‘Kelg-y ne gũusg n yɩɩd raasenkam’
‘Kelg-y ne gũusg n yɩɩd raasenkam’
“Yaa rẽ n so tɩ yaa tɩlae ne-d tɩ d kelg bũmb nins d sẽn wʋma ne gũusg n yɩɩd raasenkam, sẽn na yɩl n da wa lak n zãag abada n menem ye.”—HEBRE DÃMBA 2:1, NW.
1. Rɩk-y makr n wilg tɩ tiisgã tõe n waa ne yel-beedo.
MOBILÃ agsɩdã rãmbã kʋʋda neb 37000 yʋʋmd fãa Etazĩni pʋgẽ yen-yen bala. Mitb wʋsg yetame tɩ nin-kãensã wʋsg ra tõeeme n põs kũumã, sʋfɛɛr dãmbã sã n da gũusẽ n paas sorã zugu. Sofɛɛr dãmb kẽer basdame tɩ piblisite pano rãmbã gesg bɩ b telefon selilɛɛrã tiisd-ba. Kẽer me wẽnda mobila la b rɩtẽ. Yel-kãensã fãa pʋsẽ, tiisgã tõe n waa ne yel-beedo.
2, 3. Sagl-bʋg la a Poll kõ kiris-neb nins sẽn yaa Hebre dãmbã, la bõe yĩng tɩ sagl-kãngã ra zemse?
2 Sẽn kolg yʋʋm 2000 tɩ b nan pa maan mobilli, tʋm-tʋmd a Poll wilga tiisg buud sẽn yɩ wẽng ne Hebre kiris-neb kẽere. A Poll wilga vẽeneg t’a Zezi Kirist sẽn vʋʋgã paama naam n yɩɩd malɛgsã fãa, bala b zĩnig-a-la Wẽnnaam dɩtgo. Tʋm-tʋmdã paasa woto: “Yaa rẽ n so tɩ yaa tɩlae ne-d tɩ d kelg bũmb nins d sẽn wʋma ne gũusg n yɩɩd raasenkam, sẽn na yɩl n da wa lak n zãag abada n menem ye.”—Hebre dãmba 2:1, NW.
3 Bõe yĩng tɩ kiris-neb nins sẽn yaa Hebre rãmbã ra segd n ‘kelg bũmb nins b sẽn wʋm’ a Zezi wɛɛngẽ wã ‘ne gũusg n yɩɩd raasenkam’? Bala a Zezi ra yii tẽng zug sẽn na maan yʋʋm 30. B Zusoabã sẽn ka be wã, Hebre kiris-neb kẽer da sɩngame n basd tẽeb sɩd-sɩdã. B ra basame tɩ Zidaismã sẽn da yaa bãmb pĩnd balengã tiis-ba.
B ra segd n maana gũusg neere
4. Tõe tɩ yaa bõe yĩng la Hebre kiris-nebã sẽn da rat n leb Zidaismã pʋgẽ wã?
4 Bõe yĩng tɩ kiris-ned tõe n wa rat n leb Zidaismã pʋgẽ? Be neere, balengã sẽn da sigl to-to a Moiiz Tõogã wakatã ra tɩ loee ne yɛl ned nif sẽn tõe n yã. Nebã ra tõe n yãa maan-kʋʋdbã la b wʋm maandã b sẽn yõogdã yũugu. La ne yɛl kẽere, kiris-nebã tũudum da yaa toor wʋsgo. Kiris-nebã ra tara Maankʋʋd Kãsem sẽn ya a Zezi Kiristi, la maana yʋʋm pis-tã tɩ b ra ye pa ne-a tẽng zug ye. (Hebre dãmba 4:14) B ra tara wẽn-doogo, la wẽn-do-kãng zĩ-sõngã ra yaa saasẽ mengã. (Hebre dãmba 9:24) Sẽn yaa lebend ne yĩngã bãong a Moiiz Tõogã wakatã, kiris-nebã bãong ra yaa “sũur dẽnd ne vʋʋsem sõngã sabab yĩnga.” (Rom dãmba 2:29, NW ) Woto yĩnga, sã n yaa ne Hebre kiris-nebã, Kirist tũudmã sɩngame n wõnd bũmb sẽn lebg yamẽ yell bala.
5. Wãn to la a Poll wilg tɩ baleng buud ning a Zezi sẽn da siglã ra yɩɩda a soab ning b sẽn da lugl a Moiiz Tõogã wakatã?
5 B ra segd n sõnga Hebre kiris-nebã tɩ b bãng bũmb sẽn tar võor wʋsg baleng ning Kirist sẽn luglã wɛɛngẽ. A tika tẽeb zug n yɩɩd nif yãab zugu, la a yaool n yɩɩda Tõogã b sẽn tũnug ne no-rɛɛs a Moiiz n kõ wã. A Poll gʋlsa woto: “Lols ne bʋʋs zɩɩm zãgsgo la nag-sadga tom-pɛglem yuglg sã n da tõe n maan yĩns sẽn ka sõama tɩ yɩ sõama; dẽ, Kirist sẽn ka tar dẽgdo sẽn kõ b meng Wẽnnaam ne Sɩɩga sẽn ka sɛta pãngã, bãmb zɩɩm na n peka yãmb sũyã n yɩɩda, n yiis tʋʋm nins sẽn yaa kũuma tɩ yãmb sak Wẽnnaam sẽn vɩ.” (Hebre dãmba 9:13, 14) N-ye, sugrã b sẽn da tõe n paam tẽeb ne a Zezi Kirist maoongã sẽn yaa rondã maasmã yaa kãseng wʋsg n yɩɩd a soab ning maandã b sẽn da paamd ne a Moiiz Tõogã wakat maand maasmã.—Hebre dãmba 7:26-28.
6, 7. a) Yel-bʋg n kɩt tɩ ra yaa yãgb bũmb ne Hebre kiris-nebã tɩ ‘b kelg yɛl nins b sẽn wʋma n yɩɩd raasenkam’? b) A Poll sẽn wa n gʋls a lɛtrã Hebre rãmbã, wakat a wãn n da ket Zerizalɛm yĩnga? (Ges-y tẽngr notã.)
6 Bũmb a to n kɩt tɩ Hebre kiris-nebã ra segd n gũus n kelg yɛl nins sẽn tɩ loe ne a Zezi wã neere. A ra reng n togsame tɩ Zerizalɛm ra na n sãamame. A Zezi yeela woto: “Wakat n wat tɩ fo bɛɛba na n tu bok n gilgi n gũbg foom tɩ fo neba ka tõe n yi ye. Bãmb na n sarma foom ne f kamba sẽn be f pʋgẽ wã, la bãmb kõn bas kugr ba a yembr kugr a to zugu fo pʋgẽ ye, fo sẽn ka bãng f fãagr wakata yĩnga.”—Luk 19:43, 44.
7 Wakat bʋg la woto ra na n wa? A Zezi pa wilg a daarã la a lɛɛrã ye. Wall t’a maan woto, a kõo no-kãngã: “Yãmb sã n wa yã tɩ sodaas wʋsg gũbg Zerizalɛm, dẽ, bɩ y bãng t’a sãoong kolgame. Wakat kãnga neb nins sẽn be Zide, bɩ b zoe n kẽng tãens zutu. La neb nins sẽn be Zerizalɛm, bɩ b yi. La neb nins sẽn be wetẽ, bɩ b ra kẽ tẽnga pʋgẽ ye.” (Luk 21:20, 21) Yʋʋm 30 nins sẽn pʋgl a Zezi sẽn togs gom-kãensã wã wakate, kiris-neb kẽer sẽn be Zerizalɛm ra pa leb n get tɩ tẽebã yɛl yaa yãgb bũmb ye, tɩ rẽ kɩt tɩ b bas tɩ yɛl tiis-ba. B maana wa sʋfɛɛr sẽn bas sorã gesgã. B sã n da pa rems b tagsgã, yel-beed n da na n wa b zutu. B tagsa rẽ zug tɩ b pa tags rẽ zug me, Zerizalɛm sãoongã ra kolga wʋsgo! * Zu-noogo, a Poll saglgã neka Zerizalɛm kiris-neb nins sẽn da suusd tẽebã wɛɛngẽ wã.
D sẽn ‘gũusd n kelgd neer n yɩɩd raasenkam’ rũndã-rũndã to-to
8. Bõe yĩng tɩ d segd n ‘gũus n kelg’ Wẽnnaam Gomdã sɩd ‘n yɩɩd raasenkam’?
8 Wala pipi kiris-nebã, d segdame n ‘gũus n kelg’ Wẽnnaam Gomdã sɩdã n ‘yɩɩg raasenkam.’ Bõe yĩnga? Bala tõnd me gũuda sãoong sẽn na n wa ka la bilfu, pa tẽng a yembr sãang bal ye, la yaa zãmaanã tõre. (Wilgri 11:18; 16:14, 16) Sɩda, d pa mi daar ning la lɛɛr ning takɩ a Zeova sẽn na n wa ne sãoong kãngã wã ye. (Matɩe 24:36) Baasg zãnga, d nif maana kaset ne Biiblã bãngr-goam sẽn wilgd vẽeneg tɩ d vɩɩ ‘yaoolem wakatã’ pidsgu. (2 Tɩmote 3:1-5) Woto yĩnga, d segd n gũusa ne bũmb buud fãa sẽn tõe n tiis-du. D segd n kelga Wẽnnaam Gomdã neer la d ket n tar yãgdem yam. Yaa d sẽn na n maan woto bal la d na n tõog n “põs bõn-kãens fãa sẽn na n wa wã.”—Luk 21:36.
9, 10. a) Wãn to la d tõe n wilg tɩ d kelgda tẽebã yɛl neere? b) Wãn to la Wẽnnaam Gomdã yaa d ‘nao fɩtl’ la d ‘sor vẽenem’?
9 Tõnd wakatã sẽn pa reem yellã sasa, wãn to la d tõe n wilg tɩ d ‘gũusd n kelgda tẽebã yɛl n yɩɩd raasenkam’? Manesem a yembr yaa d sẽn na n debd d kiris-neb tigissã la tigis-kãsemsã wakat fãa. D segd n nong n zãmsda Biiblã neere, sẽn na yɩl n tõog n pẽneg a Zeova sẽn yaa Biiblã Soabã. (Zak 4:8) D sã n tũnug ne meng zãmsgã la tigissã n bãng a Zeova, d na n yɩɩ wa yɩɩl-gʋlsdã sẽn yeel Wẽnnaam woto wã: “Yãmb goama yaa mam nao wã fɩtla la m sor vẽenem.”—Yɩɩl Sõamyã 119:105.
10 Biiblã yaa ‘d sor vẽenem,’ a sã n togsd tõnd Wẽnnaam daabã beoog daar yĩnga. A yaa ‘tõnd nao wã fɩtl’ me. Rat n yeelame t’a tõe n sõnga tõnd d na-yakemd ning sẽn pʋgdã pʋgẽ, d sã n wa segd zu-loe-kãsems d vɩɩmã pʋgẽ. Yaa woto yĩng n kɩt tɩ tar yõod wʋsg tɩ d segd n ‘kelg ne gũusg n yɩɩd raasenkam,’ d sã n wa tigim ne d tẽed-n-taasã n na n deeg zãmsgo, la d sã n wa karemd Wẽnnaam Gomdã d yembre. Zãmsg ning d sẽn paamdã na n sõnga tõnd tɩ d rɩk sard sẽn yaa sõma la sẽn be nafre, sẽn tat a Zeova yam la sẽn noogd a sũuri. (Yelbũna 27:11; Ezai 48:17) Wãn to la d na n kelgd neer n kaoosd n paasd tigissẽ wã la tõnd mengã zãmsg sasa, sẽn na yɩl n dɩ Wẽnnaam tẽebã segls nafa n paase?
D kelg neer tigissẽ wã n kaoosd n paasdẽ
11. Bõe yĩng tɩ kelgr neer kiris-neb tigissẽ wã pa nana wakat ninga?
11 Wakat ninga, kelgrã kiris-neb tigissẽ wã pa nana ye. Biig kɛleng bɩ ned sẽn wa retaar n baood zĩig tõe n tiisa tõnd nana-nana. D sã n sõs n tʋme, yaams tõe n tar-d lame. Ned ning sẽn kõt sõsgã sẽn kõt-a to-to wã tõeeme n pa be yamleoogo, tɩ ne d na n wa bãng la d yamã sẽn gõode, bɩ d suusdẽ menga. Zãmsg ning b sẽn taasd tõnd tigissẽ wã yõod sẽn yaa kãseng wʋsgã yĩnga, d segd n modgame n kelg neer tɩ kaoosdẽ n paase. La wãn to la d tõe n maan woto?
12. Bõe n tõe n kɩt tɩ yɩ nana n yɩɩg ne-d tɩ d kelg tigissẽ wã?
12 Naoor wʋsgo, yaa nana n yɩɩd tɩ d kelg tigissẽ wã, d sã n segla sõma. Woto, bõe yĩng tɩ y pa na n yãk sẽk n deng n tags bũmb ning b sẽn na n wɛgs tigissẽ wã zugu? Daar fãa, minit a wãn bal seka sẽn na yɩl n karem la d bʋgs sags nins b sẽn kõ Biiblã kareng yĩng semenã pʋgẽ wã. D sã n sigl d meng sõma, d tõeeme me n bao sẽk n segl Tigingã Sebr Zãmsg la Gũusg Gãsgã zãmsgo. Baa tõnd sẽn yãk wakat ning zãmsgã yĩngã sẽn yaa to-to ningã, bũmb a yembr n yaa waaziba: Seglgã na n sõnga tõnd tɩ d kelg zãmsg ning b sẽn na n wɛgs tigingã tigissẽ wã neere.
13. Bõe n tõe n sõng tõnd tɩ d yamã tik zãmsg ning b sẽn wɛgsd tigissẽ wã?
13 Segl-m-meng neerã toor sẽn ka be, kẽer getame tɩ b kelgda neer tigissẽ wã n yɩɩda, b sã n zĩ taoore. D sã n ket n get sõsdã, n tũud Biiblã karengo, la d gʋlsd sõsgã tags-kãsems koɛɛg-koɛɛg me, kɩtdame tɩ d yamã ra gõ ye. Baasg zãnga, sũur sẽn segl yõod n yɩɩd kelg neer n kaoosã zĩig sẽn zãre. D segd n bãngã tõnd sẽn tigim taabã bõn-datla. Sẽn yɩɩd fãa, tõnd sẽn tigimd ne d tẽed-n-taasã yaa sẽn na yɩl n balem a Zeova. (Yɩɩl Sõamyã 26:12; Luk 2:36, 37) Tigissã yaa bõn-tũnugdg kãseng b sẽn tũnugd ne n dɩlgd tõnd tẽebã wɛɛngẽ. (Matɩe 24:45-47) Sẽn paase, rẽ sasa d tõeeme n “yik taab ratem tɩ maan nonglem la tʋʋm sõama.”—Hebre dãmba 10:24, 25.
14. Bõe n sɩd kɩtd tɩ tigisg yɩ sõma?
14 Kẽer tõe n magda tigisg sõmblem ne a sõsdbã zãmsg kũun minim sẽn yaa to-to wã. Sõsdbã sã n mi neb zãmsg sõma, b yetame tɩ tigisgã yɩɩ noogo. La sã n wõnd zãmsgã pa tar pãngã, d tõe n tagsame tɩ tigisgã pa yɩ noog ye. Yaa sɩd tɩ neb nins sẽn tar sõss tigisgẽ wã segdame n maan b sẽn tõe fãa n bãng zãmsg kũun la b modg tɩ zãmsgã kẽ nebã sũyã. (1 Tɩmote 4:16) La tõnd sẽn kelgdã, d pa segd n yɩ sãbsdb zaalem yĩng ye. Baa ne sẽn tar yõod ne neb nins sẽn tar sõssã tɩ b tall zãmsg kũun minimã, pa rẽ bal n kɩtd tɩ tigisgã yɩ sõma ye. D sak n deeg tɩ bũmb ning sẽn pak tõnd n yɩɩd pipi pa sõsdã sẽn kõt a sõsgã neer to-to wã, la yaa tõnd sẽn kelgd neer to-to wã. Tõnd sã n debd tigissã la d kelgd b sẽn yet be wã neere, d balemda Wẽnnaam tɩ zems ne a raabã. Yaa rẽ n kɩtd tɩ tigisgã yɩ sõma. D sã n dat n paam Wẽnnaam bãngrã ne d sũyã fãa, d na n dɩɩ tigissã nafa, baa sõsdã zãmsg kũun minim sẽn yaa to-to fãa. (Yelbũna 2:1-5) Sẽn ya a soab fãa, bɩ d rɩk sard sẽn pa vigsd n kelg tigissẽ wã ‘ne gũusg n yɩɩd raasenkam.’
Rɩ-y y meng zãmsgã nafa zãnga
15. Wãn to la zãmsgã la bʋgsgã tõe n naf-do?
15 D sã n ‘kelgd ne gũusg n yɩɩd raasenkamã’ d meng zãmsgã la bʋgsgã sasa, naf-d-la wʋsgo. Biiblã la kiris-neb sɛbã kareng la b zug bʋgsg na n sõngã tõnd sõma tɩ d kɩt tɩ Wẽnnaam Gomdã sɩd vigl d sũyã pʋsẽ sõma, la tall pãn-tusg sẽn yaa kãseng tõnd tagsgã la d yel-manesmã zutu. Sɩda, rẽ na n sõnga tõnd tɩ d paam sũ-noog ne a Zeova raabã maanego. (Yɩɩl Sõamyã 1:2; 40:9) Woto yĩnga, d segd n baoame n kelg neer tɩ kaoos n paase, sẽn na yɩl tɩ rẽ naf-do, d sã n wa zãmsdẽ. Yaa nana wʋsg tɩ bũmb tiis-du. Bũmb sẽn pa zem baa fʋɩ wala telefon booll bɩ bʋrg tõeeme n tiis d kelgrã. Bɩ tõeeme tɩ rẽ toor sẽn ka be meng bɩ yaa toog ne-d tɩ d kelg neer n kaoose. D tõe n wa zĩndame, n sɩd rat n dɩ tẽebã rɩɩbo, la tõeeme tɩ pa yã n kaoos la tõnd yamã sɩng n gõodẽ ye. Wãn to la d tõe n ‘kelg ne gũusg n yɩɩd raasenkam’ d sã n wa zãmsd Wẽnnaam Gomdã d yembre?
16. a) Bõe yĩng tɩ tar yõod tɩ d sigl d sẽkã n maan d meng zãmsgo? b) Wãn to la y paamd sẽk Wẽnnaam Gomdã zãmsg yĩnga?
16 Bee nafr tɩ d yãk sẽk d meng zãmsgã yĩnga, n yãk zĩig la wakat sẽn zems ne zãmsgã sõma n yɩɩda. Ne neb wʋsg sẽn be tõnd sʋkã, paam sẽk n zĩnd f yen wã yaa toog wʋsgo. D tõe n tagsdame tɩ vɩɩmã yɛl yaa n looga d nugu, tɩ kɩt tɩ d rat n mao n paam sẽk n zĩnd d yembr n bʋgse. D pa tõe bal n gũ tɩ weer d sẽn tõe n dɩk n zãmsã wa a toor ye. Yaa tõnd mengã n segd n bao sẽk zãmsgã yĩnga. (Efɛɛz rãmba 5:15, 16, NW ) Kẽer yãkda wakat bilf yibeoogo, yɛl sẽn wat ne tiisgã sẽn pa waoogã yĩngã. Kẽer tagsdame tɩ zaabr n são. Sẽn be yaa tɩ d pa tog n yĩm tɩ d segd paama Wẽnnaam la a Biriblã bãngr sẽn yaa takɩ wã ye. (Zã 17:3) Woto yĩnga, bɩ d sigl d sẽkã n maan d meng zãmsgo, la d gãd d sẽkã d sẽn yãk rẽ yĩngã.
17. Bʋgsg yaa bõe, la wãn to la a tõe n naf tõndo?
17 Bʋgsgã, sẽn yaa zĩnd n tags d sẽn zãmsd bũmb ningã zug neerã tara yõod sẽn pa tõe n sɩfe. Bʋgsgã kɩtdame tɩ Wẽnnaam tagsa wã kẽ d sũyã sõma. Bʋgsgã sõngda tõnd tɩ d bãng d sẽn na n tũ Biiblã saglg to-to sẽn na yɩl n yɩ ‘koe-sakdba, n da yɩ koe-kelgdb bal ye.’ (Zak 1:22-25) Sẽn paase, bʋgsgã sõngda tõnd tɩ d pẽneg a Zeova n paase, bala a sõngda tõnd tɩ d puk a zʋg-sõma wã, la d bãng b sẽn wilg-b to-to zãmsg ning tõnd sẽn maandã sasa.
18. Bõe n yaa tɩlae, d sã n dat n maan bʋgsg sẽn yaa sõma?
18 Sẽn na yɩl n dɩ zãmsgã la bʋgsgã nafa zãnga, d pa tog n bas tɩ bũmb tiis-d ye. Sẽn na yɩl n zãms tags-paals d bʋgsgã wakate, d pa segd n bas tɩ rũndã yɛlã buud toor-toorã tiis-d ye. Rẽ baooda sẽk la zĩnd d yembr wakat ninga, la ad d tẽebã na n sɩd paama kengre, d sã n dɩt tẽebã rɩɩb la d yũud sɩdã koom sẽn be Wẽnnaam Gomdã pʋgẽ wã!
19. a) Sã n yaa ne meng zãmsgã, yaa bõe n sõng neb kẽer tɩ b tõogd n kelgd neer tɩ kaoosd n paasdẽ? b) Tõnd manesem segd n yɩɩ wãn to ne zãmsgã, la yaa bõe nafa la d tõe n paam ne tʋʋm-kãseng kãngã?
19 Yaa wãn to, tõnd sã n pa tõe n kelg neer tɩ kaoose, bɩ d yamã sã n sɩng n gõodẽ, d sã n sɩng zãmsgã tɩ nan pa kaoose? Kẽer yãame tɩ b tõe n kelga neer n kaoos n yɩɩge, b sã n sɩng ne zãmsg sẽn kaoosd wakat bilfu, la b paasd a kaoosgã bilf-bilfu. Tõnd sẽn datã yaa d rɩk sẽk tɩ sek zãmsgã yĩnga, la pa d zãms var-var ye. D segd n bɩɩsa raab sẽn tar pãng ne bũmb ning d sẽn zãmsdã. La d tõe n maana vaeesg n paase, n tũnug ne tʋʋm-teed wʋsgã tʋm-tʋmd sẽn tũud sɩd la sẽn tar yamã sẽn kõ wã. A bee nafr wʋsg tɩ d vaees “Wẽnnaam yel-zulumsã.” (1 Korẽnt dãmba 2:10, NW ) Woto maaneg kɩtdame tɩ d bãng Wẽnnaam n paas la d paas d tagsgã tõogo. (Hebre dãmba 5:14) Tõnd sã n nong n zãmsd Wẽnnaam Gomdã neere, d na n ‘tõogame me n zãms neb a taaba.’—2 Tɩmote 2:2.
20. Wãn to la d tõe n ket n tar zems-n-taar sẽn tar pãng ne Wẽnnaam a Zeova?
20 Kiris-neb tigissẽ wã kẽngr la meng zãmsgã na n sõnga tõnd wʋsg tɩ d ket n tar zems-n-taar sẽn tar pãng ne a Zeova. Vẽenega, yɩɩ woto ne yɩɩl gʋlsdã sẽn yeel Wẽnnaam tɩ: “Mam nonga yãmb tõoga wʋsgo. Mam tagsda a yell daar fãa” wã. (Yɩɩl Sõamyã 119:97) Rẽ, bɩ d maan d sẽn tõe fãa n kẽnd tigissã la tigis-kãsemsã wakat fãa. La bɩ d bao sẽk Biiblã zãmsg la bʋgsgã yĩnga. D na n paama bark wʋsgo, d sẽn ‘kelgd’ Wẽnnaam Gomdã ‘ne gũusg n yɩɩd raasenkamã’ yĩnga.
[Tẽngr note]
^ sull 7 B gʋlsa lɛtr ning b sẽn taas Hebre dãmbã yʋʋmd 61 wã. Sã n yaa woto, ra yaa yʋʋm a nu poor bal la a Sɛstius Galus tãb-biisã wẽ gũbr n gilg Zerizalɛm n na n zab ne-a. Pa kaoos la tãb-biis kãens lebg n looge, tɩ kõ kiris-nebã weer tɩ b zoe ye. Yʋʋm a naas poore, zenerall Tɩtus talla Rom tãb-biisã n wa sãam galʋ-tẽngã.
Y tẽrame bɩ?
• Bõe yĩng tɩ Hebre kiris-neb kẽer ra zãagd n basd tẽeb hakɩkã?
• Wãn to la d tõe n ket n kelgd kiris-neb tigissẽ wã neere?
• Bõe n na n sõng tõnd tɩ d rɩ meng zãmsgã la bʋgsgã nafa?
[Zãmsgã sogsgã]
[Foto, seb-neng a 9]
Hebre kiris-nebã ra segd n seglame n gũ Zerizalɛm sãoongã sẽn da kolg wʋsgã
[Foto, seb-neng 11]
Roagdbã tõe n sõnga b kambã tɩ b rɩ kiris-neb tigissã nafa