Kom-bɩɩs sẽn nong sɩdã

“BI-BƖƖG na n maana a wãn t’a sor zemse?” Woto la yɩɩl gʋlsd sẽn yaa Hebre buudã ned sʋk sẽn yɩɩd yʋʋm 2400 sẽn looge. (Yɩɩl Sõamyã 119:9) Sʋk kãngã ket n tara yõod wʋsg hal ne rũndã, bala kom-bɩɩsã segda zu-loees wʋsg dũniyã gill zugu. Kom-biisã sẽn yood yaar ne neb wʋsgã kɩtame tɩ bãmb wʋsg pa zãr ne b paam SƖDA wã ye. Sẽn zoe n tar-b bã-kãngã sẽn yaa wẽngã pʋɩ-sʋk la bal zemsa yʋʋm 15 n digd 24. Dorgã rɩkr me waa ne yɛl ka tɛk n kɩt tɩ kom-bɩɩs wʋsg kiid poala. Mizik wẽnsã, televiziõ wã la video rãmbẽ wã b sẽn yiisd filim sẽn wilgd bi-beerã la yoobã, la ẽntɛrnɛtã sẽn wilgd yoobã yɛlã, woto fãa mata kom-bɩɩsã vɩɩm hal wʋsg tɩ b sãamd n debda. Dẽnd woto yĩnga, sʋkr ning yɩɩl gʋlsdã sẽn da sʋkã paka roagdbã la kom-bɩɩsã wʋsg rũndã-rũndã.

Yɩɩl gʋlsdã sẽn maan a sʋkrã a lebg n leok-a-la a toor woto n yeele: “Ya a sẽn na n kẽn wa sẽn zems yãmb goama.” Hakɩka, Wẽnnaam Gomdã sẽn yaa Biiblã tara sor-wilgr sẽn yaa sõma ne kom-bɩɩsã la a tũub kɩtame tɩ bãmb wʋsg vɩɩm sɩd lebg sõma masã. (Yɩɩl Sõamyã 119:105) Bɩ d vaees kom-bɩɩs kẽer makre, bãmb sẽn nong Wẽnnaamã la b sẽn modgd n na n kell n tall pãng tẽebã wɛɛngẽ, dũni pʋgẽ yõ-noogrã la laogã nonglem sẽn paam pãngã.

B tara mi-beoog ne b roagdbã, b sor-wilgrã yĩnga

A Jacob Emmanuel reng n yɩɩ wakat fãa so-pakd sẽn na maan yʋʋm n yaool n na n tɩ tʋm a Zeova Kaset rãmbã Tʋʋmd will biru sẽn be Megsiko wã pʋgẽ. A tẽegda yẽ sẽn tall nonglem to-to ne Wẽnnaam tʋʋmdã ne mi-beoog n yetẽ: “Mam roagdbã n yɩ pipi n tall pãn-tusdg mam zug rẽnda yĩnga, baa ne saam-biis kẽer sẽn tar tõog tẽebã wɛɛngẽ m sẽn da tar zood ne me sẽn sɩd yɩ sõngr hal wʋsg n kõ-ma. Bãmb fãa kɩtame tɩ m nong koɛɛgã moonego. Ne bʋgsem b sõnga maam tɩ m dɩk so-tɩrgã. Mam zɩ n tags tɩ b weoogd-m lame ye.”

A Davɩɩd sẽn da zoe n yɩ wakat fãa so-pakd sẽn na maan yʋʋm wʋsgã tẽra a roagdbã sẽn wa n sɩng zall so-pakr tʋʋmdã tɩ yẽnda ne a yao wã ket n paoodẽ wã. A ba wã kũum poore a ma wã kẽnga taoor zall so-pakrã tʋʋmd pʋgẽ. A kell n gesa bãmb yell la a ket n moond koe-noogã me. “B zɩ n modg maam tɩ m yɩ so-pakd ye.” Woto la a Davɩɩd yeel-yã, la a paas tɩ “la wakat fãa so-pakrã tʋʋmd kõo tõnd zakã neb sũ-noog wʋsg hal n kɩt tɩ d lagm-n-taarã tus-m tɩ m maan wa bãmba me.” A roagdbã sẽn wilg-a sor sõma la b ges a yellã sẽn tall yõod ne-a wã wɛɛngẽ, a Davɩɩd yeelame: “Yʋng fãa m ma ra karemda Du paradis perdu au paradis reconquis sebrã tɩ tõnd kelgdẽ. * A sẽn da karemd-b to-to wã sõnga tõnd tɩ d ra nong tẽebã rɩɩb rɩɩbo.”

Naneb ne tigissã

Kom-bɩɩs sãnda getame tɩ yaa toog tɩ b tall naneb ne kiris-neb tigissã. B kẽngda tigissẽ wã, b roagdbã sẽn talld-b n kẽngã yĩng bala. La baasgo b sã n ket n kẽngd tigissẽ wã, wakat n wat n beẽ tɩ b na n nong tigissã. Ges-y-yã a Alfredo sẽn  sɩng wakat fãa so-pakrã t’a ra tar yʋʋm 11 balã. A sak n deegame t’a sẽn da wa n tar yʋʋma nu, a ra pa rat n kẽng tigissã, bala tigissã kẽesda yẽ gõeem, t’a roagdbã ra pa sakdẽ t’a gũs wakat kãng ye. A yeelame: “M sẽn da wa n bɩtẽ wã, bilf-bilfu tigissa kẽngr wa n noomã maam n yɩɩd pĩnda, sẽn tɩ yɩɩd fãa mam sẽn wa n zãms kareng la gʋlsgã poore, bala yaa wakat kãng la m da sɩng n leokd ne m toorẽ gom-biisi.”

Yʋʋm 17 bi-pugl a Cintia sẽn yaa wakat fãa so-pakdã wilga tũud-n-taar sẽn yaa sõma sẽn sõng yẽnda to-to t’a bɩɩs Wẽnnaam tʋʋmdã nonglem. A yeelame: “Zems-n-tar tallg ne saam-biisã la tigissã kẽngr wakat fãa wã kɩtame tɩ mam pa tagsdẽ tɩ m kongda m zo-rãmb nins sẽn be dũniyã pʋgẽ wã tũud-n-taare, la bũmb nins kom-bɩɩsã wʋsg sẽn nong n maand wakat fãa wala diskotɛk rãmbẽ wã kẽngrã ye. Tigissẽ wã, neb a taabã leoor kelgr la nebã sẽn bilgd b sẽn vɩɩmd yɛl ninsã ra kɩtdame tɩ m tʋll n kõ a Zeova m sẽn tara fãa, la m neeme tɩ m bi-bɩɩlmã n da yaa bõn-sõng sẽn tɩ yɩɩd mam sẽn da tara fãa. Woto, mam dɩka sard n na n kẽes m meng a tʋʋmdẽ wã.”

La baasgo a sak n deega woto: “Nand tɩ m deeg lisgã, wakat n da zĩnd tɩ m da mi n pa kẽngd tigissã ye, n pademd wakat fãa tɩ yaa m karengã yĩng n kɩt tɩ m mi n pa kẽngdẽ wã. Mam vaala tigiss yaka, la woto wa n sɩnga mam tẽebã komsgo. Mam da wa n sɩnga biribl a yen sẽn da pa a Zeova Kaset soab pʋgbo. La ne a Zeova songre m tõog n demsa yɛlã tɩ pa zãag zĩig ye.”

F toorẽ sardo

B sẽn sʋk a Pablo, sẽn yaa bi-bɩɩg a to sẽn be wakat fãa koe-moonegã tʋʋmd pʋgẽ wã tɩ bõe la yẽ tagsd tɩ yaa tɩlae sẽn na yɩl n bɩɩs nonglem ne Wẽnnaam gomda sɩdã, a yeelame: “Mam tẽedame tɩ yaa yɛl a yiibu: Meng Biibl zãmsgã maaneg wakat fãa, n ye paas yẽesem tallg koe-moonegã tʋʋmd pʋgẽ. Mam tara mi-beoog ne m roagdbã, b sẽn zãms-m sɩdã a Zeova wɛɛngẽ wã, bala m miime tɩ yãoã bal la bõn-tɩrg sẽn tɩ yɩɩd b sẽn da tõe n kõ maam. Baasgo, mam mengã sɩd segdame n kɩs sɩd ne bũmb nins sẽn kɩt tɩ mam nong a Zeova wã. La sẽn na yɩl tɩ yɩ woto, tara yõod hal wʋsg tɩ f bãng Biiblã sɩdã ‘yalmã la a zulmã.’ Yaa woto maaneg bal n kɩtd tɩ d tall nonglem sẽn yaa kãseng ne a Zeova Gomdã, sẽn yaa ‘wa bugum’ tõnd sũyã pʋsẽ n kɩtdẽ tɩ d rat n gom a yell ne neb a taabã. Yẽesem a woto tallg ne moonegã tʋʋmd na n kɩtame tɩ d tall naneb wʋsg ne sɩdã wakat fãa.”—Efɛɛz rãmba 3:18; Zeremi 20:9

A Jacob Emmanuel b sẽn gom a soab yell zugẽ wã leb n wilgame tɩ tara yõod tɩ f rɩk f toorẽ sard n maan a Zeova raabã. A yeelame tɩ yẽnda roagdbã pa tol n modg yẽ t’a reeg lisg ye. “Mam tẽedame tɩ manesem kãngã yɩɩ sõma n yɩɩda, bala m nee a bi-sõma wã masã. Wala makre, kom-bɩɩs sãnda mam sẽn da tar zood ne wʋsg lagma taab n dɩk sard n deeg lisg wakat yɛngã. La baa ne woto sẽn yaa sõma wã, m yãame tɩ kẽer reega lisgã tɩ b taab rɛɛgd bala, la pa kaoos la b yẽesmã ne Rĩungã tʋʋm maag ye. Mam nengẽ wã m roagdbã pa modg-m tɩ m  dɩk sard n kõ m meng a Zeova ye. Maam n dɩk sard kãng m toore.

Tigingã sõngre

Kom-bɩɩs sãnda zãmsa Wẽnnaam Gomdã sɩdã b toor tɩ pa tũ ne b roagdbã sõngr ye. La sɩd-sɩda, sã n yaa woto, pa nana tɩ f tõog n zãms n bãng sẽn yaa tɩrg la f kell n nang pãng a pʋgẽ ye.

A Noé tẽra sɩdã sẽn naf yẽnda hal wʋsg to-to. Hal a sẽn da ket n paoodẽ, a sũur da nong n yikda tao-tao, la a ra nong n tʋmda nen-kɛglem tʋʋma. A sɩnga Biiblã zãmsg a yʋʋm 14, t’a zʋgdã sɩng toeeng sõma hal t’a roagdbã meng ne b sẽn da pa sak Biiblã wakat kãnga wã tall mi-beoog a toeengã yĩnga. A Noé sẽn bɩ tẽebã wɛɛngẽ wã a wa n datame n kõ a vɩɩmã zãng fãa fasɩ Wẽnnaam tʋʋmdã pʋgẽ. Masã a bee wakat fãa so-pakrã tʋʋmdẽ.

Woto me, a Alejandro sɩng n nonga kiris-neb sɩdã t’a nan ket n paood wʋsgo, baa ne a roagdbã sẽn da nan pa nong sɩdã. A wilga a naneb ne sɩdã n yeele: “Mam roagdba yaa katolik rãmba, la b wuba maam tũudum kãng pʋgẽ. La baasgo mam nonglmã ne kominismã sẽn zãmsd nebã tɩ Wẽnd kãeyã paasame, sẽn mik tɩ egiliizã pa tõog n leok sʋgsg nins sẽn da sɩng n namsd maam hal m yãadmẽ wã. A Zeova siglgã sõnga maam tɩ m paam Wẽnnaam bãngrã. Rẽ sɩd fãaga mam yõorã, bala m sã n da pa zãmsẽ Biiblã m da na n lʋɩɩ yoobã, rã-tɩgrã bɩ dorgã pʋgẽ. M da na n kẽe revolusionɛɛr dãmb sull pʋgẽ meng tɩ wa wa ne yel-beed sẽn pa tõe n bãng n bilg m zugu.”

Wãn to la bi-bɩɩg tõe n nang pãng sɩdã baoob pʋgẽ la a gãd-a kãn-kãe tɩ pa tũ ne a roagdbã sõngre? Yaa vẽeneg tɩ tigingã pʋgẽ kãsem dãmbã la neb a taabã fãa modgr tara yõod wʋsgo. A Noé yeelame: “Mam zɩ n tags tɩ m yaa m yembr ye, bala a Zeova sɩd pẽe maam wakat fãa. Sẽn ye paase, mam paama saam-biisã ne saam-bi-pogsã teelg ne nonglem, tɩ kɩt tɩ b lebg mam ba rãmba, m ma rãmb la m saam-biis tẽebã wɛɛngẽ.” Masã a tʋmda Betɛllẽ n dɩkd a sẽka fãa n kẽesd Wẽnnaam daabã maaneg tʋʋmd pʋgẽ. A Alejandro me yeela woto: “Bũmb a ye sẽn kɩt tɩ mam tar mi-beoog yaa m sẽn paam bark n be tiging ningã pʋgẽ, t’a kãsem dãmbã get mam yell ne nonglmã yĩnga. Mam tara mi-beoog wʋsg ne manesem a woto b sẽn tall ne-ma, tɩ bala m sẽn da wa n tar yʋʋm 16 n sɩng Biiblã zãmsgã, mam me zɩɩmã ra kaeeda wa kom-bɩɩsã fãa. Tigingã pʋgẽ zagsã rãmb pa tol n bas-m ye. Wakat fãa ned n da be n deegd maam sãando. Rẽ ra pa sẽn na yɩl tɩ m zĩnd ne-b b yirã la m dɩ ne-b bal ye, la yaa sẽn na yɩl me n wilg tɩ b nong-m-la ne b sũur fãa.” A Alejandro lebga wakat fãa so-pakd sẽn yɩɩd yʋʋm 13 masã.

Neb kẽer me n tẽed tɩ tũudmã paka sẽn kʋʋl-bã bala. Baasg zãnga kom-bɩɩs wʋsg n zãms Biiblã sɩdã tɩ b ra ket n yaa yãase, n wa nong a Zeova, la b ket n tara kɩs-sɩd ne-a hal ne masã. A Davɩɩd goam nins sẽn be Yɩɩl Sõamyã 110:3 pʋgẽ wã pidsda kom-bɩɩs kãens zutu: “Yãmb neba na n dɩka b mens n kõ yãmb ne yamleoog daar ninga yãmb kʋʋnga sẽn na n tigim tãn-sõamyã zutã. Yãmb kom-bɩɩs na n waa yãmb nengẽ wa meenem sẽn yit yibeoogo.”

Sẽn na yɩl n zãms n bãng sɩdã la b kell n vɩɩmd a pʋgẽ ne kɩs-sɩda, kom-bɩɩsã segd n modga hal wʋsgo. Ad sɩd kõta sũ-noogo, d sẽn ne tɩ bãmb wʋsg kẽnd ne a Zeova siglgã, n pa vaand tigissã, la b zãmsd Biiblã neerã. Woto maaneg kɩtame tɩ b tõog n bɩɩs nonglem hakɩk ne Wẽnnaam Gomdã la a tʋʋmdã!—Yɩɩl Sõamyã 119:15, 16.

[Tẽngr note]