Pa kẽesd-m-toog rãmb sẽn yaa kiris-neb yaoolem dayã
Pa kẽesd-m-toog rãmb sẽn yaa kiris-neb yaoolem dayã
“Bãmb ka dũniyã rẽnd wa mam sẽn ka dũniyã rẽndã.”—ZÃ 17:16.
1, 2. Bõe la a Zezi yeel a karen-biisã yel-manesem ne dũniyã wɛɛngẽ, la sʋgs-bʋs la a goamã wat ne?
A ZEZI sẽn da wa n yaa ninsaal sẽn zems zãngã, a yaoolem yʋngã a maana pʋʋs-wok t’a karen-biisã ra kelgdẽ. Pʋʋs-kãng pʋgẽ, a togsa bũmb sẽn wilgd kiris-nebã fãa vɩɩm sẽn ya a soaba. A pʋʋsga pʋgẽ, a yeela a karen-biisã wɛɛngẽ: “Mam kõo bãmb yãmb goama, la dũniyã kisga bãmba bãmb sẽn ka dũniyã rẽnda a wa mam sẽn ka dũniyã rẽnda yĩnga. Mam ka kot yãmb tɩ y yiis bãmb dũniyã pʋgẽ ye, m kotame tɩ y gũ-b tɩ wẽng soaba ra tõog-b ye. Bãmb ka dũniyã rẽnd wa mam sẽn ka dũniyã rẽndã.”—Zã 17:14-16.
2 Naoor a yiibu, a Zezi yeelame t’a karen-biisã pa dũniyã rẽnd ye. Sẽn paase, b sẽn pa dũniyã rẽndã ra na n waa ne zu-loeese, bala dũniyã ra na n kisg-b lame. Ne rẽ fãa, kiris-nebã pa segd n koms raood ye, bala a Zeova ra na n gesa b yelle. (Yelbũna 18:10; Matɩe 24:9, 13) A Zezi sẽn togs goam ninsã tõe n kɩtame tɩ d sʋk d mense: ‘Bõe yĩng tɩ kiris-neb hakɩkã pa dũniyã rẽnda? Ra yɩ dũniyã rẽndã rat n yeelame tɩ bõe? Dũniyã sã n kis kiris-nebã, wãn to la b get dũniyã? Sẽn tɩ yɩɩd fãa, wãn to la b get dũniyã goosneema rãmba?’ Gʋlsg Sõamyã sẽn leokd sʋgs-kãensã to-to wã tara yõodo, bala b paka tõnd fãa.
“Tõnd yaa Wẽnnaam kamba”
3. a) Bõe n kɩt tɩ tõnd welg ne dũniyã? b) Bõe n wilgd tɩ dũniyã “bee wẽng soabã nugẽ”?
3 Zems-n-taar sẽn tar pãng ning tõnd sẽn tar ne a Zeova wã yaa bũmb a ye sẽn kɩt tɩ d pa dũniyã rẽndã. Tʋm-tʋmd a Zã gʋlsame: “Tõnd miimi tɩ tõnd yaa Wẽnnaam kamba, la dũniyã fãa bee wẽng soaba nugẽ.” (1 Zã 5:19) A Zã sẽn togs goam nins dũniyã wɛɛngẽ wã yaa sɩd vẽenega. Zabã, bi-be-tʋʋmã, wẽnemã, weoogrã, pʋ-likã la yoobã sẽn be zĩig fãa rũndã-rũndã wã wilgdame tɩ ya a Sʋɩtãan n tar pãn-tusdg dũniyã zug lakẽ pa Wẽnnaam ye. (Zã 12:31; 2 Korẽnt dãmba 4:4; Efɛɛz rãmba 6:12) Ned sã n lebg a Zeova Kaset soaba, a pa na n sak bɩ a tʋm tʋʋm kãensã ye. Rẽ n kɩt t’a pa dũniyã rẽnda.—Rom dãmba 12:2; 13:12-14; 1 Korẽnt dãmba 6:9-11; 1 Zã 3:10-12.
4. Wãn to la d wilgd tɩ d ya a Zeova rẽnda?
4 A Zã yeelame tɩ sẽn yaa lebend ne dũniyã sẽn be zĩig ningã, kiris-nebã yaa “Wẽnnaam kamba.” A Zeova soo neb nins fãa sẽn dɩk b mens n kõ-a wã. Tʋm-tʋmd a Poll yeelame: “Tɩ bõe, tõnd sã n vɩ, tõnd vɩɩ Zusoaba yĩnga; la tõnd sã n ki, tõnd kiida Zusoaba yĩnga. Woto yĩnga, tõnd sã n vɩ walla tõnd sã n ki, tõnd yaa Zusoaba rẽndã.” (Rom dãmba 14:8; Yɩɩl Sõamyã 116:15) Tõnd sẽn ya a Zeova rẽndã yĩnga, d sakd-a-la zãng-zãnga. (Yikri 20:4-6) Woto yĩnga, kiris-ned hakɩk pa rɩkd a vɩɩmã fãa n kẽes dũniyã bõn-datɩ pʋsẽ ye. La baa ne a sẽn tar waoogr ne a tẽngã tãb-kaoorã, a pa balemd-a ne a tʋʋm bɩ a sũur pʋgẽ ye. A pa balemd ball tãoodb la yĩn-wɩsgr nin-bɛd yʋy sẽn yi bɩ bũmb a to b sẽn get wa wẽnd rũndã-rũndã ye. Yaa sɩd tɩ neb a taabã sã n dat n maan woto a pa gɩdgd-b ye, la yaa Naandã bal la yẽ balemda. (Matɩe 4:10; Wilgri 19:10) Rẽ me kɩtdame t’a welg ne dũniyã.
“Mam soolem ka dũniyã rẽnd ye”
5, 6. Wãn to la Wẽnnaam Rĩungã sakr welgd tõnd ne dũniyã?
5 Kiris-nebã yaa Kirist Zezi karen-biisi, la b yaa Wẽnnaam Soolmã neba, tɩ rẽ me kɩt tɩ b pa dũniyã rẽnd ye. A Zezi sẽn da wa n be bʋʋdẽ a Põns Pɩlat taoore, a yeelame: “Mam soolem ka dũniyã rẽnd ye. Mam soolem sã n da yaa dũniyã rẽnda, mam tʋm-tʋmdba ra na n zabame tɩ b ra yõk maam n kõ Zʋɩf rãmba ye. La masã mam soolem ka dũniyã ka rẽnd ye.” (Zã 18:36) Yaa Rĩungã la a Zeova na n tũnug ne n pek a yʋʋrã, n wilg a naam sẽn-ka-to wã zemsgo, la a kɩt t’a raabã maan tẽngã zugu, wa a sẽn maand saasẽ wã. (Matɩe 6:9, 10) A Zezi moonegã tʋʋmd fãa pʋgẽ, a moona Rĩungã koe-noogo, la a yeelame t’a karen-biisã na n moon-a lame hal tɩ ta zãmaan wẽng kãngã saabo. (Matɩe 4:23; 24:14) Yʋʋmd 1914, bãngr-goam nins sẽn be Wilgri 11:15 pʋgẽ wã paama pidsgu: “Dũniyã soolem fãa lebga tõnd Zusoaba la bãmb Kirist dẽnda, la bãmb na n dɩɩ naam wakat sẽn ka sɛta.” Ka la bilf bala, yaa saasẽ Rĩung kãngã bal n na n dɩ naam ãdem-biisã zutu. (Daniɛll 2:44) Wakat n na n wa zĩnd tɩ na n yɩ tɩlae ne dũniyã nanambs tɩ b sak n deeg rĩung kãng zu-sobendã.—Yɩɩl Sõamyã 2:6-12.
6 Ne woto fãa b yamẽ, rũndã-rũndã, kiris-neb hakɩkã yaa Wẽnnaam Rĩungã neba, la b tũuda a Zezi saglgã sẽn yet tɩ b ‘reng n bao Wẽnnaam soolem ne bãmb tɩrlmã.’ (Matɩe 6:33) Rẽ pa kɩtd tɩ b yaa tõtb tẽng ning pʋgẽ b sẽn vɩyã ye, la a kɩtdame tɩ sã n yaa ne tẽebã wɛɛngẽ bɩ b welg b mens ne dũniyã. Rũndã-rũndã, wala pipi yʋʋm kob-gĩndẽ wã, kiris-nebã pipi tʋʋmd yaa ‘kɩs kaset zãng-zãng ne Wẽnnaam soolem koɛɛga.’ (Tʋʋma 28:23) Ninsaalbã goosneema ba a yembr pa tar sor n na n gɩdg tʋʋm kãngã Wẽnnaam sẽn kõ wã ye.
7. Bõe yĩng tɩ kiris-neb hakɩkã yaa pa-kẽesd-m-toog rãmba, la wãn to la b wilg rẽ?
7 B sẽn ya a Zeova rẽnda, n ya a Zezi karen-biis la Wẽnnaam Rĩungã nebã yĩnga, a Zeova Kaset rãmbã pa kẽes b toog tẽnsã pʋsẽ zaba, la tẽns ne taab zab sẽn zĩnd yʋʋm kob-gĩnd 20 la 21 soabã sasa pʋsẽ ye. B pa teel tẽng ba a yembr ye. B pa zabd ne ned ba a yembre, b leb n pa maan porpagãnd n teel dũniyã bõn-datl ba a yembr ye. Baa ne kɩɩsgã sẽn da wõnd looga b nugã, b talla tẽeb sẽn yaa kãsenga, n tũ bũmb ning b sẽn da togs Nazi taoor dãmbã Alemayn tẽngã yʋʋmd 1934 bãmb mens wɛɛngẽ wã. Ad b sẽn da togsã: “Politikã yɛl pa pak tõnd ye, la tõnd dɩka d meng zãng n kõ Wẽnnaam Rĩungã sẽn be Kirist sẽn yaa Rĩm ning a sẽn yãkã nugẽ wã. Tõnd pa na n maan ned ba a yembr wẽng ye. D tʋllame n zĩnd ne laafɩ la d maan nebã fãa neere, d sã n paam sore.”
Kirist ãmbasadɛɛr dãmba, la a tʋm-tʋmdba
8, 9. Rũndã-rũndã, wãn to la a Zeova Kaset rãmbã yaa ãmbasadɛɛr dãmb la tʋm-tʋmdba, la rẽ kɩtame tɩ b tar manesem bʋg tẽns nins pʋsẽ b sẽn beẽ wã?
8 A Poll bilga yẽ meng la a kiris-nin-taasã sẽn zae ne vʋʋsem sõngã wa “ãmbasadɛɛr dãmb Kirist zĩigẽ, wala Wẽnnaam sã n maanda bõosg n tũnugd ne tõndo.” (2 Korẽnt dãmba 5:20, NW; Efɛɛz rãmba 6:20, NW ) Wa sẽn zemse, yʋʋmd 1914 tɛkã, b tõe n goma kiris-neb nins sẽn zaeyã yell wa ãmbasadɛɛr dãmb Wẽnnaam Rĩungã yĩnga, tɩ b yaa Rĩung kãng “kamba.” (Matɩe 13:38; Filip rãmba 3:20; Wilgri 5:9, 10) Sẽn paase, a Zeova yiisa ‘kʋʋng kãseng’ sẽn be ‘piis a taabã’ sʋkã tẽn-tẽnsã pʋgẽ, tɩ b yaa kiris-neb sẽn saagd n na n vɩɩmd tẽngã zugu, sẽn na yɩl tɩ b teel komdibli wã sẽn zae ne vʋʋsmã b ãmbasadɛɛremdã tʋʋmd pʋgẽ. (Wilgri 7:9; Zã 10:16) B tõe n yeelame tɩ “piis a taab” kãens yaa Wẽnnaam Rĩungã ‘tʋm-tʋmdba.’
9 Ãmbasadɛɛr ne a poorẽ dãmbã pa kẽesd b mens tẽng ning b sẽn tʋmẽ-bã yɛl pʋsẽ ye. Woto me, kiris-nebã pa kẽesd b toog dũniyã tẽns politik yɛlẽ ye. B pa teend babg a yembr n zabd ne a to, sã n yaa tẽnse, buudu, zãmaana neba, bɩ laogã zãab yɛl wɛɛngẽ ye. (Tʋʋma 10:34, 35) Sẽn yaa lebende, b ‘maanda neba fãa yel-sõmde.’ (Galat dãmba 6:10) A Zeova Kaset rãmbã sẽn yaa pa kẽesd-m-toog rãmba yĩnga, ned ba a ye ka bʋʋm n na n zãgs b koɛɛgã, n yetẽ tɩ b teenda buud bɩ tẽng a to neb sẽn yaa bãmb bɛɛb ye.
B bãng-b lame n welg b nonglmã yĩnga
10. Nonglem yõod taa zĩ-bʋg ne kiris-neda?
10 Sẽn paas yɛl nins d sẽn yã wã, kiris-nebã pa kẽesd b toog dũniyã yɛlẽ, b zems-n-taarã ne b kiris-nin-taasã yĩnga. A Zezi yeela a karen-biisã woto: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) Tall saam-biir nonglmã yaa tɩlae sẽn na yɩl tɩ ned yɩ kiris-neda. (1 Zã 3:14) Wa kiris-ned sẽn tar zems-n-taar ning ne a Zeova la ne a Zezi Kiristã, yaa zems-n-taar sẽn tar pãng me la kiris-ned segd n tall ne kiris-neb a taabã. A nonglmã pa tek a tigingã neb ye. A tara nonglem ne a “ba-biisa [fãa] sẽn be dũniyã pʋgẽ wã.”—1 Pɩɛɛr 5:9.
11. Wãn to la a Zeova Kaset rãmbã sẽn nong taabã tall pãn-tusdg b manesmã zugu?
11 Rũndã-rũndã, a Zeova Kaset rãmbã wilgda b saam-biir nonglmã n tũud Ezai 2:4 goamã: “Neba na n dɩka b sʋʋsã n kud wãgse, la b rɩk b kãna n kud goeto. Buud ka na n le zẽk sʋʋg ne buud a to ye, la b ka na n le zãms zabr yell yɛs ye.” Kiris-neb hakɩkã sẽn paam a Zeova zãmsgã, b tara laafɩ ne Wẽnnaam la ne taaba. (Ezai 54:13) B sẽn nong Wẽnnaam ne b saam-biisã yĩnga, yaa bũmb sẽn pa saagd meng tɩ b zab ne b kiris-nin-taase, bɩ ne ned a to tẽns a taabẽ. B laafɩ wã la b zems-n-taarã tara yõod wʋsg b balengã pʋgẽ, la woto yaa bũmb sẽn wilgd tɩ b sɩd tara Wẽnnaam vʋʋsem sõngã. (Yɩɩl Sõamyã 133:1; Miise 2:12; Matɩe 22:37-39; Kolos rãmba 3:14) B ‘baooda laafɩ ne nebã la b pʋgda laafɩ wã,’ n miẽ ‘t’a Zeova geta nin-tɩrse.’—Yɩɩl Sõamyã 34:15, 16.
Kiris-nebã tagsg sẽn yaa to-to ne dũniyã
12. A Zeova manesem bʋg ne nebã sẽn be dũniyã pʋgẽ wã la a Zeova Kaset rãmbã rɩkd togs-n-taar ne, la yaa wãn to?
12 A Zeova kaoa dũni kãngã bʋʋd n ning-a taale, la a nan pa kao nebã sẽn be a pʋgẽ wã yembr-yembr bʋʋd ye. A na n tũnuga ne a Zezi n kao b bʋʋd wakat ning Yẽ sẽn yãkã sasa. (Yɩɩl Sõamyã 67:4, 5; Matɩe 25:31-46; 2 Pɩɛɛr 3:10) Nananda, a wilgda nonglem kãseng ne ãdem-biisã. A kõo a Biribl yend a sẽn naan a toorã menga, sẽn na yɩl tɩ ned fãa tõog n paam vɩɩm sẽn pa satã. (Zã 3:16) D sẽn yaa kiris-nebã, d rɩkda togs-n-taar ne Wẽnnaam nonglmã n togsd neb a taabã Wẽnnaam seglsã fãagrã yĩngã, baa b sã n nong n sãbgda tõnd modg kãng yĩnga.
13. D tagsg ne dũniyã nanambs segd n yɩɩ wãn to?
13 D tagsg segd n yɩɩ wãn to ne dũni kãngã nanambse? A Poll leoka sʋk-kãngã a sẽn wa n gʋls tɩ: “Bɩ ned kam fãa sak nanambsa noyã, tɩ bõe, noor ka be a sã n ka Wẽnnaam sẽn kɩt t’a zĩnd ye. Noy nins sẽn be wã yaa Wẽnnaam n kɩt tɩ b beẽ.” (Rom dãmba 13:1, 2) Ninsaalbã tara zu-sobend “sẽn pa bũmb fãa zug zu-sobendo,” (sẽn yɩɩd taaba, la sẽn pa ta a Zeova rẽnda ye), pãng sẽn tõe fãa Soabã sẽn bas-b tɩ b beẽ wã yĩnga. Kiris-ned sakda dũniyã zu-soben dãmba, bala rẽ bee bãmb sakrã ne a Zeova wã sʋka. La d na n maana wãn masã, Wẽnnaam noyã sã n wa kɩɩsd ninsaalbã goosneema rãmb rẽnda?
Wẽnnaam noorã la Sezaar noorã
14, 15. a) Wãn to la a Daniɛll tõog n põs mo-yõsr sakrã wɛɛngẽ? b) Hebre dãmb a tãabã yãka yam n maan bõe, mo-yõsr b sẽn da ka tõe n gil sẽn wa n zĩnd sakrã wɛɛngẽ?
14 A Daniɛll ne a tũud-n-taas a tãabã kõo mak-sõngo, sã n yaa ne d sẽn na n sak ninsaalbã goosneema rãmbã to-to, tɩ yaool n pa kɩɩs Wẽnnaam zu-sobendã ye. Hebre kom-bɩɩs a naasã sẽn da wa n be yembd weoog Babilonã, b saka tẽn-kãng noyã tɩ b yãk-b tao-tao tɩ b reeg zãmsg sẽn pa wõnd a taaba. A Daniɛll sẽn yã tɩ zãmsgã ra na n waa ne a Zeova tõogã kɩɩsgã, a sõsa ne b yel-gɛtã yellã zugu. Woto kɩtame tɩ b maan yɛlã tɩ zems ne Hebre dãmb a tãabã sũur-kaseto. (Daniɛll 1:8-17) A Zeova Kaset rãmbã tũuda a Daniɛll makre, n maagd b yĩng n wilgd b tagsgã tẽngã nin-kãsemse, sẽn na yɩl n da wa paam zu-loees zaalem ye.
15 La kaoosg zugẽ, yell a to n wa n zĩnd t’a pʋgẽ bɩ b ra pa tõe n gil mo-yõsr sakrã wɛɛngẽ ye. Babilon rĩmã yalsa bõn-naandg bedr Dura zĩ-lamdẽ wã, la a kõ noor tɩ tẽngã kug-zĩidb ra segd n tigma taab a pakrã sasa. Rẽ wẽnde, a ra yãka a Daniɛll tũud-n-taas a tãabã tɩ b yaa Babilon soolmã kug-zĩidba, tɩ kɩt tɩ bãmb me ra segd n zĩnd be. Sasa n zĩnd tɩ neb nins fãa sẽn tigma ra segd n wõgemd bõn-naandgã taoore. La Hebre dãmbã ra miime tɩ woto ra na n kɩɩsa Wẽnnaam tõogã. (Tõodo 5:8-10) Woto yĩnga, nebã fãa sẽn wõgemdã, bãmb kell n yalsa yĩngri. B sẽn kɩɩs rĩmã noorã yĩnga, b ra na n paama kũ-toaaga, la tũu ne yel-solemd la b sẽn põsã. La b yãkame n na n gẽneg b yõyã, n da kɩɩs a Zeova ye.—Daniɛll 2:49–3:29.
16, 17. Tʋm-tʋmdbã manesem yɩɩ wãn to, b sẽn wa n kõ-b noor tɩ b ra le moona, la bõe yĩnga?
16 Pipi yʋʋm kob-gĩndẽ wã, Zʋɩf rãmbã nanambs sẽn be Zerizalɛmã boola a Zezi Kirist tʋm-tʋmdbã n kõ-b noor tɩ b ye ra moon ne a Zezi yʋʋrã ye. B manesem yɩɩ wãn to? A Zezi kõ-b-la noor tɩ b tɩ maan karen-biis buudã fãa pʋsẽ, tɩ Zide be sʋka. A leb n yeel-b lame tɩ b yɩ a kaset dãmb Zerizalɛm la dũniyã zĩis fãa pʋsẽ. (Matɩe 28:19, 20; Tʋʋma 1:8) Tʋm-tʋmdbã ra miime t’a Zezi sẽn kõ-b noy ninsã ra zemsa ne Wẽnnaam sẽn baood tɩ b maanã. (Zã 5:30; 8:28) Woto yĩnga, b yeelame: “Zemsame tɩ tõnd sak Wẽnnaam n yɩɩd nebã.”—Tʋʋma 4:19, 20; 5:29.
17 Tʋm-tʋmdbã ra pa tõatb ye. (Yelbũna 24:21) Baasg zãnga, ninsaalbã nanambs sẽn wa n yeel-b tɩ b ra maan Wẽnnaam daabã, b ra tõe n yeelame bal tɩ: ‘Tõnd segd n saka Wẽnnaam n yɩɩd ninsaala.’ A Zezi yeelame tɩ d segdame n “kõ Sezaar bũmb nins sẽn yaa Sezaar dẽnda, la [d] kõ Wẽnnaam bũmb nins sẽn yaa Wẽnnaam dẽnda.” (Mark 12:17) Tõnd sã n kɩɩs Wẽnnaam noor ninsaal sẽn yeel tõnd tɩ d kɩɩs yĩnga, d rɩkda Wẽnnaam sẽn so wã n kõt ninsaala. La tõnd pa maand woto ye, d yaooda bũmb ning fãa d sẽn segd n yao Sezaarã, la d gãdame t’a Zeova n tar zu-sobend sẽn yɩɩd fãa wã. A yaa ãndũniyã Naab sẽn ka to, Naandã, zu-sobendã meng yẽgre.—Wilgri 4:11.
D na n yalsa kãn-kãe
18, 19. Yãk bʋg sẽn yaa sõma la tõnd saam-biis wʋsg maan-yã, la wãn to la d tõe n tũ b makrã?
18 Masã, dũniyã goosneema rãmb fãa la bal sak n deega a Zeova Kaset rãmbã sẽn yãk n yaa pa-kẽesd-m-toog rãmba, la d tara mi-beoog rẽ yĩnga. La tẽns sãnda pʋsẽ, Kaset rãmbã segda gɩdg-toaag b tẽebã yĩnga. Yʋʋm kob-gĩnd 20 soabã sasa hal n ta masã, tõnd saam-biis kẽer n mao wʋsg n “zab tẽeb zabr sõama.”—1 Tɩmote 6:12.
19 Wãn to la d tõe n yals kãn-kãe wa bãmba? Pipi, d segd n ningã d yamẽ tɩ kɩɩsg tõe n wa waame. Rẽ sã n wa wa, d pa segd n sãam d sũuri, wall yɩ lingr ne-d ye. A Poll keooga a Tɩmote woto: “Neb nins fãa sẽn dat n tũ Kirist Zezi ne pʋ-peelma na n paama namsgo.” (2 Tɩmote 3:12; 1 Pɩɛɛr 4:12) Dũni sẽn pid ne a Sʋɩtãan pãn-tusdgã pʋgẽ, bõe yĩng tɩ d pa na n seg kɩɩsgo? (Wilgri 12:17) Tõnd sã n ket n yaa kɩs-sɩd dãmb bala, wakat fãa, kẽer n be tɩ yɛlã na n ‘ling-b tɩ b gom tõnd wẽnga.’—1 Pɩɛɛr 4:4.
20. Sɩd bʋs sẽn kengd tẽeb la b tẽegd tõndo?
20 Yiib-n-soaba, tõnd kɩsa sɩd t’a Zeova ne a malɛgsã na n sõnga tõndo. Wala a Eli sẽn togs tẽn-kʋdem wẽndẽ wã, “sẽn be-b ne tõnda yɩɩda sẽn be-b ne bãmbã.” (2 Rĩm dãmba 6:16; Yɩɩl Sõamyã 34:8) Tõe tɩ yaa bʋʋm sẽn zems yĩng n kɩt t’a Zeova bas tɩ kɩɩsdbã kɩɩsg ket n kẽngd taoor wakat bilf yĩngã. Baasg zãnga, wakat fãa, a na n kõo tõnd pãng ning d sẽn datã sẽn na yɩl tɩ d tõog n yals kãn-kãe toogã pʋgẽ. (Ezai 41:9, 10) B kʋʋ neb kẽere, la rẽ pa komsd tõnd raood ye. A Zezi yeelame: “Bɩ y ra zoe neb nins sẽn kʋʋd yĩngã, la b ka tõe n kʋ sɩɩga ye. Sẽn yɩɩda bɩ y zoe sẽn tõe n sãama sɩɩga ne yĩng a yiib fãa [“Zeɛnã,” NW ].” (Matɩe 10:16-23, 28) D yaa ‘kaoos-wet’ bal dũni kãngã pʋgẽ. Dũni kãngã pʋgẽ, d rɩkda d sẽkã n tʋmdẽ, sẽn na yɩl n “paam vɩɩm sẽn yaa sɩda,” vɩɩm sẽn pa sat Wẽnnaam dũni paalgã pʋgẽ. (1 Pɩɛɛr 2:11, Kãab-paalgã Koe-noogo; 1 Tɩmote 6:19) Tõnd sã n ket n sakd Wẽnnaam fãa, ninsaal ba a yembr pa tõe n kɩt tɩ d kong keoorã ye.
21. Bõe la d segd n ning d yamẽ wakat fãa?
21 Woto yĩnga, bɩ d tẽeg zood sẽn pa wõnd a taab ning tõnd sẽn tar ne Wẽnnaam a Zeova wã. Wakat fãa, bɩ d tall naneb ne bark ning d sẽn tar n yaa Kirist karen-biisi, la d yaa Soolmã nebã yĩnga. Bɩ d nong d saam-biisã ne d sũy fãa, la bɩ d maan sũ-noog ne nonglem ning b sẽn tar ne-dã. Sẽn yɩɩd fãa, bɩ d tũ yɩɩl-gʋlsdã sagl-kãensã: “Maan tẽeb ne Zusoabã, yals kãn-kãe n keng f sũuri. Maan tẽeb ne Zusoabã.” (Yɩɩl Sõamyã 27:14; Ezai 54:17) Rẽ, wala kiris-neb sõor ka tɛk sẽn deng tõndã, d na n yalsa kãn-kãe, n tar saagr sẽn yaa waaziba, n yaa pa kẽesd-m-toog rãmb sẽn yaa kiris-neba, sẽn pa dũniyã rẽnda.
Y tõe n wilga a võor bɩ?
• Wãn to la tõnd zems-n-taarã ne a Zeova welgd tõnd ne dũni-kãngã?
• Tõnd sẽn yaa Wẽnnaam Soolmã nebã, wãn to la d yaa pa-kẽesd-m-toog rãmb dũni kãngã pʋgẽ?
• Wãn to la tõnd saam-biisã nonglem kɩt tɩ d yaa pa-kẽesd-m-toog rãmba, n welg ne dũniyã?
[Zãmsgã sogsgã]
[Foto, seb-neng 25]
Tõnd sã n sakd Wẽnnaam Rĩungã, wãn to la rẽ segd n toeem tõnd manesmã ne dũniyã?
[Foto, seb-neng 26]
Hutu ne Tutsi sẽn tʋmd ne taab sũ-noog pʋgẽ
[Foto, seb-neng 27]
Zʋɩf la Araab sẽn yaa saam-biis sẽn yaa kiris-neba
[Foto, seb-neng 27]
Sɛrbi, Bosni la Korwasi kiris-neb sẽn lagem taab ne sũ-noogo
[Foto, seb-neng 28]
Manesem bʋg n zemse, nanambs sã n wa kõ tõnd noor sẽn kɩɩsd Wẽnd noyã?