Belsgo, Wẽnnaam bãngr hakɩkã sẽn kõtã

SÃ N yaa ne neb kẽere, Biiblã sẽn yet bũmb ning Wẽnnaam nonglmã la a nimbãan-zoeerã wɛɛngẽ wã wata ne sʋgsg sẽn namsd bãmba. Bãmb sʋkda woto: Wẽnnaam sã n datame tɩ wẽngã fãa menem tẽngã zugu, n mi a sẽn na n maan to-to la a leb n tar tõog n tõe n maan dẽ, bõe yĩng masã la wẽngã sẽn ket n piuugd woto wã? Ne bãmb rãmba, yaa toog tɩ b tõog n tõgen yel-kãensã a tãabã tɩ b tall võore. 1) Wẽnnaam yaa Pãng-sẽn-ka-to soaba, 2) Wẽnnaam leb n yaa nonglem la sõmblem, 3) tɩ yel-beedã me yaool n ket n tar waoong bala. B tagsdame tɩ tãab-n-soabã sẽn yaa sɩd tɩ sãmbg kae n wã yĩnga, pipi la a yiib-n-soabã sẽn keta sʋka a ye n tog n yaa ziri, tɩ sã n pa a yiibã fãa. Sã n yaa ne bãmba, Wẽnnaam pa tõeeme n kɩt tɩ wẽngã sa, pa rẽ yaa a toog n kae ne wẽnga sẽn be wã.

Dũniyã afɛɛr dãmb nif zĩig (World Trade Center) sẽn be Niu Yorkã sãoonga rasem a wãn loogr poor bala, Etazĩni tũudum taoor soab a ye yʋʋr sẽn yi wʋsg yeelame: “Mam vɩɩmã pʋgẽ, m talla m meng sʋgsg naoor kobs n dat n bãng bũmb ning sẽn kɩt tɩ Wẽnnaam bas tɩ yel-beedã la namsgã beẽ wã. Mam sak n deegame tɩ mam mengã sɩd pa mi sʋk-kãngã leoor fasɩ ye.”

Gom kãensã kɩtame tɩ tũudmã yɛl karen-saamb a ye gʋls n yetẽ tɩ “tẽebã wɛɛngẽ tags-sõng” ning tũudum taoor soab kãngã sẽn togsã sɩd kɩtame tɩ yẽ yaeese. A leb n talla tagsg a yembr ne bãngd a ye me sẽn gʋls woto: “D sẽn pa tõe n wʋm namsgã sẽn be wã võorã yaa d sẽn pa mi Wẽnnaam tagsg sẽn yaa to-to ne rẽ wã.” La rẽ yĩnga sɩd yaa sɩd tɩ d pa tõe n bãng bũmb ning sẽn kɩt tɩ Wẽnnaam bas tɩ wẽngã beẽ wã bɩ?

Wẽngã sẽn yitẽ

Sẽn yaa lebend ne tũudmã taoor dãmb sẽn yetã, Biiblã pa bilgd Wẽnnaam sẽn sak tɩ wẽngã beẽ wã wa bũmb d sẽn pa tõe n wʋm a võor ye. Bũmb a ye sẽn tõe n sõng tɩ d bãng yel-beedã belem võor yaa d sẽn na n sak n deeg t’a Zeova ra pa naan dũniyã t’a yaa wẽng ye. A naana pipi raoa ne a paga tɩ b zems kɛpɩ n pa tar zams la yel-wẽn ye. A Zeova sẽn ges a sẽn naan bũmb ninsã, fãa ra yaa “sõamã wʋsgo.” (Sɩngre 1:26, 31) A raabã ra yaa t’a Ãdem ne a Hawa yalg Edɛn arzãnã tɩ bui tẽngã fãa, la b rog kamb n pids-a kɛpɩ n zĩnd a zug ne sũ-noogo, yẽnda naam sẽn ka to wã a sẽn dɩt ne nonglmã koglg tẽngre.—Ezai 45:18.

Wẽngã sɩnga ne malɛk a ye sẽn da yɩ kɩd-sɩd soab ne Wẽnnaam sɩngrẽ wã n wa bas rẽ n dat masã tɩ b balem yẽ me wala Wẽnnaamã. (Zak 1:14, 15) A tõdgrã yɩɩ vẽeneg tẽng zug kaanẽ a sẽn wa n tus pipi raoa ne a pagã tɩ b sak n lagem ne yẽ n kɩɩs Wẽnnaamã. Wall tɩ b ra kell n sak Wẽnnaam noorã a sẽn da kõ-b vẽeneg tɩ b ra wa sak n yãk sõmã la wẽng bãngr tɩɩgã biis n dɩ wã, a Ãdem ne a Hawa yãk-a lame n dɩ. (Sɩngre 3:1-6) La b sẽn maan woto wã pa Wẽnnaam bal la b sẽn kɩɩsã ye, b wilgame me tɩ b ratame t’a bas bãmb tɩ b soog b mense.

 Kɩɩsgã waa ne sʋgsg sẽn baood leoore

Tõdgr a woto sẽn zĩnd Edɛn pʋgẽ wã waa ne yel-kãseng sẽn pak ãndũniyã fãa gill la sẽn baood welgre. Ninsaalbã tõdgrã kɩtame tɩ sãmbs zĩnd Wẽnnaam naamã a sẽn dɩt a naanegã fãa kɛpɩ zugã zemsg wɛɛngẽ. Naandã ra tara sor n na n kɩt tɩ ãdem-biisã fãa sak yẽ zãng-zãng bɩ? Nebã vɩɩm tõe n yɩɩ sõmã n yɩɩda, b sã n soog b mens bɩ?

A Zeova tũnuga ne b sẽn kɩɩs a naamã zemsgã n kɩt tɩ b bãng tɩ yẽnda nonglmã, a tɩrlmã, a yamã la a pãnga fãa kɩlsame tɩ zems kɛpɩ. A ra tõe n tũnuga ne a pãngã n kɩt tɩ kɩɩsgã sa zĩig pʋgẽ a sɩngrẽ wã n da zãag ye. A sã n da pʋs n maan woto me yaa tɩrga, bala a tara sor n na n maan rẽ. La woto maaneg ra pa na n yɩ sʋgsgã b sẽn wa ne wã leokr ye. Wẽnnaam da tõeeme me n bas yel-wendã taale. Rũndã-rũndã kẽer tõe n tagsdame t’a sã n da maan woto ra yaa nonglem tʋʋmde. La sɩda woto me ra pa na n leokẽ a Sʋɩɩtãan sẽn yeel tɩ ãdem-biisã sã n da soog b mens n ges b mens yell b toor la sõmã n yɩɩdã ye. Sẽn yɩɩda, woto kõn kɩtẽ tɩ neb a taab me wa kɩɩs a Zeova noor sɩda? Ra na n ket n wata ne namsg wakat fãa bala.

A sẽn yaa yam-kãseng soabã yĩnga, a Zeova basame tɩ ãdem-biisã soog b mens wakat bilf pʋgẽ. Baa woto sẽn kɩt t’a bas tɩ yel-wensã zĩnd wakat bilf yĩngã, ãdem-biisã paama sor n na n wilg b sã n tara tõog n na n soog b mens tɩ zems tɩ Wẽnnaam pa kẽes a toogo, n yiis noy n wilg sẽn segd la sẽn pa segdã tɩ zems kɛpɩ, bɩ b sã n pa tar tõog ne rẽ maaneg ye. Woto baasa wãn-to? Ãdem-biisã kʋdemd yɛl pʋgẽ wakat fãa yɩɩ zaba, yel-kɛga, weoogr la namsgo. B sẽn kɩɩs a Zeova tɩ wa baas wẽngã na n kɩtame tɩ b welg yɛl nins b sẽn wa ne Edɛnã wakat fãa yĩnga.

Nand tɩ wa yɩ woto, Wẽnnaam wilga nonglem n kõ a Biribl a Zezi kirist t’a wa tẽng zug n dɩk a vɩɩmã n maan maoong tɩ yɩ rondo. Woto kɩtame tɩ ãdem-biis nins sẽn yaa sakdbã fãa tõe n paam n põs yel-wẽnã la kũumã a Ãdem kɩɩsgã sẽn wa ne wã. Rondã paka vɩɩm sẽn kõn sa sor n kõ neb nins fãa sẽn tẽed a Zezi wã.—Zã 3:16.

 A Zeova sẽn kõt-d bas-m-yam tɩ ãdem-biisã namsg yaa wakat bilf yĩngã kõt-d-la belsgo. Yɩɩl gʋlsdã gʋlsa woto: “A keta bilf bala tɩ nin-wẽng kõn tol n zĩnd ye. Yãmb na bao tɩ bãng a zĩiga, la a ka be ye. La sũ-maasem dãmba na n sooga dũniyã n maan sũ-noog laafɩ wʋsg yĩnga.”—Yɩɩl Sõamyã 37:10, 11.

Beoog daar sẽn tar bãan la sũ-noogo

Biiblã bãngr-goam pidsg wilgdame tɩ wakat ning Wẽnnaam sẽn yãk n na n kɩt tɩ bãasã, sũ-sãamsã la kũumã sa wã kolgame. Ges-y bõn-sõmã nins sẽn na n wa wã b sẽn kɩt tɩ tʋm-tʋmd a Zã lemb bilf a yãabã pʋgẽ wã. A gʋlsame: “Mam yãa yĩngr paalga la dũni paalga; tɩ bõe, dẽenem yĩngri la tẽnga loogame, la ko-kãsenga ka leb n be ye . . . La Wẽnnaam menga na n paa ne [ãdem-biisã]. Bãmb na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.” Sẽn na yɩl n wilg vẽeneg tɩ kãab kãngã pidsgã yaa waaziba, b yeela a Zã woto yaa: “Gʋlse! Tɩ bõe gom-kãens yaa sɩda la b zemsa reegre.”—Wilgri 21:1-5.

Na n yɩɩ wãn ne ka-taal dãmb milyõ ka tɛk nins sẽn ki hal sẽn sɩng ne kɩɩsgã sẽn zĩnd Edɛn tɛkã n tõk masã wã? A Zeova kãabame t’a na n kɩtame tɩ kũum sẽn dɩk b rãmba fãa vʋʋge. Tʋm-tʋmd a Poll yeelame: “Mam tara tẽeb kãng ne Wẽnnaam . . . tɩ kũum fãa na n vʋʋgame, nin-tɩrsa la [sẽn pa-b tɩrsa fãa, NW ].” (Tʋʋma 24:15) Nin-kãensã na n wa vɩɩmda tẽng zug ‘tɩrlem sẽn na n zĩnd a pʋgẽ.’—2 Pɩɛɛr 3:13.

Wala ba sẽn tar nonglem sẽn na n sak t’a biig maan wopeere a sã n mi tɩ rẽ na n wa naf-a lame n kaoosã yĩnga, a Zeova me basa wakat bilf pʋgẽ tɩ wẽngã zĩnd tẽng zug tɩ ãdem-biisã maan kaset ne rẽ b vɩɩmã pʋgẽ. La bark sẽn na n zĩnd wakat sẽn kõn sa n gũud neb nins sẽn baood n na n maan Wẽnnaam daabã. A Poll wilgame: “Bõn-naands fãa lebga faoore, la ka b mens ratem yĩng ye, yaa sẽn maana bãmb tɩ b yɩ woto wã yĩnga. Bãmb yaasdame n gũud tẽeb pidsgu tɩ bãmb me na paam yolsg ne faoolem yembdo n paam pʋɩɩr ne Wẽnnaam kamba b lohorma ne b ziira pʋgẽ.”—Rom dãmba 8:20, 21.

Ad woto sɩd yaa koɛɛg tɛkẽ! A pa wa d sẽn mi n wʋmd televiziõ n wã, bɩ d sẽn karemdb zʋrno rãmbẽ wã ye, yaa koe-noogo. Yaa koe-noog sẽn yɩɩd a taaba fãa sẽn yit “belsg fãa Wẽnnaam” sẽn sɩd geta tõnd yellã nengẽ.—2 Korẽnt dãmba 1:3.

[Foto rãmba, seb-neng a 6]

Yɛla wilgdame tɩ ãdem-biisã pa tõe n bas Wẽnnaam n soog b mens tɩ yãk neng ye

[Fotã soaadbã]

Somali zak a ye neba: UN PHOTO 159849/M. GRANT. Bõmb atomik: USAF photo. Nams-bɛɛg zaka: U.S. National Archives photo