Karemdbã sʋgsgo

Ra tũudum zẽng roog n maneg n maan Rĩung roog yaa bũmb sẽn wilgd tɩ d lagemda tũudum zẽng neb bɩ?

Naoor wʋsgo, a Zeova kaset rãmbã lakda b mens ne rot a woto buud raab ne tũudum a taaba. La baasgo, b pa segd n ges roog a woto raab meng wa kaset sẽn wilgd tɩ b maanda lagem-n-taar ne tũudum a to wã ye. B tõe n ges-a-la wa bũmb raag b sẽn maand ne taab bala, tɩ pa minung ye. Zĩig baa ye, a Zeova kaset rãmba pa naagd tũudum sul zẽng n me baleng zĩiga, tɩ sul a yiibã tõe n ledgd taab be n pʋʋsdẽ ye.

Bõe maaneg la a Zeova tõe n wa ges wala lagem-n-taar tallg ne tũudum a to? Bɩ d tags a Poll sẽn kõ sor wilgr ningã zugu. A yeela woto: “Bɩ y ra lagem ne neb nins sẽn ka tẽeba ye. Tɩ bõe, bõe lagengo n be tɩrlem ne wẽng sʋka? Walla bõe lagengo n be vẽenem ne lik sʋka? La bõe sakre n be Kirist ne Beliall sʋka? Walla ned ninga sẽn tẽeda tara bõe ne ned ninga sẽn ka tẽeda? Bõe lageng n be Wẽnnaam doog ne bõn-naands sʋka? . . . Yaa woto yĩnga Zusoaba yetame yaa: ‘Bɩ y yi bãmb sʋka la y welg ne bãmba. Da sak-y tɩ yãmb sũyã rẽgem ye, la mam na reeg yãmba.’ ” (2 Korẽnt dãmba 6:14-17) Bõe la a Poll dat n yeel a sẽn gomd “lageng” la ‘sakr’ yellã?

Lagem-n-taar ning yell a Poll sẽn gomd ka wã tɩ loee vẽeneg ne baleng la tẽeb zems-n-taar sẽn maand ne bõn-naands pʋʋsdba la neb sẽn ka tẽeda. A keooga Korẽnt neba tɩ b ra tall “lagem-n-taar ne zĩn dãmb ye.” (1 Korẽnt dãmba 10:20, 21) Dẽnd lagem-n-taar tallg ne tũudum a taabã, yaa naag tũudum sigls a taab Wẽnnaam balengã pʋgẽ bɩ tẽebã yɛl pʋgẽ. (Yikri 20:5; 23:13; 34:12) D sã n deeg tũudum a to roog n da, yaa zĩiga bal la d dat tɩ lebg Rĩung Roog zĩiga. La nand t’a yɩ Rĩung Roog menga b rengdame n yiis ziri balengã teed fãa a pʋgẽ wã. B sã n maneg-a woto tɩ zemse, b rɩkd-a lame n kõ a Zeova, tɩ ro-kãng be yẽ balengã yĩng bala. Naagr bɩ lagem-n-taar baa bilf ka be sɩd balengã ne ziri balengã sʋk ye.

D sã n wa sõsd yɛl toɛy-toɛy nins fãa sẽn tɩ loe ne raab a woto wɛɛngẽ wã, tũudum a to wã neb segb segd n teka zĩigã raab yĩng bala. Kiris-neb tigingã neb segdame n gãd a Poll saglgã b yamẽ sõma, n da “lagem ne neb nins sẽn ka tẽeba ye.” Baa ne d sẽn pa tagsd tɩ d yɩɩda neb nins sẽn be tũudum a taabã pʋsẽ wã, d pa lagemd ne-b b balengã pʋgẽ ye. *

Yaa wãn to masã yẽ ne tiging sẽn na n luwaas roog tũudum a to sẽn so? Roogã kiuug ligd yaoob nong n kɩtame tɩ b segd n yã taab wakat fãa, tɩ rẽ yaool n pa segd ye. Sã n yaa bũmb maaneg vugr bal yĩng la b rat n luwaas roog a woto, tigingã kãsem dãmb tog n gesa yel-kãensã: Rẽ yĩnga, wẽn-naands la tũudmã teed pa be roogã pʋgẽ wall a yɩngã? Wãn-to la sakã neb na n tags tõnd sẽn tũnugd ne ro-kãngã wã? Rẽ yĩnga tõnd sã n tʋm ne ro-kãngã pa na n wa yɩ sabab tɩ tigingã ned lʋɩ tẽebã wɛɛngẽ? (Matɩe 18:6; 1 Korẽnt dãmba 8:7-13) Kãsem dãmbã na n vaeesa yel-kãensã neer nand n yaool masã n dɩk sard tɩ zems ne rẽ. Kãsem dãmbã segdame n kelg bãmb mensã la tigingã neb sũur kaset me, b sã n wa rat n da roog a woto n maan-a t’a lebg Rĩung Roogo.

[Tẽngr note]

[Foto, seb-neng 30]

Ro-kãngã ra yaa Zʋɩf rãmb karen-doogo, tɩ b ra n maaneg tɩ lebg Rĩung Roogo