Kiris-nebã rata taab sõngre
Kiris-nebã rata taab sõngre
“Tõnd fãa yaa yĩng a yembr wil ne taaba.”—EFƐƐZ RÃMBA 4:25.
1. Bõe la bãngr sebr a yembr yeel ninsaal yĩngã wɛɛngẽ?
NINSAAL yĩngã yaa yel-solemde! Bãngr sebr a yembr (The World Book Encyclopedia) yetame: “Wakat kẽere, neba yetame tɩ ninsaal yĩngã yaa masĩn sẽn yaa kãseng n yɩɩd a taabã fãa. Yaa vẽeneg tɩ ninsaal yĩngã pa masĩn ye. La b tõe n mak-a-la ne masĩn zĩis wʋsg wɛɛngẽ. Wa masĩni, yĩngã tara babs wʋsgo. Wa masĩn babg fãa sẽn yaa to-to wã, yĩngã babg fãa tara tʋʋmd sẽn pa wõnd a taabã. La a babsã fãa tʋmda ne taab n kɩt tɩ yĩngã bɩ masĩnã marsd sõma.”
2. Wãn to la ninsaal yĩngã la kiris-neb tigingã wõnd taaba?
2 N-ye, ninsaal yĩngã tara babs bɩ wil wʋsgo. Yaa zɩ-sor tɩ yaa gĩind me, yĩngã wil fãa tara yõodo. Woto me, kiris-neb tigingã ned fãa tõe n sõnga tigingã t’a paam laafɩ tẽebã wɛɛngẽ la a tall rasãnde. (1 Korẽnt dãmba 12:14-26) Baa tigingã ned ba a yembr sẽn pa segd n tags t’a yɩɩda a taabã, ned ba a yembr pa segd n tags me t’a ka yõod ye.—Rom dãmba 12:3.
3. Wãn to la Efɛɛz rãmba 4:25 wilgd tɩ kiris-nebã rata taab sõngre?
3 Wala ninsaal yĩngã wil sẽn teeg taabã, kiris-nebã me rata taab sõngre. Tʋm-tʋmd a Poll yeela a tẽed-n-taasã sẽn da paam zaeeb ne vʋʋsem sõngã woto: “Bɩ y bas zĩri yagbo la ned kam fãa togs sɩd ne a yaka; tɩ bõe, tõnd fãa yaa yĩng a yembr wil ne taaba.” (Efɛɛz rãmba 4:25) B sẽn yaa ‘yĩng wil ne taaba’ yĩnga, tẽeb Israɛllã neb sẽn yaa “Kirist yĩnga” wʋmda taab moor sõma la b lagemd n tʋmd sõma ne taaba. N-ye, bãmb ned kam fãa bee a taabã yĩnga. (Efɛɛz rãmba 4:11-13) Kiris-neb hakɩk nins sẽn tar saagr n na n vɩɩmd wakat fãa tẽng zugã lagemd n tʋmda ne-b ne sũ-noogo.
4. Wãn to la d tõe n sõng nin-paalsã?
4 Yʋʋmd fãa, neb tusa sẽn saagd n na n vɩɩmd tẽng zug arzãnẽ wã reegda lisgu. Tigingã neb a taab sõngd-b-la ne sũ-noog sẽn na yɩl tɩ b “yɩ tao-tao n ta bɩʋʋng zĩigẽ.” (Hebre dãmba 6:1-3, NW ) Rẽ tõe n yɩɩ leok nin-kãens sogsg nins sẽn tɩ loe ne Gʋlsg Sõamyã bɩ sõng-b koe-moonegã wɛɛngẽ. D tõe n sõnga nin-paalsã, d sã n kõ mak-sõng n kẽesd d mens kiris-neb tigissẽ wã. Toog wakate, d tõe n kenga neb raood bɩ d bels-ba. (1 Tesalonik rãmba 5:14, 15) D segd n baoa soay n sõng neb a taabã tɩ b ‘kẽn sɩda pʋgẽ.’ (3 Zã 4) D yaa bi-bɩɩg tɩ d kʋʋlame me, d nan sɩnga sɩdã pʋgẽ kẽnd tɩ d kẽnda a pʋgẽ sẽn na maan yʋʋma, d tõe n sõng n paasa d tẽed-n-taasã tẽeb neere, la sɩd me b rata tõnd sõngre.
B kõo sõngre
5. Wãn to la a Akila la a Piriska sõng a Polle?
5 Kẽed-n-taas nins sẽn yaa kiris-nebã me paamda sũ-noog b sẽn sõngd b tẽed-n-taasã yĩnga. Wala makre, a Akila ne a pag a Piriska sõnga a Polle. B reeg-a-la b zakẽ, n tʋm ne-a n maan fu-roto, la b sõng-a t’a yẽbg tiging paalg Korẽnte. (Tʋʋma 18:1-4) Biiblã pa wilg rẽ sẽn yɩ to-to ye, la b gẽnega b yõy meng a Poll yĩnga. B ra vɩɩ Rom a Poll sẽn wa n yeel kiris-neb nins sẽn be be wã tɩ: “Pʋʋs-y a Piriska la a Akila sẽn yaa mam tʋmd-n-taas Kirist Zezi tũudma pʋgẽ wã n kõ maam. Bãmb gẽnega b yõe n fãag maam. A ka maam bal n pʋʋsd bãmb bark ye, la ya a Zezi tẽedba fãa sẽn yaa bu-zẽmsa me.” (Rom dãmba 16:3, 4) Wala a Akila la a Piriska, rũndã-rũndã kiris-neb kẽer kengda tigims pãng la b sõngd b tẽed-n-taasã ne manesem toɛy-toɛya, wakat ninga b gẽnegda b yõya, sẽn na yɩl tɩ bɛɛbã ra wa yã Wẽnnaam sõgen dãmb a taab n nams-b bɩ n kʋ-b ye.
6. Sõng-bʋg la a Apolos paam-yã?
6 A Akila ne a Piriska me sõnga kiris-ned a Apolos sẽn da yaa gom-minim soaba, la sẽn da zãmsd Efɛɛz nebã a Zezi Kirist wɛɛngẽ wã. Rẽ wẽnde, a Apolos ra mii a Zã lisgã bala, sẽn da yaa lisg sẽn wilgd tek yam n kos sugri, yel-wẽn nins b sẽn maan n beeg a Moiiz Tõogã kaoolã yĩnga. A Akila ne a Piriska yãame t’a Apolos ra rata sõngre. Rẽ n so tɩ b “zãms yẽ Wẽnnaam sor tɩrga n paase.” Tõe tɩ b wilg-a lame tɩ kiris-neb lisgã rat n yeelame tɩ f paam koom lisgu, la f ye paam vʋʋsem sõngã zaeebo. A Apolos reega zãmsgã sõma. Rẽ poore, Akai soolmẽ wã “yẽ sõnga tẽedba wʋsg ne Wẽnnaam barka. Tɩ bõe, yẽ goma ne Zʋɩf rãmba neba sʋka n wilg bãmb ne Gʋlsg Sõamyã t’a Zezi sɩd yaa Kirist.” (Tʋʋma 18:24-28) Naoor wʋsgo, tõnd tẽed-n-taasã leoor tõe n sõnga tõnd tɩ d wʋm Wẽnnaam Gomdã võor n paase. Rẽ wɛɛngẽ me, d rata taab sõngre.
Sõngr laogã wɛɛngẽ
7. Filip rãmbã manesem yɩɩ wãn to, kiris-nin-taas sẽn da wa n be sõngr daab pʋgẽ wã?
7 Kiris-neb tigingã neb sẽn da be Filipã ra nonga a Poll wʋsgo, n tool-a sõngre, a sẽn da wa n be Tesalonikã. (Filip rãmba 4:15, 16) Saam-biis nins sẽn da be Zerizalɛmã sẽn da wa n dat sõngr laogã wɛɛngẽ wã, Filip rãmbã wilgame tɩ b ra ratame n kõ tɩ yɩɩg b tarem menga. A Poll talla mi-beoog wʋsgo, yam sõng ning a saam-biisã la a saam-bi-pogsã sẽn da be Filipã sẽn tallã, hal t’a wilg tɩ b yaa mak-sõng n kõ tẽedb a taabã.—2 Korẽnt dãmba 8:1-6.
8. Yam bʋg la a Epafordit tall-yã?
8 A Poll sẽn da wa n be bãens roogẽ wã, Filip nebã pa tool-a kũun bal ye, la sẽn paase, b tʋma a Epafordit sẽn yaa bãmb ned a ye wã a nengẽ. A Poll yeelame: “Yaa Kirist tʋʋmda yĩng la [a Epafordit] ra kolg kũum; yẽ gẽnega a yõor n sõng maam ne sõngr ninga yãmb sẽn ka tõog n maane yãmb sẽn ka be ne maama yĩnga.” (Filip rãmba 2:25-30; 4:18) Biiblã pa yet tõndo, a Epafordit sã n da yaa kãsem soab bɩ kãsemb sõngd ye. Baasg zãnga, a ra yaa saam-biig sẽn da modgd la a mongd a meng wʋsgo. A kõ-a Poll sõngr ning a sẽn da ratã. Rẽ yĩnga, ned bee yãmb tigingẽ wã n yaa wa a Epafordit bɩ?
B yɩɩ neb ‘sẽn wat ne belsgo’
9. Mak-sõng bʋg la a Aristark kõ-yã?
9 Saam-bi-nongds wala a Akila, a Piriska la a Epafordit tara yõod wʋsg tiging buud fãa pʋgẽ. Tõnd tẽed-n-taas kẽer tõe n wõnega pipi yʋʋm kob-gĩndẽ kiris-ned a Aristark wʋsgo. Yẽ ne neb a taab ra yaa neb ‘sẽn wat ne belsgo’, tõe tɩ yɛl takɩ kẽer pʋsẽ, b ra kõo neb a taabã belsg la sõngre. (Kolos rãmba 4:10, 11) A sẽn sõng a Pollã, a Aristark wilgame t’a yaa zoa hakɩk sõngr daab wakate. A ra yaa ned ning buud yell b sẽn gom Yelbũna 17:17 (NW ) pʋgẽ wã: “Tũud-n-taag hakɩk nonga wakat fãa, la a yaa saam-biig sẽn dog toog wakat yĩnga.” Tõnd fãa pa segd n modg n yɩ ‘neb sẽn wat ne belsg’ n kõ d kiris-nin-taasã sɩda? Sẽn tɩ yɩɩd fãa, d segd n sõnga neb nins sẽn be toog pʋgẽ wã.
10. A Pɩɛɛr kõo kiris-neb kãsem dãmbã mak-sõng bʋgo?
10 Sẽn yɩɩd fãa kiris-neb kãsem dãmbã segd n yɩɩ neb sẽn wat ne belsg n kõ b tẽebã pʋgẽ saam-biis la saam-bi-pogse. Kirist yeela tʋm-tʋmd a Pɩɛɛre: “Bɩ f sõng f ba-biisa tɩ b paam pãnga.” (Luk 22:32) A Pɩɛɛr da tõe n maana woto, bala a puka zʋg-sõma sẽn tar pãnga, sẽn yɩɩd fãa a Zezi vʋʋgrã poore. Kãsem dãmba, mao-y wa y sẽn tõe tɛk n maan woto ne yamleoog la ne sũ-bʋgsem, bala y tẽed-n-taasa rata sõngre.—Tʋʋma 20:28-30; 1 Pɩɛɛr 5:2, 3.
11. Wãn to la a Tɩmote yam-tagsgã sẽn yɩ to-to wã vaeesg tõe n nafa tõndo?
11 A Poll so-toak tũud-n-taag a Tɩmote ra yaa kãsem soab sẽn da tagsd a kiris-nin-taasã yell wʋsgo. Baa ne a sẽn da namsd yĩns ka laafɩ yĩngã, a Tɩmote talla tẽeb sẽn yaa kãn-kãe la a ‘tʋm ne a Poll koe-nooga pʋgẽ.’ Woto yĩnga, tʋm-tʋmd a Poll da tõe n yeela Filip rãmbã: “Mam ka tar ned [a to, NW ] ka sẽn tar yam a yembr ne maam sẽn na n ges yãmb yell neer ye.” (Filip rãmba 2:20, 22; 1 Tɩmote 5:23; 2 Tɩmote 1:5) D tõe n yɩɩ nafr n kõ neb a taabã sẽn balemd a Zeova wa tõndã, d sã n tall a Tɩmote yam-tagsgã buudu. Yaa sɩda, d segd n maoo ne tõnd mengã pãn-komslmã la makr toɛy-toɛya, la tõnd me tõeeme la d segdame n tall tẽeb sẽn tar pãng la nonglem ne d tẽebã pʋgẽ saam-biis la saam-bi-pogsã. D segd n tẽega wakat fãa tɩ b rata tõnd sõngre.
Pagb sẽn ges neb a taab yelle
12. Bõe la a Dorkas makrã tõe n zãms tõndo?
12 A Dorkas bee pagb sẽn yaa wẽn-zoɛtb nins sẽn ges neb a taab yellã sʋka. A Dorkas sẽn ki wã, karem-biisã boola a Pɩɛɛr n tall-a n dʋ a Dorkas yĩngr doogẽ wã. Beenẽ, “pʋg-kõapa fãa gũbga yẽnda n yãbda n wilgd fut nins [a Dorkas, NW ] sẽn da sẽ wã.” B vʋʋga a Dorkase, la sãmbg sẽn ka be, a kell n “maana tʋʋm sõama wʋsgo n sõng naong rãmba.” Rũndã-rũndã kiris-neb tigingã pʋgẽ, pagb n be n wõnd a Dorkase, sẽn wʋgd fut bɩ b maand bũmb a taab ne nonglem n kõt sẽn be-b raab pʋgẽ wã. Yaa sɩd tɩ pipi, b tʋʋm sõma wã yaa sẽn na yɩl tɩ Rĩungã tʋʋm kẽng taoore, la sẽn na yɩl n maan karen-biisi.—Tʋʋma 9:36-42; Matɩe 6:33; 28:19, 20.
13. Wãn to la a Lidi wilg t’a kiris-nin-taasã yɩ-neer pak-a lame?
13 A Lidi, sẽn yɩ pag sẽn yaa Wẽn-zoɛtã gesa neb a taabã yelle. A roga Tiyatiiri, la a ra bee Filipi, a Poll sẽn da wa n moon be yʋʋmd 50 sẽnesã sasa. A Lidi ra tog n yaa pag sẽn tuub n sak Zʋɩf rãmbã tũudum. Tõe tɩ wakat kãng tɩ Zʋɩf rãmbã ra pa wʋsgo, la tõe meng tɩ b ra pa tar karen-doog Filip pʋgẽ ye. A Lidi ne pagb a taab sẽn da yaa Wẽn-zoɛtb ra tigma taab balengã yĩng kʋɩlg noore, tʋm-tʋmdã sẽn da wa n moon-b koe-noogã. Biiblã yetame: “La Zusoaba paka a [Lidi] sũur t’a reeg a Poll sẽn togs bũmb ninsa fãa. La yẽ ne a yir dãmba sẽn paam lisgu yẽ kosa tõnd woto: ‘Yãmb sã n tẽed tɩ mam tũuda Zusoaba sɩda, bɩ y wa n sig mam yiri.’ La yẽ pẽdga tõnd wʋsgo.” (Tʋʋma 16:12-15) A Lidi sẽn da rat n maan bõn-sõma n kõ neb a taabã yĩnga, a tõogame t’a Poll ne a tũud-n-taasã sak n sig a yirã. D kiris-nin-taasã sã n maan-d sãand woto ne sõmblem la nonglem rũndã-rũndã, ad d sɩd nanda rẽ wʋsgo!—Rom dãmba 12:13; 1 Pɩɛɛr 4:9.
Kamba, d rata yãmb me sõngre
14. Manesem bʋg la a Zezi Kirist ra tar ne kambã?
14 Yaa Wẽnnaam Biribl a Zezi Kirist sẽn yɩ nin-sõng sẽn tar nonglmã n yẽbg kiris-neb tigingã. Nebã ra nonga a zĩiga, bala a ra tara nonglem la nimbãan-zoeere. Vugri, neb kẽer sẽn da sɩng n wat ne b kamb a Zezi nengẽ wã, a karem-biisã makame n na n dig-b ne b roagdbã. La a Zezi yeelame: “Bas-y kom-bõonega tɩ b wa mam nengẽ n da gɩdg bãmb ye, tɩ bõe, Wẽnnaam soolem yaa neb nins sẽn wẽnd wa bãmba yĩnga. Mam yeta yãmb sɩda, tɩ ned ninga fãa sẽn kõn deeg Wẽnnaam soolem wa bi-bilfu, a kõn kẽ be ye.” (Mark 10:13-15) Sẽn na yɩl n paam bark nins Rĩungã sẽn na n kõ wã, d segd n yɩɩ sik-m-mens rãmb la d yɩ neb sẽn sakd zãmsg wa kamba. A Zezi wilga a nonglem ne kambã n dɩk-b a nusẽ la a ning-b barka. (Mark 10:16) Kamba, yaa wãn to ne yãmb rũndã-rũndã? Kɩs-y sɩd tɩ b nong-y lame la tɩ b rata y sõngr tigingã pʋgẽ.
15. A Zezi vɩɩmã wɛɛngẽ yel-bʋs n be Luk 2:40-52 pʋgẽ, la mak-sõng bʋg la a kõ kambã?
15 A Zezi sẽn da ket n yaa bi-bilfu, a wilga a nonglem ne Wẽnnaam la ne Gʋlsg Sõamyã. A sẽn da wa n tar yʋʋm 12, yẽ ne a roagdbã, sẽn ya a Zozɛf la a Maari wã yii b tẽngẽ wã Nazarɛt n kẽng Zerizalɛm n na n tɩ maan Pak kibsã. B sẽn da wa n lebgdẽ wã, a Zezi roagdbã mikame t’a ra pa be ne so-toagdbã ye. B wa n baas n yã-a lame t’a zĩ wẽn-doogẽ wã, n kelgd Zʋɩf karen-saam dãmbã la a maand-b sogsgo. Ling-a lame, a Zozɛf ne a Maari sẽn da pa mi b sẽn na n yã-a zĩig ningã, t’a sok-ba: “Yãmb da ka mi tɩ mam tog n bee m ba wã roogẽ laa?” A lebg n kula ne a roagdbã, n kell n sak-ba, la a ket n bɩtẽ t’a yamã me paasdẽ. (Luk 2:40-52, Kãab-paalgã Koe-noogo) Ad sɩd yaa mak-sõng meng la a Zezi bas ne kambã! Sɩd-sɩda b segd n saka b roagdbã la b wilg tɩ b nonga tẽebã yɛl zãmsgo.—Tõodo 5:16; Efɛɛz rãmba 6:1-3.
16. a) Bõe la kamb kẽer kaas n yeele, a Zezi sẽn da wa n kõt kasetã wẽn-doogẽ wã? b) Zu-no-bʋg la kiris-neb nins sẽn yaa kambã tar rũndã-rũndã?
16 Y sẽn yaa bi-bɩɩgã, tõe tɩ y kõta kaset a Zeova wɛɛngẽ lekollẽ wã la zak-zak koe-moonegẽ wã ne y roagdbã. (Ezai 43:10-12; Tʋʋma 20:20, 21) A Zezi sẽn da wa n kõt kasetã la a maagd nebã wẽn-doogẽ wã bilf sẽn deng a kũumã, kamb n kaas woto: “Hosanna! a Davɩɩd Biiga.” Maan-kʋʋdbã kãsem dãmb ne gʋlsdbã sũy yikame tɩ b yeele: “Yãmb wʋmda kamba sẽn yeta bɩ?” A Zezi leoka bãmb yaa: “N-yẽe, yãmb nan ka karem gom-kãens sẽn yeta: Yãmb paama pẽgre sẽn yit kom-bõonego la kamb sẽn ket n yẽsemda noe pʋsẽ bɩ?” (Matɩe 21:15-17) Wala kom-kãense, yãmb sẽn yaa kamb n be tigingã pʋgẽ wã tara zu-no-kãseng n na n pẽg Wẽnnaam la a Biriblã. D rata yãmb sõngre, tɩ y naag tõnd n yɩ Rĩungã moondba.
Toog sã n wa wa
17, 18. a) Bõe yĩng t’a Poll sigl ligd tigisg Zide kiris nebã yĩnga? b) Pãn-tusdg bʋg la yamleoog kũun nins b sẽn taas Zide tẽedbã tall Zʋɩf rãmb la bu-zẽms neb sẽn yaa kiris-nebã zutu?
17 D sẽn be yɛl nins fãa pʋsẽ me, nonglmã tusda tõnd tɩ d sõng d kiris-nin-taas nins sẽn be sõngr daab pʋgẽ wã. (Zã 13:34, 35; Zak 2:14-17) Ra ya a Poll nonglmã a saam-biisã sẽn be Zide wã yĩng n tus-a t’a sigl ligd tigisg b yĩng Akai, Galasi, Masedoan la Azi soolmã tigimsẽ. Tõe tɩ yaa karen-biisã sẽn be Zerizalɛm sẽn nams b tẽebã yĩngã, n be tẽn-dãmbg la kom pʋgẽ wã yell la a Poll sẽn gom n yeel tɩ ‘b namsa wʋsg’ la tɩ ‘b wʋka b paoongã.’ (Hebre dãmba 10:32-34; Tʋʋma 11:27–12:1) Woto yĩnga, a gesame tɩ b lob ligd n na n ges kiris-neb nins sẽn da be naong pʋgẽ Zide wã yelle.—1 Korẽnt dãmba 16:1-3; 2 Korẽnt dãmba 8:1-4, 13-15; 9:1, 2, 7.
18 Yamleoog kũun nins b sẽn maan Wẽnnaam nebã sẽn be Zide wã yĩngã yɩɩ kaset sẽn wilg t’a Zeova balemdb nins sẽn yaa Zʋɩf rãmbã la b rãmb nins sẽn yaa bu-zẽms nebã ra yaa saam-biis tẽebã pʋgẽ. Yamleoog kũunã kɩtame me tɩ bu-zẽms kiris-nebã tall mi-beoog ne b tẽed-n-taasã sẽn be Zide wã, tẽeb vẽnegr nins b sẽn paam b nengẽ wã yĩnga. Woto, yaa laog la tẽeb la b pʋɩ ne taaba. (Rom dãmba 15:26, 27) Kũunã b sẽn maand n sõngd tẽed-n-taas nins sẽn be sõngr daab pʋgẽ rũndã-rũndã wã yaa ne yamleoogo, la yaa nonglem yĩng me. (Mark 12:28-31) Zĩ-kãng wɛɛngẽ me d rata taab sõngre, sẽn na yɩl tɩ zeng-taab zĩndi, tɩ ‘sẽn wʋk-a tɩ ka ta wã me ra kong sẽn sek yẽnda ye.’—2 Korẽnt dãmba 8:15.
19, 20. Kõ-y makr sẽn wilgd a Zeova nin-buiidã sẽn kõt sõngr to-to sabaab wakate.
19 D sẽn mi tɩ kiris-nebã rata taab sõngrã yĩnga, d yɩta tao-tao n sõng d tẽebã pʋgẽ saam-biis la saam-bi-pogse. Wala makre, ges-y bũmb ning sẽn maane, tẽn-digimdg sẽn wa ne sãoong wʋsg El Salvadoor yʋʋmd 2001 sɩngrẽ wã. Kɩbar a yembr yetame: “Saam-biisã kẽnga ne sõngr El Salvadoor tẽngã fãa pʋgẽ. Saam-biis sul sẽn yi Guatemala, Etazĩni la Kanada wa n sõnga tõndo. . . . Sẽn yɩɩd zags 500 la Rĩung Rot a 3 sẽn yaa neeb la b me tao-tao. Saam-bi-kãensã sẽn mong b mens la b naag taab n tʋm wʋsgã kõo kaset sẽn tar pãng nebã nifẽ.”
20 Kɩbar sẽn yit Afirikdisiid yetame: “Ko-kãsems nins sẽn dɩ Mozãmbik babs wʋsgã namsa tõnd saam-biis wʋsg sẽn yaa kiris-nebã me. Tõnd tʋʋmdã will sẽn be Mozãmbikã seglame n sõng-b ne bũmb nins b sẽn da ratã fãa la bala. La b kosame tɩ d tool fut sẽn ket n yaa sõma tɩ b kõ d saam-biisã sẽn be ratem pʋgẽ wã. D tigma fut tɩ seke, n tool kõnteneer woglem sẽn ta metr 12 sẽn pid ne fut Mozãmbik d saam-biisã yĩnga.” N-ye, yel-kãensã pʋsẽ me, d rata taab sõngre.
21. Bõe la d na n vaees sõsg ning sẽn pʋgdã pʋgẽ?
21 Wa d sẽn yeel tɩ loogã, ninsaal yĩngã babs fãa tara yõodo. Sɩd-sɩda yaa woto me ne kiris-neb tigingã. A nebã fãa rata taab sõngre. B leb n datame n maan Wẽnnaam daabã lagem-n-taar pʋgẽ. Sõsg ning sẽn pʋgdã na n vaeesa yɛl kẽer sẽn kɩt tɩ rẽ tõeyã.
Wãn to la y na n leokẽ?
• Bõe wõneg n be ninsaal yĩngã la kiris-neb tigingã sʋka?
• Wãn to la pipi kiris-nebã maan-yã, b tẽed-n-taas sẽn wa n be sõngr daab pʋgẽ wã?
• Mak-sõma bʋs n be Biiblã pʋgẽ n wilgdẽ tɩ kiris-nebã rata taab sõngre?
[Zãmsgã sogsgã]
[Foto, seb-neng 10]
A Akila la a Piriska gesa neb a taaba yelle
[Foto rãmba, seb-neng 12]
Toog wakate, a Zeova sõgen dãmbã sõngda taaba, la b sõngd neb a taabã