Bɩ y gũus n yɩɩg pĩnda!

“Bɩ d ra gũs wa neb a taabã ye, la bɩ d kell n gũus la d tall yam sẽn vẽen sõma.”—1 TESALONIK RÃMBA 5:6, NW.

1, 2. a) Põmpei ne Hɛrkulanom ra yaa tẽn-bʋs buudu? b) Keoog-bʋg la Põmpei ne Hɛrkulanom neb wʋsg ra pa sak n tũ, tɩ baas ne bõe?

PIPI yʋʋm kob-gĩndẽ Kirist zãmaana pʋgẽ, Põmpei ne Hɛrkulanom ra yaa Rom tẽns a yiib sẽn da be Vezuuv tãngã sɛɛgẽ, n tar arzɛgse. Rom rakãagb wʋsg ra nong n kẽnda be n deemdẽ la b vʋʋsdẽ. B reemã zĩis ra tõe n deega sẽn yɩɩd neb tusri, la reem zĩ-kãseng n da be Põmpei n da tõe n deeg tẽngã neba fãa la bala. Põmpei raboodã vaeesdb sõda rã-rot 118, tɩ bãmb kẽer da yaa reem n bao ligd bɩ pʋg-yoaadb roto. Gʋlb nins sẽn da be lalsã zut la te-kʋd kɛl b sẽn yã wã wilgame tɩ yoobã la laogã nonglem da piuuga be.

² Yʋʋmd 79, sa-sik kiuug rasem 24, Vezuuv tãngã sɩnga pusgri. Tãng pusgr mitbã tẽedame tɩ pipi pusgrã sẽn tãoos tãn-tʋʋlg la tom-pɛglem tɩ ni wa saag tẽns a yiibã zutã, pa gɩdg nebã fãa põsb ye. Sɩd me yaa wa neb wʋsg n põse. La neb a taab n pa reeg tɩ yellã yaa sɩd ye. Tõe tɩ b pa sak tɩ pusgra wilgdame tɩ yell n wat ye. Rẽ n so tɩ b yãk yam n pa be. La sẽn wa n ta yʋn-sʋk sẽnẽ, Hɛrkulanom tãngã yik n wurdame n pusg n yiisd walem sẽn tʋʋl wʋsg la tãnd ne kug sẽn yẽneg n zoet wa bɛgd n kɩt tɩ neb nins fãa sẽn da pa tẽnga pʋgẽ wã pa tõe n vʋʋse, tɩ b ki. Yibeoog pĩnda, Põmpei tãngã me pusga woto n kʋ tẽngã neb fãa. Tãngã sẽn pusg pipi tɩ b pa rɩk yam n zoeyã sɩd baasa ne yel-beed menga!

Zʋɩf rãmbã zãmaan saabo

3. Bõe wõneg n be Zerizalɛm sãoongã, la Põmpei ne Hɛrkulanom rẽndã sʋka?

³ Baas-beed ning sẽn paam Põmpei ne Hɛrkulanomã pa kolg tẽn-kũum ning sẽn paam Zerizalɛm yʋʋm a wɛ sẽn deng rẽ wã, baa ne sẽn tũ ne ninsaalb sabab tɩ yel-be-kãng zĩndã ye. B wilgame tɩ “tẽns nins b sẽn gũbg n zab ne wã sʋka, rẽ zĩnda wẽnem sẽn yɩɩg-bã sʋka,” la tɩ sẽn yɩɩd Zʋɩf rãmb milyõ n ki zab-kãng pʋgẽ. La wala yel-beed ning sẽn paam Põmpei ne Hɛrkulanomã, b reng n keooga nebã tɩ Zerizalɛm sãoongã yaool n wa.

4. Bãnd bʋg la a Zezi reng n togs a karen-biisã sẽn na yɩl n keoog-b tɩ zãmaan saab n da kolge, la wãn to la rẽ reng n paam pidsg pipi yʋʋm kob-gĩndẽ wã?

⁴ A Zezi Kirist ra reng n togsame tɩ b na n sãama Zerizalɛm, la a reng n wilg yɛl nins sẽn na n zĩnd tɩ rẽ yaool n wa wã. Yaa yel-beed wala zaba, kom, tẽn-digimdg la tõogã kɩɩsgo. Ziri no-rɛɛsdb me n da na n puki, la Wẽnnaam soolem koe-noogã me ra na n moona dũniyã gill zugu. (Matɩe 24:4-7, 11-14) Yaa sɩd t’a Zezi goamã paamda b pids-kãseng rũndã-rũndã, la b paama pidsg-bilf rẽ wẽndẽ me. Pĩnd yɛlã wilgame tɩ kom-kãseng n zĩnd Zide soolmẽ wã. (Tʋʋma 11:28) Pĩnd yɛl mit a Zozɛf sẽn da yaa Zʋɩfã wilgame tɩ tẽn-digimdug n zĩnd Zerizalɛm soolmẽ wã bilf sẽn deng galʋ-tẽngã sãoongo. Zerizalɛm sãoongã sẽn da kolgdã, tẽn-gudgr n da be wakat fãa. Zʋɩf politik sul toɛy-toɛy n da wẽneg n zabd taaba, la tẽns kẽer pʋsẽ b naaga Zʋɩf rãmb la bu-zẽms neb sẽn da be be n kʋ. Baasg zãnga, b ra moonda Rĩungã koe-noog “dũniyã fãa.”—Kolos rãmba 1:23.

5, 6. a) A Zezi bãngr-gom-bʋg n pids yʋʋmd 66? b) Bõe yĩng tɩ neb wʋsg ki woto, b sẽn wa n baas n tõog Zerizalɛm yʋʋmd 70 wã?

⁵ Sẽn na n baase, yʋʋmd 66, Zʋɩf rãmbã tõdga Rom sakre. A Sɛstius Gallus sẽn tall a  sodaasã n wa gũbg Zerizalɛm n na n zab ne wã, a Zezi karen-biisã tẽega a sẽn da yeelã: “Yãmb sã n wa yã tɩ sodaas wʋsg gũbg Zerizalɛm, dẽ, bɩ y bãng t’a sãoong kolgame. Wakat kãnga neb nins sẽn be Zide, bɩ b zoe n kẽng tãens zutu. La neb nins sẽn be Zerizalɛm, bɩ b yi. La neb nins sẽn be wetẽ, bɩ b ra kẽ tẽnga pʋgẽ ye.” (Luk 21:20, 21) Wakat taame tɩ b segd n yi Zerizalɛm. La yaa wãn to? Linga neba, a Gallus sẽn wa n lebg n loog ne a sodaasã, tɩ rẽ pak sor tɩ kiris-neb nins sẽn be Zerizalɛm ne Zide wã tõog n sak a Zezi noorã n zoe n kẽng tãensẽ wã.—Matɩe 24:15, 16.

⁶ Yʋʋm a naas loogr poore, Pakã sasa sẽnese, Rom sodaasã lebg n waa ne b naab a Titus, la so-kãngã yaa sẽn na yɩl n sɩd kɩt tɩ Zʋɩf rãmbã tõdgrã sa ne pãnga. A tãb-biisã ‘tuu bok n gilg n gũbg’ Zerizalɛm, n kɩt tɩ ned ye pa tõe n yi n põs ye. (Luk 19:43, 44) Baa ne zabrã sẽn da rat n yikã, Zʋɩf rãmbã sẽn be Rom soolma fãa pʋgẽ wã kaoog n kẽnga Zerizalɛm n na n tɩ rɩ Pak kibsa. B ra kẽe tẽngã pʋgẽ tɩ yiib ye pa tõe ye. Sã n yaa ne a Zozɛfo, yaa sãam-kãens sẽn yɩ zu-beed rãmbã la Rom sodaasã kʋ n yɩɩge. * B sẽn wa n baas n tõog Zerizalɛmã, sẽn zems Zʋɩf rãmbã sẽn be Rom soolmẽ wã fãa yembr yopoe zug n ki. Zerizalɛm ne a wẽn-doogã sãoong yɩɩ Zʋɩf soolmã ne a tũudmã sẽn tik a Moiiz Tõogã zugã saabo. *—Mark 13:1, 2.

7. Bõe yĩng tɩ kiris-neb nins sẽn tar tẽebã põs Zerizalɛm sãoongã?

⁷ Yʋʋmd 70, b ra tõe n lame n kʋ Zʋɩf rãmb nins sẽn da yaa kiris-nebã bɩ n ning-b yembd pʋgẽ wa neb a taabã fãa sẽn da be Zerizalɛmã. La sã n yaa ne pĩnd yɛlã kaseto, b tũu keoogr ning a Zezi sẽn kõ yʋʋmd 37 sẽn dengã. B zoe n yii tẽngã n pa leb be ye.

Keoogr sẽn zems a wakat tʋm-tʋmdbã sẽn kõ

8. A Pɩɛɛr yãame tɩ bõe n da segd ne kiris-nebã, la yaa wa a Zezi gom-bʋs n da be a yamẽ?

⁸ Rũndã-rũndã, sãoong sẽn yaa kãseng n yɩɩd woto, sẽn na n menems zãmaan wẽng kãngã n kolge. Yʋʋm a yoob sẽn deng Zerizalɛm sãoongã, tʋm-tʋmd a Pɩɛɛr kõo saglg sẽn yaa yãgb bũmb la sẽn zems a wakat sẽn pak tõnd wakatã kiris-neb n tɩ yɩɩda: Bɩ y gũusi! A Pɩɛɛr da gesame tɩ kiris-nebã segd n ‘neka b yam sõma’ sẽn na yɩl n da yĩm ‘Zusoab a Zezi tõogã ye.’ (2 Pɩɛɛr 3:1, 2) A sẽn sagend kiris-nebã tɩ b gũusã, yaa wa sẽn da be a Pɩɛɛr yamẽ wã yaa bũmb ning a sẽn da wʋm a Zezi nengẽ, a sẽn da wa n yeel a tʋm-tʋmdbã rasem a wãn sẽn deng a kũumã. A yeela woto: “Gũus-y neere. Bɩ y gũ, tɩ bõe, yãmb ka mi wakat ninga ra-kãng sẽn na n wa ye.”—Mark 13:33.

9. a) Tags-bʋg sẽn yaa yell la neb kẽer tall-yã? b) Bõe yĩng tɩ tẽeb kaalem yaa yell n tɩ yɩɩd fãa?

⁹ Rũndã-rũndã, kẽer tõe n togsa woto ne laado: “Bãmb waoong kãabg bee yɛ?” (2 Pɩɛɛr 3:3, 4) Vẽenega, nin-kãensã tagsdame tɩ yɛlã sɩd zɩ n toeeme, la tɩ ket n yaa wa dũniyã naaneg sɩngrẽ. Tẽeb kaalem woto yaa yelle. Sãmb-sãmb tõe n kɩtame tɩ d ye pa tagsdẽ tɩ saabã kolgame ye, tɩ rẽ kɩt tɩ d baood n na n noog d yõor tɩ loog noore. (Luk 21:34) Sẽn paase, a Pɩɛɛr wilgame tɩ sẽn laad-bã yĩma a Nowe wakatẽ sãoong sa-kãsengã sẽn sãam dũniyã neb gillã. Dũniyã sɩd wa n toeema rẽ wẽnde!—Sɩngre 6:13, 17; 2 Pɩɛɛr 3:5, 6.

10. Ne gom-bʋs la a Pɩɛɛr kengd neb nins sẽn tõe n wa bas sũ-mar tallgã raoodo?

¹⁰ A Pɩɛɛr sõngda a karemdbã tɩ b tall sũ-mare, n tẽegd-b bũmb ning sẽn kɩt tɩ Wẽnnaam pa nong n yɩ tao-tao n kao bʋʋdã. Pipi, a Pɩɛɛr yetame: “Yaa tɩ ne Zusoabã, daar a ye wẽnda yʋʋm tusri, la yʋʋm tusri wẽnda daar a ye.” (2 Pɩɛɛr 3:8) A Zeova sẽn vɩ wakat sẽn kõn sa wã yĩnga, a tõe n bãnga yɛl nins fãa sẽn kɩt tɩ yaa woto wã, n yãk wakat ning sẽn  zems n yɩɩdã n kẽes a toogo. Rẽ, a Pɩɛɛr wilgdame t’a Zeova tʋllame tɩ zĩig fãa bɩ nebã tek yam n kos sugri. Wẽnnaam sũ-marã fãagda neb wʋsg sẽn da na n sãamẽ, a sã n da yãgẽ lame n kao b bʋʋdo. (1 Tɩmote 2:3, 4; 2 Pɩɛɛr 3:9) La a Zeova sẽn tar sũ-marã pa rat n yeel t’a pa na n tol n kao bʋʋd ye. ‘Zusoaba daar na n waa wa wagdre.’ Woto la a Pɩɛɛr yeta.—2 Pɩɛɛr 3:10.

11. Bõe n na n sõng tõnd tɩ d ket n gũusd tẽebã wɛɛngẽ, la wãn to la rẽ na n kɩt tɩ yɩ wa a Zeova daarã ‘wata tao-tao’?

¹¹ A Pɩɛɛr sẽn dɩk makr ningã zemsa kɛpɩ. Wagdr yõkr yaa toogo, la ned sẽn gũud yʋng tõr n pa gõe tõe n yãa wagdr nana n yɩɩd ned ning sẽn suusd wakat-wakate. Wãn to la gũud tõe n da gũsi? Gũud sã n yikd n gilgdẽ, sõngd-a lame t’a gũus sõma n yɩɩd a sẽn na n zĩ zĩ-yɛng yʋngã tõre. Woto me, tõnd sẽn yaa kiris-nebã, d sã n tʋmd tẽebã tʋʋma na n sõng-d lame tɩ d kell n da gũs ye. Woto, a Pɩɛɛr sagenda tõnd tɩ d ket n yaa “neba b yel-manesem sẽn yaa sõama la sẽn sakd Wẽnnaam.” (2 Pɩɛɛr 3:11) D sã n maan woto na n sõnga tõnd tɩ d ket n “ningd a Zeova daarã d yamẽ wakat fãa” (NW ). Gɛrk gom-biig ning sẽn lebg tɩ ‘ning y yamẽ wakat fãa’ wã b tõe n lebg-a lame tɩ “kɩt tɩ wa tao-tao.” (2 Pɩɛɛr 3:12, Kãab-paalgã Koe-noogo) Yaa sɩda, tõnd pa tõe n toeem wakat ning a Zeova sẽn yãkã ye. A daarã na n waa wakat ning a sẽn yãkã. La nananda, tõnd sã n kẽesd d meng wʋsg a Zeova tʋʋmdã pʋgẽ, d pa na n ges t’a raarã kaoosdame ye.—1 Korẽnt dãmba 15:58.

12. Wãn to la tõnd ned kam fãa tõe n dɩ a Zeova sũ-marã nafa?

¹² Woto yĩnga, bɩ ned ning fãa sẽn get t’a Zeova daarã kaoosdame tũ a Pɩɛɛr sẽn sagl tɩ d gũ wakat ning a Zeova sẽn yãkã ne sũ-mare. D sɩd tõe n tũnuga Wẽnnaam sũ-marã n dɩk sẽk ning sẽn ketã n tʋm ne yam. Wala makre, d tõe n ket n bɩɩsda zʋg nins sẽn yaa tɩlae ne kiris-nebã la d moond koe-noogã neb wʋsg n paase. Rẽ ra pa na n tõoge, Wẽnnaam sũ-marã sã n da kaẽ ye. Tõnd sã n ket n gũusdẽ, zãmaan-kãngã saabẽ a Zeova na n yãame tɩ tõnd ‘ka tar dẽgd tosb bɩ dõdb ye.’ (2 Pɩɛɛr 3:14, 15) Ad woto na n sɩd yɩɩ bark menga!

13. A Poll gom-bʋs a sẽn taas Tesalonik kiris-nebã n zems n tɩ yɩɩd fãa rũndã-rũndã?

¹³ A Poll me wilgame tɩ b segd n ket n gũusdame, a pipi lɛtr ning a sẽn taas Tesalonik kiris-nebã pʋgẽ. A saglame: “Bɩ d ra gũs wa neb a taabã ye, la bɩ d kell n gũus la d tall yam sẽn vẽen sõma.” (1 Tesalonik rãmba 5:2, 6, NW ) Rũndã-rũndã, zãmaan wẽngã gill sãoong sẽn kolgdã yĩnga, ad woto sɩd yaa tɩlae! A Zeova balemdbã bee dũni sẽn pid ne neb sẽn maand yam-kaalg ne tẽebã yɛl sʋka, la woto tõe n mad-b lame. Yaa rẽ yĩng la a Poll sẽn sagend woto wã: “[Bɩ d tall yam sẽn vẽen sõma,” NW ], bɩ d da yɩ rã-yũudb ye, la bɩ d bob tẽebo la nonglem tɩ yɩ tõnd gãongo, la d fõgen fãagr tẽeb tɩ yɩ kut pugla.” (1 Tesalonik rãmba 5:8) D sã n zãmsd Wẽnnaam Gomdã wakat fãa la d tigimd wakat fãa ne d saam-biisã, na n sõng-d lame tɩ d tũ a Poll saglgã n ket n neẽ tɩ saabã kolga wʋsgo.—Matɩe 16:1-3.

Neb milyõ rãmb n ket n gũusdẽ

14. Sõor bʋs n wilgd tɩ rũndã-rũndã, neb wʋsg tũuda a Pɩɛɛr saglgã n ket n gũusdi?

¹⁴ Rũndã-rũndã, neb wʋsg n tũud saglgã vʋʋsem sõng sẽn vẽnegã n ket n gũusdẽ bɩ? N-ye. Yʋʋmd 2002 tʋʋmd yʋʋmdã sasa, koe-moondbã sõor sẽn sãd yaa 6 304 645, sẽn makd fɩɩgr sẽn yaa 3,1 koabg zugu, b sã n mak ne yʋʋmd 2001 sẽn loogã rẽnda. Rẽ kõta kaset tɩ b ket n gũusda tẽebã wɛɛngẽ, bala b rɩka lɛɛr 1 202 381 302 n moon b taabã Wẽnnaam Rĩungã. Tʋʋm-kãng pa yam-kaalg tʋʋmd ne nin-kãensã ye. A yaa bũmb b sẽn ning pipi zĩigẽ b vɩɩmã pʋgẽ. Bãmb wʋsg sẽn tall manesem ningã yɩɩ wa a Eduardo la a Noemi sẽn yit Salvadoor tẽngã sẽn tallã.

15. Yel-bʋg neb sẽn vɩɩmd Salvadoor n wilgd tɩ neb wʋsg ket n gũusda tẽebã wɛɛngẽ?

¹⁵ Yʋʋm a wãn sẽn looge, a Eduardo ne a Noemi tagsa a Poll gom-kãensã yell neere: “Dũni kãngã yɛlã tara toeengo.” (1 Korẽnt dãmba 7:31, NW ) B gĩdga b vɩɩmã n lebg wakat fãa so-pakdba. Sẽn wa n tar-n-tarẽ, b paama bark ne manesem wʋsgo, hali n kẽes b mens tigims gĩnd la tigims gind sul yɛl-gesg tʋʋmdã pʋgẽ. Baa ne b sẽn seg zu-loe-kãsemsã, a Eduardo ne a Noemi ra kɩsa sɩd tɩ b ra rɩka sard ning sẽn zemsã, b sẽn wa n bas b naarã vɩɩm n lebg wakat fãa so-pakdbã. Salvadoor be, koe-moondb 29 269, tɩ so-pakdb 2 454 paas bãmb sʋkã me talla mong-m-meng yam kãngã buudu. Yaa rẽ me n kɩt tɩ tẽngã paam fɩɩgr 2 koabg zugu, b sã n mak ne rɩẽ koe-moondbã sõore.

16. Tags-bʋg la saam-biig sẽn yaa bi-bɩɩg tall Kodivoaare?

¹⁶ Kodivoaare, manesem sẽn wõnd woto la kiris-ned sẽn yaa bi-bɩɩg tall-yã. Ad a sẽn gʋls tʋʋmd-willã: “Masã m yaa kãsemb sõngda. La m pa tõe n yeel saam-biisã tɩ b yɩ so-pakdb tɩ mam mengã pa kõt-b mak-sõng ye. Woto yĩnga, mam basa tʋʋm sẽn yaood sõma n tʋmd m meng masã, tɩ rẽ kõt-m sẽk n yɩɩd koe-moonegã yĩnga.” Bi-bɩɩg kãngã bee so-pakdb 983 sẽn be Kodivoaarã sʋka. Rɩẽ, tẽn-kãngã koe-moondbã sõor yɩɩ 6 701, tɩ yaa fɩɩgr a 5 koabg zugu.

17. Wãn to la Bɛlzik bi-bɩɩg sẽn ya a Zeova Kaset soab wilg tɩ yãg-n-sãbsã ra pa kẽesd-a rabeem?

¹⁷ Kisgrã, yãg-n-sãbsã la bu-welsgã ket n wata ne zu-loees n kõ Rĩungã koe-moondb 24 961 sẽn be Bɛlzikã. Ne rẽ fãa, b tara yẽesem, la b pa basd tɩ rabeem yõk-b ye. A Zeova Kaset soab sẽn tar yʋʋm 16 sẽn wʋm b sẽn bilg a Zeova Kaset rãmbã wa tũudum paalg sẽn pa sõma a karen-doogẽ wã, a kosa sor n na n wilg tɩ pa woto ye. A tũnuga ne kasɛt video ning sẽn yaa: Les Témoins de Jéhovah : un nom, une organisation wã, la seb-bil ning sẽn yaa: A Zeova Kaset rãmba: B yaa ãnd rãmba?, n tõog n  wilg a Zeova Kaset rãmbã sẽn sɩd yaa neb ninsi. B pẽga zãmsg ning rẽ sẽn kõ wã wʋsgo, tɩ semen ning sẽn pʋglã, b kõ karen-biis devoaar t’a sogsgã fãa tɩ loe ne a Zeova Kaset rãmbã sẽn yaa kiris-nebã tũudum.

18. Bõe n wilgd tɩ naongã pa kɩt tɩ Arzãntin la Mozãmbik koe-moondbã pa yals kãn-kãe tẽebã pʋgẽ?

¹⁸ Kiris-neb wʋsg segda zu-loe-kɛgems yaoolem day kãensã. Ne rẽ fãa, b maoodame n pa basd tẽeb ye. Baa ne nebã sẽn mi tɩ naong n tar Arzãntin tɩ wa ne zu-loeesã, Kaset rãmb sõor sẽn sãd 126 709 la b paam rɩẽ. Naongã ket n bee zĩis wʋsg Mozãmbiki. Baasg zãnga, b wilgame tɩ neb 37 563 n kõt kasetã, ne fɩɩgr sẽn yaa a 4 koabg zugu. Vɩɩmã yaa toog ne neb wʋsg Albani, la ne rẽ fãa b wilgame tɩ b paama fɩɩgr sẽn yaa 12 koabg zugu, n paam koe-moondb sõor sẽn sãd 2 708. Vẽenega, a Zeova sõgen dãmbã sã n ning Rĩungã pipi b vɩɩmã pʋgẽ, zu-loeesã pa tõe n gɩdg a vʋʋsem sõngã pãng ye.—Matɩe 6:33.

19. a) Bõe n kõt kaset tɩ sɩd ning sẽn be Biiblã pʋgẽ wã kom ket n tara neb wʋsg sẽn wõnd piisi? b) Yʋʋmdã kɩbay yel-bʋs a taab n wilgd t’a Zeova sõgen dãmbã ket n gũusda tẽebã wɛɛngẽ? (Ges-y taablo wã sẽn be seb-neng 22-25 wã.)

¹⁹ Biibl zãms rãmb 5 309 289 d sẽn paam dɩẽ dũniyã gill zugã wilgdame tɩ sɩd ning sẽn be Biiblã pʋgẽ wã kom ket n tara neb wʋsg sẽn wõnd piisi. A Zezi kũumã Tẽegr watb sõor paalg sẽn sãd sẽn yaa neb 15 597 746 sʋka, wʋsg nan pa maand a Zeova raabã ye. Bɩ b ket n paasd b bãngrã la b nonglmã ne a Zeova la ne b tẽeb pʋgẽ saam-biisã. Bee yamleoogo, d sẽn ne tɩ ‘piis a taabã’ ‘kʋʋng kãseng’ ket n womda biisi, b sẽn lagemd b saam-biis sẽn zae ne vʋʋsem sõngã n maand Naandã raab ‘wĩntoog ne yʋng a dooga pʋgẽ wã.’—Wilgri 7:9, 15; Zã 10:16.

A Lot kɩbarã sẽn zãmsd tõnd bũmb ningã

20. Bõe la a Lot ne a pagã makr zãmsd tõndo?

²⁰ Yaa sɩd tɩ wakat bilf pʋgẽ, tõe n wa zĩndame tɩ Wẽnnaam sõgen dãmbã meng yĩm tɩ saabã kolga wʋsgo. Tags-y a Abrahaam ba-biig biig a Lot yellã. Malɛgs a yiib n wa n ges-a n togs-a tɩ Wẽnnaam dat n sãama Sodom la Gomoor tao-tao. Kɩba-kãngã ra pa ling a Lot ye, bala a ‘ra sidgda wʋsg nin-wẽns kãens yel-manesem sẽn yaa wẽns tɩ looga yĩnga.’ (2 Pɩɛɛr 2:7) Baa ne rẽ, malɛgs a yiibã sẽn wa n na n tall-b n yiis Sodomã, a ra ket n ‘kaoosdame.’ Ra yɩɩ tɩlae la bal ne malɛgsã tɩ b gãd yẽ ne a zaka neb nus n peeg-b n yiis tẽngẽ wã. Rẽ poore, a Lot pagã pa kelg malɛgsã sẽn keoog-b tɩ b ra wẽneg n ges poorẽ wã ye. A maana yam-kaalg tɩ tũ ne a yõore. (Sɩngre 19:14-17, 26) “Bɩ y tẽeg a Lot paga yelle.” Woto la a Zezi keoog-yã.—Luk 17:32.

21. Bõe yĩng tɩ tar yõod wʋsg tɩ d ket n gũusd n yɩɩd pĩndã?

²¹ Põmpei ne Hɛrkulanom yel-beedã ne yɛl nins sẽn maan tɩ wa baas ne Zerizalɛm sãoongã, n paas a Nowe wakatẽ sãoong sa-kãsengã ne a Lot makrã fãa wilgdame tɩ d pa segd n deem ne keoogr nins b sẽn kõt-dã ye. D sẽn ya a Zeova sõgen dãmbã, d bãnga bãnd ning sẽn wilgd tɩ d bee saabã wakatã. (Matɩe 24:3) Tõnd welga d mens ne ziri tũudmã. (Wilgri 18:4) Wa yʋʋm pipi kob-gĩndẽ kiris-nebã, d segd n ‘gũuda a Zeova daara ne datem kãsenga.’ (2 Pɩɛɛr 3:12) N-ye, d segd n ket n gũusdame n yɩɩd pĩndã! Yaa bõe la d tõe n maane, la zʋg-bʋs la d segd n bao sẽn na yɩl n ket n gũusdẽ? Sõsg ning sẽn pʋgdã na n goma rẽ yelle.

[Tẽngr not rãmbã]

Wãn to la y na n leoke?

• Bõe n sõng kiris-neb nins sẽn yaa Zʋɩf rãmbã tɩ b põs Zerizalɛm sãoongã?

• Wãn to la sagls nins sẽn be tʋm-tʋmd a Pɩɛɛr la a Poll sɛbẽ wã sõngd tõnd tɩ d ket n gũusdẽ?

• Rũndã-rũndã, ãnd dãmb n kõt kaset tɩ b ket n gũusda sõma?

• Zãms-bʋg la a Lot ne a pagã kɩbarã kõt tõndo?

[Zãmsgã sogsgã]

 [Taablo, seb-neng 22-25]

A ZEOVA KASET RÃMBÃ TƲƲMD RAPOOR DŨNIYÃ GILL ZUGU, YƲƲMD 2002

(Ges-y volim relie wã pʋgẽ)

[Foto rãmba, seb-neng 26]

Kiris-nebã sã n ket n tʋmd tẽebã tʋʋma, sõngd-b lame tɩ b ket n gũusdẽ