Bõe yĩng tɩ yaa toog wʋsg tɩ f kos sugri?

YƲƲMD 2000, sẽoog kiuugu, Etazĩni tẽngã, Kaliforni noy yiisdbã sull yiisa noor sẽn yolsd ned ning fãa sẽn tall nimbãan-zoeer n sõng ned a to a sẽn maan aksɩdã ne t’a paam sãmpogre. Bõe yĩng tɩ b yiis no-kãngã? B mikame tɩ aksɩdã sã n maan tɩ ned pogl bɩ bũmb sãame, neba pa nong n dat n sak n deeg b kongrã, sẽn na n yɩl tɩ b ra wa bool-b bʋʋd ye. La neb nins sẽn get tɩ neb a taabã kongame n segd n kos sugr tao-tao wã tõe n sãama b sũyã, tɩ kɩt tɩ aksɩdã sẽn pa zem bũmb tõe n wa wa ne goam wʋsgo.

Yaa vẽeneg tɩ pa tɩlae tɩ f kos sugr aksɩdã sẽn pa tũ ne f sabaab yĩng ye. La wakat ninga yaa yam tʋʋmd tɩ d gũus ne d sẽn yetã. Yel-bũn-kʋdr yeta woto: “Ned sã n gomd wʋsgo, a ka tõe n ka kong ye. Ned sã n gũusd ne a goama, a tara yam.” (Yelbũna 10:19; 27:12) La baa y sã n tar bʋʋm, y tõe n kõ y sõngre la y tall manesem sẽn zemse.

Baasg zãnga yaa vẽeneg tɩ wʋsg pa ye rat n kos sugri, baa b sã n miẽ tɩ sugrã kosg pa na n kɩt tɩ b bool-b bʋʋd ye. Zak pʋgẽ, pag tõe n wa sidgda woto:  ‘Sẽn yaa yell ning fãa pʋgẽ mam sɩda zɩ n kos maam sugr abada.’ Tʋʋm zĩigẽ, tʋʋmd taoor soab tõe n wa yẽgemda woto: ‘Mam tʋm-tʋmdbã zɩ n sak n deeg b kongr ye.’ Lekollẽ, karen-saamb tõe n kõo kaset tɩ: ‘B pa zãms kambã sugr kosg ye.’

Bʋʋm a ye sẽn tõe n kɩt tɩ ned pa rat n sak n deeg t’a kongame wã ya a sẽn yaeesd b na n wa pa zoe a nimbãanegã yĩnga. Rẽ tõe n kɩtame t’a pa wilg a sẽn sɩd tagsd ye. Masã, ned ning b sẽn beegã tõeeme n gil bɛɛgdã fas-fasɩ, tɩ mo-yõsrã manegr lebg toog wʋsgo.

Neb kẽer sẽn pa kot sugrã yaa b toog sẽn kae ne neb a taabã yĩn-sidgã yĩnga. B tõe tagsda woto: ‘Sugr kosg ye pa tõe n maneg m sẽn zoe n sãama ye.’ La neb a taab yam sẽn yood ne sugr kosgã, yaa rẽ sẽn tõe n wa ne yɛl ninsã rabeem yĩnga. B sʋkda b meng woto: ‘Rẽ yĩnga m kõn wa n paam taal tɩ b kɩt tɩ m yao n lebs sɩda?’ La baasg zãnga, wuk-m-mengã n tõe n yɩ gɩdg-kãseng meng n kɩt tɩ ned pa sak a kongr ye. Ned sẽn yaa wuk-m-meng soab n pa rat n yeel tɩ “m kongame” tõe n data ne manesem kãng n yeel woto me: ‘Mam ka na n sak m taalã n deeg yãnd ye. Woto na n yɩɩ paoogr n kõ-ma.’

Sẽn yaa bʋʋm ning fãa yĩnga, neb wʋsg getame tɩ sugr kosg yaa toogo. La sugr kosg sɩd yaa tɩlae bɩ? Nafa bʋs n be sugr kosg pʋgẽ?

[Foto, seb-neng a 3]

“B pa zãms kambã sugr kosg ye”

[Foto, seb-neng a 3]

“Mam tʋm-tʋmdbã pa sakd n deeg b kongr ye”

[Foto, seb-neng a 3]

“Mam sɩda zɩ n kos maam sugr ye”