A Zeova geta yãmb yelle
A Zeova geta yãmb yelle
“Bɩ y bas yãmb yɩɩra fãa ne [Wẽnnaam]; tɩ bõe, bãmb menga geta yãmb yelle.”—1 PƖƐƐR 5:7.
1. Zĩ-kãseng bʋg wɛɛngẽ la a Zeova la a Sʋɩtãan yaa lebend zãng fasɩ ne taaba?
A ZEOVA ne a Sʋɩtãan yaa lebend zãng fasɩ ne taaba. Ned ning fãa sẽn pẽnegd a Zeova a Sʋɩtãan kis-a lame. B togsa welg-kãng sebr a yembr pʋgẽ. Sẽn tɩ loe ne a Sʋɩtãan tʋʋmã wa b sẽn wilg-a to-to Biiblã pʋgẽ a Zoob sebrẽ wã, bãngr sebr a ye (Encyclopædia Britannica, yʋʋmd 1970 rẽndã) yetame: ‘A Sʋɩtãan tʋʋmd ya a yeeb tẽngã zug n bao tʋʋm bɩ neb n ning taale. Woto, a tʋʋmdã yaa lebend ne “Zusoabã nin” sẽn saagd tẽngã gill n na n paas neer maanegã pãngã. (2 Kɩbaya. 16:9) A Sʋɩtãan geta tʋʋm sõma nins ninsaalbã sẽn maandã ne yam-wẽngã, la Wẽnnaam bas-a lame t’a mak sõmblem manesem kãng yẽ zu-sobend la a sor-wilgr pʋgẽ, tɩ zems ne kogs nins Wẽnnaam sẽn yãkã.’ N-ye, ad sɩd yaa welg-kãseng meng n be manesem kãensã a yiibã sʋka!—Zoob 1:6-12; 2:1-7.
2, 3. a) Wãn-wãn la gom-biig ning sẽn yaa “Munaafɩɩkã” võor sɩd zems ne bũmb ning sẽn paam a Zoobã? b) Wãn to la Biiblã wilgd t’a Sʋɩtãan ket n dõta a Zeova sõgen dãmbã sẽn be tẽng zugã?
2 Gom-biig ning sẽn yaa “Munaafɩɩkã” yita Gerɛk gom-biigẽ sẽn dat n yeel tɩ “rõta,” “tẽn-kãn-neda.” A Zoob sebrã wilgdame t’a Sʋɩtãan rõda a Zeova kɩs-sɩd sõgen a Zoob t’a maanda Wẽnd raabã rat-m-yembr yĩnga, n yeele: “A Zoob zoeta yãmb zaalem laa?” (Zoob 1:9) A Zoob sebrã kɩbar wilgdame tɩ baa ne a makrã la a zu-loeesã, a Zoob kell n talla a Zeova pẽnegr bala. (Zoob 10:9, 12; 12:9, 10; 19:25; 27:5; 28:28) A Zoob makrã poore, a yeela Wẽnnaam tɩ: “Mam da wʋma yãmb kɩbare. La masã, mam nin yãa yãmba.”—Zoob 42:5.
3 A Sʋɩtãan basa Wẽnnaam sõgen dãmbã sẽn yaa kɩs-sɩd dãmbã rõdg a Zoob wakatã tɛk bɩ? Ayo. Wilgr sebrã wilgdame tɩ wakat kãngã sẽn yaa saabã sasa wã, a Sʋɩtãan ket n dõta Kirist saam-biis sẽn zae ne vʋʋsem sõngã la b tũud-n-taasã sẽn tar kɩs-sɩdã. (2 Tɩmote 3:12; Wilgri 12:10, 17) Woto, tõnd fãa sẽn yaa kiris-nebã, tara yõod wʋsg tɩ d sak d Wẽnnaam a Zeova sẽn get d yellã, n maan a raabã nonglem yĩnga, tɩ woto wilg t’a Sʋɩtãan dõt-d-la zaalem bala. D sã n maan woto, d na n nooga a Zeova sũuri.—Yelbũna 27:11.
A Zeova baood n na n sõnga tõndo
4, 5. a) Sẽn yaa lebend ne a Sʋɩtãana, yaa bõe la a Zeova baood tẽngã zugu? b) Tõnd sã n dat t’a Zeova maan-d lohorem, yaa bõe la d segd n maan tɩlae?
4 Munaafɩɩkã gõoda tẽngã zugu, n baood n na n dõd la a sãam neda. (Zoob 1:7, 9; 1 Pɩɛɛr 5:8) Sẽn yaa lebend ne rẽ, a Zeova baoodame n na n sõng neb nins sẽn dat pãng a nengẽ wã. No-rɛɛs a Hanani yeela rĩm a Aza: “Zusoaba nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.” (2 Kɩbaya 16:9) Ad a Sʋɩtãan sẽn yaa yel-gẽnes sẽn tar kisgrã yaa toor wʋsg ne a Zeova sẽn get tõnd yell ne nonglmã!
5 A Zeova pa gũusd tõnd wakat fãa sẽn na yɩl n yã kongr fãa d sẽn maan ye. Yɩɩl gʋlsdã gʋlsame: “Zusoaba, mam soaala, yãmb sã n tẽeg yel-wẽna n ka base, ãnda n na n yalse?” (Yɩɩl Sõamyã 130:3) Leokrã yaa: ned ba a ye. (Koɛɛg Soaba 7:20) Tõnd sã n kolg a Zeova ne d sũyã fãa, a nifã na n geta tõnd wakat fãa, pa sẽn na yɩl n ning-d taal ye, la yaa sẽn na yɩl n ges modgr ning tõnd sẽn maandã, la a reeg tõnd pʋʋsgã n sõng-d la a kõ-d sugri. Tʋm-tʋmd a Pɩɛɛr gʋlsa woto: “Zusoaba geta nin-tɩrse, la b wʋmda bãmb pʋʋsgo. La Zusoaba kɩɩsda neb nins sẽn maand wẽngã.”—1 Pɩɛɛr 3:12.
6. Bõe yĩng tɩ bũmb ning sẽn paam a Davɩɩdã yaa belsg la keoogr n kõ-do?
6 A Davɩɩd ra pa zems zãng ye, la a maana yel-wẽn-kãsemse. (2 Sãmwɛll 12:7-9) La pʋʋsg pʋgẽ, a zuka sẽn be a sũurẽ wã fãa n togs a Zeova. (Yɩɩl Sõamyã 51:1-14) A Zeova kelga a Davɩɩd pʋʋsgã n kõ a sugri, baa ne a yel-wẽndã bi-wẽns sẽn wa a zugã. (2 Sãmwɛll 12:10-14) Woto segd n yɩɩ belsg la keoogr n kõ tõndo. Ad sɩd kengda d pelse, d sẽn mi t’a Zeova sakame n na n kõ d yel-wẽnã sugri, d sã n sɩd teka yam n kos sugrã, la yaa d bãng me tɩ yel-wẽnã nong n wata ne bi-wẽnse. (Galat dãmba 6:7-9) Tõnd sã n dat n kolg a Zeova, d segd n zãaga d meng ne bũmb buud fãa sẽn pa noom-a wã wa d sẽn tõe tɛka.—Yɩɩl Sõamyã 97:10.
A Zeova boonda a nin-buiidã tɩ b wat a nengẽ
7. Yaa nin-bʋs buud la a Zeova baooda, la wãn to la a takd-b n wat a meng nengẽ?
7 A Davɩɩd gʋlsa woto a yɩɩll a yembr pʋgẽ: “Zusoaba yaa kãsenga; la baoosgo, bãmb nanda sik-m-mens rãmba la b geta tɩtaam dãmba yɩɩga.” (Yɩɩl Sõamyã 138:6) Woto me, yɩɩll a to yetame: “Ãnda n wẽnd wa Zusoaba [a Zeova, NW ] tõnd Wẽnnaam sẽn zao yĩngri n get saasẽ la dũniyã? Bãmb zẽkda ned sẽn ka pãng t’a yi wubsg pʋgẽ.” (Yɩɩl Sõamyã 113:5-7) N-ye, ãndũniyã Naand sẽn tõe fãa wã sikda a meng n get tẽngã, la a ninã nee “sik-m-mens rãmba,” ‘neb nins sẽn ka pãngã,’ sẽn yaa neb nins sẽn “wõosd n yãbd bõn-wẽns nins sẽn maand tẽnga pʋgẽ wã yĩnga.” (Ezekɩɛll 9:4) A tũnugda ne a Biriblã n takd neb a woto n wat a nengẽ. A Zezi sẽn da wa n be tẽng zugu a yeelame: “Ned ka tõe n wa mam nengẽ tɩ ka m Ba sẽn tʋm-a maama n bool-a ye. . . . Ned ka tõe n wa mam nengẽ tɩ ka m Ba n bool-a ye.”—Zã 6:44, 65.
8, 9. a) Bõe yĩng tɩ tõnd fãa segd n wa a Zezi nengẽ? b) Bõe n yaa kãseng wʋsg rondã wɛɛngẽ?
8 Ãdem-biisã fãa segd n kẽnga a Zezi nengẽ la b tall tẽeb ne a maoongã sẽn yaa rondã, bala b roga ne yel-wẽna, n zãr ne Wẽnnaam. (Zã 3:36) B segd n paama zems-n-taar ne Wẽnnaam. (2 Korẽnt dãmba 5:20) Wẽnnaam pa gũ tɩ yel-wẽn-maandbã bõos-a t’a maan seglse, tɩ ne rẽ maasem bɩ b tõog n paam laafɩ ne-a ye. Tʋm-tʋmd a Poll gʋlsame: “Wẽnnaam wilga bãmb nonglem tõnd yĩnga, tɩ tõnd sẽn da ket n yaa yel-wẽna rãmba Kirist kii tõnd yĩnga. Tɩ bõe, a sã n yaa tɩ tõnd sẽn da yaa bɛɛba wakate, Wẽnnaam Biiga kũum yiisa yell ninga sẽn da be tõnd ne Wẽnnaam sʋkã, tɩ yella sɛ tõnd ne Wẽnnaam sʋkã, sẽn yɩɩda, tõnd na n paama fãagre bãmb Biiga vɩɩma yĩnga.”—Rom dãmba 5:8, 10.
9 Tʋm-tʋmd a Zã wilgame tɩ b sẽn yet tɩ Wẽnnaam kɩtdame tɩ ninsaalbã ne yẽ zemsd taabã sɩd yaa sɩda. A gʋlsa woto: “Wẽnnaam sẽn tʋm bãmb Biiga sẽn-ka-to dũniyã pʋgẽ tɩ tõnd paam vɩɩm bãmb maasem yĩnga wilgdame tɩ bãmb nonga tõndo. La nonglem kãng ka tõnd sẽn nong Wẽnnaam ye, yaa bãmb n nong tõndo n tʋm bãmb Biiga tɩ b yɩ maoong tõnd yel-wẽna yĩnga.” (1 Zã 4:9, 10) Yaa Wẽnnaam n yɩ pipi n maan woto, lakae pa ninsaalbã ye. Rẽ yĩnga y pa rat n kolg Wẽnnaam sẽn wilg nonglem wʋsg woto ne “yel-wẽn-maandbã,” sẽn da yaa “bɛɛb mengã” sɩda?—Zã 3:16.
D segd n baoa a Zeova
10, 11. a) Bõe la d segd n maan n bao a Zeova? b) Wãn to la d segd n ges a Sʋɩtãan dũniyã?
10 Sɩda, a Zeova pa modgd tõnd tɩ d wa a nengẽ ye. D segd n bao-a lame, ‘n babl ne d pãng tɛka n yã bãmba, tɩ bõe, bãmb ka zãr ne tõnd fãa ye.’ (Tʋʋma 17:27) D segd n sak n deegame t’a Zeova tara sor n na n bao tɩ d sak-a. Karen-biig a Zak gʋlsame: “Dẽ yĩnga, bɩ y sak Wẽnnaam. Kɩɩs-y Sʋɩtãana, la yẽ na zoe n bas yãmba. Bɩ y kolg Wẽnnaam, la bãmb na kolg yãmba. Yel-wẽna rãmba, bɩ y nudg y nusi. La yam a yiib rãmba, bɩ y maneg y sũyã tɩ yɩ sõama.” (Zak 4:7, 8) D pa segd n maan sãmb-sãmb la d yãk yam ne manesem sẽn pa vigsd n kɩɩs Munaafɩɩkã la d zĩnd a Zeova poorẽ ye.
11 Woto rat n yeelame tɩ d zãag d mens ne a Sʋɩtãan dũni wẽngã. A Zak gʋlsa woto yɛsa: “Yãmb ka mi tɩ zood ne dũniyã yaa beem me Wẽnnaam la? Woto yĩnga, ned ninga sẽn dat n maan zood ne dũniyã yẽ yaa Wẽnnaam bɛ.” (Zak 4:4) Sẽn yaa lebende, d sã n dat n yɩ a Zeova zo-rãmba, yaa d bãng tiir t’a Sʋɩtãan dũniyã na n kisg-d lame.—Zã 15:19; 1 Zã 3:13.
12. a) Belsg gom-bʋs la a Davɩɩd gʋls-yã? b) Keoog bʋg la a Zeova tũnug ne no-rɛɛs a Azaria n maane?
12 A Sʋɩtãan dũniyã sã n kɩɩsd tõnd yell sẽn yaa takɩ pʋgẽ, sẽn yɩɩd fãa d segd n kolga a Zeova pʋʋsg pʋgẽ, n kos a sõngre. A Davɩɩd sẽn yã t’a Zeova fãag-a-la naoor wʋsgã gʋlsa woto tɩ kõt tõnd belsgo: “Zusoaba pẽnegda neb nins sẽn boond bãmbã, la neb nins sẽn boond bãmb ne sɩdã. Bãmb kõta b zoɛtba b sẽn dat bũmb ninga. La bãmb wʋmda bãmb kɛlenga n fãagd bãmba. Zusoaba gũuda neb nins sẽn nong bãmbã, la bãmb na n sãama nin-wẽnse.” (Yɩɩl Sõamyã 145:18-20) Yɩɩn-kãngã wilgdame t’a Zeova tõe n fãaga tõndo, d yembr-yembrã sã n paam makre, la t’a na n fãaga a nin-buiidã “to-kãsenga” wakate. (Wilgri 7:14) A Zeova na n kell n pẽnega tõndo, d sã n paa n pẽneg-a. ‘Wẽnnaam vʋʋsmã’ (NW ) tusa no-rɛɛs a Azaria t’a togs sɩd kãseng kãngã: “Yãmb sã n be ne Zusoabã, bãmb bee ne yãmba. Yãmb sã n bao bãmba, y na n yã-b lame. La yãmb sã n bas bãmba, bãmb me na n basa yãmba.”—2 Kɩbaya 15:1, 2.
A Zeova segd n sɩd yɩɩ vẽeneg ne tõndo
13. Wãn to la d tõe n wilg t’a Zeova sɩd yaa vẽeneg ne-do?
13 Tʋm-tʋmd a Poll gʋlsa a Moiiz wɛɛngẽ n yeel t’a “talla tẽeb kãn-kãe wa a yãa neba nin sẽn ka tõe n yã a soabã.” (Hebre dãmba 11:27) Yaa vẽeneg t’a Moiiz zɩ n yã a Zeova ne a nin ye. (Yikri 33:20) La a Zeova ra yaa vẽeneg ne-a hal tɩ ra yaa wa a yã-a lame. Woto me, a Zoob makrã poore, a tẽebã ninã yã a Zeova vẽeneg n yɩɩda, la rẽ wã yaa Wẽnnaam sẽn basd tɩ makr wat a kɩs-sɩd sõgen dãmbã zut n yaool n zɩ n yĩm-b yellã yĩnga. (Zoob 42:5) B yeelame t’a Enok la a Nowe ra “kẽnda ne Wẽnnaam.” B maana woto b sẽn bao n ta Wẽnnaam yam la b sak-a wã. (Sɩngre 5:22-24; 6:9, 22; Hebre dãmba 11:5, 7) A Zeova sã n yaa vẽeneg ne tõnd wa a sẽn da yaa to-to ne a Enok, a Nowe, a Zoob la a Moiizã, d na n ‘tẽega a yell’ d soayã fãa pʋsẽ, la a na n “demsa [tõnd] sorã.”—Yelbũna 3:5, 6.
14. “Gãd” a Zeova rat n yeelame tɩ bõe?
14 Nand tɩ Israɛll nebã kẽ Kãabg Tẽngẽ wã, a Moiiz sagl-b-la woto: “Bɩ y tũ Zusoab a Wẽnnaam la y zoe bãmba. Sak-y bãmb tõodã n kelg b koɛɛgã la y waoog bãmba n gãd-b kãn-kãe.” (Tõodo 13:5) B ra segd n tũu a Zeova, n zoe-a, n kelg a koɛɛgã la b gãd-a kãn-kãe. Gom-biig ning b sẽn lebg tɩ “gãda” wɛɛngẽ, Biiblã mit a yembr n yeel tɩ “Hebre buud-gomdã wilgdame t’a rat n yeelame tɩ zems-n-taar sẽn tar pãng wʋsgo.” Yɩɩl gʋlsdã yeelame: “Zusoaba zood yaa neb nins sẽn zoet bãmba yĩnga.” (Yɩɩl Sõamyã 25:14) Tõnd me tõe n paama zood sẽn tar pãng woto la sẽn tar yõod wʋsg ne a Zeova, a sã n sɩd yaa vẽeneg ne tõndo, la d sã n nong-a wʋsg hal tɩ kɩt tɩ d pa rat n maan bũmb sẽn pa noom-a ye.—Yɩɩl Sõamyã 19:10-15.
Yãmb miime t’a Zeova geta d yell bɩ?
15, 16. a) Wãn to la Yɩɩl 34 soabã wilgd t’a Zeova geta tõnd yelle? b) Bõe la d segd n maane, sã n yaa toog ne-d tɩ d tẽeg a Zeova sõmblem tʋʋmã a sẽn maan n sõng tõndã?
15 A Sʋɩtãan sɩlem manesem a yembr ya a kɩt tɩ d yĩm tɩ d Wẽnnaam a Zeova geta a kɩs-sɩd sõgen dãmbã yell wakat fãa. Israɛll rĩm a Davɩɩd ra mii sõma t’a Zeova ra kogend-a lame, baa sasa ning a sẽn seg zu-loees sẽn da na n tũ ne a yõorã. A sẽn da wa n maan wa a yaa gãeeng Gat rĩm a Akɩs taoorã, rẽ poore, a maana yɩɩll sẽn be rasãnd wʋsgo, sẽn tar tẽeb gom-kãensã: “Tɩ d lagem n pẽg Zusoabã la d zẽk bãmb yʋʋre. Mam baooda Zusoabã la bãmb leokda maam n yolsd maam ne m dabeema fãa. Zusoaba malɛk rãmb gũbgda neb nins sẽn zoet bãmbã n fãagd bãmba. Bɩ y lemb n gese tɩ Zusoaba yaa sõama. Bark bee ned ninga sẽn baood zĩ-lilldg bãmb nengẽ wã zugu. Zusoaba pẽnegda neb nins sũy sẽn sãamã, la bãmb fãagda sũ-pa-noom dãmbã. Nin-tɩrg paamda tood wʋsgo, la Zusoaba yiisda yẽnda bãmb fãa pʋgẽ.”—Yɩɩl Sõamyã 34:4, 5, 8, 9, 19, 20; 1 Sãmwɛll 21:11-16.
16 Yãmb kɩsa sɩd t’a Zeova tõe n fãagame bɩ? Yãmb kɩsa sɩd t’a malɛk rãmbã tõe n kogla tõnd bɩ? Yãmb mengã maana kaset t’a Zeova yaa sõma bɩ? Yaoolem a Zeova sẽn wilg a sõmblem ne yãmb tɩ y sɩd bãng yaa wakat bʋg sasa? Mak-y n tẽeg-y-yã. Yɩɩ yaoolem zak ning yãmb sẽn kẽ koe-moonegã wakate, sasa ning yãmb sẽn da tagsd tɩ y ye pa tõe n moon n paasã bɩ? Tõe tɩ wakat kãngã y maana sõsg sẽn kengd tẽeb wʋsg ne nedã. Y tẽegame n pʋʋs a Zeova barka, a sẽn kõ yãmb pãng ning y sẽn datã n paase, la a sẽn ning-y barkã sɩda? (2 Korẽnt dãmba 4:7) La tõeeme n yaa toog ne-y tɩ y tẽeg sõmblem tʋʋmd takɩ a Zeova sẽn maan y yĩnga. Tõe tɩ y segd n tẽega yɛl sẽn zĩnd semene, kiuugu, yʋʋmd sẽn looge, bɩ sẽn yɩɩd woto yelle. Sã n yaa woto, bõe yĩng tɩ y pa na n maan modgr n kolg a Zeova n mak n ges a sẽn wilgd yãmb sor to-to wã? Tʋm-tʋmd a Pɩɛɛr sagla kiris-nebã woto: “Bɩ y sik yãmb mens Wẽnnaam sẽn yaa pãng soaba taoore. . . . Bɩ y bas yãmb yɩɩra fãa ne bãmba; tɩ bõe, bãmb menga geta yãmb yelle.” (1 Pɩɛɛr 5:6, 7) Sɩda, na n ling-y-la wʋsgo, y sã n wa bãng a sẽn get yãmb yell wʋsg to-to ningã!—Yɩɩl Sõamyã 73:28.
Ket-y n baood a Zeova
17. Bõe n yaa tɩlae, d sã n dat n ket n baood a Zeova?
17 Kell n tall d zoodã ne a Zeova wã segd n yaa bũmb d sẽn maand wakat fãa. A Zezi yeela woto pʋʋsg a sẽn taas a Ba wã pʋgẽ: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.” (Zã 17:3) Bãng a Zeova la a Biriblã baoodame tɩ d modg wakat fãa. Pʋʋsgã la vʋʋsem sõngã sõngr yaa tɩlae ne-d sẽn na yɩl tɩ d wʋm “Wẽnnaam yel-zulumsã” võore. (1 Korẽnt dãmba 2:10, NW; Luk 11:13) D leb n data ‘tʋm-tʋmd sẽn tũud sɩd la sẽn tar yamã’ sor-wilgri, sẽn na yɩl n dɩlg d yamã ne tẽebã rɩɩb b sẽn kõt ‘wakat sẽn zemsã.’ (Matɩe 24:45) A Zeova tũnugda ne bãmb n sagend tõnd tɩ d karem a Gomdã daar fãa, tɩ d kẽng d kiris-neb tigissã n da vaale, la d kẽes d meng sõma n moon “Wẽnnaam soolem koe-noog kãngã.” (Matɩe 24:14) D sã n maan woto, d na n ket n baooda d Wẽnnaam a Zeova sẽn get d yellã.
18, 19. a) D segd n dɩka sard sẽn pa vigsd n maan bõe? b) Tõnd sã n sɩd rɩk sard sẽn pa vigsd n kɩɩs Munaafɩɩkã la d ket n baood a Zeova, wãn to la d na n paam barka?
18 A Sʋɩtãan maanda a sẽn tõe fãa n na n wa ne namsgo, kɩɩsg la weoogr sẽn yit zĩis toɛy-toɛy a Zeova nin-buiidã zugu. A makdame n na n sãam tõnd bãanã la d yʋ-noogã Wẽnnaam taoore. A pa rat tɩ d kẽng taoor ne d tʋʋmdã n yã pʋ-peelem dãmbã n sõng-b tɩ b wa teel a Zeova ãndũniyã naam sẽn ka to wã yẽ a Sʋɩtãan sẽn kɩɩsã ye. La d segd n dɩka sard sẽn pa vigsd tɩ d na n kell n talla kɩs-sɩd ne a Zeova, n teeg-a t’a fãag-d ne wẽng soabã. D sã n bas tɩ Wẽnnaam Gomdã wilg-d sore, la d sã n ket n tʋmd ne a siglgã tõnd nif sẽn tõe n yã wã, d tõe n kɩsa sɩd wakat fãa t’a na n sõng-d lame.—Ezai 41:8-13.
19 Woto yĩnga, bɩ d fãa rɩk sard sẽn pa vigsd n kɩɩs Munaafɩɩkã la a sɩlem tʋʋma, tɩ wakat fãa bɩ d baood Wẽnnaam a Zeova d sẽn nong wʋsgã, sẽn na n ‘kɩt tɩ d kɩ yẽga, n paas tõnd pãngã.’ (1 Pɩɛɛr 5:8-11) Woto, d na n ‘talla d mens Wẽnnaam nonglem pʋgẽ, tõnd sẽn gũud tõnd Zusoab a Zezi Kirist nimbãan-zoeerã sẽn na n yɩ vɩɩm sẽn ka sɛtã.’—Ziid 21.
Wãn to la y na n leokẽ?
• Gerɛk gom-biig ning b sẽn lebg tɩ “Munaafɩɩkã” võor yaa bõe, la wãn to la Munaafɩɩkã manesem zems ne yʋ-kãngã?
• A Zeova sẽn get tẽngã nebã to-to wã wɛɛngẽ wãn to la a yaa toor ne Munaafɩɩkã?
• Bõe yĩng tɩ ned segd n sak rondã n tõog n kolg a Zeova?
• “Gãd” a Zeova rat n yeelame tɩ bõe, la wãn to la d tõe n ket n baood-a?
[Zãmsgã sogsgã]
[Foto, seb-neng 15]
Baa ne a Zoob makrã fãa, a wa n bãngame t’a Zeova ra geta a yelle
[Foto rãmba, seb-neng 16, 17]
Biiblã kareng daar fãa, kiris-neb tigissẽ wã kẽngr wakat fãa, la moon ne yẽesmã tẽegda tõnd t’a Zeova geta d yelle