‘Nong-y taaba’
‘Nong-y taaba’
“Yãmb sã n nong taaba, neba fãa na n bãngame tɩ yãmb yaa mam karen-biisi.”—ZÃ 13:35.
1. Bõe zug la a Zezi gom n tadg sẽn deng a kũumã?
“MAM kom-bõonego.” (Zã 13:33) Yaa ne bʋgsem woto la a Zezi gom ne a tʋm-tʋmdbã yʋng ning sẽn deng a kũumã. Evãnzill dãmbã kɩbay pʋsẽ, a Zezi ra zɩ n gom ne-b ne nimbãan-zoeer wʋsg wa ka wã ye. La baraar yʋngã sẽn da pa wõnd a taabã, a Zezi tũnuga ne nonglem goam woto sẽn na yɩl n wilg a karen-biisã t’a nong-b-la wʋsgo. Sɩda, a goma nonglmã yell naoor 30 baraar yʋngã. Bõe yĩng t’a gom n tadg nonglma zug woto?
2. Bõe yĩng tɩ nonglem tallg tar yõod wʋsg ne kiris-nebã?
2 A Zezi wilga bũmb ning sẽn kɩt tɩ nonglmã tar yõod wʋsg woto wã. A yeelame: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35; 15:12, 17) Yɩ Kirist karen-biig tɩ loee vẽeneg ne f sẽn na n wilg tɩ f tara nonglem ne f tẽeb saam-biisã. Pa ne fu-yerdɩ manesem bɩ ne yel-maandɩ sẽn pa wõnd a taab la b bãngd kiris-neb hakɩkã n welg ye, la yaa nonglem wʋsg sẽn naag ne sũ-bʋgsma b sẽn tar ne taabã. Nonglem kãngã buud sẽn yaa kãseng n yɩɩdã yaa yel-kãsems a tãabã b sẽn baood tɩ Kirist karen-biig tallã yiib-n-soaba, tɩ b gom dẽ yell sõsg ning sẽn loogã sɩngrẽ. Yaa bõe n na n sõng tõnd tɩ d ket n maand bõn-kãngã b sẽn baood tɩ d maana?
‘D maan woto n paas daar fãa’
3. Sagl-bʋg sẽn tɩ loe ne nonglmã la tʋm-tʋmd a Poll kõ-yã?
3 Wa sẽn yɩ to-to ne Kirist karen-biisã pipi yʋʋm kob-gĩndẽ wã, d nee nonglem kãseng kãngã buud rũndã-rũndã Kirist karen-biis hakɩkã sʋka. Tʋm-tʋmd a Poll gʋlsa pipi kiris-nebã woto: ‘Ne ba-biis nonglem yelle, yãmb ka baood tɩ mam gʋls n wilg yãmb ye; tɩ bõe, yãmb mens paama zãmsg Wẽnnaam nengẽ tɩ y nong taaba. La yãmb maanda ba-biisa fãa woto.’ Ne rẽ fãa a Poll paasame: ‘Wɩng-y ne nonglem kãng n paas daar fãa.’ (1 Tesalonik rãmba 3:12; 4:9, 10) Tõnd me segd n tũu a Poll saglgã ne d sũy fãa n modg n tall nonglem ne taab “n paas daar fãa.”
4. Sã n yaa ne a Poll la a Zezi, ãnd yell la d segd n ges n tɩ yɩɩda?
4 Lɛt-kãng vʋʋsem sõng sẽn vẽneg t’a gʋlsã pʋgẽ, a Poll sagla a tẽed-n-taasã tɩ b “bels sũ-sãoong rãmbã,” la b “sõng ka pãng rãmbã.” (1 Tesalonik rãmba 5:14) Sasa a to, a tẽega kiris-nebã tɩ neb nins “sẽn tar pãnga zɩ neb nins sẽn ka pãnga zɩɩbo.” (Rom dãmba 15:1) A Zezi me kõo noy sẽn tɩ loe ne ka pãng rãmbã sõngre. A Zezi sẽn deng n togs t’a yõkrã yʋngo a Pɩɛɛr da na n bas-a lame wã poore, a yeela a Pɩɛɛr woto: “F tẽebã sã n lɛɛg n wa a zĩigẽ, bɩ f keng f saam-biisa pɛlga.” Bõe yĩnga? Yaa bãmb me sẽn da na n wa bas a Zezi n dat sõngrã yĩnga. (Luk 22:32, Sebr Sõngo; Zã 21:15-17) Rẽnd Wẽnnaam yeta tõnd tɩ d nong neb nins me sẽn ka pãng tẽebã wɛɛngẽ, n ye pa lagemd ne kiris-neb tigingã. (Hebre dãmba 12:12) Bõe yĩng tɩ d segd n maan woto? Makr a yiib sẽn tar pãng a Zezi sẽn dɩk n kõt leokrã.
Pesg la lagf sẽn menem
5, 6. a) Mak-koees a yiib bʋs la a Zezi rɩk-yã? b) Bõe la mak-kãensã pukd a Zeova wɛɛngẽ?
5 Sẽn na yɩl n zãms a kɛlgdbã tɩ b bãng a Zeova sẽn tagsd to-to ne neb nins sẽn bʋdgã, a Zezi rɩka mak-koees a yiibu. A yembrã ra gomda pe-kɩɩm yelle. A Zezi yeelame: “Nin-bʋg n be yãmb sʋka n tar piis koabga, t’a yembr menem, t’a ka bas pis-wɛ la wɛ wã weoog pʋgẽ n kẽng n bao sẽn menema wã hal t’a wa yã-a? La yẽ sã n yã-a, a na n palg-a-la a bãgdẽ ne sũ-noogo. Yẽ sã n ta yiri a na n boola a zo-rãmba ne a yagsã n yeel-b yaa: Bɩ y maan sũ-noog ne maam tɩ mam yãa m pesga sẽn da menemã. Mam yeta yãmba tɩ sũ-noog na n zĩnda arzãn pʋgẽ woto me, yel-wẽna soab a yembr yam sẽn na n tek t’a kos sugra yĩnga n yɩɩd nin-tɩrs pis-wɛ la a wɛ sẽn ka baood sugr kosgã.”—Luk 15:4-7.
6 Makr a yiib-n-soabã ra gomda pag yelle. A Zezi yeelame: “Pʋg-bʋg n tar wakɩ koeems piiga t’a yembr menem, t’a ka tugl bugum n piis a roog n bao-a neer hali n yã-a? La yẽ sã n yã-a, a na n boola a zo-rãmba ne a yagsã n yeele: Bɩ y maan sũ-noog ne maam tɩ mam yãa m wakɩ koɛɛnga sẽn da menemã. Mam yeta yãmba tɩ sũ-noog bee Wẽnnaam malɛk rãmba sʋk woto me, yel-wẽna soab a yembr yam sã n tek t’a kos sugri.”—Luk 15:8-10.
7. Zãmsg a yiib bʋs la makr ning sẽn gomd pesgã la lagfã sẽn menema yellã kõt tõndo?
7 Bõe la mak-koees kãensã tõe n zãms tõndo? B wilgda tõnd 1) d sẽn segd n tall tagsg ning ne neb nins pãng sẽn boog tẽebã wɛɛngẽ wã la 2) tõnd sẽn segd n maan bũmb ning n sõng-ba. Bɩ d ges zĩ-kãensã neere.
B menemame la b tara yõodo
8. a) Pe-kɩɩmã ne pagã manesem yɩɩ wãn to, pesgã la lagfã sẽn menema? b) Bõe la b manesmã wilgd tõnd b sẽn da tagsd to-to ne bũmb ning b sẽn menemsã?
8 Makr a yiibã fãa pʋsẽ, bũmb n da menem, la ges-y bũmba rãmb manesem sẽn yɩ to-to. Pe-kɩɩmã pa yeel tɩ: ‘Pe-yɛng yaa bõe piis 99 m sẽn ket n tarẽ wã taoore? Pe-kãngã pa tɩlae ne-m ye.’ Pagã me pa yeel tɩ: ‘Bõe yĩng tɩ m na n maan yɩɩr ne lagf a yembre? Wɛ wã m sẽn ket n tarã sek-m lame.’ Pe-kɩɩmã pa tags woto ye, a baoa a pesgã sẽn menema wa ra yaa yẽ a yembr bal la a ra tara. Tɩ pagã me bao a lagf ning sẽn menema wa yaa rẽ bal la a ra tara. Makr a yiibã fãa pʋsẽ, bũmb ning sẽn da menema ra ket n tara yõod wʋsg a soaadã nifẽ. Yaa bõe la rẽ wilgda?
9. Bõe la pe-kɩɩmã ne pagã yɩɩr makda?
9 Ges-y a Zezi sẽn baas a goama to-to zĩis a yiiba fãa pʋsẽ: ‘Mam yeta yãmba tɩ sũ-noog na n zĩnda saasẽ woto me, yel-wẽna soab a yembr yam sẽn na n tek t’a kos sugra yĩnga n yɩɩda,’ la “mam yeta yãmba tɩ sũ-noog bee Wẽnnaam malɛk rãmba sʋk woto me, yel-wẽna soab a yembr yam sã n tek t’a kos sugri.” Woto yĩnga, pe-kɩɩmã ne pagã yɩɩr kɩtdame tɩ d bãng a Zeova ne malɛgsã tagsg bilfu. Wala bũmb ning sẽn da menemã sẽn da tar yõod wʋsg ne pe-kɩɩmã la ne pagã, woto me, neb nins sẽn bas n ye pa lagemd ne Wẽnnaam nin-buiidã ket n tara yõod wʋsg a Zeova nifẽ. (Zeremi 31:3) Nin-kãensã tõeeme n pa tar pãng tẽebã wɛɛngẽ ye, la rẽ pa wilgd tɩlae tɩ b yaa tõtb ye. Baa ne b sẽn pa tar pãngã, tõe tɩ b ket n tũuda a Zeova noyã zĩis kẽere. (Yɩɩl Sõamyã 119:176; Tʋʋma 15:29) Rẽnd wa pĩnd wẽndẽ wã, a Zeova pa yãgd n na n ‘dig-b ye.’—2 Rĩm dãmba 13:23.
10, 11. a) D tagsg segd n yɩɩ wãn to ne neb nins sẽn zãag b mens ne tigingã? b) Sã n yaa ne a Zezi makr a yiibã, wãn to la d tõe n wilg tɩ b yell paka tõndo?
10 Wala a Zeova la a Zezi, neb nins sẽn ka pãng n ye pa wat kiris-neb tigingẽ wã yell paka tõnd me. (Ezekɩɛll 34:16; Luk 19:10) D geta ned sẽn pa tar pãng tẽebã wɛɛngẽ wa pesg sẽn menem, la pa wala ned sẽn pa tõe n toeem ye. D pa yet tɩ: ‘Bõe yĩng tɩ ka pãng soab yell na n pak-ma? Yẽ pa tɩlae ne tigingã ye.’ Tõnd pa maand woto ye, la wala a Zeova, d geta neb nins sẽn zãag b mense, n yaool n dat n lebg n wa wã wa neb sẽn tar yõodo.
11 La wãn to la d tõe n wilg tɩ b yell paka tõndo? A Zezi makr a yiibã wilgdame tɩ d tõe n maana woto 1) n sɩd yãkd yam n sõnge, 2) n yaa sũ-bʋgsem dãmba, la 3) d modgd n na n sõng-b ne d sũur fãa. Bɩ d ges manesem kãensã ball-balle.
D yãk yam n sõnge
12. Bõe la gom-biis nins sẽn yet tɩ ‘kẽngame n tɩ bao sẽn menema wã’ wilgd tõnd pe-kɩɩma sẽn tagsd to-to?
12 Pipi makrã pʋgẽ, a Zezi yeelame tɩ pe-kɩɩma na n ‘kẽngame n tɩ bao sẽn menema wã.’ Pe-kɩɩmã sɩd yãka yam n na n n maan modgr sẽn na yɩl n yã pesg ning sẽn menema. Namsgã, yell sẽn tõe n paam-a wã, la zãrma pa gɩdg-a ye. La a kell n pẽdgame ‘hali n wa yã-a.’—Luk 15:4.
13. Wãn to la pĩnd wẽndẽ dap sẽn yɩ kɩs-sɩd dãmb ges ka pãng rãmbã yelle, la wãn to la d tõe n dɩk Biiblã mak-sõma kãensã togs-n-taare?
13 Woto me, nong n yaa pãng sẽn yɩɩd soabã n segd n yãk yam n tɩ sõng ned ning sẽn dat tɩ b keng a raoodã. Tẽn-kʋdem wẽndẽ dap nins sẽn yɩ kɩs-sɩd dãmbã ra wʋmda rẽ võore. Wala makre, rĩm a Saull biribl a Zonatã yãame t’a zo-nongr a Davɩɩd ra rata raood kengre, t’a ‘kẽng be n tɩ ges a Davɩɩd n keng a sũur n yeel-a tɩ Wẽnnaam na n sõng-a lame.’ (1 Sãmwɛll 23:15, 16) Yʋʋm kobs loogr poore, guvɛrneer a Nehemi sẽn yã tɩ Zʋɩf rãmbã sẽn ya a saam-biisã kẽer da komsa raoodo, yẽ me “yɩɩ tao-tao n yik n” daool-b tɩ ‘b tẽeg a Zeova yelle.’ (Nehemi 4:14, NW ) Rũndã-rũndã, tõnd me segdame n yãk yam n sõnge, n ‘yik n keng’ neb nins sẽn koms raoodã pɛlga. La ãnd n segd n maan woto tigingã pʋgẽ?
14. Kiris-neb tigingã pʋgẽ, ãnd n segd n tɩ sõng ka pãng rãmbã?
14 Sẽn tɩ yɩɩd fãa, kiris-neb kãsem dãmbã segd n ‘kengã nus nins sẽn ka pãngã la b keng rũm nins sẽn keoosdã,’ la b ‘yeel neb nins sẽn zoet rabeema yaa: Keng-y y sũyã la y ra zoe rabeem ye.’ (Ezai 35:3, 4; 1 Pɩɛɛr 5:1, 2) La bãng-y t’a Poll sẽn sagl tɩ b “bels sũ-sãoong rãmbã” la b “sõng ka pãng rãmbã” a ra pa gomd ne kãsem dãmbã bal ye, a ra gomda ne ‘a Zezi tẽedba fãa sẽn be Tesalonikã.’ (1 Tesalonik rãmba 1:1; 5:14) Rẽnd neb nins sẽn ka pãnga sõngr yaa zɩɩb sẽn zao kiris-nebã fãa zugu. Wala pe-kɩɩmã yell b sẽn gom makrã pʋgẽ wã, kiris-ned fãa segd n datame n kẽng n tɩ bao “sẽn menema wã.” Yaa sɩd tɩ yaa d sẽn na n lagem n tʋm ne kãsem dãmbã la d tõe n maan woto sõma n yɩɩge. Yãmb tõe n maana bũmb n sõng ned sẽn ka pãng yãmb tigingã pʋgẽ bɩ?
Yɩ-y sũ-bʋgsem soaba
15. Bõe yĩng tɩ pe-kɩɩmã tall manesem a woto ne a pesgã?
15 Pe-kɩɩmã sẽn wa n baas n yã pesgã sẽn menema a maana bõe? ‘A palg-a-la a bãgdẽ.’ (Luk 15:5) Ad woto sɩd be yamleoog wʋsgo! Tõe tɩ pesgã yeebame n maan dasem zĩis a sẽn pa mi pʋsẽ, tɩ gɩgma ra tõe meng n pʋg-a n yõke. (Zoob 38:39, 40) Sãmbg sẽn ka be, rɩɩbã kaalem kɩtame tɩ pesgã pãng booge. A pãngã pa sek a na tõog bõn-gɩdgdsã ne a meng pãng n tõog n lebg n wa bãgrẽ wã ye. Woto yĩnga, pe-kɩɩmã zõondedame n dɩk pesgã ne bʋgsem n pasg bõn-gɩdgdsã fãa n leb bãgrẽ wã. Wãn to la tõnd me tõe n maan wa pe-kɩɩm kãngã sẽn bao a pesgã sẽn menema?
16. Bõe yĩng tɩ d segd n maan wa pe-kɩɩma sẽn tall bʋgsem ning ne pesg sẽn menemã?
16 Ned sẽn ye pa lagemd tigingã tõe n yɛɛ tẽebã wɛɛngẽ. Wa pesg ning sẽn welg ne pe-kɩɩmã, tõe tɩ nin-kãng yeeba dũniyã sẽn tar yɛl wʋsgã pʋgẽ. A sẽn pa paamd koglg ning bãgrã sẽn yaa kiris-neb tigingã sẽn kõta yĩnga, a Sʋɩtãan sẽn ‘gõod wa gɩgemd sẽn kelemd n baood a sẽn tõe n paam a soab n sãama’ tõe n yɩɩ yell wʋsg ne-a n yɩɩd pĩndã. (1 Pɩɛɛr 5:8) Sẽn paase, a sẽn pa paamd tẽebã rɩɩbã kɩtame t’a pãngã booge. Woto, a pãnga paooda ne a na tõog zu-loees nins a sẽn na n segã a toor n lebg n wa tigingẽ wã. Rẽnd tẽebã wɛɛngẽ, d segd n zõond n zẽka ka pãng soabã ne bʋgsem, n tall-a n lebg n wa. (Galat dãmba 6:2) Wãn to la d tõe n maan woto?
17. Wãn to la d tõe n dɩk tʋm-tʋmd a Poll togs-n-taare, d sã n wa get ned sẽn ka pãnga?
17 Tʋm-tʋmd a Poll yeelame: “Ãnda pãng n paooge tɩ mam dẽnd ka paooge?” (2 Korẽnt dãmba 11:29; 1 Korẽnt dãmba 9:22) A Poll ra zoeta ka pãng rãmbã nimbãaneg me. D segd n talla nimbãan-zoeer woto me ne ka pãng rãmbã. Y sã n wa tɩ get kiris-ned pãng sẽn paood tẽebã wɛɛngẽ, kõ-y-yã bas-m-yam t’a tara yõod a Zeova nifẽ, la y kɩt t’a bãng tɩ Kaset rãmb a taabã nand-a-la wʋsgo. (1 Tesalonik rãmba 2:17) Kɩt-y t’a bãng tɩ Kaset rãmbã rat n sõng-a lame, la tɩ b rat n yɩɩ wala ‘ba-biig a toog wakate.’ (Yelbũna 17:17; Yɩɩl Sõamyã 34:19) Tõnd goama sẽn sɩd yit d sũurẽ wã tõe n kenga a raood bilf-bilf hal t’a wa tõog n lebg n wa bãgrẽ wã. Bõe la d segd n maan dẽ poore? Makr ning sẽn gomd pagã la a lagfã sẽn menema yellã wilgda tõnd d sẽn tõe n maanega.
Modg-y n sõng-b ne y sũur fãa
18. a) Makrã pʋgẽ bõe yĩng tɩ pagã ra ket n tẽed a lagfã yãabo? b) Wãn to la pagã modg ne a sũur fãa, la baasa wãn to?
18 Pag ning sẽn menems a lagfã miime tɩ baa lagfã yãab sã n yaa toogo, a tõe n yã-a lame. Lagfã sã n da lʋɩya moogẽ, bɩ kʋɩl-zulung sẽn tar bɛgd pʋgẽ, a ra tõe n tagsame tɩ saagr ye kae ye. La a sẽn mi tɩ lagfã segd n bee zĩig ning a roogẽ wã t’a tõe n yã-a wã, a sɩngame n modgd n vaeesd pẽgsã fãa sõma n baood-a neere. (Luk 15:8) Pipi wã, a widga fɩtl tɩ vẽneg a roogã sẽn yaa likã. Rẽ poore, a pɩɩsa roogã ne saag n tẽed tɩ lagfã na maan bʋrg t’a wʋme. Sẽn na n baase, a maaga a yĩng n vaees pẽgsã fãa hal t’a fɩtlã bugum wa tʋʋs lagfã t’a yãgd pɩlʋ-pɩlʋ. Pagã sẽn modg ne a sũur fãa wã pa yɩ zaalem ye.
19. Makrã pʋgẽ pagã sẽn bao lagfã to-to wã zãmsda tõnd bõe ka pãng rãmbã sõngr wɛɛngẽ?
19 Wala makrã pʋgẽ yel-kãngã sẽn tẽegd tõndã, Gʋlsg Sõamyã sẽn wilg tɩ d segd n sõnga kiris-ned sẽn yaa ka pãng soabã pa bũmb d sẽn pa tõe n maan ye. D miime tɩ rẽ me baoodame tɩ d maan modgre. Sɩda, tʋm-tʋmd a Poll yeela Efɛɛz kãsem dãmbã tɩ: “Ne tʋʋmd a woto a zemsame tɩ y tʋm n sõng neb nins sẽn ka pãngã.” (Tʋʋma 20:35a) Ning-y y yamẽ tɩ pagã pa gilg yaar doogã pʋgẽ n yi ka n kẽng ka woto bal n tõog n yã lagfã ye. Ayo, a tõogame, bala a baoa neer “hali n wa yã-a.” Woto me, tõnd sã n maood n na n sõng ned sẽn ka pãng tẽebã wɛɛngẽ t’a lebg n wa, d segd n modga wʋsg ne d sũur fãa rẽ yĩnga. Bõe la d tõe n maane?
20. Bõe la d tõe n maan n sõng ka pãng rãmbã?
20 Wãn to la d tõe n sõng ka pãng soab t’a tall tẽeb la mi-beoogo? Tõe tɩ yellã tɩɩm yaa b sẽn na n zãms Biiblã ne a soabã tõnd sebr a yembr sẽn zems ne-a pʋgẽ. Sɩda, d sã n maand Biibl zãmsg ne ned sẽn ka pãng tẽebã wɛɛngẽ, kõt-d-la sor tɩ d sõng-a sõma. Tʋʋmdã yel-gɛt n tõe n bãng ned ning sẽn tõe n kõ sõng-kãngã wã n yɩɩda. A tõe n wilga gom-zut nins b sẽn tõe n zãmse, la sebr ning zãmsg sẽn na n sõng n yɩɩdã. Wala makrã pʋgẽ pagã sẽn tʋm a tʋʋmdã ne tʋʋm te-sõama wã, rũndã-rũndã, tõnd me tara tʋʋm teed sẽn sõngd tõnd tɩ d tʋm tʋʋmd ning Wẽnnaam sẽn bobl-dã, sẽn yaa sõng ka pãng rãmbã. Tʋʋm te-paal a yiib sẽn yaa seb-paal n na n sõng-d wʋsg n paas d modgrã pʋgẽ. Yaa Adorez le seul vrai Dieu, la Approchez-vous de Jéhovah (Balem-y sɩd Wẽnnaam yɛngã, la Pẽneg-y a Zeova). *
21. Wãn to la ka pãng rãmbã sõngr nafd neba fãa?
21 Ka pãng rãmbã sõngr nafda nebã fãa barka. B sẽn sõngd a soabã paamda sũ-noogo, a sẽn lebg n lagem ne zo-rãmb hakɩkã yĩnga. D paamda sũ-noog ning kũun maaneg sẽn wat ne wã. (Luk 15:6, 9; Tʋʋma 20:35b, Sebr Sõngo) Tigingã fãa bɩta nonglem pʋgẽ, a ned fãa sã n get a taabã yell ne nonglem. Sẽn tɩ yɩɩd fãa, pẽgrã la waoogrã fãa yaa Pekɩɩmb sẽn tar nonglem a Zeova la a Zezi n so, bala b tẽng zug sõgen dãmbã rɩka bãmb sẽn tʋll n sõng ka pãng rãmbã togs-n-taar n wilg rẽ b yel-manesma pʋgẽ. (Yɩɩl Sõamyã 72:12-14; Matɩe 11:28-30; 1 Korẽnt dãmba 11:1; Efɛɛz rãmba 5:1) Rẽnd d sɩd tar bʋʋm sẽn sek n na n ket n ‘nong taaba’!
[Tẽngr note]
^ sull 20 A Zeova Kaset rãmbã n yiis seb-kãensã.
Y tõe n wilga a võor bɩ?
• Bõe yĩng tɩ nonglmã wilgr tar yõod wʋsg ne tõnd ned kam fãa?
• Bõe yĩng tɩ d segd n nong ka pãng rãmbã me?
• Bõe la makr nins sẽn gomd pesgã la lagfã sẽn menema yellã zãmsd tõndo?
• Bõe la d tõe n maan vẽeneg n sõng ka pãng soaba?
[Zãmsgã sogsgã]
[Foto rãmba, seb-neng 24]
D yãkda yam n sõng ka pãng rãmbã, ne sũ-bʋgsem la ne d sũur fãa
[Foto, seb-neng 25]
Ka pãng rãmbã sõngr nafda neba fãa