Ket-y n maand bũmb nins y sẽn zãmsã
Ket-y n maand bũmb nins y sẽn zãmsã
“Bɩ y maan bũmb nins yãmb sẽn da zãms la y reeg la y wʋm la y yã mam sẽn maanã, la Wẽnnaam sẽn so laafɩ na zĩnd ne yãmba.”—FILIP RÃMBA 4:9.
1, 2. Biiblã tara pãng neb nins fãa sẽn yet tɩ b yaa wẽn-tũudbã vɩɩm pʋgẽ bɩ? Wilg-y y leokrã võore.
“TŨUDMÃ paamda pãng n paasdẽ, tɩ nebã tar no-tɩrsã basg b vɩɩm manesmã pʋgẽ.” Yaa woto n yɩ kɩbay sebr a yembr (Emerging Trends) gom-zug sẽn kʋmsd nebã manesem b sẽn vaees n ges Etazĩni tẽngã. Neb nins sẽn kẽnd wẽn-dotẽ wã sõor paasame, tɩ b wilg tɩ tũudmã tara yõod wʋsg nebã vɩɩm pʋgẽ. Baasg zãnga, vaeesgã paasdame: “Baa ne neb sõor wʋsg woto sẽn debd wẽn-dotẽ wã, Etazĩni neb wʋsg pa tẽed tɩ tũudmã tara pãng nebã yembr-yembr bɩ nin-buiidã vɩɩm pʋgẽ ye.”
2 La pa tẽn-kãng pʋgẽ bal la yaa woto ye. Dũniyã gill zugu, neb wʋsg sẽn yet tɩ bãmb saka Biiblã n yaa wẽn-tũudb pa basd Gʋlsg Sõamyã t’a sɩd tall pãng b vɩɩmã pʋgẽ ye. (2 Tɩmote 3:5) Vaeesdb sull taoor soab a yembr yeela woto: “D ket n nanda Biiblã wʋsgo, la sã n yaa ne rɩk sẽk n sɩd karm-a, n zãms-a la d tũ-a wã, woto yaa bũmb d sẽn ye pa maande.”
3. a) Wãn to la Biiblã tar pãng neb nins sẽn lebgd kiris-neb hakɩkã vɩɩm pʋgẽ? b) Wãn to la a Zezi karen-biisã tũud a Poll saglg ning sẽn be Filip rãmba 4:9 pʋgẽ wã?
3 La pa woto ne kiris-neb hakɩkã ye. Wẽnnaam Gomdã sagls tũub kɩtame tɩ b toeem b tagsgã la b manesmã. La pa kaoosd la neb a taabã yã tɩ b zʋgã toeemame ye. (Kolos rãmba 3:5-10) Ne a Zezi karen-biisã, Biiblã pa sebr b sẽn dɩkd n dɩgl bal n pa tũnugd ne ye. Sẽn yaa lebende, tʋm-tʋmd a Poll yeela Filip kiris-nebã tɩ: ‘Bɩ y maan bũmb nins yãmb sẽn da zãms la y reeg la y wʋm la yã mam sẽn maanã, la Wẽnnaam sẽn so laafɩ na zĩnd ne yãmba.’ (Filip rãmba 4:9) Kiris-nebã pa sakd Wẽnnaam Gomdã sɩd bal ye. B tũuda b sẽn zãmsdã, n ket n tũud Biiblã saglg b zagsã pʋsẽ, b tʋʋmã zĩigẽ, tigingã pʋgẽ, la b vɩɩmã nens fãa pʋsẽ.
4. Bõe yĩng tɩ yaa toog ne-d tɩ d tũ Wẽnnaam tõodã?
4 Wẽnnaam noyã la a noy yẽgã tũub pa nana ye. Dũni ning pʋgẽ tõnd sẽn vʋyã bee a Sʋɩtãan Munaafɩɩk nugẽ. Biiblã boonda a Sʋɩtãan tɩ “dũni kãnga wẽnnaam.” (2 Korẽnt dãmba 4:4; 1 Zã 5:19) Woto yĩnga, d segd n gũusa ne bũmb ning fãa sẽn tõe n gɩdg tõnd tɩ d pa tall burkĩnd ne Wẽnnaam a Zeova. Wãn to la d tõe n yɩ burkĩn Wẽnnaam taoore?
Gãd-y “goam sõma wã mamsgo”
5. A Zezi sẽn yeel tɩ ‘tũ-y maam wakat fãa wã’ võor yaa bõe?
5 Bũmb a yembr tõnd sẽn zãmsã sẽn baood tɩ d maan yaa baleng hakɩkã teelg ne burkĩndi, baa sẽn pa tẽed-bã sã n kɩɩsd tõndo. Sũ-mar baooda modgre. A Zezi yeelame: “Ned sã n dat n tũ maam, bɩ a kɩɩs a meng raabo n dɩk a kũum da-pik n tũ maam [“wakat fãa,” NW ].” (Matɩe 16:24) A Zezi pa yeel tɩ d tũ-a semene, kiuug bɩ yʋʋmd bal ye. A yeelame: ‘Tũ-y maam wakat fãa.’ A goamã wilgdame tɩ tõnd karen-biilmã pa wakat bilf bũmb tõnd vɩɩmã pʋgẽ bala, sẽn be rũndã n ka beoog ye. Baleng hakɩkã teelg rat n yeelame tɩ d maood n ket n yaa sakd wakat fãa vɩɩm ning d sẽn yãkã pʋgẽ, baa sẽn yaa to-to fãa. Wãn to la d tõe n maan woto?
6. Goam sõama wã mamsg pipi kiris-nebã sẽn zãms a Poll nengẽ wã yaa bõe?
6 A Poll sagla a tʋmd-n-taag a Tɩmote woto: “Tall goam sõama nins fo sẽn deeg mam nengẽ wã mamsgo la tẽeb ne nonglem a Kirist Zezi maasem yĩnga.” (2 Tɩmote 1:13) Bõe la a Poll da rat n yeele? Gerɛk gom-biig ning b sẽn lebg tɩ ‘mamsgã’ tɩ loee ne gʋnd sẽn karg bũmb a sẽn dat n gʋle. Baa ne gʋlbã fãa sẽn pa sa wã, a kargrã yaa vẽeneg tɩ b tõe n yã n bãng sẽn yaa bũmb ningã. Woto me, sɩdã mamsg a Poll sẽn zãms a Tɩmote la neb a taabã bõn-datl ra pa sẽn na yɩl n kõ sʋkr fãa sẽn yaa takɩ leokr ye. Baasg zãnga, zãms-kãng kõta sor-wilgr tɩ seke, tɩ pʋ-peelem dãmbã tõe n bãng bũmb ning a Zeova sẽn baood tɩ b maana. Yaa sɩd tɩ b sã n dat n ta Wẽnnaam yam, b segd n gãda sɩdã mamsg n tũ b sẽn zãms bũmb ningã.
7. Wãn to la kiris-nebã tõe n gãd gom-sõma wã mamsgo?
7 Pipi yʋʋm kob-gĩndẽ wã, neb wala a Himene, a Alɛgsãndr la a Filɛt ra zãmsda nebã tagsa sẽn da pa zems ‘ne goam sõma wã mamsg’ ye. (1 Tɩmote 1:18-20; 2 Tɩmote 2:16, 17) Wãn to la pipi kiris-nebã ra tõe n gũus tɩ sɩdã kɩɩsdb ra tudg-ba? Yaa b sẽn da na n maag b yĩng n zãms Gʋlsg Sõamyã vʋʋsem sõng sẽn vẽneg tɩ b gʋlsã, la b tũ-a b vɩɩmã pʋgẽ. Neb nins sẽn tũ mak-sõng ning a Poll la wẽn-sakdb a taabã sẽn da kõ wã ra tõe n bãngame la b zãgs bũmb ning fãa sẽn da pa zems ne sɩda mamsg b sẽn da zãms-bã. (Filip rãmba 3:17; Hebre dãmba 5:14) Walla tɩ b yɩ neb sẽn ‘nong gom-yaals la no-koɛɛm wʋsgã,’ b ket n kẽngda taoor ne b wẽn-zoeer sẽn yaa bõn-neerã. (1 Tɩmote 6:3-6) Yaa woto la tõnd me maanda, d sã n ket n tũud sɩd nins d sẽn zãmsã. Ad sɩd kengda tẽebo, d sẽn ne tɩ neb milyõ rãmbã sẽn maand a Zeova raabã tẽngã gill zug ket n gãta Biiblã sɩd mams-sõngã b sẽn zãms-bã.—1 Tesalonik rãmba 1:2-5.
Zãgs-y ‘soalmã’
8. a) Wãn to la a Sʋɩtãan baood n na n sãam tõnd tẽebã rũndã-rũndã? b) A Poll keoog-bʋg n be 2 Tɩmote 4:3, 4 pʋgẽ?
8 A Sʋɩtãan makdame n na n sãam tõnd burkĩndã n tũnugd ne sãmbs yɛl nins b sẽn zãms tõndã zutu. Wala pipi kiris-nebã wakatã, rũndã-rũndã, sɩdã kɩɩsdb la neb a taab baoodame n na n sãam sẽn pa gũusd-bã tẽebo. (Galat dãmba 2:4; 5:7, 8) Wakat ninga, b tũnugda ne kɩba-kɩtbã n yelgd kɩba-goalem bɩ ziri fasɩ sẽn tɩ loe ne a Zeova nin-buiidã manesem la b yam-tusdi wã. A Poll yeelame tɩ d gũus tɩ kẽer la b na n kɩt tɩ b bas sɩdã. A gʋlsame: “Wakat n na n wa tɩ neba ka rat n sak sɩd koɛɛga ye. La bãmb mens ratem yĩnga, bãmb na n baoo karen-saam dãmb wʋsg sẽn na n togs koɛɛg sẽn noom bãmb bala. Bãmb kõn le kelg sẽn yaa sɩd ye, bãmb na n kelga soalem bala.”—2 Tɩmote 4:3, 4.
9. Tõe tɩ yaa bõe n da be a Poll yamẽ, a sẽn gom ‘soalem bal’ yellã?
9 Kẽer pa gãd goam-sõama wã mamsg ye, b basame tɩ “soalem” yamleoog yõk-ba. Solem-kãens ra yaa bõe? Tõe tɩ yaa kɩbay b sẽn mams neer bal n da be a Poll yamẽ wã, wala b rãmb nins sẽn be Tobi sẽn yaa sebr goam sẽn pa halaalã pʋgẽ wã. * Soalmã leb n tõe n da yaa kɩbay sẽn be yamleoog n wat ne no-koɛɛma n yaool n pa sɩd ye. Rẽnd neb kẽer me, “bãmb mens ratem yĩnga,” tõe tɩ b basame tɩ neb nins sẽn maand laas-laas ne Wẽnnaam noyã, bɩ sẽn da sãbsd tigingã taoor dãmbã belg-ba. (3 Zã 9, 10; Ziid 4) Baa sẽn yɩ ne kug-lakdg ning fãa, kẽer da saka ziri wã n bas Wẽnnaam Gomdã sɩda. Pa yã n kaoos la b bas yɛl nins b sẽn da zãmsã tũub ye, la rẽ waa ne bãmb mens sãoong tẽebã wɛɛngẽ.—2 Pɩɛɛr 3:15, 16.
10. Rũndã-rũndã soalem kẽer la bʋse, la wãn to la a Zã wilg vẽeneg tɩ d segd n gũusame?
10 Rũndã-rũndã, d tõeeme tɩ zãmsg sẽn yaa soalem balã yamleoog ra kẽ-do, d sã n vaees n tũus bũmb nins d sẽn kelgdã la d sẽn karemdã. Wala makre, televiziõ wã nong n wilgda yoob yɛla. Neb wʋsg yetame tɩ ned pa tõe n bãng sɩd ye, bɩ b tolg n wilgdẽ tɩ b yaa wẽnd-kae rãmba. Bãngdb nins sẽn gẽnesd yɛl Biiblã pʋgẽ wã laada b sẽn yeel Biiblã pʋgẽ tɩ yaa Wẽnnaam n vẽneg tɩ b gʋls-a wã. Tɩ rũndã-rũndã sɩdã kɩɩsdb ket n maood n na n ning sãmb-sãmb nebã yamẽ, sẽn na yɩl n sãam kiris-nebã tẽebo. Ziri no-rɛɛsdb sẽn wa n wa ne yell sẽn wõnd woto pipi yʋʋm kob-gĩndẽ wã, tʋm-tʋmd a Zã maana keoog-kãngã: “Mam kom-nongdse, bɩ y ra tẽ sɩɩsa fãa ye, la bɩ y mak sɩɩsã n gese n bãng sẽn yaa Wẽnnaam dẽnda, tɩ bõe, zãmb bãngdb wʋsg waa dũniyã pʋgẽ.” (1 Zã 4:1) Rẽnd d segd n gũusame.
11. Manesem a ye bʋg la d tõe n tũnug ne n mak n gese, d sã n bee tẽeb pʋgẽ?
11 Rẽ wɛɛngẽ a Poll gʋlsa woto: “Bɩ y fees yãmb mens n ges yãmb sã n bee tẽeb pʋgẽ.” (2 Korẽnt dãmba 13:5) Tʋm-tʋmdã sagla tõnd tɩ d ket n makd d mens n getẽ d sã n gãta bũmb nins fãa kiris-nebã sẽn tẽedã. Tõnd sã n nong n kelgd neb nins sẽn nong yẽgengã, yaa d vaees d mens ne pʋ-peelem. (Yɩɩl Sõamyã 139:23, 24) Tõnd nong n baooda kongr a Zeova nin-buiidã nengẽ bɩ? Sã n yaa woto, yaa bõe yĩnga? Yaa ned goam bɩ a tʋʋm n zab tõnd bɩ? Sã n yaa woto, tõnd ket n tara tagsg sẽn zems ne yɛlã bɩ? Toog buud fãa tõnd sẽn segd dũni kãngã pʋgẽ yaa wakat bilf yĩng bala. (2 Korẽnt dãmba 4:17) Baa tõnd sã n segd yel-tood tigingã pʋgẽ, bõe yĩng tɩ d na n bas Wẽnnaam balengo? Bũmb sã n sãam tõnd sũuri, d sã n maan d sẽn tõe n welg yellã, tɩ rẽ poor bɩ d bas yellã a Zeova nugẽ pa são n yɩɩd sɩda?—Yɩɩl Sõamyã 4:5; Yelbũna 3:5, 6; Efɛɛz rãmba 4:26.
12. Wãn to la Beere nebã kõ tõnd mak-sõngo?
12 Wall tɩ d yɩ sãbsdba, bɩ d kell n tall tagsg sẽn yaa sõma ne zãmsg ning d sẽn paamd d meng zãmsgã pʋgẽ la tigingã tigissẽ wã. (1 Korẽnt dãmba 2:14, 15) La wall tɩ d maan sãmb-sãmb ne Wẽnnaam Gomdã, ad sɩd yaa yam tʋʋmd n yɩɩd tɩ d maan wa pipi yʋʋm kob-gĩndẽ Beere nebã. Bãmb maaga b yĩng n vaees Gʋlsg Sõamyã. (Tʋʋma 17:10, 11) Rẽ poore, bɩ d tũ d sẽn zãmsdã, n bas sẽn yaa soalem balã la d gãd sɩdã.
13. Wãn to la d tõe n yelg kɩbay sẽn pa sɩd n pa bãnge?
13 Solemd buud a to sẽn yaa ziri n be tɩ d segd n gũus ne. kɩbay sẽn be yamleoog wʋsg n saagde, la naoor wʋsgo yaa ne ẽntɛrnetã maasem. Yaa yam tʋʋmd tɩ d gũus neer ne kɩbay a woto, sẽn yɩɩd fãa, tõnd sã n pa mi kɩbayã yẽgre. Baa yaa saam-biig sẽn tar yʋ-noog n tool kɩbare, tõeeme tɩ pa saam-bi-kãng a toor n maan kaset ne yɛlã ye. Yaa rẽ n so tɩ d segd n gũus n da lebs n togs kɩbay d sẽn pa vaees n bãng tɩ yaa sɩd ye. D pa na n sɩd rat n togs neb a taab ‘soalem sẽn ka võore la sẽn yaa yalemd’ ye. (1 Tɩmote 4:7) Sẽn mik tɩ d segd n togsa taab sɩdã, yaa yam tʋʋmd tɩ d lak d meng ne bũmb ning fãa sẽn tõe n wa kɩt tɩ d yelg goam sẽn pa sɩd n pa bãng meng ye.—Efɛɛz rãmba 4:25.
Sɩdã tũub nafa
14. Bõe nafa la d paamda, d sã n tũ bũmb nins d sẽn zãms Wẽnnaam Gomdã pʋgẽ wã?
14 D sã n tũ d sẽn zãmsd bũmb ning d meng Biibl zãmsgã pʋgẽ la kiris-neb tigissẽ wã, na n naf-d-la wʋsgo. Wala makre, d tõe n yãame tɩ d zems-n-taarã ne sẽn kĩ-b ne tõnd tẽebã pʋgẽ wã paasdame. (Galat dãmba 6:10) D sã n tũud Biiblã noyã, tõnd mengã sũur tagsg na n yɩlgame n paase. (Yɩɩl Sõamyã 19:9) Sẽn paase, d sã n tũud d sẽn zãmsd bũmb ningã, d kɩtdame tɩ ‘tõnd Wẽnnaam kareng paam waoogre,’ la d na n taka neb a taab tɩ b wa baleng hakɩkã pʋgẽ.—Tɩt 2:6-10.
15. a) Wãn to la bi-bɩɩg a yembr tõog n kõ kasetã lekollẽ wã ne raoodo? b) Yaa bõe la kɩba-kãngã zãmsd yãmba?
15 A Zeova Kaset rãmbã sʋka, kom-bɩɩs n be be n tũud b sẽn zãms bũmb nins b meng Biibl zãmsgã la kiris-neb sɛbã pʋsẽ wã, n paas ne b sẽn kẽngd tigingã tigissẽ n pa vaandẽ wã maasem. B manesem sõngã yaa kaset sẽn tar pãng ne b karen-saam dãmbã la b karen-bi-taasã. (1 Pɩɛɛr 2:12) Ges-y Etazĩni yʋʋm 13 bipugl a Leslie makrã. A sak n deegame tɩ ra yaa toog ne-a t’a gom a tẽebã yell ne a karen-bi-taasã, la raar a yembre toeeng n zĩndi. “Karen-doogẽ wã b ra gomda nebã sẽn makd n na n kɩt tɩ nebã ra b koosmã to-to. Tɩ bipugl a yembr zẽk a nug n dɩk makr ne a Zeova Kaset rãmbã.” A Leslie sẽn yaa Kaset soabã manesem yɩɩ wãn to? A yeelame: “Mam gomame n teel m tẽebã. La m kɩsa sɩd tɩ rẽ linga nebã fãa, bala m nong n yaa nin-sĩndr lekollẽ wã.” A yẽesmã waa ne bõe? “M tõog n basa seb-bil la seb-vãoog ne karen-biigã, bala a ra tara sʋgsg a taaba.” Woto la a Leslie yeel-yã. Ad a Zeova sũur segd n yaa noog wʋsgo, kom-bɩɩsã sẽn tũud b sẽn zãmsdã n kõt kasetã lekollẽ wã ne raoodã!—Yelbũna 27:11; Hebre dãmba 6:10.
16. Wãn to la Wẽnnaam Tʋʋmdã Lekoll naf bi-bɩɩg a ye sẽn yaa Kaset soaba?
16 Makr a to ya a Elizabɛte. A kẽe lekoll a yʋʋm a yopoe, la sasa ning fãa a sẽn zĩnd lekollẽ wã, bipugl kãngã boola a karen-saam dãmbã tɩ b wa Rĩungã Roogẽ, a sã n da tar sõsg Wẽnnaam Tʋʋmdã Lekollẽ. Karen-saambã sã n da pa tõe n wa, a Elizabɛt ra paada karengã poor n kõ a sõsgã karen-saambã taoore. A yaoolem yʋʋmdã kolɛɛsẽ wã, a Elizabɛt gʋlsa kɩbar sẽn pid seb-nens piig sẽn wilgd Wẽnnaam Tʋʋmdã Lekoll yõod n tik rẽ zug n kõ sõsg karen-saam dãmb a naas taoore. B leb n kos-a lame t’a kõ Wẽnnaam Tʋʋmdã Lekollẽ sõasg buudu, t’a yãk sõsg gom-zug sẽn yaa: “Bõe yĩng tɩ Wẽnnaam bas wẽnemã tɩ beẽ?” A Elizabɛt rɩɩ zãmsg ning a Zeova Kaset rãmbã sẽn kõt Wẽnnaam Tʋʋmdã Lekollẽ wã nafre. Yẽ me maana wa kom-bɩɩs wʋsg nins sẽn pẽgd a Zeova n tũud bũmb nins b sẽn zãms a Gomdã pʋgẽ wã.
17, 18. a) Biiblã kõta sagl-bʋg pʋ-peelmã wɛɛngẽ? b) Wãn to la a Zeova Kaset soab a yembr pʋ-peelem tʋʋmd yɩ rao a yembr noog hal wʋsgo?
17 Biiblã sagenda kiris-nebã tɩ b tall pʋ-peelem bũmb fãa pʋgẽ. (Hebre dãmba 13:18) Pʋ-lik tõe n sãama tõnd zems-n-taar ne d taaba, la sẽn yɩɩd fãa d zems-n-taarã ne a Zeova mengã. (Yelbũna 12:22) Tõnd manesmã b sẽn tõe n tall bas-m-yam ne wã kõta kaset tɩ d tũuda yɛl nins d sẽn zãmsã, la rẽ tusa neb wʋsg tɩ b tall waoogr n paas ne a Zeova Kaset rãmbã.
18 Ges-y bũmb ning sẽn paam sodaag yʋʋr sẽn boond t’a Philip. A sĩyã sɛk n bas vɩʋʋg n pa gʋls ligd sõor a zug ye, la a pa bãng hal tɩ sɛkã wa lebg n tũ ne lɛtr n wa a nengẽ. Ya a Zeova Kaset soab a yembr n yã sɛkã, n gʋls koɛɛg-koɛɛg n paas n wilg tɩ yaa ned ning sẽn yã sɛkã tẽeb n tus-a t’a lebs sɛkã. Linga a Philip wʋsgo. “B ra tõe n vaaga m dolaar 9 000 [milyõ a yoob la zaka] sẽn be m kõntẽ wã!” Woto la a yeel-yã. Sasa a to a sũur sãama b sẽn zuk a pugl wẽn-doog pʋgẽ wã. Yɩta mit la sẽn dɩk a puglã, tɩ sãan yaool n lebs a sɛk sẽn da tõe n kɩt t’a paam milyõ rãmba! Sɩd-sɩda, kiris-neb nins sẽn yaa pʋ-peelem dãmbã waoogda Wẽnnaam a Zeova!
Ket-y n tũud bũmb ning y sẽn zãmsã
19, 20. Wãn to la d na n nafe, d sã n tũ bũmb nins d sẽn zãms Gʋlsg Sõamyã pʋgẽ wã?
19 Neb nins sẽn tũud bũmb ning b sẽn zãms Wẽnnaam Gomdã pʋgẽ wã paamda nafa wʋsgo. Karen-biig a Zak gʋlsame: “Ned ninga sẽn get tõog sẽn zems zãnga sẽn yaa lohorem tõogã, la sẽn ket n get daar fãa, la sẽn kelgda n ka yĩmdẽ, la sẽn sakda, bark na n zĩnda yẽ zugu a sẽn maand woto wã yĩnga.” (Zak 1:25) N-ye, tõnd sã n maandẽ tɩ zemsd ne bũmb nins d sẽn zãmsd Gʋlsg Sõamyã pʋgẽ wã, d na n paama sũ-noog hakɩka, la d na n tõogame n mao ne vɩɩmã zu-loees sõma n paase. Sẽn yɩɩd fãa, d na n paama a Zeova bark la vɩɩm sẽn pa satã saagre!—Yelbũna 10:22; 1 Tɩmote 6:6.
20 Rẽ, sẽn ya a soab fãa, bɩ y ket n modgd ne Wẽnnaam Gomdã zãmsgo. Tigimd-y wakat fãa ne a Zeova balemdbã, la y kelg zãmsg ning b sẽn wɛgsd b tigissẽ wã neere. Tũ-y y sẽn zãmsdã, kell-y n maan woto, tɩ “Wẽnnaam sẽn so laafɩ na zĩnd ne yãmba.”—Filip rãmba 4:9.
[Tẽngr note]
^ sull 9 Tobit sebrã b sẽn gʋls yʋʋm kob-gĩnd a tãab-n-soab sẽn deng Kirist zãmaana tara tẽeb ziri wʋsg Zʋɩf ned yʋʋr sẽn boond t’a Tobia sẽn wa ne. B yeelame t’a ra tara tõog n tõe n maag neba, la zĩn dãmb rigb tõogo, a sã n tũnug ne zĩm bedr sũuri, a yam la a sãoore.
Y tẽrame bɩ?
• ‘Goam sõama wã mamsg’ yaa bõe, la wãn to la d tõe n ket n gãt-ba?
• ‘Soalem’ nins d sẽn segd n zãgsã yaa bʋse?
• Nafa bʋs la neb nins sẽn tũud bũmb nins b sẽn zãms Wẽnnaam Gomdẽ wã paamda?
[Zãmsgã sogsgã]
[Foto, seb-neng 15]
Wãn to la pipi kiris-nebã ra tõe n gũus tɩ sɩdã kɩɩsdb ra kʋɩɩb-ba?
[Foto rãmba, seb-neng 16]
Kɩba-kɩtbã, Ẽntɛrnetã la rũndã-rũndã sɩdã kɩɩsdb tõe n waa ne sãmb-sãmbe
[Foto, seb-neng 17]
Pa yam tʋʋmd tɩ d yelg kɩbay d sẽn pa tar kaset tɩ yaa sɩd ye
[Foto rãmba, seb-neng 18]
Tʋʋma zĩigẽ, lekollẽ wã la zĩis a taaba, a Zeova Kaset rãmbã tũuda b sẽn karemd Wẽnd Gomdẽ wã