“Bɩ y gũ”!
“Bɩ y gũ”!
“Bũmb ninga mam sẽn yet yãmba, mam yeta neba fãa. Bɩ y gũ.”—MARK 13:37.
1, 2. a) Yam bʋg la rao a yembr zãms a paoongã koglg wɛɛngẽ? b) A Zezi sẽn dɩk makrã sẽn tɩ loe ne wagdrã zãmsda tõnd bõe gũusgã wɛɛngẽ?
A JUAN bĩnga a laogã a roogẽ. A ning-a-la a gadgã tẽngre. Yẽ tagsdame tɩ yaa roogã pʋgẽ la a tõe n solg-a sõma n yɩɩda. La yʋng a yembre, yẽ ne a pagã sẽn da wa n gõeyã, wagdr n kẽ b ro-gãagẽ wã. Yaa vẽeneg tɩ wagdrã ra mii a sẽn na n gẽesẽ. A maaga a yĩng n yãk laog nins fãa sẽn da be gadgã tẽngrã, n paas ligd ning a Juan sẽn da bas taabl koofr ning sẽn da yɛg gadgã pʋgẽ wã. Beoog sẽn vẽege, a Juan yãame tɩ b zu-a lame. Na kaoos t’a pa yĩm yam-kãngã a sẽn zãms toog pʋgẽ wã ye: Ned sẽn gõe pa tõe n gũ a laog ye.
2 Yaa woto me tẽebã wɛɛngẽ. D sã n gũs tẽebã wɛɛngẽ, d pa tõe n kogl d saagrã bɩ d tẽebã ye. Yaa rẽ yĩng la a Poll sẽn sagl woto wã: “Dẽ yĩnga, bɩ tõnd da gũs wa neb a taaba ye, la bɩ d gũusi [la d] da tɩg ne rãam ye.” (1 Tesalonik rãmba 5:6) Sẽn na yɩl n wilg tɩ tara yõod wʋsg tɩ d ket n gũusdẽ, a Zezi rɩka makr ne wagdre. A Zezi bilga yɛl nins sẽn na n deng n maan t’a yaool n wa kao bʋʋdã, la a keoog woto: “Woto yĩnga, bɩ yãmb gũusi tɩ yãmb ka mi daar ninga yãmb Zusoaba sẽn na n wa ye. Bɩ y bãng bõn-kãnga, tɩ roog soab sã n bãng wakat ninga wagdr sẽn na n wa, a na n gũume n ka sak t’a kẽ a roogẽ ye. Yaa woto yĩnga yãmb me, bɩ y segle tɩ Ninsaal Biiga wata wakat ninga yãmb sẽn ka tẽeda.” (Matɩe 24:42-44) Wagdr pa rengd n togs a waoong wakat ye. A rat n waa sasa ning ned ba a yembr sẽn pa tagsd t’a na wa wã. Wa a Zezi sẽn yeelã, woto me, zãmaan kãngã saab na n waa ‘wakat ninga tõnd sẽn ka tẽeda.’
“Bɩ y gũus y mens n yals kãn-kãe tẽeb pʋgẽ”
3. Wãn to la a Zezi sẽn dɩk makr ne yembs sẽn gũud b zu-soab sẽn yit kãadem kibsẽ n watẽ wã wilgd tɩ ket n gũudẽ tara yõodo?
3 A Luk Evãnzillã pʋgẽ, a Zezi maka kiris-nebã ne yembs sẽn gũud b zu-soab sẽn na n yi kãadem kibsẽ n wa. B ra segd n gũume t’a sã n wa ta bɩ a mik tɩ b pa gõe, la b seglame n na n deeg-a. Woto me, a Zezi yeelame: “Ninsaal Biiga wata wakat ninga yãmb sẽn ka tẽeda.” (Luk 12:40) Kẽer sẽn maan a Zeova raab yʋʋm wʋsg tõeeme n ye pa getẽ tɩ tõnd sẽn vɩ wakat ningã yaa yãgb wakat ye. B tõe n wa tagsame meng tɩ saabã tõe n ket n zãra wʋsgo. La tagsg a woto tõe n wa kɩtame tɩ d bas tẽebã yɛl n bao laogã ne yõ-noogrã sẽn tõe n kɩt tɩ d suus tẽebã wɛɛngẽ wã.—Luk 8:14; 21:34, 35.
4. Bõe la tõnd kɩs sɩd ne tɩ na n tus-d tɩ d ket n gũusdẽ, la wãn to la a Zezi wilg rẽ?
4 Zãmsg a to la d tõe n paam a Zezi makrã pʋgẽ. Baa ne yembsã sẽn da pa mi lɛɛr ning b zu-soabã sẽn da na n wa wã, yaa wa b ra mii sẽn yaa yʋng ninga. Ra na n yɩɩ toog tɩ b kell n gũ yʋʋn-kãng tõrã, b sã n da tagsdẽ tɩ b zu-soabã tõe n waa yʋng a to. La ayo, b ra mii yʋng ning a sẽn da watã, tɩ rẽ tus-b tɩ b gũ sõma. Woto me, Biiblã bãngr-goam wilgda vẽeneg tɩ d vɩɩ saabã wakate, la b pa togsd tõnd saabã daar bɩ a lɛɛrã meng ye. (Matɩe 24:36) Tõnd sẽn tẽed tɩ saabã watame wã sõngda tõnd tɩ d ket n gũusdẽ, la d sã n kɩsa sɩd t’a Zeova daarã sɩd kolgame, rẽ na n tus-d lame tɩ d tʋll n gũ sõma n paase.—Sofoni 1:14.
5. Wãn to la d tõe n tũ a Poll saglgã sẽn yet tɩ d ‘ket n gũusdẽ’ wã?
5 A Poll gʋlsa Korẽnt kiris-nebã n sagl-b woto: “Bɩ y gũus y mense n yals kãn-kãe tẽeb pʋgẽ.” (1 Korẽnt dãmba 16:13) N-ye, d sã n dat n ket n gũusdẽ yaa d sẽn na n ket n yas kãn-kãe d tẽebã pʋgẽ. Wãn to la d tõe n ket n gũusdẽ? Yaa d sẽn na n bãngd Wẽnnaam Gomdã sõma n paasdẽ. (2 Tɩmote 3:14, 15) D sã n minim n maand d mengã zãmsg sõma la d wat tigissã n pa vaandẽ, sõngd-d lame tɩ d paas d tẽebã. Sẽn paase, ning a Zeova daarã d yamẽ wakat fãa yaa bõn-kãseng tõnd tẽebã pʋgẽ. Woto, wakat-wakate, d sẽn lebgd n tẽegd bũmb nins sẽn be Gʋlsg Sõamyã pʋgẽ sẽn wilgd tɩ d pẽe zãmaan kãngã saabã, na n sõng-d lame tɩ d ra yĩm sɩd-kãsems nins sẽn tɩ loe ne saabã sẽn watã ye. * Leb n yaa sõma tɩ d tags dũniyã yɛl nins sẽn pidsd Biiblã bãngr-goamã yelle. Saam-biig a yembr sẽn be Alemayn gʋlsa woto: “Wakat buud fãa mam sã n ges kɩbayã, n ne zabã, tẽn-digimdgã, nen-kɛglmã la tẽngã rẽgengã, wilgdame n paasdẽ tɩ saabã kolgame.”
6. Wãn to la a Zezi rɩk makr n wilg tɩ tar-n-tarẽ, d tõeeme n wa rat n bas gũusg tẽebã wɛɛngẽ?
6 Mark sak 13 pʋgẽ, d yãta kɩbar a to sẽn wilg a Zezi sẽn sagl a karen-biisã, n yet-b tɩ b ket n gũusdẽ. Zĩ-kãngã, a Zezi makda b sẽn da be zĩig ningã ne zak noor gũud sẽn gũud t’a zu-soab yi so-toak weoog n wa. Gũudã ra pa mi a zu-soabã lebgr lɛɛr ye. A ra segdame bal n ket n gũusdẽ. A Zezi goma gũub sasa a naas yelle, t’a zu-soabã ra tõe n wa sasa kãens pʋsẽ. Sasa a naas-n-soabã kaoosa sẽn zems tõdbeoog lɛɛr a tãab n digd zĩ-yẽegre. Sasa kãnga, gũudã ra tõe n wa sɩnga suusg nana-nana. B wilgame tɩ sodaasã geta lɛɛr ning sẽn deng zĩ-yẽegrã sasa ning sẽn zems ne bɛ ling n yõke. Woto me, yaoolem day kãensã baasgẽ sẽn yaa wakat dũniyã sẽn gũbg tõndã sẽn gõe wʋsg tẽebã wɛɛngẽ wã, tõe tɩ d segdame n mao wʋsg n yɩɩd pĩndã, n tõog n ket n gũusdẽ. (Rom dãmba 13:11, 12) Rẽ n so tɩ makr ning a Zezi sẽn dɩka pʋgẽ, a sagl woto n yɩlme: “Gũus-y neere . . . Woto yĩnga, bɩ y gũ . . . Bũmb ninga mam sẽn yet yãmba, mam yeta neba fãa. Bɩ y gũ.”—Mark 13:32-37.
7. Yel-bʋg n sɩd yɛgd tõndo, la rẽ wɛɛngẽ Biiblã sagl-bʋg la d karemd wakat fãa?
7 A Zezi koe-moonegã wakat la a vʋʋgrã poor me, a sagla a karen-biisã naoor wʋsg tɩ b gũusi. Sɩda, wakat fãa la bala, Gʋlsg Sõamyã sã n gomd zãmaan-kãngã saab yelle, d neeme tɩ b keoogd-d lame tɩ d ket n gũusdẽ. * (Luk 12:38, 40; Wilgri 3:2; 16:14-16) Vẽenega, suusgã tẽebã wɛɛngẽ yaa yell sẽn sɩd yɛgd-do. Keoog-kãensã segda ne tõnd fãa!—1 Korẽnt dãmba 10:12; 1 Tesalonik rãmba 5:2, 6.
A Zezi tʋm-tʋmdb a tãab sẽn pa tõog n gũ
8. Gɛtsemane zẽedẽ wã, a Zezi tʋm-tʋmdb a tãab maana wãn to, a sẽn yeel-b tɩ b ket n gũudẽ wã?
8 Wa a Pɩɛɛre, a Zak la a Zã makrã sẽn wilgdã, ket n gũudẽ wã pa f sẽn na n tʋll dẽ maaneg bal ye. Ra-kãensã b tãabã ra tara tẽebo, la ra yaa neb sẽn tũ a Zezi ne kɩs-sɩda, n da nong-a wʋsgo. Baasg zãnga, yʋʋmd 33, Nizã rasem 14, b pa tõog n pa gũs ye. Tʋm-tʋmdb a tãabã sẽn maan Pakã n sa wã yii etaasã roogẽ n yãag a Zezi Gɛtsemane zẽedẽ wã, t’a yeel-b beenẽ tɩ: “Sũ-sãoong n tar maam hal t’a rat n yɩ kũum. Bɩ y pa ka n gũ ne maam.” (Matɩe 26:38) A Zezi pʋʋsa a saasẽ Ba wã naoor a tãab ne a sũur fãa, la naoor a tãabã a leba a zo-rãmbã nengẽ, n tɩ mik tɩ b gõeyã.—Matɩe 26:40, 43, 45.
9. Tõe tɩ yaa bõe n wa ne tʋm-tʋmdbã suusgu?
9 Bõe yĩng tɩ baraar yʋngo ra-kãensã sẽn tar kɩs-sɩdã pa tõog n tũ a Zezi sẽn da ratã? Yaams n da tar-ba, tɩ zĩigã zʋʋge, tõe tɩ yʋʋn-sʋk ra loogame, tɩ ‘gõeem tar-ba.’ (Matɩe 26:43) Baasg zãnga a Zezi yeelame: “Bɩ yãmb gũ la y pʋʋse n da wa kẽ makr ye. Sɩɩga ratame la yĩnga ka pãng ye.”—Matɩe 26:41.
10, 11. a) Baa ne a yaamsã, yaa bõe n sõng a Zezi t’a pa gũs Gɛtsemane zẽedẽ wã? b) A Zezi sẽn yeel a tʋm-tʋmdb a tãabã tɩ b gũus tɩ b yaool n pa tõog n maan dẽ wã zãmsda tõnd bõe?
10 Sãmbg sẽn ka be, yʋʋn-kãng sẽn da pa wõnd a taabã a Zezi me ra yaame. A pa gũs ye, la a rɩka sẽk bilf ning sẽn da ketã n pʋʋs ne a sũur fãa. Rasem a wãn sẽn deng rẽ, a ra sagla a karen-biisã tɩ b pʋʋse, n yeel-b woto: “Dẽ yĩnga bɩ y gũ la y pʋʋs daar fãa n paam pãng n põs bõn-kãens fãa sẽn na n wa wã, la y yals Ninsaal Biiga taoore.” (Luk 21:36; Efɛɛz rãmba 6:18) Tõnd sã n tũ a Zezi saglgã la a mak-sõngã pʋʋsgã wɛɛngẽ, pʋʋsg nins d sẽn taasd a Zeova ne d sũy fãa wã na n sõng-d lame tɩ d ra gũs tẽebã wɛɛngẽ ye.
11 Yaa sɩd t’a Zezi ra miime tɩ ra pa na n kaoos la b yõk-a, n kao a bʋʋd n kʋ-a, la rẽ wẽnd t’a karen-biisã ra pa mi woto ye. A toogã ra na n taa a zug tẽn-sʋk namsg ra-lukã zugu. A Zezi reng n togsa a tʋm-tʋmdbã yel-kãensã, la b pa wʋm a sẽn da yetã võor ye. Rẽ n so tɩ b ra gõe a Zezi sẽn da ket n pʋʋsdẽ wã sasa. (Mark 14:27-31; Luk 22:15-18) Wa sẽn da yaa to-to ne tʋm-tʋmdbã, tõnd me pãngã paoodame, la yɛl n be tɩ d nan pa miẽ ye. Ne rẽ fãa, tõnd sã n pa bãng vẽeneg tɩ d sẽn vɩ wakat ningã yaa yãgb wakate, d tõe n gũsa tẽebã wɛɛngẽ. Yaa tõnd sẽn na n gũusdẽ bal la d tõe n da gũs ye.
Zʋg-sõma a tãab sẽn yaa tɩlae
12. Zʋg-sõma a tãab bʋs la a Poll rɩk n tɩ loe ne d yamã sẽn ket n vẽen sõma wã?
12 D na n maana wãn n da yĩm tɩ d vɩɩ yel-yãgdem wakate? Tõnd zoe n yãa pʋʋsgã yõod sẽn ta zĩig ninga, la tɩ d segd n ket n ningda a Zeova daarã d yamẽ. Sẽn paase, a Poll wilgda zʋg-sõma a tãab sẽn yaa tɩlae d sẽn segd n talle. A yeelame: “La tõnd sẽn yaa wĩntoog kambã, bɩ d da yɩ rã-yũudb ye [“d tall yam sẽn ket n vẽen sõma,” NW ], la bɩ d bob tẽeb la nonglem tɩ yɩ tõnd gãongo, la d fõgen fãagr tẽeb tɩ yɩ kut pugla.” (1 Tesalonik rãmba 5:8) Koɛɛg-koɛɛga, bɩ d ges tẽebã, saagrã la nonglmã sẽn tõe n sõng tõnd to-to tɩ d ra gũs tẽebã wɛɛngẽ ye.
13. Wãn to la tõnd tẽebã sõngd tõnd tɩ d ket n gũudẽ?
13 D segd n kɩsa sɩd t’a Zeova sɩd beeme la t’a ‘yaa neb nins sẽn baood-a wã roanda.’ (Hebre dãmba 11:6) A Zezi bãngr-gomdã saabã wɛɛngẽ sẽn paam pipi pidsg pipi yʋʋm kob-gĩndẽ wã kɩtdame tɩ d tẽ sõma n paas t’a na n paama pids-kãseng tõnd wakatã me. Sẽn paase, tõnd tẽebã sõng-d lame tɩ d ket n gũud a Zeova daarã ne d sũy fãa, tɩ d tar hakɩk tɩ “[yãabã sẽn yaa bãngr-gomdã] na n maaname n ka vaal ye.”—Habakuk 2:3.
14. Wãn to la saagrã yaa tɩlae, d sã n dat n ket n gũusdẽ?
14 Tõnd saagrã sẽn yaa waazibã yaa wa “tõnd sɩɩg baare,” sẽn sõngd tõnd tɩ d sã n wa be zu-loees pʋgẽ bɩ d yals kãn-kãe, baa sã n yaa tɩlae tɩ d yaas n gũ Wẽnnaam kãabsã pidsg sẽn yaa waazibã. (Hebre dãmba 6:18, 19) A Margaret yaa saam-bi-poak sẽn paam vʋʋsem sõng zaeebo, a yɩɩda yʋʋm 90, a reega lisg sẽn yɩɩd yʋʋm 70 sẽn looge. A sak n deega woto: “Mam sɩdã sẽn da wa n kiid kãnsɛɛrã bãag poorẽ yʋʋmd 1963, mam tagsame tɩ yɩtẽ-la sõma wʋsgo, saabã sã n da waẽ tao-tao. La masã, m mikame tɩ m da tagsda m meng ratem yell n yɩɩda. Rẽ wẽnde, tõnd ra pa mi koe-moonegã tʋʋmd sẽn da na n paam pãng to-to dũniyã gill zug ye. Baa masã, zĩis wʋsg n ket n be tɩ yaa tʋʋmdã sẽn nan sɩngd bala. Rẽnd m sũur yaa noogo, a Zeova sẽn tall sũ-marã.” Tʋm-tʋmd a Poll kõo tõnd bas-m-yam woto: “Sũ-mar wata ne tõogr makr pʋga, la tõogr kãng kɩtdame tɩ tõnd gũ tõnd tẽeb pidsgu. La tẽeb pidsg gũudum ka belgd ye.”—Rom dãmba 5:3-5.
15. Wãn to la nonglmã na n kõ tõnd yẽesem, baa sã n wõnd d gũuda hal sẽn kaoose?
15 Nonglem ning kiris-neba sẽn tara yaa bõn-kãseng wʋsgo, bala yaa rẽ n kɩtd tɩ d maand bũmba fãa. Yaa tõnd sẽn nong a Zeova wã yĩng la d sẽn maand a raabã, la pa tɩ loe ne wakat ning a sẽn yãk n na n maan yɛlã ye. D sẽn nong neb a taabã kɩtdame tɩ d moon Rĩungã koe-noogo, baa Wẽnnaam daabã sẽn baood tɩ d maan dẽ tɩ kaoos to-to fãa, la baa sã n yaa naoor wʋsg la d segd n lebg n tɩ ges nin-kãens b yiyã. Wa a Poll sẽn gʋlsã: “Bõn-kãens a tãaba ka sɛt ye, sẽn yaa tẽebo la tẽeb pidsg gũudum la nonglem. La sẽn yɩɩd fãa bãmb sʋka yaa nonglem.” (1 Korẽnt dãmba 13:13) Nonglmã kɩtdame tɩ d ket n maan sũ-mare, la a sõngd tõnd tɩ d ket n gũusdẽ. “[Nonglem] gũuda a tẽeb pidsg ne bũmb fãa, la a tõe n tõoga toog fãa pʋgẽ. Nonglem ka sɛt abada.”—1 Korẽnt dãmba 13:7, 8.
“Bɩ y tall bũmb nins yãmb sẽn tarã”
16. Walla tɩ d maan laas-laase, yaa manesem bʋg la d segd n talle?
16 Tõnd vɩɩ wakat sẽn pa reem yell sasa, tɩ dũniyã yɛl tẽegd tõnd wakat fãa tɩ d vɩɩ yaoolem dayã baasgẽ. (2 Tɩmote 3:1-5) Masã pa laas-laas maaneg wakat ye, la yaa wakat d sẽn segd n ‘kell n gãd d sẽn tara neere.’ (Wilgri 3:11, Sebr Sõngo) D sã n ‘gũus la d wɩng ne pʋʋsgo,’ n bɩɩsd tẽebo, saagr la nonglem, d na n segla sõma makr wakat yĩnga. (1 Pɩɛɛr 4:7) Tõnd tara bũmb wʋsg n na n maan Zusoabã tʋʋmdẽ. D sã n tʋmd wẽn-sakr tʋʋm wʋsgo, na n sõng-d lame tɩ d ket n gũusd sõma.—2 Pɩɛɛr 3:11.
17. a) Bõe yĩng tɩ wakat ningã tõnd gẽegrã sẽn pa pidsã pa segd n koms d raoodo? (Ges-y zĩ-gũbr ning sẽn be seb-neng 31 pʋgẽ wã.) b) Wãn to la d tõe n dɩk a Zeova togs-n-taare, la bark bʋs n gũud neb nins sẽn maand woto wã?
17 A Zeremi gʋlsa woto: “Zusoaba yaa mam pʋɩɩre. Yaa rẽ n kɩt tɩ mam na n tẽ bãmba. Zusoaba maanda neb nins sẽn teeg bãmba la b baood bãmba neere. Ned sã n sĩnd bala n gũ Zusoaba fãagre, yaa neere.” (Wiisgu 3:24-26) Kẽer sɩngã gũub sẽn nan pa kaoos bala. Kẽer gũuda a Zeova fãagrã sẽn na maan yʋʋm wʋsgo. La gũub wakat kãng sɩd yaa koɛɛg wʋsgo, b sã n mak-a ne wakat sẽn-kõn-sa wã sẽn watã! (2 Korẽnt dãmba 4:16-18) La d sẽn gũud wakat ning a Zeova sẽn yãkã, d tõe n bɩɩsa zʋg-kãsems nins sẽn segd ne kiris-nedã, la d sõng neb a taabã tɩ b rɩ a Zeova sũ-marã nafa, la b sak sɩdã. Woto, bɩ tõnd fãa ket n gũusdẽ. Bɩ d rɩk a Zeova togs-n-taar n tall sũ-mare, n tar mi-beoog ne saagr ning a sẽn kõ-dã. La d sẽn gũusd kɩs-sɩd pʋgẽ wã sasa, bɩ d ket n gãt d vɩɩm sẽn pa satã saagr kãn-kãe. Rẽ, kãab-kãensã na n sɩd pidsa tõnd zutu: “[A Zeova] na n zẽka foom tɩ f soog tẽnga. Fo na n yãa nin-wẽns sãoongo.”—Yɩɩl Sõamyã 37:34.
[Tẽngr not rãmbã]
^ sull 5 D sã n lebg-y n ges yɛl a yoobã sẽn kõt kaset tɩ d vɩɩ ‘yaoolem wakatã,’ sẽn be yʋʋmd 2000, wao-fugdg kiuug pipi daar Gũusg Gasgã, seb-neng a 6-7 pʋgẽ wã, sõngd-d lame.—2 Tɩmote 3:1.
^ sull 7 Gɛrk gom-biig ning tõnd sẽn lebg tɩ ‘ket n gũudẽ’ wã, gom-biis mit a Vine wilgame t’a võorã sɩd-sɩdã yaa ‘zãag f meng ne gõeem,’ la t’a “wilgda neb sẽn gũud bũmbu, la pa b sẽn na n pa gõe bal ye.”
Wãn to la y na n leoke?
• Wãn to la d tõe n kɩs sɩd n paas tɩ zãmaan-kãngã saab kolgame?
• Bõe la a Pɩɛɛre, a Zak ne a Zã makrã tõe n zãms tõndo?
• Zʋg-sõma a tãab bʋs n na n sõng tõnd tɩ d ket n gũusd tẽebã wɛɛngẽ?
• Bõe yĩng tɩ wakat kãngã yaa wakat d sẽn segd n ‘kell n gãd d sẽn tarã neere’?
[Zãmsgã sogsgã]
[Zĩ-gũbri/Foto, seb-neng 31]
‘Sũ-noog soab la ned ning sẽn ket n gũudẽ wã.’—Daniɛll 12:12.
Mams-y n ges gũud sẽn na n tagsdẽ tɩ wagdr n dat n wa zu teed nins yẽ sẽn gũudã. Yʋng sẽn ta, bũmb sẽn yɩ pẽra fãa gũudã tʋbr yaa keoo n tẽed tɩ wagdrã n wate. Wakat fãa, a maooda ne kelgr la gẽesgo. Rãamd sẽn pa wagdrã rãamd tõe n belg-a lame. Tõe tɩ yaa sebg n maan tɩ tɩɩg miimdĩ bɩ yũug n tus bũmb n lubi.—Luk 12:39, 40.
Yɛlã tõe n wa wõnda woto ne neb nins sẽn “gũud tõnd Zusoab a Zezi Kirist pukrã [ne yãgbã, NW ].” (1 Korẽnt dãmba 1:7) Tʋm-tʋmdbã tagsame t’a Zezi ra “na n deega Israɛll soolma” a vʋʋgrã poor bilf bala. (Tʋʋma 1:6) Yʋʋm loogr poore, yɩɩ tɩlae tɩ b tẽeg kiris-nebã sẽn be Tesalonikã t’a Zezi belma a Rĩungã naam pʋgẽ wã ra yaa bũmb sẽn da wat beoog-daare. (2 Tesalonik rãmba 2:3, 8) Ne rẽ fãa, saagr ning b sẽn tar a Zeova daarã wɛɛngẽ sẽn pa pidsã pa kɩt t’a Zezi pipi karen-biisã bas sor ning sẽn tar n debd vɩɩmẽ wã ye.—Matɩe 7:13.
Rũndã-rũndã me, sẽn wõnd zãmaan-kãngã saabã kaoosdame tɩ sãamd d sũyã pa segd n kɩt tɩ d bas gũusg ye. Rãamd sẽn pa wagdr rãamd tõe n belga gũud sẽn gũusdi, la a segd n ket n gũusdame! Ya a tʋʋmd la rẽ. Yaa woto me ne kiris-nebã.
[Foto rãmba, seb-neng 29]
Tigissã, pʋʋsgã la Wẽnnaam Gomda zãmsg sõma sõngda tõnd tɩ d ket n gũusdẽ