D zãms d mens n wa tõog n yɩ karen-saam dãmba

“Wɩng ne bõn-kãense la f maan ne f sũur fãa, tɩ neba fãa yã tɩ fo bɩtame. Gũus f meng ne koɛɛg ninga fo sẽn zãmsd nebã.”—1 TƖMOTE 4:15, 16.

1. Bõe n yaa sɩd sẽkã la d mengã zãmsg wɛɛngẽ?

“BŨMB fãa tara a wakate.” Woto la Biiblã yet Koɛɛg Soaba 3:1 pʋgẽ. Sɩd yaa woto ne d meng zãmsgã. Neb wʋsg getame tɩ yaa toog tɩ b tags tẽebã yɛl zutu, sã n mik tɩ wakatã bɩ zĩigã pa zems ye. Wala makre, y sã n tʋm wʋsg n wa ta zaabr n dɩ wʋsgo, rẽ yĩnga y na n dat n zãmsa Biiblã, sẽn yɩɩd fãa y sã n zĩ goeen-bedr sẽn bʋgs wʋsg zug televiziõ wã taoor sɩda? Yaa toogo. Rẽnd yellã tɩɩm yaa bõe? Vẽenega, yaa d yãk wakat la zĩig ning d sẽn na n zãmsã, sẽn na yɩl n dɩ modgr ning d sẽn maand zãmsgã yĩngã nafa sõma wa d sẽn tõe tɛka.

2. Naoor wʋsgo sasa bʋg n yaa sõma n yɩɩd ne d meng zãmsgã?

² Neb wʋsg getame tɩ sasa ning sẽn zems ne-b n yɩɩd ne zãmsgã yaa yibeoogo, b yamã sẽn vẽen n yɩɩdã sasa. Neb a taab tũnugda ne tʋʋmã sigb sasa midi n zãms Biiblã wakat bilfu. Makr nins sẽn pʋgdã pʋsẽ, bɩ y ges b sẽn tũnug ne wakat ning n tʋm tẽebã tʋʋm kãsemsã. Pĩnd wẽndẽ Israɛll rĩm a Davɩɩd gʋlsa woto: “Kɩt-y tɩ m wʋm yãmb nonglem koɛɛg yibeoogo; tɩ bõe, mam dellda yãmba. Kɩt-y tɩ m bãng sor ninga mam sẽn tog n tũ; tɩ bõe, mam geta yãmb ne m sũur fãa.” (Yɩɩl Sõamyã 143:8)  No-rɛɛs a Ezai me sak n deegame tɩ zãmsgã tara yõodo, a sẽn wa n yeel tɩ: “Zusoab a Wẽnnaam kõo maam gom-minim zɩlemde tɩ m tõe n bãng goam nins mam sẽn tog n leok ned ninga pãng sẽn sɛ wã. Yibeoog fãa, bãmb yokda mam tʋbre tɩ m kelg wa karen-biiga.” Bũmb sẽn be yaa tɩ d segd n zãmsame la d pʋʋs a Zeova sõma, d yamã sã n wa vẽenẽ, baa sẽn yaa wakat ning daarã pʋgẽ.—Ezai 50: 4, 5; Yɩɩl Sõamyã 5:4; 88:14.

3. Zĩ-bʋs n yaa sõma ne zãmsg sẽn be nafre?

³ Bũmb a to sẽn sõngd tɩ d zãms sõma yaa tɩ d pa segd n zĩnd zoambdg sẽn bʋgs wʋsg zug ye. Pa woto la d yamã na n nek ye. D sã n wa zãmsdẽ, d yamã segd n vẽename, la d sã n zĩẽ bɩ d gãee zĩig sẽn nord yĩns pʋgẽ, na n yɩɩ lebend ne rẽ. Zĩig bʋrg la tiisg me sẽn ka beẽ yaa sõma ne zãmsg la bʋgsgo. F sã n baood n na n zãms Biiblã tɩ radio pake, tɩ televiziõ widgi, bɩ tɩ kambã tiisd-fu, zãms-kãng pa na n tall nafa wʋsg ye. A Zezi sã n da rat n bʋgse, a kẽngda zĩig sẽn pa tarẽ bʋrgo. A leb n wilgame tɩ bao zĩig f sẽn yaẽ f yembr n pʋʋsã tara yõod wʋsgo.—Matɩe 6:6; 14:13; Mark 6:30-32.

D zãms d mens n wa tõog n leok nebã sogsgo

4, 5. Wãn to la Baood seb-bilã kõt sõngr sẽn yaa vẽenega?

⁴ D meng zãmsgã kõta sũ-noogo, d sã n tũnug ne sɛb toɛy-toɛy sẽn tik Biiblã zug sẽn na yɩl n vaees gom-zug neer n paase, sẽn yɩɩd fãa, d sã n maand woto sẽn na yɩl n leok ned sẽn maan sogsg n sɩd rat n bãng sɩdã. (1 Tɩmote 1:4; 2 Tɩmote 2:23) Sɩngrẽ wã, nin-paals wʋsg zãmsda seb-bil ning gom-zug sẽn yaa Bõe la Wẽnnaam baood tɩ tõnd maane?, * sẽn be buud-goam 261 pʋsẽ masã wã. Yaa sebr sẽn togsd yɛlã nana-nana la takɩ, t’a zãmsgã fãa yẽbg Biiblã zugu. A sõngda karemdã t’a bãng Wẽnnaam sẽn baood t’a balemd hakɩk maan bũmb ninsã tao-tao. La a sẽn yaa seb-bilã yĩnga, zĩig pa waoog sẽn na n wɛgs gom-zug fãa nens gill ye. Yãmb sẽn zãmsd Biiblã ne ned ningã sã n maan sogsg sẽn pak-a sẽn tik Biiblã zugu, la sẽn tɩ loe ne gom-zut kẽer y sẽn zãmsde, y na n maana wãn n paam zãmsg sẽn  yit Biiblã pʋgẽ n paas tɩ sõng-a t’a paam sogs-kãensã leoore?

⁵ Ne neb nins sẽn tar Watchtower Library sẽn be CD-ROM zug b buud-gomdã pʋgẽ wã, yaa nana ne-b tɩ b yã kɩbay sẽn yit sɛb toɛy-toɛyẽ ordinatɛɛrã pʋgẽ. La yaa wãn to yẽ ne neb nins sẽn pa tar zãmsg te-kãensa wã? Bɩ d vaees gom-zut a yiib sẽn be Baood seb-bilã pʋgẽ sẽn na yɩl n ges d sẽn tõe n paas d bãngrã la d tõog n leok tɩ yɩ vẽeneg n paas to-to, sẽn yɩɩd fãa ned sã n maan sogsg wala: Ãnda la Wẽnnaam, la, a Zezi sɩd ra yaa wãn-wãna?—Yikri 5:2; Luk 9:18-20; 1 Pɩɛɛr 3:15.

Ãnda la Wẽnnaam?

6, 7. a) Sok-bʋg n be Wẽnnaam wɛɛngẽ? b) Bõn-kãseng bʋg la tũudum taoor soab a yembr yĩm a sõsg pʋgẽ?

⁶ Baood seb-bilã zãmsg a 2 soabã leokda sok-kãseng ning sẽn yaa, Ãnda la Wẽnnaam? Sok-kãngã tɩ loee ne zãms-kãsenga, bala ned pa tõe n balem sɩd Wẽnnaamã t’a pa mi-a bɩ a sãmbd a beeme bɩ a ka be ye. (Rom dãmba 1:19, 20; Hebre dãmba 11:6) La dũniyã gill zugu, nebã gãda zãmsg buud toor-toor wʋsgo, sã n yaa ne Wẽnnaam sẽn ya a soabã wɛɛngẽ. (1 Korẽnt dãmba 8:4-6) Tũudum fãa tara a tagsg sẽn yaa toor ne a taabã Wẽnnaam sẽn ya a soabã zugu. Tũudum nins sẽn be dũni kiris-nedemdã pʋgẽ wã wʋsg tagsdame tɩ Wẽnnaam yaa Tãablem. Etazĩni tũudum taoor soab a yembr yʋʋr sẽn yi n kõ sõsg gom-zug sẽn yaa: “Yãmb mii Wẽnnaam bɩ?” la baa ne a sẽn togs goam sẽn yit Hebre Gʋlsg Sõamyã pʋgẽ naoor wʋsgã, a pa pʋd Wẽnnaam yʋʋrã a sõsgã pʋgẽ baa vugri meng ye. Sɩda, a karma Biibl lebgr sẽn bas Zeova bɩ Yahweh wã n tũnug ne gom-biig sẽn yaa “Soaalã,” sẽn yaa libsg la sẽn pa yʋ-peellã.

⁷ Ad sɩd yaa zãms-kãseng la tũudum taoor soab kãngã sẽn bas n pa wilgã, a sẽn wa n lebs n togs Zeremi 31:33, 34 goamã: “La ned ka na n le yeel a yak bɩ a saam-biig t’a bãng Zusoaba [ne Hebre goama yaa “bãng a Zeova”] ye. Tɩ bõe, sẽn sɩng ne nin-kãsems n tɩ ta nin-bõonega fãa na n bãnga maam. . . . Mam yaa Zusoaba, [ne Hebre goama yaa Zeova] yaa maam n yeele.” Biibl lebgr ning a sẽn tũnug ne wã basa Wẽnnaam yʋʋr sẽn welg-a toorã sẽn yaa Zeova wã.—Yɩɩl Sõamyã 103:1, 2, NW.

8. Bõe n wilgd tɩ tara yõod tɩ d tũnug ne Wẽnnaam yʋʋrã?

⁸ Yɩɩl Sõamyã 8:9 (NW ) wilgda bũmb ning sẽn kɩt tɩ tar yõod wʋsg tɩ d tũnug ne a Zeova yʋʋrã: “Zeova tõnd Soaala, ad f yʋʋrã sɩd yaa kãseng tẽngã gill zugu!” Mak-y rẽ ne woto: “Zusoaba, tõnd Soaala, yãmb yʋʋr yaa kãseng dũniyã tɛk fãa.” (Yɩɩl Sõamyã 8:10, Wẽnnaam Sebre, ges-y Sebr Sõng me) La wala d sẽn wilg sõsg ning sẽn loogã pʋgẽ wã, d tõe n paama ‘Wẽnnaam bãngre,’ d sã n bas a Gomdã t’a vẽneg-do. La yaa seb-bʋg sẽn tik Biiblã zug n na n leok tõnd sogsg nins d sẽn maand Wẽnnaam yʋʋrã yõod wɛɛngẽ wã sõma?—Yelbũna 2:1-6.

9. a) Seb-bʋg n tõe n sõng tõnd tɩ d wilg nebã tɩ tara yõod tɩ b tũnug ne Wẽnnaam yʋʋrã? b) Wãn to la Biiblã lɛbgdb kẽer pa tall waoogr ne Wẽnnaam yʋʋrã?

⁹ D tõe n tɩ gesa seb-bil ning sẽn yaa Le nom divin qui demeure à jamais wã b sẽn lebg buud-goam 69 pʋsẽ wã. * Babg ning gom-zug sẽn yaa: “Wẽnnaam yʋʋrã: A võorã la a boolgã” (seb-neng a 6-11) wilgda vẽeneg tɩ Hebre Tetragrammã (sẽn yaa Gɛrk gom-bil t’a võorã yaa: “gʋls-biis a naasã”) pukda sẽn pẽneg naoor 7 000 Hebre Gʋlsgã pĩnd sɛb pʋsẽ. Ne rẽ fãa, zidaismã la dũni kiris-nebã tũudmã taoor dãmb la b Biibl lɛbgdbã basa ne pʋ-toog n ka ning-a b Biibl lebgr wʋsg pʋsẽ ye. * Wãn to la b tõe n yeel tɩ b mii Wẽnnaam la tɩ b tara zems-n-taar ne-a, b sã n zãgsd n pa rat n sak n bool-a n tũnug ne a yʋʋrã? A yʋʋrã meng-meng sõngdame tɩ d tõe n bãng a kãabsã sẽn yaa b rãmba, la a sẽn ya a soabã. Sẽn paase, pʋʋsg  ning a Zezi sẽn maan tɩ yaa makr n kõ tõnd n yeel tɩ: “Tõnd Ba sẽn be arzãna, tɩ yãmb yʋʋr yɩ ne waoogre,” võor yaa bõe, b sã n pa tũnugd ne Wẽnnaam yʋʋrã menga?—Matɩe 6:9; Zã 5:43; 17:6.

Ãnda la a Zezi Kirist?

10. Ne manesem bʋs la d tõe n bãng yɛl nins fãa sẽn maan a Zezi vɩɩmã la a koe-moonegã wakatã?

¹⁰ Zãmsg a 3 soabã sẽn be Baood seb-bilã pʋgẽ wã gom-zug yaa: “Ãnda la a Zezi Kirista?” Ne sul a yoob bala, zãms-kãng wilgda a Zezi sẽn ya a soab koɛɛg-koɛɛga, n wilg a sẽn yiẽ, la bũmb ning sẽn kɩt t’a wa tẽng zugã. Baasg zãnga, y sã n dat kɩbay sẽn togsd a vɩɩmã yɛl fãa, Evãnzill dãmbã meng toor sẽn ka be, sebr ning sẽn na n sõng-y n yɩɩg yaa: Le plus grand homme de tous les temps, sẽn be buud-goam 111 pʋgẽ wã.* Seb-kãngã wilgda Kirist vɩɩmã la a zãmsgã kɩbar tɩ zems ne yɛlã sẽn pʋg taab to-to wã, tɩ tik Evãnzill dãmb a naasã zugã. A sags 133 wã gomda a Zezi vɩɩmã yɛl la a koe-moonegã yelle. Y sã n dat n ges b sẽn wɛgs a Zezi vɩɩmã ne manesem zẽnga, y tõe n tɩ gesa Étude perspicace, volim a 2 soabã, gom-zug ning sẽn yaa “Jésus Christ” tẽngre.

11. a) Bõe n kɩt t’a Zeova Kaset rãmbã yaa toor b tẽebã sẽn tɩ loe ne a Zezi wã wɛɛngẽ? b) Biiblã verse sãnda bʋs n kɩɩsd Tãablmã zãmsg vẽenega, la seb-bʋg n kõt vẽnegr yel-kãng wɛɛngẽ?

¹¹ Dũni kiris-nedemdã pʋgẽ, no-koeemd ning sẽn tɩ loe ne a Zezi wã tika bãnge, a sã n yaa “Wẽnnaam Biribl” n leb n yaa “Wẽnnaam sẽn yaa Biriblã” zugu. Sẽn dat n yeel bal tɩ yaa no-koeemd ning b sẽn wẽed tɩ Katolik rãmbã sebr a yen (Catéchisme de l’Église catholique) bool dẽ tɩ “kiris-nebã yel-solem-kãsengã” sẽn yaa Tãablmã. A Zeova Kaset rãmbã yaa toor ne dũni kiris-nedemdã tũudum dãmb yel-kãngã wɛɛngẽ. Bãmb tẽedame tɩ yaa Wẽnnaam n naan a Zezi, la tɩ pa a Zezi la Wẽnnaamã ye. Sõsg sẽn wɛgs gom-zu-kãngã sõma n be seb-bil ning sẽn yaa: Doit-on croire à la Trinité ? wã pʋgẽ. Yaa seb-bil b sẽn lebg buud-goam 95 pʋgẽ. * Biiblã verse rãmb wʋsgã a sẽn tũnugd ne n na n zãgs Tãablmã sʋka, ad kẽere: Mark 13:32 la 1 Korẽnt dãmba 15:24, 28.

12. Sok-bʋg me n baood leokre?

¹² Tõnd sẽn yã bũmb nins Wẽnnaam la a Zezi Kirist wɛɛngẽ zãms-kãngã pʋgẽ wã wilgda soay tõnd sẽn tõe n tũnug ne n maan d meng Biibl zãmsgã, sẽn na yɩl n wa tõog n sõng neb nins sẽn pa mi sɩd ning sẽn be a pʋgẽ wã, tɩ b paam bãngr hakɩkã. (Zã 17:3) Yaa wãn to masã ne neb nins sẽn lagem ne kiris-neb tigingã sẽn na maan yʋʋm wʋsgã? Baa ne b sẽn paam Biiblã bãngr wʋsgã, b segdame n ket n zãmsd b mens a Zeova Gomdã neer bɩ?

Bõe yĩng tɩ d segd n ‘gũus wakat fãa’?

13. Tags-kɛgr bʋg la kẽer tõe n tar b mens zãmsgã wɛɛngẽ?

¹³ Neb kẽer sẽn yɩ tigingã neb sẽn na maan yʋʋm wʋsg tõe n wa minimame n teegd Biiblã bãngr ning b sẽn da paam, b pipi yʋʋm a wãnã b sẽn yɩ a Zeova Kaset rãmbã sasa. Yaa nana tɩ d tags woto: “Pa tɩlae ne maam tɩ m zãms wʋsg wa nin-paalsã ye, bala yaa naoor wʋsg la mam karem Biiblã la sɛb nins sẽn tik Biiblã zugã yʋʋmã sẽn pʋg taabã pʋgẽ.” Rẽ ne yãmb sẽn na n yeel woto fãa yaa yembre: “M sɩd pa segd n maan yɩɩr ne m sã n dɩtame tɩ sek bɩ m pa rɩt tɩ sek masã ye. Ges-y rɩɩb nins fãa mam sẽn zoe n dɩ wã.” Tõnd miime tɩ yĩngã rata rɩlgr wakat fãa, ne rɩɩb sẽn yaa sõma, b sẽn segl sõma, sẽn na yɩl t’a ket n tar laafɩ la a tõe n tʋme. Segd n yɩɩ woto n yɩɩd menga, d sã n dat tɩ d tẽebã kell n tall pãngã!—Hebre dãmba 5:12-14.

14. Bõe yĩng tɩ d segd n gũus d mensã neer wakat fãa?

¹⁴ Woto yĩnga, tõnd zãmsda Biiblã hal sẽn kaoos tɩ pa woto me, d fãa segd n tũu a Poll saglg ning a sẽn taas a Tɩmote wã. Rẽ wẽnd t’a Tɩmote ra bɩɩ tẽebã wɛɛngẽ n da yaa yel-gɛt sẽn get a tʋʋmd yell sõma, la a Poll yeel-a lame: “Gũus f meng ne koɛɛg ninga fo sẽn zãmsd nebã, la ges bõn-kãens n da bas ye, tɩ bõe, yaa woto la fo na n fãag f menga la neb nins sẽn kelgd foomã.” (1 Tɩmote 4:15, 16) Bõe yĩng tɩ d segd n kelg a Poll saglgã neere? Tẽeg-y t’a Poll wilgame me tɩ d tara zabr ne “a Sʋɩtãan sɩlem  fãa” la “ne sɩɩs wẽns buud fãa sẽn be yĩngri.” Sẽn paase tʋm-tʋmd a Pɩɛɛr yeelame tɩ d gũus t’a Sʋɩtãan ‘baooda a sẽn tõe n paam a soab n sãam,’ la tɩ tõnd ned kam fãa tõe n yɩɩ nin-kãng soaba. A sẽn baoodã yaa tõnd sẽn na n tall sek-m-meng n pa gũus bal tɩ pak sor n kõ-a.—Efɛɛz rãmba 6:11, 12; 1 Pɩɛɛr 5:8.

15. Tẽeb zab-te-bʋs la d tara, la wãn to la d tõe n ket n zãad-b sõma?

¹⁵ Woto, yaa bõe zab-teed la d tara? Tʋm-tʋmd a Poll tẽegda tõnd woto: “Bɩ yãmb bob Wẽnnaam zab-teed fãa tɩ yãmb tõe n tõog wẽng wakate, la tɩ yãmb sã n zab n tõoge, yãmb na yals kãn-kãe.” (Efɛɛz rãmba 6:13) Tẽeb zab-te-kãens pãngã pa be ne b sẽn sɩng n yaa to-to wã bal ye, la a leb n bee ne tõnd sẽn na n ket n zãad-b sõma wakat fãa. Woto yĩnga, zab-te-kãens sẽn pid zãngã sẽn yit Wẽnnaam nengẽ wã segd n naaga Wẽnnaam Gomdã bãngr sẽn zems ne masã võor-wʋmbã. Rẽ wilgdame tɩ tara yõod wʋsg tɩ d ket n baood sɩdã võor wʋmb ning sẽn zems ne a Zeova sẽn tũnug ne a Gomdã la tʋm-tʋmd sẽn tũud sɩd la sẽn tar yamã sull n puk-a to-to wã. Tõnd mengã sẽn zãmsd Biiblã la sɛb nins sẽn tik a zugã yaa tɩlae ne tõndo, sẽn na yɩl tɩ d tẽebã zab-teed ket n yaa sõma.—Matɩe 24:45-47; Efɛɛz rãmba 6:14, 15.

16. Bõe la d tõe n maan n kɩs sɩd tɩ d ‘tẽebã gãong’ sẽn yalmã ket n yaa sõma?

¹⁶ A Poll wilga vẽeneg tɩ tõnd zab-teedã bõn-kãseng a ye yaa ‘tẽebã gãong’ sẽn yalmã, d sẽn tõe n tũnug ne n kiis a Sʋɩtãan pɛɛma sẽn wit bugum, sẽn tõe n yɩ rõdg bɩ sɩdã kɩɩsdb zãmsgo. (Efɛɛz rãmba 6:16) Woto, tara yõod wʋsg tɩ d ges tõnd tẽebã gãong pãng sẽn ta zĩig ninga, la d sẽn maand bũmb nins n kɩt t’a kell n yɩ sõma la d paas a pãngã. Wala makre, y tõe n sokame: ‘Wãn to la m segend m meng semen fãa Biiblã zãmsg sẽn tũnugd ne Gũusg Gasgã yĩnga? Mam zãms-a lame tɩ sek m na tõog n “yik taab ratem tɩ maan nonglem la tʋʋm sõama,” m sẽn na n tags tɩ bɩ n yaool n leok tigisgã wakat bɩ? Mam lakda Biiblã n karemd verse rãmb nins b sẽn sõdg bal tɩ b goam pa be zãmsgã pʋgẽ wã bɩ? Mam kengda neb a taaba pels n kẽesd m meng sõma ne yẽesem tigissẽ wã bɩ?’ Tõnd tẽebã rɩɩb yaa taoko, tɩ d segd n bʋgs a zug sõma-sõma sẽn na yɩl n dɩ a nafa tɩ pidi.—Hebre dãmba 5:14; 10:24.

17. a) Zẽnem bʋg la a Sʋɩtãan tũnugd n na n mak n sãam tõnd tẽebã? b) A Sʋɩtãan zẽnemã tɩɩm yaa bõe?

¹⁷ A Sʋɩtãan mii ninsaalbã sẽn pa zems zãngã pãn-komsem, la sẽn paase, a sɩlmã solga wʋsgo. Manesem nins a sẽn tũnugd ne n yelgd a pãn-tusd-wẽngã a yembr ya a sẽn maand tɩ yoobã yɛl yãab yaa nana wʋsg televiziõ wã, ẽntɛrnetã, video rãmbẽ wã, la sɛbã pʋsẽ wã. Kiris-neb kẽer basame tɩ zẽnem kãng sãam b zab-teedã sẽn zoe n komsã, tɩ rẽ kɩt tɩ b kong b zu-noodã tiginga pʋgẽ, bɩ yɩ wẽng n yɩɩd woto menga. (Efɛɛz rãmba 4:17-19) A Sʋɩtãan zẽnemã tẽebã wɛɛngẽ wã tɩɩm yaa bõe? D pa segd n maan yam-kaalg ne d meng Biibl zãmsg wakat fãa wã, d kiris-neb tigissã, la d zab-teed sẽn pid zãng sẽn yit Wẽnnaam nengẽ wã ye. Bõn-kãensã fãa sẽn lagem taab kɩtdame tɩ d tõe n bãng sõma ne wẽng n bake, la d kisg Wẽnnaam sẽn kis bũmb ningã.—Yɩɩl Sõamyã 97:10; Rom dãmba 12:9.

18. Wãn to la ‘vʋʋsem sõngã sʋʋg’ tõe n sõng tõnd d tẽebã zabr pʋgẽ?

¹⁸ Tõnd sã n kell n tall d minung sõngã n zãmsd Biiblã n pa vaandẽ, pipi, d na n paama zab-teed sẽn tar pãng sẽn kogend-do, d sẽn paam Wẽnnaam Gomdã bãngr hakɩk yĩnga. Sẽn paase, d na n tõoga sõma n tũnug  ne ‘vʋʋsem sõng sʋʋga sẽn yaa Wẽnnaam gomdã’ (NW ) n zab d tẽeb zabrã. Wẽnnaam goama “rɩtame n yɩɩd sʋʋg sẽn tar noy a yiibu, la a kẽeda hali n welgd vɩɩm ne sɩɩga la kõb-sugds ne b sɩɩlem, la a yaa sũur tagsgo la ratem bʋ-kaooda.” (Efɛɛz rãmba 6:17; Hebre dãmba 4:12) Tõnd sã n paam minim ‘sʋ-kãng’ rɩk-n-tʋmã pʋgẽ, rẽ, d sã n wa be kʋɩɩbg taoore, d na n tõog n bãnga vẽeneg tɩ bũmb ning sẽn wõnd a ka yell bɩ sẽn wõnd a bee yamleoog mengã yaa wẽng soabã bẽd-kʋʋdga. Bãngr ning fãa tõnd sẽn paam Biiblã pʋgẽ wã na n sõnga tõnd tɩ d zãgs sẽn yaa wẽng la d maan sẽn yaa neere. Woto yĩnga, tõnd fãa segd n soka d mense: ‘Mam sʋʋgã rɩtame bɩ a mudame? Yaa toog ne maam tɩ m tẽeg Biiblã verse rãmb sẽn tõe n paas mam zab-teedã pãng bɩ?’ Bɩ d kell n tall d minung sõngã n zãmsd Biiblã d toore, tɩ yaa woto la d na n yals kãn-kãe a Sʋɩtãan Munaafɩɩk taoore.—Efɛɛz rãmba 4:22-24.

19. Bõe nafa la d tõe n paame, d sã n modgd sõma n maand d meng Biibl zãmsgã?

¹⁹ A Poll gʋlsame: “Gʋlsg Sõamyã zãnga yaa Wẽnnaam n kõ tõndo: la a bee bark zãmsg yĩnga, la tɩ wilg ned a kongre, la saglg yĩnga, la tɩ zãms tɩrlem tɩ Wẽnnaam ned tõe n bɩ la a maan tʋʋm sõama fãa.” Tõnd sã n gãd sagls nins a Poll sẽn taas a Tɩmote wã ne d sũy fãa, d tõe n paasa d mengã tẽeb pãnga, la d tõe n kɩtame me tɩ d koe-moonegã yɩ sõma n paase. Kãsem dãmb la kãsemb sõngdb sẽn tar tẽeb sõma wã tõe n sõnga tigingã neb sõma, la d fãa tõe n kell n talla pãng tẽebã pʋgẽ.—2 Tɩmote 3:16, 17; Matɩe 7:24-27.

[Tẽngr not rãmbã]

Y tẽrame bɩ?

• Yel-bʋs n sõngd ned t’a meng zãmsgã yɩ sõma?

• Tudg-bʋg la Biiblã lɛbgdb wʋsg maan Wẽnnaam yʋʋrã wɛɛngẽ?

• Biiblã verse bʋs la y na n tũnug ne n kɩɩs Tãablmã zãmsgo?

• Bõe la d segd n maan n kogl d mens ne a Sʋɩtãan sɩlmã, baa d sã n yaa kiris-neb sẽn na maan yʋʋm wʋsgo?

[Zãmsgã sogsgã]

[Foto rãmba, seb-neng 25]

Sẽn na yɩl n maan d meng Biibl zãmsgã sõma, y segd n zĩnda zĩig sẽn zemsẽ, tɩ tiisg kaẽ ye

[Foto rãmba, seb-neng 29]

Yãmb tẽeb ‘sʋʋgã’ rɩtame bɩ a mudame?