ sõngd-d tɩ d wʋm tags-paalsã võor n paase. A Zezi ra mii a sẽn na n tũnug ne makr sõma wʋsg to-to. (Mark 4:33, 34) Bɩ d ges d sẽn tõe n maan to-to n tũnug ne zãmsg manesem kãngã.
17. Bũmb a naas bʋs n kɩtd tɩ makr tall pãnga?
17 Bõe n kɩtd tɩ makr tar pãngã? Pipi, a segd n zemsa ne kɛlgdbã, n tɩ loe ne yɛl kɛlgdbã sẽn mi sõma. D tẽrame t’a Zezi makr wʋsg ra tɩ loee ne a kɛlgdbã daar fãa vɩɩmã yɛla. Yiib-n-soaba, makr segd n zemsa ne tagsg ning d sẽn wɛgsdã. Makrã sã n sɩd pa zemse, a na n yuusa kɛlgdbã yam bala. Tãab-n-soaba, makr pa segd n tall yɛl wʋsg sẽn pa tɩlae ye. Tẽeg-y t’a Zezi togsa yɛl nins sẽn yaa tɩlaeyã la a bas sẽn pa tɩlaeyã. Naas-n-soaba, d sã n dɩk makre, d segd n kɩsa sɩd tɩ zãmsg ning b sẽn tõe n paam a pʋgẽ wã yaa vẽenega. Sã n pa rẽ fãa, kẽer tõeeme n pa bãng tagsg ning tõnd sẽn dat n wilgã ye.
18. Wãn to la d tõe n paam makr sẽn zemse?
18 Wãn to la d tõe n paam makr sẽn zemse? Pa tɩlae tɩ d mams kɩba-wogd sẽn pid ne yɛl wʋsg ye. Mak-koees tõe n talla pãng wʋsgo. Modg-y bal n tags makr sẽn tɩ loe ne tagsg ning y sẽn wɛgsdã. Wala makre, y sã n gomd Wẽnnaam sugrã yelle, n dat n dɩk makr ne tagsg ning sẽn be Tʋʋma 3:19 (Sebr Sõngo) pʋgẽ wã, zĩig ning sẽn yet t’a Zeova ‘yẽesdame’ bɩ a yiisda tõnd kongrã. Woto a yen-yen wã yaa makr goam sẽn tar pãnga, la yaa mak-bʋg la d tõe n dɩk vẽeneg n wilg tags-kãngã? Yẽesdg bɩ, bɩ gomm? D tõe n yeelame: ‘A Zeova sã n kõ tõnd yel-wẽnã sugri, a yẽesd-b-la wala ne kʋdga (bɩ gomm).’ Rẽ yĩnga, yaa toog tɩ d yĩm makr a woto zãmsgã?
19, 20. a) Yɛ la d tõe n paam makr sẽn yaa sõma? b) Mak-bʋs sẽn yaa sõma n be tõnd sɛbã pʋsẽ? (Ges-y zĩ-gũbrã me.)
19 Yɛ la y tõe n yã makr sẽn zemse, tɩ yɛl neb sẽn sɩd vɩɩmd be b sʋkã? Bao-y makrã y mengã vɩɩm pʋgẽ, la y tẽed-n-taasã vɩɩm pʋgẽ. D tõe n yãka makrã zĩis wʋsg a taab pʋsẽ. Tõe n yɩɩ bõn-yood bɩ bõn-vɩɩlɩ wã sʋka, roog teedo, bɩ bũmb sẽn maan sakã pʋgẽ tɩ nebã miẽ. Bũmb sẽn tõe n kɩt tɩ d yã makr sẽn yaa sõma yaa d sẽn na n gũus ‘n ges’ vɩɩmã daar fãa yɛlã ‘neere.’ (Tʋʋma 17:22, 23, Sebr Sõngo) Sebr a yembr sẽn gomd sõsg kũun yell wilgdame: “Sõsd ning sẽn get ãdem-biisã vɩɩm la b tʋʋmã toɛy-toɛyã neere, sẽn gomd ne neb buud toor-toore, n get yɛl la a maand sʋgsg hal t’a wa wʋm b võore, a na n paama makr wʋsg sẽn na n sõng-a sõma, a sã n wa rata.”
20 Sɛb a taab sẽn pid ne makr wʋsg n be. Yaa Gũusg Gasgã, Réveillez-vous ! wã la sɛb a taab a Zeova Kaset rãmbã sẽn yiisi. Y tõe n zãmsa yɛl wʋsgo, y sã n maag y yĩng n ges seb-kãensã sẽn tũnugd ne makrã to-to wã. * Wala makre, d ges b sẽn tũnug ne makr ning Bãngr sebrã sak 17 sull 11 pʋgẽ wã. A makda nebã zʋg sẽn yaa toɛy-toɛy tigingã pʋgẽ wã ne mobila toɛy-toɛy sẽn kẽnd sorã zug ne yãmbã. Bõe n kɩt tɩ mak-kãngã tar pãnga? Ges-y t’a yẽbga daar fãa yɛlã zutu, a zemsa wʋsg ne tagsg ning b sẽn dat n zãms nebã, tɩ zãmsg ning a sẽn tarã yaa vẽenega. D tõe n tũnuga ne makr sẽn zoe n be sebrẽ d zãmsgã pʋgẽ, tõe tɩ d na n maaname t’a zems ne Biibl karen-biigã ratem wall d maan tɩ b zems ne sõsga.
21. Keo-bʋg la d paamda, d sã n yaa Wẽnnaam Gomdã karen-saamb sẽn zãmsd neb sõma?
21 D sã n zãmsd nebã sõma, keoor ning d sẽn paamdã yaa kãsenga. D sã n zãmsd nebã, d pʋɩta bũmb ne-ba, d rɩkda d tõodã n sõng-ba. Kũun a woto kõta sũ-noogo, bala Biiblã yetame: “Sẽn kõt-a sũ-noog yɩɩda sẽn deegd-a.” (Tʋʋma 20:35, Sebr Sõngo) D sẽn yaa Wẽnnaam Gomdã karen-saam dãmbã, d sũ-noogã yaa d sẽn mi tɩ d kõta nebã bũmb sẽn sɩd tar yõod la sẽn sɩd kaoosde, sẽn yaa sɩdã a Zeova wɛɛngẽ wã. D leb n tõe n paama sũ-noogo, d sẽn mi tɩ d rɩkda Karen-saam Kãseng a Zezi Kirist togs-n-taarã.
[Tẽngr not rãmbã]
^ sull 6 A Zeova Kaset rãmbã n yiis seb-kãngã.
^ sull 9 Ges-y babg ning sẽn yaa “Sɩngr-goam Koe-moonegã Yĩnga” sẽn be seb-neng a 2-7 pʋgẽ. A Zeova Kaset rãmbã n yiis seb-kãngã.
^ sull 20 Sẽn na yɩl n yã makre, ges-y Index des publications de la Société Watch Tower 1986-2000, zĩig ning sẽn gomd “Illustrations” yellã, a Zeova Kaset rãmbã sẽn yiisã.
Y tẽrame bɩ?
• Wãn to la d tõe n kõ zãmsg võor wʋmb sẽn yaa nana, d sã n wa zãmsd Biiblã ne neda? D sã n wa kõt sõsg tigingã pʋgẽ?
• Wãn to la d tõe n tũnug ne sʋgsgã sõma, d sã n wa moond zak zaka?
• Wãn to la d tõe n tũnug ne tagsg sẽn yaa tɩrg n wilg a Zeova zʋg-sõma wã la a manesmã vẽenega?
• Yɛ la d tõe n yã makr sẽn zemse?
[Zãmsgã sogsgã]
[Zĩ-gũbri/Foto, seb-neng 23]
Yãmb tẽra mak-kãensã bɩ?
Ad makr a wãn bal sẽn tar pãnga. Bõe yĩng tɩ y pa na n ges makr sẽn yit sɛb nins pʋsẽ wã n bãng b sẽn tũnug ne-b to-to n kɩt tɩ b wʋm zãmsg ning y sẽn wɛgsdã võore?
• Wa pag sẽn tʋk zɩɩb t’a sɩd rɩk-a ne montɛɛr tɩ b pasgd tẽngã bɩ wala kamb a yiib sẽn dɩk taab ne kut weefã, neb nins sẽn baood n na n yẽbg kãadem sẽn kõt sũ-noogã segda tɩlae n bao kẽed-n-taag sẽn zems ne-ba.—Gũusg Gasgã, yʋʋmd 2001, sigr kiuug pipi daare, seb-neng 12.
• Yãmb sã n wa wilgd y sũurã tagsgo, yaa wa y sẽn lobd ned balle. Y tõe n lob-a-la ne nonglem wall y lob-a ne pãng t’a pogl a soabã.—Réveillez-vous ! yʋʋmd 2001, yʋʋm-vẽkr rasem a 8, seb-neng 10.
• Zãms n wilg nonglem yaa wa buud-gom-paalg zãmsgo.—Gũusg Gasgã, yʋʋmd 1999, tʋʋlg kiuug pipi daare, seb-neng a 8, 12-3.
• B tõe n dɩka yel-wẽnã tõnd sẽn dog ne wã n mak ne virus sẽn sãamd ordinatɛɛr program.—Y a-t-il un Créateur qui se soucie de vous? seb-neng 156.
• Tɩɩm dɩɩb la a maaneg yõod ne zĩn dãmbã yaa wala tãoog rɩɩb yõod ne tãoosa. Rũmsa sã n yã-a b watame.—Bãngr Sẽn Tar n Debd Vɩɩm Sẽn-Kõn-Saẽ Wã, seb-neng 111.
• B tõe n maka a Zezi sẽn fãag a Ãdem kambã la a yagensã to-to wã ne arzɛk soab sẽn yaood ãnterpiriiz samde (dɩrɛktɛɛr sẽn yaa zãmb soab sẽn lubi) la sẽn lebg n pak luzinã, tɩ naf tʋm-tʋmdbã.—Gũusg Gasgã, yʋʋmd 1991, sigr kiuug pipi daare, seb-neng 26.
• Wala ned sẽn nong yimaas neeb sẽn na n maan a sẽn tõe fãa n maneg yimaas sẽn sãama, a Zeova tõe n gesame tɩ zʋʋg tõnd pa-zems zãngã, n yã tõnd zʋg-neebã, n wa baas n lebg n kõ tõnd zems-zãng ning a Ãdem sẽn da menemsã.—Gũusg Gasgã, yʋʋmd 1990, wao-fugdg kiuug rasem 15 (ne farende), seb-neng 22.
[Foto rãmba, seb-neng 28]
Kiris-neb hakɩkã yaa Wẽnnaam Gomdã karen-saam dãmba
[Foto, seb-neng 29]
Kãsem dãmbã tõe n tũnuga ne sʋgsg tɩ b saam-biisã paam belsg Wẽnd Gomdẽ wã