Saabã sẽn kolgdã, bɩ y yɩ sakdba

“Yaa [a Silo] la neba na n sake.”—SƖNGRE 49:10.

1. a) Pĩndã, a Zeova sakr da nong n tɩ loee ne bõe? b) Bãngr-gom-bʋg sẽn tɩ loe ne sakrã la a Zakoob togs-yã?

NAOOR wʋsgo, sak a Zeova rat n yeelame tɩ d sak neb nins a sẽn yãkã. Malɛgse, zak soben dãmba, bʋ-kaoodba, maan-kʋʋdba, no-rɛɛsdb la rĩm dãmb bee nin-kãens sʋka. B ra boonda Israɛll rĩm dãmbã geer meng t’a Zeova naam geere. (1 Kɩbaya 29:23, NW ) La zu-bʋko, Israɛll nanambs wʋsg kɩɩsa Wẽnnaam, n wa ne tood b mens la b soolmã neb zutu. La a Zeova pa bas neb nins sẽn sakd-a wã n pa kõ-b saagr ye. A bels-b lame n kãab-b t’a na n zĩniga Rĩm b sẽn pa tõe n kʋɩɩbe, sẽn da na n maan sũ-noog ne Wẽnnaam sakre. (Ezai 9:5, 6) Zak soab a Zakoob sẽn da wa n bẽed a yõor bãagã a togsa bãngr-gomd beoog-daar na-kãng wɛɛngẽ n yeele: “Naam dasaar ka na n bas a Zida ye. La naam kãnd ka na n yi yẽ nao wã tẽngr ye, hal tɩ sẽn soa bãmba [a Silo, NW ] wa. Yaa bãmb la neba na n sake.”—Sɩngre 49:10.

2. ‘Silo’ võor yaa bõe, la a soolmã yalem taa zĩ-bʋgo?

² “Silo” yaa Hebre gom-biig sẽn dat n yeel  tɩ: “A Soab ning sẽn so.” N-ye, dasaarã makda a Silo sẽn da na n paam sor n dɩ naam, tɩ naam kãndã makd a sẽn na n soog nebã. Sẽn paase, a naamã ra pa a Zakoob yagensã zut bal ye, la yaa “neba” fãa zutu. Woto zemsa ne kãabg ning a Zeova sẽn taas a Abrahaamã: “La fo [“yagengã,” NW ] na n tõoga b bɛɛba tẽnse. La yaa fo [yagengã] yĩng la dũniyã buud fãa na n paam barka.” (Sɩngre 22:17, 18) A Zeova wilga ‘yageng’ kãng sẽn ya a soabã vẽeneg yʋʋmd 29 wã, a sẽn da wa n zae Nazarɛt rao a Zezi ne vʋʋsem sõngã.—Luk 3:21-23, 34; Galat dãmba 3:16.

A Zezi pipi Soolmã

3. Naam bʋg la a Zezi paam a sẽn wa n dʋ saasẽ wã?

³ A Zezi sẽn da wa n dʋ saasẽ wã, a pa yɩ tao-tao n sɩng naamã rɩɩb dũniyã neb fãa zut ye. (Yɩɩl Sõamyã 110:1) Baasg zãnga, a paama “soolem” ne neb sẽn sak-a. Tʋm-tʋmd a Poll wilga soolem kãng sẽn ya a soab a sẽn wa n gʋls tɩ: ‘[Wẽnnaam] yiisa tõnd [kiris-neb nins sẽn paam vʋʋsem sõng zaeebã] lik pʋgẽ t’a ka le tar noor ne tõnd ye, la bãmb ninga tõnd bãmb Bi-nongra soolem pʋgẽ.’ (Kolos rãmba 1:13) Fãag-kãng sɩnga yʋʋmd 33 Pãntekotã, b sẽn wa n pʋdg vʋʋsem sõngã a Zezi karen-bi-sakdbã zutã.—Tʋʋma 2:1-4; 1 Pɩɛɛr 2:9.

4. Wãn to la a Zezi pipi karen-biisã wilg b sakre, la wãn-wãn la a Zezi bool bãmb sullã?

⁴ B sẽn yaa “Kirist tʋm-tʋmdba” yĩngã, karen-biis nins sẽn paam vʋʋsem sõngã zaeebã sakame n na n tigim neb a taab tɩ b lebg “buud a yembr” ne bãmba tẽeb soolem kãngã pʋgẽ. (2 Korẽnt dãmba 5:20; Efɛɛz rãmba 2:19; Tʋʋma 1:8) Sẽn paase, b ra segd n kell n maaname tɩ ‘bãmb koees fãa zems taaba tɩ welgr da zĩnd bãmb sʋka,’ sẽn na yɩl n ta b Rĩm a Zezi Kirist yam. (1 Korẽnt dãmba 1:10) B sullã tõr la ‘tʋm-tʋmd sẽn tũud sɩd la sẽn tar yamã.’—Matɩe 24:45; Luk 12:42.

B tara barka, b sẽn sakd Wẽnd ‘tʋm-tʋmdã’ yĩnga

5. Hal sẽn sɩng ne tẽn-kʋdem wẽndẽ wã, wãn to la a Zeova zãms a nin-buiidã?

⁵ Wakat fãa, a Zeova kõo a nin-buiidã karen-saam dãmba. Wala makre, Zʋɩf rãmbã sẽn yi Babilon n wa wã poore, a Ɛsdras la rap a taab sẽn tar tõog pa karem Wẽnnaam Tõogã bal tɩ nin-buiidã kelg ye, b ‘bilg-a lame tɩ b bãng Wẽnnaam Gomdã võore.’—Nehemi 8:8.

6, 7. Wãn to la tʋm-tʋmdã sull tũnug ne a Siglgã Taoor lʋɩtb Sull n kõ tẽebã rɩɩb wakat sẽn zems sasa, la bõe yĩng tɩ zems tɩ d sak tʋm-tʋmdã sulli?

⁶ Pipi yʋʋm kob-gĩndẽ wã, bãongã yell sẽn wa n yik yʋʋmd 49 wã, siglgã taoor lʋɩtb sull pʋʋsa yel-kãng poorẽ n dɩk sard sẽn tik Gʋlsg Sõamyã zugu. B sẽn wa n gʋls n wilg sard ning b sẽn dɩkã, tigimsã saka sor-wilgr ning b sẽn kõ wã n paam Wẽnnaam bark wʋsgo. (Tʋʋma 15:6-15, 22-29; 16:4, 5) Rũndã-rũndã me, tʋm-tʋmd sẽn tũud sɩdã tũnugda ne a Siglgã Taoor lʋɩtb Sull n kõt vẽnegr yel-kãsems zutu, wala kiris-ned pa-kẽesd-m-toogã, zɩɩmã sẽn tar yõod wʋsg Wẽnnaam nifẽ wã, dorgã la tabã wɛɛngẽ. (Ezai 2:4; Tʋʋma 21:25; 2 Korẽnt dãmba 7:1) A Zeova ninga a nin-buiidã barka, b sẽn sak a Gomdã la tʋm-tʋmd sẽn tũud sɩdã yĩnga.

⁷ Wẽnnaam nin-buiidã sẽn sakd tʋm-tʋmdã sullã wilgdame me tɩ b sakda Zusoab a Zezi Kirist. Sakr a woto paama pãng n paas rũndã-rũndã, a Zezi sẽn paam zu-sobend n paas wa a Zakoob sẽn togs bãngr-gomd a sẽn da wa n bẽed a yõor bãagã wakatã.

A Silo lebga tẽngã naab wa sẽn segde

8. Wãn to, la wakat bʋg la Kirist zu-sobendã yalg-yã?

⁸ A Zakoob bãngr-gomdã reng n togsame t’a Silo na n sooga ‘neba sẽn yaa sakdbã.’ Vẽenega, Kirist naamã ra na n yalg n zʋʋga tẽeb Israɛllã. A ra na n taa zĩ-bʋgo? Wilgri 11:15 leokda woto: ‘Dũniyã soolem fãa lebga tõnd Zusoaba la bãmb Kirist dẽnda, la bãmb na n dɩɩ naam wakat sẽn ka sɛta.’ Biiblã wilgdame t’a Zezi paama zu-sobend kãngã “wakat a yopoe” sẽn yaa “bu-zẽmsa wakat” saabẽ yʋʋmd 1914. * (Daniɛll 4:13, 14; Luk 21:24) Yʋʋm kãnga, Kirist “belmã” a naamã pʋgẽ wã sɩngame, t’a yaa Rĩm sẽn yaa Mesi ninsaalba nif sẽn pa ne, n ‘dɩt naam a bɛɛba sʋka.’—Matɩe 24:3, NW; Yɩɩl Sõamyã 110:2.

9. Bõe la a Zezi maan a sẽn deeg a naamã, la bõe la rẽ wa ne ãdem-biisã zutu, sẽn yɩɩd fãa a karen-biisã zutu?

⁹ A Zezi sẽn deeg a naamã, pipi bũmb a sẽn maan yɩɩ rig a Sʋɩtãan sẽn yaa wẽn-kɩɩs sẽn yɩɩd nebã fãa wã ne a zĩn dãmbã tɩ b “kẽng dũniyã zugu.” Rẽ tɛkã, malɛg-wẽns kãensã waa ne tood sẽn ka mak-n-taag ãdem-biisã zutu, n paas b sẽn maand tɩ nebã yel-manesem kɩt t’a Zeova sakr yaa toogã. (Wilgri 12:7-12; 2 Tɩmote 3:1-5) Sɩda, a Sʋɩtãan sẽn zabd ne neb nins tẽebã wɛɛngẽ n tɩ yɩɩdã ya a Zeova neb nins sẽn zae ne vʋʋsem sõngã, “sẽn sakd Wẽnnaam noore la sẽn tar a Zezi Kasetã,” la ‘piis a taabã’ sẽn ya a b tũud-n-taasã.—Wilgri 12:17; Zã 10:16.

10. Biiblã bãngr-gom-bʋs pidsg n sɩd wilgd t’a Sʋɩtãan pa zab ne kiris-neb hakɩkã n tõoge?

¹⁰ Baasg zãnga, a Sʋɩtãan pa na n tõog ye,  bala yaa ‘Zusoaba raarã’ la woto, la bũmb pa tõe n gɩdg a Zezi t’a pa ‘baas a tõogrã’ ye. (Wilgri 1:10; 6:2, NW ) Wala makre, a na n gesame tɩ tẽeb Israɛll neb 144000 bãnd ningr baase. A na n leb n kogla ‘kʋʋn-kãseng ned sẽn pa tõe n sõd n sɛ ye, sẽn yi soolem fãa, la buud fãa, la neb sẽn gomd goam toɛy-toɛya fãa’ wã. (Wilgri 7:1-4, 9, 14-16) La sẽn yaa lebend ne b tũud-n-taasã sẽn zae ne vʋʋsem sõngã, nin-kãensã na n lebga Kirist soolmã neb sẽn yaa sakdb tẽng zugu. (Daniɛll 7:13, 14) B belmã yen-yen tẽng zugã zoe n kõta kaset vẽeneg t’a Silo sɩd yaa Naab “dũniyã soolem fãa” zugu.—Wilgri 11:15.

Yaa masã la d segd n ‘sak koe-noogã’

11, 12. a) Ãnd bal n na n paam fãagr zãmaan wẽng kãngã saabẽ? b) Zʋg-wẽns bʋs la neb nins sẽn sakd “zamaana yam wẽnga” tara?

¹¹ Neb nins fãa sẽn dat vɩɩm sẽn pa satã segd n zãmsa sakre, bala Biiblã yeta vẽeneg tɩ “neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã” pa na n põs Wẽnnaam sũ-dokrã daar ye. (2 Tesalonik rãmba 1:8) La zãmaanã neb sẽn tar manesem wẽng la b kɩɩsd Biiblã noyã kɩtame tɩ koe-noogã sakr yaa toogo.

¹² Biiblã bilgda yam kãng sẽn kɩɩsd Wẽnnaamã n yetẽ tɩ yaa “zãmaana rãmb yam.” (1 Korẽnt dãmba 2:12, Sebr Sõngo) Tʋm-tʋmd a Poll gʋlsa Efɛɛz kiris-nebã sẽn vɩɩmd pipi yʋʋm kob-gĩndẽ wã n wilg yam kãng biisã nebã zut n yeele: “Y vɩɩnda bãmb pʋgẽ pĩnda tɩ y ra tũuda zamaana yam wẽnga soaba la a soaala, sẽn ket n tʋmda a tʋʋma ne tõatbã. Yaa tõnd fãa bal n pʋs n yɩ woto; d da tũuda d zʋg wẽnga, n tũud d yĩnga yamleoog la d tʋls-wẽnse n tol n wa lebg beem zãng ne Wẽnde, wa ninsaalb a taaba fãa.”—Efɛɛz rãmba 2:2, 3, Sebr Sõngo.

13. Wãn to la kiris-nebã tõe n sɩd n tõog n kɩɩs dũniyã yam, la rẽ wata ne nafa bʋse?

¹³ Zu-noogo, Efɛɛz kiris-nebã pa kell n pa kɩɩsg kãng yamã yembdẽ ye. Wall tɩ yɩ woto, b lebga Wẽnnaam kom-sakdse, b sẽn sak a vʋʋsem sõngã pãn-tusdg n kẽeb a bi-sõma wʋsgã yĩnga. (Galat dãmba 5:22, 23) Woto me, rũndã-rũndã, Wẽnnaam vʋʋsmã, sẽn yaa pãng ning sẽn yaa kãseng n yɩɩd ãndũniyã pʋgẽ wã, sõngda neb milyõ rãmb tɩ b lebgd neb sẽn sakd a Zeova, tɩ rẽ kɩt tɩ b ‘gũud b tẽeba pidsg hal tɩ wakat ta.’—Hebre dãmba 6:11; Zakari 4:6.

14. Wãn to la a Zezi keoog kiris-neb nins fãa sẽn vɩ yaoolem dayã ne yɛl takɩ sẽn na n mak b sakrã waoongo?

¹⁴ Ning-y y yamẽ me t’a Silo teenda tõnd sõma-sõma, tɩ yẽ ne a Ba wã pa na n bas bɛ ba a yembre, zĩn bɩ ninsaala, t’a mak tõnd sakrã tɩ yɩɩg d pãn-tõog ye. (1 Korẽnt dãmba 10:13) Sɩda, sẽn na yɩl n sõng tõnd d tẽebã zabr pʋgẽ, a Zezi sõdga zu-loees takɩ d sẽn na n seg yaoolem day kãensã sasa. A maana woto n tũnug ne lɛta a yopoe a sẽn kõ tʋm-tʋmd a Zã vẽnegr pʋgẽ wã. (Wilgri 1:10, 11) Yaa vẽeneg tɩ b ra tara sagls sẽn tar pãng kiris-nebã yĩng rẽ wẽnde, la b pidsg kãsengã yaa “Zusoaba daare,” yʋʋmd 1914 tɛkã. Woto yĩnga, ad sɩd zemsame tɩ d kelg koe-kãense! *

Gũus-y ne yam-kaalgo, yoob la laog nonglem

15. Bõe yĩng tɩ d segd n gũus ne yell ning sẽn paam Efɛɛz tigingã, la wãn to la d tõe n maan woto? (2 Pɩɛɛr 1:5-8)

¹⁵ A Zezi pipi lɛtrã a taas-a-la Efɛɛz tigingã. A Zezi sẽn pẽg tigingã a sũ-marã yĩng poore, a yeelame: “La yell ninga mam sẽn tar ne yãmba, yaa tɩ yãmb basa yãmb pipi nonglem.” (Wilgri 2:1-4) Rũndã-rũndã,  kiris-neb kẽer sẽn da tar yẽesem basa nonglem kãseng ning b sẽn da tar ne Wẽnnaamã. Nonglem basg a woto tõe n booga ned zood ne Wẽnnaam, la a soabã segd n demsa rẽ tao-tao. Wãn to la nonglem kãng tõe n ye paam pãnga? Yaa ne Biiblã zãmsg wakat fãa, tigissã waoongo, pʋʋsgã, la bʋgsgã. (1 Zã 5:3) Yaa sɩda, rẽ baoodame tɩ “y maan yãmb sẽn tõe tɛka,” la sɩd-sɩda, modg-kãng pa na n yɩ zaalem ye. (2 Pɩɛɛr 1:5-8) Vaees-m-meng ne pʋ-peelem sã n wilgdẽ tɩ y nonglmã maagame, bɩ y rems yɛlã tao-tao, n sak a Zezi sagl-kãngã: “Bɩ y tẽeg yãmb sẽn kong ne bũmb ninga la y tek yam n kos sugri n leb n maan yãmb pipi tʋʋma.”—Wilgri 2:5.

16. Tẽebã wɛɛngẽ, pãn-tusd bʋs sẽn yaa wẽns n da be Pɛrgam la Tiyatiir tigimsẽ wã, la bõe yĩng tɩ sagls nins a Zezi sẽn taas-bã zems rũndã-rũndã?

¹⁶ B pẽga kiris-neb nins sẽn da be Pɛrgam la Tiyatiirã b burkĩndã, b sũ-marã la b yẽesmã yĩnga. (Wilgri 2:12, 13, 18, 19) La neb kẽer sẽn da tar yam wẽng wa a Balaam la a Zezabɛll n da tall pãn-tusdg b zutu. Pĩnd Israɛllẽ wã, a Balaam la a Zezabɛll tũnuga ne yoob la a Baal balengã n kʋɩɩb buudã. (Sõdbo 31:16; 1 Rĩm dãmba 16:30, 31; Wilgri 2:14, 16, 20-23) La yaa wãn to ne tõnd wakatã sẽn yaa ‘Zusoabã daarã’? Pãn-tusd-wẽns a woto me beeme bɩ? N-ye, bala sẽn tɩ yɩɩd fãa yaa yoobã yĩng la b yiisd nebã Wẽnnaam nin-buiidã sʋka. Woto yĩnga, ad sɩd tara yõod wʋsg tɩ d lak d mens ne tũud-n-taar maaneg ne neb nins fãa sẽn tõe n kʋɩɩb ned n kẽes yoob pʋgẽ wã, yaa tigingã pʋgẽ tɩ yaa yɩng neb me! (1 Korẽnt dãmba 5:9-11; 15:33) Neb nins sẽn dat n yɩ a Silo soolmã nin-sakdsã me na n zãaga b mens ne reem wẽnsã la yoobã yɛl sẽn be sɛb zut bɩ b sẽn tũnugd ne ẽntɛrnetã n wilgdẽ wã.—Amos 5:15; Matɩe 5:28, 29.

17. Wãn to la Sard la Laodise nebã tagsg b tẽebã halhaal wɛɛngẽ yaa toor ne a Zezi tagsgã?

¹⁷ Sã n dok neb a wãna, Sard tigingã pa paam pẽgr baa bilf ye. A ra tara “yʋʋre,” sẽn dat n yeel tɩ nif gesg pʋgẽ b ra yetame t’a vɩɩme, la b yam-kaalgã tẽebã wɛɛngẽ ra paama pãng wʋsg hal t’a Zezi yeel t’a “yaa kũum.” Neba ra sakda koe-noogã wala rok-m-zugẽ yell bala. Ad sɩd yaa taal tɛkẽ! (Wilgri 3:1-3) Laodise tigingã me ra yaa woto. A ra wukda a meng ne tẽng zug arzɛgsã n yetẽ: “Tõnd tara arzɛgse,” la sã n yaa ne Kirista, b ra ‘namsdame, la b yaa nimbãan dãmba la naong rãmba la zoense la b yaa bɛɛla.’—Wilgri 3:14-17.

18. Wãn to la ned tõe n da lebg zal-zal tẽebã wɛɛngẽ Wẽnnaam nif-gesgẽ?

¹⁸ Rũndã-rũndã, kiris-neb sẽn da tar kɩs-sɩd me kɩɩsa woto. Tõe tɩ b basame tɩ dũniyã yam kɩt tɩ b wa tẽed masã tɩ tẽebã yɛl ye pa yãgb bũmbu, tɩ kɩt tɩ b lebg zal-zal tẽebã wɛɛngẽ n ye pa tar yẽesem ne Biiblã zãmsgo, pʋʋsgã, kiris-neb tigissã kẽnde, la koe-moonegã ye. (2 Pɩɛɛr 3:3, 4, 11, 12) Ad sɩd tara yõod wʋsg tɩ nin-kãensã sak Kirist saglgã n bao tẽebã arzɛgse, n-ye, n “da sãnem sẽn zug ne bugum [Kirist] nengẽ”! (Wilgri 3:18) ‘Maan neer tɩ tʋʋm sõama yɩ d arzɛgse, la yɩ kõatb sẽn kõt ne sũ-noogã’ bee arzɛgs hakɩk kãens sʋkã. D sã n sɩd bao tẽebã arzɛgs kãensã sẽn sɩd tar yõod wʋsgã, d ‘na n bĩnga arzɛgs beoog yĩnga yẽbgr ninga sẽn tar pãnga zugu, tɩ d tõe n paam vɩɩm sẽn yaa sɩda.’—1 Tɩmote 6:17-19.

B paama pẽgr b sakrã yĩnga

19. Yaa pẽgr la sagl-bʋs la a Zezi taas Smirn la Filadɛlfi kiris-nebã?

¹⁹ Smirn ne Filadɛlfi tigimsã yaa mak-kãsems sakrã wɛɛngẽ, bala a Zezi sẽn taas-b lɛta ninsã pa tar taal ningr baa bilf ye. A yeela neb nins sẽn be Smirnã tɩ: “Mam mii fo namsga fãa la fo naongã—mik fo yaool n gãee ne laogo.” (Wilgri 2:9, Sebr Sõngo) Ad b sɩd yaa toor wʋsg ne Laodise nebã sẽn da wukd b mens ne dũniyã arzɛgs n yaool n sɩd ra yaa naong rãmbã! Sɩda, a Sʋɩtãan Munaafɩɩk sũur da pa noom t’a yã nebã sẽn wilgd tɩ b tara kɩs-sɩd la b sakda Kiristã ye. Woto, a Zezi keoogame: “Bɩ y ra zoe rabeem ne bũmb nins sẽn na n nams yãmba ye. Gese, Sʋɩtãana na n kẽesa yãmb kẽer bi-bees roogẽ tɩ yãmb paam makre, la yãmb na n paama namsg rasem piiga. Bɩ y maan neer hal tɩ ta kũum, la mam na kõ yãmb vɩɩm maanfo.” (Wilgri 2:10) Woto me, a Zezi pẽga neb nins sẽn be Filadɛlfi wã n yeele: “Yãmb talla mam koɛɛgã [bɩ y saka maam] n ka kɩɩs mam yʋʋra ye. Mam wata tao-tao. Bɩ y tall bũmb nins yãmb sẽn tarã, tɩ ned ra reeg yãmb maanf ye.”—Wilgri 3:8, 11.

20. Wãn to la neb milyõ rãmb kell n tall a Zezi goama rũndã-rũndã, baa ne yel-bʋs taoore?

²⁰ “Zusoaba daare,” sẽn sɩng yʋʋmd 1914, kell sẽn tar kɩs-sɩd la b tũud-n-taasã sẽn yaa piis a taabã nebã sẽn ta neb milyõ rãmb masã wã me ket n tũuda a Zezi goama n moond koe-noogã ne yẽesem la b gãt b burkĩndã sõma. Wala b saam-biisã pipi yʋʋm kob-gĩndẽ wã, kẽer namsa b sẽn sak Kiristã yĩnga, hal tɩ b kẽes-b bãens rot la nams-bɛɛg zagsẽ mengã. Kẽer kell n talla a Zezi goama n tall ‘nif sẽn yaa sõma,’ baa ne neb sẽn tar arzɛgs la rat-tɩ-loog rãmb sẽn gũbg-bã. (Matɩe 6:22, 23) N-ye, zĩig fãa la yell buud fãa taoore, ne b sakrã, kiris-neb hakɩkã ket n noogda a Zeova sũuri.—Yelbũna 27:11.

21. a) Tẽeb tʋʋm-bʋg sẽn yaa tɩlae la tʋm-tʋmdã sull na n ket n tʋmdẽ? b) Wãn to la d tõe n wilg tɩ d sɩd rat n saka a Silo?

²¹ D sẽn kolgd to-kãsengã, ‘tʋm-tʋmd sẽn tũud sɩd la sẽn tar yamã’ kell n dɩka sard sẽn pa vigsd n pa na n bas Zusoab sẽn yaa Kiristã sakr ye. Tẽebã rɩɩb seglg Wẽnnaam zakã neb yĩng wakat sẽn zems sasa bee rẽ sʋka. Rẽnd bɩ d kell n tall mi-beoogo, a Zeova siglgã sẽn yaa sõma wʋsg sẽn tũud a sor-wilgrã la bũmb nins sigl-kãng sẽn kõtã yĩnga. Yaa woto la d wilgd d sakr ne a Silo, sẽn na n keo a soolmã nin-sakds fãa n kõ-b vɩɩm sẽn pa satã.—Matɩe 24:45-47; 25:40; Zã 5:22-24.

[Tẽngr not rãmbã]

 Y tẽrame bɩ?

• Wa a Zakoob sẽn da reng n togs a yõor bãagã sasa wã, tʋʋm bʋg la a Zezi ra segd n pidsi?

• Wãn to la d sakd n deeg t’a Zezi la a Silo, la yam bʋg la d ka segd n talle?

• Sagl-bʋg sẽn zems tõnd wakatã yĩng n be lɛta nins b sẽn taas Wilgr sebrã pʋgẽ tigims a yopoe wã pʋsẽ?

• Wãn to la d tõe n dɩk togs-n-taar ne neb nins sẽn da be pĩnd Smirn la Filadɛlfi tigimsẽ wã?

[Zãmsgã sogsgã]

[Foto rãmba, seb-neng 28]

A Zeova ningda a nin-buiidã barka, b sẽn sakd “tʋm-tʋmd” sẽn tũud sɩdã yĩnga

 [Foto, seb-neng 29]

A Sʋɩtãan pãn-tusdgã kɩtame tɩ Wẽnnaam sakrã yaa toogo

[Foto rãmba, seb-neng 31]

Zems-n-taar sẽn tar pãng ne a Zeova sõngda tõnd tɩ d sak-a