A Zeova ningda sakdbã bark la a kogend-ba
A Zeova ningda sakdbã bark la a kogend-ba
“La sẽn kelgda maama na n zĩnda ne laafɩ. Yẽ na n zĩnda bãan tɩ rabeem kaẽ ye.”—YELBŨNA 1:33.
1, 2. Bõe yĩng tɩ Wẽnnaam sakr tar yõodo? Rɩk-y makre.
NO-BI n da geood rɩɩb n pa miẽ tɩ sɩlg n be yĩngr n laandẽ ye. Zĩig pʋgẽ no-yãangã kõgsame n bool a no-bi wã la a yadg a pɩgsã, tɩ b zoe tao-tao n wa, t’a solg-b a pɩgsã tẽngre, tɩ sɩlgã wẽ n konge. * Yaa bõe zãmsg la d paamd ne yel-kãngã? Tɩ sakr fãagda yõore!
2 Sẽn yɩɩd fãa, zãms-kãng tara yõod ne kiris-nebã rũndã-rũndã, bala a Sʋɩtãan maanda a sẽn tõe fãa n na n bẽd Wẽnnaam nin-buiidã wʋsg wa a sẽn tõe tɛk n paam n sãam-ba. (Wilgri 12:9, 12, 17) A raabã ya a sãam tõnd tẽebã tɩ d kong a Zeova lohormã la vɩɩm sẽn pa satã. (1 Pɩɛɛr 5:8) Baasg zãnga, d sã n kell n pa n pẽneg Wẽnnaam la d sakd sor-wilgr ning a sẽn tũnugd ne a Gomdã la a siglgã n kõtẽ wã tao-tao, d tõe n kɩsa sɩd t’a na n kogl-d lame. “Bãmb põgendeda foom ne b pɩgsa la fo na n paama zĩ-lilldg bãmb pɩgsa tẽngre.” Woto la yɩɩl gʋlsdã gʋls-yã.—Yɩɩl Sõamyã 91:4.
Bu-kɩɩsd n lebg wa rɩɩb a bɛɛb nugẽ
3. Israɛll sẽn kɩɩs Wẽnnaam naoor wʋsgã waa ne bõe?
3 Israɛll buudã neb sẽn da wa n sakd a Zeova wã, wakat fãa a ra gũusd-b lame tɩ yell da paam-b ye. La kaeto, naoor wʋsgo, nin-buiidã basa b Naandã n bao raad la kug wẽnnaam dãmb sõngre. Ra yaa “bõn-zaals sẽn ka nafda la sẽn ka fãagd ned ye.” (1 Sãmwɛll 12:21) Yʋʋm kobs sẽn pʋgl tõdgr a woto wã poore, sɩdã kɩɩsg ra paama pãng buudã pʋgẽ hal tɩ yellã ra pa leb n tar tɩɩm ye. Yaa rẽ yĩng la a Zezi sẽn yeel woto ne sũ-sãangã: “Zerizalɛm, Zerizalɛm, sẽn kʋʋd Wẽnnaam no-rɛɛsdba n lobd neb nins b sẽn tʋm fo nengẽ wã kuga! Naoor wʋsgo mam da rat n tigma fo kamba wa no-yãang sẽn põgend a kamba a pɩgsẽ, la fo ka sak ye. Gese, b na n basa fo roog ne foo zaalem.”—Matɩe 23:37, 38.
4. Wãn to la a Zeova sẽn bas Zerizalɛmã lebg vẽeneg yʋʋmd 70 wã?
4 A Zeova sẽn bas Israɛll sẽn yaa bu-kɩɩsã yɩɩ vẽeneg yʋʋmd 70 wã. Yʋʋm kãnga, Rom tãb-biisã sẽn da zẽk b tãb-kaoorã sẽn da tar sɩlgã makrã, wa n piga Zerizalɛm wa sɩlga, n kʋ a nebã wʋsgo. Rẽ wẽnd tɩ galʋ-tẽngã ra pida ne neb wʋsg sẽn wa n na n maan Pakã kibsa. B maandã pa kɩt tɩ b paam Wẽnnaam lohorem ye. Woto tẽegda tõnd a Sãmwɛll goam nins a sẽn taas rĩm kɩɩsd a Saull woto wã: “Maand ka noogd Zusoaba sũur wa sakr sẽn noogd bãmb sũura ye. Gese, sakr yɩɩda maando la kelgre yɩɩda pe-raad kaam.”—1 Sãmwɛll 15:22.
5. Yaa sakr bʋg buud la a Zeova baooda, la wãn to la d mi tɩ sakr a woto buud tõeeme?
5 Baa ne a Zeova sẽn pẽdgd ninsaalbã tɩ b sak-a wã, a mii sõma tɩ ninsaalbã sẽn pa zems zãngã b tara kogse. (Yɩɩl Sõamyã 130:3, 4) A sẽn baood yaa d sẽn na n tar pʋ-peelem la d sakd-a, d sẽn tar tẽebo, nonglem la d sẽn zoet d na n wa sãam a sũurã yĩnga. (Tõodo 10:12, 13; Yelbũna 16:6; Ezai 43:10; Miise 6:8; Rom dãmba 6:17) Bũmb ning sẽn wilgd tɩ sakr a woto tõeeme wã yaa “kaset dãmb wʋsg” sẽn zĩnd sẽn deng kiris-nebã, sẽn kell n tall b burkĩndã, mak-kãsems la kũum meng taoorã. (Hebre dãmba 11:36, 37; 12:1) Ad nin-kãensã sɩd noog a Zeova sũuri! (Yelbũna 27:11) La kẽer sẽn sɩng n yaa wẽn-sakdb pa kell n pa b sakrã pʋgẽ ye. Yɩɩ woto ne pĩnd wẽndẽ Zida rĩm a Zoas.
Rĩm tũud-n-ta-wẽns sẽn sãame
6, 7. A Zoas ra yaa rĩm bʋg buud a Zehozada sẽn da ket n vɩyã sasa?
6 Kellẽ-la bilf bal tɩ b kʋẽ dĩm a Zoas a sẽn da wa n yaa biiga. A Zoas sẽn da wa n ta yʋʋm a yopoe, ne raoodo maan-kʋʋd kãsem a Zehozada yiis-a-la b sẽn da solg-a zĩig ningã, n wa kɩt t’a yɩ rĩma. Wẽn-zoɛt a Zehozada sẽn tall ba manesem la a yɩ a Zoas sagendã yĩnga, na-pollã “maana sẽn ta Zusoaba yam maan-kʋʋd a Zehozada yõor tɛka.”—2 Kɩbaya 22:10–23:1, 11; 24:1, 2.
7 A Zeova roogã manegr da bee a Zoas tʋʋm sõma wã sʋka. N-ye, “a Zoas wa n yãka yam n dat n maneg Zusoaba roogã.” A tẽega maan-kʋʋd kãsem a Zehozada tɩ b segd n kẽnga Zida la Zerizalɛm n tɩ rees wẽn-doogã yaoodo, wa ‘a Moiiz sẽn yeelã,’ sẽn na yɩl tɩ b yao wẽn-doogã manegre. A Zehozada tõog n sagla rĩmã sẽn nan yaa bi-bɩɩgã t’a zãms la a sak Wẽnnaam Tõogã. Rẽ kɩtame tɩ tʋʋmdã b sẽn da maand wẽn-doogã la wẽn-doogã teed zutã sa tao-tao.—2 Kɩbaya 24:4, 6, 13, 14; Tõodo 17:18.
8. a) Sẽn yɩɩd fãa, yaa bõe n wa ne a Zoas lʋɩɩs tẽebã wɛɛngẽ? b) Yaa bõe la rĩmã kɩɩsg baas n kɩt t’a maane?
8 Zu-bʋko, a Zoas sakrã ne a Zeova wã pa kaoos ye. Bõe yĩnga? Wẽnnaam Gomdã yeta tõndo: ‘A Zehozada kũuma zugẽ, Zida nanambsa kẽngame n tɩ wõgemd rĩma taoore. La rĩma kelga bãmba. La b basa b yaab rãmba Zusoab a Wẽnnaam doogã n waoog a Astarte ne bõn-naandse. La Zusoaba sũur yika ne Zida la Zerizalɛm neba bõn-kãng poorẽ.’ Zida na-biisã pãn-tusd-wẽngã me kɩtame tɩ rĩmã pa kelg Wẽnnaam no-rɛɛsdbã ye. No-rɛɛsdb kãens ned a ye da ya a Zehozada biribl a Zakari sẽn keoog a Zoas ne nin-buiidã ne raood b kɩɩsgã yĩngã. Wall t’a tek yam n kos sugrã, a Zoas kɩtame tɩ b lob a Zakari kug n kʋ. Ad a Zoas sɩd lebga ned sẽn pa tar nimbãan-zoeer la kɩɩsd menga. Rẽ fãa ya a sẽn sak n kelg tũud-n-ta-wẽnsã yĩnga!—2 Kɩbaya 24:17-22; 1 Korẽnt dãmba 15:33.
9. Wãn to la yɛl nins sẽn wa n paam a Zoas la na-biisã wilgd tɩ tõdgr yaa yalemdo?
9 A Zoas ne nin-wẽns sẽn yaa na-biis nins sẽn lagem yẽ wã sẽn bas a Zeova wã, wa n baasa wãna? Siiri tãb-biis sõor sẽn ‘ka waoog’ n pig Zida n ‘kʋ neba nanambsa fãa.’ Pigdbã leb n modga rĩmã t’a kõ a paoongã, n paas zĩ-sõngã sãnem la a wanzũri. Baa ne a Zoas sẽn põsã, a pãngã boogame t’a lebg bãad me. Rẽ poor bilfu, a meng sõgen dãmbã sʋka, neb n sũ taab n maan zãmb n kʋ-a. (2 Kɩbaya 24:23-25; 2 Rĩm dãmba 12:18, 19) Ad gom-kãensã a Zeova sẽn taas Israɛllã sɩd yaa sɩda: “Yãmb sã n ka kelg Zusoab a Wẽnnaam koɛɛgã n gũus y mens n sak tõoda ne minund[ã] . . . , yaa to-kãensa la y na n paam.”—Tõodo 28:15.
Seb-gʋlsd sakr sẽn fãag-a
10, 11. a) Bõe yĩng tɩ yaa sõngr ne-d tɩ d tags saglg ning a Zeova sẽn taas a Barukã zugu? b) Yaa sagl-bʋg la a Zeova kõ a Baruki?
10 Wakat ninga y komsda raoodo, neb nins y sẽn segd koe-moonegã pʋgẽ wã sõor bilf bal sẽn wilgd ratem ne koe-noogã yĩng bɩ? Wakat-wakate, y maanda sũ-kiir bilf ne arzɛk rãmb nins sẽn tar yõ-noogr vɩɩmã bɩ? Sã n yaa woto, bɩ y tags a Zeremi seb-gʋlsd a Baruk la a Zeova sẽn sagl-a ne nonglmã yelle.
11 A Baruk ra gʋlsda koɛɛg sẽn yaa bãngr-gomde, a Zeova sẽn wa n sagl-a wã sasa. Bõe yĩnga? A Baruk sɩngame n yẽgemd yẽ vɩɩmã sẽn ya a soabã zugu, la a ra tʋll bũmb sẽn são yẽ sẽn da tar zu-no-kaseng ning Wẽnnaam tʋʋmdã pʋgẽ wã. A sẽn yã toeeng kãngã a Baruk tagsgã pʋgẽ wã, a Zeova kõ-a-la saglg sẽn yaa vẽeneg ne nonglem n yeele: “Fo baooda bõn-kãsems f meng yĩng la? Base, ra bao bũmb a woto ye. Tɩ bõe, gese, mam na n kɩtame tɩ toog paam ninsaalba fãa. . . . La mam na n gũu fo vɩɩm fo sẽn na n kẽng zĩig ninga fãa tɩ f põse.”—Zeremi 36:4; 45:5.
12. Bõe yĩng tɩ d segd n lak d mens ne “bõn-kãsems” baoob dũni kãngã pʋgẽ?
12 A Baruk da maana neere, n naag a Zeremi n maan a Zeova raabã ne kɩs-sɩd la raoodo. Woto wã yĩnga, y pa ne tɩ goam nins a Zeova sẽn taas a Barukã wilgdame t’a Baruk yell pak-a-la wʋsg sɩda? Woto me rũndã-rũndã, neb nins dũni kãngã bõn-yood baoob tʋlsem sẽn makdã yell paka a Zeova hal wʋsgo. Zu-noogo, wala a Baruki, nin-kãensã wʋsg saka remsg ne nonglem ning saam-biis sẽn bɩ tẽebã wɛɛngẽ wã sẽn kõ-bã. (Luk 15:4-7) N-ye, bɩ tõnd fãa bãng tɩ saagr kae neb nins sẽn baood “bõn-kãsems” dũni kãngã pʋgẽ wã yĩng ye. Pa sũ-noog hakɩkã bal la nin-kãensã kongd ye, la sẽn yaa wẽng n yɩɩda, ka la bilfu, b na n looga ne dũni kãngã ne a rat-m-yembr tʋlsmã.—Matɩe 6:19, 20; 1 Zã 2:15-17.
13. Zãms-bʋg sik-m-mengã wɛɛngẽ la a Baruk kɩbarã kõt tõndo?
13 A Baruk kɩbarã leb n zãmsda tõnd sõma tɩ d yɩ sik-m-mens rãmba. Bãng-y tɩ pa a Zeova mengã n sagl a Baruk ye, la a tũnuga a Zeremi n gom, la a Baruk ra segd n mii a Zeremi pãn-komsmã la a zʋgd toɛy-toɛyã. (Zeremi 45:1, 2) Ne rẽ fãa a Baruk pa tall wuk-m-meng ye. Ne sik-m-menga, a bãngame tɩ saglgã yita a Zeova nengẽ. (2 Kɩbaya 26:3, 4, 16; Yelbũna 18:12; 19:20) Woto, tõnd ‘sã n tudg n pa bãnge,’ n paam sagls nins sẽn segdã sẽn yit Wẽnnaam Gomdẽ wã, bɩ d rɩk togs-n-taar ne a Baruk tags-tɩ-bɩ wã, a tẽebã wɛɛngẽ bãng-n-welgã ne a sik-m-mengã.—Galat dãmba 6:1, NW.
14. Bõe yĩng tɩ be nafr ne-d tɩ d sak neb nins sẽn lʋɩt tõnd taoorã?
14 Tõnd sã n tall sik-m-meng woto, na n sõnga neb nins me sẽn kõt saglgã. Hebre dãmba 13:17 yetame: “Bɩ y sak yãmb taoor dãmba la y reeg bãmb goama, tɩ bõe, bãmb gũuda yãmb sɩɩse, bãmb sẽn na n wilg yɛla fãa Wẽnnaam taoora yĩnga. Bɩ a yɩ woto tɩ b maan ne sũ-noogo la ka ne sũ-sãoong sẽn ka na n yɩ yãmb nafr ye.” Naoor wʋsgo, kãsem dãmbã pʋʋsda a Zeova ne b sũy fãa, n na n paam daoodo, yam la gũusg ning sẽn yaa tɩlaeyã, sẽn na yɩl n maan b pe-kɩʋʋngã tʋʋmdã nen-kãngã sẽn yaa toogã. Bɩ d “waoog neb sẽn yaa woto.”—1 Korẽnt dãmba 16:18.
15. a) Wãn to la a Zeremi wilg a kɩs-sɩd ne a Baruki? b) Wãn to la a Baruk paam keoobo, a sẽn sik a meng n sakã yĩnga?
15 Yaa vẽeneg t’a Baruk remsa a tagsgã, bala rẽ poore, a Zeremi kõ-a-la tʋʋmd sẽn yaa toog wʋsgo. A ra segd n kẽnga wẽn-doogẽ wã n zẽk a koɛɛg n karem bʋ-kaoor koɛɛgã a Zeremi sẽn togs yẽ mengã t’a gʋlsã. A Baruk sakame bɩ? N-ye, a saka “no-rɛɛs a Zeremi sẽn yeelã” fãa. Sɩda, a karma koe-kãng Zerizalɛm na-biisã taoore, la rẽ ra baoodame t’a sɩd tall raoodo. (Zeremi 36:1-6, 8, 14, 15) Galʋ-tẽngã sẽn da wa n lʋɩ Babilon nebã nusẽ yʋʋm 18 loogr poorã, mams-y n ges mi-beoog ning a Baruk sẽn da segd n tallã, b sẽn fãag-a, a sẽn da sak a Zeova keoogrã n bas “bõn-kãsems” baoobã yĩnga!—Zeremi 39:1, 2, 11, 12; 43:6.
B sẽn gũbg tẽngã sasa, sakrã fãaga yõyã
16. Wãn to la a Zeova zoe Zerizalɛm Zʋɩf rãmbã nimbãanega, Babilon nebã sẽn wa n pig-b yʋʋmd 607 sẽn deng Kirist zãmaanã?
16 Zerizalɛm sãoongã sẽn wa n ta yʋʋmd 607 sẽn deng Kirist zãmaana, Wẽnnaam nimbãan-zoeerã ne sakdbã yɩɩ vẽenega. Gũbrã zug tẽn-sʋka, a Zeova yeela Zʋɩf rãmbã tɩ: “Gese, mam ninga vɩɩm sor ne kũum sor yãmb taoore. Ned sã n pa tẽn-kãngã pʋgẽ, sʋʋg bɩ kom walla bã-loangdg n na n kʋ-a. La a sã n yi tẽnga pʋgẽ n sak Kalde neb nins sẽn gũbg tẽngã, b ka na n kʋ-a ye, a na n paama vɩɩm.” (Zeremi 21:8, 9) Baa ne Zerizalɛm nebã sẽn da zems ne sãoongã, a Zeova wilga a nimbãan-zoeer ne neb nins sẽn sak-a wã, baa sẽn da yaa toogã zug tẽn-sʋk sasa wã. *
17. a) Ne manesem a yiib bʋs la a Zeremi sakrã paam makre, a Zeova sẽn wa n kõ-a noor t’a yeel Zʋɩf rãmbã b sẽn da gũbg n zabd ne wã tɩ b ‘kẽ Kalde nebã’? b) Wãn to la a Zeremi sẽn kõ mak-sõng n sak ne raoodã tõe n naf tõndo?
17 Sãmbg sẽn ka be, ra tõe n yɩɩ toog ne a Zeremi t’a sak Wẽnnaam n yeel Zʋɩf rãmbã tɩ b tɩ kõ b mens b bɛɛbã. Bũmb a yembr sẽn kɩt tɩ yaa woto wã yaa t’a ra maanda sũ-kiir Wẽnnaam yʋʋrã yĩnga. A ra pa rat tɩ bɛɛbã paoog Wẽnnaam yʋʋrã, b sẽn na n wa tags tɩ b tõogrã yaa b wẽn-naands sẽn pa vʋyã yĩng ye. (Zeremi 50:2, 11; Wiisgu 2:16) Sẽn paase, a Zeremi ra miimi t’a sã n da togs nebã tɩ b kõ b mens b bɛɛbã, b sɩd ra tõe n kʋ-a lame, bala wʋsg ra na n tagsame t’a goamã tusda nin-buiidã n kẽesd tẽn-dãmbg pʋgẽ. Ne rẽ fãa a pa zoe rabeem ye, la a sakame n moon a Zeova goamã. (Zeremi 38:4, 17, 18) Wala a Zeremi, tõnd me tara koɛɛg nebã sẽn pa nonge. Yaa koe-kãng yĩng me la b kisg a Zezi. (Ezai 53:3; Matɩe 24:9) Woto yĩngã, bɩ d ra ‘zoe ninsaalb’ ye, la wala a Zeremi, bɩ d sak a Zeova ne raoodo, n teeg-a zãng-zãnga.—Yelbũna 29:25.
D yɩ sakdb a Goog zabrã taoore
18. Sakr mak-bʋs la a Zeova sõgen dãmbã na n sege?
18 Ka la bilfu, a Sʋɩtãan dũniyã zãng na n paama sãoong “toog kãseng” a to buud sẽn zɩ n zĩnd pʋgẽ. (Matɩe 24:21) Sãmbg sẽn ka be, sẽn deng wakat kãng la a sasa, Wẽnnaam nin-buiidã tẽeb la b sakr na n paama makr sẽn yaa kãsenga. Wala makre, Biiblã yeta tõnd t’a Sʋɩtãan sẽn yaa ‘Magoog Googã’ na n maana zab-kãseng ne a Zeova sõgen dãmbã, n tigim tãb-biis b sẽn bilg wa “kʋʋng-kʋʋngo tɩ neb ka tõe n sõd-b n sɛ ye.” (Ezekɩɛll 38:2, 14-16) Wẽnnaam nin-buiidã sẽn pa tar zab-teed tɩ b bɛɛbã sõor yɩɩd-b wʋsgã yĩnga, b na n baoo solgr zĩig a Zeova sẽn kogend sakdbã a ‘pɩgs’ tẽngrã nengẽ.
19, 20. a) Bõe yĩng tɩ Israɛll nebã sakr da tar yõod wʋsgo, b sẽn da wa n be Mog-Miuugẽ wã? b) Wãn to la d sẽn na n tags Mog-Miuugã kɩbar zug neer pʋʋsg pʋgẽ nafd tõnd rũndã-rũndã?
19 Yel-kãngã tẽegda tõnd Israɛll sẽn da wa n yit Eziptã. A sẽn wẽ Ezipt ne tood piig poore, a Zeova wilga a nin-buiidã sore. La a yaool n pa kɩt tɩ b tũ sor ning sẽn yaa koɛɛg n yɩɩd sẽn tar n debd Kãabg Tẽngẽ wã ye, la yaa sor sẽn da tar n debd Mog-Miuugẽ wã, zĩig ning b sẽn da tõe nana-nana n bẽd-b ne mogrã, tɩ b pa mi b sẽn na n kẽẽ wã, n zab ne-ba. Sã n da yaa ne sodaas zabr manesem wɛɛngẽ, woto ra wõnda kẽnd sẽn na n baas ne yel-beedo. Yãmb sã n da be beenẽ, rẽ yĩnga, y ra na n saka a Zeova noorã a sẽn tũnug ne a Moiiz n kõ wã, n tees Mog-Miuugã sẽnẽ ne bas-yard zãng-zãnga, n miẽ tɩ Kãabg Tẽngã ra bee bab-zẽng bɩ?—Yikri 14:1-4.
20 Wa tõnd sẽn karemd Yikr sak 14 pʋgẽ wã, d nee a Zeova sẽn tũnug ne pãn-kãseng sẽn yɛɛsd n fãag a nin-buiidã to-to. Ad kɩba-kãensã sɩd tõe n kenga tõnd tẽebã wʋsgo, d sã n dɩk sẽk n na n zãms la d tags b zutu! (2 Pɩɛɛr 2:9) Tẽeb sẽn tar pãng me kõta tõnd pãng tɩ d sak a Zeova, ba a sẽn baood tɩ tõnd maan bũmb ningã sã n yaa lebend ne ninsaalbã tagsgo. (Yelbũna 3:5, 6) Woto yĩng bɩ y sʋk y menga: ‘M maoodame n na n paas m tẽebã pãngã, n tũnugd ne Biibl zãmsg sõma, pʋʋsg la bʋgsgo, n paas tũud-n-taar maaneg ne Wẽnnaam nin-buiidã bɩ?’—Hebre dãmba 10:24, 25; 12:1-3.
Sakr kõta saagre
21. Bark bʋs sẽn be masã la beoog-daar la neb nins sẽn sakd a Zeova wã na n paame?
21 Neb nins sẽn sakd a Zeova b vɩɩmã fãa pʋgẽ wã zoe n nee Yelbũna 1:33 pidsg masã mengã b zutu. Be b yetame: “La sẽn kelgda maama na n zĩnda ne laafɩ. Yẽ na n zĩnda bãan tɩ rabeem kaẽ ye.” Ad gom-kãensã sẽn kõt belsgã sɩd na n pidsa ne manesem kãsenga, a Zeova sũ-dokrã daar sẽn watã sasa! Sɩda, a Zezi togsa a karen-biisã woto: “Bõn-kãens sã n sɩng n zĩndi, bɩ y rooge n nak n ges yĩngri; tɩ bõe, yãmb fãagra kolgame.” (Luk 21:28) Vẽenega, yaa neb nins bal sẽn sakd Wẽnnaamã n na n tũ gom-kãensã ne bas-yardo.—Matɩe 7:21.
22. a) Bõe zug la a Zeova nin-buiidã tik n tar bas-yardo? b) Yel-bʋs yell la b na n sõs sõsg ning sẽn pʋgdã pʋgẽ?
22 Bũmb a to sẽn kɩt tɩ d segd n tall bas-yardã yaa tɩ “Zusoaba ka maand bũmb n ka wilg b no-rɛɛsdba sẽn yaa b tʋm-tʋmdba ye.” (Amos 3:7) Rũndã-rũndã, a Zeova pa vẽnegd no-rɛɛsdb tɩ b gom la b gʋls wa pĩndã ye. La a kõo tʋm-tʋmd sẽn tũud sɩdã tʋʋmd t’a kõ a zakã neb tẽebã rɩɩb wakat sẽn zems sasa. (Matɩe 24:45-47) Woto yĩnga, ad sɩd tar yõod wʋsg tɩ d sak “tʋm-tʋmd” kãngã! Wala sõsg ning sẽn pʋgdã sẽn na n wilgã, sakr a woto leb n pukda tõnd tagsg ne a Zezi sẽn yaa ‘tʋm-tʋmdã’ zu-soabã sẽn ya a soaba. A ya a Soab ning ‘nebã sẽn na n sakã.’—Sɩngre 49:10.
[Tẽngr not rãmbã]
^ sull 1 Baa ne b sẽn nong n bilgd-a wa rabɛɛma, siglg sẽn get rũmsã koglg yell yeela b sebr a ye pʋgẽ tɩ “no-yãang sakd n gẽnega a yõor n mao n kogl a koamba.”
^ sull 16 Zeremi 38:19 wilgdame tɩ Zʋɩf rãmb n ‘kẽ’ Kalde rãmbã, n põs kũum, la b tall-b lame n kẽng yembdo. D pa mi b sã n maana woto sẽn na yɩl n sak a Zeremi goamã ye. Sẽn yal fãa, b põsbã wilgdame tɩ no-rɛɛsã goam da yaa sɩda.
Y tẽrame bɩ?
• Israɛll sẽn kɩɩs naoor wʋsgã waa ne bõe?
• Wãn to la rĩm a Zoas tũud-n-taasã tall pãn-tusdg a zugu, a vɩɩmã sɩngrẽ la a baasgẽ?
• Bõe la a Baruk kɩbarã zãmsd tõndo?
• Bõe yĩng t’a Zeova nin-buiidã sẽn yaa sakdbã pa segd n zoe rabeem dũni kãngã saab sẽn kolgdã yĩnga?
[Zãmsgã sogsgã]
[Foto, seb-neng 23]
A Zehozada sor-wilgrã sasa, bi-bɩɩg a Zoas ra sakda a Zeova
[Foto, seb-neng 25]
Tũud-n-ta-wẽnsã tusa a Zoas t’a kɩt tɩ b kʋ Wẽnnaam no-rɛɛsã
[Foto, seb-neng 26]
Y ra na n saka a Zeova n maan kaset ne a pãn-yɛɛsdgã sẽn fãagdã bɩ?