Karemdbã sogsgo

Yaa wẽng tɩ d reem n bao ligdi, sã n mikame tɩ yaa ligd bilf n kẽed sʋk bɩ?

Wẽnnaam gomdã pʋgẽ, b pa gom reem n bao ligdã yel-bõoneg fãa yell ye. La Biiblã tara sagls sẽn sek n wilgdẽ tɩ reem n bao ligda yaa bũmb sẽn pa zemsd ne Wẽnnaam noyã. * Wala makre neb wʋsg sak n deegame tɩ reem n bao ligd yaa yão-beedo. Bʋʋm kãngã a ye meng zoe n seka kiris-neda, bala Biiblã yetame tɩ ‘yão-be-nebã’ ka na n paam Wẽnnaam Rĩunga ye. La b rɩka yão-beedã n tɩ mag ne bõn-naands pʋʋsgã.—1 Korẽnt dãmba 6:9, 10, NW; Kolos rãmba 3:5, NW.

Reem n bao ligda leb n tusda nebã n kẽesd rat-m-yembr la wags-taab sẽn pa sõma, la f taab tõogr tʋlsem sẽn tar pãng pʋgẽ. Tʋm-tʋmd a Poll keooga tõnd bõn-kãensã wɛɛngẽ woto: “Bɩ tõnd da waoog tõnd mens zaalem n maan no-baoodem walla sũ-kiir ne taab ye.” (Galat dãmba 5:26) Sẽn paase, reem n bao ligd tusda nebã tɩ b tall bas-yard ne zu-noogo, sẽn yaa tẽeb ziri wã. Sẽn deemdb n baood ligdã fãa bɩɩsda tẽeb ziri buud toor-toor n saagdẽ tɩ b tõe n kɩtame tɩ zu-noogã naf-ba. Bãmba tẽegda tõnd Israɛll neb nins sẽn da pa tar kɩs-sɩdã sẽn ‘sam rɩ-nood a Gad b zu-noog wẽndã’ yĩngã.—Ezai 65:11, Sebr Sõngo.

Sãnda tõe n tagsdame tɩ par ne ligd bilf bal kart tãoob pʋgẽ ne f zo-rãmb wall reem f sẽn maand sull pʋgẽ ne f roagdb bɩ ne f zo-tɩrs yaa pemsem kokr sẽn pa tar yelle. Sɩda, ned sẽn kẽed parb sẽn maand ne ligd bilf pʋgẽ tõe n getame tɩ woto, a pa rat-tɩ-loog soaba, rat-m-yembr soaba, ned sẽn nong wags-n-taar bɩ ned sẽn tar tẽeb ziri ye. La pãn-tusdg bʋg la yẽ tõe n tall a sẽn pard ne b rãmbã zutu? Pard-kãas wʋsg me sɩnga ne par-bõones b sẽn da maand n deemdẽ. (Luk 16:10) Reem a woto sẽn wõnd a pa tar yell nif gesg pʋgẽ wã wat n baas n lebga yel-be-kãseng ne nin-kãense.

Yaa woto me ne kambã. Sũ-noog ning b sẽn da nong n paamd par-bõones pʋsẽ wã tusa kamb wʋsg tɩ wa baas n pard ne ligd wʋsgo. (1 Tɩmote 6:10) Etazĩni, Arizona neb sull sẽn maand vaeesg reem n bao ligdã wɛɛngẽ rɩka sẽk wʋsg n maan vaeesgo, n yiis sebr sẽn sɩd wilg tɩ neb wʋsg sẽn lebg reem n bao ligdã yembs sɩnga “ne ligd bilf parb yĩn-wɩsgrã reem zut bɩ kart tẽoob pʋgẽ ne b zo-rãmb wall b roagdba,” tɩ b yʋʋm nan ket n paoodẽ. Vaeesg a to me wilgame tɩ “nong n yaa yir la kambã sɩngd reem–n–bao ligdã n tẽood kart ne b zaka neb bɩ ne b zo-rãmbã.” Vaeesgã paasame tɩ “kamb pis-tã koabg zug sẽn deemd n baood ligdã sɩngame tɩ b nan pa ta yʋʋm 11 ye.” Sã n yaa ne sebr a yembre (Why Do People Gamble Too Much—Pathological and Problem Gambling), kom-bɩɩs wʋsg sẽn lebg reem n baood ligdã yembs kẽeda bi-beer la yoob pʋgẽ sẽn na yɩl n paam n pids b tʋlsem kãngã. Ad yaa bũmb b sẽn da ges wa yel-yaalg sẽn wa ne yel-beedo!

Sẽn mik tɩ d vɩɩ dũni sẽn zoe n pid ne bẽds la makr pʋgẽ wã, bõe yĩng tɩ d na n ye bao yell a to n kõ-d mense? (Yelbũna 27:12) Yaa ne kambã tɩ yaa ne neb a taaba, yaa ne ligd bilf bɩ ligd wʋsg la d pard ne me, d tog n zãaga d mens ne reem n bao ligdã, bala a tõe n ninga tõnd tẽebã yell pʋgẽ. Yɩtẽ-la sõma tɩ kiris-nebã gũus tɩ b sã n nonga kart (bɩ lido tãoog) b pemsma kokr sasa bɩ b tãood n sõt ne gʋls-moog ned fãa sẽn tõog sõor bala, wall b pʋs n da sõd meng ye. Kiris-neb sẽn tar yam, tɩ b mensã tẽebã, b zakã neb la b zo-rãmba tẽeb yell pak-bã zãagda b mens ne reem n bao ligdi, ba yaa ne ligd bilf menga.

[Tẽngr note]